Ha Tsamɔ Tsɔɔmɔ Afee Oshihilɛ Gbɛ
“Nyɔŋmɔ jamɔ hetuu-kɛhamɔ he yɛ sɛɛnamɔ kɛha nibii fɛɛ.”—1 TIMOTEO 4:8, New World Translation.
1, 2. Nɛgbɛ gbɔmɛi susuɔ amɛgbɔmɔtsoŋ hewalɛnamɔ he kɛyashɛɔ, ni mɛni jɛɔ mli baa?
MƐI pii baakpɛlɛ nɔ amrɔ nɔŋŋ akɛ gbɔmɔtsoŋ hewalɛnamɔ kpakpa ji shihilɛ mli jwetrii ni jara wa waa lɛ ateŋ ekome. Amɛkɛ be kɛ shika babaoo tsuɔ nii koni amɛhi gbɔmɔtsoŋ hewalɛnamɔ kpakpa mli, ni amɛkwɛɔ jogbaŋŋ hu koni amɛna tsofa-feemɔ kpakpa kɛ ehe miihia amɛ. Akɛ nɔkwɛmɔ nɔ lɛ, yɛ U.S. Amerika lɛ, daa afi hewalɛnamɔ-kwɛmɔ kɛha nyɛsɛɛ afi nɛɛ fa fe Amerika shika dɔlai akpekpei akpei 900 ($900 billion). Enɛ fe Amerika shika dɔlai 3,000 ni afiteɔ daa afi, kɛha nuu fɛɛ nuu, yoo fɛɛ yoo, kɛ gbekɛ fɛɛ gbekɛ ni yɔɔ nakai maŋ lɛ mli, ni bɔ ni eji kɛha gbɔmɔ fɛɛ gbɔmɔ yɛ maji krokomɛi ni amɛna nɔyaa lɛ amli lɛ miihe atamɔ nakai nɔŋŋ.
2 Mɛni ji nɔ ni be, hewalɛ, kɛ shikafitemɔ lɛ fɛɛ kɛba? Mɔ ko ejeŋ he ŋwane akɛ, kɛ abu fɛɛ he akɔntaa lɛ, wɔyɛ tsofa-feemɔ mli nibii kɛ gbɛjianɔtoo ni etee hiɛ ŋmɛnɛ fe be kroko yɛ yinɔsane mli. Ni kɛlɛ, enɛ kɛ shihilɛ yɛ gbɔmɔtsoŋ hewalɛnamɔ kpakpa mli bako. Yɛ anɔkwale mli lɛ, beni U.S. Amerika maŋ nɔyelɔ lɛ tsɔɔ gbɛjianɔ ni ato kɛha hewalɛnamɔ-kwɛmɔ kɛha Amerika lɛ mli lɛ, etsɔɔ akɛ, kɛfata “shika babaoo ni afiteɔ yɛ awuiyeli he, ni anyɛɛɛ naa atsi lɛ he lɛ,” gbɔmɛi ni yɔɔ U.S. Amerika ni “yeɔ AIDS hela, ni shɛreɔ zigaret, ni nuɔ daa babaoo, kɛ gbekɛbii ni ŋɔɔ hɔ, kɛ fufɔbii ni amɛtsiii kwraa yɛ fɔmɔ mli lɛ ayi fa” fe maji krokomɛi ni amɛna nɔyaa lɛ. Ni te emu sane naa eha tɛŋŋ? “Esa akɛ wɔtsake wɔshihilɛ gbɛ kɛ wɔmiitao diɛŋtsɛ ni wɔfee gbɔmɛi ni yɔɔ gbɔmɔtsoŋ hewalɛ akɛ maŋ.”—Galatabii 6:7, 8.
