Nyɛhaa Wɔhia Efɔŋ

YEHOWA ji Nyɔŋmɔ ni yɔɔ krɔŋkrɔŋ. Yɛ blema beaŋ lɛ, lɛ ji “Israel Mɔ Krɔŋkrɔŋ lɛ,” ni no hewɔ lɛ ebi ni Israel he atse, ni muji ko kwraa akahi amɛhe. (Lala 89:19) Ekɛɛ ewebii ni ehala lɛ akɛ: “Nyɛfea krɔŋkrɔŋ, ejaakɛ mɔ krɔŋkrɔŋ ji mi.” (3 Mose 11:45) Esa akɛ mɔ fɛɛ mɔ ni taoɔ akɛ ‘eeekwɔ Yehowa gɔŋ lɛ’ afee mɔ ni “eniji ahe bɛ muji ko ni etsui hu mli tse.” (Lala 24:3, 4) No tsɔɔ babaoo fe he ni aaatsi kɛaajɛ esha feemɔi ahe kɛkɛ. Etsɔɔ ‘efɔŋ ni aaanyɛ.’—Abɛi 8:13.

Yehowa jɛ suɔmɔ mli ewo mlai ni mli kã shi faŋŋ koni Israel maŋ lɛ anyɛ ale nɔ ni ji efɔŋ feemɔ ni amɛtsi amɛhe kɛjɛ he. (Romabii 7:7, 12) Nɔ ni fata mlai nɛɛ ahe ji jeŋba he gbɛtsɔɔmɔi ni yɔɔ shiŋŋ. Awie gbalafitemɔ, hii ni kɛ hii naa bɔlɛ lɛ anifeemɔi, wekunyo ni bɛŋkɛ kpaakpa ni akɛ lɛ naa bɔlɛ, kɛ kooloo ni akɛnaa bɔlɛ lɛ fɛɛ he akɛ nibii ni bɛ krɔŋkrɔŋ, ni buleɔ mɔ yɛ mumɔŋ. (3 Mose 18:23; 20:10-17) Akpataa mɛi ni yeɔ nɛkɛ nifeemɔi ni baa shi nɛɛ amli fɔ lɛ ahiɛ kɛjɛɔ Israel maŋ lɛ mli.

Beni Kristofoi ni afɔ amɛ mu lɛ asafo lɛ batsɔ “Nyɔŋmɔ Israel lɛ,” akɛ jeŋba he mlai ni tamɔ nakai nɔŋŋ shwie shi kɛha amɛ. (Galatabii 6:16) Esa akɛ Kristofoi hu “[ahi] efɔŋ kwraa.” (Romabii 12:9) Yehowa wiemɔi ni ekɛ Israel wie lɛ hu kɔɔ amɛhe, akɛ: “Nyɛfea krɔŋkrɔŋ, ejaakɛ krɔŋkrɔŋ ji mi.” (1 Petro 1:15, 16) Esaaa ni nifeemɔi ni he tseee, tamɔ ajwamaŋbɔɔ, gbalafitemɔ, hii kɛ hii abɔlɛnamɔ nifeemɔi, kooloo ni akɛnaa bɔlɛ, kɛ wekunyo ni bɛŋkɛ kpaakpa hu ni akɛ lɛ naa bɔlɛ fiteɔ Kristofoi asafo lɛ. Mɛi ni sumɔɔɔ ni amɛkpaa nɛkɛ nifeemɔi nɛɛ lɛ fataŋ Nyɔŋmɔ Maŋtsɛyeli lɛ he. (Romabii 1:26, 27; 2:22; 1 Korintobii 6:9, 10; Hebribii 13:4) Tɛi ni afolɔ ashwie shi nɛɛ kɔɔ “tooi krokomɛi” lɛ hu ahe, yɛ nɛkɛ “naagbee gbii” nɛɛ amli. (2 Timoteo 3:1; Yohane 10:16) Enɛ hewɔ lɛ, Kristofoi ni afɔ amɛ mu lɛ kɛ tooi krokomɛi lɛ feɔ gbɔmɛi kpakpai ni he tse, ni amɛnyɛɔ amɛkɛ amɛ-Nyɔŋmɔ lɛ gbɛi fɔ̃ɔ amɛnɔ akɛ Yehowa Odasefoi.—Yesaia 43:10.

