Yɛ Be Mli Ni Jeŋ Amanehulu Bɛŋkɛɔ Lɛ—‘Nyɛtɛjea Nyɛhiɛ Nyɛkwɛa Yesu’
“Anyɛmimɛi krɔŋkrɔŋi . . . nyɛtɛjea nyɛhiɛ nyɛkwɛa wɔhemɔkɛyeli jajemɔ lɛ he bɔfo kɛ osɔfonukpa ni ji Kristo Yesu lɛ.”—HEBRIBII 3:1.
1, 2. Te wɔɔfee tɛŋŋ wɔna blema amanehulu ko ni ba ni akaiɔ yɛ Roma lɛ he sɛɛ?
1 OBAANYƐ ona amanehulu ko he odaseyeli diɛŋtsɛ yɛ Roma—Amanehulu ni esa akɛ ena hewalɛ waa yɛ oshihilɛ nɔ. Obaanyɛ ona Tito Agbó ni akɛkaiɔ kunim ni Tatsɛ Tito ye beni ekpata Yerusalem hiɛ yɛ afi 70 Ŋ.B. lɛ yɛ blema Roma gwabɔɔhe lɛ. Nitɛŋmɔ ni yɔɔ agbó lɛ nɔ lɛ tsɔɔ Yudafoi ni akɛ kɔsɔŋkɔsɔ efimɔ amɛ ni anyɛ amɛnɔ koni amɛtere ha nii kɛjɛ amɛmaŋtiase lɛ mli.
2 Akɛ Kristofoi lɛ, nakai amanehulu lɛ he baanyɛ aba sɛɛnamɔ aha wɔ kɛtsɔ Biblia mli ŋaawoo ni akɛha yɛ ebe naa pɛpɛɛpɛ ni eka shi faŋŋ akɛ aŋma aaafee afii nɛɛhu loo nɔ̃ dani nakai hiɛkpatamɔ lɛ ba lɛ mlipɛimɔ nɔ. Eyɛ Hebribii awolo lɛ mli, nɔ ni bɔfo Paulo ŋma eyaha Hebri Kristofoi ni yɔɔ Yerusalem kɛ Yudea lɛ.
3. Mɛni ha shihilɛ ni Hebri Kristofoi ni yɔɔ Yerusalem lɛ yɔɔ mli lɛ mli bawa lɛ?
3 No mli lɛ wɔnyɛmimɛi lɛ yɛ shihilɛ ko ni mli wa mli. Tsɛ, etamɔ nɔ ni Roma nɔyeli ni yeɔ Yudea nɔ lɛ yɛ shiŋŋ moŋ, shi Yudafoi lɛ ateŋ mɛi pii lɛ atuatselɔi ni. (Bɔfoi lɛ Asaji 5:36, 37) Bo lɛ susumɔ nɔnyɛɛ ni mli wa ni Yudafoi nɛɛ baanyɛ amɛkɛba Yesu sɛɛnyiɛlɔi, ni akɛni “amɛjɛɛɛ je lɛŋ” hewɔ lɛ amɛkɛ Yudafoi lɛ efeŋ ekome yɛ shi ni amɛteɔ amɛwoɔ Roma lɛ mli lɛ anɔ lɛ he okwɛ. (Yohane 17:16) Nɔ kroko ni ha awa Hebri Kristofoi lɛ ayi ji bɔ ni Yudafoi Iɛ nuɔ he akɛ amɛnɔ kwɔlɔ, akɛni Nyɔŋmɔ ehala amɛ, ekɛ amɛ ewo Mla kpaŋmɔ Iɛ mli ni ekɛ jamɔ ko ni kɔɔ Levi osɔfoi kɛ afɔleshãa sɔrɔtoi ahe eha amɛ lɛ hewɔ.
4. (a) Mɛni hewɔ abaanyɛ akɛɛ akɛ Yesu jie ehe kpo yɛ “jeŋbei lɛ anaagbee” lɛ? (b) Mɛni Yesu gba fɔ shi yɛ nakai naagbee lɛ he?
