Biblia Mli Wolo ni Ji 57—Filemon

Mɔ ni Ŋma: Paulo

Heni Aŋma Yɛ: Roma

Be ni Aŋma Agbe Naa: Aaafee afi 60–61 Ŋ.B.

WOLO ni Paulo kɛ ŋaalee kɛ suɔmɔ ŋma nɛɛ he yɛ sɛɛnamɔ diɛŋtsɛ kɛha Kristofoi ŋmɛnɛ. Jeee akɛ eji woji ni “jeŋmaji abɔfo lɛ” ŋma ni abaa yi lɛ ateŋ nɔ ni yɔɔ kuku fe fɛɛ kɛkɛ, shi moŋ yɛ Biblia lɛ mli fɛɛ lɛ Yohane Wolo ni Ji Enyɔ lɛ kɛ Nɔ ni Ji Etɛ lɛ pɛ amli saji faaa fe no. Agbɛnɛ hu no pɛ ji wolo ni Paulo ŋma kɛyaha “mɔ aŋkro,” ejaakɛ ejeee wolo ni eŋma kɛyaha asafo ko loo asafoŋ onukpa ko, shi moŋ eŋma kɛyaha mɔ pɔtɛɛ ko ní eeenyɛ efee akɛ lɛ ji Filemon ni ji niiatsɛ ni hi shi yɛ Frigia yɛ Kolose ni yɔɔ Asia Bibioo lɛ teŋ lɛ, ni ekɛ lɛ wie naagba krɛdɛɛ ni etaoɔ ni ekɛ nyɛminuu ni ji Kristofonyo nɛɛ asusu he lɛ he.—Rom. 11:13.

² Yiŋtoo ni akɛŋma wolo lɛ je kpo faŋŋ: Yɛ klɛŋklɛŋ tsuŋ ni awo Paulo yɛ Roma (afi 59-61 Ŋ.B.) lɛ mli lɛ, ená hegbɛ babaoo kɛshiɛ Nyɔŋmɔ Maŋtsɛyeli lɛ. Mɛi ni bo eshiɛmɔ lɛ toi lɛ ateŋ mɔ kome ji Onesimo, tsulɔ ni jo foi kɛjɛ Filemon ni ji Paulo naanyo lɛ shĩa lɛ. Nɔ ni jɛ mli ba ji akɛ Onesimo batsɔ Kristofonyo, ni Paulo kɛ Onesimo susu he, ni ekpɛ mli akɛ ebaawo lɛ gbɛ kɛya Filemon ŋɔɔ. Nɛkɛ bei nɛɛ amli hu ni Paulo ŋma woji kɛyaha Efeso kɛ Kolose asafoi lɛ. Yɛ woji enyɔ nɛɛ fɛɛ amli lɛ, ewo Kristofoi ni ji tsuji lɛ kɛ nuŋtsɔmɛi lɛ ŋaa kpakpa yɛ bɔ ni esa akɛ amɛkɛ amɛhe aye aha lɛ mli. (Efe. 6:5-9; Kol. 3:22–4:1) Shi kɛfata enɛ he lɛ, Paulo ŋma wolo eyaha Filemon ni ekɛkpa fai eha Onesimo. Eji wolo ni lɛ diɛŋtsɛ ekɛ enine ŋma—nɔ ko ni Paulo efɔɔɔ feemɔ. (File. 19) Wolo nɛɛ ní lɛ diɛŋtsɛ ekɛ enine ŋma lɛ ma hiamɔ ni yɔɔ efaikpamɔ lɛ he lɛ nɔ mi jogbaŋŋ.

³ Eeenyɛ efee akɛ Paulo ŋma ewolo lɛ yɛ aaafee afi 60-61 Ŋ.B., be mli ni ekolɛ ekɛ bei babaoo eshiɛ yɛ Roma kɛtsake mɛi lɛ. Agbɛnɛ hu, ewie yɛ kuku 22 lɛ mli akɛ eyɛ hiɛnɔkamɔ akɛ abaajie lɛ, hewɔ lɛ wɔbaanyɛ wɔmu sane naa akɛ eŋma ewolo lɛ yɛ etsuŋwoo lɛ sɛɛ be kpalaŋŋ sɛɛ. Etamɔ nɔ ni akɛ woji etɛ nɛɛ ha Tihiko kɛ Onesimo ni amɛkɛ ekome yaha Filemon ni amɛkɛ ekrokomɛi lɛ yaha Efeso kɛ Kolose asafoi lɛ.—Efe. 6:21, 22; Kol. 4:7-9.

⁴ Wolo lɛ mli klɛŋklɛŋ kuku lɛ tsɔɔ akɛ Paulo ni ŋma Filemon wolo lɛ, ejaakɛ etsĩ egbɛi tã yɛ jɛmɛ. Origen kɛ Tertullian wie he akɛ lɛ eŋma.a Filemon wolo lɛ fata Paulo woji krokomɛi ni atsĩ tã yɛ Muratori Wolo ni akɛtsu nii yɛ afi 100 Ŋ.B. afii lɛ amli lɛ he, ni enɛ tsɔɔ akɛ eji wolo ni ja.

