Mɔ Hiɛnɔkamɔ Ni Ka Ohiɛ Iɛ Mli
1, 2. Mɛni hewɔ esa akɛ okɛ hiɛdɔɔ asusu sane ni kɔɔ ohiɛnɔkamɔ ni ooomɔ mli lɛ he lɛ?
1 BƆFO Paulo ŋma akɛ, “Kristo hefatalɔi wɔtsɔmɔ, kɛji wɔhiɛ wɔhe ni wɔŋɔ-fɔɔ enɔ kɛjɛ shishijee lɛ mli kpɛŋŋ kɛyashi naagbee lɛ.” (Hebribii 3:14) Ni ewie yɛ bɔ ni ehe hiaa ni wɔmɔ “nɔhiɛkamɔ ni ka wɔhiɛ lɛ mli” lɛ hu he.—Hebribii 6:18.
2 Ekolɛ obatsɔ Yehowa Odasefoi lɛ ateŋ mɔ kome nyɛsɛɛ nɛɛ, ni eyɛ nɔ ni óhe oye lɛ nɔmimaa waa. Aloo ekolɛ obatsɔ Odasefonyo Kristofonyo nɛɛ afii nyɔŋmai abɔ nɛ, ni onuɔ he akɛ oyɛ shiŋŋ yɛ anɔkwale lɛ gbɛ lɛ nɔ. Bɔ fɛɛ bɔ ni eji lɛ, ebaanyɛ eba akɛ wɔteŋ mɔ ko baanyɛ akai mɛi komɛi ni wɔle ni amɛkpa anɔkwale gbɛ lɛ nɔ nyiɛmɔ, taakɛ eba yɛ klɛŋklɛŋ afii oha lɛ mli lɛ. (Filipibii 3:18; Bɔfoi lɛ Asaji 20:30) Ekolɛ mɛi komɛi laaje amɛhemɔkɛyeli lɛ fiofio, amɛkɛ amɛhe wo heloo gbɛfaŋ nibii ataomɔ mli aloo amɛŋmɛɛ amɛhe amɛha kaa ni amɛfee esha.
3-5. Hebribii awolo lɛ baanyɛ afee nɔ ni yeɔ ebuaa yɛ wɔhiɛnɔkamɔ lɛ he yɛ mɛɛ gbɛ nɔ?
3 Te wɔɔfee tɛŋŋ wɔtsi enɛ naa koni ekaba wɔ nɔ nakai? Nyɛhaa wɔsusua ŋaawoo ni yɔɔ Hebribii awolo lɛ mii lɛ he. Wɔbaana bɔ ni enɛ sa jogbaŋŋ kɛha wɔbe nɛɛ, yɛ bɔ ni ŋmɛnɛŋmɛnɛ beaŋ Yehowa Odasefoi lɛ ateŋ mɛi pii eto amɛtsui shi yɛ anɔkwayeli mli yɛ ŋaawoo nɛɛ ni wo amɛ hewalɛ lɛ hewɔ.
4 Aŋma Hebribii lɛ aha Kristofoi ni “ena ŋwɛi tsɛmɔ lɛ eko” lɛ. Akɛ Nyɔŋmɔ mumɔ lɛ fɔ amɛ mu, ni amɛyɛ hiɛnɔkamɔ ni ma shi shiŋŋ yɛ Kristo ni ji klɛŋklɛŋ mɔ ni tsɔ hiɛ ebote ŋwɛi lɛ sɛɛnyiɛmɔ mli. Taakɛ obaanyɛ osusu lɛ, nɛkɛ ‘hiɛnɔkamɔ nɛɛ ji sɛkɛ kɛha susuma lɛ, nɔ ni tseee ni efi shi shiŋŋ.’ Shi kɛ̃lɛ, Paulo gbala jwɛŋmɔ kɛtee bɔ ni ehe hiaa ni “wɔmɔ nɔhiɛkamɔ ni ka wɔhiɛ lɛ mli” lɛ nɔ (Hebribii 3:1; 6:18-20) Kɛ amɛyɛ hiamɔ nii ni tamɔ nɛkɛ lɛ, enyiɛ nɔŋŋ ni ebafeŋ babaoo moŋ yɛ shwɛɛnii ni afɔ amɛ mu lɛ kɛ “asafo babaoo” lɛ ni kpaa gbɛ akɛ amɛbaaje “amanehulu kpeteŋkpele” ni baa lɛ mli lɛ agbɛfaŋ bianɛ.—Kpojiemɔ 7:9, 15.
5 Yehowa hɛleɔ wɔ shi yɛ osharai tamɔ ‘ni wɔɔkpalaŋ kɛya,’ ‘shigbeemɔ,’ ‘kpɔkee-feemɔ,’ ‘kpalemɔ ni kɛ mɔ yaa hiɛkpatamɔ mli’ aloo ‘wiemɔ lɛ kwamɔ’ he. (Hebribii 2:1; 6:6, 12; 10:39; 12:25) Wolo lɛ kɛ ŋaawoo kpakpa haa wɔ koni ekɛye ebua wɔ ni “wɔtsɔɔ nɛkɛ mɔdɛŋbɔɔ nɛɛ nɔŋŋ, koni ama nɔhiɛkamɔ lɛ nɔ mi kɛyashi naagbee” koni wɔtsɔmɔ “mɛi ni kɛ hemɔkɛyeli naa amɛsusuma yiwalaheremɔ.”—Hebribii 6:11; 10:39.
