Nyɛlɛa Nyɔŋmɔ Asafoku Lɛ Yɛ Suɔmɔ Naa
“Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa.”—1 PETRO 5:2.
1. Mɛni hewɔ esa akɛ wɔkpa Kristofoi onukpai lɛ gbɛ akɛ amɛaajɛ ‘amɛsuɔmɔ mli amɛlɛ Nyɔŋmɔ asafoku lɛ’?
YEHOWA jɛɔ suɔmɔ mli elɛɔ ewebii lɛ.(Lala 23:1-4) “Tookwɛlɔ kpakpa” Yesu Kristo jɛ esuɔmɔ mli ekɛ ewala akɛ adesa ni yeɔ emuu lɛ ha yɛ gbɔmɛi ni tamɔ gwantɛŋi lɛ ahewɔ. (Yohane 10:11-15) No hewɔ lɛ, bɔfo Petro wo Kristofoi onukpai lɛ ŋaa koni ‘amɛlɛ Nyɔŋmɔ asafoku lɛ yɛ suɔmɔ mli.’—1 Petro 5:2.
2. Mɛɛ sanebimɔi esa akɛ wɔsusu he yɛ Kristofoi onukpai lɛ akwɛmɔ loo saramɔ nitsumɔ lɛ he?
2 Suɔmɔ mli ni ajɛɔ afeɔ nii lɛ ji Nyɔŋmɔ tsuji akadimɔ nii. (Lala 110:3) Shi aatao babaoo fe nifeemɔ he suɔmɔ ni Kristofonyo nuu lɛ yɔɔ dani ahala lɛ akɛ nɔkwɛlɔ, loo tookwɛlɔ bibioo. Namɛi ahe saa akɛ tookwɛlɔi ni tamɔ nɛkɛ? Amɛ kwɛmɔ nitsumɔ lɛ kɔɔ mɛni he? Mɛni ji gbɛ ni hi fe fɛɛ ni atsɔɔ nɔ atsuɔ enɛ he nii?
We loo Shia Nɔkwɛmɔ
3. Mɛni hewɔ abaanyɛ akɛɛ akɛ gbɛ ni Kristofonyo nuu tsɔɔ nɔ ekwɛɔ eweku lɛ saa ehe ni aaasa akɛ nɔkwɛlɔ yɛ asafo lɛ mli lɛ he?
3 Dani aaahala nuu ko awo “nɔkwɛmɔ nitsumɔ” lɛ mli lɛ, esa akɛ ana Ŋmalɛ naa taomɔ nii komɛi yɛ ehe. (1 Timoteo 3:1-7; Tito 1:5-9) Sane kome ji akɛ, bɔfo Paulo kɛɛ esa akɛ nɔkwɛlɔ lɛ afee “mɔ ni yeɔ lɛ diɛŋtsɛ ewe nɔ jogbaŋŋ, ni ebii boɔ lɛ toi kɛ woo fɛɛ.” Yiŋtoo kpakpa ko yɛ enɛ sɛɛ, ejaakɛ Paulo kɛɛ: “Shi kɛ mɔ ko leee lɛ diɛŋtsɛ ewe nɔ yeli lɛ, te eeefee tɛŋŋ ekwɛ Nyɔŋmɔ asafo lɛ?” (1 Timoteo 3:4,5) Beni Tito halaa hii onukpai yɛ asafoi ni yɔɔ Kreta ŋshɔkpɔ lɛ nɔ lɛ amli lɛ, akɛɛ lɛ ni etao “mɔ ko . . . ni kpa ko bɛ ehe, ni eji mɔ ni yɔɔ ŋa kome, ni yɔɔ bii ni heɔ yeɔ ni awieee amɛhe akɛ nyenyeŋtswibɔlɔi loo toigbolɔi ji amɛ.” (Tito 1:6) Hɛɛ, esa akɛ asusu gbɛ ni Kristofonyo nuu lɛ tsɔɔ nɔ ekwɛɔ eweku lɛ he yɛ be mli ni akwɛɔ akɛ esa kɛha gbɛnaa nii ni tsii ni ji asafo lɛ kwɛmɔ lo lɛ.
4. Mɛɛ gbɛ nɔ fɔlɔi ni ji Kristofoi tsɔɔ nɔ amɛjieɔ suɔmɔ kpo amɛtsɔɔ amɛwekui lɛ yɛ, kɛfata daa Biblia kasemɔ kɛ sɔlemɔ he?
