Yitso Etɛ

Mɔ Nyɔŋmɔ Wiemɔ lɛ Mli Kpɛŋŋ

 1. (a) Blema Israel na anɔkwale ni Nyɔŋmɔ wiemɔ lɛ ji yɛ mɛɛ gbɛ nɔ? (b) Mɛni hewɔ wɔyɔɔ miishɛɛ yɛ enɛ he lɛ?

“NYƐLE yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli eha nyɛ.” (Yoshua 23:14-16) Enɛ ji nɔ ni Yoshua kɛɛ Israel onukpai lɛ yɛ sɛɛ mli beni amɛyahi Shiwoo Shikpɔŋ lɛ nɔ lɛ. Hɛɛ, Yehowa shiwoi lɛ fee anɔkwale ni anyɛɔ akɛ he fɔ̃ɔ nɔ. Ábaa nakai sane lɛ—kɛ nɔ ni yɔɔ Biblia muu lɛ fɛɛ mli lɛ—yi aha wɔ koni ‘wɔná hiɛnɔkamɔ.’—Romabii 15:4.

 2. (a) Biblia lɛ “jɛ Nyɔŋmɔ [mumɔ, NW] lɛŋ” yɛ mɛɛ shishinumɔ naa? (b) Akɛni wɔle akɛ Nyɔŋmɔ kanya Biblia lɛ ŋmaa hewɔ lɛ, mɛɛ gbɛnaa nii kã wɔnɔ?

² Eyɛ mli akɛ atsɔ adesai woloŋmalɔi aaafee 40 nɔ aŋma Biblia lɛ moŋ, shi Yehowa diɛŋtsɛ ji e-Ŋmalɔ. Ani no tsɔɔ akɛ lɛ ekudɔ nɔ fɛɛ nɔ ni aŋma awo mli lɛ? Hɛɛ. Efee enɛ kɛtsɔ emumɔ krɔŋkrɔŋ ni yɔɔ hewalɛ lɛ, enifeemɔ hewalɛ lɛ nɔ. Bɔfo Paulo wie yɛ anɔkwale mli akɛ: “Ŋmalɛ fɛɛ ŋmalɛ . . . jɛ Nyɔŋmɔ [mumɔ, NW] lɛŋ . . . koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” Gbɔmɛi ni yɔɔ he fɛɛ he ni heɔ enɛ amɛyeɔ lɛ boɔ Biblia lɛ toi ni amɛtswaa amɛshihilɛ kɛbɔleɔ nɔ ni aŋma yɛ mli lɛ he.—2 Timoteo 3:16, 17; 1 Tesalonikabii 2:13.

Ye Obua Mɛi Krokomɛi ni Amɛná Hiɛsɔɔ

 3. Mɛɛ gbɛ ni hi fe fɛɛ nɔ wɔɔtsɔ ní wɔye wɔbua mɛi babaoo ni amɛyiŋ tsɔko ákɛ Biblia lɛ ji Nyɔŋmɔ Wiemɔ lɛ?

³ Mɛi ni wɔkɛ amɛ gbaa sane lɛ ateŋ mɛi pii ekpɛlɛɛɛ hemɔkɛyeli ni wɔyɔɔ akɛ Biblia lɛ ji Nyɔŋmɔ Wiemɔ lɛ nɔ. Te wɔɔfee tɛŋŋ wɔye wɔbua amɛ? Bei pii lɛ, gbɛ ni hi fe fɛɛ ji ni wɔgbele Biblia lɛ ní wɔtsɔɔ amɛ nɔ ni yɔɔ mli. “Nyɔŋmɔ wiemɔ [lɛ] hiɛ kã ni eyɛ hewalɛ ni enaa ba fe klante kɛ enaa ŋta fɛɛ . . . ni eji tsuiiaŋ susumɔi kɛ jwɛŋmɔi lɛ akojolɔ.” (Hebribii 4:12) “Nyɔŋmɔ wiemɔ [lɛ]” jeee yinɔsane ni egbo loo be eho; ehiɛ kã! Biblia shiwoi kɛ hewalɛ miiya hiɛ kɛha emlibaa ni anyɛɛɛ naa atsĩ. Hewalɛ ni Biblia mli shɛɛ sane lɛ náa yɛ mɔ ko anɔkwa tsui kanyamɔ mli lɛ yɛ hewalɛ kwraa fe nɔ ni wɔ diɛŋtsɛ wɔbaanyɛ wɔkɛɛ.

