Kaisare Nii ni Akɛaaha Kaisare

“Bɔ ni ji mɔ fɛɛ mɔ gbɛnaa lɛ, nyɛfea nyɛhaa lɛ.”—ROMABII 13:7.

1, 2. (a) Taakɛ Yesu wie lɛ, te esa akɛ Kristofoi aha Nyɔŋmɔ kɛ Kaisare he gbɛnaa nii ni kã amɛnɔ lɛ aŋmɛ pɛpɛɛpɛ aha tɛŋŋ? (b) Mɛni he hiaa Yehowa Odasefoi klɛŋklɛŋ?

TAAKƐ Yesu tsɔɔ lɛ, nibii yɛ ni esa akɛ wɔkɛha Nyɔŋmɔ, kɛ nibii hu ni esa akɛ wɔkɛha Kaisare, loo Maŋ lɛ. Yesu wie akɛ: “Nyɛŋɔa Kaisare nii nyɛhaa Kaisare, ni nyɛŋɔa Nyɔŋmɔ nii nyɛhaa Nyɔŋmɔ.” Ekɛ wiemɔi fioo nɛɛ futu ehenyɛlɔi lɛ ayiŋ, ni ekɛmu subaŋ ni ŋmɛɔ pɛpɛɛpɛ ni esa akɛ wɔna yɛ wɔkɛ Nyɔŋmɔ teŋ wekukpaa, kɛ bɔ ni wɔkɛ Maŋ lɛ hu yeɔ haa lɛ mli lɛ naa yɛ gbɛ fɛfɛo nɔ. Ebɛ naakpɛɛ akɛ etoibolɔi lɛ “[ahiɛ] fee amɛ yaa yɛ ehewɔ”!—Marko 12:17.

² Yɛ anɔkwale mli lɛ, nɔ ni Yehowa tsuji susuɔ he klɛŋklɛŋ ji ni amɛkɛ Nyɔŋmɔ nii aha Nyɔŋmɔ. (Lala 116:12-14) Shi, be mli ni amɛfeɔ nakai lɛ, amɛhiɛ kpaaa nɔ akɛ Yesu wie akɛ esa akɛ amɛkɛ nibii komɛi aha Kaisare. Amɛ henileei ni akɛ Biblia etsɔse lɛ lɛ biɔ ni amɛtsɔ sɔlemɔ nɔ amɛsusu hé ni amɛbaanyɛ amɛkɛ nɔ ni Kaisare biɔ lɛ aha lɛ kɛyashi lɛ he. (Romabii 13:7) Mlalelɔi kɛ kojolɔi pii eyoo yɛ ŋmɛnɛŋmɛnɛ beaŋ akɛ husui yɛ maŋ nɔyeli hewalɛ he, ni gbɔmɛi kɛ nɔyelii ni yɔɔ he fɛɛ he yɛ adebɔɔ mla kudɔmɔ shishi.

3, 4. Mɛɛ saji ni yɔɔ miishɛɛ awie yɛ adebɔɔ mla, mla ni ajie lɛ kpo, kɛ adesa mla he?

³ Bɔfo Paulo wie nɛkɛ adebɔɔ mla nɛɛ he beni eŋma je lɛŋ bii ahe sane lɛ, akɛ: “Nyɔŋmɔ he nii ni aaanyɛ ale lɛ yɛ faŋŋ yɛ amɛmli, ejaakɛ Nyɔŋmɔ jie tsɔɔ amɛ faŋŋ. Ejaakɛ ehe nii ni anaaa ni ji enaanɔ hewalɛ kɛ Nyɔŋmɔyeli lɛ fɛɛ lɛ, kɛjɛ jeŋ bɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ, no hewɔ lɛ amɛbɛ naajiemɔ ko.” Kɛji amɛbaakpɛlɛ nɔ lɛ, no lɛ adebɔɔ mla lɛ baatsirɛ nɛkɛ gbɔmɛi ni heee yeee nɛɛ ahenileei po. Enɛ hewɔ lɛ, Paulo tee nɔ ewie akɛ: “Kɛ jeŋmajiaŋbii ni bɛ mla lɛ kɛ amɛ fɔmɔ mli su lɛ tsuɔ mla naa nii lɛ, amɛ ni amɛbɛ mla lɛ, amɛji mla ha amɛ diɛŋtsɛ amɛhe; no amɛkɛtsɔɔ akɛ aŋma mla lɛ nitsumɔ lɛ yɛ amɛtsuii amli, ni amɛ henilee hu yeɔ odase.”—Romabii 1:19, 20; 2:14, 15.