4 Shi Yudafoi abe lɛ—kɛ esɔlemɔwe afɔlei sɔrɔtoi ni ashãa, osɔfoi, gbijurɔyelii kɛ Hejɔɔmɔ Gbii—lɛ ba naagbee klɛŋklɛŋ yɛ Mesia lɛ afɔleshaa gbele lɛ sɛɛ. (Galatabii 3:24, 25; Kolosebii 2:13-17) No hewɔ Iɛ Paulo baanyɛ aŋma akɛ ajie Nyɔŋmɔ Bi lɛ kpo akɛ gbɔmɔ “shikome kɛkɛ . . . yɛ jeŋ bei lɛ anaagbee lɛ mli.” (Hebribii 9:26; 1:2) Etsɛŋ ni nakai naagbee lɛ baaje kpo faŋŋ ni anyɛŋ aje he ŋwane, kɛ sɔlemɔwe lɛ hiɛkpatamɔ. Beni Yesu gba nakai hiɛkpatamɔ lɛ efɔ shi lɛ, ekaselɔi lɛ bi akɛ: “Tsɔɔmɔ wɔ beyinɔ ni aaafee nii nɛɛ.” (Mateo 23:37-24-3) Yesu ha hetoo akɛ tai, hɔmɔ, shikpɔŋhosomɔi, tsɛŋemɔ helai baaba, ni abaashiɛ Maŋtsɛyeli lɛ he sane lɛ babaoo dani naagbee lɛ baaba. (Mateo 24:4-14; Luka 21:10, 11) Nakai wiemɔi lɛ ba mli anɔkwale yɛ yinɔ ni hi shi yɛ be mli ni Yesu kɛ nakai gbalɛ lɛ ha lɛ kɛ beni Paulo ŋma Hebribii lɛ mli lɛ anɔ. Kristo hu gba akɛ ‘amanehulu kpeteŋkpele ni anako eko ni tamɔ nakai kɛjɛ jeŋ shishijee baaba’ Yerusalem nɔ. (Mateo 24:21) Hiɛkpatamɔ amanehulu ni ba Yerusalem nɔ yɛ afi 70 Ŋ.B. lɛ eko bako ni tamɔ nakai dã ni anyɛŋ ati mli yɛ nakai maŋ lɛ nɔ dɔŋŋ. Shi kɛ̃lɛ, eji emlibaa bibioo. Mɛni hewɔ? Ejaakɛ “amanehulu kpeteŋkpele” kɛha adesai aje lɛ fɛɛ baaba yɛ wɔsɛɛ ni yɔɔ shɔŋŋ lɛ mli.
5. Te feɔ tɛŋŋ ni “amanehulu kpeteŋkpele” ni da kwraa yɛ ni baaba lolo lɛ?
5 Anɔkwasaji lɛ yeɔ he odase akɛ Yesu gbalɛ wiemɔi lɛ yɛ emlibaa titri ni da yɛ “beni eba lɛ kɛ nibii agbɛjianɔtoo lɛ naagbee” mli. (Mateo 24:3) Kpojiemɔ yitso 6, ni aŋma afii nyɔŋmai abɔ yɛ Yerusalem hiɛkpatamɔ lɛ sɛɛ lɛ hu gba, ta, hɔmɔ kɛ hela. Enɛ baaba he ni da fe Yudea nɔ, ejaakɛ Kpojiemɔ kɛɛ akɛ ta lɛ “baajie toiŋjɔlɛ kɛjɛ shikpɔŋ lɛ nɔ.” (Kpojiemɔ 6:4) Nibii ni ba yɛ jeŋ fɛɛ kɛjɛ Jeŋ Ta I yɛ 1914 kɛbashi 1918 lɛ tsɔɔ akɛ ŋmɛnɛŋmɛnɛ yiwalɛ nibii gbɛjianɔtoo nɛɛ naagbee ni baaba naagbee kwraa kɛ “amanehulu kpeteŋkpele” lɛ mli wɔyɔɔ nɛɛ. Amanehulu nɛɛ baajie efɔŋfeemɔ kɛjɛ shikpɔŋ lɛ nɔ, ni egbá gbɛ kɛha Paradeiso yɛ Nyɔŋmɔ Maŋtsɛyeli lɛ nɔyeli shishi.
6. Mɛni tsɔɔ akɛ aŋma Hebribii awolo lɛ yɛ wɔbe nɛɛ hewɔ?
6 Hebribii awolo lɛ gbalaa jwɛŋmɔ kɛbaa wɔbe nɛɛ nɔ. Emli ni Paulo ŋma yɛ akɛ Kristo yɛ ŋwɛi, ni “eemɛ kɛyashi beyinɔ ni aaaŋɔ ehenyɛlɔi lɛ afee enajiashi maaŋoo.” (Hebribii 10:13) Wolo lɛ hu wieɔ be mli ni [Nyɔŋmɔ] kɛ kromɔbi lɛ aaaba je nɛɛ mli ekoŋŋ”a lɛ he. (Hebribii 1:6) No ji bianɛ! Odaseyeli lɛ tsɔɔ akɛ Kristo nine eshɛ maŋtsɛyeli nɔyeli nɔ ni ete shi ewo Nyɔŋmɔ henyɛlɔi ni yɔɔ ŋwɛi lɛ. (Kpojiemɔ 12:7-12) Kristo egbala ejwɛŋmɔ kɛba shikpɔŋ ni gbɔmɛi yɔɔ nɔ lɛ nɔ, eba shi anaaa lɛ. No hewɔ lɛ taakɛ Yesu gba fɔ shi lɛ, etsɛŋ ni wɔkɛ be mli ni Nyɔŋmɔ baajie ehenyɛlɔi fɛɛ kɛjɛ shikpɔŋ lɛ nɔ yɛ naagbee kwraa lɛ baakpe. Belɛ mɛɛ ŋaawoo Hebribii lɛ yɔɔ kɛha wɔ mɔ?