Ní Aaaha Asafo lɛ He Atse

Nɔ ni tamɔɔɔ enɛ lɛ, je lɛ kpɛlɛɔ jeŋba shara sɔrɔtoi fɛɛ nɔ. Eyɛ mli akɛ esoro anɔkwa Kristofoi moŋ, shi esaaa ni amɛhiɛ kpaa nɔ akɛ tsutsu ko lɛ, mɛi ni sɔmɔɔ Yehowa bianɛ lɛ ateŋ mɛi pii yɛ je lɛŋ. Mɛi babaoo yɛ ni, dani amɛaale wɔ-Nyɔŋmɔ ni yɔɔ krɔŋkrɔŋ lɛ, no mli lɛ amɛnaaa nɔ hewɔ ni esaaa ni amɛkɛ amɛhe woɔ amɛheloo ni egbɔjɔ lɛ akɔnɔi kɛ yaka yiŋsusumɔi amli, ni amɛkɛ amɛhe fɛɛ kokoloɔ “sakasaka feemɔ shɛii” mli. (1 Petro 4:4) Beni ewie jeŋmajiaŋbii ni baa shi lɛ anifeemɔi ni yɔɔ nyaŋemɔ lɛ he lɛ sɛɛ lɛ, bɔfo Paulo kɛɛ akɛ: “Nɛkɛ nyɛteŋ mɛi komɛi yɔɔ sá.” Ni kɛlɛ, etee nɔ ewie akɛ: “Shi agbɛnɛ aju nyɛhe, ni asaŋ atsuu nyɛhe, ni abu nyɛ bem hu yɛ Nuntsɔ Yesu gbɛi kɛ wɔ-Nyɔŋmɔ lɛ Mumɔ mli.”—1 Korintobii 6:11.

Mɛɛ miishɛjemɔ wiemɔ eji nɛkɛ! Nɔ fɛɛ nɔ ni mɔ ko efee pɛŋ yɛ eshihilɛ mli lɛ, etsakeɔ kɛji anunyam sanekpakpa ni kɔɔ Kristo he lɛ ná hewalɛ yɛ etsui nɔ. Ejieɔ hemɔkɛyeli kpo ni ejɔɔ ehe nɔ ehaa Yehowa Nyɔŋmɔ. Kɛjɛ nakai gbi lɛ nɔ kɛyaa lɛ, ehiɔ jeŋba mli shihilɛ ni he tse mli, ni aju ehe ni ehe etse yɛ Nyɔŋmɔ hiɛ. (Hebribii 9:14) Akɛ eshai ni efee tsutsu ko lɛ keɔ lɛ, ni ebaanyɛ ‘epele kɛshɛ nibii ni yɔɔ hiɛgbɛ lɛ ahe.’a—Filipibii 3:13, 14; Romabii 4:7, 8.