4 Hii ni yeɔ amɛ diɛŋtsɛ amɛwe nɔ jogbaŋŋ lɛ feɔ babaoo fe sɔlemɔ kɛ Biblia lɛ ni amɛkɛ amɛwekui kaseɔ daa kɛkɛ. Amɛfee klalo be fɛɛ be akɛ amɛaaye amɛbua amɛsuɔlɔi nɛɛ. Yɛ mɛi ni batsɔmɔɔ fɔlɔi lɛ agbɛfaŋ lɛ, enɛ jeɔ shishi yɛ gbi ni afɔɔ bi lɛ nɔ. Fɔlɔi Kristofoi lɛ le akɛ kɛ amɛkɛ amɛhe kpɛtɛ Nyɔŋmɔ gbeyeishemɔ gbɛ he gbagbalii lɛ, etsɛɛɛ ni amɛbi lɛ hu kɛ ehe woɔ gbɛjianɔ ni amɛto amɛha amɛ Kristofoi anitsumɔi yɛ amɛ daa gbi shihilɛi amli lɛ mli. Bɔ ni tsɛ Kristofonyo lɛ kwɛɔ eweku lɛ nɔ jogbaŋŋ ehaa lɛ jeɔ kpo yɛ ehesaa akɛ onukpa lɛ mli.—Efesobii 5:15,16: Filipibii 3:16.
5. Te tsɛ ni ji Kristofonyo lɛ aaafee tɛŋŋ ale loo atsɔse ebii lɛ yɛ “Nuŋtsɔ [Yehowa] tsɔsemɔ kɛ ŋaawoo lɛ mli”?
5 Tsɛ Kristofonyo ni kɛ henilee kpakpa tsuɔ nii yɛ ewe nɔ kwɛmɔ mli lɛ boɔ Paulo ŋaawoo nɛɛ toi: “Nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli.” (Efesobii 6:4) Weku lɛ ni akɛ amɛ aaakase Biblia lɛ daa, ni nyɛ kɛ bii lɛ fɛɛ fata he lɛ, haa anaa hegbɛ kɛhaa tsɔsemɔ ni suɔmɔ yɔɔ mli. No hewɔ lɛ gbekɛbii lɛ anine shɛɔ “tsɔsemɔ” loo jajemɔ ni tsɔɔ mɔ nii lɛ nɔ. Ni “tsɔsemɔ kɛ ŋaawoo” ni baa lɛ yeɔ buaa gbekɛbii lɛ ateŋ mɔ fɛɛ mɔ ni eleɔ bɔ ni Yehowa kwɛɔ saji ehaa. (5 Mose 4:9; 6:6, 7; Abɛi 3:11; 22:6) Yɛ nɛkɛ mumɔŋ kpee ni miishɛɛ yɔɔ mli nɛɛ shishi lɛ, tsɛ ni susuɔ ebii ahe lɛ boɔ toi jogbaŋŋ kɛ ebii lɛ miiwie. Ekɛ sanebimɔi ni suɔmɔ yɔɔ mli tsuɔ nii koni amɛjɛ amɛsuɔmɔ mli amɛwie nibii ni amɛsusuɔ he kɛ amɛsubaŋi ahe yɛ anɔkwayeli mli. Tsɛ lɛ efeee enii akɛ ele nɔ fɛɛ nɔ ni yaa nɔ yɛ amɛjwɛŋmɔi ni darako lɛ amli. Yɛ anɔkwale mli lɛ, Abɛi 18:13 kɛɔ akɛ, “mɔ ni nuuu sane dani ehereɔ nɔ lɛ, eji buulufeemɔ kɛ hiɛgbele ha lɛ.” Ŋmɛnɛ, fɔlɔi pii naa akɛ shihilɛi ni amɛbii kɛkpeɔ lɛ yɛ sɔrɔto kwraa yɛ nɔ ni amɛkɛkpe beni amɛji gbekɛbii lɛ he. No hewɔ lɛ, tsɛ lɛ baabɔ mɔdɛŋ ni ele nɔ ni hɔ naagba ko sɛɛ lɛ fɛɛ fitsofitso dani etsɔɔ gbɛ ni abaatsɔ nɔ atsu he nii.—Okɛto Yakobo 1:19 he.
