Okɛ Ohe Afɔ Hewalɛ ni Nyɔŋmɔ Kɛhaa lɛ Nɔ

Timoteo Wolo ni ji Enyɔ lɛ Mli Saji Otii

YEHOWA kɛ hewalɛ haa etsuji koni amɛnyɛ amɛdamɔ kaai kɛ yiwaa naa. Ni kwɛ bɔ ni hewalɛ ni Nyɔŋmɔ kɛhaa lɛ he hiaa Timoteo kɛ Kristofoi krokomɛi lɛ waa ha! La ni shãa nii kpata Roma hiɛ yɛ afi 64 Ŋ.B., ni anu yɛ dujiaŋ akɛ Maŋtsɛ Nero ji mɔ ni wo la lɛ. Bɔni afee ni eye ehe lɛ, ekɛ shwamɔ lɛ fɔ Kristofoi lɛ anɔ, ni eka shi faŋŋ akɛ enɛ tee yiwaa babaoo shi. Eeenyɛ eba akɛ nakai beaŋ (aaafee 65 Ŋ.B.) lɛ, awo bɔfo Paulo tsuŋ ekoŋŋ yɛ Roma. Eyɛ mli akɛ gbele ka ehiɛ moŋ, shi eŋma ewolo ni ji enyɔ lɛ eyaha Timoteo.

Paulo wolo lɛ saa Timoteo koni eku hemɔkɛyelikwalɔi lɛ anaa ni edamɔ shi shiŋŋ yɛ yiwaa mli. Ewo lɛ hewalɛ koni eya nɔ eshwere yɛ mumɔŋ ni egba lɛ shihilɛ mli ni Paulo yɔɔ yɛ tsuŋwoo he lɛ. Wolo lɛ yeɔ buaa mɛi ni kaneɔ lɛ hu koni amɛkɛ amɛhe afɔ hewalɛ ni Nyɔŋmɔ kɛhaa lɛ nɔ.

Miamɔ Ohiɛ yɛ Amanehulu Mli ni Okɛ Mlijɔlɛ Atsɔɔ Nii

Nyɔŋmɔ kɛ hewalɛ haa wɔ koni wɔdamɔ yiwaa naa akɛ sanekpakpa jajelɔi. (1:​1-18) Paulo hiɛ kpaaa Timoteo nɔ kɔkɔɔkɔ yɛ esɔlemɔi amli, ni ekai ehemɔkɛyeli ni osato bɛ mli lɛ. ‘Jeee hegbeyeiwoo mumɔ’ Nyɔŋmɔ kɛha Timoteo, ‘shi moŋ hewalɛ kɛ suɔmɔ kɛ jwɛŋmɔ ni mli ka shi nɔ. No hewɔ lɛ ehiɛ akagbo yɛ odaseyeli kɛ amanehulu ni enaa yɛ sanekpakpa lɛ hewɔ lɛ he. Awo lɛ hewalɛ akɛ “hiɛmɔ tsamɔ wiemɔi ni onu yɛ [Paulo] minaa . . . lɛ mli,” taakɛ bɔ ni esa akɛ wɔ hu wɔkɛ wɔhe akpɛtɛ Kristofoi anɔkwale ŋmiiŋmi lɛ he kɛ mɛi krokomɛi tsi amɛhe kɛjɛ he po lɛ.

Esa akɛ atuu nibii ni Paulo tsɔɔ lɛ awo hii anɔkwafoi ni baatsɔɔ mɛi krokomɛi anii lɛ adɛŋ. (2:​1-26) Awo Timoteo hewalɛ koni efee Kristo tabilɔ kpakpa, eye anɔkwa kɛ eena amanehulu. Paulo diɛŋtsɛ na amanehulu yɛ boklɛfoi atsuŋ yɛ sanekpakpa lɛ shiɛmɔ hewɔ. Ewo Timoteo hewalɛ koni efee bɔ fɛɛ bɔ ni eeenyɛ ni ekɛ ehe atsɔɔ akɛ Nyɔŋmɔ nitsulɔ ni sa, ni etsi ehe kɛjɛ yakayaka wiemɔ ni buleɔ krɔŋkrɔŋ nii lɛ ahe. Ni akɛɛ lɛ akɛ esa akɛ Nuŋtsɔ lɛ tsulɔ lɛ kɛ mlijɔlɛ atsɔɔ mɛi anii.

Shiɛmɔ Wiemɔ Lɛ!

