“Hejɔlɛ Ahanyɛ!”

“Yesu ba ni ebadamɔ amɛteŋ ni ekɛɛ amɛ akɛ: Hejɔlɛ ahanyɛ!”​—YOHANE 20:⁠19.

 1. Mɛni hewɔ mɔdɛŋ ni gbɔmɔ bɔɔ koni ekɛ jeŋ toiŋjɔlɛ aba lɛ yeŋ omanye lɛ?

“JEŊ muu lɛ fɛɛ ka mɔ fɔŋ lɛ hewalɛ mli.” (1 Yohane 5:​19, New World Translation.) Sane nɛɛ ji anɔkwale yɛ Yohane gbii lɛ amli, ni eyɛ faŋŋ ŋmɛnɛ yɛ awui ni ayeɔ gbɔmɛi, niseniianifeemɔ, tawuu kɛ fitemɔ ni eba lɛ hewɔ. Yohane wiemɔ ni jɛ mumɔŋ lɛ hu kɛ hiɛnɔkamɔ ko haaa akɛ je lɛŋ toiŋjɔlɛ baanyɛ aba kɛtsɔ adesai amɔdɛŋbɔɔ nɔ, yɛ mɔdɛŋ ni paapa lɛ baabɔ lɛ fɛɛ sɛɛ, yɛ mɔdɛŋ ni maŋ lɛ mli onukpai lɛ aaabɔ kɛ nɔ ni Jeŋmaji Ekomefeemɔ lɛ aaabɔ lɛ fɛɛ sɛɛ. Mɛni hewɔ? “Hejɔlɛ ko bɛ ha mɛi fɔji lɛ, mi-Nyɔŋmɔ lɛ kɛɛ.”​—Yesaia 57:⁠21.

 2. Mɛni ji nɔ ni wiemɔ “hejɔlɛ” loo toiŋjɔlɛ lɛ tsɔɔ titri lɛ yɛ Hebri kɛ Hela mli?

² Shi, wiemɔ “hejɔlɛ” loo toiŋjɔlɛ lɛ baanyɛ atsɔɔ nɔ kroko ni fe tawuu pɛ ni bɛ. Toiŋjɔlɛ loo hejɔlɛ baanyɛ afee jwɛŋmɔ loo mumɔŋ shihilɛ ko ni nɔ ni kadiɔ lɛ ji susumɔi loo henumɔi ni eye ehe kɛjɛ hoofeemɔ loo haomɔi ahe: jwɛŋmɔŋ kɛ tsuiŋ dioofeemɔ.” Ni kɛlɛ, Hebri wiemɔ kɛha “hejɔlɛ loo toiŋjɔlɛ (sha·lohmʹ) lɛ kɛ Hela wiemɔ (ei·reʹne) lɛ hiɛ shishinumɔ ni mli lɛɛ. Amɛtsɔɔ mɔ ko hilɛ-kɛhamɔ, tamɔ shɛɛyeli wiemɔi ni ji: “Yaa yɛ hejɔlɛ mli.” (1 Samuel 1:​17; 29:7; Luka 7:​50; 8:48) Enɛ yeɔ ebuaa wɔ ni wɔleɔ bɔ ni Yesu kɛ suɔmɔ susu ekaselɔi lɛ ahe yɛ haomɔ be ni bɔle egbele be lɛ he lɛ.

 3. Yɛ mɛɛ gbɛ nɔ Yesu jie bɔ ni esusuɔ ekaselɔi lɛ ahe waa lɛ kpo yɛ, yɛ eshitee lɛ mli, ni mɛni jɛ mli ba?

³ Yesu gbo yɛ Sohaa, Nisan 14, yɛ afi 33 Ŋ. B. Yɛ Hɔgbaa, Nisan 16 lɛ, atee lɛ shi. Akɛni yɛ be fɛɛ mli lɛ, esusuɔ ekaselɔi lɛ ahilɛ-kɛhamɔ he waa hewɔ lɛ, etee eyatao amɛ. Nɛgbɛ ena amɛ yɛ? Ena amɛ yɛ tsu ni aŋamɔ eshinai fɛɛ mli “yɛ Yudafoi lɛ ahe gbeyeishemɔ hewɔ.” Amɛtsui miiye, amɛmiishe gbeyei, ni shishinumɔ hu yɛ enɛ he. Shi Yesu kɛɛ amɛ akɛ: “Hejɔlɛ aha nyɛ.” (Yohane 20:​19-21, 26) Yɛ sɛɛ mli lɛ, akɛni mumɔ krɔŋkrɔŋ lɛ ewo amɛ hewalɛ hewɔ lɛ, amɛna hewalɛ ekoŋŋ. Amɛkɛ ekaa tsu amɛshiɛmɔ nitsumɔ lɛ he nii, ni amɛye amɛbua mɛi pii ni amɛna toiŋjɔlɛ ni Nyɔŋmɔ gbeyeishemɔ yɔɔ mli.

