Ŋaawolɔi Ní He Esa—Amɛji Jɔɔmɔ Kɛha Amɛnyɛmimɛi
“Ní maŋɔ okojolɔi Iɛ mahao ekoŋŋ tamɔ tsutsu lɛ, kɛ ojinafoi Iɛ hu tamɔ blema lɛ.”—YESAIA 1:26.
1, 2. (a) Abɛi 12:15 kɛ 19:20 tsɔɔ sɛɛnamɔ ni yɔɔ ŋaawoo he lɛ yɛ mɛɛ gbɛ nɔ? (b) Klɛŋklɛŋ lɛ, mɛni he hiaa kɛ wɔɔnyɛ wɔkpɛlɛ ŋaawoo nɔ, ni mɛɛ niiashikpamɔ tsɔɔ enɛ mli?
FƆLƆI Kristofoi komɛi abiyoo ji Terri. Beni eyaa skul lɛ, no mli lɛ, eyɛ enaanyo ko ni Iɛ hu “eyɔɔ anɔkwale lɛ mli.” Shi Terri yoo akɛ kɛmiiba amɛ skul nikasemɔ lɛ naagbee lɛ, enaanyo lɛ nyaaa ehemɔkɛyeli lɛ he taakɛ efeɔ tsutsu lɛ. Yɛ be mli ni amɛtsa nɔ kɛtee kɔlegi lɛ, enaanyo lɛ bafee mɔ ni efɔɔɔ Kristofoi akpeei yaa ni ebɔi Buu Mɔɔ Asafo lɛ he tɔmɔ taomɔ. Terri sɔle waa yɛ enaanyo nɛɛ he, ni etee nɔ ewo lɛ ŋaa ni ehi shi akɛ mɔ ni he wa akɛ Kristofonyo. Yɛ naagbee lɛ, Terri mɔdɛŋbɔɔ lɛ ye omanye Beni amɛshɛ klas ni ji nyɔŋma lɛ, enaanyo nɛɛ ebɔi kpeei yaa ni eyaa yɛ be fɛɛ mli ni yɛ naagbee lɛ, abaptisi lɛ. Mɛɛ jɔɔmɔ enɛ ji kɛha lɛ! Mɛɛ nyɔmɔwoo enɛ ji kɛha enaanyo obalayoo fioo nɛɛ!
2 Yɛ niiashikpamɔ nɛɛ hewɔ lɛ, ani mɔ ko aaaje ŋwane yɛ bɔ ni ehe hiaa akɛ Kristofoi aaawo amɛhe amɛhe ŋaa yɛ suɔmɔ mli yɛ be kɛ bei amli lɛ he? Biblia lɛ woɔ wɔ hewalɛ akɛ: “Bo ŋaawoo toi, ni okpɛlɛ tsɔsemɔ, koni wɔsɛɛ ni ole nii.” (Abɛi 19:20; 12:15) Terri naanyo lɛ bo nakai ŋaawoo lɛ toi. Ni mɛni baaba, eji Terri bɛ suɔmɔ, hekamɔ kɛ ekaa ni ekɛaaya nɔ eye ebua enaanyo lɛ kɛtsɔ afii lɛ amli kulɛ? Hɛɛ, dani wɔteŋ mɔ fɛɛ mɔ ‘aaabo kamɔ toi’ lɛ, esa akɛ ŋaawolɔ ahi shi. Namɔ esa akɛ mɔ nɛɛ aji?
Ŋaawoo—Namɔ Kɛbaaha?
3. Namɛi Yehowa kɛha ni amɛkɛ ŋaawoo aha yɛ Kristofoi asafo lɛ mli yɛ ebe naa pɛpɛɛpɛ?
3 Yehowa Nyɔŋmɔ ewo shi akɛ ekɛ ŋaawolɔi loo ajinafoi baaha yɛ wɔbe nɛɛ mli. Ekɛɛ akɛ: “Ni mikɛ . . ŋaawolɔi aaaba abaha ekoŋŋ tamɔ tsutsu lɛ.” (Yesaia 1:26, NW) Anaa nɛkɛ shiwoo nɛɛ mlibaa titri lɛ, yɛ onukpai ni ahala amɛ yɛ Kristofoi asafo lɛ mli lɛ mli. Ŋaawoo tamɔ nitsumɔ ko, ni onukpai lɛ titri ji mɛi ni “le nitsɔɔmɔ.” (1 Timoteo 3:2) Ekolɛ onukpai lɛ titri ji mɛi ni yɔɔ bɔfo Paulo jwɛŋmɔ mli yɛ be mli ni ekɛɛ akɛ: “Kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ nyɛsaa nakai mɔ lɛ ekoŋŋ yɛ mlijɔlɛ mumɔ mli” lɛ. (Galatabii 6:1) Shi ani onukpai lɛ pɛ ji mɛi ni baanyɛ ni amɛkɛ ŋaawoo aha?