Hewalɛnamɔ Shihilɛ
3. Yɛ blema Helabii akusum-nifeemɔ hewɔ lɛ, mɛɛ ŋaawoo Paulo kɛha?
3 Ale Helabii yɛ klɛŋklɛŋ afii oha lɛ mli akɛ mɛi ni amɛtu amɛhe amɛha gbɔmɔtsoŋ hewalɛnamɔ, koni amɛgbɔmɔtsei asara, kɛ foidamɔ he akaŋshii sɔrɔtoi. Shihilɛ ni tamɔ nɛkɛ mli ajɛ akɛ mumɔ tsirɛ bɔfo Paulo koni eŋma wolo eyaha obalanyo Timoteo akɛ: “Gbɔmɔtso he mɔdɛŋbɔɔ he sɛɛnamɔ faaa; shi Nyɔŋmɔ jamɔ hetuu-kɛhamɔ he yɛ sɛɛnamɔ kɛha nibii fɛɛ, ni eyɛ wala ni yɔɔ bianɛ nɛɛ kɛ nɔ ni baaba lɛ he shiwoo.” (1 Timoteo 4:8, NW) No hewɔ lɛ, Paulo miitsɔɔ nɔ ni gbɔmɛi naa he nilee kpaako lɛ, akɛ, tsofa-feemɔ loo gbɔmɔtso he gbɛjianɔtoo jeee nɔ ni maa hewalɛnamɔ shihilɛ diɛŋtsɛ nɔ mi. Shi Paulo maa nɔ mi kɛhaa wɔ akɛ, nɔ ni anyɛŋ ajie yɛ mli loo ehe hiaa fe fɛɛ ji mumɔŋ hewalɛnamɔ kpakpa kɛ Nyɔŋmɔ jamɔ hetuu-kɛhamɔ ni aaaná.
4. Mɛni ji Nyɔŋmɔ jamɔ hetuu-kɛhamɔ mli sɛɛnamɔi?
4 Shihilɛ gbɛ ni tamɔ nɛkɛ he yɛ sɛɛnamɔ kɛha “wala ni yɔɔ bianɛ nɛɛ” ejaakɛ ejieɔ mɔ kɛjɛɔ awuiyeli nibii fɛɛ ni gbɔmɛi ni sheee Nyɔŋmɔ gbeyei loo “[amɛ]hiɛ Nyɔŋmɔ jamɔ su” kɛkɛ lɛ kɛbaa amɛ diɛŋtsɛ amɛnɔ lɛ mli. (2 Timoteo 3:5; Abɛi 23:29, 30; Luka 15:11-16; 1 Korintobii 6:18; 1 Timoteo 6:9, 10) Mɛi ni ŋmɛɔ gbɛ koni Nyɔŋmɔ jamɔ hetuu-kɛhamɔ akudɔ amɛshihilɛ lɛ yɛ bulɛ kpakpa kɛha Nyɔŋmɔ mlai kɛ taomɔ nii, ni no kanyaa amɛ koni amɛha Nyɔŋmɔ tsamɔ tsɔɔmɔ lɛ afee amɛshihilɛ gbɛ. Shihilɛ gbɛ ni tamɔ nɛkɛ kɛ mumɔŋ kɛ gbɔmɔtsoŋ hewalɛnamɔ, tsui ni nyɔɔ mɔ mli, kɛ miishɛɛ bahaa amɛ. Ni “amɛmiibɔ jwetri amɛha amɛhe, ni efee shishitoo kpakpa eha be ni baaba lɛ, koni amɛmɔ anɔkwa wala lɛ mli kpɛŋŋ.”—1 Timoteo 6:19, NW.
5. Mɛɛ famɔi Paulo kɛha yɛ ewolo ni eŋma eyaha Tito lɛ yitso enyɔ lɛ mli?
5 Akɛni shihilɛ ni Nyɔŋmɔ tsamɔ tsɔɔmɔ kudɔɔ lɛ lɛ kɛ jɔɔmɔi ni tamɔ nɛkɛ baa bianɛ kɛ wɔsɛɛ be mli hewɔ lɛ, ehe miihia ni wɔle bɔ ni wɔɔfee wɔha Nyɔŋmɔ tsamɔ tsɔɔmɔ lɛ afee wɔshihilɛ gbɛ diɛŋtsɛ. Bɔfo Paulo kɛ hetoo lɛ ha yɛ ewolo ni eŋma eyaha Tito lɛ mli. Wɔbaasusu nakai wolo lɛ yitso enyɔ lɛ he titri, yɛ he ni efa Tito akɛ “wiemɔ wiemɔi ni sa tsamɔ tsɔɔmɔ lɛ.” Yɛ anɔkwale mli lɛ, wɔ fɛɛ, gbekɛbii kɛ onukpai, hii kɛ yei, fɛɛ baanyɛ ana “tsamɔ tsɔɔmɔ” ni tamɔ nɛkɛ he sɛɛ ŋmɛnɛ.—Tito 1:4, 5; 2:1.