Nyɔŋmɔ Gbeyeishemɔ Mli Toiŋjɔlɛ

 4. Te Yehowa webii aaafee tɛŋŋ amɛna jwɛŋmɔŋ kɛ tsuiŋ toiŋjɔlɛ yɛ jaramɔ bei nɛɛ amli?

⁴ Naagbee be lɛ mli wɔyɔɔ lɛ, yɛ “jaramɔ be ni mli wa” lɛ amli. (2 Timoteo 3:​1, New World Translation.) Okpɔŋɔiatsɛmɛi ni agba amɛhe sane afɔ shi yɛ kpojiemɔ lɛ tra amɛ okpɔŋɔi lɛ anɔ kɛnyiɛ shikpɔŋ lɛ nɔ​—taakɛ obaanyɛ ona tawuu, hɔmɔ kɛ gbele ni hela kɛbaa hewɔ lɛ. (Kpojiemɔ 6:​3-8) Shihilɛi ni ebɔle Yehowa webii ahe lɛ hu saa amɛhe. No hewɔ lɛ te ooofee tɛŋŋ ona jwɛŋmɔŋ kɛ tsuiŋ toiŋjɔlɛ ni Nyɔŋmɔ gbeyeishemɔ yɔɔ mli? Ja okɛ ohe kpɛtɛ miishɛjemɔ kɛ toiŋjɔlɛ Jɛɛhe lɛ he kpaakpa. Taakɛ nikasemɔ ni tsɔ hiɛ lɛ tsɔɔ lɛ, enɛ biɔ sɔlemɔ kɛ faikpamɔ ni ayaa nɔ afeɔ daa. Kɛ eba lɛ nɛkɛ lɛ, “Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsui kɛ nyɛjwɛŋmɔi lɛ yɛ Kristo Yesu mli!​—Filipibii 4:​6, 7.

 5. Mɛni hewɔ Paul yɔɔ nɔmimaa akɛ “Nyɔŋmɔ hejɔlɛ” lɛ baanyɛ abu wɔtsuii ahe lɛ?

⁵ No mli lɛ bɔfo Paulo ni ŋma nakai wiemɔi lɛ hu etsɔ osharai kɛ naagbai ni tamɔ nakai mli. Awo lɛ tsuŋ ni Yudafoi kɛ Romabii yi lɛ. Atswia lɛ tɛi ni ashi lɛ akɛ mɔ ni egbo. Gbɛfaa yɛ nakai gbii lɛ amli lɛ yɛ gbeyei; Paulo kɛ lɛlɛ sha shi shii etɛ, eshɛɔ be ni ojotswalɔi po haa ewala baa oshara mli, eshiɔ kpe shii abɔ ni ewɔɔɔ, ni fɛi, hɔmɔ kɛ kumai yeɔ lɛ yɛ bei pii amli. Yɛ enɛɛmɛi fɛɛ sɛɛ lɛ, nɔ ni yeɔ etsui daa gbi ji “asafoi lɛ fɛɛ ahe susumɔ.” (2 Korintobii 11:​24-28) No hewɔ lɛ, Paulo le bɔ ni “Nyɔŋmɔ hejɔlɛ” ni baanyɛ abu tsuii ahe lɛ he hiaa ha yɛ eniiashikpamɔi babaoo lɛ mli.