“Jeee Mɛi Ni Kpaleɔ Kɛyaa”
6. Hebri Kristofoi lɛ kɛ mɛni ekpe, shi kɛlɛ mɛni he hiaa amɛ lolo?
6 Eka shi faŋŋ akɛ Hebri Kristofoi lɛ ateŋ mɛi pii etsɔ yiwaa mli. Amɛmia amɛhiɛ “yɛ amanehului ata babaoo mli,” tamɔ Roma shwɛmɔhei ni akɛ amɛ yadamɔ yɛ kooloi awuyelɔi ahiɛ aloo amɛhe ni amɛkɛwo oshara mli bɔni afee ni amɛye amɛbua mɛi ni awo amɛ tsuŋ lɛ hewɔ. (Hebribii 10:32-34) Fɛɛ sɛɛ lɛ, esa akɛ amɛtsu nii koni amɛkafee “mɛi ni kpaleɔ kɛyaa hiɛkpatamɔ mli . . . shi moŋ [amɛfee] mɛi ni kɛ hemɔkɛyeli naa amɛsusuma yiwalaheremɔ lɛ ateŋ mɛi komɛi.”—Hebribii 10:39.
7. (a) Yiwaa gbɛkpamɔ baanyɛ ana hewalɛ yɛ Kristofonyo ko nɔ yɛ mɛɛ gbɛ nɔ? (b) Mɛni esa akɛ obi bo diɛŋtsɛ ohe?
7 No hewɔ lɛ oshara ákɛ Kristofonyo aaashe shitee kɛ woo gbeyei, ni eha ‘ekpale kɛya’ aloo eŋmɛɛ sane he ni ekɛsaa lɛ yɛ. Ni wɔ hu? Ekolɛ shitee kɛ woo fioo ko wɔná, tamɔ nɔ ni jɛ nanemɛi skulbii loo nitsulɔi adɛŋ. Akɛ nine eyi mɛi komɛi diɛŋtsɛ, tamɔ nɔ ni hefatalɔi loo fɔlɔi ni heee yeee feɔ. Shi kɛ̃lɛ yɛ shikpɔji pii anɔ lɛ, ákɛ aaawa Odasefonyo ko yi waa yɛ ehemɔkɛyeli hewɔ lɛ ji nɔ ko ni ekaaa aloo naakpɛɛ sane. Enɛ baaha efee mɔ ni esako ehe tsɔ̃ kɛhako yiwaa ni mli wa, ni enɛ baaha ‘ekpale kɛya’ kɛ eba enɔ nakai. Nyɛhaa wɔbia akɛ, “Ani yɛ be mli ni mihi shi yɛ miishɛɛ mli sɛɛ lɛ, kɛ awo mihe gbeyei waa, tamɔ ãkɛ, mishĩa kɛ minitsumɔ baaje midɛŋ aloo minaŋ miweku lɛ dɔŋŋ, aloo aaawo mi tsuŋ ni aaayi mi diɛŋtsɛ lɛ, ani enɛ baaka mi koni ‘mikpale kɛya sɛɛ?’”
8. Mɛɛ ŋaawoo ni kɔɔ bɔ ni wɔɔfee wɔdamɔ yiwaa naa Hebribii kɛhaa wɔ?
8 Yɛ be mli ni ewieɔ hemɔkɛyeli ni esa akɛ wɔjie lɛ kpo yɛ be mli ni wɔyɔɔ haomɔ shishi lɛ he lɛ, Paulo wo wɔ hewalɛ ni wɔtɛje wɔhiɛ wɔkwɛ bɔ ni Yesu to etsui shi lɛ. (Hebribii 12:2, 3) Kɛkɛ ni Paulo kai wɔ akɛ kɛji akɛ yiwaa ni mli wa waa te shi lɛ, esa akɛ wɔbu enɛ akɛ tsɔsemɔ ko ni sɛɛnamɔ yɔɔ he. Shi jeee Nyɔŋmɔ ji mɔ ni kɛ yiwaa lɛ baa moŋ; eeŋmɛ enɛ gbɛ kɛkɛ. Kɛ̃lɛ, yiwaa baanyɛ atsɔse wɔ aloo eye ebua wɔ ni wɔya wɔhiɛ yɛ Kristofoi asubaŋi ni he hiaa lɛ amli, tamɔ tsuishiŋmɛɛ, anɔkwayeli kɛ he ni akɛaafɔ Yehowa he.—Hebribii 12:4-11; Yakobo 1:2-4.
9. (a) Te wɔfeɔ tɛŋŋ wɔleɔ akɛ adesai ni yeee emuu baanyɛ adamɔ yiwaa naa? (b) Mɛni ba nyɛmiina yei komɛi anɔ yɛ kɔmunist shikpɔŋ ko nɔ yɛ 1960 afii lɛ amli?
