“Gbee Osɔɔmɔ Lɛ Naa Kwraa”
“Miima nɔ mi miihao yɛ Nyɔŋmɔ kɛ Nuŋtsɔ Yesu Kristo ni baaba ebakojo hiɛkalɔi kɛ gbohii . . . lɛ hiɛ okɛ . . . gbee osɔɔmɔ Iɛ naa kwraa.”—2 TIMOTEO 4:1, 5.
1. Mɛni ji wekukpaa ni ka Paul kɛ Timoteo teŋ?
1 BENI bɔfo Paulo ŋma ewolo ni ji enyɔ lɛ eyaha Timoteo lɛ, no mli lɛ Paulo miitiu oti ni ma ehiɛ akɛ Nyɔŋmɔ sɔɔlɔ, ni étee no efee nakai aaafee afii 30. Ni enine eshɛ jɔɔmɔi babaoo nɔ kɛjɛ Yehowa ŋɔɔ. (2 Timoteo 1:2) Paulo ehala Timoteo ni ekɛ lɛ atsu nii akɛ ehefatalɔ yɛ egbɛfaa nitsumɔ lɛ mli beni amɛsɔmɔɔ asafoi lɛ. Amɛ fɛɛ amɛná afii babaoo ni woɔ yibii amli nikpamɔi yɛ ekomefeemɔ mli lɛ mli ŋɔɔmɔ.—Bɔfoi lɛ Asaji 16:1-5.
2. Mɛni ji nɔ ni Paulo wiemɔi ni yɔɔ 2 Timoteo 4:6-8 lɛ tsɔɔ?
2 Agbɛnɛ be ní Paulo sɔɔmɔ lɛ baaba naagbee ebɛŋkɛ. Eŋma akɛ: “Aafɔse milá aashwie shi momo akɛ afɔle, ni mimliyimɔ be lɛ eshɛ. Ta kpakpa lɛ, miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ; nɔ ni eshwɛ ni ka shi ha mi ji jalɛ akekre lɛ, ni Nuŋtsɔ ni ji jalɛ kojolɔ lɛ kɛbaaha mi yɛ nakai gbi lɛ nɔ lɛ, ni jeee mikome ebaaha, shi moŋ mɛi bluublu ni sumɔɔ epuemɔ lɛ hu.” (2 Timoteo 4:6-8) Enɛ tsɔɔ akɛ Paulo gbele ebɛŋkɛ. Anuɔ shishi akɛ Paulo gbo yɛ Nero yiwaa shishi yɛ afi 66 Ŋ.B. Beni gbele ji nɔ ni ka ehiɛ lɛ, mɛɛ susumɔi baaba Paulo jwɛŋmɔ mli? Ekolɛ enɛɛmɛi: Ani mitsu misɔɔmɔ lɛ jogbaŋŋ? Ani migbe misɔɔmɔ lɛ naa yɛ omanyeyeli mli? Hɛɛ, Paulo baanyɛ ena nɔmimaa yɛ ewiemɔ mli akɛ efee nakai! Ehemɔkɛyeli mli wa waa ni eyɛ hekɛnɔfɔɔ akɛ enine baashɛ jweremɔ nɔ ni ji ŋwɛi tsɛmɔ lɛ nɔ. Kwɛ bɔ ni etsui baanyɔ emli aha akɛni ekpaleee kɛjɛɛɛ nitsumɔ ni akɛwo edɛŋ lɛ he lɛ hewɔ!
3. Mɛɛ nɔkpakpa Paulo baanyɛ afee aha Timoteo dani egbo?
3 Be fioo ko yɛ lolo kɛha Paulo ni ebaanyɛ ekɛfee nɔ kpakpa ko. Dani eeewɔ yɛ gbele mli lɛ, mɛɛ nɔ kpakpa ko Paulo baanyɛ afee aha Timoteo? Ekɛ ŋaawoo ni he hiaa ha lɛ yɛ mumɔ lɛ tsirɛmɔ naa. Wɔkaneɔ esusumɔi kɛ ewiemɔi lɛ yɛ Timoteo Wolo ni ji Enyɔ lɛ mli. Enɛɛmɛi ji enaagbee niŋmaai ni yɔɔ Ŋmalɛi lɛ amli kɛha wɔ hu wɔ sɛɛnamɔ.