Ŋaawoo kɛha Hiimeji loo Onukpai
6. Mɛɛ ŋaawoo Paulo kɛha “hiimeji” loo onukpai, ni mɛni hewɔ eji mlihilɛ yɛ egbɛfaŋ akɛ eeefee nakai lɛ?
6 Klɛŋklɛŋ lɛ, Paulo yɛ ŋaawoo kɛha onukpai ni yɔɔ asafo lɛ mli lɛ. Ofainɛ kanemɔ Tito 2:2. “Hiimeji lɛ,” awoɔ amɛhiɛ nyam akɛ kuu, ni akɛ hiɛ fɔɔ amɛnɔ akɛ hemɔkɛyeli kɛ anɔkwayeli he nɔkwɛmɔ nii. (3 Mose 19:32; Abɛi 16:31) Yɛ enɛ hewɔ lɛ, mɛi komɛi baashashao shi akɛ amɛaatsɔɔ amɛjwɛŋmɔ loo amɛkɛ ŋaawoo aaaha hiimeji yɛ saji ni hiɛdɔɔ bɛ mli tsɔ he. (Hiob 32:6, 7; 1 Timoteo 5:1) No hewɔ lɛ, eji mlihilɛ yɛ Paulo gbɛfaŋ akɛ ewie etsɔɔ hiimeji loo onukpai lɛ klɛŋklɛŋ, ni ebaahi eha amɛ akɛ amɛkpɛlɛ Paulo wiemɔi lɛ anɔ, ni amɛna nɔmimaa akɛ taakɛ Paulo ji lɛ, amɛji mɛi ni esa akɛ akase amɛ.—1 Korintobii 11:1; Filipibii 3:17.
7, 8. (a) Ni “amɛhiɛ aka shi” lɛ kɔɔ mɛni he? (b) Mɛni hewɔ esa akɛ “hiɛ [ni] tsii” lɛ kɛ “jwɛŋmɔ ni mli ka shi” aŋmɛ pɛpɛɛpɛ lɛ?
7 Esa akɛ klɛŋklɛŋ kwraa lɛ, hiimeji loo Kristofoi onukpai lɛ “ahiɛ aka shi.” Eyɛ mli akɛ shishijee wiemɔ lɛ baanyɛ akɔ daanumɔ su (“hiɛshikamɔ,” Kingdom Interlinear) he moŋ, shi ehiɛ shishinumɔ ni ji henɔkwɛmɔ, jwɛŋmɔ ni ŋmɛɔ pɛpɛɛpɛ, loo hiɛ ni yɔɔ he nɔ. (2 Timoteo 4:5; 1 Petro 1:13) No hewɔ lɛ, esa akɛ onukpai nɛɛ afee mɛi ni hiɛ ka shi, mɛi ni efeee nii kɛtekeee nɔ, kɛ́ yɛ daanumɔ jio, nibii krokomɛi amli jio.
8 Agbɛnɛ hu, esa akɛ amɛfee “mɛi ni hiɛ tsii” ni “amɛjwɛŋmɔ aka shi.” Ni mɔ ko hiɛ tsii, loo ejeɔ agbo, esa woo, ni esa bulɛ hu lɛ baa kɛ gbɔlɛ loo afii. Shi mɛi komɛi kɛ hiɛtsiimɔ nɛɛ baatsu nii kɛteke nɔ, amɛbaafee mɛi ni naaa obalaŋtai ahewalɛ lɛ he tsui. (Abɛi 20:29) No hewɔ akɛ ‘jwɛŋmɔ ni ka shi’ fata ‘hiɛ ni tsii’ he koni eŋmɛ pɛpɛɛpɛ lɛ. Ehe miihia ni onukpai loo hiimeji lɛ afee mɛi ni hiɛ tsii koni ekɛ afii ni amɛye lɛ akpa gbee, ni yɛ nakai beaŋ nɔŋŋ lɛ esa akɛ amɛfee mɛi ni ŋmɛɔ pɛpɛɛpɛ, ni yeɔ amɛhenumɔi kɛ kanyamɔi anɔ.