9 Bɔni afee ni wɔkanu he akɛ gbɔmɔ ni yeɔ emuu lɛ pɛ baanyɛ amia ehiɛ loo eŋmɛ etsui shi lɛ, Hebribii lɛ wieɔ hii kɛ yei ni yeee emuu tamɔ wɔ ni tsɔ hemɔkɛyeli nɔ amɛto loo amɛŋmɛ amɛtsui shi lɛ ahe. (Hebribii 11:35-40; 12:1) Akɛ mɛi komɛi efata “odasefoi babaoo ni . . . tamɔ atatu” ni tsɔ hemɔkɛyeli nɔ amɛŋmɛ amɛtsui shi lɛ ahe yɛ ŋmɛnɛŋmɛnɛ beaŋ. Yɛ August 1982 mli lɛ, Swiss wolo tɛtrɛɛ ko ŋma sane ko ni kɔɔ niiashikpamɔ ko ni yoo ko kɛ Yehowa Odasefoi ná yɛ be mli ni awo amɛ tsuŋ yɛ yei tsuji aŋsraŋ yɛ komunist shikpɔŋ ko nɔ afii nyɔŋmai abɔ ko ni eho nɛ lɛ he. Agugui ni yɔɔ yoo nɛɛ wiemɔi lɛ amli lɛ ekomɛi nɛ:
Sɔlemɔi wuji loo nɔ ni amɛmlibii fa lɛ pɛ naa heyeli fioo ko ejaakɛ amɛshiɛɔ nɔ ni Maŋ loo Nɔyeli lɛ ŋmɛɔ gbɛ lɛ. Etamɔɔɔ nakai yɛ hemɔkɛyelii bibii ni kpeɔ yɛ shiai amli lɛ gbɛfaŋ. Mɛi ni awaa amɛ yi waa fe fɛɛ ji Yehowa Odasefoi. Awo Odasefoi pii ni ana Buu-Mɔɔ lɛ yɛ amɛshiai amli lɛ tsuŋ afii 10. Belɛ abaanyɛ anu nɔ hewɔ ni gboklɛfoi anɔkwɛlɔi lɛ amli woɔ la waa akɛni Odasefoi lɛ anine shɛɔ woji babaoo anɔ lolo yɛ gbɛ ko nɔ lɛ shishi. Ajieɔ gboklɛfoi lɛ atadei fɛɛ kɛjɛɔ amɛhe ni eshwɛɛɛ nɔ ko koni akɛtao nɔ ni amɛkɛto, ni akwɛɔ amɛ atadei lɛ fɛɛ mli fitsofitso kɛ kpãai ni akɛloloi lɛ po. Agbɛnɛ hu bulɔi ni hiɛ tũi kwɛɔ gboklɛfonyo fɛɛ gboklɛfonyo ni tsuɔ nii yɛ ŋmɔshi lɛ nɔ, ni kɛ amɛku amɛsɛɛ kɛmiiba lɛ akwɛɔ amɛ nɔ fɛɛ nɔ mli ekoŋŋ yɛ agbo lɛ naa. Shi kɛ̃lɛ woji lɛ miiba lolo. Etamɔ nɔ ni ŋwɛibɔfoi filikiɔ gbɛkɛ ni amɛŋmɛɛɔ he amɛshwieɔ shi. Odasefoi lɛ ateŋ mɛi ni fa ji obalayei bibii. Klɛŋklɛŋ tsuŋwoo lɛ baafee kɛjɛ afii 5 kɛyashi 7, ni kɛ hoo lɛ tsuŋwoo ni ji shii enyɔ lɛ shɛɔ afii 10. Odasefoi lɛ ji mɛi ni amɛnii yɔɔ mɔbɔ fe fɛɛ yɛ ŋsra lɛŋ. Kɛ amɛteŋ mɛi ni fa fe etɛ̃ kpe lɛ, afãa amɛ koni amɛgbala mli.
10. Hebribii yeɔ ebuaa wɔ kɛshɛɔ mɛɛ faishitswaa he yɛ yiwaa he?
10 Hebribii lɛ wie yɛ blema hemɔkɛyeli he nɔkwɛmɔ nii yɛ yiwaa shishi lɛ ahe akɛ “mɛi ni je nɛŋ esaaa amɛ,” shi Yehowa baakwɛ ni eha ‘amɛye emuu’ yɛ shikpɔŋ nɔ Paradeiso lɛ mli. Namɔ baanyɛ abi babaoo? No hewɔ lɛ nyɛhaa wɔkɛ blema kɛ ŋmɛnɛŋmɛnɛ beaŋ hemɔkɛyeli he nɔkwɛmɔ nii lɛ atoa wɔtsui mli. Ni ‘wɔɔkpale kɛya hiɛkpatamɔ mli’ moŋ lɛ, esa akɛ wɔtswa wɔfai shi akɛ “wɔji mɛi ni kɛ hemɔkɛyeli naa amɛsusuma yiwalaheremɔ lɛ ateŋ mɛi komɛi.”—Hebribii 11:38, 40; 10:39.