Yehowa kɛ David he ke lɛ beni eshwa ehe yɛ gbɔmɔgbee kɛ gbalafitemɔ lɛ sɛɛ lɛ, ni E-kɛ Manase wɔŋjamɔ mli jeŋba shara kɛ lá shishwiemɔ babaoo lɛ hu ke lɛ beni etsake etsui lɛ. (2 Samuel 12:9, 13; 2 Kronika 33:2-6, 10-13) Wɔbaanyɛ wɔda shi waa lɛlɛŋ akɛ efee klalo ni ekɛ wɔhe aaake wɔ hu kɛji wɔshwa wɔhe ni wɔbɛŋkɛ lɛ yɛ anɔkwayeli kɛ heshibaa mli. Ni kɛlɛ, yɛ David kɛ Manase he ni Yehowa kɛke amɛ lɛ fɛɛ sɛɛ lɛ, esa akɛ nɛkɛ hii enyɔ nɛɛ—kɛ Israel ni fata amɛhe lɛ—akpee nibii ni jɛ amɛ esha feemɔi lɛ amli kɛba lɛ anaa. (2 Samuel 12:11, 12; Yeremia 15:3-5) Nakai nɔŋŋ hu, eyɛ mli akɛ Yehowa kɛ eshafeelɔi ni tsakeɔ amɛtsui lɛ ahe keɔ amɛ moŋ, shi ekolɛ nibii komɛi baajɛ amɛnifeemɔi lɛ amli kɛba ni amɛnyɛŋ amɛjo naa foi.

Nibii ni Jɛɔ Mli Baa ni Anyɛɛɛ Naa Atsi

Akɛ nɔkwɛmɔ nɔ lɛ, ekolɛ mɔ ko ni hiɔ nyenyeŋtswibɔɔ jeŋba shara mli ni enaa AIDS hela lɛ, baakpɛlɛ anɔkwale lɛ nɔ ni ebaatsake eshihilɛ gbɛ kwraa kɛyashɛ henɔjɔɔmɔ kɛ baptisimɔ mli. Agbɛnɛ, eji Kristofonyo ni he tse yɛ mumɔŋ ni yɔɔ ekɛ Nyɔŋmɔ teŋ wekukpaa kɛ hiɛnɔkamɔ ni yɔɔ nyam kɛha wɔsɛɛ; shi kɛlɛ AIDS hela lɛ yɛ ehe lolo. Ekolɛ yɛ naagbee lɛ, hela lɛ baagbe lɛ, ni eyɛ mɔbɔ waa, shi no ji nɔ ni jɛ etsutsu jeŋba lɛ mli ni enyɛŋ etsi naa. Yɛ Kristofoi komɛi agbɛfaŋ lɛ, nibii ni jɛɔ tsutsu jeŋba shara shihilɛ mli baa lɛ baaya nɔ ehi shi aahu yɛ gbɛi krokomɛi anɔ. Amɛ baptisimɔ sɛɛ afii babaoo lɛ, ekolɛ yɛ amɛshihilɛ be ni eshwɛ yɛ nibii agbɛjianɔtoo nɛɛ mli lɛ fɛɛ mli lɛ, ehe baahia ni amɛwuu amɛshi kanyamɔi komɛi ni amɛnuɔ he yɛ amɛ heloo lɛ mli akɛ amɛku amɛsɛɛ kɛya amɛ tsutsu jeŋba shara shihilɛ lɛ mli ekoŋŋ lɛ. Kɛtsɔ Yehowa mumɔ lɛ yelikɛbuamɔ nɔ lɛ, mɛi pii yeɔ omanye kɛteɔ shi woɔ enɛ. Shi esa akɛ amɛwuu amɛshi enɛ be fɛɛ be.—Galatabii 5:16, 17.

Nɛkɛ gbɔmɛi nɛɛ efeee esha, bei abɔ ni amɛyeɔ amɛ kanyamɔi anɔ lɛ. Shi kɛ́ hii ji amɛ lɛ, no lɛ ekolɛ amɛaajɛ nilee mli amɛkpɛ amɛyiŋ akɛ ‘amɛtaoŋ’ sɔɔmɔ gbɛnaa yɛ asafo lɛ mli beni ehe hiaa ni amɛwuu lolo amɛshi heloo lɛ kanyamɔi ni mli wa waa lɛ. (1 Timoteo 3:1) Mɛni hewɔ? Ejaakɛ amɛle hekɛnɔfɔɔ ni asafo lɛ náa yɛ onukpai lɛ amli. (Yesaia 32:1, 2; Hebribii 13:17) Amɛyɔseɔ akɛ ayanaa onukpai lɛ yɛ teemɔŋ saji babaoo ahe, ni ehe hiaa ni amɛtsu shihilɛi komɛi ni biɔ ŋaa kɛ saji ahesusumɔ jogbaŋŋ lɛ ahe nii. Efeŋ nɔ ni suɔmɔ, nilee, loo hiɛshikamɔ yɔɔ mli akɛ mɔ ko ni miiwuu eeshi heloo akɔnɔi ni he tseee be fɛɛ be lɛ baabɔ mɔdɛŋ ni ena gbɛhe ni kɛ gbɛnaa nii ni tamɔ nɛkɛ fɔ̃ɔ mɔ nɔ.—Abɛi 14:16; Yohane 15:12, 13; Romabii 12:1.

