Onesiforo—Miishɛjelɔ ni Yɔɔ Ekãa

“NYƐKAIA mɛi ni awo amɛ gboklɛi lɛ tamɔ akɛ nyɛkɛ amɛ kãmɔ mli, kɛ mɛi ni afeɔ amɛ efɔŋ lɛ hu.” (Hebribii 13:3) Beni bɔfo Paulo ŋmala nɛkɛ wiemɔi nɛɛ yɛ aaafee afi 61 Ŋ.B. lɛ, no mli lɛ, lɛ diɛŋtsɛ lɛ, ená tsuŋwoo mli niiashikpamɔ nɔ ni fa fe shi kome, ni ebaaná ekoŋŋ dani ebaagbo akɛ lá odasefonyo. (Bɔfoi lɛ Asaji 16:23, 24; 22:24; 23:35; 24:27; 2 Korintobii 6:5; 2 Timoteo 2:9; Filemon 1) Taakɛ eji ŋmɛnɛ lɛ, no bei lɛ amli lɛ, ehe bahia waa koni asafoi lɛ asusu nanemɛi heyelilɔi ni akaa amɛhemɔkɛyeli lɛ ahe.

Klɛŋklɛŋ afii oha lɛ mli kaselɔi lɛ ateŋ mɔ kome ni susu nakai hiamɔ nii lɛ ahe waa ji Onesiforo. Eyasara Paulo yɛ etsuŋwoo ni ji enyɔ lɛ mli yɛ Roma. Bɔfo lɛ ŋma yɛ ehewɔ akɛ: “Nuntsɔ lɛ ana Onesiforo we lɛ mɔbɔ, ejaakɛ kpitiokpitio ebahaa mi tsui, ni ehiɛ gbooo mikɔ̃sɔ̃ŋkɔ̃sɔ̃ lɛ he; shi beni eba Roma lɛ, ebɔ mɔdɛŋ etao mi ni ena mi.” (2 Timoteo 1:16, 17) Ani ohe be okɛsusu shishinumɔ diɛŋtsɛ ni yɔɔ nakai wiemɔi fioo lɛ mli lɛ he pɛŋ? Eyɛ faŋŋ akɛ, nakai feemɔ baaha ohiɛ asɔ Onesiforo waa diɛŋtsɛ. Obaana akɛ eji miishɛjelɔ ni yɔɔ ekãa.

Paulo Tsuŋwoo ni Ji Enyɔ

Yɛ be mli ni ajie Paulo kɛjɛ eklɛŋklɛŋ tsuŋwoo lɛ mli lɛ sɛɛ lɛ, asaa awo lɛ tsuŋ ekoŋŋ yɛ Roma tsuŋwoohe ko, shi yɛ shihilɛi sɔrɔtoi amli. Tsutsu lɛ, nanemɛi nyɛɔ amɛyaa eŋɔɔ yɛ shia ní lɛ diɛŋtsɛ eyahai lɛ mli, ni etamɔ nɔ ni eyɛ nɔmimaa akɛ etsɛŋ ni abaajie lɛ. Shi bianɛ lɛ, akɛni mɛi babaoo ekwa lɛ hewɔ lɛ, lá odasefonyo ni eeetsɔ lɛ kã ehiɛ kpaakpa.—Bɔfoi lɛ Asaji 28:30; 2 Timoteo 4:6-8, 16; Filemon 22.

Yɛ nɛkɛ beaŋ, yɛ afi 65 Ŋ.B. lɛ, awo Paulo tsuŋ. Aaafee afi ni tsɔ hiɛ lɛ mli—yɛ July 64 Ŋ.B. lɛ—la je yɛ Roma niaŋ fɛɛ, ni efite maŋtiase lɛ kpokpaai 14 lɛ ateŋ 10 mli nibii babaoo diɛŋtsɛ. Taakɛ Roma yinɔsane ŋmalɔ Tacitus wie lɛ, Nɔyelɔ Nero nyɛɛɛ “ajie he ni mɛi heɔ amɛyeɔ akɛ amanehulu nɛɛ, ni ji la ni fite nibii babaoo lɛ ji fãmɔ ni jɛ eŋɔɔ lɛ kɛjɛ amɛjwɛŋmɔ mli. No hewɔ lɛ, bɔni afee ni Nero ajie sane nɛɛ kɛjɛ maŋ bii lɛ ajwɛŋmɔ mli lɛ, eŋɔ sane lɛ efɔ̃ kuu ko ni anyɛ̃ɛɔ amɛ yɛ nɔ ni amɛfeɔ ni asumɔɔɔ lɛ hewɔ, ní maŋbii pii tsɛɔ amɛ akɛ Kristofoi lɛ anɔ, ni ekɛ yiwaa ni naa wa waa diɛŋtsɛ ba amɛnɔ. . . . Agbe amɛ yɛ hefɛoyelii sɔrɔtoi babaoo mli. Akɛ kooloi ahewolo haa amɛhe, ni gbeei tserɛɔ amɛheloo ni amɛgbeɔ amɛ, loo akalaa amɛ akpɛtɛɔ krɔsii ahe, loo akpataa amɛhiɛ yɛ la mli, ni etsoɔ akɛ gbɛkɛ kane beni hulu lɛ eyanyɔ shi.”