4, 5. (a) Mɛɛ Ŋmalɛ naa nɔkwɛmɔ nii yɔɔ ni tsɔɔ akɛ jeee onukpai pɛ ji mɛi ni baanyɛ amɛkɛ ŋaawoo aha? (b) Mɛɛ ŋmɛnɛŋmɛnɛ beaŋ shihilɛi komɛi yɔɔ ni tsɔɔ bɔ ni Kristofoi komɛi baanyɛ ni amɛkɛ ŋaawoo aha shi jeee onukpai lɛ pɛ?
4 Dabi. Terri jeee onukpa, ni kɛlɛ eŋaawoo lɛ wo yibii kpakpai yɛ naagbee. Agbɛnɛ kaimɔ akɛ Siria asafoiatsɛnukpa Naeman hu yɛ. Etsu ŋaawoo kpakpa ni jɛ Israel gbekɛyoo fioo ko ŋɔɔ lɛ he nii ni agbɛnɛ ebo ŋaawoo ni etsuji lɛ wo lɛ lɛ toi. Ahere David koni ekaye lá yi sɔ yɛ nii ni Nabal ŋa Abigai tsu lɛ oya lɛ hewɔ. Ni obalanyo Elihu hu yɛ ŋaawoo kpakpa ko kɛha Hiob kɛ ‘emiishɛjelɔi’ etɛ lɛ.—1 Samuel 25:23-35; 2 Maŋtsɛmɛi 5:1-4, 13, 14; Hiob 32:1-6.
5 Nakai nɔŋŋ hu ŋmɛnɛ, ŋaawoo jeee hegbɛ pɛ ni onukpai lɛ yɔɔ. Fɔlɔi woɔ amɛbii aŋaa daa. Obalaŋtai tamɔ Terri yeɔ omanye yɛ ŋaawoo ni amɛkɛhaa amɛtipɛŋfoi lɛ mli. Ni Biblia lɛ jeɔ gbɛ ewoɔ nyɛmimɛi yei ni amɛdara yɛ mumɔŋ lɛ hewalɛ ni “amɛfee mɛi ni tsuɔ nii kpakpai,” titri lɛ, mɛi ni tsɔɔ obalayei ni yɔɔ asafo lɛ mli lɛ anii. (Tito 2:3-5) Yɛ anɔkwale mli lɛ, wɔ fɛɛ wɔyɛ hegbɛ akɛ wɔɔye wɔbua wɔhe wɔhe yɛ nɛkɛ gbɛ nɔ. Bɔfo Paulo kɛɛ: “Nyɛtsea nyɛtsui nyɛŋmɛa nyɛmli, ni mɔ aha enaanyo nane amɔ shi, taakɛ bɔ nɔŋŋ ni nyɛfeɔ lɛ.”—1 Tesalonikabii 5:11.
Otii Ni Kristofoi Aŋaawoo Tsuɔ He Nii
6. Kristofoi aŋaawoo tsuɔ mɛɛ otii komɛi ahe nii?
6 Mɛni ji otii ni Kristofoi aŋaawoo tsuɔ he nii lɛ ekomɛi? Enɛɛmɛi ji ni eye ebua mɔ ko ni eshwere ni eya nɔ eya ehiɛ yɛ gbɛ ni ja lɛ nɔ, koni akɛtsu naagbai ahe nii, aye haomɔi anɔ kunim ni ekolɛ ajaje gbɛ ni ejaaa ko. Paulo wie ŋaawoo lɛ ekomɛi ahe yɛ be mli ni ewo Timoteo ŋaa ni ‘eka hiɛ, ewo ŋaa, ebɔ kɔkɔ yɛ tsuishitoo kɛ nitsumɔ fɛɛ mli’ lɛ he lɛ. (2 Timoteo 4:1, 2) Eji hesaa diɛŋtsɛ akɛ aaawo mɔ ko ŋaa bɔ ni eeenu shishi ni enaaa he mlifu.
7, 8. (a) Mɛɛ shihilɛi komɛi baa ni haa akpaa ŋaawoo gbɛ yɛ Kristofoi asafo lɛ mli? (b) Mɛɛ bei komɛi baa ni Kristofonyo ko kpaaa ŋaawoo gbɛ shi kɛlɛ ehe miihia lɛ hu lɛ?