6. Mɛni hewɔ esa akɛ tsɛ ni ji Kristofonyo lɛ akwɛ Nyɔŋmɔ Wiemɔ lɛ mli beni eyeɔ ebuaa eweku lɛ?
6 Mɛni baa, yɛ be mli ni mɔ ko ele ebii anaagbai, yeyeeye-feemɔi kɛ subaŋi lɛ? Tsɛ ni kwɛɔ lɛ diɛŋtsɛ ewe nɔ jogbaŋŋ lɛ kwɛɔ Ŋmalɛi lɛ amli, akɛni “ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli” lɛ hewɔ. Etsɔɔ ebii lɛ bɔ ni amɛaafee ni amɛkɛ Biblia mli gbɛtsɔɔmɔi ni jɛ mumɔŋ lɛ atsu nii. Ni yɛ nɛkɛ gbɛ nɔ lɛ, ehaa mɛi ni darako yɛ afii amli lɛ yeɔ “emuu, ni asaa [amɛ] pɛpɛɛpɛ aha[a] nitsumɔ kpakpa fɛɛ nitsumɔ kpakpa.”—2 Timoteo 3:16, 17; Lala 78:1-4.
7. Mɛɛ nɔkwɛmɔ nɔ esa akɛ tsɛmɛi Kristofoi lɛ afee yɛ sɔlemɔ he?
7 Gbekɛbii ni sheɔ Nyɔŋmɔ gbeyei lɛ kɛ shihilɛi ni mli wawai kpeɔ yɛ amɛnanemɛi skulbii ni ji jeŋbii lɛ hewɔ. No hewɔ lɛ mɛɛ gbɛ tsɛmɛi ni ji Kristofoi lɛ aaatsɔ nɔ ni amɛjie amɛbii agbeyeishemɔi nɛɛ kɛya? Gbɛ kome ji kɛtsɔ daa sɔlemɔ ni akɛ amɛ aaafee ni asɔle hu aha amɛ lɛ nɔ. Kɛ nɛkɛ gbekɛbii nɛɛ kɛ shihilɛi ni kaa mɔ kpe lɛ, eka shi faŋŋ akɛ amɛbaakase bɔ ni amɛfɔlɔi kɛ amɛhe fɔɔ Nyɔŋmɔ nɔ lɛ. Gbekɛyoo ko ni eye afii 13, ni abibii lɛ saji dani abaptisi lɛ akɛfee ehenɔjɔɔmɔ kɛha Nyɔŋmɔ lɛ he okadi lɛ gba akɛ, enanemɛi skulbii eye ehe fɛo ni amɛjɛ lɛ aahu. Beni efa ehemɔkɛyeli ni kɔɔ krɔŋkrɔŋ ni la ji ni damɔ Biblia lɛ nɔ lɛ he lɛ, gbekɛbii yei krokomɛi yi lɛ, ni amɛfɛ lajɔ amɛshwie ehe. (Bɔfoi lɛ Asaji 15:28, 29) Ani efee nɔ ko ekɛto amɛ najiaŋ? Dabi. Etsɔɔ mli akɛ: “Mitee nɔ misɔle miha Yehowa koni eye ebua mi ni mato mitsui shi. Mikai hu akɛ mifɔlɔi etsɔɔ mi bɔ ni esa akɛ wɔto wɔtsui shi wɔha efɔŋ yɛ wɔweku nikasemɔ lɛ mli.”—2 Timoteo 2:24.
8. Te onukpa ni bɛ bii lɛ aaafee tɛŋŋ akwɛ ewe nɔ jogbaŋŋ lɛ?
8 Onukpa ni bɛ bii lɛ hu baanyɛ ato gbɛjianɔ bɔ ni sa yɛ mumɔŋ kɛ heloo naa fɛɛ eha mɛi ni yɔɔ ewe lɛ. Mɛi ni fata he ji egbalashihilɛ mli hefatalɔ lɛ kɛ ekolɛ ewekumɛi Kristofoi ni yɔɔ eshia lɛ. (1 Timoteo 5:8) Mɔ ni yeɔ ewe nɔ jogbaŋŋ nɛkɛ lɛ ji taomɔ nii ni esa akɛ ana yɛ nuu ni ahala lɛ ni akɛ gbɛnaa nii ewo edɛŋ akɛ asafoŋ onukpa lɛ he. Belɛ, te esa akɛ onukpai ni ahala amɛ lɛ akwɛ amɛ hegbɛ ni ji gbɛnaa nii ni jwere amɛnɔ yɛ asafo lɛ mli lɛ amɛha tɛŋŋ?