Shihilɛ kɛ gbɛkpamɔi ni tamɔ nɛkɛ pɛpɛɛpɛ mli Paulo na ehe yɛ ekoŋŋ yɛ tsuŋwoo mli lɛ. Ŋwanejee ko bɛ he akɛ no hewɔ ni ehiɛ sɔ saramɔi ni enaanyo Onesiforo basaraa lɛ lɛ! Shi agbɛnɛ, nyɛhaa wɔkwɛɔ shihilɛ mli ni Onesiforo hu yɔɔ yɛ shihilɛ ni tamɔ nɛkɛ nɔŋŋ lɛ mli.

Paulo ni Ji Gboklɛfonyo lɛ Saramɔ

Eka shi faŋŋ akɛ Onesiforo wekumɛi yɛ Efeso. (2 Timoteo 1:18; 4:19) Atsɔɔɔ kɛji Onesiforo ba nɔyelɔ lɛ maŋtiase lɛ kɛha lɛ diɛŋtsɛ enitsumɔ mli sane, loo eba diɛŋtsɛ koni ebasara Paulo lɛ mli. Yɛ fɛɛ sɛɛ lɛ, bɔfo lɛ tsĩ tã akɛ: ‘Kɛ Onesiforo ba Roma lɛ, ebahaa mi tsui kpitiokpitio.’ (2 Timoteo 1:16, 17) Mɛɛ tsuiwoo nɛkɛ ekɛbahaa? Eyɛ mli akɛ ekolɛ Onesiforo kɛ heloonaa nibii baafata yelikɛbuamɔ ni ekɛhaa lɛ he moŋ, shi eyɛ faŋŋ akɛ, jɛmɛ ni eyaa lɛ hu tsuɔ nii akɛ hewalɛwoo tsofa ko ni woɔ Paulo hewalɛ, ni ekanyaa lɛ. Yɛ anɔkwale mli lɛ, shishitsɔɔmɔi komɛi kaneɔ akɛ: “Ewoɔ mi hewalɛ yɛ mumɔŋ bei babaoo,” loo “eshɛjeɔ mimii yɛ bei babaoo mli.”

Ní aaatsu bɔ ni ashweɔ ni ayasara gboklɛfonyo Kristofonyo yɛ Roma lɛ he nii yɛ nakai beaŋ lɛ kɛ kaai baa. Nɔ ni tamɔɔɔ gbii ni akɛwo Paulo tsuŋ klɛŋklɛŋ lɛ, Kristofoi ni yɔɔ Roma lɛ leee he ni eyɔɔ kwraa. Yɛ maŋtiase wulu ni tamɔ Roma mli lɛ, ebɛ mlɛo akɛ aaana gboklɛfonyo ni akɛ lɛ eyatee ni efutu gboklɛfoi babaoo ni awo amɛ tsuŋ yɛ saji sɔrɔtoi ahewɔ lɛ. No hewɔ lɛ, ehe miihia koni atao mli jogbaŋŋ. Giovanni Rostagno ni ji Woloŋlelɔ lɛ tsɔɔ saji amli yɛ nɛkɛ gbɛ nɔ akɛ: “Naagbai ni yɔɔ mli lɛ baanyɛ afee sɔrɔtoi sɔrɔtoi. Nɔ ni fe fɛɛ lɛ, hiɛtɛ̃ɛ sɔrɔto ko he miihia yɛ taomɔ lɛ mli. Saji anaabuamɔ yɛ hei sɔrɔtoi, kɛ na ni aaana akɛ oobɔ mɔdɛŋ waa koni ona gboklɛfoi atsũ mli ni akɛ gboklɛfonyo ni etsɛ, ni akɛ efɔŋfeemɔi sɔrɔtoi efolɔ enaa lɛ yɔɔ lɛ baanyɛ aha akɛ hiɛŋmɛi fɔŋ akwɛ mɔ lɛ.”