7 Mɛɛ be esa ákɛ akɛ ŋaawoo aha? Fɔlɔi naa hegbɛ amɛwoɔ amɛbii aŋaa daa, ni bii lɛ hu kpaa enɛ gbɛ kɛ́ amɛsumɔɔ loo amɛsumɔɔɔ. (Abɛi 6:20; Efesobii 6:4) Yɛ asafo lɛ mli hu lɛ, nikaselɔ lɛ kpaa ŋaawoo gbɛ yɛ be mli ni eha wiemɔ ko yɛ Teokrase Sɔɔmɔ Skul lɛ mli egbe naa lɛ. Ni Maŋtsɛyeli shiɛlɔ hee hu kpaa yelikɛbuamɔ kɛ ŋaawoo gbɛ yɛ be mli ni eshwereɔ kɛyaa dalɛ mli akɛ Kristofonyo sɔɔlɔ lɛ. (1 Timoteo 4:15) Yɛ bei komɛi amli lɛ, aŋkroaŋkroi ni taoɔ yelikɛbuamɔ kɛ ŋaawoo lɛ yaa onukpai loo mɛi krokomɛi ni yɔɔ asafo lɛ mli lɛ aŋɔɔ.
8 Shi eshɛɔ be hu ni ehe bahiaa ni akɛ ŋaawoo aha mɛi ni kpaaa enɛ gbɛ aloo mɛi ni sumɔɔɔ lɛ. Ekolɛ mɔ ko miilaaje ekaa ni eyɔɔ yɛ Yehowa sɔɔmɔ mli lɛ, ‘ni eekpalaŋ kɛmiiya’ taakɛ Terri naanyo lɛ fee be ko lɛ. (Hebribii 2:1) Ekolɛ béi ko ni mli wa ka mɛi enyɔ ko ni yɔɔ asafo lɛ mli lɛ ateŋ. (Filipibii 4: 2) Aloo ekolɛ yelikɛbuamɔ he miihia mɔ ko yɛ hesaamɔ loo atade ni awoɔ yɛ gbɛ kpakpa nɔ lɛ mli, aloo nanemɛi loo lalai amli halamɔ nɛkɛ mli.—1 Korintobii 15:33;1 Timoteo 2:9.
9, 10. (a) Mɛni hewɔ Kristofoi aŋaawoo ni akɛhaa lɛ biɔ ekaafeemɔ lɛ? (b) Mɛni hewɔ ni yɛ fɛɛ sɛɛ lɛ, esa akɛ Kristofonyo lɛ ŋaawoo aha kɛ́ ehe miihia lɛ?
9 Beni gbalɔ Hanani kɛ ŋaawoo ha Yuda Maŋtsɛ Asa lɛ, bɔ ni Asa mli fu nɛkɛ ŋaawoo nɛɛ sɔŋŋ ha lɛ ha “ewa lɛ tsuŋ.” (2 Kronika 16:7-10) Esa akɛ mɔ ko afee mɔ ni yɔɔ ekaa babaoo dani enyɛ ewo maŋtsɛ ko ŋaa yɛ nakai gbii lɛ amli. Ŋmɛnɛ, ehe baahia ni ŋaawolɔi afee mɛi ni yɔɔ ekaa ejaakɛ ŋaawoo kɛhamɔ baanyɛ atee mlifu shi kɛjɛ shishijee Kristofonyo ko ni yɔɔ niiashikpamɔ babaoo kpoo akɛ ekɛ ŋaawoo ni he hiaa aaaha obalanyo ko ni ekɛ lɛ bɔɔ. Mɛni hewɔ? Etsɔɔ mli akɛ: “Wɔji nanemɛi kpakpai bianɛ, ni miisumɔ ni mahiɛ mli nakai!” Shi yɛ anɔkwale mli lɛ, ni oootsi yelikɛbuamɔ naa yɛ be mli ni ehe hiaa waa lɛ jeee naanyo kpakpa he okadi.—Abɛi 27:6; Okɛto Yakobo 4:17 he.
10 Yɛ anɔkwale mli lɛ, niiashikpamɔ etsɔɔ akɛ kɛji akɛ ŋaawolɔ ko he esa lɛ, enyɛɔ ehaa mlifu shi, ni enine shɛɔ oti ni edamɔɔ nɔ ekɛ ŋaawoo lɛ haa lɛ nɔ. Mɛni ebiɔ dani mɔ ko afee ŋaawolɔ ni he esa? Bɔni afee ni wɔha enɛ hetoo lɛ nyɛhaa wɔsusua nɔkwɛmɔ nii enyɔ ko he, ekome hi ni ekroko lɛ ehiii.