⁴ Yɛ afii ohai 18 lɛ mli lɛ, Ŋleshinyo mlalelɔ William Blackstone ni ale lɛ waa lɛ ŋma akɛ: “Yɛ anɔkwale mli lɛ, nɛkɛ adebɔɔ mla [adebɔɔ naa mla], ni kɛ adesa sɛɛtsɛlɛ [afii abɔ ni eye] yeɔ egbɔ pɛpɛɛpɛ, ní Nyɔŋmɔ diɛŋtsɛ wo nɛɛ, nɔ kwɔ kwraa fe mla fɛɛ mla, yɛ ehe gbɛnaa nii ahe nitsumɔ gbɛfaŋ. Ekɛ sɔ̃ fɔ̃ɔ mɔ fɛɛ mɔ nɔ yɛ je lɛŋ he fɛɛ he, yɛ maji fɛɛ mli, kɛ bei fɛɛ mli hu: adesa mlai esaaa yɛ gbɛ ko kwraa nɔ, kɛji amɛteɔ shi amɛwoɔ nɛkɛ adebɔɔ mla nɛɛ.” Blackstone tee nɔ ewie “mla ni ajie lɛ kpo,” taakɛ anaa yɛ Biblia lɛ mli lɛ he, ni ekɛɛ yɛ he akɛ: “Nɛkɛ shishitoo nii enyɔ, ni ji adebɔɔ mla kɛ mla ni ajie lɛ kpo nɛɛ anɔ adesai amlai fɛɛ damɔ; kɛ wɔɔkɛɛ yɛ gbɛ kroko nɔ lɛ, esaaa ni ahaa [loo aŋmɛɔ gbɛ] ni adesai amlai teɔ shi woɔ nɛkɛ mlai nɛɛ.” Enɛ kɛ nɔ ni Yesu wie yɛ Nyɔŋmɔ kɛ Kaisare he, taakɛ aŋma yɛ Marko 12:17 lɛ kpaa gbee. Eyɛ faŋŋ akɛ, hei komɛi yɛ ni Nyɔŋmɔ tsĩɔ nɔ ni Kaisare baanyɛ abi kɛjɛ Kristofonyo dɛŋ lɛ naa. Sanhedrin lɛ teke nɔ kɛtee nɛkɛ hei nɛɛ ekome, beni amɛwo bɔfoi lɛ kita akɛ amɛkpa Yesu he saji shiɛmɔ lɛ. Enɛ hewɔ lɛ, bɔfoi lɛ ha amɛ hetoo yɛ gbɛ ni ja nɔ akɛ: “Esa akɛ aboɔ Nyɔŋmɔ moŋ toi [akɛ nɔyelɔ] fe gbɔmɛi.”—Bɔfoi lɛ Asaji 5:28, 29.

“Nyɔŋmɔ Nii”

5, 6. (a) Yɛ Maŋtsɛyeli lɛ fɔmɔ yɛ 1914 mli lɛ hewɔ lɛ, mɛni esa akɛ Kristofoi aha ehi amɛjwɛŋmɔ mli be fɛɛ be? (b) Kristofonyo yeɔ odase akɛ sɔɔlɔ ji lɛ yɛ mɛɛ gbɛ nɔ?

⁵ Titri lɛ, kɛjɛ 1914, beni Yehowa Nyɔŋmɔ, Ofe lɛ, bɔi nɔyeli akɛ maŋtsɛ kɛtsɔ Kristo Mesia Maŋtsɛyeli lɛ nɔ lɛ kɛbaa nɛɛ, ehe ebahia ni Kristofoi akwɛ jogbaŋŋ ni amɛkɛ Nyɔŋmɔ nii akaha Kaisare. (Kpojiemɔ 11:15, 17) Amrɔ nɛɛ Nyɔŋmɔ mla biɔ ni Kristofoi afee mɛi ni “[jɛɛɛ] je lɛ mli,” fe bei krokomɛi fɛɛ ni eho. (Yohane 17:16) Akɛni amɛjɔɔ amɛhe nɔ amɛha Nyɔŋmɔ, amɛ Wala-Halɔ lɛ hewɔ lɛ, esa akɛ amɛha ana faŋŋ akɛ amɛbɛ kɛha amɛ diɛŋtsɛ amɛhe dɔŋŋ. (Lala 100:2, 3) Taakɛ Paulo ŋma lɛ, “Nuntsɔ [Yehowa] nii ji wɔ.” (Romabii 14:8) Kɛfata he lɛ, yɛ Kristofonyo baptisimɔ mli lɛ, ahalaa lɛ akɛ Nyɔŋmɔ sɔɔlɔ, no hewɔ lɛ ebaanyɛ efata Paulo he kɛwie akɛ: “Nyɔŋmɔ . . . [eha] wɔsa ni wɔtsɔmɔ . . . sɔɔlɔi.”—2 Korintobii 3:5, 6.

⁶ Bɔfo Paulo ŋma hu akɛ: “Mawo misɔɔmɔ lɛ hiɛ nyam.” (Romabii 11:13) Eka shi faŋŋ akɛ esa akɛ wɔ hu wɔfee nakai. Kɛji wɔkɛ wɔhe woɔ sɔɔmɔ lɛ mli kɛ be-fɛɛ jio, be-fã jio, wɔhaa ehiɔ wɔjwɛŋmɔ mli akɛ Yehowa diɛŋtsɛ kɛ wɔ sɔɔmɔ nitsumɔ lɛ ha wɔ. (2 Korintobii 2:17) Akɛni mɛi komɛi baate shi awo wɔ shidaamɔ hewɔ lɛ, esa akɛ Kristofonyo fɛɛ Kristofonyo ni ejɔɔ ehe nɔ, ni abaptisi lɛ lɛ afee klalo akɛ ekɛ odaseyeli kpakpa ni yɔɔ faŋŋ baaha akɛ eji sanekpakpa lɛ he sɔɔlɔ lɛlɛŋ. (1 Petro 3:15) Esa akɛ ana esɔɔmɔ lɛ he odaseyeli yɛ ejeŋba hu mli. Akɛ Nyɔŋmɔ sɔɔlɔ lɛ, esa akɛ Kristofonyo awo jeŋba kpakpa he hewalɛ ni etsu he nii hu, ni ehiɛ weku ekomefeemɔ mli, ni eye anɔkwa, ni ena bulɛ eha mla kɛ gbɛjianɔtoo kpakpa. (Romabii 12:17, 18; 1 Tesalonikabii 5:15) Kristofonyo kɛ Nyɔŋmɔ teŋ wekukpaa kɛ esɔɔmɔ ni ajɛ ŋwɛi akɛha lɛ lɛ ji nibii ni he hiaa fe fɛɛ yɛ eshihilɛ mli. Enyɛŋ eŋmɛɛɛ nɛkɛ nibii nɛɛ ahe yɛ Kaisare famɔ hewɔ. Eyɛ faŋŋ akɛ, enɛɛmɛi fata “Nyɔŋmɔ nii” lɛ ahe.

