Te Nyɔŋmɔ Buɔ Kristendom Jamɔ Ehaa Tɛŋŋ?

“JEEE mɔ fɛɛ mɔ ni kɛɔ mi akɛ: ‘Nuntsɔ, Nuntsɔ!’ lɛ, aaabote ŋwɛi maŋtsɛyeli lɛ mli,” Yesu Kristo kɛɛ, “shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ. Mɛi pii aaakɛɛ mi yɛ no gbi lɛ nɔ akɛ: ‘Nuntsɔ, Nuntsɔ!’ ani jeee bo ogbɛi lɛ mli . . . wɔfee hewalɛ nibii pii yɛ lo?’ Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”—Mateo 7:21-23.

Nyɔŋmɔ etsɔ e-Wiemɔ ni yɔɔ krɔŋŋ, Biblia Krɔŋkrɔŋ lɛ nɔ eha nɔ ni ji esuɔmɔnaa nii efee faŋŋ. Ani Kristendom sɔlemɔi lɛ miifee Nyɔŋmɔ suɔmɔnaa nii? Aloo ani amɛji mɛi ni Yesu tsɛ amɛ akɛ ‘mɛi ni tsuɔ nibii ni ejaaa gbɛ lɛ’?

Lashishwiemɔ

Gbi gbɛkɛ ni tsɔ e-Nuntsɔ lɛ gbele hiɛ lɛ, shwɛ sharao ni Petro aje ekɛ asraafoi akuu ni atsu ni amɛbamɔ Yesu kɛya lɛ ateŋ nɔmɔ kɛ klante shishi. (Yohane 18:3, 10) Shi Yesu jɔɔ shihilɛ lɛ he ni ebɔ Petro kɔkɔ akɛ: “Mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 26:52) Atĩ kɔkɔbɔɔ ni mli kã shi faŋŋ nɛɛ mli yɛ Kpojiemɔ 13:10. Ani Kristendom sɔlemɔi lɛ ebo toi? Aloo ani amɛhe yɛ tai ni yaa nɔ yɛ shikpɔŋ lɛ nɔ hei sɔrɔtoi lɛ mli?

Beni awuɔ Jeŋ Ta II lɛ, agbe Serbiabii kɛ Croatiabii akpei ohai abɔ yɛ jamɔ hewɔ. “Yɛ Croatia,” taakɛ The New Encyclopædia Britannica bɔ amaniɛ lɛ, “fascist nɔyeli ni yɔɔ maŋ lɛ mli lɛ je shishi akɛ ekɛ mla ko ni ji ‘wekui ni ataooo amɛ lɛ ahiɛkpatamɔ’ baatsu nii, ni amɛfee enɛ kɛteke Nazi nifeemɔi po. . . . Ajaje akɛ abaashwie Serbiabii lɛ amlijaa etɛ mli ekome kɛjɛ maŋ lɛ mli, abaatsake mlijaa etɛ mli ekome kɛya Roma Katolik jamɔ mli, ni abaagbe mlijaa etɛ mli ekome. . . . Bɔ ni Katolik osɔfoi fata he yɛ gbɛ ko nɔ yɛ nifeemɔi nɛɛ amli lɛ fite sɔlemɔ lɛ kɛ nɔyeli lɛ teŋ wekukpaa ni yɔɔ lɛ kwraa yɛ ta lɛ sɛɛ.” Anyɛ mɛi babaoo nɔ koni amɛtsake kɛya Katolik jamɔ mli, kɛ jeee nakai lɛ abaagbe amɛ; mɛi akpei abɔ krokomɛi yɛ ni ahaaa amɛ hegbɛ po ni amɛhala nɔ ni amɛsumɔɔ. Anyɛ akrowai amlibii fɛɛ—hii, yei kɛ gbekɛbii—anɔ awo amɛ Ortodɔks sɔlemɔi lɛ amli ni agbe amɛ. Ni Komunist asraafoi ni teɔ shi woɔ amɛ lɛ hu? Ani amɛna jamɔ ko sɛɛfimɔ?