4. Mɛɛ ŋaawoo Paulo kɛha Timoteo?
4 Timoteo egbeko esɔɔmɔ nitsumɔ lɛ naa, no hewɔ lɛ Paulo ŋma akɛ: “Miima nɔ mi miihao yɛ Nyɔŋmɔ kɛ Nuŋtsɔ Yesu Kristo ni baaba ebakojo hiɛkalɔi kɛ gbohii yɛ epuemɔ kɛ emaŋtsɛyeli lɛ mli lɛ hiɛ akɛ: Shiɛmɔ wiemɔ lɛ, ka he, deka yɛ jio, deka bɛ jio, ka hiɛ, wo ŋaa, bɔɔ kɔkɔ yɛ tsuishitoo kɛ nitsɔɔmɔ fɛɛ mli. Ejaakɛ be ko baaba ni amɛkpɛlɛŋ tsamɔ tsɔɔmɔ lɛ dɔŋŋ, shi moŋ amɛaabua tsɔɔlɔi anaa amɛwo amɛhe yɛ amɛ diɛŋtsɛ amɛkɔnɔi lɛ anaa, ejaakɛ amɛtoiiaŋ miifɛ̃lɛ amɛ; ni amɛaakpala anɔkwale lɛ yɛ amɛtoii asɛɛ, ni amɛkpale amɛyabɔ adesai amoŋ toi. Shi bo lɛ, ohiɛ aka shi yɛ nii fɛɛ mli, miamɔ ohiɛ yɛ amanehului amli, tsu sanekpakpa jajelɔ nitsumɔ Iɛ, gbee osɔɔmɔ lɛ naa kwraa!”—2 Timoteo 4:1-5.
5. Mɛni hewɔ Paulo ŋaawoo lɛ he hiaa wɔ titri Iɛ?
5 Nakai ŋaawoo kpakpa lɛ he ba sɛɛnamɔ babaoo kɛha Timoteo. Shi ani ehe aaaba sɛɛnamɔ aha wɔ hu lo? “Naagbee gbii” ni Paulo ŋma yɛ he lɛ mli wɔyɔɔ nɛɛ. Gbɔmɛi pii yɛ ni ŋmɛnɛ ‘Nyɔŋmɔ jamɔ su kɛkɛ amɛhiɛ shi amɛhiii shi yɛ naa.’ (2 Timoteo 3:1-5) Nɔ ni gbɔmɛi ni tamɔ nɛkɛ sumɔɔ ni amɛbo toi ji “tsɔɔlɔi” ni baata amɛtoiiaŋ. Ni kɛlɛ, kɛfata shiɛmɔ ni aaashiɛ wiemɔ lɛ yɛ asafo lɛ mli lɛ he lɛ, gbɛnaa nii ka anɔkwale Kristofoi anɔ akɛ amɛshiɛ yɛ maŋ amɛha mɔ fɛɛ mɔ, ni amɛtao mɛi ni baabo “wiemɔi” lɛ toi. No hewɔ lɛ nɛkɛ ŋaawoo nɛɛ kɔɔ wɔhe ŋmɛnɛ, wɔ mɛi ni wɔji Yehowa Odasefoi Kristofoi lɛ.
Gbɛ Ni Wɔɔtsɔ Nɔ Wɔgbe Sɔɔmɔ Lɛ Naa Kwraa
6. (a) Mɛni hewɔ esa akɛ ‘wɔshiɛ wiemɔ lɛ’? (b) Mɛɛ sɛɛnamɔi jɛɔ wɔhiɛ ni wɔɔha ahi bɔ ni wɔtsuɔ wɔsɔɔmɔ lɛ wɔhaa lɛ nɔ lɛ mli baa?