 4. Mɛɛ Biblia mli anɔkwalei amlitsɔɔmɔ etsake sui ni mɛi komɛi hiɛ yɛ Biblia lɛ he lɛ, ni mɛni hewɔ?

⁴ Nyɔŋmɔ gbɛi lɛ ni mɛi ena yɛ Biblia lɛ mli lɛ eha mɛi babaoo egbu shi amɛtao mli vii. Mɛi krokomɛi hu kpɛ amɛyiŋ akɛ amɛbaakase Biblia lɛ beni atsɔɔ amɛ nɔ ni ekɛɔ yɛ yiŋtoo ni yɔɔ shihilɛ sɛɛ, nɔ hewɔ ni Nyɔŋmɔ ŋmɛɔ efɔŋfeemɔ gbɛ, nɔ ni shihilɛ mli nibii ni baa amrɔ nɛɛ lɛ tsɔɔ, aloo naanɔ wala he hiɛnɔkamɔ yɛ shikpɔŋ nɔ paradeiso mli lɛ. Yɛ shikpɔji ni jamɔ mli nifeemɔ eha mumɔi fɔji miihao gbɔmɛi lɛ anɔ lɛ, bɔ ni Biblia lɛ tsɔɔ nɔ ni haa ebaa lɛ nakai lɛ mli kɛ bɔ ni mɔ aaafee ni eye ehe kɛjɛ enɛ mli lɛ étee mɛi amiishɛɛ shi. Mɛni hewɔ mɛi ni hiɛ jwɛŋmɔ ni ja lɛ nyaa nɛkɛ saji otii nɛɛ ahe jogbaŋŋ lɛ? Ejaakɛ Biblia lɛ pɛ ji saji ni he hiaa ni kɔɔ enɛɛmɛi fɛɛ ahe lɛ jɛɛhe kome ni anyɛɔ akɛ he fɔ̃ɔ nɔ.—Lala 119:130.

 5. (a) Kɛji akɛ gbɔmɛi kɛɛ akɛ amɛheee Biblia lɛ amɛyeee lɛ, ekolɛ ejɛ mɛni? (b) Te wɔɔfee tɛŋŋ wɔye wɔbua gbɔmɛi ni tamɔ nɛkɛ?

⁵ Shi kɛlɛ, kɛji akɛ gbɔmɛi kɛɛ wɔ akɛ amɛheee Biblia lɛ amɛyeee hu? Ani esa akɛ enɛ kɛ sanegbaa lɛ aba naagbee? Ja amɛsumɔɔɔ ni amɛsusu saji ahe. Ekolɛ amɛbuɔ Biblia lɛ akɛ Kristendom wolo. Ekolɛ eyinɔsane ni kɔɔ osatofeemɔ kɛ maŋkwramɔ saji ni ekɛ ehe woɔ mli, kɛ shika ni ebaa daa lɛ baanyɛ afee nɔ hewɔ ni amɛsumɔɔɔ Biblia lɛ. Mɛni hewɔ obiii kɛji akɛ nakai sane lɛ ji? Bɔ ni Biblia lɛ buɔ Kristendom je lɛŋ gbɛ̀i lɛ fɔ, kɛ srɔtofeemɔ ni kã Kristendom kɛ anɔkwa Kristojamɔ teŋ lɛ baanyɛ átee amɛmiishɛɛ shi.—Mika 3:11, 12; Mateo 15:7-9; Yakobo 4:4.

 6. (a) Mɛni tsɔɔ bo diɛŋtsɛ oyiŋ akɛ Biblia lɛ ji Nyɔŋmɔ Wiemɔ? (b) Mɛɛ susumɔi krokomɛi abaanyɛ akɛtsu nii koni akɛye abua gbɔmɛi ni amɛna akɛ Biblia lɛ jɛ Nyɔŋmɔ ŋɔɔ diɛŋtsɛ?