Paulo—Ŋaawolɔ Ni He Esa
11. Mɛni hewɔ Korintobii lɛ ateŋ mɛi pii kpɛlɛ Paulo ŋaawoo lɛ nɔ, eyɛ mli akɛ yɛ bei komɛi amli lɛ, ewieɔ yɛ faŋŋ mli lɛ?
11 Bɔfo Paulo na hegbɛ babaoo ekɛ ŋaawoo ha, ni yɛ bei komɛi amli lɛ, nibii ni ewieɔ lɛ mli wa naakpa. (1 Korintobii 1:10-13; 3:1-4; Galatabii 1:6; 3:1) Ní kɛlɛ, eŋaawoo lɛ mɔɔ shi, ejaakɛ mɛi ni ekɛ nɛkɛ ŋaawoo nɛɛ haa amɛ lɛ le akɛ Paulo sumɔɔ amɛ. Taakɛ ekɛɛ Korintobii lɛ: “Shi mitsuiŋ amanehulu kɛ fimɔ babaoo mli miŋmanyɛ yɛ, kɛtsɔ yaafonui babaoo hu mli, jeee ni nyɛwerɛ aho nyɛhe hewɔ, shi moŋ ni nyɛna nɔ suɔmɔ babaoo ni misumɔɔ nyɛ.” (2 Korintobii 2:4) Korintobii lɛ ateŋ mɛi pii kpɛlɛ Paulo ŋaawoo lɛ nɔ ejaakɛ amɛle akɛ ekɛha ni pɛsɛmkunya yiŋtoi komɛi bɛ sɛɛ. Ejaakɛ “suɔmɔ . . . epeleee lɛ diɛŋtsɛ enɔ.” Agbɛnɛ hu, amɛyɛ hekɛnɔfɔɔ akɛ jeee emli ni efu amɛ lɛ hewɔ ewieɔ lɛ, ejaakɛ “suɔmɔ . . . mli wooo la, eniŋŋ efɔŋ he.”—1 Korintobii 13:4, 5.
12. Mɛɛ su ji nɔ ni baaha efee mlɛo aha Kristofonyo ŋaawolɔ lɛ koni eye omanye? Feemɔ enɛ he nɔkwɛmɔ nɔ.
12 Ŋmɛnɛ hu, ewaaa akɛ wɔɔkpɛlɛ ŋaawoo ni mli wa nɔ, kɛji akɛ wɔle akɛ mɔ ni woɔ wɔ ŋaa lɛ sumɔɔ wɔ ni jeee emli ni efu hewɔ ni ewieɔ, ni ebɛ pɛsɛmkunya yiŋtoo ko hu. Akɛ nɔkwɛmɔ nɔ lɛ, kɛji akɛ be ni onukpa ko kɛ obalaŋtai wieɔ yɛ asafo lɛ mli ji be mli ena hegbɛ ni ekɛaakã amɛhiɛ loo ewie eshi amɛ lɛ, ewaaa kwraa akɛ obalaŋtai lɛ aaanu he akɛ, ekɛ amɛ ena. Shi kɛji akɛ onukpa lɛ ji mɔ ni kɛ obalaŋtai lɛ hiɔ shi jogbaŋŋ hu? Kɛji akɛ ekɛ amɛ yaa shiɛmɔ, amɛnyɛɔ abɛŋkɛɔ lɛ yɛ Maŋtsɛyeli Asa lɛ nɔ, ni ewoɔ amɛ hewalɛ ni ekɛ amɛ wieɔ amɛnaagbai hiɛnɔkamɔi, yiŋkɔshikɔshifeemɔi ahe, ekolɛ efɔɔ amɛ nine kɛbaa eshia (ni amɛfɔlɔi le he eko) yɛ be kɛ bei amli lɛ? Kɛkɛ lɛ kɛ́ eba akɛ esa akɛ ewo amɛ ŋaa lɛ, obalaŋtai lɛ baakpɛlɛ nɔ babaoo ejaakɛ amɛle akɛ ebaa kɛjɛɔ naanyo ko ŋɔɔ.
Mlihilɛ Kɛ Heshibaa
13. (a) Fɛɛ sɛɛ lɛ, esa akɛ Kristofoi aŋaawoo adamɔ mɛni nɔ? (b) No hewɔ lɛ, mɛni esa akɛ mɛi ni kɛ ŋaawoo haa yɛ Kristofoi asafo lɛ mli lɛ akwa efeemɔ?