Nyɛkahaa “Wɔkpalea Kɛyaa Sɛɛ”
11. Yɛ mɛɛ gbɛ nɔ ‘kpalaŋmɔ kɛmiiya sɛɛ’ baanyɛ afee oshara aha mɔ ni ehi shi akɛ Kristofonyo yɛ be saŋŋ mli?
11 Taakɛ Hebribii lɛ tsɔɔ lɛ, oshara kroko ji ‘kpalaŋmɔ kɛmiiya sɛɛ.’ (Hebribii 2:1) Susumɔ bɔ ni enɛ baanyɛ aba lɛ he okwɛ. Mɔ ko—ebaanyɛ efee wɔteŋ mɔ ko—batsɔ Kristofonyo ni yɔɔ miishɛɛ kɛ ekaa babaoo. Ekɛ ehe wo sɔɔmɔ nitsumɔ lɛ mli amrɔ nɔŋŋ eyɛ mli akɛ Biblia mli nilee ni eyɔɔ lɛ faaa.. (Bɔfoi lɛ Asaji 3:1-9; 8:39; 13:48, 49) Yɛ afii komɛi asɛɛ lɛ, esa akɛ miishɛɛ ni ena lɛ aha eda kɛya ekãa kɛ hetuu-kɛhamɔ ni mli kwɔ mli. Ani éfee nakai? Ani esusuɔ Kristofoi asɔɔmɔ lɛ he akɛ nɔ ni ebaatsɔ nɔ ejie esuɔmɔ kpo etsɔɔ Nyɔŋmɔ ni eye ebua mɛi krokomɛi, taakɛ aye abua lɛ lɛ? Aloo ebatsɔ nitsumɔ ko ni ka shi ni esa akɛ atsu, nitsumɔ ni wa ni asumɔɔɔ akɛ atsuɔ? Kɛji akɛ eyɛ gbekɛbii lɛ ani ekɛ miishɛɛ woɔ amɛ hewalɛ yɛ be fɛɛ mli ni amɛtsɔmɔ be fɛɛ sɔɔlɔi? Aloo etsiɔ ta fioo ko kɛfoɔ sanegbaa mli kɛkɛ ni hewalɛwoo ko bɛ mli, fe bɔ ni ewieɔ skul kpakpa ni amɛaana amɛya, kɛ nitsumɔ ni nyɔmɔwoo fa yɛ mli kɛ shia kpakpa ni amɛaana ni amɛhi mli lɛ he?—Kpojiemɔ 2:4.
12. (a) Mɛni Hebribii jieɔ yi ehaa wɔ koni wɔkwa ‘kpalaŋmɔ kɛmiiya sɛɛ’? (b) Mɛɛ sanebimɔi wɔbaanyɛ wɔsusu he yɛ toiboo ni wɔfeɔ wɔhaa Wiemɔ lɛ he?
12 Gbɛ ni baaha wɔkwa ‘kpalaŋmɔ kɛmiiya sɛɛ’ ji ni ‘wɔmɔ nii ni wɔnu lɛ mli ni awa.’ (Hebribii 2:1) Hebri Kristofoi lɛ ateŋ mɛi komɛi nyɛɛɛ afee enɛ. Yɛ be mli ni amɛkase “Kristo shishijee saji lɛ,” amɛfooo ‘mli kɛyaaa dalɛ mli.’ Yɛ be mli ni ‘kulɛ esa akɛ amɛtsɔmɔ tsɔɔlɔi’ lɛ, amɛka he amɛyɛ shishijee nibii lɛ anɔ lolo. (Hebribii 5:12–6:2) Ni wɔ hu? Ani “wɔnyiɛ kɛkɛ ni wɔkɛ wɔhe wooo nɔ ko mli,” aloo wɔmiishwere kɛmiiya hiɛ yɛ teemɔŋ nikasemɔ ni wɔfeɔ lɛ hewɔ? Ani wɔbɔɔ mɔdɛŋ ni wɔkane Biblia lɛ fa ko daa gbii. Ani wɔkɛ miishɛɛ diɛŋtsɛ kaseɔ Kristofoi awoji, ni wɔkɛ mɛi krokomɛi po gbaa nibii heei ni wɔkaseɔ lɛ he sane? Ani wɔmiiye wɔbua wɔbii koni amɛshwere kɛya hiɛ kɛteke ‘Wiemɔ lɛ mli fufɔ’ lɛ? Ani amɛbaanyɛ amɛjɛ Biblia lɛ mli amɛtsɔɔ anɔkwale ni kɔɔ susuma lɛ, gbohiiashitee, Triniti, Paradeiso shikpɔŋ, kɛ ekrokomɛi ahe lɛ mli? Ani amɛmiifee nakai yɛ shiɛmɔ mli, ni jeee bɔ ni amɛji nyɛsɛɛ afi lɛ nɔŋŋ amɛka he amɛji bianɛ?—1 Petro 3:15.