“Kaisare Nii”

 7. Mɛɛ gbɛi Yehowa Odasefoi ená yɛ too-woo gbɛfaŋ?

⁷ Yehowa Odasefoi le akɛ esa akɛ ‘amɛba amɛhe shi amɛha hegbɛi ni yeɔ nɔ,’ ni ji maŋ nɔyelɔi lɛ. (Romabii 13:1) No hewɔ lɛ, kɛ Kaisare, ni ji Maŋ lɛ, bi nibii ni ja yɛ mla naa lɛ, amɛ henilee ni Biblia etsɔse lɛ lɛ ŋmɛɔ amɛ gbɛ akɛ amɛtsu nakai taomɔ nii lɛ ahe nii. Akɛ nɔkwɛmɔ nɔ lɛ, anɔkwa Kristofoi fata too-wolɔi ni feɔ nɔkwɛmɔ nɔ kpakpa fe fɛɛ yɛ shikpɔŋ nɛɛ nɔ lɛ ahe. Yɛ Germany lɛ, adafitswaa wolo ni atsɛɔ lɛ Münchner Merkur lɛ wie Yehowa Odasefoi ahe akɛ: “Amɛji too-wolɔi ni yeɔ anɔkwa fe fɛɛ kɛ mɛi ni woɔ amɛtoo yɛ be naa pɛpɛɛpɛ yɛ Federal Republic lɛ mli.” Yɛ Italy lɛ, adafitswaa wolo ni atsɛɔ lɛ La Stampa lɛ hu wie akɛ: “Amɛ [Yehowa Odasefoi] ji maŋbii ni yeɔ anɔkwa fe fɛɛ ni mɔ ko aaasumɔ ni ekɛ amɛ ahi shi: amɛtsɔɔɔ ŋaa gbɛ nɔ amɛjieee amɛhe kɛjɛɛɛ too-woo mli ni amɛkaaa akɛ amɛaajo mlai ni ehiii kɛhaaa amɛ lɛ anaa foi kɛha amɛ sɛɛnamɔ.” Yehowa tsuji feɔ enɛ ‘yɛ amɛ henilee hewɔ.’—Romabii 13:5, 6.

 8. Ani nii ni wɔkɛaaha Kaisare lɛ kɔɔ too-woo pɛ he?

⁸ Ani “Kaisare nii” lɛ kɔɔ too-woo pɛ he? Dabi. Paulo tsĩ nibii krokomɛi atã, tamɔ gbeyeishemɔ kɛ woo. German woloŋlelɔ Heinrich Meyer ŋma yɛ ewolo ni gbɛi ji Critical and Exegetical Hand-Book to the Gospel of Matthew lɛ mli akɛ: “Kɛ akɛɛ [Kaisare nii] lɛ . . . esaaa ni wɔnuɔ shishi akɛ ekɔɔ maŋ too ni wɔɔwo lɛ pɛ he, shi moŋ nɔ fɛɛ nɔ ni ji Kaisare nɔ, yɛ mla naa nɔyeli hegbɛ ni eyɔɔ lɛ hewɔ.” Yinɔsane ŋmalɔ E. W. Barnes, wie yɛ ewolo ni gbɛi ji The Rise of Christianity lɛ mli akɛ, Kristofonyo baawo too kɛji esa akɛ ewo, ni “nakai nɔŋŋ hu ebaakpɛlɛ Maŋ gbɛnaa nii krokomɛi fɛɛ nɔ, shi ja abiii ni ekɛ nibii ni ji Nyɔŋmɔ nɔ lɛ aha Kaisare, dani ebaafee nakai.”

 9, 10. Mɛɛ shishashaomɔ ekolɛ Kristofonyo baaná yɛ Kaisare gbɛfaŋnɔ ni ekɛaaha lɛ lɛ he, shi mɛɛ otii esa akɛ eha ehi ejwɛŋmɔ mli?