Woloŋmalɔ P. N. Harrison fee shihilɛ ni tamɔ nakai lɛ he mfoniri ni ekɛɛ akɛ: “Etamɔ nɔ ni wɔhiɛ gbaa hiɛ ko ni etswa efai shi waa ni nyiɛ gbɔmɛi ni nyiɛ gbɛjegbɛi anɔ lɛ ateŋ, ni gbɔ nɛɛ kɛ ekãa kɛ miishɛɛ enyiɛ kɛjɛ Aegean wuoyigbɛ tɔ̃ɔ, ni enyiɛ nanegbɛi babaoo ni tsa gbɛjegbɛi ni eleee lɛ anɔ, eeetswa shinai babaoo anaa, ni eeenyiɛ gbɛtsɔɔmɔi ni akɛha lɛ lɛ fɛɛ sɛɛ, ni yɛ kɔkɔbɔɔ ni akɛha lɛ yɛ osharai ni enɛ ji lɛ fɛɛ sɛɛ lɛ, etswa efai shi akɛ ekuŋ esɛɛ; aahuu kɛyashi gbee ko ni ele ni jɛ gboklɛfoi atsũ ni hɔ he ko ni anaaa lɛ mli lɛ ŋa lɛ, ni ena Paulo ni awo lɛ kɔsɔ̃ŋkɔ̃sɔ̃ kɛmɔ Roma asraafonyo ko.” Kɛ jɛmɛ tamɔ Romabii agboklɛfoi atsũi krokomɛi lɛ, belɛ eji he ko ni mli ejɔ, ni ewo duŋ, kɛ emli muji, he ni kɔsɔ̃ŋkɔ̃sɔ̃i woo kɛ piŋmɔi sɔrɔtoi fɛɛ yɔɔ.

Ní aaayɔse mɔ ko akɛ eji gboklɛfonyo tamɔ Paulo naanyo lɛ ji oshara nifeemɔ. Eyɛ oshara waa po akɛ aaaya nɔ asara lɛ. Ní mɔ ko aaajie ehe kpo yɛ faŋŋ mli etsɔɔ akɛ eji Kristofonyo lɛ ji he ni akɛwoɔ tsuŋwoo kɛ piŋmɔ kɛmiibote gbele mli lɛ mli. Shi Onesiforo mii shɛɛɛ ehe akɛ eeesara lɛ shikome aloo shii enyɔ pɛ. Efeee lɛ hiɛgbele, ni asaŋ esheee gbeyei akɛ eeefee nakai “kpitiokpitio.” Onesiforo hi shi lɛɛlɛŋ yɛ egbɛi lɛ shishinumɔ naa, “Mɔ ni He Yɔɔ Sɛɛnamɔ,” ni ekɛ ekãawoo kɛ yelikɛbuamɔ ni suɔmɔ yɔɔ mli ha yɛ osharai fɛɛ sɛɛ.

Mɛni hewɔ Onesiforo fee enɛɛmɛi fɛɛ? Brian Rapske ŋma akɛ: “Jeee gbɔmɔtsoŋ piŋmɔi pɛ anáa yɛ gboklɛfoi atsuŋwoo mli, shi moŋ eji he ko ni afeɔ yeyeeye waa yɛ, yɛ nɔnyɛɛ ni ekɛbaa gboklɛfonyo lɛ nɔ lɛ hewɔ. Yɛ sane ni tamɔ nɛkɛ mli lɛ, puemɔ yɛ gbɔmɔtsoŋ kɛ ekãawoo wiemɔi ni yelikɛbualɔi kɛhaa lɛ baafee hewalɛwoo babaoo yɛ henumɔŋ kɛha gboklɛfonyo lɛ.” Eka shi faŋŋ akɛ Onesiforo yɔse enɛ, no hewɔ ni ekɛ ekãa kpɛtɛ enaanyo lɛ he ni efi esɛɛ lɛ. Kwɛ bɔ ni Paulo hiɛ baasɔ yelikɛbuamɔ ni tamɔ nɛkɛ lɛ eha!