‘Mɔdɛŋbɔɔ Diɛŋtsɛ’ ni Akɛaaye Onukpa
9. Mɛɛ su esa akɛ Kristofoi onukpai lɛ ana yɛ sɔɔmɔ nitsumɔ ni akɛwo amɛdɛŋ lɛ he?
9 Bɔfo Paulo sɔmɔ akɛ Nyɔŋmɔ we, ni ji Kristofoi asafo lɛ ni yɔɔ Kristo yitsoyeli shishi lɛ nɔ tsulɔ-nukpa, yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli. (Efesobii 3:2, 7; 4:15) No sɛɛ lɛ, Paulo wo enanemɛi heyelilɔi ni yɔɔ Roma lɛ ŋaa akɛ: “Duromɔ ni aŋɔha wɔ lɛ naa lɛ, wɔteŋ mɔ fɛɛ mɔ yɛ duromɔ keenii sɔrɔtoi sɔrɔtoi. Kɛji gbalɛ ni lɛ, ha ni egba yɛ hemɔkɛyeli susumɔ lɛ naa; kɛji sɔɔmɔ ni lɛ, ha ehiɛ sɔɔmɔ lɛ nɔŋŋ mli; kɛ tsɔɔlɔ ji mɔ lɛ, ha ehiɛ nitsɔɔmɔ lɛ mli; mɔ ni wieɔ tsɔɔ mɛi lɛ, ehiɛ wiemɔ kɛ tsɔɔmɔ lɛ mli; mɔ ni jaa nii haa mɛi lɛ, efee kɛ tsui krɔŋŋ; mɔ ni yeɔ onukpa lɛ, ebɔ mɔdɛŋ; mɔ ni naa mɔbɔ lɛ, efee kɛ tsuijurɔ.”—Romabii 12:6-8.
10. Mɛɛ nɔkwɛmɔ nɔ Paulo fee efɔ shi kɛha onukpai ni yɔɔ ŋmɛnɛ yɛ Nyɔŋmɔ tooi lɛ anɔkwɛmɔ mli?
10 Paulo kai Tesalonikabii lɛ akɛ: “Wɔwieɔ wɔtsɔɔ nyɛteŋ mɔ fɛɛ mɔ, tamɔ bɔ ni tsɛ ko wieɔ tsɔɔ ebii, ni wɔshɛjeɔ nyɛmii hu, ni wɔma nɔ mi wɔha nyɛ akɛ nyɛnyiɛ bɔ ni sa Nyɔŋmɔ ni tsɛ nyɛ kɛba lɛ diɛŋtsɛ emaŋtsɛyeli kɛ enunyam lɛ mli lɛ hiɛ lɛ.” (1 Tesalonikabii 1:1; 2: 11, 12) Bɔ ni akɛ nɛkɛ ŋaawoo nɛɛ ha yɛ mlijɔlɛ kɛ suɔmɔ mli hewɔ lɛ eha Paulo nyɛ eŋma akɛ: “Wɔmli jɔ yɛ nyɛteŋ, taakɛ bɔ ni biianyɛ hiɛɔ lɛ diɛŋtsɛ ebii dɔdɔɔdɔ lɛ. Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” (1 Tesalonikabii 2:7, 8) Yɛ Paulo nɔkwɛmɔ nɔ ni tamɔ tsɛ ko nɔ lɛ kɛ gbeekpamɔ naa lɛ, onukpai anɔkwafoi lɛ susuɔ mɛi fɛɛ ni yɔɔ asafo lɛ mli lɛ ahe.
11. Mɛɛ gbɛ nɔ onukpai ni ahala amɛ lɛ aaatsɔ ni amɛjie nifeemɔ he tsui ni amɛyɔɔ lɛ kpo yɛ?
11 Esa akɛ mlijɔlɛ kɛ tsuiŋ ni ajɛɔ afeɔ nii akadi suɔmɔ nɔkwɛmɔ nɔ ni wɔ nɔkwɛlɔi Kristofoi anɔkwafoi lɛ jieɔ lɛ kpo lɛ. Gbɛ ni amɛtsɔɔ nɔ amɛtsuɔ nii lɛ tsɔɔ babaoo. Petro wo onukpai lɛ aŋaa ni amɛlɛ Nyɔŋmɔ asafoku lɛ, “jeee nɔnyɛɛ naa” loo “sɛɛnamɔ ni yɔɔ hiɛgbele hewɔ.” (1 Petro 5:2) Woloŋlelɔ William Barclay kɛ kɔkɔbɔɔ ko ha yɛ nɛkɛ sane nɛɛ he, beni eŋma akɛ: “Gbɛ ko yɛ ni atsɔɔ nɔ akpɛlɛɔ nitsumɔ mli gbɛhe loo hegbɛ ko nɔ, kɛ ehe nitsumɔ hu ni tamɔ nɔ ko gbonyo ni eŋɔɔɔ, tamɔ nɔ ni eji tɔlɛ nitsumɔ, tamɔ jatsu ko ni asumɔɔɔ ni atere. Ebaanyɛ enalɛ akɛ abaanyɛ akɛɛ gbɔmɔ ko akɛ etsu nɔ ko, ni ebaatsu, shi ebaatsu enɛ yɛ gbɛ ni ehiii kwraa nɔ akɛ efiteɔ nifeemɔ lɛ fɛɛ. . . . Shi [Petro] kɛɔ akɛ Kristofonyo fɛɛ Kristofonyo he akpokpo yɛ nɛkɛ nitsumɔ nɛɛ tsumɔ mli bɔ ni eeenyɛ, eyɛ mli akɛ ele bɔ ni ejeee mɔ ko ni sa po akɛ etsuɔ nitsumɔ ni tamɔ nɛkɛ lɛ jogbaŋŋ.”