6 Nitsumɔi sɔrɔtoi yɔɔ sɔɔmɔ lɛ mli; ni nibii pii yɛ ni sɔɔlɔ lɛ baafee. Klɛŋklɛŋ lɛ, Paulo tsĩ “shiɛmɔ wiemɔ lɛ” ta. Enɛ ji wiemɔ ni Yehowa ehala akɛ eeejie lɛ kpo etsɔɔ etsuji lɛ. No ji anɔkwale wiemɔ ni Yesu wie he lɛ. Yehowa haa aleɔ nɔ ni eshɛɛ sane lɛ ji kɛha adesai yɛ be kome mli, koni eha edasefoi ni yɔɔ shikpɔŋ nɔ lɛ atsɔɔ esane lɛ mli amɛha mɛi. Yehowa gbɛ ji ni ekɛ kɔkɔbɔɔ sane lɛ aha dani efee nɔ ko yɛ he. (2 Kronika 36:15, 16; Yesaia 42:9; 43:12; Yona 3:2-4) Nɔ ni baajɛ esane lɛ mli aba ji nɔ kpakpa kɛha mɛi ni boɔ toi lɛ; amɛnine baashɛ yibaamɔ nɔ. Mɛi ni booo toi lɛ baana nɔ yɛ be mli ni Yehowa tsuɔ fɔbuu kojomɔ he nii eshiɔ mɛi lɛ. Esa akɛ amɛtere sɔ ni baajɛ mli aba lɛ. (Bɔfoi lɛ Asaji 20:20, 21, 26, 27) Shi nilee gbɛ kɛha Nyɔŋmɔ sɔɔlɔ lɛ ji: “Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.”—1 Timoteo 4:16.
7. Mɛni hewɔ eji nitsumɔ ni he hiaa kɛ́ shihilɛi komɛi po eŋmɛɛɛ gbɛ lɛ?
7 Atsuɔ shiɛmɔ nitsumɔ lɛ yɛ shihilɛi sɔrɔtoi ashishi, shi kɛlɛ esa akɛ eya hiɛ. Paulo ŋma akɛ, “Ka he, deka yɛ jio, deka bɛ jio.” Nɛkɛ sane nɛɛ baanyɛ atsɔ wala aha gbɔmɛi lɛ. No hewɔ lɛ, yɛ shihilɛ fɛɛ shihilɛ ni sɔɔlɔ anɔkwafo lɛ aaana ehe yɛ mli lɛ, ebuɔ sane lɛ akɛ nɔ ni he hiaa waa. Etaoɔ gbɛ ni eeetsɔ nɔ eha mɛi anu wiemɔ lɛ, kɛ ate shi awo shiɛmɔ nitsumɔ lɛ po. Wɔbaanyɛ wɔtsɔ Yesu nɔkwɛmɔ nɔ lɛ kɛ nɔ ni aŋma afɔ shi yɛ Biblia mli wolo ni ji Bɔfoi lɛ Asaji lɛ nɔ wɔna enɛ yɛ faŋŋ mli.
8. (a) Mɛni baanyɛ aye abua sɔɔlɔ lɛ koni eshiɛ wiemɔ lɛ? (b) Mɛni hewɔ kamɔ loo hiɛkamɔ baanyɛ afee wɔsɔɔmɔ lɛ fa lɛ?
8 Bɔni afee ni wɔshiɛ wiemɔ lɛ, kɛ yɛ asafo lɛ mli aloo esɛɛ hu lɛ, esa akɛ sɔɔlɔ lɛ afee mɔ ni le Nyɔŋmɔ Wiemɔ lɛ, efee mɔ ni kaseɔ enɛ. Esa akɛ ehe be ni ekɛkase, esusu he, ni ejwɛŋ nɔ, ni etao akɛ eeenu shishi jogbaŋŋ. Esa akɛ eshiɛ akɛ mɔ ni le anɔkwale tsɔɔmɔi lɛ jogbaŋŋ. Paulo kɛɛ Timoteo akɛ esa akɛ nɔkwɛlɔ lɛ afee “mɔ ni hiɛɔ tsɔɔmɔ lɛ naa anɔkwa wiemɔ lɛ mli, koni enyɛ ewie etsɔɔ mɛi yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ naa lɛ, eka amɛhiɛ.” (Tito 1:9) Akɛ Nyɔŋmɔ Wiemɔ lɛ tsuɔ nii akɛ-kãa mɛi ni ámɛje amɛŋɛlɛ nɔ kɛjɛ nɔ ni Yehowa taoɔ lɛ he lɛ, ni akɛjajeɔ mɔ ni tɔ̃ɔ lɛ yɛ lɛ nɔŋŋ ehilɛ-kɛhamɔ hewɔ. Enɛɛmɛi fɛɛ fata Sɔɔmɔ lɛ ni aaagbe naa kwraa lɛ he.