‘Nyɛtɛjea Nyɛhe Nyɛkwɛa Yesu’
7, 8. Mɛni hewɔ Hebribii lɛ gbala jwɛŋmɔ kɛtee Yesu nɔ yɛ gbɛ sa nɔ lɛ?
7 Paulo je gbɛ egbala jwɛŋmɔ kɛtee Yesu nɔ titri. Eŋma akɛ: “Shi nii ni wɔwieɔ lɛ ayitso nɛ: Nɛkɛ osɔfonukpa wɔyɔɔ, mɔ ni ta hewalɔ agbo lɛ maŋtsɛsɛi lɛ ninejurɔ nɔ yɛ ŋwɛi.”‘ (Hebribii 8:1) Mɛni hewɔ enɛ ji ŋaawo ni sa jogbaŋŋ kɛha Kristofoi ni yɔɔ shihilɛ mli yɛ nibii agbɛjianɔtoo ko naagbee be mli lɛ?
8 Jwɛŋmɔ ni ejaaa ni ahiɛ yɛ Yesu he lɛ ehi shi yɛ be kakadaŋŋ mli. Klɛŋklɛŋ afii oha lɛ mli Yudafoi lɛ wóɔ amɛhe nɔ akɛni amɛjɛ Abraham mli, amɛtsu jamɔ ko ni akɛtsɔ Mose nɔ aha he nii, ni amɛyɛ osɔfoi ni jɛ Aaron wekukpaa lɛ mli lɛ hewɔ. No hewɔ lɛ ekolɛ amɛsusu akɛ: ‘Nɛkɛ Yesu ni jɛ Nazaret nɛɛ ji Galilea ŋmoŋmologbɔlɔ ko binuu kɛkɛ.’ Amɛfolɔ Nyɔŋmɔ Bi lɛ po naa akɛ eji Samarianyo ni daimonio yɔɔ emli. (Yohane 7:52; 8:39-41, 48; 9:24, 28, 29) No hewɔ lɛ Nyɔŋmɔ wo Hebri Kristofoi lɛ ŋaa ni amɛkɛ nilee ‘atɛje amɛhiɛ amɛkwɛ Yesu,’ ejaakɛ wekukpaa kpakpa ni ŋmɛɔ pɛpɛɛpɛ ni aaaka amɛ kɛ Nyɔŋmɔ Bi lɛ teŋ lɛ baaye abua nakai Kristofoi lɛ ni amɛye anɔkwale.
9. Mɛni hewɔ ŋaawoo akɛ ‘nyɛtɛjea nyɛhiɛ nyɛkwɛa Yesu’ lɛ sa jogbaŋŋ ŋmɛnɛ lɛ, shi mɛɛ oshara esa akɛ wɔbu wɔhe kɛjɛ he?
9 Ŋwɛi ŋaawoo ni yɔɔ Hebribii awolo lɛ mli lɛ hu yeɔ ebuaa wɔ ejaakɛ apasa loo jwɛŋmɔ ni ejaaa ni ahiɛ yɛ Kristo he lɛ yɛ lolo. Ŋmɛnɛ, mɛi pii yɛ ni, ni amɛaagbe Yesu he guɔ taakɛ Yudafoi ni teɔ shi woɔ lɛ lɛ fee lɛ, amɛwoɔ bɔ ni eji lɛ moŋ he kwraa tsɔ̃. Amɛsɔlemɔi lɛ kɛɔ akɛ Yesu ji nyɔŋmɔi etɛ ni efee ekome ko fã, ni ákɛ Tsɛ lɛ, Bi lɛ kɛ Mumɔ krɔŋkrɔŋ lɛ fɛɛ lɛ ekomeŋ. Shi amɛgbalaa amɛjwɛŋmɔ kɛyaa namɔ nɔ titri? Yesu. Agbalaa Yesu kɛbaa hiɛ, ni atsiɔ e-Tsɛ lɛ kɛyaa sɛɛ shɔŋŋ yɛ duŋ mli. Enɛ kɛ mpoatswaa ko bafɔ̃ɔ anɔkwale Kristofoi ahiɛ. Yesu kɛɛ yɛ Yohane 14:28 akɛ e-Tsɛ lɛ ji mɔ ni da, ni Lala 83:19 kɛɔ akɛ “bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ.” Shi esaaa akɛ wɔfeɔ jwɛŋmɔ ni ejaaa ni ahiɛ yɛ Yesu he nɛɛ he nii kɛtekeɔ nɔ ni wɔkɛba gbɛhe diɛŋtsɛ mli ni eyɔɔ lɛ shi ni ekolɛ wɔleee. Taakɛ eji yɛ Hebri Kristofoi lɛ agbɛfaŋ lɛ, bɔ ni Yesu ji lɛ he jwɛŋmɔ ni ji anɔkwale ni ŋmɛɔ pɛpɛɛpɛ baaye abua wɔ babaoo yɛ be mli ni wɔkwɛɔ wɔsɛɛ be gbɛ lɛ.