9. Mɛni hewɔ esa akɛ hiimeji loo onukpai lɛ afee mɛi ni he wa yɛ hemɔkɛyeli kɛ suɔmɔ mli ni titri lɛ yɛ tsuishiŋmɛɛ mli?
9 Yɛ naagbee lɛ, esa akɛ hiimeji loo onukpai lɛ afee mɛi ni “he wa yɛ hemɔkɛyeli kɛ suɔmɔ kɛ tsuishiŋmɛɛ gbɛfaŋ.” Paulo tsi hemɔkɛyeli kɛ suɔmɔ tã kɛfata hiɛnɔkamɔ he shii abɔ yɛ eniŋmaai lɛ amli. (1 Korintobii 13:13; 1 Tesalonikabii 1:3; 5:8) Ekɛ “tsuishiŋmɛɛ” ye “hiɛnɔkamɔ” najiaŋ yɛ biɛ. Ekolɛ ejɛ nijiaŋwujee henumɔ ni baanyɛ aba yɛ gbɛ ni waaa kwraa nɔ yɛ gbɔlɛ loo afii ni yaa hiɛ lɛ hewɔ. (Jajelɔ 12:1) Shi, taakɛ Yesu tsɔɔ lɛ, “mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Kɛfata he lɛ, hiimeji loo onukpai lɛ ji nɔkwɛmɔ nii kpakpai kɛha mɛi krokomɛi, ni jeee yɛ amɛdalɛ loo niiashikpamɔ hewɔ, shi yɛ amɛmumɔŋ subaŋi kpakpai—hemɔkɛyeli, suɔmɔ, kɛ tsuishiŋmɛɛ lɛ hewɔ.
Kɛha Yeimeji loo Yei Onukpai
10. Mɛɛ ŋaawoo Paulo kɛhaa “yeimeji” loo yei onukpai ni yɔɔ asafo lɛ mli lɛ?
10 Kɛkɛ ni Paulo gbala ejwɛŋmɔ agbɛnɛ kɛtee yeimeji loo yei onukpai ni yɔɔ asafo lɛ mli lɛ anɔ. Ofainɛ kanemɔ Tito 2:3. “Yeimeji” lɛ ji asafo lɛ mli yei lɛ ateŋ mɛi ni edara yɛ afii amli, ni “hiimeji” lɛ aŋamɛi kɛ asafo lɛ mlibii krokomɛi lɛ anyɛmɛi kɛ naamɛi fata he. Yɛ bɔ ni amɛji nɛɛ hewɔ lɛ, amɛbaanyɛ amɛna mɛi anɔ hewalɛ babaoo, kɛha ekpakpa loo kɛha efɔŋ. No hewɔ ni Paulo kɛ wiemɔi “nakai nɔŋŋ,” ni eshishi ji akɛ “yeimeji” lɛ hu yɛ gbɛnaa nii komɛi ni esa akɛ amɛhi shi yɛ naa bɔni afee ni amɛtsu nitsumɔ ni ka amɛnɔ yɛ asafo lɛ mli lɛ he nii lɛ je ewiemɔi lɛ ashishi lɛ.
11. Mɛni ji jeŋba ni yɔɔ krɔŋkrɔŋ?
11 Klɛŋklɛŋ lɛ, Paulo kɛɛ akɛ, “yeimeji lɛ, . . . amɛba amɛjeŋ bɔ ni sa mɛi krɔŋkrɔŋi lɛ.” ‘Jeŋba’ ji bɔ ni mɔ lɛ su kɛ baŋ ji yɛ mligbɛ, ni jeɔ kpo yɛ kponɔgbɛ yɛ bɔ ni ebaa ejeŋ ehaa lɛ naa. (Mateo 12:34, 35) No hewɔ lɛ, mɛni esa akɛ efee Kristofonyo yoo ni eda yɛ afii amli lɛ subaŋ loo bɔ ni ebaa ejeŋ ehaa? Yɛ wiemɔ kome mli, “krɔŋkrɔŋ.” Atsɔɔ enɛ shishi kɛjɛ Hela wiemɔ ko mli, ni etsɔɔ “nɔ ni sa yɛ gbɔmɛi amli, nifeemɔi loo nibii ni ajɔɔ nɔ loo afee amɛ krɔŋkrɔŋ aha Nyɔŋmɔ.” Enɛ ji ŋaawoo ni sa jogbaŋŋ, yɛ hewalɛ ni amɛnaa yɛ mɛi krokomɛi, titri lɛ obalayei ni yɔɔ asafo lɛ mli lɛ anɔ lɛ hewɔ.—1 Timoteo 2:9, 10.