NƆ HEWƆ NI SƐƐNAMƆ YƆƆ HE

⁷ Taakɛ wolo ni Paulo ŋma nɛɛ tsɔɔ lɛ, eshiɛɛɛ “sanekpakpa ni wieɔ maŋ saji ahe,” koni ekɛjie nɔyeli ni yɔɔ nakai beaŋ lɛ kɛ egbɛjianɔtoo tamɔ nyɔŋyeli lɛ kɛya. Eteee shi kɛkɛ akɛ eeeha Kristofoi ni ji nyɔji lɛ aye amɛhe kɛjɛ nyɔŋyeli mli, shi yɛ no najiaŋ lɛ ewo Onesimo ni ji nyɔŋ ni jo foi lɛ gbɛ kɛjɛ Roma kɛtee enuŋtsɔ Filemon ŋɔɔ yɛ Kolose, ni gbɛ ni efã nɛɛ jɛkɛ fe kilomitai 1400. No hewɔ lɛ, Paulo tsu etsɛmɔ akɛ bɔfo lɛ he nii, ni ekɛ ehe kpɛtɛ nitsumɔ ní Nyɔŋmɔ kɛwo edɛŋ akɛ ‘eshiɛ Nyɔŋmɔ maŋtsɛyeli lɛ ni ekɛ ekãa fɛɛ ajaje Nuŋtsɔ Yesu Kristo he saji lɛ etsɔɔ amɛ’ lɛ.—Bɔf. 28:31; File. 8, 9.

⁸ Wolo ni aŋma ha Filemon lɛ tsɔɔ mɔ nii ejaakɛ ehaa anaa akɛ suɔmɔ kɛ ekomefeemɔ hi Kristofoi lɛ ateŋ yɛ klɛŋklɛŋ afi 100 lɛ mli. Wɔnaa wɔleɔ yɛ wolo nɛɛ mli akɛ mra be Kristofoi lɛ tsɛ́ amɛhe akɛ ‘nyɛmimɛi hii’ kɛ ‘nyɛmimɛi yei.’ (File. 2, 20) Kɛfata he lɛ, ehaa Kristofoi ni yɔɔ ŋmɛnɛ lɛ leɔ bɔ ni amɛaafee amɛkɛ Kristofoi ashishitoo mlai atsu nii yɛ nyɛmimɛi ni ji Kristofoi lɛ ateŋ. Nɔ ko ni wɔkaseɔ yɛ Paulo he ji nyɛmimɛi asuɔmɔ, bulɛ ni anáa ahaa hegbɛ ni mɛi yɔɔ, kɛ bulɛ ni anáa ahaa mɛi anibii, hiɛshikamɔ kpakpa ni akɛtsuɔ nii, kɛ heshibaa ni sa. Yɛ nɔ̃ najiaŋ ni Paulo kɛ hegbɛ ni eyɔɔ akɛ nɔkwɛlɔ ni ji hiɛnyiɛlɔ yɛ Kristofoi asafo lɛ mli lɛ aaatsu nii kɛnyɛ Filemon nɔ koni ekɛ Onesimo he ake lɛ lɛ, edamɔ Kristofoi asuɔmɔ kɛ naanyobɔɔ ni kã ekɛ lɛ teŋ lɛ nɔ ekpa lɛ fai. Nɔkwɛlɔi ni yɔɔ ŋmɛnɛ lɛ baanyɛ aná ŋaa gbɛ nɔ ni Paulo tsɔ ekɛ Filemon wie lɛ he sɛɛ.

⁹ Ekã shi faŋŋ akɛ Paulo miikpa gbɛ akɛ Filemon baakpɛlɛ enibimɔ lɛ nɔ, ni nakai ni Filemon baafee lɛ baatsɔɔ akɛ ekɛ nɔ ni Yesu wie yɛ Mateo 6:14 lɛ kɛ nɔ ni Paulo wie yɛ Efesobii 4:32 lɛ miitsu nii. Aakpa Kristofoi ni yɔɔ ŋmɛnɛ lɛ hu gbɛ koni amɛmli ahi ni kɛ́ nyɛmi ko tɔ̃ amɛnɔ lɛ amɛkɛ ehe ake lɛ. Kɛ́ Filemon nyɛ ekɛ etsulɔ ni eyɔɔ hegbɛ akɛ efeɔ lɛ niseniianii bɔ ni esumɔɔ lɛ he ke lɛ lɛ, belɛ esa akɛ Kristofoi hu anyɛ amɛkɛ mɛi ni tɔ̃ɔ amɛnɔ lɛ ahe ake amɛ—nɔ ko ni abaanyɛ atsu he nii aahu.

¹⁰ Nitsumɔ ni Yehowa mumɔ lɛ tsuɔ lɛ jeɔ kpo faŋŋ yɛ wolo ni aŋma kɛyaha Filemon nɛɛ lɛ mli. Eje kpo yɛ ŋaa gbɛ nɔ ni Paulo tsɔ etsu naagba wulu lɛ he nii lɛ mli. Eje kpo yɛ nyɛmimɛi ahedɔɔ kɛ suɔmɔ ni Paulo ná eha naanyo Kristofonyo ko kɛ hekɛnɔfɔɔ ni Paulo ná yɛ emli lɛ mli. Anaa hu yɛ anɔkwa sane ni ji akɛ wolo ni aŋma aha Filemon lɛ tamɔ Ŋmalɛi krokomɛi lɛ nɔŋŋ, ejaakɛ etsɔɔ Kristofoi ashishitoo mlai, ewoɔ Kristofoi hewalɛ ni amɛfee ekome, ekafoɔ suɔmɔ kɛ hemɔkɛyeli ni fa yɛ “mɛi krɔŋkrɔŋi lɛ” ni hiɛ kã Nyɔŋmɔ Maŋtsɛyeli lɛ nɔ, ní amɛbaa amɛjeŋ yɛ Yehowa mlihilɛ lɛ naa lɛ.—Kk. 5.

[Shishigbɛ niŋmaa]