10. Mɛni Hebribii lɛ tsɔɔ yɛ Yesu gbɛhe he?
10 Hebribii awolo lɛ jeɔ shishi kɛ jwɛŋmɔ ni egbalaa kɛbaa gbɛhe ni kwɔ ni hĩ ni Kristo yɔɔ mli lɛ nɔ. Eji mumɔ ni awo ehiɛ nyam bianɛ, eji “[Nyɔŋmɔ] enunyam lɛ kpɛmɔ kɛ esu lɛ henɔ.” Enɛ etsɔɔɔ akɛ Tsɛ lɛ kɛ Bi lɛ ji gbɔmɔ kome aloo nyɔŋmɔ kome, ejaakɛ Hebribii 1:3 kɛfata he akɛ Yesu “eyata shi yɛ [“Nyɔŋmɔ,” Today’s English Version] agbo lɛ ninejurɔ nɔ yɛ ŋwɛi.” Ŋmalɛi tamɔ Hebribii 2:10 kɛ 5:5, 8 hu tsɔɔ akɛ Yehowa nɔ kwɔ fe Bi lɛ. Shi kɛ̃lɛ, Kristo “ená gbɛi ko [gbɛhé loo gbɛihemɔ] ko ni fe ŋwɛibɔfoi anɔ.”—Hebribii 1:4.
11. (a) Mɛni Nyɔŋmɔ ŋwɛibɔfoi lɛ feɔ yɛ Yesu Kristo he aloo te amɛbuɔ lɛ amɛhaa tɛŋŋ? (b) Te esa akɛ anu Hebribii 1:6 shishi aha tɛŋŋ?
11 Taakɛ ŋwɛibɔfoi anɔkwafoi lɛ feɔ lɛ, ehe miihia ni wɔ hu wɔyoo Kristo gbɛhe ni awo nɔ lɛ. Yɛ be mli ni etsɛɔ wiemɔ kɛjɛɔ Lala 97:7 (Greek Septuagint Version) lɛ, Hebribii 1:6 kɛɔ akɛ: “Ha Nyɔŋmɔ bɔfoi fɛɛ aja lɛ.” Taakɛ shishitsɔɔmɔi krokomɛi tsɔɔ enɛ mli lɛ, ŋwɛibɔfoi lɛ “kulaa shi” aloo “amɛkotoɔ shi” aloo “amɛbaa” amɛhe shi amɛhaa Bib lɛ. Shishinumɔ ni yɔɔ mli lɛ tsɔɔ akɛ ŋwɛibɔfoi lɛ po baa amɛhe shi amɛhaa Yesu ákɛ Nyɔŋmɔ najiaŋdamɔlɔ titri akɛ Bi ni awo enɔ. Amɛyooɔ ákɛ “akɛ anunyam kɛ woo fi lɛ akekre” ni akɛ jeŋ ni baaba lɛ nɔ hewalɛ ewo edɛŋ.—Hebribii 2:5, 9.
12. Mɛni ehewɔ ehe hiaa akɛ wɔbo Yesu wiemɔi lɛ toi lɛ?
12 Te esa akɛ enɛ ana wɔ nɔ hewalɛ eha tɛŋŋ? Yɛ be mli ni étsɔɔ bɔ ni Yesu nɔ kwɔ fe ŋwɛibɔfoi lɛ amli lɛ sɛɛ lɛ, Paulo ŋma akɛ: “No hewɔ lɛ esa akɛ wɔmɔ nii ni wɔnu lɛ mli ni awa koni wɔkakpalaŋ kɛjɛ he be ko.” (Hebribii 2:1) Taakɛ Hebri Kristofoi lɛ le lɛ, jeeŋmɔ beebe Yudafoi lɛ jɛ amɛbo Nyɔŋmɔ Wiemɔ aloo Mla ni atsɔ Mose nɔ akɛha lɛ toi. Belɛ ehe miihia waa moŋ ni wɔbo ŋwɛi gbɛtsɔɔmɔ ni atsɔɔ Yesu nɔ akɛhaa lɛ toi.