13. Mɛɛ nɔkwɛmɔ nɔ wɔnyɛmimɛi yei ni awo amɛ tsuŋ lɛ fee yɛ nikasemɔ he amɛha wɔ, ni mɛni no tsɔɔ kɛha wɔ?
13 Wolo ni aŋma lɛ tee nɔ ewie Odasefoi ni awo amɛ tsuŋ lɛ ahe akɛ:
Kɛ amɛná be fioo ko lɛ, amɛkaseɔ Biblia mli wiemɔi amɛwoɔ amɛyitsoŋ. Agbɛnɛ amɛkaseɔ maŋsɛɛ wiemɔi, titri Iɛ Ŋleshi, French kɛ German. Yɛ bei komɛi amli lɛ woji ni amɛnine shɛɔ nɔ lɛ yɛ nɛkɛ wiemɔi nɛɛ amli, ni mɛi ni nyɛɔ amɛkaseɔ lɛ tsɔɔ shishi amɛhaa amɛnyɛmimɛi yei krokomɛi lɛ.
Eyɛ mli akɛ wɔteŋ mɛi fioo ko pɛ anyɛɔ wɔ nɔ ni wɔkɛ ŋmlɛtswaa babaoo atsu nii ni niyenii ni wɔbaaye lɛ faaa moŋ, shi ani wɔkɛ be ni wɔ diɛŋtsɛ wɔyɔɔ lɛ miitsu nii babaoo koni “wɔmɔ nii ni wɔnu lɛ mli ni awa”?
‘Kaagbee Shi’
14. Mɛni baanyɛ aba mɛi ni amɛhi shi akɛ Kristofoi yɛ be kakadaŋŋ mli lɛ po nɔ?
14 Yɛ be mli ni ewo wɔ hewalɛ ni wɔya nɔ wɔshwere sɛɛ lɛ, Hebribii lɛ bɔɔ kɔkɔ akɛ “mɛi ni la etso amɛnɔ pɛŋ” lɛ baanyɛ ‘agbee shi,’ kɛyashɛ he ni ekolɛ amɛnyɛŋ amɛtsake dɔŋŋ. (Hebribii 6:4-8) Hɛɛ, nɔ ko ni kaa mɔ ni yɔɔ ŋmɛnɛŋmɛnɛ gbɛjianɔtoo nɛɛ mli baanyɛ agbala Kristofoi ni amɛjɛ jeeŋmɔ amɛsɔmɔ Nyɔŋmɔ, mɛi ni afɔ amɛ mu lɛ po, “ni amɛna mumɔ krɔŋkrɔŋ lɛ eko” lɛ.
15. Yɛ mɛɛ gbɛ nɔ mɛi komɛi egbee shi yɛ bɔlɛnamɔ kɛ heloo gbɛfaŋ nitsumɔi amli?
15 Mɛi komɛi egbee shi kɛtsɔ helooŋ akɔnɔ aloo jeŋ ninamɔ sɛɛdii hewɔ. (1 Yohane 2:16) Shi bɔlɛnamɔ he akɔnɔ hu fata he, yɛ be mli ni obalaŋtai ŋmɛɛɔ amɛhe amɛhaa bɔlɛnamɔ ni tsɔɔ gbalashihilɛ hiɛ lɛ. Shi susumɔ sane kroko ni kɔɔ enɛ he lɛ he. Mɛi komɛi yɛ ni amɛgbalashihilɛ mli hefatalɔi kɛ shihilɛ etɔ amɛ, ni amɛkɛ mɔ kroko ni tamɔ mɔ ni he yɔɔ fɛo kɛ akɔnɔ, ni kɛ sanegbaa ŋɔɔ aloo eyɛ nii babaoo yɛ je lɛ mli ekpe. Nɔ ni yɔɔ awerɛho ji akɛ, enɛ kɛ gbalafitemɔ eba ni amɛtsɔ jeŋba shara gbɛ nɛɛ nɔ amɛkɛ mɛi ni tamɔ nakai Iɛ ebote gbalashihilɛ mli. Mɛi komɛi “gbee shi” yɛ heloo gbɛfaŋ nibii asɛɛdii hewɔ, ágbala amɛ awo nitsumɔ mli nifeemɔi komɛi ni etsɔɔɔ anɔkwayeli aloo ni akuɔ hiɛ ashwieɔ nɔyeli lɛ mla kɛ tooyeli he taomɔ nii komɛi anɔ lɛ amli. (Mateo 22:21) Amɛtoɔ shikataomɔ nitsumɔi babaoo he gbɛjianɔ, aloo gbɛjianɔtooi ni atsɔɔ nɔ akɛnaa shika oyayaayai ni kaa gbɔmɛi ni haa amɛkɛ hiɛjoomɔ heɔ amɛnyɛmimɛi ashika kɛjɛɔ amɛdɛŋ (Okɛto Bɔfoi lɛ Asaji 20:33; 2 Tesalonikabii 3:10:11 he.) Yɛ Maŋtsɛyeli lɛ he nibii ni enɛɛmɛi haa nɔ lɛ sɛɛ lɛ, nitsumɔi nɛɛ kɛ mlifu kɛ béi baa yɛ be babaoo mli, kɛ naafolɔmɔ po akɛ mɔ ko eshishiu enyɛmi yɛ mli. Ana Biblia lɛ akɛ emli wiemɔ ji anɔkwale: “Mɛi ni taoɔ nii pii ana Iɛ gbeeɔ kaa kɛ tsɔne . . . mli.”—1 Timoteo 6:9.