⁶ Kɛha mɛi krokomɛi lɛ, odaseyelii ni tsɔɔ akɛ Biblia lɛ jɛ Nyɔŋmɔ mumɔŋ lɛ he sanegbaa ni yɔɔ tɛ̃ɛ baanyɛ aye abua. Mɛni yeɔ odase yɛ faŋŋ mli kɛhaa bo akɛ Biblia lɛ jɛ Yehowa Nyɔŋmɔ ŋɔɔ? Ani no ji nɔ ni Biblia lɛ diɛŋtsɛ kɛɔ yɛ eshishijee lɛ he? Aloo ejɛ anɔkwale ni eji akɛ gbalɛi babaoo yɛ Biblia lɛ mli ni tsɔɔ wɔsɛɛ be he nilee babaoo ni yɔɔ, gbalɛi ni jɛ jɛɛhe ko ni nɔ kwɔ fe adesai lɛ hewɔ? (2 Petro 1:20, 21) Aloo ekolɛ ejɛ bɔ ni Biblia lɛ kɛ ehe kpãa gbee waa, tsɛbelɛ gbɔmɛi 40 ŋmala ni ehé fe afii 1,600 lɛ hewɔ? Aloo bɔ ni eji anɔkwale yɛ jeŋ nilee naa, ni etamɔɔɔ niŋmaai krokomɛi ni jɛ nakai bei lɛ amli lɛ hewɔ? Aloo bɔ ni mɛi ni ŋma lɛ ye anɔkwale yɛ amɛniŋmaai amli lɛ hewɔ? Aloo yɛ bɔ ni abaa yi yɛ yiwalɛ ni akɛbɔ mɔdɛŋ koni akpata hiɛ lɛ fɛɛ sɛɛ lɛ hewɔ? Obaanyɛ okɛ nɔ fɛɛ nɔ ni ona ni saa ohiɛ lɛ hu atsu nii ni okɛye obua mɛi krokomɛi.a

Biblia lɛ ni Wɔɔkane

7, 8. (a) Mɛni esa akɛ wɔkɛ Biblia lɛ afee? (b) Mɛni he hiaa wɔ kɛfata Biblia lɛ ni wɔ diɛŋtsɛ wɔɔkane lɛ he? (d) Mɛɛ gbɛ nɔ bo diɛŋtsɛ lɛ oná Yehowa yiŋtoi ahe shishinumɔ yɛ?

⁷ Kɛfata yelikɛbuamɔ ni wɔkɛaaha mɛi krokomɛi koni amɛhe Biblia lɛ amɛye lɛ he lɛ, ehe miihia ni wɔ diɛŋtsɛ lɛ wɔhe be ni wɔkane daa. Ani oofee nakai? Enɛ ji wolo ni he hiaa fe fɛɛ yɛ woji ni afee lɛ fɛɛ mli. Shi no etsɔɔɔ akɛ kɛji akɛ wɔ kome wɔkane lɛ belɛ nɔ ko he ehiaaa wɔ dɔŋŋ. Ŋmalɛi lɛ bɔɔ kɔkɔ eshiɔ wɔhe ni wɔɔtse banee he. Esaaa akɛ wɔsusuɔ akɛ kɛ́ wɔ diɛŋtsɛ wɔpɛi nibii amli wɔha wɔhe lɛ, wɔbaanyɛ wɔna nɔ fɛɛ nɔ naa. Teemɔŋ nikasemɔ kɛ Nyɔŋmɔ webii akpeei ni wɔɔya daa lɛ fɛɛ he miihia kɛ́ wɔɔnyɛ wɔfee Kristofoi ni ŋmɛɔ pɛpɛɛpɛ.—Abɛi 18:1; Hebribii 10:24, 25.

⁸ Nɔ ni kɔɔ enɛ he lɛ, Biblia lɛ gbaa wɔ Etiopia piafonyo ko ni miikane Yesaia gbalɛ lɛ he sane. Ŋwɛibɔfo ko kudɔ Kristofonyo sanekpakpa shiɛlɔ Filipo kɛtee eŋɔɔ koni ebi nuu lɛ akɛ: “Ani oonu nɔ ni okaneɔ lɛ shishi lo?” Etiopianyo lɛ kɛ heshibaa ha lɛ hetoo akɛ: “Te mafee tɛŋŋ ni manyɛ hu, akɛ ja mɔ ko tsɔɔ mi?” Ewo Filipo hewalɛ koni etsɔɔ lɛ Ŋmalɛ ni ekaneɔ lɛ shishi. Agbɛnɛ, Filipo jeee mɔ ni ekome ekaneɔ Biblia lɛ ehaa ehe, ní etsɔɔ lɛ diɛŋtsɛ ejwɛŋmɔ yɛ Ŋmalɛi lɛ ahe. Ekɛ Nyɔŋmɔ gbɛjianɔtoo ni anaa lɛ bɔɔ gbagbalii. No hewɔ lɛ ebaanyɛ eye ebua Etiopianyo lɛ koni famɔ ni Yehowa tsɔɔ nakai gbɛjianɔtoo lɛ nɔ ekɛhaa lɛ he aba sɛɛnamɔ kɛha lɛ. (Bɔfoi lɛ Asaji 6:5, 6; 8:5, 26-35) Nakai nɔŋŋ hu ŋmɛnɛ, mɔ ko naaa Yehowa yiŋtoi ahe shishinumɔ ni ja lɛ diɛŋtsɛ. Yelikɛbuamɔ ni Yehowa jɛɔ esuɔmɔ mli ekɛhaa kɛtsɔɔ egbɛjianɔtoo ni anaa lɛ nɔ lɛ he miihia wɔ fɛɛ.