“Osɔfoi lɛ ekomɛi kɛ amɛhe wo ta lɛ mli ni amɛfata maŋ hiɛ atuatselɔi lɛ ahe kɛwuu,” taakɛ History of Yugoslavia wolo lɛ bɔ amaniɛ lɛ. “Osɔfoi ni jɛ Serbia Ortodɔks kɛ Roma Katolik sɔlemɔi lɛ amli po bafata asraafoi ni Fiɔ Kui Sɔrɔtoi Asɛɛ lɛ ahe,” taakɛ Yugoslavia and the New Communism wolo lɛ wie lɛ. Jamɔ mli béi miiya nɔ eewo ta ni awuɔ yɛ Balkans lɛ mli wu lolo.

Ni Rwanda hu? Katolik Gbɛjianɔtoo Kɛha Majimaji Ateŋ Sharamɔ lɛ nɔ onukpa, Ian Linden, wie wiemɔi ni nyiɛ sɛɛ nɛɛ yɛ adafitswaa wolo ni atsɛɔ lɛ The Month lɛ mli: “Nii amlipɛimɔ ni African Rights ni yɔɔ London lɛ fee lɛ haa nɔkwɛmɔ nɔ kome loo enyɔ ni miitsɔɔ akɛ maŋ nɛɛŋ Katolik, Anglikan kɛ Baptist Sɔlemɔ hiɛnyiɛlɔi ahe yɛ gbɔmɛi ni asraafoi gbe lɛ mli kɛtsɔ nɔ ko ni amɛfeee loo nɔ ko ni amɛfee nɔ. . . . Ŋwanejee ko kwraa bɛ he akɛ Kristofoi ni abuɔ amɛ waa yɛ sɔlemɔi amli lɛ ateŋ mɛi babaoo kɛ amɛhe wo gbɔmɔgbee lɛ mli.” Dɔlɛ sane ji akɛ, nɔmɔ kã he eeya nɔ yɛ mɛi ni tsɛɔ amɛhe Kristofoi lɛ ateŋ lolo yɛ Afrika teŋ gbɛ.

Ajwamaŋbɔɔ kɛ Gbalafitemɔ

Taakɛ Nyɔŋmɔ Wiemɔ lɛ tsɔɔ lɛ, he kometoo ni sa woo pɛ yɔɔ kɛha bɔlɛnamɔ, ni no ji yɛ gbalashihilɛ ekomefeemɔ mli. “Awo gbala hiɛ nyam yɛ nyɛ fɛɛ nyɛteŋ,” taakɛ Biblia lɛ kɛɔ lɛ, “ni akabule gbala saa hu; shi ajwamaŋbɔlɔi kɛ gbalaŋkulɔi lɛ, Nyɔŋmɔ baakojo amɛ.” (Hebribii 13:4) Ani sɔlemɔ hiɛnyiɛlɔi nyiɛɔ Nyɔŋmɔ tsɔɔmɔ nɛɛ sɛɛ?

Yɛ 1989 mli lɛ, Anglikan Sɔlemɔ ni yɔɔ Australia lɛ ŋma wolo ko ni kɔɔ bɔlɛnamɔ mli jeŋba he amɛha, ni amɛwo ŋaa akɛ tɔmɔ ko bɛ bɔlɛnamɔ ni tsɔɔ gbalashihilɛ hiɛ lɛ he kɛji mɛi enyɔ lɛ etuu amɛhe kwraa ni amɛkpɛlɛ nɔ akɛ amɛkɛ amɛhe baahi shi. Nyɛsɛɛ nɛɛ nɔŋŋ lɛ, Anglikan Sɔlemɔ ni yɔɔ Scotland lɛ hiɛnyiɛlɔ lɛ wie akɛ: “Esaaa ni Sɔlemɔ lɛ buɔ gbalafitemɔ nifeemɔi akɛ esha kɛ tɔmɔ. Esa akɛ Sɔlemɔ lɛ akpɛlɛ nɔ akɛ esha ni akɛfɔ wɔ lɛ ji nɔ ni kɛ gbalafitemɔ baa.”