⁹ Mɛɛ nibii Maŋ lɛ baanyɛ abi ni etekeŋ ehusui kɛyaŋ nibii ni ji Nyɔŋmɔ nɔ yɛ gbɛ ni ja nɔ lɛ ahe? Mɛi komɛi nuɔ he akɛ amɛbaanyɛ amɛha Kaisare shika yɛ mla naa ákɛ too ni amɛaawo, ni nɔ ko kwraa fataaa he. Eka shi faŋŋ akɛ amɛmii shɛŋ amɛhe akɛ amɛaaha Kaisare nɔ ko ni ekolɛ ebaabi, yɛ be mli ni kulɛ amɛbaanyɛ amɛkɛtsu nii kɛha teokrase nifeemɔi. Shi kɛlɛ, eyɛ mli akɛ eji anɔkwale akɛ esa akɛ ‘wɔsumɔ Yehowa wɔ-Nyɔŋmɔ lɛ kɛ wɔtsui, susuma, jwɛŋmɔ kɛ hewalɛ fɛɛ’ moŋ, shi Yehowa kpaa gbɛ akɛ wɔkɛ wɔbe lɛ eko baatsu nibii ni jeee sɔɔmɔ krɔŋŋ lɛ ahe nii. (Marko 12:30; Filipibii 3:3) Akɛ nɔkwɛmɔ nɔ lɛ, awoɔ Kristofonyo ni ebote gbalashihilɛ mli lɛ ŋaa ni etu be kɛha egbalashihilɛ mli hefatalɔ lɛ hiɛ saa. Nɛkɛ nifeemɔi nɛɛ jeee efɔŋ, shi kɛlɛ, bɔfo Paulo wie faŋŋ akɛ amɛji “je nɛŋ nii,” shi jeee “Nuntsɔ lɛ nii.”—1 Korintobii 7:32-34; okɛto 1 Timoteo 5:8 he.

¹⁰ Kɛfata he lɛ, Kristo ha esɛɛnyiɛlɔi lɛ hegbɛ akɛ ‘amɛwo’ too, ni eka shi faŋŋ akɛ enɛ biɔ ni wɔkɛ be ni wɔjɔɔ nɔ wɔha Yehowa—akɛni wɔjɔɔ wɔshihilɛ fɛɛ nɔ yɛ nɛkɛ gbɛ nɔ lɛ—eko atsu nii. Kɛji kɛ aja mli lɛ, too fɛɛ ni awoɔ yɛ maŋ mli lɛ feɔ shika fɛɛ ni anaa lɛ oha mli 33 (efa fe nakai yɛ maji komɛi amli) lɛ, enɛ tsɔɔ akɛ daa afi lɛ, nitsulɔ fɛɛ nitsulɔ woɔ shika ni naa shɛɔ enyɔji ejwɛ nyɔmɔwoo ehaa Maŋ Shika Toohe lɛ. Kɛ wɔɔwie yɛ gbɛ kroko nɔ lɛ, yɛ enitsumɔ be naagbee lɛ, no mli lɛ nitsulɔ fɛɛ nitsulɔ kɛ nɔ ni aaashɛ afii 15 etsu nii ni ekɛna too-woo shika ni “Kaisare” biɔ kɛjɛɔ edɛŋ lɛ. Agbɛnɛ, susumɔ skulyaa he sane lɛ hu he okwɛ. Yɛ maji pii amli lɛ, mla biɔ ni fɔlɔi aha amɛbii aya skul, kɛ hoo lɛ, afii falɛ pɔtɛɛ ko ni atsɔɔ. Afii abɔ ni ataoɔ ni akɛya skul nɛɛ tsakeɔ kɛjɛɔ maŋ kome mli kɛyaa ekroko mli. Yɛ hei babaoo lɛ, be falɛ ni akɛyaa skul nɛɛ sɛɛ kɛ saŋŋ. Lɛlɛŋ, bei pii lɛ, nɛkɛ skulyaa nɛɛ he yɛ sɛɛnamɔ, shi Kaisare ji mɔ ni tsɔɔ gbekɛ lɛ wala be falɛ ni esa akɛ ekɛtsu nii yɛ nɛkɛ gbɛ nɔ, ni fɔlɔi Kristofoi kɛ Kaisare yiŋkpɛɛ nɛɛ tsuɔ nii.

Asraafoi Anitsumɔ yɛ Nɔnyɛɛ Naa

11, 12. (a) Mɛni Kaisare biɔ yɛ shikpɔji pii anɔ? (b) Te mra be mli Kristofoi lɛ susu asraafoi anitsumɔ he amɛha tɛŋŋ?

¹¹ Nɔ kroko ni Kaisare biɔ yɛ maji komɛi anɔ ji asraafoi anitsumɔ yɛ nɔnyɛɛ naa. Maji pii kɛ nɛkɛ gbɛjianɔtoo nɛɛ ema shi yɛ ta bei amli, ni yɛ maji komɛi agbɛfaŋ lɛ, yɛ toiŋjɔlɛ be mli hu, yɛ afii ohai 20 nɛɛ mli. Yɛ France lɛ, akɛ afii babaoo tsɛ nɛkɛ taomɔ nii nɛɛ akɛ too ni akɛ lá woɔ, ni tsɔɔ akɛ esa akɛ obalanyo fɛɛ obalanyo asumɔ akɛ ekɛ ewala baasha afɔle eha Maŋ lɛ. Ani nɔ ko ni mɛi ni ejɔɔ amɛhe nɔ amɛha Yehowa lɛ baanyɛ ajɛ henilee kpakpa mli amɛkɛha nɛ? Te klɛŋklɛŋ afii oha lɛ mli Kristofoi lɛ kwɛ sane nɛɛ amɛha tɛŋŋ?