 9. Mɛɛ Biblia kanemɔ he gbɛjianɔtoo he baanyɛ aba sɛɛnamɔ kɛha wɔ fɛɛ?

⁹ Bɔni afee ni eye ebua wɔ ni wɔnu Biblia lɛ shishi lɛ, Yehowa gbɛjianɔtoo lɛ kɛ Ŋmalɛ mli saji ni nɔ bɛ haa wɔ yɛ woji srɔtoi amli. Kɛfata he lɛ, ato Biblia lɛ kanemɔ daa he gbɛjianɔ aha wɔ yɛ Teokrase Sɔɔmɔ Skul lɛ ni afeɔ yɛ Yehowa Odasefoi asafoi ni yɔɔ jeŋ fɛɛ lɛ mli lɛ amli. Sɛɛnamɔ kpele baanyɛ aba kɛjɛ be ni wɔ diɛŋtsɛ wɔkɛpɛiɔ Ŋmalɛ Krɔŋkrɔŋ lɛ mli lɛ he. (Lala 1:1-3; 19:8, 9) Bɔɔ mɔdɛŋ waa diɛŋtsɛ ni okane Biblia lɛ daa. Eyɛ mli akɛ onuuu nɔ fɛɛ nɔ shishi jogbaŋŋ moŋ, shi Ŋmalɛi lɛ fɛɛ he jwɛŋmɔ ni oooná lɛ he baaba sɛɛnamɔ waa. Ákɛ nɔkwɛmɔnɔ lɛ, kɛji akɛ okane baafai ejwɛ loo enumɔ pɛ gbi kome lɛ, obaanyɛ ogbe Biblia lɛ naa yɛ aaafee afi kome mli.

10. (a) Mɛɛ be okaneɔ o-Biblia lɛ? (b) Namɛi hu esa akɛ akɛ amɛ afata he beni akaneɔ Biblia lɛ, ni mɛni hewɔ ehe hiaa ni afee daa lɛ?

¹⁰ Mɛɛ be obaanyɛ okane o-Biblia lɛ? Kɛ onyɛ oto minitii 10 loo 15 daa gbi kɛha enɛ lɛ, ehe baaba sɛɛnamɔ diɛŋtsɛ kɛha bo. Kɛ́ jeee nakai lɛ, kɛ hoo lɛ, too gbɛjianɔ oha enɛ daa otsi, ni okɛ nakai be he gbɛjianɔtoo lɛ atsu nii. Kɛji akɛ obote gbalashihilɛ mli lɛ, bo kɛ ohefatalɔ lɛ baanyɛ aná Biblia lɛ kanemɔ mli ŋɔɔmɔ beni nyɛkaneɔ lɛ waa nyɛtsɔɔ nyɛhe lɛ. Kɛji akɛ gbekɛbii ni amɛdara saŋŋ ni baanyɛ akane fata nyɛhe lɛ, amɛbaanyɛ amɛto naa ni amɛkane lɛ waa amɛtsɔɔ. Esa akɛ Biblia kanemɔ afee su ko ni abaahiɛ mli wala gbii abɔ fɛɛ, tamɔ niyenii ni ayeɔ. Taakɛ ole lɛ, kɛji akɛ mɔ ko niyeli su ehiii lɛ, ebaasa egbɔmɔtsoŋ hewalɛnamɔ he. Nakai nɔŋŋ eji yɛ wɔmumɔŋ shihilɛ he, no hewɔ lɛ wɔ naanɔ wala damɔ “wiemɔ fɛɛ wiemɔ ni jɛɔ [Yehowa, NW] daaŋ lɛ” ni wɔkɛaalɛ wɔhe daa lɛ nɔ.—Mateo 4:4.