Yɛ South Africa lɛ, osɔfoi pii kɛ ekaa ewie kɛfi hii ni kɛ hii naa bɔlɛ lɛ anifeemɔ sɛɛ. Akɛ nɔkwɛmɔ nɔ lɛ, yɛ 1990 mli lɛ, South Africa wolo tɛtrɛɛ ni atsɛɔ lɛ You lɛ tsɛ́ Anglikan osɔfo ko ni ale lɛ waa lɛ wiemɔ ko sɛɛ akɛ ewie akɛ: “Ŋmalɛi lɛ kɛ mla ko fĩii wɔnɔ kɛyaaa naanɔ. . . . Miheɔ miyeɔ akɛ tsakemɔi baaba sɔlemɔ lɛ nifeemɔ kɛ mlai ni kɔɔ hii ni kɛ hii naa bɔlɛ lɛ ahe lɛ mli.”—Okɛto Romabii 1:26, 27 he.

Taakɛ 1994 Britannica Book of the Year lɛ tsɔɔ lɛ, bɔlɛnamɔ nifeemɔi ebatsɔ sane ni awieɔ he fe fɛɛ yɛ Amerika sɔlemɔi amli, titri lɛ saji tamɔ “mɛi ni ale amɛ jogbaŋŋ akɛ hii ni kɛ hii naa bɔlɛ loo yei ni kɛ yei naa bɔlɛ ni awoɔ amɛ osɔfoi, jamɔ mli shishinumɔ ni ayɔɔ yɛ hii ni kɛ hii naa bɔlɛ lɛ ahegbɛi ahe, ‘nuu kɛ nuu gbalashihilɛ’ nɔ jɔɔmɔ, kɛ shihilɛi komɛi ni ale akɛ eji hii ni kɛ hii naa bɔlɛ lɛ anifeemɔi lɛ anɔkpɛlɛmɔ loo fɔbuu.” Jamɔi wuji sɔrɔtoi lɛ amli babaoo kpɛlɛɔ osɔfoi ni kɛ ekaa woɔ hewalɛ waa ni aha bɔlɛnamɔ mli heyeli babaoo lɛ anɔ. Taakɛ 1995 Britannica Book of the Year lɛ tsɔɔ lɛ, Episkopal osɔfonukpai 55 kɛ amɛnine wo sane jajemɔ ko shishi ni “amɛkɛma bɔ ni amɛkpɛlɛɔ hii ni kɛ hii naa bɔlɛ lɛ a-osɔfowoo kɛ amɛ nifeemɔ nɔ lɛ nɔ mi.”

Osɔfoi komɛi wieɔ kɛfiɔ hii ni kɛ hii naa bɔlɛ lɛ sɛɛ, ni amɛkɛɔ akɛ Yesu ewieee eshiii. Shi ani nakai eji lɛlɛŋ? Yesu Kristo wie akɛ Nyɔŋmɔ Wiemɔ lɛ, anɔkwale ni. (Yohane 17:17) No tsɔɔ akɛ ekpɛlɛɔ bɔ ni Nyɔŋmɔ buɔ hii ni kɛ hii naa bɔlɛ lɛ ehaa lɛ nɔ, taakɛ atsɔɔ mli yɛ 3 Mose 18:22, ni kaneɔ akɛ: “Okɛ nuu ko akawɔ taakɛ bɔ ni akɛ yoo wɔɔ lɛ; nihii nii ji no.” Kɛfata he lɛ, Yesu tsĩ ajwamaŋbɔɔ kɛ gbalafitemɔ tã kɛfata ‘nibii fɔji ni jɛɔ mligbɛ ni buleɔ gbɔmɔ’ lɛ ahe. (Marko 7:21-23) Hela wiemɔ kɛha ajwamaŋbɔɔ lɛ hiɛ shishinumɔ ni mli lɛɛ fe nɔ ni akɛtsuɔ nii kɛhaa gbalafitemɔ lɛ. Ewieɔ bɔlɛnamɔ nifeemɔi fɛɛ ni yaa nɔ yɛ mla naa gbalashihilɛ sɛɛ, ni nuu kɛ nuu bɔlɛnamɔ fata he lɛ ahe. (Yuda 7) Yesu Kristo bɔ esɛɛnyiɛlɔi lɛ kɔkɔ hu akɛ amɛkaŋmɛ mɔ fɛɛ mɔ ni tsɛɔ ehe Kristofonyo tsɔɔlɔ, ni baa hiɛdɔɔ ni yɔɔ ajwamaŋbɔɔ he lɛ shi lɛ gbɛ kwraa.—Kpojiemɔ 1:1; 2:14, 20.