Ŋaawoo He Miihia
9. Mɛni hewɔ Kristofoi eŋaawoo he hiaa lɛ?
9 Eshɛɔ be ni kaimɔi ahe hiaa mɛi ni efeee nɔ fɛɛ nɔ ni esa akɛ amɛfee lɛ, aloo mɛi ni bɛ hiɛsɔɔ kɛ ekãa kɛha Yehowa jamɔ lɛ. Mɛi ni yɔɔ suɔmɔ kɛha Yehowa lɛ ahiɛ sɔɔ Kristofoi aŋaawoo loo kɔkɔbɔɔ lɛ waa. Amɛmii shɛɔ amɛhe akɛ amɛaanu nɔ ni Yehowa kɛɔ ni amɛbuɔ wiemɔi nɛɛ akɛ mumɔŋ wiemɔi ni jara wa waa. (Yesaia 55:3; Hebribii 12:5, 6) No hewɔ lɛ, eji sɔɔmɔ kpakpa ni wɔkɛhaa wɔnanemɛi nitsulɔi lɛ—ni agbɛnɛ kɛha mɛi ni sumɔɔ akɛ amɛaaja Yehowa lɛ—ákɛ akɛ Nyɔŋmɔ Wiemɔ lɛ aaawo amɛ ŋaa. Paulo diɛŋtsɛ kɛ ŋaawooi pii ha.—Romabii 15:30; 16:17; 1 Korintobii 1:10, 11; 1 Timoteo 4:13; 6:11, 12; Hebribii 10:24.
10. Mɛni hewɔ tsuishiŋmɛɛ he hiaa yɛ ŋaawoo ni akɛhaa lɛ mli lɛ?
10 Esa akɛ sɔɔlɔ ni ejɔɔ ehe nɔ lɛ hu ale gbɛ ni eeetsɔ nɔ ewo Nyɔŋmɔ mumɔ lɛ yibii lɛ. Ebaabi tsuishitoo kɛ tsuishiŋmɛɛ yɛ mɔdɛŋ ni abɔɔ koni awo mɛi ni ekpɛlɛɛɛ ŋaawoo nɔ amrɔ nɔŋŋ lɛ mli. Mɛi komɛi po ejieŋ hiɛsɔɔ yɛ mɔdɛŋ ni abɔɔ koni awo amɛ hewalɛ kɛ ŋaa lɛ he. Shi kɛlɛ, esa akɛ atsu enɛ, ni titri lɛ, onukpai ni ji Kristofoi lɛ fɛɛ ji mɛi ni esa akɛ amɛtsu enɛ. Ŋaa gbɛ ni atsɔɔ nɔ atsɔɔ nii lɛ hu he baa sane lɛ mli. Kɛ mɔ ko kɛ Yehowa Wiemɔ lɛ tsu nii babaoo lɛ, ehe saa babaoo yɛ Wiemɔ lɛ kɛ nitsumɔ mli. Kɛji akɛ tsɔɔlɔ ko bale enikaselɔ lɛ jogbaŋŋ lɛ, esa akɛ enyɛ ekɛ saji ni sa aha nakai mɔ lɛ. Paulo tsɔɔ gbɛ ni hi jogbaŋŋ ni esa akɛ atsɔ nɔ lɛ yɛ 1 Tesalonikabii 5:14: “Shi wɔmiikpanyɛ fai [wɔmiiwonyɛ ŋaa], anyɛmimɛi, nyɛwiea nyɛtsɔɔa mɛi ni bɛ gbɛjianɔ lɛ; nyɛshɛjea mɛi ni tsui faa lɛ amii; nyɛherea mɛi ni feɔ gbedee lɛ; nyɛtoa nyɛtsui shi nyɛbaa mɛi fɛɛ.”