Oti ni Ma Wɔhiɛ

11. Mɛni esa akɛ efee oti ni ma wɔhiɛ beni wɔkaneɔ Biblia lɛ?

¹¹ Mɛni esa akɛ efee oti ni ma wɔhiɛ yɛ Biblia lɛ kanemɔ mli? Esaaa akɛ oti ni ma wɔhiɛ lɛ feɔ akɛ wɔmiikane baafai komɛi kɛkɛ. Esa akɛ wɔyiŋtoo afee ákɛ ní wɔle Nyɔŋmɔ jogbaŋŋ, koni wɔha suɔmɔ ni wɔyɔɔ kɛha lɛ lɛ mli awa ni wɔjá lɛ yɛ nɔkpɛlɛmɔ mli. (Yohane 5:39-42) Esa akɛ wɔsubaŋ atamɔ Biblia mli niŋmalɔ lɛ ni kɛɛ akɛ: “Yehowa, tsɔɔmɔ mi ogbɛ̀i lɛ, ha male otempɔŋi lɛ!”—Lala 25:4.

12. (a) Mɛni hewɔ ‘anɔkwa nilee’ námɔ he hiaa lɛ, ni mɛɛ mɔdɛŋbɔɔ ekolɛ ehe baahia beni akaneɔ koni aná nakai nilee lɛ? (b) Mɛɛ susumɔi ejwɛ ni akɛaatsu nii baanyɛ aha wɔpɛi nɔ ni wɔkaneɔ yɛ Biblia lɛ mli lɛ mli koni sɛɛnamɔ aba he? (Kwɛmɔ akrabatsa ni yɔɔ baafa 30 lɛ.) (d) Feemɔ nɛkɛ saji otii nɛɛ ahe nɔkwɛmɔnɔ kɛtsɔ sanebimɔi ni akɛha yɛ kuku nɛɛ mli lɛ ahetoohamɔ nɔ. Kanemɔ ŋmalɛi ni atsɛ shi aŋmalako emli saji lɛ.

¹² Yɛ be mli ni wɔnine shɛɔ tsɔɔmɔi anɔ kɛjɛɔ Yehowa ŋɔɔ lɛ, esa akɛ wɔshwe akɛ wɔɔná ‘anɔkwale nilee.’ Kɛ́ enɛ bɛ lɛ, te wɔɔfee tɛŋŋ wɔkɛ Nyɔŋmɔ Wiemɔ lɛ atsu nii yɛ gbɛ ni sa nɔ yɛ wɔ diɛŋtsɛ wɔshihilɛi amli, aloo ní wɔtsɔɔ mli yɛ gbɛ ni ja nɔ wɔha mɛi krokomɛi lɛ? (Kolosebii 3:10; 2 Timoteo 2:15) Anɔkwa nilee námɔ biɔ ni wɔkane nii jogbaŋŋ, ni kɛji akɛ efã ko shishinumɔ wa lɛ, ehe baahia ni wɔkane shii abɔ bɔni afee ni wɔnu shishi. Kɛ wɔhe be ni wɔkɛjwɛŋ nɔ ni wɔkaneɔ lɛ hu nɔ, ni wɔsusu he yɛ gbɛ̀i srɔtoi anɔ lɛ, ehe baaba sɛɛnamɔ kɛha wɔ hu. Átsɔɔ susumɔ gbɛ̀i srɔtoi ejwɛ ni sɛɛnamɔ yɔɔ he ni abaanyɛ atsɔ nɔ apɛi saji amli lɛ yɛ baafa 30. Abaanyɛ atsɔ susumɔi nɛɛ ekome loo nɔ ni fe nakai nɔ asusu Ŋmalɛ lɛ fãi komɛi ahe koni ehe aba sɛɛnamɔ. Yɛ be mli ni ohaa sanebimɔi ni yɔɔ baafai ni nyiɛ sɛɛ nɛɛ amli lɛ ahetoo lɛ, obaana nɔ hewɔ ni nakai eji lɛ.