Kɛ jamɔ mli hiɛnyiɛlɔi wo hewalɛ ni awo hii kɛ hii, kɛ yei kɛ yei ni kɛ amɛhe naa bɔlɛ lɛ osɔfoi lɛ, mɛɛ hewalɛ enɛ naa yɛ amɛ sɔlemɔi lɛ amli bii lɛ anɔ, titri lɛ gbekɛbii? Ani ewooo amɛ hewalɛ ni amɛka bɔlɛnamɔ ni yaa nɔ yɛ gbalashihilɛ sɛɛ lɛ amɛkwɛ? Nɔ ni tamɔɔɔ nakai lɛ, Nyɔŋmɔ Wiemɔ lɛ woɔ Kristofoi hewalɛ akɛ “nyɛjoa ajwamaŋbɔɔ naa foi!” (1 Korintobii 6:18) Kɛ naanyo heyelilɔ yagbee esha ni tamɔ nɛkɛ mli lɛ, ajɛɔ suɔmɔ mli ayeɔ abuaa lɛ, kɛ yiŋtoo akɛ koni ena Nyɔŋmɔ hiɛ duromɔ ekoŋŋ. (Yakobo 5:16, 19, 20) Shi kɛji ekpoo yelikɛbuamɔ nɛɛ hu? Biblia lɛ kɛɔ akɛ kɛ nakai gbɔmɛi lɛ tsakeee amɛtsui lɛ, ‘amɛnine shɛŋ Nyɔŋmɔ maŋtsɛyeli lɛ nɔ.’—1 Korintobii 6:9, 10.

“Amɛtsĩɔ Yoowɛɛ Gbɛ”

Yɛ “ajwamaŋbɔɔi” ni efa lɛ hewɔ lɛ, Biblia lɛ kɛɔ akɛ “gbalashihilɛ hi fe nɔ ni akɔnɔ aaahao bo.” (1 Korintobii 7:2, 9) Yɛ ŋaawoo ni nilee yɔɔ mli nɛɛ fɛɛ sɛɛ lɛ, akpaa osɔfoi babaoo gbɛ akɛ amɛaahi shi ni amɛboteee gbalashihilɛ mli. “Akũko gbalashihilɛ ni aboteee mli he kitakamɔ lɛ mli,” taakɛ Nino Lo Bello tsɔɔ mli yɛ ewolo ni gbɛi ji The Vatican Papers lɛ mli lɛ, “kɛji osɔfo, nuu loo yoo mɔ kome shihilɔ kɛ mɔ ko na bɔlɛ. . . . Abaanyɛ ana bɔlɛnamɔ he eshaifaa kɛtsɔ anɔkwayeli ni akɛaajaje nɔ fɛɛ nɔ atsɔɔ yɛ esha jajemɔ mli lɛ nɔ, shi Sɔlemɔ lɛ ekpɛlɛɛɛ gbalashihilɛ mli ni osɔfo ko aaabote lɛ nɔ yɛ gbɛ ko kwraa nɔ.” Ani tsɔɔmɔ nɛɛ ewo yibii kpakpai loo yibii fɔji?—Mateo 7:15-19.