Hewalɛ ni Nyɔŋmɔ kɛhaa lɛ he baahia koni akɛdamɔ naagbee gbii lɛ anaa ni akɛfi Ŋmalɛ mli anɔkwale lɛ sɛɛ. (3:​1-17) Gbɔmɛi baate shi yɛ mɛi ni sheee Nyɔŋmɔ gbeyei lɛ ateŋ, ‘mɛi ni kaseɔ nii daa shi amɛshɛɛɛ anɔkwale nilee lɛ he.’ Nɛkɛ ‘gbɔmɛi fɔji kɛ shishiulɔi nɛɛ baawo wu yɛ efɔŋ mli, amɛlakaa mɛi ni amɛ hu alakaa amɛ.’ Shi esa akɛ Timoteo ‘aya nɔ yɛ nii ni ekase lɛ mli.’ Wɔ hu nakai nɔŋŋ, akɛni wɔle akɛ ‘Ŋmalɛ fɛɛ Ŋmalɛ jɛ Nyɔŋmɔ mumɔ mli, ni ehe yɛ sɛɛnamɔ kɛha nitsɔɔmɔ, mɔ hiɛkamɔ, nibii ajajemɔ, kɛ tsɔsemɔ yɛ jalɛ mli, koni Nyɔŋmɔ gbɔmɔ lɛ aye emuu, ni asaa lɛ aha nitsumɔ kpakpa fɛɛ nitsumɔ kpakpa.’

Esa akɛ Timoteo aku hemɔkɛyeli kwalɔi anaa ni egbe esɔɔmɔ lɛ naa. (4:​1-22) Ebaanyɛ efee nakai kɛtsɔ ‘wiemɔ lɛ shiɛmɔ’ kɛ ehe ni ekɛaakpɛtɛ he lɛ nɔ. Enɛ he miihia ejaakɛ asafo lɛ kɛ ‘haomɔ be’ miikpe ni mɛi komɛi miitsɔɔ apasa tsɔɔmɔi. Yehowa Odasefoi hu kɛ amɛhe kpɛtɛɔ Nyɔŋmɔ Wiemɔ lɛ he bianɛ, ni amɛkɛ hehiamɔ shiɛɔ enɛ yɛ asafo lɛ mli kɛ esɛɛ fɛɛ, yɛ shihilɛi ni ehiii po mli. Paulo ‘ehiɛ hemɔkɛyeli lɛ mli,’ eyɛ mli akɛ mɛi komɛi kwa lɛ. Shi ‘Nuŋtsɔ lɛ kɛ hewalɛ wo emli koni atsɔ enɔ agbe shiɛmɔ lɛ naa kwraa.’ Eba akɛ wɔ hu wɔkɛ wɔhe aaafɔ hewalɛ ni Nyɔŋmɔ kɛhaa lɛ nɔ ni wɔya nɔ wɔshiɛ sanekpakpa lɛ.

[Akrabatsa/Mfoniri ni yɔɔ baafa 31]

Tabilɔ Kpakpa: Paulo wo Timoteo hewalɛ akɛ: “Miamɔ ohiɛ yɛ amanehulu mli, taakɛ Yesu Kristo tabilɔ kpakpa ko. Mɔ ko enyiɛɛɛ ta gbɛ ni ekɛ ehe wo shia saji amli, koni esa mɔ ni fa lɛ kɛtee ta lɛŋ lɛ hiɛ.’ (2 Timoteo 2:​3, 4) Roma asraafonyo ni nyiɛɔ shikpɔŋ ’miaa ehiɛ yɛ amanehulu mli’ beni ehiɛ tawuu nii ni tsii, lema, kɛntɛŋ, gbii etɛ niyenii, kɛ nibii krokomɛi lɛ. (Josephus’ Wars of the Jews, Book 3, yitso 5) Ekɛ ehe wooo jarayeli nibii amli, ejaakɛ enɛ esaŋ enuŋtsɔ lɛ hiɛ, ni awoɔ shika ni efiteɔ lɛ hu he nyɔmɔ. Nakai nɔŋŋ hu Kristofonyo naa amanehulu yɛ ‘Kristo tabilɔ kpakpa ko’ ni eji hewɔ. Eyɛ mli akɛ ekɛ ehe baawo heloo naa nitsumɔ ko mli yɛ je lɛŋ ni ekɛtsu Ŋmalɛ naa gbɛnaa nii ni jwere enɔ lɛ lɛ ahe nii moŋ, shi esaaa akɛ eŋmɛɔ gbɛ ni heloo gbɛfaŋ nibii ahe nitsumɔ tuutu lɛ tsiɔ lɛ gbɛ koni ekpa mumɔŋ ta lɛ wuu. (1 Tesalonikabii 2:⁠9) Ekɛ shia kɛ shia odase ni eyeɔ lɛ fɔ̃ɔ ‘mumɔŋ klante ni ji Nyɔŋmɔ Wiemɔ lɛ,” ni eyeɔ ebuaa koni gbɔmɛi aye amɛhe kɛjɛ apasa jamɔ mli. (Efesobii 6:​11-17: Yohane 8:​31, 32) Akɛni oshara eba wala he hewɔ lɛ, ha Kristofoi asraafoi fɛɛ aya nɔ asa Yesu Kristo kɛ Yehowa Nyɔŋmɔ hiɛ yɛ nɛkɛ gbɛ nɔ.