Mɛni Ba Onesiforo Nɔ?

Yɛ Paulo wolo ni ji enyɔ ni eŋma eyaha Timoteo lɛ mli lɛ, ekɛ ŋamɔi maje Onesiforo shiabii lɛ ni ekɛɛ yɛ ehewɔ akɛ: “Nuntsɔ lɛ aha ená [Yehowa, NW] dɛŋ mɔbɔnalɛ yɛ nakai gbi lɛ nɔ.” (2 Timoteo 1:18; 4:19) Gbɔmɛi pii susuɔ akɛ wiemɔi ni ji “yɛ nakai gbi lɛ nɔ” lɛ kɔɔ Nyɔŋmɔ kojomɔ gbi lɛ he, ni no hewɔ lɛ, amɛmuɔ sane naa akɛ Onesiforo egbo. Kɛ nakai ji sane lɛ, P. N. Harrison susuɔ akɛ ekolɛ: “Onesiforo kɛ ehe ewo oshara nifeemɔ nɛɛ mli shikome ekoŋŋ fe nine, ni ekɛ ewala ewo . . . he nyɔmɔ.” Shi ekolɛ Onesiforo bɛ shia, aloo ekolɛ Paulo kɛ lɛ fata eshiabii muu lɛ fɛɛ he beni ekɛ ŋamɔi lɛ majeɔ lɛ.

Gbɔmɛi komɛi heɔ amɛyeɔ akɛ sane ko ni he hiaa waa yɛ wiemɔ ni ji: “Nuntsɔ lɛ aha ená [Yehowa NW] dɛŋ mɔbɔnalɛ yɛ nakai gbi lɛ nɔ” lɛ mli. Amɛnuɔ he akɛ wiemɔi nɛɛ maa faikpamɔ sɔlemɔi ni asɔleɔ ahaa susumai ni eshi ni yɛ wala mli lɛ, ekolɛ amɛmiipiŋ yɛ mumɔŋ maŋtsɛyelihe ko. Shi kɛlɛ, susumɔ ni tamɔ nakai lɛ teɔ shi ewoɔ Ŋmalɛ mli nitsɔɔmɔ akɛ gbohii lɛ leee nɔ ko nɔ ko lɛ. (Jajelɔ 9:5, 10) Kɛji akɛ Onesiforo egbo po lɛ, nɔ ni Paulo tsɔɔ nɔŋŋ ji akɛ, Nyɔŋmɔ baana enanemɛi lɛ mɔbɔ. Taakɛ R. F. Horton kɛɛ lɛ: “Esa akɛ wɔshwe nii ni tamɔ nakai wɔha mɔ fɛɛ mɔ. Shi akɛ aaasɔle aha gbohii lɛ, ni afee Mass aha amɛ lɛ ji nɔ ko ni bɛ [bɔfo] lɛ jwɛŋmɔ mli kwraa.”

Nyɛhaa Wɔfea Anɔkwa Miishɛjelɔi

Kɛ Onesiforo laaje ewala lɛɛlɛŋ aloo elaajeee lɛ yɛ be mli ni eyeɔ ebuaa Paulo lɛ jio, eka shi faŋŋ akɛ ekɛ ehe wo oshara mli koni ena bɔfo lɛ, ni eyasara lɛ yɛ gboklɛfoi atsũ mli. Ni ŋwanejee ko bɛ he akɛ Paulo hiɛ sɔ sɛɛfimɔ kɛ ekãawoo ni he hiaa waa ni enine shɛ nɔ kɛjɛ Onesiforo dɛŋ lɛ.

Kɛ aaka Kristofoi, aawa amɛyi loo awo amɛ tsuŋ lɛ, wɔbaanyɛ wɔshɛje amɛmii, ni wɔwo amɛ hewalɛ. No hewɔ lɛ, eba akɛ, wɔɔsɔle wɔha amɛ, ni wɔjɛ suɔmɔ mli wɔfee nɔ fɛɛ nɔ ni wɔɔnyɛ ni wɔkɛye wɔbua amɛ. (Yohane 13:35; 1 Tesalonikabii 5:25) Taakɛ Onesiforo ji lɛ, nyɛhaa wɔfea miishɛjelɔi ni yɔɔ ekãa.

[Mfoniri ni yɔɔ baafa 31]

Onesiforo kɛ ekãa shɛje bɔfo Paulo ni awo lɛ tsuŋ lɛ mii