 6. Mɛni hewɔ ehe hiaa akɛ wɔɔha ekomefeemɔ ni mli wa aka wɔkɛ wɔ-Bɔlɔ lɛ teŋ ni wɔhiɛ mli hu lɛ?

⁶ Abaanyɛ atsɔɔ “Nyɔŋmɔ hejɔlɛ” lɛ mli akɛ dioofeemɔ kɛ kpoofeemɔ, ni tsɔɔ wekukpaa kpakpa ni ka mɔ kɛ Nyɔŋmɔ teŋ, enɛ he miihia Kristofoi waa, titri lɛ, beni amɛkɛ yiwaa aloo amanehulu ekpe lɛ. Mɛni hewɔ? Ojogbaŋŋ, wɔ fɛɛ wɔyeee emuu; no hewɔ lɛ, kɛ naagbai, nɔnyɛɛ, shitee-kɛwoo loo nijiaŋwujee sɔrɔtoi komɛi miihao wɔ lɛ, wɔbaanyɛ wɔshe gbeyei. Ekolɛ nɔ ni baajɛ mli aba ji wɔ emuuyeli mli ni wɔhiɛŋ. Enɛ kɛ ahorabɔɔ baaba Nyɔŋmɔ gbɛi lɛ nɔ, ebaaha wɔlaaje Yehowa hiɛ duromɔ, ni ebaanyɛ ekɛ naanɔ wala ni wɔɔlaaje hu aba. No hewɔ lɛ, kwɛ bɔ ni ehe hiaa akɛ wɔbɔ mɔdɛŋ ni wɔnine ashɛ “Nyɔŋmɔ hejɔlɛ” ni baanyɛ aye abua wɔ ni wɔdamɔ kaai sɔrɔtoi anaa yɛ omanyeyeli mli lɛ nɔ. Eka shi faŋŋ akɛ nakai toiŋjɔlɛ loo hejɔlɛ lɛ ji ‘nibii kpakpai ni hi kɛwulashi fɛɛ’ ni wɔŋwɛi Tsɛ lɛ kɛhaa wɔ lɛ ateŋ eko.​—Yakobo 1:⁠17.

 7, 8. (a) Mɛni nɔ “Nyɔŋmɔ hejɔlɛ” lɛ damɔ, ni ‘efe jwɛŋmɔi fɛɛ’ yɛ mɛɛ gbɛ nɔ? (b) Yɛ mɛɛ gbɛ nɔ afee toiŋjɔlɛ ni tamɔ nɛkɛ he nɔkwɛmɔ nɔ yɛ sane ko ni ba Afrika nyɛminuu ko nɔ lɛ mli?

⁷ Obaanyɛ ona akɛ mɛi komɛi tsɔɔ shihilɛ mli yɛ dioofeemɔ kɛ hekɛnɔfɔɔ mli. Yɛ bei komɛi amli lɛ, enɛ jɛ fɔmɔ mli su, hewalɛ ni weku lɛ na yɛ mɔ nɔ, ninamɔ, tsɔsemɔ aloo nibii krokomɛi ni tamɔ nakai. Shi “Nyɔŋmɔ hejɔlɛ” lɛ yɛ sɔrɔto. Edamɔɔɔ shihilɛi ni hi nɔ, ni asaŋ edamɔɔɔ adesa nyɛmɔ loo susumɔ nɔ. Ejɛ Nyɔŋmɔ ŋɔɔ ni “efe jwɛŋmɔi fɛɛ.” J. B. Philips tsɔɔ Filipibii 4:7 shishi akɛ “Nyɔŋmɔ toiŋjɔlɛ . . . fe adesa shishinumɔ.” Yɛ be babaoo mli lɛ, je lɛŋ bii lɛ anaa kpɛɔ amɛhe yɛ bɔ ni Kristofoi nyɛɔ amɛdamɔɔ naagbai ni hiɛdɔɔ yɔɔ mli, awui ni ayeɔ amɛ yɛ gbɔmɔtsoŋ aloo gbele po naa lɛ.