Tsi Ohe Kɛjɛ Hemɔkɛyeli-Kwalɔi Ahe
11. Mɛni esa akɛ afee yɛ hemɔkɛyeli-kwalɔi ahe?
11 Paulo miisumɔ ni Timoteo anyɛ aŋmɛ pɛpɛɛpɛ, aloo eha ejwɛŋmɔ aka shi yɛ nibii fɛɛ mli. Ekaŋmɛ gbɛ ni eetsɔ tamɔ mɛi ni booo tsamɔ tsɔɔmɔ lɛ toi ni amɛjieɔ amɛtoii kɛjɛɔ anɔkwale lɛ toiboo he lɛ. Nyɔŋmɔ anɔkwa sɔɔlɔ ni yɔɔ ŋmɛnɛ lɛ yeee etsui ni ehaooo ehe yɛ enitsumɔi amli kɛ ena akɛ mɛi komɛi miitsi amɛhe kɛmiijɛ Nyɔŋmɔ Wiemɔ lɛ kɛ emlitsɔɔmɔ ni tsaa mɔ lɛ he lɛ. Átsɔ hiɛ abɔ wɔ kɔkɔ akɛ hemɔkɛyeli-kwalɔi kɛ gbɔmɛi ni baasumɔ ni ata amɛtoiiaŋ baahi shi. Ŋaawoo tamɔ nɔ ni yɔɔ 2 Yohane 9-11, 1 Korintobii 5:11-13 kɛ 2 Timoteo 3:5 lɛ eŋmɛɛɛ gbɛ kwraa koni wɔkɛ mɛi ni tseɔ amɛhe kɛjɛɔ anɔkwale lɛ he lɛ abɔ. Asaŋ wɔheee ni wɔkaneee amɛwoji hu. Mɛi krokomɛi babaoo yɛ ni amɛmiisumɔ ni amɛbo anɔkwale lɛ toi, ni mɛnɛɛmɛi ji mɛi ni wɔkɛ amɛ naa Kristofoi anaanyobɔɔ.—1 Timoteo 6:20, 21.
12. Mɛni hewɔ Kristofonyo sɔɔlɔ lɛ kɔɔ shidaamɔ ni yɔɔ shimɔ nɛɛ?
12 Paulo wo ŋaa akɛ: “Shi gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.” (2 Timoteo 3:13) Yɛ nakai kɔkɔbɔɔ ni atsɔ hiɛ akɛha lɛ hewɔ lɛ, Kristofonyo sɔɔlɔ lɛ kɛ mɛi ni tamɔ nakai enyiɛɛɛ. Eboɔ bɔfo lɛ ŋaawoo kpakpa lɛ toi: “Shi bo lɛ hii shi yɛ nii ni okase ni oyɔɔ hewalɛ yɛ nɔ lɛ amli, ejaakɛ ole mɔ naa ni okase yɛ, ni ogbekɛbiiashi ojɛ ole ŋmalɛi krɔŋkrɔŋi lɛ ni aaanyɛ aha ole nii ni atsɔ Kristo Yesu nɔ hemɔkɛyeli nɔ kɛya yiwalaheremɔ mli lɛ. Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ, ehi ha nitsɔɔmɔ kɛ hiɛkamɔ kɛ mɔ saamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (2 Timoteo 3:14-17) Nyɔŋmɔ Wiemɔ lɛ kasemɔ daa ji nikee nii kɛha mɛi ni taoɔ ni amɛgbe amɛsɔɔmɔ lɛ naa lɛ.