¹² Eyɛ mli akɛ mra be mli Kristofoi lɛ bɔ mɔdɛŋ ni amɛfee maŋbii kpakpai moŋ, shi amɛ hemɔkɛyeli eŋmɛɛɛ amɛ gbɛ ni amɛgbe gbɔmɔ loo amɛkɛ amɛ diɛŋtsɛ amɛwala asha afɔle aha Maŋ lɛ. The Encyclopedia of Religion kɛɔ akɛ: “Mra be mli sɔlemɔ lɛ hiɛnyiɛlɔi ni Tertullian kɛ Origen fata he lɛ, ma nɔ mi akɛ aŋmɛɛɛ Kristofoi agbɛ ni amɛgbe gbɔmɔ adesa, ni enɛ ji shishitoo mla ni ha amɛkɛ amɛhe wooo Roma asraafoi anitsumɔ mli lɛ.” Univɛsiti Tsɔɔlɔ Nukpa C. J. Cadoux ŋma yɛ ewolo ni gbɛi ji The Early Church and the World lɛ mli akɛ: “Kɛbashi Marcus Aurelius nɔyeli beaŋ, kɛ hoo lɛ, [161-180 Ŋ.B.] lɛ, no mli lɛ Kristofonyo ko kwraa batsɔɔɔ asraafonyo yɛ ebaptisimɔ sɛɛ.”

13. Mɛni hewɔ Kristendom bii pii susuuu asraafoi anitsumɔ he tamɔ bɔ ni mra be mli Kristofoi lɛ fee lɛ?

¹³ Mɛni hewɔ ni Kristendom sɔlemɔi lɛ amli bii nuuu nibii ashishi yɛ nɛkɛ gbɛ nɔ ŋmɛnɛ lɛ? Yɛ tsakemɔ wulu ko ni ba yɛ afii ohai ejwɛ lɛ mli lɛ hewɔ. Katolik wolo ko ni atsɛɔ lɛ A History of the Christian Councils lɛ tsɔɔ mli akɛ: “Kristofoi pii, . . . ni yɔɔ maŋtsɛmɛi ni ji wɔŋjalɔi ashishi lɛ, yɛ jamɔ mli shishitoo mlai ni tsiɔ̃ amɛ naa yɛ asraafoi anitsumɔ gbɛfaŋ, ni amɛje gbɛ amɛkpoo akɛ amɛaasɔmɔ akɛ asraafoi, aloo amɛshi asraafoi anitsumɔ lɛ kwraa. Beni Osɔfoi Agwabɔɔ [ni afee yɛ Arles, yɛ afi 314 Ŋ.B.], lɛ susuɔ tsakemɔi ni Konstantino kɛba lɛ ahe lɛ, amɛkɛ nɔnyɛɛ ko ba akɛ esa akɛ Kristofoi asɔmɔ yɛ ta mli, . . . ejaakɛ toiŋjɔlɛ (in pace) yɛ Sɔlemɔ lɛ kɛ Maŋ lɛ teŋ, yɛ lumɔ ko ni sumɔɔ Kristofoi asane lɛ nɔyeli shishi.” Nɔ ni jɛ Yesu tsɔɔmɔi ni amɛkpoo nɛɛ mli kɛba ji akɛ, kɛjɛ nakai be lɛ mli aahu kɛbashi ŋmɛnɛ, Kristendom osɔfoi lɛ ewo amɛ tooiku lɛ hewalɛ ní amɛsɔmɔ yɛ jeŋmaji lɛ asraafoi ateŋ, eyɛ mli akɛ aŋkroaŋkroi komɛi ekɔ amɛ shidaamɔ akɛ mɛi ni wuuu ta yɛ amɛ henilee hewɔ.

14, 15. (a) Mɛni nɔ Kristofoi ni yɔɔ hei komɛi lɛ damɔɔ ni amɛbiɔ ni aŋmɛ gbɛ ni amɛkɛ amɛhe akawo asraafoi anitsumɔ mli lɛ? (b) Kɛji gbɛŋmɛɛ nɛɛ bɛ lɛ, mɛɛ Ŋmalɛ mli shishitoo mlai baaye abua Kristofonyo ni efee yiŋkpɛɛ ni ja yɛ asraafoi anitsumɔ he sane lɛ mli?

¹⁴ Ani sɔ̃ kã Kristofoi anɔ ŋmɛnɛ akɛ amɛnyiɛ nɔ ni mɛi pii feɔ lɛ sɛɛ yɛ sane nɛɛ mli? Dabi. Kɛji Kristofonyo ni ejɔɔ ehe nɔ ni abaptisi lɛ, yɛ maŋ mli he ni ajieɔ jamɔ mli sɔɔlɔi kɛjɛɔ asraafoi anitsumɔ mli lɛ, no lɛ ebaanyɛ ekɛ gbɛjianɔtoo ni yɔɔ nɛɛ atsu nii jogbaŋŋ, ejaakɛ yɛ anɔkwale mli lɛ, sɔɔlɔ ji lɛ. (2 Timoteo 4:5) Maji pii, ni United States kɛ Australia fata he, eŋmɛ gbɛ akɛ abaanyɛ ajie mɛi ni tamɔ nɛkɛ kɛjɛ asraafoi anitsumɔ mli yɛ tawuu be po mli. Ni yɛ maji pii ni asraafoi anitsumɔ yɛ nɔnyɛɛ naa yɔɔ jɛmɛ lolo lɛ amli lɛ, akɛni jamɔ he sɔɔlɔi ji Yehowa Odasefoi hewɔ lɛ, ajieɔ amɛ kɛjɛ asraafoi anitsumɔ mli, yɛ toiŋjɔlɛ bei amli. No hewɔ lɛ, amɛbaanyɛ amɛya nɔ amɛye amɛbua gbɔmɛi lɛ kɛtsɔ amɛ maŋ sɔɔmɔ lɛ nɔ.