Yɛ nuu ni ekolɛ efeɔ gbekɛbii niseniianii dani abaptisi lɛ lɛ gbɛfaŋ lɛ, ekolɛ nɔ kroko baajɛ enɛ mli kɛba. Kɛ́ ebale anɔkwale lɛ, eshwaa ehe ni etsakeɔ eshihilɛ, ni ekɛ nakai yiwalɛ eshafeemɔ lɛ baŋ asafo lɛ mli. Ekolɛ kɛjɛ no sɛɛ kɛyaa lɛ ebaaya ehiɛ waa, ni ebaaye ehenumɔi ni ejaaa lɛ anɔ kwraa, ni ekolɛ ebaasumɔ po ni ‘etao’ sɔɔmɔ gbɛhe yɛ asafo lɛ mli. Shi, kɛji akɛ ebaahi shi daa akɛ mɔ ko ni ale lɛ yɛ akutso lɛ mli akɛ mɔ ko ni tsutsu lɛ efeɔ gbekɛbii niseniianii hu? Ani ebaafee mɔ ni “anaŋ ehe sane ko atã, . . . [ni] mɛi ni yɔɔ sɛɛ lɛ [yeɔ] ehe odase kpakpa, . . . [ni] sane ko bɛ [ehe]”? (1 Timoteo 3:1-7, 10; Tito 1:7) Dabi, efeeŋ nakai. No hewɔ lɛ, efeeŋ mɔ ni sa kɛha asafoŋ hegbɛi.

Kɛ́ Kristofonyo ni Ejɔɔ Ehe nɔ Fee Esha

Yehowa nuɔ shishi akɛ wɔgbɔjɔ, ni ákɛ yɛ baptisimɔ sɛɛ po lɛ, ekolɛ wɔbaagbee esha mli. Bɔfo Yohane ŋma wolo eha Kristofoi ni hi shi yɛ egbii lɛ amli lɛ akɛ: “Miiŋma nyɛ nii nɛɛ, koni nyɛkafee esha. Ni kɛ mɔ ko fee esha jiŋŋ, wɔyɛ mlidamɔlɔ yɛ tsɛ lɛ ŋɔɔ, Yesu Kristo jalɔ lɛ; ni lɛ ji wɔhe eshai lɛ ahe kpatamɔ nɔ; shi jeee wɔnɔ̃ lɛ kɛkɛ he, shi moŋ jeŋ muu lɛ fɛɛ nɔ̃ lɛ hu he.” (1 Yohane 2:1, 2) Hɛɛ, Yehowa baadamɔ Yesu afɔleshaa lɛ nɔ ekɛ Kristofoi ni abaptisi amɛ, ni amɛgbeeɔ esha mli lɛ ahe ake amɛ—kɛji amɛshwa amɛhe lɛlɛŋ ni amɛtsake amɛgbɛ fɔŋ lɛ kwraa.