12. Mɛɛ lilɛi lɛ kɛ nitsumɔ yɛ gbɛ ni esaaa nɔ esa akɛ wɔ fɛɛ wɔkwa?
12 Nɔ ni nyiɛɔ sɛɛ baa ji sui enyɔ ni ehiii: “amɛkawiewie mɛi ahe, amɛkatsɔmɔ daatɔlɔi.” Eyɛ miishɛɛ ákɛ akɛ nɛkɛ sui enyɔ nɛɛ tsaa. Nilelɔ E. F. Scott kɛɛ akɛ: “Yɛ blema bei lɛ amli, beni wein pɛ ji dãa ni anuɔ lɛ, amɛ wein okpɔlɔŋmɛɛ bibii lɛ ashishi yeimeji gbeɔ amɛ akutseiaŋbii ahe guɔ yɛ.” Yei susuɔ gbɔmɛi ahe babaoo fe hii, ni enɛ sa yijiemɔ. Ni kɛlɛ, mɛi ahe ni amɛsusuɔ nɛɛ baanyɛ afite ni etsɔ oshekuyeli loo heguɔgbee po, titri lɛ kɛ akɛ dãa eŋmɛɛ lilɛi lɛ he lɛ. (Abɛi 23:33) Yɛ anɔkwale mli lɛ, mɛi fɛɛ ni diɔ shihilɛ gbɛ kpakpa sɛɛ, hii kɛ yei, baafee jogbaŋŋ akɛ amɛaaha amɛhiɛ ahi nɛkɛ tsɔne nɛɛ nɔ.
13. Mɛɛ gbɛi anɔ nɛkɛ yeimeji baanyɛ atsɔmɔ tsɔɔlɔi yɛ?
13 Bɔni afee ni amɛkɛ be ni amɛyɔɔ lɛ atsu nii yɛ gbɛ kpakpa nɔ lɛ, aawo yeimeji loo yei onukpai lɛ ahewalɛ ni amɛfee “mɛi ni tsɔɔ nii kpakpai.” He kroko yɛ ni Paulo kɛ famɔi ni mli ka shi faŋŋ ha akɛ esaaa akɛ yei feɔ tsɔɔlɔi yɛ asafo lɛ mli. (1 Korintobii 14:34; 1 Timoteo 2:12) Shi enɛ etsiii amɛ gbɛ yɛ Nyɔŋmɔ he nilee ni jara wa waa lɛ ni amɛkɛaaha yɛ amɛshiai amli kɛ agbɛnɛ yɛ maŋ lɛ mli lɛ he. (2 Timoteo 1:5; 3:14, 15) Amɛbaanyɛ amɛtsu nitsumɔi kpakpai babaoo hu kɛtsɔ nɔkwɛmɔ nii ni amɛaafee akɛ Kristofoi amɛha obalayei ni yɔɔ asafo lɛ mli lɛ nɔ, taakɛ kukuji ni nyiɛ sɛɛ lɛ tsɔɔ lɛ.
Kɛha Obalayei Lɛ
14. Obalayei Kristofoi baanyɛ ajie bɔ ni amɛŋmɛɔ pɛpɛɛpɛ lɛ kpo yɛ amɛnitsumɔi amli yɛ mɛɛ gbɛ nɔ?
14 Yɛ be mli ni ewoɔ yeimeji lɛ ahewalɛ ni “amɛfee mɛi ni tsɔɔ nii kpakpai” lɛ, Paulo je gbɛ etsi obalayei lɛ ata. Ofainɛ kanemɔ Tito 2:4, 5. Yɛ be mli ni wiemɔ kɛ tsɔɔmɔ lɛ kɔɔ shia mli saji ahe titri lɛ, esaaa akɛ obalayei Kristofoi lɛ feɔ nii kɛtekeɔ nɔ, ni amɛhaa heloo gbɛfaŋ nibii asɛɛdii ahe susumɔ miifee nɔ titri yɛ amɛshihilɛ mli. Shi moŋ esa akɛ “amɛhiɛ aka shi, amɛhe atse, . . . amɛmli ahi,” ni nɔ ni fe fɛɛ lɛ, amɛfee klalo akɛ amɛaafi Kristofoi ayitsoyeli he gbɛjianɔtoo lɛ sɛɛ, “koni akawie Nyɔŋmɔ wiemɔ lɛ he musubɔɔ wiemɔ.”
