Eunike kɛ Loise Nitsɔɔlɔi ni Feɔ Nɔkwɛmɔnɔ Kpakpa

Akɛ Yehowa sɔɔlɔi lɛ, wɔle akɛ jamɔŋ nitsɔɔmɔ ni mɔɔ shi ni wɔkɛaaha wɔbii lɛ ji gbɛnaanii ni hiɛdɔɔ yɔɔ mli. Yɛ shihilɛi kpakpai amli po lɛ, gbɛtsii nii kɛ naagbai sɔrɔtoi baanyɛ afata nitsumɔ nɛɛ he. Enɛ mli bawaa waa kɛ́ fɔlɔ Kristofonyo lɛ kɛ nakai kaa lɛ miikpe yɛ shia ni jamɔ egbala mli lɛ mli. Shihilɛ ni tamɔ nɛkɛ jeee nɔ̃ hee. Ŋmalɛi lɛ gbaa wɔ fɔlɔ ko ni na akɛ eyɛ shihilɛ ni tamɔ nɛkɛ mli yɛ klɛŋklɛŋ afii oha Ŋ.B. lɛ he sane.

Yoo ko ni atsɛɔ lɛ Eunike lɛ weku hi shi yɛ Listra, maŋtiase ko ni yɔɔ Likaonia kpokpaa ni yɔɔ Asia Bibioo lɛ wuoyi-teŋgbɛ lɛ mli. Listra ji maŋ bibioo ko ni he bɛ sɛɛnamɔ tsɔ, ni yɔɔ maŋtiase lɛ sɛɛ. No mli lɛ eji Roma maŋ bibioo ko ni atsɛɔ lɛ Julia Felix Gemina Lustra, ní Augustus Caesar to shishi koni ekɛku ojotswalɔi ni yɔɔ hei ni bɛŋkɛ jɛmɛ lɛ anitsumɔi anaa. Eunike ji Yudanyo Kristofonyo ni kɛ ewu Helanyo, ebinuu Timoteo, kɛ enyɛ Loise hi shi yɛ shia ni jamɔ egbala mli lɛ mli.—Bɔfoi lɛ Asaji 16:1-3.

Ekolɛ, Yudafoi fioo pɛ yɔɔ Listra, ejaakɛ Biblia lɛ etsĩii tã akɛ kpeehe ko yɛ jɛmɛ, eyɛ mli akɛ Yudafoi yɛ Ikoniom, aaafee kilomitai 30 kɛyaa. (Bɔfoi lɛ Asaji 14:19) No hewɔ lɛ efeŋ mlɛo kɛha Eunike akɛ eeetsu ehemɔkɛyeli lɛ he nii. Anɔkwale ni eji akɛ afooo Timoteo ketia beni afɔ lɛ sɛɛ lɛ ha woloŋlelɔi komɛi susu nɔŋŋ akɛ Eunike wu te shi ewo jwɛŋmɔ ni tamɔ nakai.

Shi, jeee Eunike pɛ yɔɔ ehemɔkɛyeli lɛ. Etamɔ nɔ ni Timoteo nine shɛ nitsɔɔmɔ ni ená yɛ “ŋmalɛi krɔŋkrɔŋi lɛ” amli lɛ nɔ kɛjɛ enyɛ kɛ enaa ni ji enyɛ mami Loise fɛɛ ŋɔɔ.a Bɔfo Paulo wo Timoteo hewalɛ akɛ: “Hii shi yɛ nii ni okase ni oyɔɔ hewalɛ yɛ nɔ lɛ amli, ejaakɛ ole mɔ naa ni okase yɛ, ni ogbekɛbiiashi ojɛ ole ŋmalɛi krɔŋkrɔŋi lɛ, ní aaanyɛ aha ole nii ni atsɔ Kristo Yesu nɔ hemɔkɛyeli nɔ kɛya yiwalaheremɔ mli lɛ.”—2 Timoteo 3:14, 15.

