“Yakayaka Adesãi lɛ, Guu”

BIBLIA lɛ eyi obɔ kɛ gbɔmɛi aniiashikpamɔi kɛ amɛhe saji. Jeee akɛ wɔnáa amɛkanemɔ he miishɛɛ kɛkɛ, shi moŋ wɔnáa he sɛɛ hu. Bɔfo Paulo ŋma wolo eyaha Kristofoi asafo ni yɔɔ Roma lɛ akɛ: “Nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.”—Romabii 15:4.

Paulo diɛŋtsɛ po gbaa mɛi niiashikpamɔi. Biblia lɛ kɛɔ yɛ Paulo kɛ Barnaba he, yɛ amɛ klɛŋklɛŋ maŋsɛɛ sanekpakpa shiɛmɔ gbɛfaa lɛ naagbee akɛ: “Shi beni amɛba jɛi [Antiokia yɛ Siria] ni amɛbabua asafo lɛ naa lɛ, amɛgba amɛ nii ni Nyɔŋmɔ kɛ amɛ eyatsu lɛ fɛɛ.” (Bɔfoi lɛ Asaji 14:27) Ŋwanejee ko bɛ he akɛ niiashikpamɔi nɛɛ wo nyɛmimɛi lɛ hewalɛ waa.

Shi kɛlɛ, jeee niiashikpamɔi lɛ fɛɛ tswaa mɔ emaa shi. Paulo jɛ mumɔŋ ewo Timoteo ŋaa akɛ: “Yeimeji ayakayaka adesãi lɛ, guu.” (1 Timoteo 4:7) Ni eŋma wolo eyaha Tito akɛ Kristofoi anɔkwafoi lɛ, “amɛkabo Yudafoi lɛ adesãi lɛ kɛ gbɔmɛi ni kpaleɔ kɛjɛɔ anɔkwale lɛ mli lɛ akitai lɛ atoi.”—Tito 1:14.

Mɛni ji nɛkɛ amalei, loo adesãi nɛɛ? Nɛkɛ wiemɔi enyɔ nɛɛ fɛɛ jɛ Hela wiemɔ myʹthos (“blema adesã”) mli. The International Standard Bible Encyclopaedia jajeɔ akɛ nɛkɛ wiemɔ nɛɛ tsɔɔ “(jamɔ mli) adesã ni kɛ nɔ ni yɔɔ diɛŋtsɛ lɛ bɛ tsakpaa ko kwraa.”

Paulo beaŋ je lɛ eyi obɔ kɛ adesãi ni tamɔ nɛkɛ. Ehe nɔkwɛmɔ nɔ ji apokrifa wolo ni atsɛɔ lɛ Tobit, ni ekolɛ aŋma nɔ ni fe afii ohai enyɔ dani eshɛ Paulo beaŋ lɛ. Nɛkɛ adesã nɛɛ wieɔ Tobit, ni ji Yudanyo ko ni jaa Nyɔŋmɔ waa, ní shwila beni looflɔ ko wamɔ bote ehiŋmɛi mli lɛ he. Sɛɛ mli lɛ, etsu ebinuu Tobias ni eyabi nyɔmɔ. Beni enyiɛ gbɛ nɔ kɛyaa lɛ, Tobias yana loo ko tsui, emlɛbo, kɛ edɔrɔ, yɛ ŋwɛibɔfo ko gbɛtsɔɔmɔ naa. No sɛɛ lɛ, ekɛ yoo okulafo ko hu kpe, mɔ ni, eyɛ mli akɛ ebote gbalashihilɛ mli shii kpawo moŋ, shi eka he eji obalayoo foro lolo ejaakɛ mumɔ fɔŋ ko gbeɔ ewumɛi lɛ ateŋ mɔ fɛɛ mɔ yɛ yookpeemɔ lɛ sɛɛ gbɛkɛnaashi. Yɛ ŋwɛibɔfo lɛ yisɛɛ-tsirɛmɔ naa lɛ, Tobias kɛ yoo lɛ hi shi ni eshã loo lɛ tsui kɛ emlɛbo lɛ ni ekɛshwie mumɔ fɔŋ lɛ. Sɛɛ mli lɛ, Tobias kɛ loo lɛ dɔrɔ lɛ tsa etsɛ hiŋmɛi lɛ ni ena nii ekoŋŋ.