16. Mɛɛ nɔkwɛmɔ nɔ kpakpa nyɛmimɛi yei ni awo amɛ tsuŋ yɛ kaai ni amɛnyɛ amɛdamɔ naa lɛ mli?
16 Kɛji akɛ wɔkɛ heshibaa kpɛlɛ nɔ akɛ wɔhe waaa tsɔ ni wɔbaanyɛ wɔgbee shi lɛ, belɛ esa akɛ wɔtswa wɔfai shi akɛ wɔŋmɛŋ he wɔhaŋ kaai kɛ esha ni jeɔ shishi lɛ. (Romabii 12:3; 1 Korintobii 10:12) Nyɛmimɛi yei ni yɔɔ gboklɛfoi aŋsraŋ Iɛ kɛ nɔkwɛmɔ nɔ kpakpa haa wɔ:
Aŋɔ amɛ, mɔ kome mɔ kome, kɛtee maŋ wulu ko mli he ni shwapoi, sinii kɛ hiɛtserɛjiemɔhei yɔɔ. Ákɛ nɔkwɛmɔ nɔ lɛ, teemɔŋ polisifoi lɛ ateŋ mɛi enyɔ kɛ nyɛmiyoo ko tee shwapo ko mli yɛ he ni ahɔ̃ɔ niyenii sɔrɔtoi babaoo yɛ. Amɛkɛɛ lɛ akɛ, ‘Halamɔ nɔ ni osumɔɔ.’ Nyɛmiyoo lɛ kɛɛ amɛ akɛ nɔ ko he ehiaaa lɛ. Eji nii ni kɛ ehe kpaaa gbee ákɛ akɛ bodobodo kɛ daaŋjiemɔ nibii sɔrɔtoi ni ashã amɛ ehee aaatsɔɔ mɔ ko ni etɔ lɛ ni eyeko nɔ ko kpakpa ko afii pii nɛ. Aka lɛ yɛ gbɛi krokomɛi anɔ lɛ shwapoi krokomɛi amli kɛ hiɛtserɛjiemɔhei lɛ. Eyɛ mli akɛ amɛha ehi jɛmɛ otsii fioo ko, kɛ shiwoo akɛ amɛbaaha eye ehe kɛ ekwa ehemɔkɛyeli lɛ, shi nɔ ko jɛɛɛ mli baaa haaa amɛ. Amɛnyɛ amɛkumɔ aloo amɛyɛ nyɛmiyoo kome pɛ nɔ kunim. Nyɔji komɛi esɛɛ lɛ, yoo nɛɛ ba nsra lɛŋ, eshwi ni ewo atade fɛfɛo. Ekɛ ŋmlɛtswaai enyɔ wie tsɔɔ etsutsu nyɛmimɛi lɛ, shi amɛfooo edaaŋ ni amɛnaaa lɛ hu. Eka shi faŋŋ akɛ teemɔŋ polisifoi lɛ susu akɛ enɛ ji ŋaa gbɛ ni hi jogbaŋŋ ni amɛaatsɔ nɔ koni nyɛmimɛi yei Iɛ anyiɛ esɛɛ ni amɛkwa amɛhemɔkɛyeli lɛ. Nɔ ni amɛkpaa gbɛ lɛ baaa mli.
17. Te esa akɛ wɔnu kaai ni wɔkɛkpeɔ lɛ ahe wɔha tɛŋŋ?
17 Ani onuɔ he akɛ kulɛ obaanyɛ ohiɛ ofai shi ni otswa lɛ mli yɛ nakai kaai lɛ ashishi? Shi kaai ni okɛkpeɔ lɛ hu? Paulo ŋma akɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ hiɛkalɔ lɛ he; shi moŋ nyɛwiea nyɛtsɔɔtsɔɔa nyɛhe gbi fɛɛ gbi ni atsɛɔ lɛ ŋmɛnɛ lɛ, koni akɛ esha shishiumɔ lɛ akawaje nyɛteŋ mɔ ko.” (Hebribii 8:12, 13) Bɔni afee ni wɔkwa shigbeemɔ aloo kpalaŋmɔ kɛmiiya sɛɛ lɛ, ehe miihia ni wɔjwɛŋ “ŋmɛnɛ” he.
Hemɔkɛyeli Ni Wɔɔjie Lɛ Kpo “Ŋmɛnɛ”
18. Mɛni hewɔ Israelbii lɛ nyɛɛɛ abote Nyɔŋmɔ hejɔɔmɔ mli lɛ?
18 Paulo kɛ ewiemɔ ni kɔɔ “ŋmɛnɛ” he lɛ damɔ wiemɔ ni etsɛ kɛjɛ Lala 95:7-11 lɛ nɔ. (Hebribii 3:7-11) Taakɛ sane lɛ tsi ta lɛ, Israelbii lɛ waje amɛtsui yɛ Mose gbii lɛ amli. Israelbii lɛ jie hemɔkɛyeli ni amɛbɛ kpo amɛtsɔɔ yɛ be mli ni amɛnu amaniɛ ni Yoshua kɛ Kaleb bɔ yɛ Shiwoo Shikpɔŋ lɛ he lɛ. (4 Mose 13:17–14:38) Eyɛ mli akɛ amɛbaanyɛ amɛna toiŋjɔlɛ kɛ jɔɔmɔi yɛ Nyɔŋmɔ hejɔɔmɔ gbi ni yaa nɔ lɛ mli moŋ, shi Israelbii lɛ kɛ tsuiwalɛ kɛ hemɔkɛyeli ni bɛ kpoo akɛ amɛaaya shikpɔŋ lɛ nɔ ni amɛyahi jɛmɛ. No hewɔ lɛ Nyɔŋmɔ ha amɛtsomlo yɛ ŋa lɛ nɔ afii 40.—Hebribii 3:17-19.