13 Yiŋtoo kroko hu yɛ ni no ha Paulo ŋaawoo lɛ ye omanye lɛ. Ekɛ ehe fɔ ŋwɛi nilee nɔ, jeee lɛ diɛŋtsɛ esusumɔi. Taakɛ ekai ŋaawolɔ Timoteo lɛ: “Ŋmalɛ fɛɛ ni jɛ Nyɔŋmɔ mumɔŋ lɛ ehi ha nitsɔɔmɔ kɛ hiɛkamɔ kɛ mɔ saamɔ kɛ tsɔsemɔ ni yɔɔ jalɛ mli.” (2 Timoteo 3:16; okɛto 1 Korintobii 2:1, 2 he.) Ŋmɛnɛ hu, ŋaawolɔi ni ji Kristofoi kɛ amɛŋaawoo lɛ damɔɔ Ŋmalɛi lɛ anɔ. Eji anɔkwale akɛ yɛ weku lɛ mli lɛ, fɔlɔi efɔɔɔ Biblia lɛ gbelemɔ yɛ be fɛɛ mli yɛ be mli ni amɛwoɔ amɛbii lɛ aŋaa. Shi kɛlɛ, kɛji akɛ fɔlɔi Kristofoi miiwo toiboo, hetsemɔ, mɛi krokomɛi ahesusumɔ, be ni akɛaatsu nii, aloo nɔ kroko he ŋaa lɛ, esa akɛ amɛna Ŋmalɛ nɔdaamɔ nɔ amɛha nɔ ni amɛkɛɔ lɛ. (Efesobii 6:1; 2 Korintobii 7: 1; Mateo 7:12; Jaj. 3:1-8) Esa akɛ wɔkwɛ jogbaŋŋ koni wɔkanyɛ wɔ diɛŋtsɛ wɔsusumɔi loo nibii ni wɔsumɔɔ nɔ wɔwo mɛi krokomɛi amli yɛ asafo lɛ mli. Esa akɛ onukpai lɛ hu akwa Ŋmalɛ lɛ ni amɛaatsɔmɔ ni amɛtamɔ nɔ ni amɛmiifi jwɛŋmɔ ko ni amɛhiɛ lɛ sɛɛ waa. (Okɛto Mateo 4:5, 6 he.) Esa akɛ Biblia mli yiŋtoo ko ni ji anɔkwale ni no nɔ adamɔɔ akɛ ŋaawoo fɛɛ ŋaawoo haa lɛ aje kpo faŋŋ.—Lala 119:105.
14, 15. (a) Tsii su kroko ni haa efeɔ mlɛo akɛ aaakpɛlɛ ŋaawoo nɔ lɛ ta. (b) Mɛni hewɔ ehe hiaa akɛ ŋaawolɔ lɛ aaana su ni tamɔ nɛkɛ lɛ?
14 Ŋaawoo mɔɔ shi hu kɛji akɛ akɛha yɛ mlijɔlɛ mumɔ mli. Paul le enɛ. Ní no hewɔ ni yɛ be mli ni ewieɔ mɔ ni tɔ̃ɔ dani ehiɛ baa ehe nɔ lɛ he lɛ, ewo mɛi ni he esa lɛ hewalɛ ni amɛsaa “nakai mɔ lɛ ekoŋŋ yɛ mlijɔlɛ mumɔ mli” lɛ. (Galatabii 6:1) Agbɛnɛ ewo Tito hu ŋaa ni ekai amɛ ni “amɛkawie mɔ ko he efɔŋ, amɛkabe; shi moŋ, amɛfee kpoo, ni amɛkɛ amɛhe atsɔɔ mɔ fɛɛ mɔ akɛ amɛhe jɔ.”—Tito 3:1, 2; 1 Timoteo 6:11.
15 Mɛni hewɔ mlijɔlɛ he hiaa lɛ? Ejaakɛ henumɔi ni anyɛɛɛ aye nɔ lɛ tsɛŋeɔ mɔ. Mlifu wiemɔi teɔ mlifu wiemɔi babaoo shi, ni anyɛɛɛ asusu saji ni mli wawai ahe kɛji akɛ mlifu lɛ naa wa. Kɛji akɛ mɔ ni awoɔ lɛ ŋaa lɛ kɛ mlifu kpee bo po lɛ, enɛ jeee nɔ ni esa akɛ ŋaawolɔ lɛ adamɔ nɔ ni lɛ hu efee nakai nɔŋŋ. Shi moŋ, ŋaawolɔ lɛ diɛŋtsɛ mlijɔlɛ su lɛ baanyɛ aye abuɔ ni eha nibii ahe ajɔ. “Naajɔlɛ hetoo kuɔ mlila naa.” (Abɛi 15:1) Enɛ ji anɔkwale kɛji akɛ ŋaawolɔ lɛ ji fɔlɔ, onukpa aloo mɔ kroko.
