Sanebimɔi Ni Jɛ Kanelɔi Adɛŋ
◼ Ani eja gbɛ akɛ Kristofonyo yoo aaawo jwinei aloo ediki ehiɛ, kɛ eyitsɔi, aloo efee nibii ni tamɔ nakai kɛsaa ehe?
Yɛ blema beaŋ kɛ wɔgbii nɛɛ amli fɛɛ lɛ, mɛi ni kɛɔ akɛ amɛnyiɛɔ Biblia lɛ sɛɛ Iɛ ateŋ mɛi komɛi eteetee shishinumɔi sɔrɔtoi ni mli wawai ashi yɛ hewulamɔ he.a
Yei ni yɔɔ sɔlemɔi komɛi amli lɛ tsiɔ amɛhe kwraa kɛjɛɔ hiɛ ni adikiɔ kɛ jwinei awoo he. Akɛ nɔkwɛmɔ nɔ lɛ, wolo ni ji The Amish People Iɛ bɔɔ amaniɛ akɛ “amɛtsiɔ bɔ ni amɛpueɔ yɛ gbɔmɔtsoŋ lɛ naa ejaakɛ amɛnuɔ he akɛ amɛteŋ mɔ ko ni naa je lɛŋ hewulamɔ he miishɛɛ babaoo lɛ yɛ oshara mli, akɛni esa akɛ aha [nakai] miishɛɛ Iɛ ahi mumɔŋ nibii ahe susumɔ nɔ moŋ fe helooŋ nibii anɔ lɛ hewɔ. Mɛi komɛi po . . . baatsɛ Ŋmalɛi Iɛ ayisɛɛ kɛfi sɛɛ.”
Kɛkɛ ni ŋmalɛ ni amɛtsɛ yisɛɛ lɛ ji 1 Samuel 16:7: “Shi Yehowa kɛɛ Samuel akɛ: ‘Kaakwɛ ehiɛŋtso loo ekwɔlɛ nyenyereŋŋ lɛ; shi misumɔɔɔ lɛ. Ejaakɛ Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa Iɛ tsui ekwɛɔ!” Shi kɛlɛ, nakai ŋmalɛ lɛ miiwie David nyɛminuu Eliab kwɔlɛ he. Eyɛ faŋŋ yɛ emli sane Iɛ shishinumɔ mli akɛ jeee hewulamɔ gbɛi ni efɔɔ kɛ nitsumɔ he Nyɔŋmɔ wieɔ yɛ biɛ lɛ, tamɔ akɛ ani David kɛ enyɛmimɛi hii lɛ kɛ nibii wulaa amɛyitsɔi aloo amɛkɛ hesaamɔ nibii woɔ amɛtadei amli aloo amɛfeee nakai.—1 Mose 38:18; 2 Samuel 14:25, 26; Luka 15:22.
Enɛ tsɔɔ akɛ mɛi ni kɛɔ akɛ esaaa akɛ Kristofoi kɛ hewulamɔ nibii saa amɛhe, ni amɛdikiɔ amɛhiɛ aloo amɛwoɔ jwinei lɛ taoɔ sɛɛfimɔ kɛjɛɔ ŋmalɛi ni amɛtsɔɔ shishi yɛ gbɛ ni ejaaa nɔ lɛ amli. Yɛ anɔkwale mli Iɛ Biblia lɛ ewieee hewulamɔ he saji ahe babaoo. Ni nakai nɔŋŋ hu efiii mũi kɛ tsofai komɛi ni akɛtsuɔ nii Iɛ asɛɛ ni eteee shi ewooo eko hu. Nɔ ni ekɛhaa ji gbɛtsɔɔmɔ ni nilee yɔɔ mli. Nyɛhaa wɔsusuɔ enɛɛmɛi ahe ni wɔkwɛɔ bɔ ni ekɔɔ sane lɛ he ŋmɛnɛ.