19. Mɛɛ be ni yɛ mɛɛ gbɛ nɔ wɔbaanyɛ wɔbote Yehowa hejɔɔmɔ lɛ mli?
19 Nyɔŋmɔ Hejɔɔmɔ Gbi wulu lɛ, aloo gbi ni ekɛjɔɔ ehe lɛ miiya nɔ lolo. (1 Mose 1:31–2:3) Paulo ŋma akɛ “ashi ehejɔɔmɔ Iɛ mlibotemɔ he shiwoo aha wɔ,” (Hebribii 4:1, 9) No hewɔ lɛ wɔ, ni ji Kristofoi lɛ baanyɛ abote aloo wɔhi nakai “hejɔɔmɔ” lɛ mli agbɛnɛ. Yɛ mɛɛ gbɛ nɔ? Kɛtsɔ hemɔkɛyeli kpojiemɔ nɔ, jeee yɛ blema bei amli Yoshua lɛ mli, shi yɛ Yoshua Kpeteŋkpele lɛ, wɔhiɛnyiɛlɔ Yesu mli. Ehe miihia hu ni wɔkpa nitsumɔi ni tsɔɔ hemɔkɛyeli ni wɔbɛ lɛ, tamɔ nɔ ni gbɔmɛi ni heee yeee diɛŋtsɛ akɛ Gbɛjianɔtoo Hee ko baaba lɛ jieɔ lɛ kpo lɛ. Amɛtswa amɛshihilɛ amɛbɔle hiɛtserɛjiemɔ loo miishɛɛnamɔ he. Amɛmiisumɔ ni amɛtsɔ “mɔ ko,” tamɔ kɛtsɔ gbɛhe loo sabala ko ni amɛaana nɔ. Aloo amɛbaatiu jeŋ nilee ko ni tsɔɔ akɛ amɛji gbɔmɛi “kpakpai” lɛ sɛɛ.
20, 21. (a) Mɛɛ nitsumɔ ehe hiaa ni wɔkwa? (b) Mɛɛ nitsumɔ kpakpa esa akɛ wɔkɛ wɔhe awo mli, taakɛ nyɛmimɛi yei ni awo amɛ tsuŋ lɛ fee he nɔkwɛmɔ nɔ lɛ?
20 Kɛ wɔyɛ hemɔkɛyeli yɛ Yesu kɛ nɔ ni ka Yehowa webii ahiɛ lɛ mli lɛ, esa akɛ wɔtsɔ wɔnitsumɔi anɔ wɔtsɔɔ akɛ nakai eji. Paulo ŋma akɛ: “Mɔ ni ebote [Nyɔŋmɔ] ehejɔɔmɔ lɛ mli lɛ, lɛ diɛŋtsɛ hu ejɔɔ ehe kɛjɛ enitsumɔi lɛ amli.” (Hebribii 4:10) No hewɔ lɛ ni akɛ he aaawo nitsumɔi ni tsɔɔ hemɔkɛyeli ni abɛ mli aloo nɔ ni mɔ ko bɔɔ mɔdɛŋ ni ebu lɛ diɛŋtsɛ ehe bem yɛ mli lɛ mli lɛ, esa akɛ wɔna nitsumɔi ni jieɔ wɔhemɔkɛyeli lɛ kpo.