Ana enɛ he nɔkwɛmɔ nɔ yɛ klɛŋklɛŋ afii oha lɛ mli asafo ni hi Korinto lɛ mli. Bɔfo Paulo nu sane ko ni kɔɔ ajwamaŋbɔɔ ni tee nɔ yɛ mɔ kɛ ewekunyo teŋ yɛ nakai asafo hee lɛ mli lɛ he, ni ekɛ famɔ ha akɛ ashwie nuu ni fee nakai lɛ kɛjɛ asafo lɛ mli. Sɛɛ mli lɛ, eshafeelɔ lɛ shwa ehe, ni Paulo wo asafo lɛ ŋaa akɛ ahe lɛ kɛba mli ekoŋŋ. (1 Korintobii 5:1, 13; 2 Korintobii 2:5-9) Enɛ hewɔ lɛ, atsɔ̃ Yehowa suɔmɔ kɛ mlihilɛ lɛ tsamɔ hewalɛ lɛ kɛ Yesu kpɔmɔ afɔleshaa lɛ jara ni wa waa lɛ nɔ atsuu nuu lɛ he kɛjɛ ehe eshai lɛ amli. Nibii ni tamɔ nakai baanyɛ aba ŋmɛnɛ. Ni agbɛnɛ hu, kɛji mɔ ko ni abaptisi lɛ ni eyafee esha ni hiɛdɔɔ yɔɔ mli lɛ shwa ehe ni akɛ ehe ke lɛ yɛ Yehowa hiɛ po lɛ, ekolɛ nibii yɛ ni jɛ esha ni efee lɛ mli ni miiya nɔ lolo.—Abɛi 10:16, 17; Galatabii 6:7.

Akɛ nɔkwɛmɔ nɔ lɛ, kɛji gbekɛ yoo ni abaptisi lɛ yabɔ ajwamaŋ lɛ, ekolɛ ekɛ dɔlɛ baashwa ehe yɛ enifeemɔ lɛ he ni naagbee lɛ abaasaa akɛ lɛ aba mumɔŋ hewalɛ kpakpa mli ekoŋŋ kɛtsɔ asafo lɛ yelikɛbuamɔ nɔ. Shi kɛ́ ena musu yɛ ejeŋba shara lɛ hewɔ hu? No lɛ eshihilɛ fɛɛ etsake kwraa kɛtsɔ nɔ ni efee lɛ nɔ, bɔ ni enyɛŋ ejo naa foi. Ekolɛ nuu ni efite gbala lɛ baashwa ehe, ni no hewɔ lɛ ashwieŋ lɛ kɛjɛŋ asafo lɛ mli. Shi eŋa ni efeko efɔŋ ko lɛ yɛ Ŋmalɛ naa nɔdaamɔ nɔ ni ekɛaatse lɛ gbala, ni ekolɛ eeehala akɛ eeefee nakai. (Mateo 19:9) Kɛ́ efee nakai lɛ, eyɛ mli akɛ Yehowa kɛ nuu lɛ he eke lɛ moŋ, shi ekɛ nii ni yɔɔ hiɛdɔɔ ni jɛ esha ni efee lɛ mli lɛ baahi shi ewala gbii abɔ ni eshwɛ lɛ fɛɛ.—1 Yohane 1:9.

Shi nuu ni kɛ yitsoŋwalɛ shwieɔ eŋa koni ekɛ yoo kroko ayahi shi lɛ hu? Ekolɛ yɛ naagbee lɛ ebaashwa ehe, ni abaasaa ahe lɛ kɛba asafo lɛ mli ekoŋŋ. Beni be shwieɔ mli lɛ, ekolɛ ebaaya ehiɛ ni ‘ebaafo mli kɛya dalɛ mli.’ (Hebribii 6:1) Shi bei abɔ ni eklɛŋklɛŋ ŋa lɛ hiɔ shi ni ebɛ hefatalɔ lɛ, efeeŋ mɔ ni sa akɛ eeesɔmɔ akɛ mɔ ni tsuɔ gbɛnaa nii ko he nii yɛ asafo lɛ mli. Ejeee “mɔ ni yɔɔ ŋa kome” ejaakɛ ebɛ Ŋmalɛ naa nɔdaamɔ nɔ ni ekɛaatse eklɛŋklɛŋ ŋa lɛ gbala.—1 Timoteo 3:2, 12.