(1) Bei pii lɛ, Ŋmalɛ ko fã ni okaneɔ lɛ baanyɛ atsɔɔ bo nɔ ko yɛ nɔ̃ gbɔmɔ ni Yehowa ji lɛ he. Ákɛ nɔkwɛmɔnɔ lɛ, wɔkaseɔ bɔ ni Nyɔŋmɔ susuɔ abifao ni afɔko lɛ lɛ he waa lɛ he sane yɛ Lala 139:13, 14, akɛ: “Bo oshɔ̃ mi yɛ minyɛ musuŋ. Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.” Kwɛ bɔ ni Yehowa nibɔɔ nitsumɔi lɛ yɔɔ naakpɛɛ ha! Gbɛ ni atsɔ nɔ afee adesai lɛ yeɔ esuɔmɔ kpele ni eyɔɔ kɛha wɔ lɛ he odase.

Yɛ nɔ ni awie yɛ Yohane 14:9, 10 lɛ hewɔ lɛ, kɛji akɛ wɔkane bɔ ni Yesu kɛ mɛi krokomɛi ye ha lɛ, belɛ wɔmiina bɔ ni Yehowa diɛŋtsɛ baafee enii eha. Akɛni enɛ yɔɔ wɔjwɛŋmɔ mli hewɔ lɛ, mɛɛ sane naa wɔbaanyɛ wɔmu yɛ Yehowa he yɛ saji ni ba ni aŋmala ashwie shi yɛ Luka 5:12, 13 lɛ kɛ Luka 7:11-15 lɛ hewɔ?

(2) Susumɔ bɔ ni sane lɛ kɛ nɔ ko fataa Biblia lɛ saneyitso, ni ji: jeŋ muu fɛɛ maŋtsɛ ni Yehowa ji lɛ bembuu kɛ egbɛi lɛ he tsemɔ kɛtsɔ Maŋtsɛyeli ni yɔɔ Yesu Kristo, shiwoo Seshi lɛ shishi lɛ nɔ lɛ he.

Ezekiel kɛ Daniel ma Biblia mli saneyitso lɛ nɔ mi yɛ mɛɛ gbɛ nɔ? (Ezekiel 38:21-23; Daniel 2:44; 4:17; 7:9-14)

Yɛ mɛɛ gbɛ nɔ Biblia lɛ haa ayɔseɔ Yesu yɛ faŋŋ mli akɛ lɛ ji shiwoo Seshi lɛ? (Galatabii 3:16)

Te Kpojiemɔ tsɔɔ Maŋtsɛyeli saneyitso lɛ naagbee yɛ anunyam mli lɛ mli eha tɛŋŋ? (Kpojiemɔ 11:15; 12:7-10; 17:16-18; 19:11-16; 20:1-3; 21:1-5)

(3) Bi ohe akɛ te ooofee tɛŋŋ ni okɛ nɔ ni okaneɔ lɛ ato bo diɛŋtsɛ ohe. Ákɛ nɔkwɛmɔnɔ lɛ, wɔkaneɔ Israel jeŋba shara kɛ atuatsemɔ lɛ he sane kɛjɛɔ 2 Mose kɛyashi 5 Mose. Wɔkaseɔ akɛ nɔ ni jɛ nakai subaŋi kɛ nifeemɔi lɛ amli ba lɛ bafee efɔŋ. No hewɔ lɛ, esa akɛ ekanya wɔ ni wɔsa Yehowa hiɛ kɛtsɔ Israel nɔkwɛmɔnɔ gbonyo lɛ ni wɔkaseŋ lɛ nɔ. “Afee amɛ enɛɛmɛi fɛɛ ni akɛto okadi aha wɔ, ni aŋma ni aŋɔbɔ wɔ kɔkɔ, wɔ mɛi ni je lɛ naagbee lɛ enina wɔ lɛ.”—1 Korintobii 10:11.

Mɛɛ nikasemɔ nɔ ni aŋma afɔ̃ shi ni kɔɔ Kain ni gbe Habel he lɛ yɔɔ kɛha wɔ? (1 Mose 4:3-12; Hebribii 11:4; 1 Yohane 3:10-15; 4:20, 21)

Ani Biblia mli ŋaawoo ni akɛhaa Kristofoi ni yɔɔ ŋwɛi hiɛnɔkamɔ lɛ kɔɔ mɛi ni yɔɔ naanɔ wala yɛ shikpɔŋ nɔ he hiɛnɔkamɔ lɛ hu he? (4 Mose 15:16; Yohane 10:16)