16. Mɛni hewɔ esa akɛ mɔ ni kɛ ŋaawoo haa lɛ ajie bule kpo yɛ be fɛɛ mli lɛ?
16 Yɛ naagbee lɛ, susumɔ nɔ ni Paulo kɛɛ onukpa Timoteo ni edako tsɔ lɛ he: “Kaafamɔ onukpa ko, shi owie otsɔɔ lɛ akɛ tsɛ, obalahii hu akɛ nyɛmimɛi; yei onukpai Iɛ akɛ nyɛmɛi; obalayei lɛ hu akɛ nyɛmimɛi yei yɛ hetsemɔ fɛɛ mli.” (1 Timoteo 5:1, 2) Mɛɛ ŋaawoo ni nɔ bɛ nɛ! Susumɔ bɔ ni yoo ko ni eda yɛ afii amli baanu he aha kɛji akɛ obalanyo ko ni ji onukpa, ni ekolɛ eji obalanyo bɔ ni yoo nɛɛ aaanyɛ afɔ lɛ ákɛ lɛ diɛŋtsɛ ebinuu wo lɛ ŋaa ni etsɔ mli ekɛkã ehiɛ waa aloo yɛ gbɛ ni bulɛ bɛ mli nɔ lɛ he okwɛ. Ebaahi moŋ akɛ ŋaawolɔ lɛ aaahe be ni esusu sane nɛɛ he: ‘Kɛ misusu gbɔmɔ nɛɛ su kɛ baŋ kɛ afii ni eye lɛ he lɛ, mɛni ji gbɛ ni suɔmɔ yɔɔ mli ni baamɔ shi fe fɛɛ nɔ ni matsɔ ni mikɛ ŋaawoo nɛɛ aha? Kɛ miyɛ eshihilɛ lɛ mli lɛ, mɛɛ gbɛ nɔ masumɔ ni atsɔ nɔ akɛ mi awie?—Luka 6: 31; Kolosebii 4:6.
Farisifoi Lɛ Aŋaawoo
17, 18. Mɛni ji yiŋtoo kome hewɔ ni ŋaawoo ni Farisifoi lɛ kɛha lɛ yeee ebuaaa Iɛ?
17 Agbɛnɛ tsi ohe kɛjɛ Paulo ŋaawoo kpakpa he nɔkwɛmɔ nɔ lɛ he ni osusu nɔkwɛmɔ nɔ fɔŋ lɛ he—Yudafoi ajamɔ mli hiɛnyiɛlɔi ni hi shi yɛ Yesu gbii lɛ amli lɛ nɔ lɛ. Amɛkɛ ŋaawoo babaoo haa, shi maŋ lɛ, naaa he sɛɛ. Mɛni hewɔ?
18 Yiŋtoi pii yɛ. Ekome ji akɛ, susumɔ be mli ni Farisifoi lɛ kã Yesu hiɛ akɛni ekaselɔi lɛ fɔɔɔ amɛdɛ dani amɛyeɔ nii lɛ he okwɛ. Eji anɔkwale akɛ nyɛmimɛi pii woɔ amɛbii aŋaa ni amɛfɔ amɛdɛ dani amɛyɛ nii, ejaakɛ eji falefalefeemɔ nifeemɔ, ni abaanyɛ ajie enɛ yi babaoo. Shi jeee falefalefeemɔ he Farisifoi lɛ jwɛŋɔ titri lɛ, kɛha amɛ lɛ, dɛfɔmɔ ji blemasane, ni amɛhao, akɛni Yesu kaselɔi lɛ enyiɛɛɛ nɛkɛ blemasane nɛɛ sɛɛ. Shi, taakɛ Yesu tee nɔ etsɔɔ lɛ, naagbai wujiwuji yɛ Israel ni esa akɛ nomɛi ahe moŋ amɛjwɛŋ Akɛ nɔkwɛmɔ nɔ lɛ, amɛteŋ mɛi komɛi kɛ Farisifoi ablemasaji lɛ miitsu nii akɛ gbɛ ni amɛaatsɔ nɔ amɛkwa Kitai Nyɔŋma lɛ mli nɔ ni ji enumɔ lɛ toiboo: “Wo onyɛ kɛ otsɛ.” (2 Mose 20:12; Mateo 15:1-11) Nɔ ni yɔɔ awerɛho ji akɛ woloŋmalɔi lɛ kɛ Farisifoi lɛ kɛ amɛhe ewo eshishitsɔɔmɔ fitsofitso mli akɛ amɛkuɔ amɛhiɛ amɛshwieɔ “Mla lɛ mli nii ni he jaraa ni ji kojomɔ kɛ mɔbɔnalɛ kɛ anɔkwayeli lɛ nɔ.—Mateo 23:23, NW.