¹⁵ Shi, kɛji Kristofonyo yɛ maŋ ni ajieee jamɔ he sɔɔlɔi kɛjɛɛɛ asraafoi anitsumɔ mli lɛ mli hu? No lɛ ehe baahia ni enyiɛ ehenilee ni Biblia etsɔse lɛ lɛ sɛɛ ni lɛ diɛŋtsɛ ekpɛ eyiŋ. (Galatabii 6:5) Beni esusuɔ hegbɛ ni Kaisare yɔɔ lɛ he lɛ, ebaasusu nɔ ni esa akɛ ekɛha Yehowa lɛ hu he jogbaŋŋ. (Lala 36:10; 116:12-14; Bɔfoi lɛ Asaji 17:28) Kristofonyo lɛ baakai akɛ anɔkwa Kristofonyo kadimɔ nii ji suɔmɔ ni eeena eha enanemɛi heyelilɔi fɛɛ, mɛi ni yɔɔ shikpɔji krokomɛi anɔ loo amɛjɛ wekui krokomɛi amli lɛ po. (Yohane 13:34, 35; 1 Petro 2:17) Kɛfata he lɛ, ehiɛ kpaŋ Ŋmalɛ naa shishitoo mlai ni anaa yɛ ŋmalɛi tamɔ Yesaia 2:2-4; Mateo 26:52; Romabii 12:18; 14:19; 2 Korintobii 10:4; kɛ Hebribii 12:14 lɛ anɔ.

Maŋnyo Folo Sɔɔmɔ

16. Yɛ shikpɔji komɛi anɔ lɛ, mɛɛ sɔɔmɔ ni jeee asraafoi anitsumɔ Kaisare biɔ kɛjɛɔ mɛi ni ekpɛlɛɛɛ asraafoi anitsumɔ nɔ lɛ adɛŋ?

¹⁶ Shi, shikpɔji komɛi yɛ ni, eyɛ mli akɛ Maŋ lɛ haaa hegbɛ akɛ ajie jamɔ mli sɔɔlɔi kɛjɛ asraafoi anitsumɔ mli moŋ, shi kɛlɛ ekpɛlɛɔ nɔ akɛ aŋkroaŋkroi komɛi baanyɛ ate shi ashi amɛhe ni amɛkɛaawo asraafoi anitsumɔ mli. Nɛkɛ shikpɔji nɛɛ babaoo toɔ gbɛjianɔ koni akanyɛ mɛi ni ekpɛlɛɛɛ asraafoi anitsumɔ nɔ yɛ amɛ henilee hewɔ lɛ anɔ awo mli. Yɛ hei komɛi lɛ, abuɔ maŋnyo folo sɔɔmɔ ni abiɔ, tamɔ nitsumɔ ni sɛɛnamɔ yɔɔ he yɛ akutso lɛ mli, akɛ maŋ sɔɔmɔ ni jeee asraafoi anitsumɔ. Ani Kristofonyo ni ejɔɔ ehe nɔ baanyɛ ekɛ ehe aha sɔɔmɔ ni tamɔ nɛkɛ? Biɛ hu, esa akɛ Kristofonyo ni ejɔɔ ehe nɔ ni abaptisi lɛ lɛ adamɔ ehenilee ni Biblia etsɔse lɛ lɛ nɔ ekpɛ eyiŋ.

17. Ani Biblia mli nɔkwɛmɔ nɔ ko yɛ ni tsɔɔ maŋnyo folo sɔɔmɔ ni jeee asraafoi anitsumɔ?

¹⁷ Etamɔ nɔ ni akɛ asraafoi asɔɔmɔ yɛ nɔnyɛɛ naa nɛɛ tsu nii yɛ Biblia bei amli. Yinɔsane wolo ko wie akɛ: “Kɛfata tooi kɛ oniai ni aheɔ kɛjɛɔ Yudea maŋ lɛ mli bii lɛ adɛŋ lɛ he lɛ, ayɛ nitsumɔ hu ni awooo he nyɔmɔ [nitsumɔ ni nyɔmɔwoo bɛ he, ni maŋ nɔyelɔi lɛ biɔ]. Eji blema nifeemɔ ko ni ato ni afeɔ yɛ Bokagbɛ, ni Hela kɛ Roma nɔyelɔi lɛ tee nɔ amɛkɛtsu nii aahu. . . . Kpaŋmɔ Hee lɛ hu tsĩɔ nitsumɔ ni awooo he nyɔmɔ nɛɛ he nɔkwɛmɔ nii atã yɛ Yudea, ni tsɔɔ bɔ ni egbɛ eshwã waa ha. Yɛ nifeemɔ nɛɛ kɛ gbeekpamɔ naa lɛ, asraafoi lɛ nyɛ Simon ni Jɛ Kireene lɛ nɔ ni amɛha etere Yesu krɔɔs [sɛŋmɔ tso] lɛ (Mateo 5:41; 27:32; Marko 15:21; Luka 23:26).”