Nitsɔɔmɔ ‘Kɛjɛ Gbekɛbiiashi’

Beni Paulo kɛɛ akɛ Timoteo nine shɛ nitsɔɔmɔ yɛ “ŋmalɛi krɔŋkrɔŋi lɛ” amli lɛ nɔ ‘kɛjɛ gbekɛbiiashi’ lɛ, enɛ kɛ odaseyeli miitsɔɔ akɛ kɛjɛ beni eji abifao. Enɛ kɛ Hela wiemɔ (breʹphos) ni ekɛtsu nii ni bei pii lɛ etsɔɔ gbekɛ ŋmɔŋ lɛ kpãa gbee. (Okɛto Luka 2:12, 16 he.) No hewɔ lɛ Eunike kɛ hiɛdɔɔ tsu gbɛnaanii ni Nyɔŋmɔ kɛha lɛ lɛ he nii, ni efiteee be kwraa kɛjɛ shishijee akɛ ekɛ tsɔsemɔ ni baaye abua Timoteo koni eda ni ebatsɔ Nyɔŋmɔ sɔɔlɔ ni etu ehe eha lɛ aaaha lɛ.—5 Mose 6:6-9; Abɛi 1:8.

Aha Timoteo ‘ná hewalɛ yɛ’ Ŋmalɛ naa anɔkwalei lɛ ‘anɔ.’ Taakɛ Hela wiemɔ komekomei ashishitsɔɔmɔ wolo ko tsɔɔ lɛ, wiemɔ ni Paulo kɛtsu nii yɛ biɛ lɛ tsɔɔ akɛ, “koni akɔne yiŋ jogbaŋŋ; koni aha aná nɔmimaa” yɛ nɔ ko he. Ŋwanejee ko bɛ he akɛ, be kɛ mɔdɛŋbɔɔ saŋŋ he bahia koni ato hemɔkɛyeli ni ma shi shiŋŋ tamɔ nɛkɛ shishi awo Timoteo tsui mli, koni aye abua lɛ ni esusu Nyɔŋmɔ Wiemɔ lɛ he koni ená emli hemɔkɛyeli. Belɛ eyɛ faŋŋ akɛ, Eunike kɛ Loise fɛɛ tsu nii waa koni amɛtsɔɔ Timoteo nii kɛjɛ Ŋmalɛi lɛ amli. Ni mɛɛ nyɔmɔwoo nakai yei ni sheɔ Nyɔŋmɔ gbeyei lɛ ná nɛkɛ! Paulo nyɛ́ eŋma yɛ Timoteo he akɛ: “Mihiɛ yɛ ohemɔkɛyeli ni apasa bɛ mli lɛ nɔ; nɔ ni tsutsu ni eyɔɔ onaa Loise kɛ onyɛ Eunike mli, ni miyɔɔ hewalɛ yɛ nɔ akɛ eyɛ bo hu omli lɛ.”—2 Timoteo 1:5.

Mɛɛ gbɛfaŋnɔ ni he hiaa Eunike kɛ Loise tsu he nii nɛkɛ yɛ Timoteo shihilɛ mli! Yɛ enɛ gbɛfaŋ lɛ, niŋmalɔ David Read kɛɛ: “Kɛ bɔfo lɛ he eye akɛ nɔ ko kwraa he ehiaaa shi moŋ Timoteo diɛŋtsɛ niiashikpamɔ ni tsɔɔ etsakemɔ kɛmiiya jamɔ kroko mli lɛ he hiaa lɛ, kulɛ ebaakai lɛ yɛ he amrɔ nɔŋŋ. Shi klɛŋklɛŋ nii ni eyɔɔ kɛɛmɔ yɛ Timoteo hemɔkɛyeli lɛ he ji akɛ nakai hemɔkɛyeli lɛ nɔŋŋ ‘yɛ ekãa yɛ Loise . . . kɛ Eunike mli’ momo.” Wiemɔ ni Paulo wie yɛ Loise, Eunike, kɛ Timoteo hemɔkɛyeli lɛ he lɛ tsɔɔ akɛ bei pii lɛ mra be mli Ŋmalɛ naa nitsɔɔmɔ ni fɔlɔi kɛ naamɛi po kɛhaa yɛ shia lɛ ji nɔ ni he hiaa titri yɛ gbɛ ni atsɔɔ nɔ aleɔ bɔ ni gbekɛ ko wɔsɛɛ mumɔŋ shihilɛ baatamɔ. Ani esaaa akɛ no haa weku mli bii kɛ hiɛdɔɔ susuɔ nɔ ni amɛfeɔ koni amɛtsu gbɛnaanii nɛɛ ahe nii yɛ Nyɔŋmɔ kɛ amɛbii lɛ ahe lɛ he?