Bɔfo Paulo kɛ gbɛtsɔɔmɔ ni jɛ mumɔŋ nɛɛ ha akɛ: “Nakai nɔŋŋ yei hu, amɛkɛ atade ni sa kɛ hiɛ ni gboɔ nɔ kɛ jwɛŋmɔ ni sa awula amɛhe, jeee kɛ yigbɔɔ loo shika loo adiagbai loo atade ni jara wa.” (1 Timoteo 2:9) Petro hu ŋma nakai nɔŋŋ akɛ: “Ni nyɛkɛ yigbɔɔ kɛ shika-woo kɛ atadewoo akafee nyɛ hewulamɔ, shi moŋ nyɛtsuiiaŋ gbɔmɔ ni aŋɔtee lɛ, yɛ mumɔ ni he jɔ ni yɔɔ kpoo lɛ nibii ni fiteee Iɛ amli, no ji nɔ ni jara wa yɛ Nyɔŋmɔ hiɛ.”—1 Petro 3:3, 4.
Hela wiemɔ ni atsɔɔ shishi yɛ jɛmɛ akɛ “awula,” “nɔ ni sa.” kɛ “hewulamɔ” lɛ jɛ wiemɔ ko’smos, ni ji shishijee wiemɔ ni ana wiemɔ “cosmetic,” ni shishi ji “ni akɛ nɔ ko asaa he kɛha hefɛo, [titri lɛ] yɛ hewolo nɔ” Iɛ nɔŋŋ mli. No hewɔ lɛ nakai ŋmalɛi lɛ yeɔ amɛbuaa wɔ koni wɔnyɛ wɔha saji ni abiɔ yɛ nibii tamɔ tsofai kɛ mui ni akɛkpaa hewolo nɔ kɛ hiɛ Iɛ kɛ nitsumɔ, jwinewoo, kɛ nibii krokomɛi ni kɔɔ yei ahewulamɔ he lɛ ahetoo.
Ani Paulo kɛ Petro miitsɔɔ akɛ esa akɛ Kristofoi atsi amɛhe kɛjɛ amɛyigbɔɔ, kɛ adiagbai kɛ shika jwinei awoo he, aloo, kɛ aalɛɛ mli lɛ, mui kɛ tsofai ni akɛkpaa hewolo nɔ kɛ hiɛ lɛ ahe? Dabi. Ni aaakɛɛ akɛ nakai ji amɛshishitsɔɔmɔ lɛ baabi ni nyɛmimɛi yei ni ji Kristofoi Iɛ atsi amɛhe kɛjɛ ‘atadewoo he.’ Ni kɛlɛ, asumɔɔ Dorka, mɔ ni Petro tee lɛ shi lɛ sane waa ejaakɛ efeɔ “atadei” ehaa nyɛmimɛi yei krokomɛi lɛ. (Bɔfoi lɛ Asaji 9:39) No hewɔ lɛ, 1 Timoteo 2:9 kɛ 1 Petro 3:3, 4 etsɔɔɔ akɛ esa akɛ nyɛmimɛi yei lɛ akagbɔ amɛyi, ni amɛkawo adiagbai, atadei, kɛ nibii krokomɛi. Shi moŋ, Paulo miima bɔ ni ehe hiaa ni akɛ hiɛshikamɔ kɛ jwɛŋmɔ ni mli ka shi jogbaŋŋ atsu nii yɛ yei ahewulamɔ mli lɛ nɔ mi. Petro tsɔɔ akɛ esa akɛ yei Iɛ aha amɛhiɛ ahi amɛmligbɛ mumɔ lɛ moŋ nɔ babaoo, bɔni afee ni atsɔ no nɔ ni nine ashɛ amɛwumɛi ni heee yeee lɛ anɔ, shi jeee ni aaama kponɔgbɛ hesaamɔ aloo hewulamɔ nɔ mi.
Yɛ wiemɔ kuku mli lɛ, Biblia lɛ eteee shi ewooo mɔdɛŋ fɛɛ ni abɔɔ ni akɛha he afee fɛo. Nyɔŋmɔ tsuji Iɛ ateŋ mɛi komɛi, hii kɛ yei fɛɛ kɛ jwinei saa amɛhe. (1 Mose 41:42; 2 Mose 32:2, 3; Daniel 5:29) Ester anɔkwafo Iɛ kpɛlɛ hesaamɔ krɛdɛɛ ni akɛ tsofai ni akɛkpaa hewolo nɔ, anowatrɛi sɔrɔtoi, kɛ tsofai ni akɛgbɔlei feɔ yɛ yei awe lɛ nɔ. (Ester 2:7, 12, 15; okɛto Daniel 1:3-8 he.) Nyɔŋmɔ kɛɛ akɛ ekɛ wulamɔ nii, tamɔ nineshi gai, kɔsɔŋkɔsɔ, gugɔŋ ga, kɛ toiiaŋ nii ewula lsrael yɛ mfoniri-feemɔŋ. Nibii nɛɛ fata he ni eha “[e]he fee fɛo naakpa diɛŋtsɛ” lɛ.—Ezekiel 16:11-13.