18. Mɛɛ maŋ sɔɔmɔi ni jeee asraafoi anitsumɔ, ni jeee jamɔ mli nɔ̃ hu bei pii lɛ Yehowa Odasefoi kɛ amɛhe haa kɛtsuɔ?

¹⁸ Nakai nɔŋŋ, ŋmɛnɛ, Maŋ lɛ loo maji bibii anɔkwɛlɔi biɔ ni maŋbii ni yɔɔ maji komɛi amli lɛ kɛ amɛhe awo maŋ sɔɔmɔ nitsumɔi sɔrɔtoi komɛi amli. Bei komɛi lɛ, amɛfeɔ enɛ kɛhaa nitsumɔ pɔtɛɛ ko, tamɔ nu bu jee loo gbɛjegbɛi afeemɔ; bei komɛi hu lɛ, atsuɔ nitsumɔi nɛɛ daa, tamɔ daa otsi nitsumɔ ni atsuɔ ni akɛsaa gbɛjegbɛi anɔ, loo skul kɛ helatsamɔ hei sɔrɔtoi amli nɛkɛ. Kɛji atsuɔ nɛkɛ maŋnyo folo sɔɔmɔ nɛɛ kɛhaa maŋbii ashihilɛ kpakpa namɔ, ni ekɛ apasa jamɔ bɛ tsakpaa ko, ni eteee shi ewooo Yehowa Odasefoi ahenilee yɛ gbɛ ko kwraa nɔ lɛ, bei pii lɛ amɛkɛ amɛhe woɔ mli. (1 Petro 2:13-15) Bei pii lɛ, nɔ ni enɛ kɛbaa ji odase fɛfɛo ni ayeɔ, ni bei komɛi po lɛ ekuɔ mɛi ni kɛ amale folɔɔ Odasefoi anaa akɛ amɛteɔ shi amɛwoɔ nɔyelii lɛ anaa.—Okɛto Mateo 10:18 he.

19. Kɛ Kaisare bi ni Kristofonyo atsu maŋ sɔɔmɔ ni jeee asraafoi anitsumɔ, yɛ be sɛɛjekɛmɔ ko mli lɛ, te esa akɛ etsu sane lɛ he nii eha tɛŋŋ?

¹⁹ Shi, kɛji Maŋ lɛ bi ni Kristofonyo atsu maŋnyo folo sɔɔmɔ nitsumɔ, ni ji maŋ sɔɔmɔ ni atsuɔ he nii yɛ maŋbii anɔkwɛmɔ shishi lɛ eko yɛ be sɛɛjekɛmɔ pɔtɛɛ ko mli hu? Shikome ekoŋŋ lɛ, esa akɛ Kristofoi adamɔ amɛhenilee kpakpa nɔ ni amɛ diɛŋtsɛ amɛkpɛ amɛyiŋ. “Wɔ fɛɛ wɔbaadamɔ [Nyɔŋmɔ] kojomɔ sɛi lɛ hiɛ.” (Romabii 14:10) Esa akɛ Kristofoi ni kɛ Kaisare taomɔ nii he naagba ko ekpe lɛ atsɔ sɔlemɔ nɔ amɛsusu sane lɛ he ni amɛjwɛŋ nɔ.a Ebaafee nilee gbɛ hu akɛ akɛ Kristofoi ni edara yɛ mumɔŋ yɛ asafo lɛ mli lɛ aaasusu sane lɛ he. Yɛ enɛ sɛɛ lɛ, esa akɛ mɔ lɛ diɛŋtsɛ akpɛ eyiŋ.—Abɛi 2:1-5; Filipibii 4:5.

20. Mɛɛ sanebimɔi kɛ Ŋmalɛ mli shishitoo mlai yeɔ ebuaa Kristofonyo koni esusu maŋnyo folo sɔɔmɔ ni jeee asraafoi anitsumɔ he sane lɛ he?

²⁰ Beni amɛtaoɔ saji amli nɛkɛ lɛ, Kristofoi baasusu Biblia mli shishitoo mlai babaoo he. Paulo wie akɛ esa akɛ ‘wɔbo onukpai kɛ nɔyelɔi lɛ atoi, ni wɔsaa wɔhe wɔha nitsumɔ kpakpa fɛɛ nitsumɔ kpakpa, . . . ni wɔfee kpoo, ni wɔkɛ wɔhe atsɔɔ mɔ fɛɛ mɔ akɛ wɔhe jɔ.’ (Tito 3:1, 2) Yɛ nakai beaŋ nɔŋŋ lɛ, Kristofoi baafee jogbaŋŋ akɛ amɛaapɛi maŋnyo folo sɔɔmɔ ni ataoɔ ni amɛsɔmɔ lɛ mli amɛkwɛ. Kɛ amɛkpɛlɛ nɔ lɛ, ani amɛbaanyɛ amɛhiɛ amɛhe ni amɛkɛwooo maŋ saji amli akɛ Kristofoi lɛ mli? (Mika 4:3, 5; Yohane 17:16) Ani ebaaha amɛkɛ amɛhe awo apasa jamɔ ko mli? (Kpojiemɔ 18:4, 20, 21) Ani nitsumɔ lɛ baatsĩ amɛ naa loo ehaŋ amɛnyɛ amɛtsu amɛ Kristofoi agbɛnaa nii ahe nii jogbaŋŋ? (Mateo 24:14; Hebribii 10:24, 25) Yɛ gbɛ kroko nɔ lɛ, ani amɛbaanyɛ amɛya nɔ amɛna mumɔŋ hiɛyaa, ni ekolɛ amɛkɛ amɛhe awo be-fɛɛ sɔɔmɔ lɛ mli po beni amɛtsuɔ nakai sɔɔmɔ ni abiɔ lɛ he nii lɛ?—Hebribii 6:11, 12.