15. Mɛni hewɔ esa akɛ ajie obalayei ni yɔɔ asafo lɛ mli lɛ ateŋ mɛi pii ayi lɛ?
15 Ŋmɛnɛ, weku shihilɛ lɛ etsake saŋŋ yɛ bɔ ni eji yɛ Paulo gbii lɛ amli nɔ̃ lɛ he. Wekui pii amli egbala yɛ hemɔkɛyeli he, ni ekrokomɛi hiɛ fɔlɔ kome pɛ. Yɛ wekui ni anaa tsɛ, nyɛ, kɛ bii yɛ shia kome mli ni tsɛ lɛ ji weku yitso taakɛ eji yɛ blema lɛ po mli lɛ, eefee nɔ ni wa akɛ aaana ŋa loo nyɛ ni ekɛ ebe fɛɛ miitsu nii yɛ shĩa. Enɛɛmɛi fɛɛ kɛ nɔnyɛɛ kɛ gbɛnaa nii babaoo bafɔɔ obalayei Kristofoi lɛ anɔ, shi enɛ haaa amɛye amɛhe kɛjɛ amɛ Ŋmalɛ naa gbɛnaa nii lɛ ahe. No hewɔ lɛ, eji miishɛɛ sane kpele, akɛ aaana obalayei anɔkwafoi babaoo ni miitsu nii waa koni amɛha amɛ nitsumɔi babaoo lɛ aŋmɛ pɛpɛɛpɛ, ni amɛmiibɔ mɔdɛŋ hu ni amɛkɛ Maŋtsɛyeli lɛ he nibii aye klɛŋklɛŋ gbɛhe, ni amɛteŋ mɛi komɛi po yɛ be-fɛɛ sɔɔmɔ lɛ mli akɛ gbɛgbalɔi awalɔi kɛ daa gbɛgbalɔi. (Mateo 6:33) Amɛsa yijiemɔ diɛŋtsɛ!
Kɛha Obalahii Lɛ
16. Mɛɛ ŋaawoo Paulo yɔɔ kɛha obalahii, ni mɛni hewɔ akɛha yɛ ebe naa pɛpɛɛpɛ lɛ?
16 Kɛkɛ ni Paulo bashɛ obalahii lɛ ni Tito fata he lɛ anɔ. Ofainɛ kanemɔ Tito 2:6-8. Yɛ ŋmɛnɛŋmɛnɛ beaŋ obalaŋtai lɛ asubaŋ gbohii kɛ nifitemɔ gbɛi—zigaret shɛremɔ, tsofai fɔji kɛ nitsumɔ kɛ daatɔɔ, bɔlɛnamɔ mli jeŋba shara, kɛ je lɛŋ nibii krokomɛi asɛɛdii, tamɔ kpɔiaŋgbɔlemɔ he akaŋshii keketee, kɛ lalai kɛ hiɛtserɛjiemɔi gbohii lɛ hewɔ lɛ—enɛ ji ŋaawoo ni sa yɛ ebe naa pɛpɛɛpɛ kɛha obalaŋtai Kristofoi ni sumɔɔ ni amɛnyiɛ shihilɛ gbɛ kpakpa ni haa mɔ tsui nyɔɔ emli lɛ sɛɛ lɛ.
17. Te aaafee tɛŋŋ ni obalanyo aaafee mɔ ni “jwɛŋmɔ ka shi” kɛ mɔ ni toɔ “nitsumɔi kpakpai ahe okadi”?
17 Nɔ ni tamɔɔɔ je lɛŋ obalaŋtai lɛ, esa akɛ obalanyo Kristofonyo lɛ “jwɛŋmɔ aka shi” ni eto “nitsumɔi kpakpai ahe okadi.” Paulo tsɔɔ mli akɛ, mɛi ni kaseɔ nii kɛkɛ lɛ naaa jwɛŋmɔ ni eda ni mli ka shi, shi moŋ mɛi ni nine shɛɔ enɛ nɔ ji “mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” (Hebribii 5:14) Kwɛ miishɛɛ sane ni eji akɛ aaana ni obalaŋtai etu amɛbe kɛ hewalɛ amɛha koni amɛna nitsumɔi pii amli gbɛfaŋnɔ yɛ Kristofoi asafo lɛ mli, fe ni amɛaafite amɛbalaŋtaiaŋ hewalɛ lɛ yɛ pɛsɛmkunya nibii asɛɛdii mli! Yɛ nakai feemɔ mli lɛ, taakɛ Tito ji lɛ, amɛbaato “nitsumɔi kpakpai” ahe okadi yɛ Kristofoi asafo lɛ mli.—1 Timoteo 4:12.