Shi, sane ni aŋma yɛ Ezekiel wolo lɛ mli Iɛ kɛ nikasemɔ ko haa kɛteɔ shi ewoɔ wɔjwɛŋmɔ ni aaahi wɔ hesaamɔ pɛ nɔ lɛ. Nyɔŋmɔ kɛɛ: “Shi oŋɔ ohiɛ ofɔ ohe fɛo lɛ nɔ, ni ogbɛi ni ehehee Iɛ hewɔ lɛ, obɔ ajwamaŋ, ni ofɔse ojwamaŋbɔi lɛ oshwie mɔ fɛɛ mɔ ni hoɔ Iɛ nɔ.” (Ezekiel 16:15; Yesaia 3:16, 19) No hewɔ lɛ, Ezekiel 16:11-15 lɛ maa nilee ni yɔɔ Paulo kɛ Petro ŋaawoo ni amɛkɛha yɛ sɛɛ mli, ni tsɔɔ bɔ ni esaaa akɛ agbalaa jwɛŋmɔ kɛyaa hesaamɔ nɔ tuutu lɛ nɔ mi. Kɛji yoo ko hala akɛ ekɛ jwinei baawula ehe lɛ, esa akɛ efalɛ kɛ bɔ ni ekɛaasaa ehe eha Iɛ kɛ hiɛshikamɔ akpa gbee, ni ekafa kɛteke nɔ aloo nɔ ni mɛi baawie ashi, nɔ ni yɔɔ haŋtsii—Yakobo 2:2.
Shi Kristofonyo yoo ni kɛ hesaamɔ tsofai krokomɛi, tamɔ nɔ ni akɛkpaa naabu, dabii ahe dikimɔ tsofai, aloo nɔ ni akɛkpaa hiŋmɛii asɛɛ kɛ hiŋmɛii anaa lɛ tsuɔ nii Iɛ hu? Blema nibii ahe nikaselɔi ni yɔɔ Israel lɛ kɛ jɛmɛ niiaŋ lɛ etsa shi ni amɛyana tsofai ni akɛkpaa hiɛ lɛ ekomɛi atɔi, kɛ hesaamɔ nibii tamɔ osɛrɛi kɛ ashwishwɛ. Hɛɛ, yei ni hi shi yɛ blema Bokagbɛ Iɛ kɛ tsofai kɛ mui ni akɛsaa he ni ji nɔ ni afeɔ ŋmɛnɛ Iɛ amli shishijee nibii Iɛ ekomɛi tsu nii. Ekolɛ Hiob biyoo Keren-Hapuk gbɛi lɛ shishi ji “(Hiŋmɛi Naa) Mu Diŋ Tɔ Lɛ,” aloo hiŋmɛi naa dikimɔ tsofa tɔ.—Hiob 42:13-15.