19. Te ŋmɛnɛŋmɛnɛ beaŋ Kristofoi aaafee tɛŋŋ akwa tsɔne ni ji pɛsɛmkunya nibii asɛɛdii lɛ mli ni amɛaagbee lɛ?
19 Esa akɛ ŋaawolɔi ni yɔɔ ŋmɛnɛ lɛ akwɛ jogbaŋŋ ni amɛkatɔ̃ yɛ nɛkɛ gbɛ nɔ. Esa akɛ amɛkwa pɛsɛmkunya nibii asɛɛdii, ni amɛkɛ amɛhe aaawo eshishitsɔɔmɔ fitsofitso mli akɛ amɛhiɛ aaakpa “nibii ni he jaraa lɛ anɔ.” Awoɔ wɔ ŋaa akɛ “Nyɛnaanaa nyɛhaa nyɛhe” yɛ saji bibii amli. (Kolosebii 3:12, 13) Nyɛmɔ ni akɛaayoo be mli ni esa akɛ akwa sane ko he ŋwanejee kɛ be mli ni ŋaawoo he hiaa diɛŋtsɛ lɛ ji nɔ ko ni yeɔ buaa mɔ lɛ “mumɔŋ hesaai” aloo mumɔŋ gbɔmɔ ni eji.—Galatabii 6:1.
20. Mɛni hewɔ nɔkwɛmɔ nɔ ni mɔ ko diɛŋtsɛ aaafee lɛ he hiaa waa yɛ ŋaawoo ni akɛhaa lɛ mli lɛ?
20 Nɔ kroko yɛ ni ha nakai klɛŋklɛŋ afii oha lɛ mli jamɔ mli hiɛnyiɛlɔi lɛ aŋaawoo bafee nɔ ni sɛɛnamɔ bɛ he. Jwɛŋmɔ ni amɛhiɛ ji “feemɔ nɔ ni mikɛɔ lɛ, jeee nɔ ni mifeɔ lɛ.” Yesu wie amɛhe akɛ: “Nyɛ Mla tsɔɔlɔi lɛ, kpoo ha nyɛ! Akɛ nyɛkɛ jatsui ni teremɔ jaraa tereɔ mɛi, ni nyɛ diɛŋtsɛ lɛ, nyɛkɛ nyɛwao kome etaaa jatsui lɛ ahe.” (Luka 11:46) Kwɛ bɔ ni suɔmɔ bɛ enɛ mli kwraa ha. Ŋmɛnɛ, esa akɛ fɔlɔi, onukpai loo mɛi krokomɛi ni kɛ ŋaawoo haa lɛ akwɛ jogbaŋŋ akɛ amɛ diɛŋtsɛ lɛ ani amɛmiifee nɔ ni amɛkɛɔ mɛi krokomɛi akɛ amɛfee lɛ lo. Te wɔɔfee tɛŋŋ wɔwo mɛi krokomɛi ahewalɛ akɛ amɛfee ekaa yɛ sɔɔmɔ nitsumɔ lɛ mli kɛji akɛ wɔ diɛŋtsɛ lɛ wɔtooo Okadi kpakpa yɛ enɛ mli? Aloo te wɔɔfee tɛŋŋ wɔnyɛ wɔwo ŋaa wɔshi heloo gbɛfaŋ nibii asɛɛdii kɛji akɛ heloonaa nibii ji nɔ ni yeɔ wɔshihilɛ nɔ lɛ?—Romabii 2:21, 22: Hebribii 13:7.
21. (a) Farisifoi lɛ nyɛɔ gbɔmɛi lɛ anɔ yɛ mɛɛ gbɛ nɔ? (b) Esa akɛ Farisifoi lɛ anifeemɔ lɛ afee kɔkɔbɔɔ nɔ aha Kristofoi ŋaawolɔi yɛ mɛɛ gbɛ nɔ?