21 Kristofoi anitsumɔ titri ji Yehowa Nyɔŋmɔ kɛ e-Bi lɛ he wiemɔ. Paulo wo hewalɛ yɛ Yesu he akɛ: “Nyɛhaa wɔmɔa jajemɔ [ni wɔjajeɔ lɛ] lɛ mli ni awaa.” (Hebribii 4:14) Wɔbaanyɛ, ni esa akɛ wɔfee nakai yɛ Kristofoi akpeei ashishi yɛ be mli ni wɔjajeɔ wɔhiɛnɔkamɔ yɛ faŋŋ mli yɛ jɛmɛ lɛ. (Hebribii 10:23-25) Shi nɔ ni esa akɛ efata ‘wɔhiɛnɔkamɔ jajemɔ yɛ faŋŋ mli’ lɛ he ji wɔhemɔkɛyelii kɛ hiɛnɔkamɔ ni wɔɔjaje wɔtsɔɔ mɛi ni yɔɔ sɛɛ lɛ. Yɛ anɔkwale mli Iɛ esa akɛ wɔnu he akɛ nɔ ko miitsirɛ wɔ ni “wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ [Nyɔŋmɔ] gbɛi lɛ ayibii lɛ.” (Hebribii 13:15; 1 Korintobii 9:16) Mɔ ni ŋma niiashikpamɔ ni wɔtsɔ hiɛ wɔtsi ta lɛ gbaa wɔ sane ko ni tee nɔ yɛ ekɛ nyɛmiyoo ko teŋ:
Mikɛɛ akɛ nɔyelɔi lɛ kɛ nyɛ fɛɛ miiwo kpabuŋ, jeee yɛ nyɛhemɔkɛyeli hewɔ, shi moŋ yɛ mɛi krokomɛi ni nyɛshiɛɔ nyɛtsɔɔ amɛ lɛ hewɔ. Kɛ nyɛaata shi kpoo yɛ shia ni nyɛaasɔle lɛ, mɔ ko mɔ ko leŋ. Obalayoo lɛ ha hetoo akɛ, ‘Eji anɔkwale, shi gbɛnaa nii ni ka wɔnɔ ji akɛ wɔwie wɔtsɔɔ mɛi krokomɛi ni wɔna nyɛmimɛi hii kɛ yei heei. Wɔnyɛŋ wɔsumɔ wɔpɛ wɔhe ni wɔsaa wɔhe wɔha wɔkome wɔshihilɛ yɛ shikpɔŋ nɔ yɛ afii akpe lɛ mli. Esa akɛ mɛi fɛɛ ale bɔ ni shihilɛ baatamɔ yɛ nakai be Iɛ mli.
22. Mɛɛ nɔkpɛlɛmɔ loo yiŋtsɔmɔ ni damɔ Hebribii anɔ oná?
22 Obaanyɛ ona akɛ sane oti ni yɔɔ Hebribii ji ákɛ, “esa akɛ wɔbɔ mɔdɛŋ ni wɔbote nakai [Nyɔŋmɔ] hejɔɔmɔ lɛ mli ni mɔ ko akanyiɛ nakai toigbele okadi lɛ sɛɛ ni egbee shi.” (Hebribii 4:11) Wɔtsui baanyɛ anyɔ wɔmli waa diɛŋtsɛ yɛ nakai hejɔɔmɔ lɛ mli ni wɔyɔɔ bianɛ lɛ hewɔ, kɛ agbɛnɛ hiɛnɔkamɔ ni ama nɔ mi akɛ wɔbaaya nɔ wɔhi shi yɛ mli yɛ be mli ni mɛi fɛɛ ni yɔɔ wala mli yɛ shikpɔŋ nɔ lɛ jaa Nyɔŋmɔ lɛ. Ŋwanejee ko bɛ suɔmɔ ni Yehowa yɔɔ akɛ eeejɔɔ ni ehaa mɛi ni tsɔɔ hemɔkɛyeli kɛ toiboo nɔ amɛboteɔ ehejɔɔmɔ lɛ mli bianɛ lɛ ayi lɛ he. Lɛ ji “mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:6) Kɛ sane ko yɛ lɛ, belɛ eji nɔ ni kɔɔ wɔhe. Shi ehe ehiaaa ni sane ko ahi wɔhe. Wɔbaanyɛ wɔtsɔ wɔhemɔkɛyeli kɛ tsuishiŋmɛɛ, kɛ Nyɔŋmɔ yelikɛbuamɔ nɔ “wɔkɛmɔ nɔhiɛkamɔ ni ka wɔhiɛ lɛ mli.”—Hebribii 6:18.a
[Shishigbɛ niŋmai]
a (Ajie kɛjɛ February 15, 1983 Blɔfo Buu-Mɔɔ lɛ mli)
□ Mɛɛ ŋaawoo loo nikasemɔ krɛdɛɛ ko ona kɛjɛ Hebribii Awolo lɛ mli?
□ Te ooofee tɛŋŋ ona nyɛmimɛi yei komɛi ni awo amɛ tsuŋ lɛ anɔkwɛmɔ nɔ lɛ he sɛɛ?
□ Hebribii 2:1 woɔ bo hewalɛ ni ofee mɛni koni okakpalaŋ kɛmiiya sɛɛ?
□ Te ooofee tɛŋŋ obote Nyɔŋmɔ hejɔɔmɔ lɛ mli?
[Nikasemɔ lɛ he Sanebimɔi]
[Wiemɔ ni akɔ ni akɛmiitsu nii ni yɔɔ baafa 18]
Awo Odasefoi pii ni ana Buu-Mɔɔ lɛ yɛ amɛshiai amli lɛ tsuŋ afii 10
[Wiemɔ ni akɔ ni akɛmiitsu nii ni yɔɔ baafa 19]
Odasefoi Iɛ ji mɛi ni amɛnii yɔɔ mɔbɔ fe fɛɛ yɛ ŋsra lɛŋ. Kɛ amɛteŋ mɛi ni fa fe etɛ̃ kpe lɛ, afãa amɛ koni amɛgbála mli
[Mfoniri ni yɔɔ baafa 21]
Israelbii lɛ nu Yoshua kɛ Kaleb amaniɛbɔɔ lɛ, shi amɛheee amɛyeee. No hewɔ lɛ amɛnyɛɛɛ amɛbote Nyɔŋmɔ hejɔɔmɔ lɛ mli yɛ Shiwoo Shikpɔŋ lɛ nɔ