Eyɛ faŋŋ akɛ, nɛkɛ adesã nɛɛ jeee anɔkwale. Yɛ adesã ni eji kɛ hemɔkɛyeli gbonyo ni efiɔ sɛɛ lɛ fɛɛ sɛɛ lɛ, tɔmɔi yɛ mli. Akɛ nɔkwɛmɔ nɔ lɛ, sane lɛ kɛɔ akɛ Tobit na kooyigbɛ wekui lɛ atuatsemɔ lɛ kɛ Israelbii lɛ ananeshi tutswaa kɛmiiya Ninive, ni ji Israel yinɔsane mli nibii ni ba ni afii 257 kã amɛteŋ lɛ kɛ ehiŋmɛi. Ni kɛlɛ, adesã lɛ kɛɔ akɛ beni Tobit gbo lɛ, no mli lɛ eye afii 112.—Tobit 1:4, 11; 14:1, The Jerusalem Bible.

Nɛkɛ blema adesãi nɛɛ fataaa anɔkwale “tsamɔ wiemɔi” ni Nyɔŋmɔ tsuji anɔkwafoi jaje amɛtsɔɔ lɛ ahe. (2 Timoteo 1:13) Amɛji nibii ni jɛɔ mɛi asusumɔi amli kɛbaa, nibii ni kɛ yinɔsane mli anɔkwalei kpaaa gbee, ni ji adesãi ni yeimeji ni bɛ Nyɔŋmɔ gbeyeishemɔ lɛ tãa lɛ. Enɛɛmɛi ji adesãi ni esa akɛ Kristofoi agu lɛ.

Anɔkwa Wiemɔi lɛ Kaa-kɛ-Kwɛmɔ

Ayɛ adesãi ni tamɔ nakai babaoo ŋmɛnɛ. Paulo ŋma akɛ: “Be ko baaba ni [gbɔmɛi] ekpɛlɛŋ tsamɔ tsɔɔmɔ lɛ dɔŋŋ, . . . ni amɛaakpala anɔkwale lɛ yɛ amɛtoii asɛɛ, ni amɛkpale amɛyabo adesãi moŋ atoi.” (2 Timoteo 4:3, 4) Yɛ je lɛŋ hei komɛi lɛ, adesãi ni ataa yɛ bɔɔnii ni he wa fe adesai ahe lɛ egbɛ eshwa waa, ni mɛi le jogbaŋŋ hu. No hewɔ lɛ, Kristofoi kɛ nilee “kaa wiemɔi” ni jɛɔ jamɔ mli adesãi amli lɛ amɛkwɛɔ akɛ ani ekɛ Biblia lɛ kpaa gbee lo.—Hiob 12:11.

Eyɛ faŋŋ akɛ pii kɛ lɛ kpaaa gbee. Akɛ nɔkwɛmɔ lɛ, yɛ je lɛŋ hei pii lɛ, afɔɔ adesãi ni fiɔ susumɔi ni mɛi yɔɔ akɛ adesa susuma lɛ gbooo lɛ sɛɛ lɛ numɔ waa. Nɛkɛ adesãi nɛɛ tsɔɔ bɔ ni gbɔmɔ gboɔ, kɛkɛ lɛ sɛɛ mli lɛ, esaa eba ekoŋŋ yɛ abifao ko gbɔmɔtso mli, aloo akɛ mumɔ, loo kooloo, aloo akɛ mɔ ko yɛ he kroko kwraa.

Shi, Nyɔŋmɔ Wiemɔ lɛ tsɔɔ akɛ adesai asusumai lɛ gboiɔ; susumai gboiɔ. (Ezekiel 18:4) Kɛfata he lɛ, Biblia lɛ kɛɔ akɛ wala bɛ gbohii lɛ amli yɛ gbohii abui lɛ amli, amɛnyɛɛɛ amɛjwɛŋ, loo amɛwie, loo amɛfee nɔ kroko. (Jajelɔ 9:5, 10; Romabii 6:23) Enɛ hewɔ lɛ, taakɛ Paulo kɛɛ lɛ, mɛi ni yakayaka adesãi ni gbɛɔ susumɔi ni mɛi yɔɔ akɛ susuma lɛ gbooo lɛ eshwaa lɛ lakaa amɛ lɛ ‘ekpale’ kɛjɛ Biblia lɛ “tsamɔ tsɔɔmɔ” lɛ he.

Bɔɔnii ni He Wa Fe Adesai lɛ ahe Adesãi

Adesãi lɛ ekrokomɛi gbalaa jwɛŋmɔ kɛyaa ayɛi kɛ okɔmfoi anɔ. Akɛ nɔkwɛmɔ nɔ lɛ, yɛ Afrika hei komɛi nɛkɛ lɛ, awieɔ akɛ nɛkɛ efɔŋ tsuji nɛɛ yɛ hewalɛi komɛi ni naa wa waa, ni amɛnyɛɔ amɛtsakeɔ amɛ diɛŋtsɛ amɛhe loo mɛi krokomɛi amɛfeɔ amɛ waamɔ kooloi, aduji, kɛ loofɔji; amɛnyɛɔ amɛfilikiɔ kɛtsɔɔ kɔɔyɔɔ mli ni amɛkɛtsuɔ amɛyiŋtoi ahe nii; amɛnyɛɔ amɛpueɔ ni amɛlaajeɔ; amɛnyɛɔ amɛtsɔɔ gbogboi amli; ni amɛnyɛɔ amɛnaa nibii ni afũ yɛ shikpɔŋ po.