21 Yudafoi ni ji hiɛnyiɛlɔi lɛ hu yeee omanye akɛ ŋaawolɔi, ejaakɛ amɛnyɛɔ mɔ nɔ. Be ko lɛ, amɛtsu mɛi ni amɛyamɔ Yesu. Beni Yesu nitsɔɔmɔ lɛ ha nɛkɛ gbɔmɛi nɛɛ ahe jɔ̃ amɛ babaoo ni amɛku amɛsɛɛ amɛtee ni amɛmɔɔɔ lɛ lɛ, Farisifoi lɛ ka amɛhiɛ akɛ: “Ani nyɛ hu alakanyɛ? Ani onukpai lɛ loo Farasifoi lɛ ateŋ mɔ ko ehe enɔ eye? Shi asafo ni leee Mla lɛ alomɔ amɛ.” (Yohane 7:45-49) Ani nɔ kpakpa ni adamɔɔ nɔ akaa hiɛ nɛ—hegbɛ ni akɛmiitsu nii yɛ yiwalɛ gbɛ nɔ kɛ gbɛitsɛmɔ loo fitemɔ? Eba akɛ ŋaawolɔi ni ji Kristofoi yeŋ ŋaawoo ni tamɔ nɛkɛ he fɔ! Esa akɛ amɛkwɛ jogbaŋŋ ni amɛkwa yi ni amɛkɛ wiemɔi aaayi mɛi krokomɛi aloo jwɛŋmɔ ni amɛaaha amɛna akɛ: ‘Esa akɛ obo mi toi, ejaakɛ onukpa ji mi!’ Aloo kɛ amɛkɛ nyɛmiyoo ko miiwie lɛ, amɛkaha eenu he akɛ: ‘Esa akɛ obo mi toi, ejaakɛ nyɛminuu ji mi.’
22. (a) Mɛni hewɔ esa akɛ Kristofoi kɛ ŋaawoo aha ni yɛ mɛɛ gbɛ nɔ? (b) Mɛɛ sanebimɔ ehe hiaa ni asusu he lolo?
22 Hɛɛ, ŋaa ni awoɔ ji suɔmɔ nifeemɔ ko ni esa akɛ wɔ fɛɛ—titri lɛ, onukpai ni ahala amɛ lɛ—kɛha nanemɛi Kristofoi lɛ yɛ be kɛ bei amli. Akɛ ŋaawoo ko akaha yɛ amale naafolɔmɔ ko nɔ. Shi kɛ ehe miihia lɛ, aha yɛ ekaa naa. Esa akɛ edamɔ Ŋmalɛ nɔ ni akɛha yɛ mlijɔlɛ mumɔ mli. Agbɛnɛ ewaaa akɛ oookpɛlɛ ŋaawoo ni jɛ mɔ ko ni sumɔɔ bo lɛ ŋɔɔ. Yɛ bei komɛi amli lɛ, ewa moŋ akɛ wɔɔle nɔ ni esa akɛ wɔkɛɛ yɛ be mli ni wɔkɛ ŋaawoo haa. No hewɔ lɛ mɛɛ gbɛ nɔ wɔɔtsɔ ni wɔkɛ ŋaawoo ni mɔɔ shi ni sɛɛnamɔ yɔɔ hé aha? Abaasusu enɛ he yɛ nikasemɔ ni nyiɛ sɛɛ lɛ mli.a
[Shishigbɛ niŋmai]
a Ajie kɛjɛ September 15, 1986 Watchtower lɛ mli.
Ani Obaanyɛ Otsɔɔ Mli?
◻ Namɛi yɔɔ hegbɛ kɛ gbɛnaa nii akɛ amɛkɛ Kristofoi eŋaawoo aha?
◻ Mɛni hewɔ ekaawoo he baahia dani anyɛ akɛ ŋaawoo aha lɛ?
◻ Mɛni hewɔ anɔkwale ni eji akɛ Paulo sumɔɔ Korinto Kristofoi lɛ ha efee mlɛo kɛha amɛ akɛ amɛaakpɛlɛ eŋaawoo nɔ lɛ?
◻ Mɛni hewɔ esa akɛ Kristofonyo ŋaawolɔ lɛ afee mɔ ni mli jɔ ni baa ehe shi lɛ?
◻ Te Kristofonyo aaafee tɛŋŋ ni ekaha eŋaawoo lɛ miifee tamɔ nɔ ni ekɛmiiwa mɔ ko yi?
[Mfoniri ni yɔɔ baafa 22]
Paulo wo Tito ŋaa ni ekai mɛi krokomɛi ni “amɛfee kpoo ni amɛkɛ amɛhe atsɔɔ mɔ fɛɛ mɔ akɛ amɛhe Jɔ”