Nɔkwɛlɔi ni Jɛɔ Amɛsuɔmɔ Mli Amɛfeɔ Nii
12. Te Kristofoi onukpai aaafee tɛŋŋ amɛjie suɔmɔ mli ni ajɛɔ afeɔ nii lɛ kpo?
12 Petro wo hewalɛ hu akɛ: “Nyɛlɛa Nyɔŋmɔ asafoku ni yɔɔ nyɛteŋ lɛ . . . yɛ suɔmɔ naa.” Kristofonyo nɔkwɛlɔ ni kwɛɔ tooi lɛ anɔ lɛ jɛɔ esuɔmɔ mli efeɔ nakai yɛ Tookwɛlɔ Kpakpa, Yesu Kristo gbɛtsɔɔmɔ shishi, ni atsirɛɛɛ eyisɛɛ. Esuɔmɔ mli ni ejɛɔ esɔmɔɔ lɛ hu tsɔɔ akɛ Kristofonyo nɔkwɛlɔ lɛ baa ehe shi ehaa hegbɛ ni Yehowa, ‘wɔsusumai alɛlɔ kɛ nɔkwɛlɔ lɛ’ yɔɔ lɛ. (1 Petro 2:25) Kristofonyo tookwɛlɔ bibioo lɛ jɛɔ esuɔmɔ mli ejieɔ bulɛ kpo ehaa teokrase gbɛjianɔtoo lɛ. Efeɔ nakai yɛ be mli ni ekudɔɔ mɛi ni taoɔ ŋaawoo lɛ kɛyaa Nyɔŋmɔ Wiemɔ ni ji Biblia lɛ mli lɛ. Eyɛ mli akɛ niiashikpamɔ baaye abua onukpa ko koni ena ŋaawoo babaoo ni damɔ Biblia lɛ nɔ moŋ, shi enɛ etsɔɔɔ akɛ ebaana Ŋmalɛ mli tsabaa eha naagbai fɛɛ amrɔ nɔŋŋ. Kɛ ele sanebimɔ ko hetoo po lɛ, ebaana akɛ eji nilee gbɛ akɛ lɛ kɛ mɔ ni biɔ sane lɛ fɛɛ akwɛ Watch Tower Publications Index lɛ loo index krokomɛi ni tamɔ nakai lɛ amli. No hewɔ lɛ etsɔɔ nii yɛ gbɛi sɔrɔtoi enyɔ nɔ: Efeɔ gbɛ ni atsɔɔ nɔ anaa saji ni yeɔ buaa lɛ he nɔkwɛmɔ nɔ, ni ekɛ heshibaa tsɔɔ bulɛ kɛhaa Yehowa kɛtsɔɔ jwɛŋmɔ ni egbalaa kɛyaa nɔ ni Nyɔŋmɔ gbɛjianɔtoo lɛ eŋma lɛ nɔ.