13. Mɛɛ gbɛ nɔ toiboo ni Kristofoi aaafee amɛha Yesu lɛ he aaaba sɛɛnamɔ aha amɛ? Feemɔ he nɔkwɛmɔ nɔ.
13 Kɛha enɛ he odaseyeli lɛ, kaimɔ nɔ ni Yesu Kristo kɛɛ yɛ foi ni esa akɛ ajo kɛ asraafoi gba bɔle Yerusalem he lɛ, (Luka 19:43, 44; 21:20-24) Romabii lɛ bɔle atuatselɔ Yerusalem he yɛ afi 66 Ŋ.B., shi amɛgbala amɛhe shi yɛ naakpɛɛ gbɛ nɔ, ni eha Kristofoi lɛ jo foi kɛjɛ maŋtiase lɛ mli. Toiboo ni amɛfee lɛ here amɛyiwala yɛ be mli ni Romabii lɛ ku amɛsɛɛ ni amɛkɛ amanehulu ba yɛ afi 70 Ŋ.B. lɛ. Nyɛhaa wɔkasea nii kɛjɛa enɛ mli: Akɛni jeŋ fɛɛ amanehulu ko ka wɔhiɛ hewɔ lɛ, bi akɛ: ‘Ani miibo Yesu wiemɔi lɛ toi jogbaŋŋ? Akɛ nɔkwɛmɔ nɔ lɛ, ani be ni mifiteɔ yɛ hiɛtserɛjiemɔ mli, su ni mihiɛ yɛ minitsumɔ he, aloo bɔ ni mibuɔ jeŋ tsɔsemɔ loo woloŋlee mihaa lɛ tsɔɔ akɛ mibo Yesu wiemɔi ni yɔɔ Luka 12:16-31 lɛ toi?
14. (a) Yesu ji ‘yiwalaheremɔ he Najiaŋdamɔlɔ Nukpa’ yɛ mɛɛ gbɛ nɔ? (b) Aha Yesu “hi kɛwula shi” yɛ mɛɛ shishinumɔ mli?
14 Hebribii 2:10 (NW) tsɛɔ Yesu akɛ ‘yiwalaheremɔ Najiaŋdamɔlɔ Nukpa.’ Klɛŋklɛŋ lɛ, nakai sane lɛ ji, yɛ Kristofoi ni afɔ amɛ mu ni amɛji “enyɛmimɛi” lɛ agbɛfaŋ (Hebribii 2:11-17) Shi mɛi fɛɛ hu ni hiɛ ka nɔ akɛ amɛbaana wala yɛ shikpɔŋ nɔ Paradeiso mli lɛ hu kɛ amɛhiɛ fɔɔ enɔ kɛha yiwalaheremɔ. Paulo ŋma akɛ: “Ni tsɛ Nyɔŋmɔ bi ji lɛ moŋ, shi ekase toiboo yɛ amanehului ni ena lɛ amli, ni akɛni ehi kɛwula shi hewɔ lɛ, etsɔ mɔ mli ni naanɔ yiwalaheremɔ jɛɔ ehaa mɛi fɛɛ ni boɔ lɛ toi lɛ, ejaakɛ Nyɔŋmɔ wo lɛ osɔfonukpa.” (Hebribii 5:8-10) Shi Yesu etee nɔ ehi shi akɛ mumɔ ni yeɔ emuu, ni eji mɔ ni yeɔ emuu hu yɛ gbɔmɔtsoŋ yɛ shikpɔŋ nɔ. Agbɛnɛ, yɛ enitsumɔ akɛ wɔ osɔfo hewɔ lɛ, esa akɛ Yesu aye emuu hu yɛ shishinumɔ kroko mli. Atsɔɔ lɛ nii yɛ be mli ni eyɔɔ shikpɔŋ nɔ—nikasemɔ, tsɔsemɔ kɛ etoiboo he kaa kɛbote gbele mli—bɔni afee ni aha eye emuu akɛ osɔfonukpa ni naa mɔbɔ ni nuɔ he ehaa mɔ.
Hekɛnɔfɔɔ Yɛ Wɔ Osɔfonukpa Lɛ Mli
15. Mɛni hewɔ wɔnaa ni áwie osɔfoi ahe babaoo yɛ Hebribii awolo lɛ mli nakai lɛ?
15 Yɛ Hebribii lɛ akanemɔ mli lɛ obaana akɛ eyɛ babaoo kɛɛmɔ yɛ osɔfoi ahe. Enɛ yɛ nakai koni etswa shishinumɔ kɛ hiɛsɔɔ ni wɔyɔɔ kɛha “osɔfonukpa ni wɔjajeɔ—Yesu” lɛ ema shi. (Hebribii 3:1, NW) Paulo tsɔɔ mli akɛ “osɔfonukpa fɛɛ osɔfonukpa ni afa yɛ gbɔmɛi ateŋ lɛ, gbɔmɛi awo lɛ osɔfonukpa aha, yɛ Nyɔŋmɔ gbɛfaŋnii ahewɔ, koni ekɛ nikeenii kɛ afɔlei abaha yɛ eshai ahewɔ.” (Hebribii 5:1; 8:3.) Mla kpaŋmɔ lɛ mli nibii babaoo kɔɔ anɔkwale ni eji akɛ eshafeelɔi ji adesai lɛ he. No hewɔ ni osɔfoi, ni amɛ hu amɛsha afɔlei amɛkɛhã amɛ diɛŋtsɛ amɛhe eshai anɔ lɛ sha afɔlei kɛha amɛ lɛ. Shi kooloi afɔlei ni ati mli ashã shii abɔ lɛ yeee esha nɔ kunim aloo ni eeeha gbɔmɛi lɛ eko aye emuu. (Hebribii 7:11, 19, 27; 10:1-4, 11) Enɛ yeɔ odase akɛ kpaŋmɔ hee he miihia, kɛ afɔleshaa hee kɛ osɔfonukpa hee.—Yeremia 31:31-34.