Ekolɛ Paulo hu miisusu shia shihilɛ ni Loise kɛ Eunike efee he. Ekolɛ yɛ bɔfo lɛ klɛŋklɛŋ shihilɛ yɛ Listra, aaafee afi 47 loo 48 Ŋ.B. lɛ, etee amɛshia. Ekolɛ yei enyɔ lɛ tsake kɛtee Kristojamɔ mli yɛ nakai be lɛ mli. (Bɔfoi lɛ Asaji 14:8-20) Ekolɛ wekukpaai kpakpai ni miishɛɛ yɔɔ mli ni anáa mli ŋɔɔmɔ yɛ nakai shia lɛ ná wiemɔi ni Paulo sumɔɔ akɛ ekɛtsu nii beni ewieɔ Loise he akɛ Timoteo ‘naa’ lɛ nɔ hewalɛ. Taakɛ woloŋlelɔ Ceslas Spicq tsɔɔ lɛ, Hela wiemɔ (mamʹme, ni akɛtoɔ woloŋlee mli wiemɔ ni bulɛ yɔɔ mli ni ji teʹthe he lɛ) ni ekɛtsu nii lɛ ji “gbekɛ ko wiemɔ ni tsɔɔ suɔmɔ” ni ekɛtsɛɔ enaa, ni yɛ shishinumɔ nɛɛ naa lɛ, etsɔɔ “sɔrɔtofeemɔ fioo ni yɔɔ wekukpaa kpakpa kɛ hedɔɔ teŋ.”

Timoteo Shia Shĩmɔ

Atsɔɔɔ bɔ ni Eunike gbalashihilɛ lɛ ji ha mli jogbaŋŋ beni Paulo yasara Listra nɔ ni ji shii enyɔ nɔ (aaafee 50 Ŋ.B. lɛ). Woloŋlelɔi babaoo susuɔ akɛ eji okulafo. Yɛ fɛɛ sɛɛ lɛ, yɛ Timoteo nyɛ kɛ agbɛnɛ enaa gbɛtsɔɔmɔ shishi lɛ, no mli lɛ éda etsɔ oblanyo fɛfɛo, ekolɛ eye aaafee afii 20 yɛ nakai beaŋ. No mli lɛ “nyɛmimɛi lɛ ni yɔɔ Listra kɛ Ikoniom lɛ tãa ehe sane kpakpa.” (Bɔfoi lɛ Asaji 16:2) Eyɛ faŋŋ akɛ, adu suɔmɔ ni ayɔɔ akɛ aaagbɛ Maŋtsɛyeli sanekpakpa lɛ ashwã lɛ awo Timoteo tsui mli, ejaakɛ ekpɛlɛ Paulo ninefɔ̃ɔ koni ebafata lɛ kɛ Sila he kɛfã gbɛ kɛya amɛmaŋsɛɛ sanekpakpa nitsumɔ lɛ mli lɛ nɔ.

Susumɔ bɔ ni Eunike kɛ Loise baanu he amɛha beni eshwɛ fioo ni Timoteo baaya lɛ he okwɛ! Amɛle akɛ beni Paulo basara amɛmaŋtiase lɛ klɛŋklɛŋ lɛ, no mli lɛ atswia bɔfo lɛ tɛi ni ashi lɛ afɔ̃ shi koni egbo. (Bɔfoi lɛ Asaji 14:19) No hewɔ lɛ efeŋ mlɛo akɛ amɛaaha oblanyo Timoteo aya. Ekolɛ amɛsusu bei abɔ ni ebaaye kɛ kɛji ebaaku esɛɛ eba shweshweeshwe lɛ he. Yɛ shihilɛi ni tamɔ nɛkɛ ni aaanyɛ aba mli ni ekolɛ enyɛ kɛ enaa ye he ŋkɔmɔ lɛ fɛɛ sɛɛ lɛ, ŋwanejee ko bɛ he akɛ amɛwo lɛ hewalɛ koni ekpɛlɛ hegbɛ krɛdɛɛ ni baaha enyɛ esɔmɔ Yehowa jogbaŋŋ kɛmɔ shi lɛ nɔ.