Bɔ ni nɛkɛ adesãi nɛɛ egbɛ eshwa babaoo, kɛ bɔ ni ayɔɔ hemɔkɛyeli yɛ mli yɛ he fɛɛ he lɛ, baanyɛ ana mɛi komɛi anɔ hewalɛ yɛ Kristofoi asafo lɛ mli ni amɛ hu amɛhe amɛye akɛ anɔkwale ni. Ekolɛ amɛbaasusu akɛ eyɛ mli akɛ adesai foji nyɛŋ afee nakai nibii moŋ, shi mɛi ni náa hewalɛi ni fe adesai anɔ kɛjɛɔ mumɔŋ bɔɔnii, ni ji daimonioi aŋɔɔ lɛ baanyɛ afee. Nɔ ni feɔ tamɔ nɔdaamɔ nɔ kɛha nɛkɛ sane naamuu ji 2 Tesalonikabii 2:9, 10, he ni kɛɔ akɛ: “[Mlakwalɔ lɛ] baa lɛ mli lɛ eeeba kɛ Satan nitsumɔ ni mli wa yɛ amale hewalɛ kɛ okadii kɛ naakpɛɛ nii fɛɛ mli, kɛ nii ni ejaaa gbɛ fɛɛ ni akɛshishiuɔ mɛi ni laajeɔ lɛ, ejaakɛ amɛmɔɔɔ anɔkwale suɔmɔ lɛ mli ni akɛhere amɛyiwala.”

Eyɛ mli akɛ eji anɔkwale akɛ ŋmalɛ nɛɛ tsɔɔ akɛ Satan nyɛɔ hewalɛ nitsumɔ etsuɔ moŋ, shi etsĩɔ tã hu akɛ Satan ji mɔ ni kɛ “amale hewalɛ kɛ okadii,” kɛ agbɛnɛ “naakpɛɛ nibii fɛɛ” baa. Biblia lɛ tsɔɔ be fɛɛ be akɛ Satan ji amalelɔ kpele fe fɛɛ, mɔ ni “shishiuɔ jeŋ muu lɛ fɛɛ lɛ.” (Kpojiemɔ 12:9) Lɛ ji mɔ ni he esa fe fɛɛ ni haa mɛi heɔ nibii ni jeee anɔkwale lɛ amɛyeɔ.

Yɛ enɛ hewɔ lɛ, bei pii lɛ, anyɛɛɛ akɛ he afɔ odase ni mɛi ni kɛ amɛhe ewo mumɔi atsɛmɔ nifeemɔi loo ayɛkpɛmɔ mli lɛ yeɔ, loo wiemɔi ni amɛwieɔ lɛ anɔ. Ekolɛ nɛkɛ gbɔmɛi nɛɛ kɛ anɔkwayeli heɔ amɛyeɔ akɛ amɛna, loo amɛnu, aloo amɛná niiashikpamɔi komɛi; shi, yɛ anɔkwale mli lɛ, ejeee nakai. Akɛ nɔkwɛmɔ nɔ lɛ, mɛi komɛi yɛ ni susuɔ akɛ amɛkɛ gbohii amumɔi ewie dã. Shi amɛtɔ̃, amɛmiilaka amɛhe, ni Satan lakamɔ tsɔne lɛ edũ amɛ. Biblia lɛ kɛɔ akɛ gbohii lɛ “kpelekeɔ shi kɛyaa he ni efee dioo lɛ.”—Lala 115:17.

Yɛ Abonsam gbɛi gbonyo ni eyɔɔ akɛ amalelɔ lɛ hewɔ lɛ, kɛ hoo kwraa lɛ, anaa jwɛŋmɔi enyɔnyɔ yɛ bɔɔnii ni he wa fe adesai ahe adesãi ni atãa nɛɛ ahe waa. Amɛmli babaoo jɛ hemɔkɛyelii gbohii amli susumɔi, ní ehe wiemɔi babaoo lɛ eha awo he aahu lɛ amli.

Nɛkɛ blema adesãi nɛɛ agbɛɛ-kɛ-shwamɔ haa malemɔ tsɛ, Satan Abonsam yiŋtoi ahe nitsumɔ yaa hiɛ. (Yohane 8:44) Amɛwoɔ mumɔi atsɛmɔ nifeemɔi ni Yehowa hiɔ lɛ ahe miishɛɛnamɔ he hewalɛ. (5 Mose 18:10-12) Amɛdũɔ gbɔmɛi yɛ gbeyeishemɔ kɛ hemɔkɛyeli gbonyo tsɔne lɛ mli. No hewɔ lɛ ebɛ naakpɛɛ akɛ Paulo wo Kristofoi aŋaa akɛ “amɛkadĩ adesãi . . . [a]sɛɛ.”—1 Timoteo 1:3, 4.