Jɔɔmɔi Ni Jɛɔ Kristofoi Anaanyobɔɔ Mli Baa
13. Sɔɔmɔ lɛ ni ekɛ Paulo tsu lɛ he ba sɛɛnamɔ kɛha Timoteo yɛ mɛɛ gbɛ nɔ, ni te wɔɔfee tɛŋŋ ni wɔna enɛ he sɛɛ?
13 Eji jɔɔmɔ diɛŋtsɛ kɛha Timoteo akɛ enyɛ ekɛ Paulo bɔ naanyo afii babaoo, ni enyɛ eyoo bɔ ni Nyɔŋmɔ tsulɔ anɔkwafo kɛ mɔ ni eda yɛ mumɔŋ baa ejeŋ ehaa. Paulo kɛ amɛ niiashikpamɔi lɛ tsu nii akɛ kaimɔ nii kpakpa kɛha Timoteo: “Shi bo lɛ, onyiɛ misɛɛ yɛ mitsɔɔmɔ, mijeŋba, miyiŋtoo, mihemɔkɛyeli, mitsuishitoo, misuɔmɔ, mitsuishiŋmɛɛ, miyiwalɛi, mimanehului ni mina yɛ Antiokia kɛ Ikoniom kɛ Listra lɛ amli, nɔ yiwalɛi abɔ ni mina ni Nuŋtsɔ lɛ jie mi kɛjɛ fɛɛ mli. Shi mɛi fɛɛ ni taoɔ akɛ amɛaahi shi yɛ Nyɔŋmɔ jamɔ naa yɛ Kristo Yesu mli lɛ, aaawa amɛyi.” (2 Timoteo 3:10-12) Eyɛ mli akɛ ŋmɛnɛ wɔnyɛɛɛ wɔkɛ Paulo abɔ tɛ̃ɛ moŋ, shi eshihilɛ mli nibii ni aŋmala ashwie shi babaoo ni anaa yɛ Biblia lɛ mli lɛ baanyɛ aye abaa wɔ.
14. Mɛni hewɔ esa akɛ wɔfee klalo akɛ wɔɔna amanehulu lɛ?
14 Paulo tsĩ eyiwaai kɛ emanehului ata, ni ŋaawoo ni ekɛha Kristofonyo sɔɔlɔ lɛ ji ni efee mɔ ni sumɔɔ akɛ lɛ hu eeena amanehulu. (2 Timoteo 4:5) Yɛ be babaoo mli lɛ ehe hiaa ni atsɔ yiwaa ko mli yɛ wɔsɔɔmɔ lɛ ni wɔɔgbe naa kwraa lɛ mli. Eji hegbɛ ni wɔnaa akɛ wɔɔhiɛ wɔ emuuyeli mli yɛ kaa mli koni wɔha Yehowa tsui anya. (Abɛi 27 :11) Nɔ ni baajɛ mli aba ji odase ni ayeɔ ni jieɔ Yehowa yi!
Sanekpakpa Jajelɔ Lɛ Nitsumɔ
15. Mɛni hewɔ esa akɛ wɔkɛ wɔhe awo sanekpakpa jajemɔ nitsumɔ lɛ mli yɛ be mli ni wɔgbeɔ wɔsɔɔmɔ lɛ naa kwraa lɛ?
15 Sanekpakpa jajemɔ lɛ heɔ Kristofonyo sɔɔlɔ anɔkwafo lɛ be lɛ mli nɔ ni fa. Yesu kɛɛ: “Ni ja ashiɛ sanekpakpa lɛ atsɔɔ jeŋmaji fɛɛ da.” (Marko 13:10) Eha efee faŋŋ akɛ naagbee lɛ baŋ ja ashiɛ sanekpakpa lɛ bɔ ni sa da. Paulo na hegbɛ eshiɛ sanekpakpa lɛ etsɔɔ heyelilɔi babaoo kɛtsɔ Roma Maŋtsɛyeli lɛ fɛɛ mli, Nɔ ni jɛ mli ba ji asafoi heei ni ato kɛ nɔkwɛlɔi ni ahala amɛ. Amɛ hu amɛkɛ amɛhe bɔ amɛnanemɛi Kristofoi ni ji nyɛmimɛi hii kɛ yei lɛ ahe yɛ sanekpakpa jajemɔ nitsumɔ lɛ mli ni amɛlɛɛ shiɛmɔ nitsumɔ lɛ mli kɛtee shɔŋŋ diɛŋtsɛ. Taakɛ Paulo tsɔɔ mli lɛ, atsuɔ nitsumɔ lɛ babaoo yɛ ‘shia kɛ shia kɛ agbɛnɛ yɛ faŋŋ mli.’ (Bɔfoi lɛ Asaji 20:20) Nibii kpakpai jɛ mli ba yɛ nakai be lɛ mli, ni nakai nɔŋŋ hu eji akɛ nɔ ni hi fe fɛɛ ejɛ mli eba ŋmɛnɛ yɛ be mli ni Kristofoi ashiɛmɔ nitsumɔ lɛ yaa nɔ yɛ jeŋ fɛɛ nɛɛ.—Yohane 14:12.