18. Akɛ mɔ ko aaafee mɔ ni tsɔɔ tsɔɔmɔ krɔŋŋ, mɔ ni hiɛ tsii, kɛ mɔ ni wieɔ wiemɔ kpakpa lɛ tsɔɔ mɛni?
18 Akaiɔ obalahii lɛ akɛ esa akɛ yɛ “nitsɔɔmɔ mli lɛ, amɛtsɔɔ tsɔɔmɔ krɔŋŋ, nii ni haa mɔ hiɛ tsiiɔ, wiemɔ kpakpa ni anaŋ he sane ko atã.” Esa akɛ tsɔɔmɔ “krɔŋŋ” lɛ afee nɔ ni damɔ Nyɔŋmɔ Wiemɔ lɛ nɔ shiŋŋ; no hewɔ lɛ, esa akɛ obalahii lɛ afee mɛi ni kɛ hiɛdɔɔ kaseɔ Biblia lɛ. Taakɛ hiimeji loo onukpai lɛ ji lɛ, esa akɛ obalahii lɛ afee mɛi ni hiɛ tsii loo mɛi ni yɔɔ hiɛdɔɔ. Ehe miihia ni amɛyoo akɛ Nyɔŋmɔ Wiemɔ lɛ he sɔɔlɔ ni mɔ ko aaafee lɛ kɛ gbɛnaa nii ni hiɛdɔɔ yɔɔ mli baa, ni no hewɔ lɛ, esa akɛ “amɛba amɛjeŋ bɔ ni sa Kristo sanekpakpa lɛ.” (Filipibii 1:27) Nakai nɔŋŋ hu esa akɛ amɛwiemɔ afee “wiemɔ kpakpa” bɔ ni “anaŋ he sane ko atã” bɔni afee ni mɛi ni teɔ shi woɔ wɔ lɛ akana nɔ ko amɛwie.—2 Korintobii 6:3; 1 Petro 2:12, 15.
Kɛha Nyɔji kɛ Tsuji
19, 20. Te mɛi ni tsuɔ nii haa mɛi krokomɛi lɛ aaafee tɛŋŋ “awula Nyɔŋmɔ ni ji wɔ Yiwalaherelɔ lɛ tsɔɔmɔ lɛ”?
19 Yɛ naagbee lɛ, Paulo tsɔ ehe kɛtee mɛi ni tsuɔ nii amɛhaa mɛi krokomɛi lɛ anɔ. Ofainɛ kanemɔ Tito 2:9, 10. Mɛi ni ji tsuji loo nyɔji ŋmɛnɛ yɛ wɔteŋ lɛ ayi faaa, shi wɔteŋ mɛi babaoo ji nitsulɔi kɛ apaafoi ni tsuɔ nii haa mɛi krokomɛi. No hewɔ lɛ, shishitoo mlai loo taomɔ nii ni Paulo tsi ta lɛ kɔɔ wɔhe ŋmɛnɛ hu.
20 Akɛ “amɛba amɛhe shi amɛha amɛ nuŋtsɔmɛi lɛ . . . yɛ nibii fɛɛ mli” lɛ tsɔɔ akɛ esa akɛ nitsulɔi ni ji Kristofoi lɛ kɛ bulɛ diɛŋtsɛ aha amɛ nuŋtsɔmɛi kɛ nɔkwɛlɔi lɛ. (Kolosebii 3:22) Esa akɛ amɛna gbɛi kpakpa akɛ amɛji nitsulɔi anɔkwafoi, ni amɛkɛ gbi muu nitsumɔ ni sa amɛ nuŋtsɔmɛi lɛ haa amɛ. Ni esa akɛ amɛhiɛ Kristofoi ajeŋba ni nɔ kwɔ mli yɛ amɛ nitsumɔ hei lɛ ni bɔ ni mɛi krokomɛi asubaŋ ji yɛ jɛmɛ kɔɔɔ he eko. Amɛfee enɛɛmɛi fɛɛ “koni amɛkɛwula Nyɔŋmɔ ni ji wɔ Yiwalaherelɔ lɛ tsɔɔmɔ lɛ yɛ nibii fɛɛ mli.” Kwɛ shii abɔ ni wɔnuɔ miishɛɛ saji ni baa, kɛ́ gbɔmɛi anɔkwafoi ni naa wɔ lɛ kpɛlɛ anɔkwale lɛ nɔ yɛ amɛnanemɛi nitsulɔi Odasefoi lɛ ajeŋba kpakpa hewɔ lɛ! Enɛ ji nyɔmɔwoo ni Yehowa kɛhaa mɛi ni diɔ etsamɔ tsɔɔmɔ lɛ sɛɛ yɛ amɛnitsumɔ hei po lɛ.—Efesobii 6:7, 8.