Eyɛ mli akɛ wɔyɛ shidaamɔ kpakpa yɛ Kristofoi asafo lɛ mli moŋ, shi mɛni hewɔ ehe hiaa ni wɔsusu bɔ ni wɔɔfee ni wɔkɛ Biblia mli ŋaawoo ni wɔle momo lɛ atsu nii yɛ gbɛ ni mɔɔ shi jogbaŋŋ nɔ lɛ he lɛ? (2 Korintobii 13:5; 1 Tesalonikabii 4:1)

(4) Susumɔ bɔ ni ooofee ni okɛ nɔ ni okaneɔ lɛ atsu nii ni okɛye obua mɛi krokomɛi lɛ he. Gbɔmɛi fɛɛ haoɔ yɛ gbɔmɔtsoŋ hewalɛnamɔ mli naagbai ahe, no hewɔ lɛ wɔbaanyɛ ni wɔkɛ amɛ akane nɔ ni Yesu fee ni ekɛfee nɔ ni ebaafee yɛ gbɛ ni da nɔ yɛ Maŋtsɛyeli hewalɛ mli lɛ he nɔkwɛmɔnɔ lɛ, akɛ: “Asafoi pii ba eŋɔɔ amɛhiɛ obubuafoi kɛ shwilafoi kɛ mumuii kɛ kpajelɔi kɛ mɛi krokomɛi pii; . . . ni etsá amɛ.”—Mateo 15:30.

Namɛi abaanyɛ akɛ Yairo biyoo lɛ ní atee lɛ shi lɛ he sane lɛ aye abua amɛ? (Luka 8:41, 42, 49-56)

13. Mɛni wɔbaakpa gbɛ ákɛ ebaanyɛ ejɛ Biblia kanemɔ kɛ nikasemɔ ni wɔyaa nɔ wɔkɛ Yehowa gbɛjianɔtoo lɛ feɔ lɛ mli aba?

¹³ Kwɛ bɔ ni Biblia kanemɔ he baa sɛɛnamɔ waa ehaa, kɛ́ wɔsusu saji otii ejwɛ ni atsĩ tã yɛ yiteŋgbɛ lɛ ahe lɛ! Yɛ anɔkwale mli lɛ, Biblia kanemɔ ji kaa. Shi ehe baanyɛ aba sɛɛnamɔ kɛha wɔ yɛ wala be fɛɛ mli, ejaakɛ yɛ be mli ni wɔkaneɔ Ŋmalɛi lɛ, wɔbaaya nɔ wɔdara ni wɔhe awa yɛ mumɔŋ. Daa Biblia kanemɔ baagbala wɔ kɛbɛŋkɛ wɔ-Tsɛ ni yɔɔ suɔmɔ, ni ji Yehowa, kɛ wɔnyɛmimɛi Kristofoi lɛ ahe kpaakpa. Ebaaye ebua wɔ ni wɔbo ŋaawoo akɛ “wɔmɔ wala wiemɔ lɛ mli kpɛŋŋ” lɛ toi.—Filipibii 2:16, NW.

[Shishigbɛ niŋmaa]

Sanegbaa ni Akɛtiɔ Mli

• Mɛni hewɔ aŋma Biblia lɛ ni ábaa yi aahu kɛbashi wɔgbi nɛɛ lɛ?

• Te wɔɔfee tɛŋŋ wɔye wɔbua mɛi krokomɛi ni amɛnu Biblia lɛ shishi?

• Mɛni hewɔ sɛɛnamɔ yɔɔ Biblia kanemɔ ni mɔ aŋkro feɔ lɛ he lɛ? Mɛɛ otii ejwɛ ni akɛsusuɔ saji ahe amɛkɛ nitsumɔ baaha wɔnyɛ wɔpɛi nɔ ni wɔkaneɔ lɛ mli ni sɛɛnamɔ aba he?

[Akrabatsa/Mfoniri ni yɔɔ baafa 30]

KƐ́ OKANE BIBLIA LƐ FÃ KO LƐ, SUSUMƆ

Nɔ ni ekɛɔ bo yɛ Yehowa he ákɛ mɔ ko diɛŋtsɛ lɛ he

Bɔ ni ekɔɔ Biblia saneyitso muu lɛ fɛɛ he ehaa lɛ he

Bɔ ni esa akɛ esa bo diɛŋtsɛ oshihilɛ he eha lɛ he

Bɔ ni okɛbaatsu nii ni okɛye obua mɛi krokomɛi lɛ he