Akɛ hesaamɔ tsofai Iɛ ekomɛi tsu nii yɛ Israel, shi kɛlɛ Biblia mli nɔkwɛmɔ nii tsɔɔ oshara ni yɔɔ ekɛ nitsumɔ fe nine Iɛ he. Afii komɛi asɛɛ beni Yezebel batsɔ Israel maŋnyɛ Iɛ, ‘ekɛ tsofa diŋ kpaa ehiŋmɛii asɛɛ, ni ehɔɔ eyi fɛfɛo.’ (2 Maŋtsɛmɛi 9:30) Yɛ sɛɛ mli beni etsɔɔ bɔ ni lsrael yatao jeŋmaji wɔŋjalɔi asɛɛfimɔ gbonyo Iɛ mli Iɛ, Nyɔŋmɔ kɛɛ akɛ ‘ewula kɛ shika wulamɔ nii, ni ekɛ adibri diki ehiŋmɛii asɛɛ, ni efee ehe fɛfɛo.’ (Yeremia 4:30; Ezekiel 23:40) Nakai kukuji lɛ kɛ ekrokomɛi ni eshwɛ Iɛ eko ekɛɛɛ akɛ tɔmɔ yɛ gbɛi krokomɛi ni akɛtsuɔ nii ni akɛhaa he feɔ fɛo lɛ he. Shi kɛlɛ, Yezebel sane Iɛ tsɔɔ akɛ ekɛ adibri lɛ kpa ehiŋmɛii asɛɛ babaoo akɛ no haa anyɛɔ ayooɔ Iɛ kɛjɛɔ shɔŋŋ, ni Yehu po na Iɛ kɛjɛ maŋtsɛwe Iɛ agbo Iɛ sɛɛ tɔɔ. Mɛni ji nikasemɔ ni yɔɔ enɛ mli? Okɛ nibii akakpa ohiɛ kɛ ohewolo nɔ ni eyafa fe nine, ni eha asusu nɔ kroko kwraa.b
Eji anɔkwale akɛ, yoo ko bɛ ni ewoɔ jwinei aloo ekɛ tsofai kpaa ehiɛ kɛ ehewolo nɔ ni ebaakɛɛ akɛ gbɛ ni etsɔɔ nɔ ekɛsaa ehe kɛ efalɛ ni ekɛkpaa Iɛ esaaa. Shi kɛlɛ, ŋwanejee ko kwraa bɛ he akɛ akɛni nibii ni ahɔɔ Iɛ ahe adafitswaa ni akɛyeɔ jara Iɛ naa mɛi anɔ hewalɛ hewɔ Iɛ, ekolɛ yoo ko baanyɛ ana subaŋ ko ni haa ekɛ hesaamɔ nibii nɛɛ tsuɔ nii babaoo tsɔ fe nine. Ekolɛ ebaanyɛ ekase bɔ ni akɛsaa he nɛɛ jogbaŋŋ aahu akɛ enyɛŋ eyoo dɔŋŋ akɛ enɛ teɔ shi ewoɔ “hiɛ ni gboɔ nɔ kɛ jwɛŋmɔ ni sa” ni Kristofoi yei babaoo kɛsaa amɛhe Iɛ.—Kwɛmɔ Yakobo 1:23, 24.
Kɛ wɔɔkɛɛ Iɛ, esoro bɔ ni mɔ fɛɛ mɔ sumɔɔ ni esaa ehe; yei komɛi kɛ tsofai ni akɛkpaa hiɛ kɛ hewolo nɔ kɛ jwinei ni awoɔ nɛɛ fioo pɛ tsuɔ nii aloo amɛkɛtsuuu nii kwraa, mɛi krokomɛi hu kɛ babaoo tsuɔ nii. No hewɔ Iɛ nilee yɛ mli akɛ akojoŋ mɔ ko ni kɛ tsofai nɛɛ ekomɛi tsuɔ nii aloo ewoɔ jwinei yɛ gbɛ ni yɔɔ sɔrɔto nɔ Iɛ. Nɔ kroko hu ji nɔ ni afɔɔ feemɔ yɛ he ni mɔ Iɛ yɔɔ. Kpɛlɛmɔ ni akpɛlɛɔ hesaamɔi komɛi anɔ yɛ maŋ kroko nɔ (aloo akɛfɔɔ nitsumɔ yɛ blema bei amli) Iɛ etsɔɔɔ akɛ esa akɛ wɔ hu wɔkɛtsu nii doo yɛ maŋ nɔ he ni wɔyɔɔ ŋmɛnɛ Iɛ.
Kristofonyo yoo ni kɛ nilee tsuɔ nii Iɛ kwɛɔ bɔ ni ewulaa ehe ehaa Iɛ yɛ be kɛ bei amli, ni ekɛ anɔkwayeli fɛɛ baabi ehe akɛ: ‘Ani miwoɔ jwinei babaoo (aloo nɔ ni yɔɔ haŋtsii) aloo mikɛ tsofai kpaa mihiɛ kɛ mihewolo nɔ fe bɔ ni Kristofoi ni yɔɔ he ni miyɔɔ Iɛ feɔ? Ani miwulaa mihe tamɔ mɛi ni sumɔɔ ni mɛi krokomɛi ajwɛŋmɔ aba amɛnɔ aloo bɔ ni sini mli gbɔmɛi feɔ Iɛ, aloo ani mihaa ŋaawoo ni yɔɔ 1 Timoteo 2:9 kɛ 1 Petro 3:3, 4 Iɛ titri kudɔɔ mi? Hɛɛ, ani miwulaa mihe kɛ hiɛ ni gboɔ nɔ, ni mitsɔɔ bulɛ diɛŋtsɛ ni miyɔɔ kɛha bɔ ni mɛi krokomɛi susuɔ nii ahe kɛ bɔ ni amɛnuɔ nii ahe hu lɛ?’—Abɛi 31:30.