Gbɔmɛi ni Atsuu Amɛhe
21. Mɛni hewɔ Yehowa kɛ tsamɔ tsɔɔmɔ lɛ ha, ni te esa akɛ wɔtsu he nii wɔha tɛŋŋ?
21 Tsamɔ tsɔɔmɔ ni Paulo tsɔɔ mli fitsofitso lɛ jeee jeŋba he mlai komɛi ni ato naa kɛkɛ ni wɔbaanyɛ wɔkwɛ mli bɔ ni wɔsumɔɔ. Paulo tee nɔ etsɔɔ yiŋtoo ni yɔɔ sɛɛ. Ofainɛ kanemɔ Tito 2:11, 12. Yɛ Yehowa Nyɔŋmɔ suɔmɔ kɛ emlihilɛ ni esaaa wɔ ni ejie kpo etsɔɔ wɔ lɛ hewɔ lɛ, ekɛ tsamɔ tsɔɔmɔ lɛ eha wɔ bɔni afee ni wɔkase bɔ ni akɛ yiŋtoo kɛ tsui ni nyɔɔ mɔ mli hiɔ shi yɛ jaramɔ bei ni osharai yɔɔ mli nɛɛ amli. Ani oosumɔ ni okpɛlɛ tsamɔ tsɔɔmɔ lɛ nɔ ni oha efee oshihilɛ gbɛ? Nakai feemɔ baatsɔ yiwalaheremɔ aha bo.
22, 23. Mɛɛ jɔɔmɔi wɔnine shɛɔ nɔ yɛ tsamɔ tsɔɔmɔ ni wɔkɛfeɔ wɔshihilɛ gbɛ lɛ hewɔ?
22 Nɔ ni fe nakai lɛ, tsamɔ tsɔɔmɔ lɛ ni wɔɔfee lɛ wɔshihilɛ gbɛ lɛ kɛ hegbɛ ko ni ekaaa bahaa wɔ bianɛ kɛ wɔsɛɛ be he hiɛnɔkamɔ ni miishɛɛ yɔɔ mli. Ofainɛ kanemɔ Tito 2:13, 14. Yɛ anɔkwale mli lɛ, tsamɔ tsɔɔmɔ lɛ ni wɔkɛaafee wɔshihilɛ gbɛ lɛ haa wɔfeɔ sɔrɔto kɛjɛɔ jeŋ ni ekpɔtɔ ni gboɔ nɛɛ he akɛ gbɔmɛi ni atsuu amɛhe, ni amɛhe tse. Paulo wiemɔi lɛ tamɔ Mose kaimɔi ni ekɛfɔ Israelbii lɛ ahiɛ yɛ Sinai lɛ: “Ni Yehowa hu . . . eha okwɔ gojoo fe jeŋmaji fɛɛ ni efee lɛ, yɛ yijiemɔ kɛ gbɛi kɛ anunyam mli, ni otsɔ Yehowa, o-Nyɔŋmɔ lɛ maŋ krɔŋkrɔŋ, taakɛ bɔ ni ekɛɛ lɛ.”—5 Mose 26:18, 19.
23 Eba akɛ wɔɔbu hegbɛ ni ji Yehowa webii ni atsuu wɔhe loo aha wɔhe etse lɛ he, kɛtsɔ tsamɔ tsɔɔmɔ lɛ ni wɔkɛaafee wɔshihilɛ gbɛ lɛ nɔ! Feemɔ klalo akɛ oookwa nɔshafeemɔi fɛɛ kɛ je nɛŋ akɔnɔi, ni ohi shi akɛ mɔ ni he tse ni tamɔ mɔ ni Yehowa kɛ lɛ aaatsu nii yɛ nitsumɔ kpeteŋkpele ni ehaa atsuɔ ŋmɛnɛ lɛ mli.—Kolosebii 1:10.
Ani Okaiɔ?
◻ Mɛni hewɔ Nyɔŋmɔ jamɔ hetuu-kɛhamɔ he yɔɔ sɛɛnamɔ kɛhaa nibii fɛɛ lɛ?
◻ Te Kristofoi hii kɛ yei ni amɛdara lɛ aaafee tɛŋŋ amɛdi tsamɔ tsɔɔmɔ sɛɛ akɛ shihilɛ gbɛ?
◻ Mɛɛ tsamɔ tsɔɔmɔ Paulo yɔɔ kɛha obalahii kɛ obalayei ni yɔɔ asafo lɛ mli lɛ?
◻ Mɛɛ hegbɛ kɛ jɔɔmɔ baanyɛ atsɔ wɔnɔ̃ kɛ wɔkɛ tsamɔ tsɔɔmɔ fee wɔshihilɛ gbɛ?
[Mfoniri ni yɔɔ baafa 18]
Mɛi pii kɛ ŋaawoo ni yɔɔ Tito 2:2-4 lɛ miitsu nii ŋmɛnɛ