16. Mɛɛ odaseyeli yɔɔ ni tsɔɔ akɛ mɛi pii kɛ Paulo ŋaawoo ni yɔɔ 2 Timoteo 4:5 lɛ miitsu nii?
16 Yɛ hemɔkɛyeli ni amɛyɔɔ hewɔ lɛ, mɛi pii miiŋɔ hegbɛ lɛ koni amɛlɛɛ amɛnitsumɔi yɛ sanekpakpa jajemɔ nitsumɔ lɛ mli lɛ mli. Akpei abɔ kɛ amɛhe ewo maŋsɛɛ sanekpakpa shiɛmɔ nitsumɔ lɛ mli, ni akpei ohai abɔ kɛ amɛhe ewo gbɛgbamɔ sɔɔmɔ lɛ mli yɛ gbɛi sɔrɔtoi anɔ. Sanekpakpa jajelɔi fe 2,842,000 miisɔmɔ yɛ shikpɔji 203 nɔ bianɛ yɛ asafoi ni fe 47,869 mli ni yibɔ lɛ miiya hiɛ lolo. Nɛkɛ naakpɛɛ nibii nɛɛ ji odaseyeli ni tsɔɔ akɛ Yehowa tsuji ni amɛjɔɔ amɛhe nɔ lɛ ekpɛlɛ ŋwɛi famɔ ni akɛha amɛ akɛ ‘amɛgbe amɛsɔɔmɔ lɛ naa kwraa’ lɛ nɔ.
Nitsumɔ Lɛ Naa Ni Aaagbe
17. Mɛni ji nɔ ni Yehowa sumɔɔ ni ena ni etsuji miifee yɛ nitsumɔ ni ekɛwo amɛdɛŋ ŋmɛnɛ lɛ he?
17 Yehowa kɛ sɔɔmɔ nitsumɔ ewo mɛi ni efɔ amɛ mu lɛ adɛŋ, ni “asafo babaoo” lɛ kɛ amɛ efee ekome yɛ nitsumɔ lɛ mli. Akɛ nitsumɔ lɛ toɔ mɛi ni dɔmɔɔ ŋtsɔi ni amɛyeɔ ŋkɔmɔ lɛ ahiɛnaa kadimɔ he yɛ gbalɛ naa, yɛ Ezekiel yitso 9. Wɔle kɛjɛ nakai gbalɛ lɛ mli akɛ be baashɛ ni nuu ni hiɛ woloŋmalɔ tɔ lɛ baakɛɛ akɛ: “Mifee taakɛ bɔ ni ofami lɛ.” Yehowa nyãa etsuji ahe kɛ amɛfee nɔ ni efa amɛ akɛ amɛfee lɛ.—Ezekiel 9:4, 11; 1 Mose 6:22; 1 Korintobii 4:2.
18, 19. Mɛni ji gbɛi komɛi anɔ ni oootsɔ okɛ Paulo ŋaawoo ni yɔɔ 2 Timoteo 4:1-5 lɛ atsu nii?