Yei ni yɔɔ wumɛi ni ji Kristofoi lɛ baanyɛ abi amɛ nɔ ni amɛyɔɔ kɛɛmɔ kɛ amɛŋaawoo. Agbɛnɛ hu, kɛ akɛ anɔkwayeli tao ŋaawoo ni yeɔ ebuaa Iɛ, no Iɛ amɛnine baanyɛ ashɛ enɛ nɔ kɛjɛ nyɛmimɛi yei krokomɛi adɛŋ. Shi yɛ nɔ najiaŋ ni oooya onaanyo ni saa ehe tamɔ ofeɔ Iɛ nɔŋŋ moŋ ŋɔɔ Iɛ, ebaahi jogbaŋŋ akɛ okɛ nyɛmimɛi yei onukpai ni abuɔ amɛ pɛpɛɛpɛ-ŋmɛɛ kɛ amɛnilee hu lɛ aaagba sane. (Okɛto 1 Maŋtsɛmɛi 12:6-8 he.) Biblia Iɛ kɛɔ akɛ yei onukpai ni abuɔ amɛ waa Iɛ, “amɛtsɔɔ obalayei Iɛ ni . . . amɛhiɛ aka shi, amɛhe atse, . . . koni akawie Nyɔŋmɔ wiemɔ Iɛ he musubɔɔ wiemɔ.” (Tito 2:2-5) Kristofonyo ko bɛ ni eda yɛ mumɔŋ ni ebaasumɔ ni bɔ ni ekɛ jwinei kɛ tsofai ni ekɛkpaa ehiɛ tsuɔ nii babaoo fe nine Iɛ aha awie Nyɔŋmɔ Wiemɔ Iɛ aloo ewebii Iɛ ahe “musubɔɔ wiemɔ.”
Biblia mli sane ni kɔɔ Tamar he Iɛ tsɔɔ akɛ bɔ ni yoo ko wulaa ehe ehaa Iɛ baaha ayoo nɔ yoo ni eji, ebaawie saji ni mli wawai yɛ ehe. (1 Mose 38:14, 15) Mɛɛ sane bɔ ni Kristofonyo yoo ko gboɔ eyitsɔi kɛ bɔ ni edikiɔ Iɛ ehaa (kɛ ekɛ tsofa woo mli), aloo jwinei ni ewoɔ kɛ bɔ ni ekɛ tsofai kpaa ehiɛ kɛ ehewolɔ nɔ lɛ wieɔ yɛ ehe? Ani ekɛɔ akɛ: Nyɔŋmɔ tsulɔ ni he tse, ni hiɛ gboɔ nɔ, ni eŋmɛɔ pɛpɛɛpɛ nɛ?
Esa akɛ mɔ ni kɛ Kristofoi kpeɔ yɛ sɔɔmɔ nitsumɔ lɛ mli, aloo mɔ ni baa wɔkpeei Iɛ hiɛ asɔ wɔ jogbaŋŋ. Yɛ bei babaoo mli Iɛ mɛi ni naa wɔ Iɛ ahiɛ sɔɔ wɔ nakai. Kristofoi yei Iɛ ateŋ mɛi pii haaa mɛi ni yɔɔ sɛɛ Iɛ ana nɔ ko nɔ amɛdamɔ amɛmu sane naa akɛ amɛfeee amɛhe saamɔ yɛ gbɛ ko nɔ, afoo yɛ gbɛ kroko hu nɔ lɛ amɛkpaa amɛhiɛ tsofai ni amɛwulaa amɛhe hu tsɔ; shi moŋ, amɛwulaa amɛhe bɔ ‘ni sa yei ni kɛ amɛhe tsɔɔ akɛ Nyɔŋmɔ jalɔi lɛ.’—1 Timoteo 2:10.