Ani enɛɛmɛi jeee yiŋtoi ni mli wa hewɔ ni esa akɛ Kristofonyo aná su ni haa ehiɔ efɔŋ kwraa lɛ?

Mɔ ko ni Feɔ Gbekɛbii Niseniianii Hu?

Shi kɛji Kristofonyo ni eda ni abaptisi lɛ lɛ fee gbekɛ ko bɔlɛnamɔ mli niseniianii hu? Ani eshafeelɔ lɛ yitsoŋ wa bɔ ni Yehowa kɛ ehe ekeŋ lɛ kɔkɔɔkɔ? Jeee doo akɛ nakai. Yesu wie akɛ ‘musubɔɔ wiemɔ ni awieɔ ashiɔ mumɔ krɔŋkrɔŋ’ lɛ ji nɔ ni akɛkeee. Ni Paulo kɛɛ akɛ eshai ahe afɔle ko bɛ dɔŋŋ kɛha mɔ ni jeɔ gbɛ efeɔ esha, yɛ anɔkwale lɛ ni ele lɛ fɛɛ sɛɛ. (Luka 12:10; Hebribii 10:26, 27) Shi Biblia lɛ ekɛɛɛ yɛ he ko kwraa akɛ anyɛŋ akɛ Kristofonyo ni eda, ni feɔ gbekɛ ko bɔlɛnamɔ mli niseniianii—kɛji ewekunyo ni jio, jeee wekunyo ni jio—lɛ he ake lɛ. Yɛ anɔkwale mli lɛ, abaanyɛ ajie ehe eshai lɛ kɛya ni ehe atse kɛji ekɛ anɔkwayeli shwa ehe kɛjɛ etsui mli ni etsake ejeŋba kwraa. Shi kɛlɛ, ekolɛ ehe baahia ni eya nɔ ewuu eshi heloo mli henumɔi fɔji ni ena lɛ be fɛɛ be. (Efesobii 1:7) Ni ekolɛ nibii komɛi baajɛ mli aba ni enyɛŋ ejo naa foi.

Yɛ mla ni yɔɔ maŋ nɔ he ni eyɔɔ lɛ naa lɛ, eeenyɛ eba lɛ akɛ ekolɛ abaawo niseniianii feelɔ lɛ tsuŋ aloo ebaaná toigbalamɔi krokomɛi kɛjɛ Maŋ lɛ dɛŋ. Asafo lɛ ebuŋ ehe kɛjɛŋ enɛ mli. Kɛfata he lɛ, nuu lɛ ejie gbɔjɔmɔ ko ni hiɛdɔɔ yɔɔ mli kpo, ni kɛjɛ nakai be lɛ nɔ kɛyaa lɛ, esa akɛ asusu he. Kɛji etamɔ mɔ ko ni eshwa ehe lɛ, no lɛ abaawo lɛ hewalɛ ni eya hiɛ yɛ mumɔŋ, ni ekɛ ehe awo shiɛmɔ nitsumɔ lɛ mli, ni ena Teokrase Sɔɔmɔ Skul lɛ po mli nifeemɔi, kɛ Sɔɔmɔ Kpee lɛ mli fãi komɛi ni jeee nitsɔɔmɔ lɛ amli gbɛfaŋnɔ. Shi, enɛ etsɔɔɔ akɛ ebaafee mɔ ni sa akɛ esɔmɔ akɛ mɔ ni akɛ gbɛnaa nii ahe nitsumɔ baawo edɛŋ yɛ asafo lɛ mli. Mɛni ji Ŋmalɛ naa yiŋtoi kɛha enɛ?