Nikasemɔi ni He Yɔɔ Sɛɛnamɔ

Abaanyɛ akase nibii babaoo kɛ́ aasusu Eunike kɛ Loise he jogbaŋŋ lɛ. Hemɔkɛyeli tsirɛ amɛ koni amɛha Timoteo mumɔŋ tsɔsemɔ kpakpa. Eka shi faŋŋ akɛ Nyɔŋmɔjamɔ he nɔkwɛmɔnɔ ni tsɔɔ mumɔŋ dalɛ, ni yɔɔ shiŋŋ ni naamɛi feɔ amɛfɔɔ shi amɛhaa amɛnabii kɛ mɛi krokomɛi lɛ he baanyɛ aba sɛɛnamɔ aha Kristofoi asafo muu lɛ fɛɛ. (Tito 2:3-5) Nakai nɔŋŋ Eunike nɔkwɛmɔnɔ lɛ kaiɔ nyɛmɛi ni amɛwumɛi heee yeee lɛ yɛ gbɛnaanii kɛ nyɔmɔwoi ni yɔɔ mumɔŋ tsɔsemɔ ni amɛkɛhaa amɛbii lɛ ahe. Ekolɛ enɛ feemɔ biɔ ekãa babaoo yɛ bei komɛi amli, titri lɛ kɛ tsɛ lɛ bɛ ehefatalɔ lɛ jamɔŋ hemɔkɛyelii ahe jwɛŋmɔ kpakpa. Ebiɔ hu koni akɛ ŋaa atsu nii, akɛni esa akɛ ŋa Kristofonyo lɛ abu ewu lɛ yitsoyeli lɛ hewɔ.

Awo Loise kɛ Eunike hemɔkɛyeli, mɔdɛŋbɔɔ, kɛ hekwamɔ lɛ he nyɔmɔ kɛtsɔ Timoteo ni amɛna akɛ eeya hiɛ yɛ mumɔŋ kɛyashi beni ebatsɔ maŋsɛɛ sanekpakpa shiɛlɔ kɛ nɔkwɛlɔ ni he esa jogbaŋŋ lɛ nɔ. (Filipibii 2:19-22) Nakai nɔŋŋ ŋmɛnɛ, Ŋmalɛ naa anɔkwalei ni wɔɔtsɔɔ wɔbii lɛ biɔ be, tsuishitoo, kɛ faishitswaa, shi nɔ kpakpa ni jɛɔ mli kɛbaa lɛ haa anaa akɛ mɔdɛŋ fɛɛ ni abɔɔ lɛ he yɛ sɛɛnamɔ lɛɛlɛŋ. Gbekɛbii Kristofoi babaoo ni feɔ nɔkwɛmɔnɔ kpakpa ni átsɔɔ amɛ ‘ŋmalɛi krɔŋkrɔŋi lɛ kɛjɛ amɛgbekɛbiiashi’ yɛ shia ni jamɔ egbala mli lɛ mli lɛ kɛ miishɛɛ babaoo bahaa amɛfɔlɔ ni sheɔ Nyɔŋmɔ gbeyei lɛ. Ni kwɛ bɔ ni abɛbua lɛ ni kɛɔ akɛ: “Mɔ ni fɔɔ bi nilelɔ lɛ, emii aaashɛ ehe” lɛ ji anɔkwale!—Abɛi 23:23-25.

Bɔfo Yohane kɛɛ yɛ emumɔŋ bii lɛ ahe akɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale mli lɛ.” (3 Yohane 4) Lɛɛlɛŋ, mɛi babaoo ni etsɔɔ akɛ amɛtamɔ Eunike kɛ Loise, nitsɔɔlɔi enyɔ ni feɔ nɔkwɛmɔnɔ lɛ kɛ henumɔ ni atsɔɔ mli yɛ nakai wiemɔi lɛ amli lɛ kpãa gbee.

[Shishigbɛ niŋmai]