21. Bɔ fɛɛ bɔ ni ebaakpɛ eyiŋ eha lɛ, te esa akɛ asafo lɛ abu nyɛmi nuu ni miitsu maŋnyo folo sɔɔmɔ ni jeee asraafoi anitsumɔ he sane lɛ he nii lɛ amɛha tɛŋŋ?

²¹ Shi kɛji Kristofonyo hetooi ni ji anɔkwale kɛha sanebimɔi nɛɛ ha emu sane naa akɛ maŋnyo folo sɔɔmɔ nitsumɔ lɛ ji “nitsumɔ kpakpa” ni ebaanyɛ etsu, yɛ toiboo feemɔ mli kɛha maŋ nɔyelɔi lɛ hu? No lɛ, eji lɛ diɛŋtsɛ eyiŋkpɛɛ yɛ Yehowa hiɛ. Esa akɛ onukpai ni ahala amɛ lɛ kɛ mɛi krokomɛi fɛɛ ajie bulɛ kpo yɛ nyɛmi nɛɛ yiŋkpɛɛ lɛ he, ni amɛya nɔ amɛbu lɛ akɛ Kristofonyo ni yɔɔ shidaamɔ kpakpa. Shi, kɛji Kristofonyo lɛ nuɔ he akɛ enyɛŋ etsu nɛkɛ maŋnyo folo sɔɔmɔ nɛɛ, lɛ hu esa akɛ ana bulɛ kɛha eshidaamɔ nɛɛ. Lɛ hu eka he eyɛ shidaamɔ kpakpa, ni esa akɛ ena sɛɛfimɔ ni jɛ suɔmɔ mli.—1 Korintobii 10:29; 2 Korintobii 1:24; 1 Petro 3:16.

22. Nɔ̃ shihilɛ fɛɛ shihilɛ ni wɔkɛaakpe lɛ, mɛni wɔbaaya nɔ wɔfee?

²² Akɛ Kristofoi lɛ, wɔbaaya nɔ ní, “mɔ nɔ ni ji woo lɛ, [wɔkɛ] woo” aha lɛ. (Romabii 13:7) Wɔbaaná bulɛ wɔha gbɛjianɔtoo kpakpa, ni wɔbɔ mɔdɛŋ ni wɔhi shi akɛ maŋbii ni sumɔɔ toiŋjɔlɛ, ni amɛyeɔ mla nɔ. (Lala 34:15) Wɔbaanyɛ wɔsɔle po “[wɔha] maŋtsɛmɛi kɛ mɛi fɛɛ ni yeɔ onukpai lɛ,” kɛji ehe miihia ni nɛkɛ hii nɛɛ afee yiŋkpɛi ni saa wɔ Kristofoi ashihilɛ kɛ nitsumɔ he. Yɛ Kaisare nii ni wɔkɛhaa Kaisare nɛɛ hewɔ lɛ, wɔhiɛ ka nɔ akɛ “[wɔɔhi] shi kpoo yɛ hejɔlɛ mli, yɛ Nyɔŋmɔ jamɔ [hetuu-kɛhamɔ] kɛ jeŋba ni hiɛ sɔɔ fɛɛ mli.” (1 Timoteo 2:1, 2) Nɔ ni fe fɛɛ lɛ, wɔbaaya nɔ wɔshiɛ Maŋtsɛyeli lɛ he sanekpakpa lɛ akɛ adesai ahiɛnɔkamɔ koome pɛ, ni wɔjɛ henilee kpakpa mli wɔkɛ Nyɔŋmɔ nii aha Nyɔŋmɔ.

[Shishigbɛ niŋmaa]

Ani Obaanyɛ Otsɔɔ Mli?

◻ Beni Kristofonyo haa ekɛ Yehowa, kɛ agbɛnɛ, ekɛ Kaisare hu teŋ wekukpaa lɛ ŋmɛɔ pɛpɛɛpɛ lɛ, mɛni esusuɔ he klɛŋklɛŋ?

◻ Mɛni esa akɛ wɔkɛha Yehowa ni wɔnyɛŋ wɔkɛha Kaisare kɔkɔɔkɔ?

◻ Mɛni ji nibii komɛi ni wɔkɛhaa Kaisare yɛ gbɛ ni ja nɔ?

◻ Mɛɛ ŋmalɛi yeɔ ebuaa wɔ ni wɔfeɔ yiŋkpɛɛ ni ja yɛ sane ni kɔɔ asraafoi anitsumɔ yɛ nɔnyɛɛ naa he lɛ gbɛfaŋ?

◻ Mɛni ji nibii komɛi ni esa akɛ wɔha ehi wɔjwɛŋmɔ mli kɛji aabi ni wɔkɛ wɔhe aha kɛha maŋnyo folo sɔɔmɔ ni jeee asraafoi anitsumɔ?

◻ Mɛni wɔbaaya nɔ wɔfee, yɛ Yehowa kɛ Kaisare gbɛfaŋ?

[Mfoniri ni yɔɔ baafa 16, 17]

Bɔfoi lɛ kɛɛ Sanhedrin lɛ akɛ: “Esa akɛ aboɔ Nyɔŋmɔ moŋ toi [akɛ nɔyelɔ] fe gbɔmɛi”