Ŋwanejee ko bɛ he akɛ, osɔfoi pii hiɔ jeŋba mli hetsemɔ mli, shi babaoo hu ehiii shi nakai. Taakɛ 1992 Britannica Book of the Year lɛ tsɔɔ lɛ, “abɔ amaniɛ akɛ Roma Katolik Sɔlemɔ lɛ wo shika ni naa shɛɔ dɔlai akpekpei 300 ni akɛtsu saji ni kɔɔ osɔfoi ni kɛ amɛhe ewo bɔlɛnamɔ mli niseniianifeemɔi amli lɛ ahe lɛ he nii.” Sɛɛ mli lɛ, 1994 nɔ ni je kpo lɛ wie akɛ: “Osɔfoi saŋŋ ni AIDS gbe amɛ lɛ ha ebaje kpo faŋŋ akɛ hii ni kɛ hii naa bɔlɛ fata osɔfoi lɛ ahe, ni abana faŋŋ hu akɛ awo hii ni kɛ hii naa bɔlɛ nɛɛ ateŋ mɛi babaoo osɔfoi . . . fe bɔ ni hiɛ kã nɔ.” Ebɛ naakpɛɛ akɛ Biblia lɛ wieɔ akɛ nɛkɛ tsĩ ni “amɛtsĩɔ yoowɛɛ gbɛ” nɛɛ, ‘daimonioi atsɔɔmɔ’ ni. (1 Timoteo 4:1-3) “Yɛ yinɔsane ŋmalɔi komɛi asusumɔ naa lɛ,” taakɛ Peter de Rosa ŋma yɛ ewolo ni gbɛi ji Vicars of Christ lɛ mli lɛ, “ekolɛ [gbalashihilɛ mli ni osɔfoi boteee lɛ] eye jeŋba kpakpa awui waa fe gbɛjianɔtoo fɛɛ gbɛjianɔtoo kroko ni yɔɔ Anaigbɛ je lɛ mli, ni ahoshwibɔɔ fata he. . . . Bei pii lɛ, [e]bafeɔ muji ko ni ekpɛtɛ Kristojamɔ gbɛi he. . . . Gbalashihilɛ ni anyɛɔ amɛnɔ akɛ amɛkabote mli lɛ kɛ osatofeemɔ baa osɔfoi lɛ ateŋ be fɛɛ be. . . . Osɔfo baanyɛ ekɛ ehe awo jeŋba shara nifeemɔi amli shii akpe, shi sɔlemɔ lɛ mla eŋmɛɛɛ gbɛ ni ebote gbalashihilɛ mli kɔkɔɔkɔ.”

Yɛ bɔ ni Nyɔŋmɔ buɔ Baal jamɔ ehaa lɛ hesusumɔ mli lɛ, ewaaa akɛ wɔɔyoo bɔ ni ebaabu Kristendom sɔlemɔi ni mli egbala lɛ eha. Biblia lɛ mli naagbee wolo lɛ buaa apasa jamɔi fɛɛ anaa ni etsɛɔ lɛ akɛ “Babilon Kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ.” Ni Biblia lɛ kɛfataa he akɛ: “Emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ ala lɛ yɛ.”—Kpojiemɔ 17:5; 18:24.

No hewɔ lɛ, Nyɔŋmɔ woɔ mɛi fɛɛ ni miisumɔ ni amɛfee enɔkwa jalɔi lɛ hewalɛ akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko. . . . Gbi kome nɔ ehaomɔi lɛ aaaba, gbele kɛ awerɛho kɛ hɔmɔ, ni akɛ la aaasha lɛ, ejaakɛ Nuntsɔ [Yehowa] Nyɔŋmɔ lɛ ni kojoɔ lɛ he wa.”—Kpojiemɔ 18:4, 8.

Agbɛnɛ sanebimɔ lɛ teɔ shi akɛ: Kɛ mɔ lɛ je apasa jamɔ mli lɛ, nɛgbɛ esa akɛ eya? Mɛɛ jamɔ Nyɔŋmɔ kpɛlɛɔ nɔ?

[Akrabatsa/Mfoniri ni yɔɔ baafa 5]

Amaga Jamɔ

Akɛ amagai tsuɔ nii yɛ Baal jamɔ mli. Israelbii lɛ ka akɛ amɛkɛ Yehowa jamɔ baafutu Baal jamɔ. Amɛkɛ amagai po ba Yehowa sɔlemɔwe lɛ. Nyɔŋmɔ ha bɔ ni ebuɔ amaga jamɔ ehaa lɛ fee faŋŋ beni ekɛ hiɛkpatamɔ ba Yerusalem kɛ esɔlemɔtsu lɛ nɔ lɛ.