13. Mɛɛ susumɔ baanyɛ aye abua onukpai ni amɛkɛ ŋaawoo kpakpa aha, ni amɛtsi amɛhe kɛjɛ mɛɛ naagba he?
13 Mɛni onukpa lɛ baanyɛ afee kɛ aŋmako nɔ ko yɛ sane loo naagba lɛ diɛŋtsɛ he yɛ Asafo lɛ woji amli? Ŋwanejee ko bɛ he akɛ ebaasɔle ebi sane shishinumɔ ni ebaatao Biblia mli shishitoo mlai komɛi ni kɔɔ sane lɛ he. Ekolɛ ebaana akɛ sɛɛnamɔ yɛ he akɛ eeewo ŋaa akɛ mɔ ni taoɔ yelikɛbuamɔ lɛ asusu Yesu nɔkwɛmɔ nɔ lɛ he. Onukpa lɛ baanyɛ abi akɛ: “Kɛ Yesu, Tsɔɔlɔ Kpele lɛ yɛ shihilɛ ni oyɔɔ mli nɛɛ mli lɛ, mɛni osusuɔ akɛ ebaafee?” (1 Korintobii 2:16) Susumɔ ni tamɔ nɛkɛ baaha mɔ ni taoɔ ale nibii amli lɛ akpɛ eyiŋ yɛ nilee mli. Shi kwɛ bɔ ni nilee bɛ mli kwraa ha akɛ onukpa lɛ kɛ lɛ diɛŋtsɛ esusumɔ aaaha tamɔ oookɛɛ eji Ŋmalɛ mli ŋaawoo ni hi! Shi moŋ, onukpai lɛ baanyɛ ni amɛkɛ amɛhe asusu naagbai loo saji ni mli wawai lɛ ahe. Amɛbaanyɛ amɛkɛ saji ni he hiaa lɛ po aba onukpai akpeei ashishi ni onukpai akuu lɛ asusu he. (Abɛi 11:14) Yiŋkpɛi ni baajɛ mli aba lɛ baaha amɛ fɛɛ amɛkpa gbee ni amɛnaabu afee ekome.—1 Korintobii 1:10.
Mlijɔlɛ He Miihia
14, 15. Mɛni ataoɔ yɛ onukpai adɛŋ beni amɛsaa Kristofonyo ko ni ‘nɔtɔmɔ ko ebanina lɛ trukaa lɛ’?
14 Esa akɛ Kristofonyo onukpa lɛ ajie mlijɔlɛ kpo yɛ be mli ni etsɔɔ mɛi krokomɛi anii lɛ, titri lɛ yɛ be mli ni ewoɔ amɛ ŋaa lɛ. Paulo wo ŋaa akɛ: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ, nyɛsaa nakai mɔ lɛ ekoŋŋ yɛ mlijɔlɛ mumɔ mli.” (Galatabii 6:1) Nɔ ni yɔɔ miishɛɛ ji akɛ, Hela wiemɔ ni atsɔɔ shishi yɛ biɛ akɛ “nyɛsaa” lɛ kɔɔ tsofa-feemɔ mli wiemɔ ni akɛtsɔɔ wui ajajemɔ koni mɔ lɛ akaje kpa ni ekɛhi shi ewala be fɛɛ. Wiemɔi komekomei ashishitsɔɔmɔ woji ahe nilelɔ W. E. Vine kɛ enɛ toɔ saamɔ ni “mɛi ni ji mumɔŋ gbɔmɛi lɛ saa mɔ ni efee esha lɛ he, akɛni nakai gbɔmɔ lɛ tamɔ mumɔŋ gbɔmɔtso lɛ he nii ni ehao lɛ hewɔ.” Wiemɔi krokomɛi ni akɛtsɔɔ shishi ji “asaa lɛ kɛba gbɛhe kpakpa mli; aha eja pɛpɛɛpɛ.”
15 Ni mɔ ko aaasaa lɛ diɛŋtsɛ ejwɛŋmɔ lɛ bɛ mlɛo, ni ebaanyɛ efee nɔ ni wa waa akɛ aaajaje mɔ ni etɔ̃ lɛ jwɛŋmɔi. Shi eka shi faŋŋ akɛ akɛ shidaa baahere yelikɛbuamɔ ni akɛhaa yɛ mlijɔlɛ mumɔ mli lɛ nɔ. No hewɔ lɛ, esa akɛ onukpai Kristofoi lɛ abo Paulo ŋaawoo nɛɛ toi: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.” (Kolosebii 3:12) Mɛni esa akɛ onukpai lɛ afee yɛ be mli ni mɔ ni saamɔ loo jajemɔ he hiaa lɛ lɛ hiɛ subaŋ gbonyo lɛ? Esa akɛ “[amɛ]nyiɛ . . . mlijɔlɛ sɛɛ.”—1 Timoteo 6:11.
Tooi lɛ Akwɛmɔ yɛ Henɔkwɛmɔ Mli
16, 17. Mɛɛ osharai esa akɛ onukpai lɛ akwɛ amɛhe nɔ jogbaŋŋ yɛ he beni amɛwoɔ mɛi krokomɛi ŋaa lɛ?