16. Mɛni hewɔ Yesu, ákɛ osɔfo Iɛ, fe Israel osɔfoi lɛ?
16 Wɔyɛ mɔ ko ni tamɔ nakai ni ji Kristo. Akɛni Melkizedek, ni Biblia lɛ etsɔɔɔ he ni ewekukpaa jɛ lɛ fee ehe mfoniri hewɔ lɛ, Yesu tsɔɔɔ heloo naa seshinyo ko ni jɛ Levi loo Aaron mli ebafeee osɔfo. Nyɔŋmɔ hala lɛ tɛ̃ɛ. (Hebribii 7:1-3, 15-17; 5:5, 6) Kɛji akɛ Nyɔŋmɔ ekpɛlɛ Yesu nɔ akɛ osɔfonukpa lɛ, ani wɔnyɛŋ wɔna hekɛnɔfɔɔ kwraa yɛ emli? Agbɛnɛ hu, ejeee mɔ ni etsɛŋ ni eeegbo koni mɔ ni akɛ lɛ aaato enajiaŋ he ahia, taakɛ eji yɛ osɔfoi ni hi Mla lɛ shishi lɛ agbɛfaŋ lɛ. Enyɛ ekɛ naagbee afɔleshaa ha, lɛ diɛŋtsɛ egbɔmɔtso; eji nɔ ni yeɔ emuu, ni ehe ebahiaŋ ni aku sɛɛ ati afɔleshaa lɛ mli dɔŋŋ. Kristo, wɔ osɔfonukpa lɛ kɛ elá ni ji ewala lɛ jara lɛ tee ŋwɛi ni ekɛyaha Nyɔŋmɔ. Eyɛ jɛmɛ lolo, ni eesɔmɔ akɛ osɔfo kɛmiiha wɔ.—Hebribii 9:24-28; 10:12-18.
17. Mɛɛ gbɛi anɔ ayeɔ abuaa wɔ yɛ Yesu ni wɔyɔɔ lɛ akɛ osɔfonukpa lɛ hewɔ?
17 Wɔbaanyɛ wɔna hekɛnɔfɔɔ yɛ wɔ osɔfonukpa lɛ mli yɛ be mli ni jeŋ amanehulu ni baa lɛ yɔɔ wɔhiɛ lɛ. Kristo afɔleshaa ni yeɔ emuu lɛ baanyɛ aha wɔhe eshai lɛ anɔ kwraa, etamɔɔɔ afɔlei ni ashãa yɛ Mla lɛ shishi lɛ. Yɛ no sɛɛ lɛ, ebaanyɛ “etsumɔ wɔhenilee lɛ he kɛjɛ nitsumɔi gbohii [tsutsu nibii fɔji asɛɛdii kɛ mɔdɛŋ ni wɔ diɛŋtsɛ wɔɔbɔ ni wɔkɛbu wɔhe bem yɛ Nyɔŋmɔ hiɛ] amli, koni wɔsɔmɔ Nyɔŋmɔ hiɛkalɔ lɛ.” (Hebribii 9:14; 10:1-4, NW) Esa akɛ wɔkpɛlɛ nɔ akɛ, kɛ wɔbote shihilɛ ko ni mli wa mli ni wɔyɛ nɔnyɛɛ shishi lɛ, henilee ni mli tse keŋkeŋ yɛ Nyɔŋmɔ hiɛ lɛ he baa sɛɛnamɔ babaoo. (Hebribii 10:19-22) Wɔmii baanyɛ ashɛ wɔhe hu yɛ gbɛi komɛi anɔ, akɛni wɔyɔɔ Yesu akɛ naanɔ osɔfonukpa yɛ ŋwɛi lɛ hewɔ.