Daimonioi Odaseyeli lɛ Kpoomɔ

Shi, kɛ etamɔ nɔ ni adesãi lɛ ji anɔkwale hu? Bei komɛi lɛ, agbaa niiashikpamɔi komɛi ni mumɔi loo mumɔi atsɛlɔi lɛ tsɔɔ bɔ ni amɛkpɛlɛɔ Yehowa nɔ akɛ enɔ kwɔ, kɛ bɔ ni e-Dasefoi lɛ hu ji anɔkwafoi ha. Ani esa akɛ Kristofoi agba nɛkɛ saji nɛɛ amɛtsɔɔ?

Dabi, esaaa ni amɛfeɔ nakai. Biblia lɛ kɛɔ akɛ beni mumɔi ni he tseee bolɔ akɛ Yesu ji Nyɔŋmɔ Bi lɛ, “etswa amɛnaa ma veveeve akɛ amɛkajie lɛ shi.” (Marko 3:12) Nakai nɔŋŋ hu beni daimonio ko ni haa mɔ klaa nyɛ obalayoo ko nɔ ni etsɛ Paulo kɛ Barnaba akɛ “Nyɔŋmɔ ni yɔɔ Ŋwɛi Shɔŋŋ lɛ tsuji” kɛ “walaheremɔ gbɛ lɛ” shiɛlɔi lɛ, Paulo fã nakai mumɔ lɛ kɛjɛ emli. (Bɔfoi lɛ Asaji 16:16-18) Yesu, Paulo, aloo Biblia ŋmalɔi lɛ ateŋ mɔ ko kwraa eŋmɛɛɛ daimonioi agbɛ ni amɛye Nyɔŋmɔ yiŋtoo aloo etsuji ni ehala lɛ ahe odase.

Nɔ ni sa kadimɔ hu ji akɛ, Yesu Kristo ehi shi yɛ mumɔi aje lɛ mli dani eba shikpɔŋ lɛ nɔ. Ele Satan jogbaŋŋ diɛŋtsɛ. Shi kɛlɛ, Yesu egbaaa ekaselɔi lɛ Satan he saji ni ekɛwo amɛnaaŋmɔlɔ, ni nakai nɔŋŋ hu ewieee nibii ni Abonsam baanyɛ afee kɛ nɔ ni enyɛŋ efee lɛ ahe babaoo. Satan kɛ edaimonioi lɛ jeee Yesu nanemɛi. Mɛi ni ashwie amɛ, kɛ atuatselɔi ji amɛ, mɛi ni nyɛɔ nii ni yɔɔ krɔŋŋ, Nyɔŋmɔ henyɛlɔi.

Biblia lɛ kɛɔ wɔ nɔ ni ehe hiaa ni wɔle. Etsɔɔ wɔ mɛi ni daimonioi lɛ ji, bɔ ni amɛlakaa gbɔmɛi amɛhaa, kɛ bɔ ni wɔɔfee wɔtsi wɔhe kɛjɛ amɛhe. Etsɔɔ akɛ Yehowa kɛ Yesu he wa kwraa fe daimonioi lɛ. Ni ekɛ gbɛtsɔɔmɔ haa wɔ akɛ kɛ wɔkɛ anɔkwayeli sɔmɔ Yehowa lɛ, mumɔi fɔji nyɛŋ afee wɔ efɔŋ ko ni baahi shi kɛya naanɔ.—Yakobo 4:7.

Belɛ, yiŋtoo kpakpa hewɔ ni Kristofoi guɔ yakayaka adesãi, ni ji adesãi ni mɛi ni teɔ shi amɛwoɔ Yehowa lɛ ayiŋtoi pɛ he hewalɛ ewoɔ lɛ. Bɔ ni Yesu ‘ye anɔkwale lɛ he odase’ lɛ, nakai nɔŋŋ esɛɛnyiɛlɔi lɛ hu feɔ ŋmɛnɛ. (Yohane 18:37) Amɛkɛ nilee boɔ Biblia ŋaawoo nɛɛ toi, akɛ: “Nii abɔ ni ji anɔkwale . . . lɛ, enɛɛmɛi anɔ nyɛjwɛŋa!”—Filipibii 4:8.

[Mfoniri ni yɔɔ baafa 31]

Esa akɛ anɔkwa Kristofoi atsi amɛhe kɛjɛ nibii fɛɛ ni jieɔ mumɔi atsɛmɔ nifeemɔi akpo lɛ ahe