16 Saji pii yɛ Paulo ŋaawoo ni yɔɔ Galatabii 6:1 lɛ mli. Ewo hii ni edara yɛ mumɔŋ lɛ hewalɛ akɛ: “Nyɛsaa nakai mɔ [ni ji nɔtɔlɔ] lɛ ekoŋŋ yɛ mlijɔlɛ mumɔ mli, ni ole ohe nɔ kwɛmɔ, koni bo hu akakao.” Mɛɛ oshara ni hiɛdɔɔ yɔɔ mli po baanyɛ aba kɛ abooo ŋaawoo ni tamɔ nɛkɛ toi! Akɛni amaniɛbɔi komɛi tsɔɔ akɛ abu Anglikan osɔfo ko fɔ yɛ esafoŋbii enyɔ ni ekɛfite gbala hewɔ lɛ, eha The Times ni ji London adafitswaa wolo lɛ kɛɛ akɛ eji “shihilɛ ni sɛɛ etsɛ waa: naa ŋaawolɔ ni tamɔ tsɛ loo nyɛmi nuu ni eŋmɛɛ ehe eha eshafeemɔ ejaakɛ mɔ ni ewoɔ lɛ ŋaa lɛ kɛ ehe fɔɔ enɔ waa.” Kɛkɛ ni adafitswaa wolo mli niŋmalɔ nɛɛ gbala jwɛŋmɔ kɛtee nɔ ni Dr. Peter Rutter wieɔ lɛ nɔ akɛ “pɛsɛmkunya shihilɛ ni akɛnaa mɛi ahe sɛɛ ni yaa nɔ yɛ mɛi ni he yeɔ loo mɛi ni he waaa lɛ kɛ hii ni le nii ni yeɔ buaa amɛ—datrɛfoi, mlalelɔi, osɔfoi kɛ nitsumɔtsɛmɛi ateŋ lɛ—ebatsɔ tsɛŋemɔhela ko ni yeɔ awui waa ni yɔɔ hiɛgbele hu yɛ gbɔmɛi ashihilɛ ni ŋmɛɔ bɔlɛnamɔ gbɛ yaka ni atsiii he naa nɛɛ mli.”
17 Esaaa akɛ wɔsusuɔ akɛ kaai ni tamɔ nɛkɛ baaa Yehowa webii anɔ. Onukpa ko ni abuɔ lɛ waa ni kɛ afii pii esɔmɔ yɛ anɔkwayeli mli kɛ ehe yawo jeŋba shara mli ejaakɛ eyasara nyɛmi yoo ko ni yɔɔ wu beni yoo lɛ kome yɔɔ shia. Eyɛ mli akɛ etsake etsui moŋ, shi nyɛmi nuu lɛ laaje esɔɔmɔ hegbɛi lɛ fɛɛ. (1 Korintobii 10:12) Belɛ mɛɛ gbɛ onukpai ni ahala amɛ lɛ aaatsɔ nɔ ni amɛyasara nyɛmimɛi lɛ koni amɛkayagbee kaa mli? Te amɛaafee tɛŋŋ ni amɛkɛ mɔ ni asaraa lɛ lɛ ana teemɔ he ko, kɛha sɔlemɔ, kɛ hegbɛ ni amɛkɛaatao Nyɔŋmɔ Wiemɔ lɛ kɛ Kristofoi awoji amli?
18. (a) Yɛ mɛɛ gbɛ nɔ shishitoo mla ni kɔɔ yitsoyeli he lɛ kɛ-nitsumɔ baaye ebua ni atsi he kɛjɛ shihilɛi ni kɛ heguɔgbee baaba lɛ ahe? (b) Mɛɛ gbɛjianɔ abaanyɛ ato yɛ be mli ni asaraa nyɛmi yoo ko lɛ?