[Shishigbɛ niŋmai]
a Yɛ Ŋ.B. klɛŋklɛŋ afii ohai etɛ lɛ mli lɛ, Tertullian wie akɛ yei “ni kɛ tsofai kpaa amɛhewolo nɔ, ni amɛdikiɔ amɛdabii ahe kɛ tsofa tsuru, ni amɛkɛ tsofa [diŋ] kpaa amɛhiŋmɛii asɛɛ koni eha ana amɛhiŋmɛii jogbaŋŋ lɛteɔ esha amɛshiɔ Lɛ.” Ewie eshi mɛi ni kɛ tsofa dikiɔ amɛyitsɔi lɛ hu. Yɛ be mli ni etsɔɔ Yesu wiemɔi ni yɔɔ Mateo 5:36 lɛ shishi yɛ gbɛ ni ejaaa nɔ lɛ, Tertullian folɔ amɛnaa akɛ: “Amɛhaaa Nuŋtsɔ lɛ wiemɔ afee anɔkwale! Amɛkɛɔ akɛ: ‘Naa! Yɛ nɔ najiaŋ ni wɔɔha [Wɔyitsɔi] ahi eyɛŋ loo ediŋ lɛ, wɔmiifee Iɛ wuɔfɔ.’” Ekɛfata he akɛ: “Obaanyɛ ona mɛi komɛi po ni efeɔ amɛ hiɛgbele akɛ amɛgbɔlɔ, ni amɛbɔɔ mɔdɛŋ ni amɛtsake amɛyitsɔi yɛŋ lɛ amɛfee lɛ ediŋ.” Tertullian diɛŋtsɛ jwɛŋmɔ nɛ. Shi eetsake bɔ ni shihilɛ Iɛ ji lɛ kwraa, ejaakɛ esane naatsɔɔmɔ lɛ fɛɛ damɔ jwɛŋmɔ ni ehiɛ akɛ yei ji mɛi ni kɛ fɔbuu ni ka adesai anɔ nɛɛ fɛɛ ba, ni no hewɔ lɛ esa akɛ ‘amɛnyiɛ tamɔ Hawa, kɛ awerɛhoyeli kɛ tsuitsakemɔ’ yɛ ‘klɛŋklɛŋ esha Iɛ he hiɛgbele ni eje kpo faŋŋ’ hewɔ lɛ nɔ. Biblia lɛ ekɛɛɛ nɔ ko tamɔ nakai; Nyɔŋmɔ kɛ adesai ahe eshai lɛ he shwamɔ lɛ fɔɔ Adam nɔ.—Romabii 5:12-14; 1 Timoteo 2:13,14.
b Etsɛko tsɔ ni United States, Amerika adafitswaa wolo ko ŋma TV nɔ sanekpakpa shiɛlɔ ko hiɛgbejianii he sane kɛ niŋmaa wuji diɛŋtsɛ, yɛ be mli ni enaanyo ni tsuɔ nakai nɔ ko Iɛ ŋa hu miigbala jwɛŋmɔ babaoo nakai nɔŋŋ. Taakɛ adafitswaa Iɛ bɔ amaniɛ Iɛ, ebada akɛ mɔ ko ni heɔ yeɔ akɛ “tsofai ni akɛkpaa hiɛ kɛ hewolo nɔ Iɛ kɛ siniyaa” ji eshafeemɔ, shi yɛ sɛɛ mli Iɛ, etsake jwɛŋmɔ ni ehiɛ nɛɛ kwraa ni ebatsɔ mɔ ko ni ale lɛ waa yɛ bɔ ni ekɛ “tsofai kpaa ehiɛ kɛ ehewolɔ nɔ fɛɛ titrii aahu akɛ ehaa etsɔɔ tamɔ amaga ko ni ashɔ Iɛ hewɔ.”
[Mfonirii ni yɔɔ baafa 31]
Nibii ni atsa shi ni ana yɛ Boka Teŋgbɛ: shwuɔwu adeka ni akɛ hesaamɔ tsofai woɔ mli, ashwishwɛ, kɛ shika kɛ kanelia kuɛnii
[He ni Sane lɛ Jɛ]
Etɛ lɛ fɛɛ: Pictorial Archive (Near Eastern History) Est.