18. Mɛni hewɔ ehi akɛ wɔɔle akɛ wɔsɔfonukpa lɛ nuɔ nii ahe lɛ?
18 Hebribii awolo lɛ maa nɔ aduatsɔ kɛhaa wɔ akɛ Kristo ji osɔfonukpa ni nuɔ nii ahe. Obaanyɛ osusu yiŋkpɛɛi kɛ naagbai ni Hebri Kristofoi lɛ kɛkpe yɛ maŋhedɔɔ su ni ebɔle Yerusalem he yɛ be mli ni amɛsaa amɛhe koni amɛjo foi, amɛshi amɛshiai, amɛwekumɛi kɛ nitsumɔ lɛ he okwɛ. Fɛɛ sɛɛ lɛ ashiko amɛ kome. Paulo ŋma akɛ: “Ejaakɛ wɔsɔfonukpa lɛ ni wɔyɔɔ lɛ, ejeee mɔ ni nyɛɛɛ anu wɔgbedemɔi lɛ ahe aha wɔ, shi eji mɔ ko ni aka lɛ yɛ nibii fɛɛ gbɛfaŋ tamɔ wɔ, ni kɛ̃lɛ esha ko bɛ ehe.” Kwɛ bɔ ni enɛ aaashɛje amɛmii aha, ni esa akɛ efee nakai nɔŋŋ kɛha wɔ yɛ nibii agbɛjianɔtoo nɛɛ naagbee gbii nɛɛ amli! Akɛni eji osɔfonukpa ni nuɔ nii ahe nɛkɛ hewɔ lɛ, eeeha “wɔnine ashɛ mɔbɔnalɛ nɔ ni wɔna duromɔ ni aaaye abua wɔ yɛ be ni sa mli.” (Hebribii 4:15, 16) “Enyɛɔ eyeɔ ebuaa mɛi ni akaa amɛ lɛ” ni kaa fɛɛ kaa ni aaaba amɛnɔ lɛ kɔɔɔ he eko.—Hebribii 2:17, 18.
Mɔ Ni Haa Wɔhemɔkɛyeli Yeɔ Emuu Lɛ
19, 20. Yesu ji “Mɔ Ni Haa wɔhemɔkɛyeli Yeɔ Emuu” yɛ mɛɛ gbɛ nɔ?
19 Ekɔɔ wɔhemɔkɛyeli lɛ he titri yɛ be mli ni ‘wɔtɛjeɔ wɔhiɛ wɔkwɛɔ Yesu’ lɛ. Yɛ be mli ni etsi “esha ni ebɔle wɔhe kpula”—hemɔkɛyeli ni bɛ—lɛ ta lɛ, Paulo wie ‘wɔhiɛ ni wɔɔtɛje wɔkwɛ wɔhemɔkɛyeli Najiaŋdamɔlɔ Nukpa lɛ kɛ Mɔ ni Haa wɔhemɔkɛyeli Yeɔ Emuu, Yesu,’ lɛ he. (Hebribii 12:1, 2, NW) Mɛni hewɔ enɛ he hiaa yɛ ŋmɛnɛŋmɛnɛ nibii agbɛjianɔtoo nɛɛ naagbee nɛɛ mli?
20 Biblia lɛ gbala jwɛŋmɔ kɛtee Kristo lɛ nɔ kɛjɛ eklɛŋklɛŋ gbalɛ ni yɔɔ 1 Mose 3:15 lɛ nɔ. Nɔ ni ágba afɔ shi ni áfee he mfoniri babaoo yɛ Biblia lɛ mli lɛ kɔɔ ehe. Nibii babaoo ni yɔɔ Mose Mla lɛ mli ni atsi ta yɛ Hebribii awolo lɛ mli lɛ ji “nii kpakpai ni baaba lɛ asusuma kɛkɛ.” (Hebribii 9:23; 10:1) Shi “gbɔmɔtso lɛ ji Kristo nɔ̃ lɛ.” (Kolosebii 2:17) Hɛɛ, Yesu fɔmɔ, eshikpɔŋ nɔ sɔɔmɔ nitsumɔ lɛ, efɔleshaa gbele, eshitee kɛmiijɛ gbohii ateŋ kɛ esɔɔmɔ yɛ ŋwɛi ákɛ osɔfo lɛ kɛ gbalɛi, mfonirii kɛ nɔkwɛmɔ nii lɛ fɛɛ ni kɔɔ nibii nɛɛ ahe lɛ baa naagbee aloo ekɛbaa emuuyeli mli.