Yiŋtoi lɛ ekome ji akɛ, esa akɛ onukpa lɛ afee mɔ ni “yeɔ ehe nɔ.” (Tito 1:8, NW) Eji anɔkwale, wɔteŋ mɔ ko kwraa bɛ henɔyeli ni yeɔ emuu. (Romabii 7:21-25) Shi Kristofonyo ni eda ni ejɔɔ ehe nɔ, ni gbeeɔ esha ni ji bɔlɛnamɔ mli niseniianii ni afeɔ gbekɛ lɛ mli lɛ, jieɔ heloo mli gbɔjɔmɔ ko ni jeee adebɔɔ su mli nɔ̃ kpo. Niiashikpamɔ etsɔɔ akɛ mɔ ko ni eda, ni tamɔ nɛkɛ, baafee gbekɛbii krokomɛi hu niseniianii. Eji anɔkwale akɛ, jeee gbekɛbii aniseniianii feelɔi fɛɛ feɔ esha lɛ ekoŋŋ moŋ, shi amɛteŋ mɛi pii feɔ. Ni asafo lɛ nyɛŋ ale tsuii amli saji ni enyɛ etsɔɔ mɔ ni baafee gbekɛbii niseniianii ekoŋŋ kɛ mɔ ni efeeŋ nakai dɔŋŋ. (Yeremia 17:9) No hewɔ lɛ, Paulo ŋaawoo ni ekɛha Timoteo lɛ kɔɔ mɛi ni edara ni abaptisi amɛ, ni amɛfee gbekɛbii niseniianii pɛŋ lɛ ahe kɛ hewalɛ kɛ nɔmimaa krɛdɛɛ ko, akɛ: “Kaaŋɔ oniji oshwie mɔ ko nɔ oya, ni asaŋ kaaŋɔ ohe ofutu mɛi krokomɛi ahe eshai amli.” (1 Timoteo 5:22) Yɛ wɔbii lɛ ahebuu hewɔ lɛ, nuu ni ale lɛ akɛ mɔ ko ni efee gbekɛ ko niseniianii dã lɛ esaaa kɛha sɔɔmɔ gbɛnaa nii ahe nitsumɔ yɛ asafo lɛ mli. Kɛfata he lɛ, enyɛŋ efee gbɛgbalɔ, loo ni esɔmɔ yɛ be-fɛɛ sɔɔmɔ hegbɛ krɛdɛɛ kroko mli.—Okɛto shishitoo mla ni yɔɔ 2 Mose 21:28, 29 lɛ he.

Shi ekolɛ mɛi komɛi baabi akɛ, ‘Ani mɛi krokomɛi efeko eshai krokomɛi ni ana akɛ amɛshwa amɛhe, ni sɛɛ mli lɛ, amɛyafee nakai esha lɛ ekoŋŋ?’ Hɛɛ, nakai nɔ ko eba dã, shi otii krokomɛi yɛ ni esa akɛ asusu he. Akɛ nɔkwɛmɔ nɔ lɛ, kɛji akɛ mɔ ko ni eda kɛ bɔlɛnamɔ fɔŋ he jwɛŋmɔ miibɛŋkɛ mɔ kroko ni eda lɛ, esa akɛ mɔ ni eda nɛɛ anyɛ ate shi awo nuu loo yoo nɛɛ yiŋtoi lɛ. Gbekɛbii alakamɔ, kɛ amɛ yiŋfutumɔ, loo amɛ hegbeyeiwoo waaa kwraa. Biblia lɛ wieɔ nilee ni gbekɛ bɛ lɛ he. (Abɛi 22:15; 1 Korintobii 13:11) Yesu kɛ gbekɛbii tsu nii akɛ heshibaa ni akɛleee efɔŋ lɛ he nɔkwɛmɔ nɔ. (Mateo 18:4; Luka 18:16, 17) Niiashikpamɔ ni ebɛ kwraa fata efɔŋ ni gbekɛ leee lɛ he. Gbekɛbii pii sumɔɔ mɔ bɛŋkɛmɔ kɛ nihamɔ, amɛsumɔɔ ni asumɔ amɛ sane, ni no hewɔ lɛ mɔ ko ni eda ni amɛle lɛ ni amɛkɛ amɛhe fɔ̃ɔ enɔ, ni miitsɔ̃ ŋaa fɔŋ lɛ nine baanyɛ ashɛ amɛnɔ. No hewɔ lɛ, sɔ̃ kã asafo lɛ nɔ yɛ Yehowa hiɛ akɛ ebu gbekɛbii lɛ ahe.