18 Yɛ be mli ni wɔkwɛɔ bɔ ni jeŋ shihilɛ yaa nɔ ehaa, ni ehaa gbalɛi ni kɔɔ naagbee gbii nɛɛ ahe lɛ baa lɛ mli pɛpɛɛpɛ lɛ, nɔ ni wɔɔnyɛ wɔfee nɔŋŋ ji ni wɔnu bɔ ni shiɛmɔ nitsumɔ ni akɛwo wɔdɛŋ lɛ he hiaa waa ha lɛ he. Enɛ kɔɔ wala he. Naabuamɔ lɛ miiya nɔ, ni Yehowa miiha eeya nɔ kɛ foi yɛ ebe mli. (Yesaia 60:22) No hewɔ lɛ, bɔ fɛɛ bɔ ni gbɛnaa nii ni ka onɔ lɛ ji, ákɛ Yehowa sɔɔlɔ ni ojɔɔ ohe no oha lɛ lɛ, tsu enɛ he nii ni okɛsa ehiɛ kwraa. (Kolosebii 1:10; 3:23, 24) Ha nitsumɔ ni akɛwo odɛŋ akɛ otsu he nii lɛ ahi ojwɛŋmɔ mli ni obɔ mɔdɛŋ ni otsu kɛgbe naa kwraa. Kɛ ookwɛ nitsumɔi komɛi anɔ yɛ Maŋtsɛyeli Asa lɛ nɔ lɛ, tsu kɛmɔ shi. Kɛ akɛ nitsumɔ ni ji Asafo Woloŋ Nikasemɔ kuu ko nɔkwɛmɔ ewo odɛŋ lɛ, okɛ kuu nɛɛ atsu nii ni owo amɛ ŋaa ni amɛwowoo amɛhe hewalɛ. Kɛ oji gbɛgbalɔ aloo maŋsɛɛ sanekpakpa shiɛlɔ lɛ, bɔɔ mɔdɛŋ ni otsu nii waa koni onine ashɛ sɔɔmɔ otii lɛ anɔ.—Romabii 12:6-9.
19 Obaanyɛ obi bo diɛŋtsɛ ohe hu akɛ, Ani manyɛ matsu nɔ kroko hu ni mikɛye mibua Kristofoi krokomɛi, titri lɛ mɛi heei ni yɔɔ asafo lɛ mli lɛ, ni mikɛtswa amɛ miina shi? Kɛji akɛ osɔɔmɔ lɛ fa ji onukpa yɛ asafo lɛ mli lɛ, belɛ esa akɛ ole bɔ ni ‘otooi kuu lɛ yɔɔ’ ni okwɛ mɛi fɛɛ ni yɔɔ mli lɛ jogbaŋŋ. Esa akɛ okwɛ jogbaŋŋ koni amɛteŋ mɔ ko akafee mɔ ni ekpa shiɛmɔ aloo mɔ ni wooo yibii yɛ Nuŋtsɔ Yesu Kristo he anɔkwale nilee gbɛfaŋ. (2 Petro 1:5-8) Nɔ ni fe fɛɛ lɛ, ha ohiɛ ahi nɔ ni otsuɔ yɛ sanekpakpa jajemɔ nitsumɔ lɛ mli lɛ nɔ koni eba akɛ yɛ naagbee lɛ, ooonyɛ “ogbe osɔɔmɔ lɛ naa kwraa.”a
[Shishigbɛ niŋmaa]
a Ajie kɛjɛ December 15, 1984 Watchtower lɛ mli.
Ani Okaiɔ?
◻ Mɛɛ shihilɛ mli Paulo yɔɔ beni eŋma Timoteo Wolo ni ji Enyɔ lɛ?
◻ Mɛni hewɔ ni ehe hiaa waa akɛ aaashiɛ wiemɔ lɛ
◻ Mɛni hewɔ ŋaawoo he hiaa lɛ?
◻ Te esa akɛ atsu apasa tsɔɔlɔi ahe nii aha tɛŋŋ?
◻ Mɛni hewɔ sanekpakpa lɛ ni aaajaje lɛ he hiaa waa ŋmɛnɛ lɛ?
[Mfoniri ni yɔɔ baafa 26, 27]
Paulo wolo ni ji enyɔ ni eŋma eyaha Timoteo lɛ ye ebua Iɛ ‘ni egbe esɔɔmɔ Iɛ naa kwraa’
JULY Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)