18 Nɔ kome ni esa akɛ onukpai lɛ asusu he ji shishitoo mla ni kɔɔ yitsoyeli he lɛ. (1 Korintobii 11:3) Kɛ obalanyo loo obalayoo fioo ko miitao ŋaawoo lɛ, bɔɔ mɔdɛŋ ni okɛ efɔlɔi aba sanegbaa lɛ mli yɛ be ni sa mli. Kɛ nyɛmi yoo ni ebote gbalashihilɛ mli miitao mumɔŋ yelikɛbuamɔ lɛ, ani obaanyɛ oto gbɛjianɔ koni ewu ahi shi yɛ osaramɔ be lɛ mli? Shi kɛ anyɛŋ afee enɛ loo ewu lɛ ji mɔ ni heee yeee ni waa yoo lɛ yi yɛ gbɛ ko nɔ hu? No lɛ too gbɛjianɔ ni otoɔ ohaa nyɛmiyoo ni boteko gbalashihilɛ mli lɛ nɔŋŋ eko oha mɔ ni tamɔ nɛkɛ. Ebaafee sane ni nilee yɔɔ mli akɛ nyɛmimɛi hii enyɔ ni edara yɛ mumɔŋ aaafee ekome ni amɛyasara nɛkɛ nyɛmi yoo nɛɛ. Kɛ enɛ feemɔ ehiŋ lɛ, no lɛ ekolɛ nyɛmimɛi hii enyɔ baanyɛ ahala be ni sa ni amɛkɛ nyɛmi yoo nɛɛ agba sane yɛ Maŋtsɛyeli Asa lɛ nɔ, ekolɛ yɛ tsu ko ni haa amɛ pɛ amɛhiɔ jɛmɛ lɛ mli. Akɛni nyɛmimɛi hii kɛ yei yɛ asa lɛ nɔ, shi amɛnyɛŋ amɛna loo amɛnu nɔ ni yaa nɔ lɛ hu hewɔ lɛ, eka shi faŋŋ akɛ ekɛ nanetɔtɔmɔ ko baŋ.—Filipibii 1:9, 10.
19. Mɛɛ nibii kpakpai jɛɔ suɔmɔ mli ni ajɛɔ akwɛɔ Nyɔŋmɔ tooi lɛ mli baa, ni namɔ shi wɔdaa yɛ tookwɛlɔi ni jɛɔ amɛsuɔmɔ mli amɛkɛ amɛhe haa lɛ hewɔ?
19 Nibii kpakpai jɛɔ suɔmɔ mli ni ajɛɔ akwɛɔ Nyɔŋmɔ tooi lɛ anɔ lɛ mli baa—tooi ni yɔɔ hewalɛ yɛ mumɔŋ ni akwɛɔ loo akudɔɔ amɛ jogbaŋŋ. Taakɛ bɔfo Paulo ji lɛ, ŋmɛnɛŋmɛnɛ beaŋ Kristofoi onukpai lɛ susuɔ nanemɛi heyelilɔi lɛ ahe waa. (2 Korintobii 11:28) Nɔ ni tsii waa titri ji Nyɔŋmɔ webii lɛ akwɛmɔ yɛ nɛkɛ jaramɔ bei nɛɛ amli. No hewɔ lɛ wɔdaa shi waa diɛŋtsɛ yɛ nitsumɔ kpakpa ni wɔnyɛmimɛi ni sɔmɔɔ akɛ onukpai lɛ tsuɔ lɛ hewɔ. (1 Timoteo 5:17) Akɛni ekɛ “nikeenii yɛ gbɔmɛi ateŋ” ni jɛɔ amɛsuɔmɔ mli amɛsɔmɔɔ ejɔɔ wɔ hewɔ lɛ, wɔkɛ yijiemɔ haa “duromɔ nii kpakpai fɛɛ, kɛ nikeenii ni hi kɛwula shi fɛɛ” Halɔ, ni ji wɔŋwɛi Tookwɛlɔ ni yɔɔ suɔmɔ lɛ, Yehowa,—Efesobii 4:8; Yakobo 1:17.
Te Obaaha Hetoo Tɛŋŋ?
◻ Mɛɛ gbɛ nɔ mɔ ko aaatsɔ akwɛ ewe nɔ jogbaŋŋ?
◻ Mɛɛ sui kpakpai esa akɛ ana yɛ Kristofoi onukpai lɛ anɔkwɛmɔ nitsumɔ lɛ mli?
◻ Mɛɛ gbɛ nɔ onukpai aaatsɔ ajie heshibaa kɛ mlijɔlɛ kpo yɛ, yɛ be mli ni amɛwoɔ ŋaa?
◻ Mɛni yeɔ ebuaa wɔ ni ehaa tsakemɔ loo saamɔ yɛ mumɔŋ lɛ feɔ nɔ ni mɔɔ shi?
◻ Te onukpai aaafee tɛŋŋ amɛkwa shihilɛi ni haa aŋmɛɔ saji ahe akɛsaa beni asaraa tooi lɛ?
[Mfoniri ni yɔɔ baafa 18]
Esa akɛ Kristofonyo onukpa lɛ akwɛ lɛ diɛŋtsɛ ewe nɔ jogbaŋŋ
[Mfoniri ni yɔɔ baafa 21]
Esa akɛ akɛ mlijɔlɛ kɛ kojomɔ kpakpa atsu Kristofoi asaramɔ nitsumɔ lɛ he nii