Gbekɛbii ni atsɔse amɛ jogbaŋŋ lɛ kaseɔ bɔ ni aboɔ mɔ toi, ni amɛkɛ woo haa amɛfɔlɔi, onukpai lɛ, kɛ mɛi krokomɛi ni edara. (Efesobii 6:1, 2; 1 Timoteo 5:1, 2; Hebribii 13:7) Ebaafee jeŋba mli fitemɔ ni haa mɔ he jɔ̃ɔ lɛ kɛji mɛi ni edara ni amɛyɔɔ hegbɛ nɛɛ ateŋ mɔ ko kɛ efɔŋ ni gbekɛ lɛ leee kɛ hekɛnɔfɔɔ ni eyɔɔ yɛ emli lɛ baatsu nii yɛ gbɛ fɔŋ nɔ ni ekɛlaka lɛ loo enyɛ enɔ ni ekpɛlɛ bɔlɛnamɔ mli nifeemɔi anɔ. Bei pii lɛ, mɛi ni afee amɛ bɔlɛnamɔ mli niseniianii yɛ nɛkɛ gbɛ nɔ lɛ kɛ afii babaoo peleɔ amɛhe akɛ amɛaaye henumɔ mli haomɔi ni jɛɔ mli baa lɛ anɔ. Enɛ hewɔ lɛ, mɔ ni feɔ gbekɛ niseniianii lɛ naa toigbalamɔ ni mli wa kɛ naatsii kɛjɛɔ asafo lɛ dɛŋ. Jeee bulɛ kɛ gbɛhe ni eyɔɔ akɛ mɔ ni eda ni yɔɔ hegbɛ lɛ pɛ kɛkɛ esa akɛ asusu he, shi moŋ, asafo lɛ hetsemɔ ni muji ko ehiŋ he.—1 Korintobii 5:6; 2 Petro 3:14.

Kɛ́ mɔ ko ni feɔ gbekɛbii aniseniianii lɛ shwa ehe lɛlɛŋ lɛ, ebaana nilee ni yɔɔ Biblia shishitoo mlai kɛ nitsumɔ mli. Kɛji ekase efɔŋ ni ahiɔ lɛlɛŋ lɛ, ebaabu nɔ ni efee lɛ akɛ nɔ fɔŋ diɛŋtsɛ, ni ebaapele waa ni ekafee nakai esha lɛ dɔŋŋ. (Abɛi 8:13; Romabii 12:9) Kɛfata he lɛ, eka shi faŋŋ akɛ ebaada Yehowa shi yɛ bɔ ni E-suɔmɔ da hã, ni no hewɔ ni eshafeelɔ ni etsake etsui, tamɔ bɔ ni eji lɛ, baanyɛ aya nɔ aja wɔ-Nyɔŋmɔ ni yɔɔ krɔŋkrɔŋ lɛ, ni ena hiɛnɔkamɔ akɛ ebaafata “mɛi ni ja” ni baahi shikpɔŋ nɔ kɛya naanɔ lɛ ahe lɛ he.—Abɛi 2:21.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 28]

Eyɛ mli akɛ Yehowa kɛ eshafeelɔi ni tsakeɔ amɛtsui lɛ ahe keɔ amɛ moŋ, shi ekolɛ nibii komɛi baajɛ amɛnifeemɔi lɛ amli kɛba ni amɛnyɛŋ amɛjo naa foi