Kristendom sɔlemɔtsui lɛ pii eyimɔ kɛ amagai, ekɔɔɔ he eko akɛ afee ekomɛi tamɔ krɔɔs, amagai bibii, loo Maria he amagai. Kɛfata he lɛ, atsɔɔ sɔlemɔyalɔi pii akɛ amɛkoto shi, loo amɛkula shi, loo amɛfee krɔɔs lɛ he okadi yɛ nɛkɛ amagai nɛɛ ahiɛ. Shi nɔ ni tamɔɔɔ enɛ lɛ, awo anɔkwa Kristofoi kita akɛ “nyɛjoa wɔŋjamɔ naa foi!” (1 Korintobii 10:14) Amɛkaaa akɛ amɛaaja Nyɔŋmɔ kɛtsɔ nibii ni anaa nɔ.—Yohane 4:24.

[He ni Sane lɛ Jɛ]

Musée du Louvre, Paris

[Akrabatsa ni yɔɔ baafa 7]

“Esa akɛ Sɔlemɔ Hiɛnyiɛlɔ lɛ Afee Mɔ ni Tɔmɔ Bɛ Ehe”

NƐKƐ wiemɔ nɛɛ jɛ Tito 1:7, taakɛ Today’s English Version etsɔɔ shishi lɛ. King James Version lɛ kaneɔ akɛ: “Esa akɛ osɔfonukpa lɛ shwamɔ ko akahi ehe.” Wiemɔ “osɔfonukpa” lɛ jɛ Hela wiemɔ ni shishinumɔ ji “nɔkwɛlɔ” mli. Enɛ hewɔ lɛ, esa akɛ hii ni ahala amɛ akɛ amɛnyiɛ hiɛ yɛ anɔkwa Kristofoi asafo lɛ mli lɛ ashɛ shishitoo tɛi ni Biblia lɛ efolɔ eshwie shi lɛ ahe. Kɛ amɛshɛɛɛ he lɛ, no lɛ esa akɛ ajie amɛ kɛjɛ amɛ nɔkwɛmɔ gbɛhe lɛ mli, ejaakɛ amɛjeee “okadii [kɛha] asafoku lɛ” dɔŋŋ. (1 Petro 5:2, 3) Te Kristendom sɔlemɔi lɛ buɔ taomɔ nii nɛɛ akɛ hiɛdɔɔ sane amɛhaa tɛŋŋ?

Dr. Everett Worthington wie nii amlipɛimɔ ko ni afee yɛ osɔfoi 100 he yɛ Virginia maŋ lɛ mli, yɛ U.S.A. lɛ he, yɛ ewolo ni ji I Care About Your Marriage lɛ mli. Amɛteŋ mɛi ni fa fe oha mlijaa 40 kpɛlɛ nɔ akɛ, amɛkɛ amɛhe ewo jeŋba ni teeɔ mɔ kroko ni jeee amɛgbalashihilɛ mli hefatalɔ lɛ akɔnɔ shi lɛ mli pɛŋ. Amɛteŋ mɛi babaoo efite gbala.

“Afii nyɔŋma ni eho lɛ mli lɛ,” taakɛ Christianity Today tsɔɔ mli lɛ, “ehiɛnyiɛlɔi ni abuɔ amɛ waa lɛ ateŋ mɛi komɛi ajeŋba shara he saji ni jeɔ kpo lɛ ehoso sɔlemɔ lɛ yɛ be kɛ bei amli.” Saneyitso ni ji, “Nɔ Hewɔ ni Esaaa ni akɛ Osɔfoi Gbalafitelɔi Woɔ Amɛ Gbɛhei Amli Dɔŋŋ” lɛ wie eshi nifeemɔ ko ni yaa nɔ yɛ Kristendom, ni ji sɔlemɔ hiɛnyiɛlɔi ni akɛ amɛ woɔ amɛ tsutsu gbɛhei amli ekoŋŋ, yɛ be mli ni “abu amɛ fɔ yɛ bɔlɛnamɔ mli esha feemɔ he lɛ.”