21. Yesu ji “Mɔ Ni Haa wɔhemɔkɛyeli Yeɔ Emuu” yɛ mɛɛ shishinumɔ kroko ni fata he hu mli?
21 Yɛ be mli ni Paulo baanyɛ ayoo Kristo akɛ “Mɔ Ni Haa wɔhemɔkɛyeli Yeɔ Emuu” lɛ, wɔyɛ yiŋtoo kroko hu kɛfata he, ni no hewɔ esa akɛ wɔfee nakai ŋmɛnɛ. Wɔmiina Yesu wiemɔi ni kɔɔ ‘beni eba lɛ kɛ nibii agbɛjianɔtoo lɛ naagbee he okadi’ lɛ mlibaa wuji ŋmɛnɛ. (Mateo 24:3) No hewɔ lɛ wɔhemɔkɛyeli lɛ damɔ nɔ ko ni ma shi shiŋŋ nɔ. Yiwalaheremɔ kɛha “jeŋ ni baaba” lɛ hu ebɛŋkɛ waa fe bɔ ni eji yɛ Paulo gbii lɛ amli lɛ. Belɛ nyɛhaa wɔtɛjea wɔhiɛ wɔkwɛa Yesu, Mɔ Ni Haa wɔhemɔkɛyeli Yeɔ Emuu lɛ, kɛ hekɛnɔfɔɔ akɛ Nyɔŋmɔ “ji mɛi ni [kɛ hemɔkɛyeli] taoɔ esɛɛgbɛ Iɛ anyɔmɔwolɔ.” (Hebribii 2:5; 11:6) Taakɛ nikasemɔ ni nyiɛ sɛɛ nɛɛ baatsɔɔ lɛ, Hebribii awolo lɛ baanyɛ aye abua wɔ ni wɔna hemɔkɛyeli ni he hiaa lɛ kɛ Kristofoi ajwɛŋmɔ bɔni afee ni wɔhi shihilɛ ni baaha wɔnine ashɛ nyɔmɔwoo ni yɔɔ naakpɛɛ lɛ nɔ lɛ mli.c
[Shishigbɛ niŋmai]
a Kwɛmɔ “Sanebimɔi ni jɛ Kanelɔi Adɛŋ” ni yɔɔ February 15, 1983 Blɔfo Buu-Mɔɔ lɛ mli yɛ baafa 31 lɛ.
b Paulo kɛ Hela wiemɔ proskynéo ni The Greek-Lexicon of the New Testament (Baur, Arndt, Gingrich) lɛ kɛɔ akɛ akɛtsu nii akɛtsɔɔ kusum nifeemɔ ni haa mɔ hoɔ egbeɔ mɔ ko hiɛ ni ehiɛ bu shi, ni eshɔɔ mɔ lɛ naji ahe, etade naamuu, shikpɔŋ lɛ mli lɛ.” (1 Samuel 24:8; 2 Maŋtsɛmɛi 2:15) Ebaanyɛ etsɔɔ “jamɔ” hu taakɛ Bibliai komɛi tsɔɔ yɛ Hebribii 1:6 lɛ. Kɛ shishinumɔ nɛɛ ja yɛ biɛ lɛ, belɛ eji jamɔ ni akɛtoɔ nii ahe atsɔɔ, Yehowa Nyɔŋmɔ jamɔ ni akɛtsɔɔ e-Bi ni ewɔ ehiɛ nyam lɛ nɔ akɛmiiha.—Okɛto Kpojiemɔ 14:7; Blɔfo Buu-Mɔɔ ni ji November 15, 1970 nɔ̃, baafai 702-704 he.
c (Ajie kɛjɛ February 15, 1983 Blɔfo Buu-Mɔɔ lɛ mli)
Ani Obaanyɛ Otsɔɔ Mli?
□ Te shihilɛ mli ni oyɔɔ lɛ tamɔ Kristofoi ni aŋma Hebribii awolo lɛ ayaha lɛ anɔ̃ lɛ ha tɛŋŋ?
□ Mɛni hewɔ ehe hiaa ni wɔna Yesu he jwɛŋmɔ ni ŋmɛɔ pɛpɛɛpɛ ni wɔbo ewiemɔi lɛ atoi?
□ Mɛni hewɔ Hebribii lɛ yɔɔ babaoo kɛɛmɔ yɛ afɔlei kɛ osɔfoi ahe nakai lɛ?
□ Te onuɔ he yɛ Yesu he ohaa tɛŋŋ, akɛ Osɔfonukpa kɛ Mɔ Ni Haa wɔhemɔkɛyeli Yeɔ Emuu?
[Akrabatsa ni yɔɔ baafa 14]
WOO loo JAMƆ
Yɛ Hebribii 1:6 lɛ, Hela wiemɔ proskynéo lɛ baanyɛ atsɔɔ:
1. Bulɛ loo woo ni akɛhaa, tamɔ ‘shi ni akulaa’ ahaa Yesu akɛ mɔ ni Yehowa Nyɔŋmɔ ewo ehiɛ nyam
2. Yehowa Nyɔŋmɔ ni aaatsɔ enajiaŋdamɔlɔ nukpa, e-Bi Yesu nɔ aja lɛ
[Mfonirii ni yɔɔ baafa 15]
Yesu kɛ afɔle ni ejara lɛ hiɔ shi kɛyaa naanɔ fe nɔ ni osɔfoi lɛ kɛhaa yɛ sɔlemɔwe lɛ ha