⁸ Ŋmɛnɛŋmɛnɛ beaŋ nɔkwɛmɔ nɔ ji eko ni kɔɔ Yehowa Odasefoi ni miifee Kristofoi akpeei yɛ Afrika shikpɔŋ ko nɔ, he ni Katolekbii ni yɔɔ akrowa lɛ shishi lɛ folɔ Odasefoi lɛ anaa akɛ amɛji yiwalɔi kɛ nɔyeli butulɔi lɛ. Trukaa pɛ kɛkɛ ni asraafoi polisifoi ni hiɛ tui ni kakla mamɔ naa pue. Amɛha yei lɛ kɛ gbekɛbii lɛ tee shia kɛkɛ ni amɛje shishi amɛbɔi hii lɛ yii. Odasefonyo lɛ kai akɛ: “Wiemɔi diɛŋtsɛ bɛ ni mikɛbaatsɔɔ gbɛ ni amɛtsɔ nɔ amɛfee wɔ niseniianii lɛ mli. Onukpa ni kwɛɔ amɛnɔ lɛ jaje yɛ faŋŋ mli akɛ abaayi wɔ aaahu kɛyashi be mli ni wɔɔgboi. Amɛkɛ tsokpotii tswia mi ni yɛ sɛɛ mli lɛ mishwila gbii 90. Shi nɔ ni misusuɔ he ji minanemɛi lɛ awala. Mitsɔ sɔlemɔ mli mibi Yehowa ni ekwɛ mɛnɛɛmɛi awala nɔ, etooi lɛ,” ni amɛ fɛɛ amɛje mli. Mɛɛ dioofeemɔ he nɔkwɛmɔ nɔ ji enɛ yɛ amanehulu kpeteŋkpele shishi kɛ mɛi krokomɛi ahe susumɔ yɛ sɔlemɔ mli! Hɛɛ, wɔŋwɛi Tsɛ lɛ ni yɔɔ suɔmɔ lɛ haa etsuji anɔkwafoi anibimɔi ahetoo, ni ekɛ toiŋjɔlɛ haa amɛ. Asraafoi ni naa ekpɛ amɛhe yɛ nɛkɛ sane nɛɛ mli lɛ ateŋ mɔ kome kɛɛ akɛ Odasefoi lɛ a-Nyɔŋmɔ lɛ “baanyɛ afee anɔkwale Nyɔŋmɔ lɛ.”

 9. Mɛni baajɛ Biblia lɛ kanemɔ kɛ enɔ jwɛŋmɔ lɛ mli aba?

⁹ Kristofoi pii yɛ naagbai yɛ nɛkɛ haomɔ be nɛɛ amli ni haa amɛnuɔ he akɛ amɛhiɛnɔkamɔ efee yaka ni amɛnijiaŋ eje wui. Gbɛ ni hi jogbaŋŋ ni oootsɔ nɔ ona jwɛŋmɔŋ toiŋjɔlɛ ji ni okane Biblia lɛ ni ojwɛŋ nɔ. Ebaanyɛ ekɛ hewalɛ kɛ faishitswaa ni he hiaa lɛ awo mɔ mli ni eya nɔ ni edamɔ shi shiŋŋ. “Nyɔŋmɔ wiemɔ lɛ hiɛ ka ni eyɛ hewalɛ.”​—Hebribii 4:⁠12.

10. Ŋmalɛi ni aaanyɛ atsɛ kɛjɛ jwɛŋmɔ mli lɛ baanyɛ afee jɔɔmɔ yɛ mɛɛ gbɛ nɔ?

¹⁰ Ni kɛlɛ, kɛji akɛ amanehulu banina wɔ yɛ be mli ni wɔbɛ Biblia lɛ eko hu? Akɛ nɔkwɛmɔ nɔ lɛ, abaanyɛ amɔ Kristofonyo ko trukaa ni awo lɛ tsuŋ ni ebɛ Biblia. Kɛ eba lɛ nɛkɛ lɛ, ebaanyɛ efee jɔɔmɔ diɛŋtsɛ akɛ mɔ ko aaanyɛ akai ŋmalɛi tamɔ Filipibii 4:​6, 7; Abɛi 3:​5, 6; 1 Petro 5:​6, 7; kɛ Lala 23. Ani ohiɛ esɔŋ waa akɛ ooonyɛ okai ni ojwɛŋ nɛkɛ ŋmalɛi nɛɛ anɔ? Yɛ shihilɛ ni yɔɔ gbeyei tamɔ tsuŋwoo he ni oyaje mli lɛ, eeenyɛ efee tamɔ nɔ ni Yehowa diɛŋtsɛ miiwie kɛmiitsɔɔ bo. Nyɔŋmɔ Wiemɔ lɛ baanyɛ atsa jwɛŋmɔi ni aye amɛ awui, ewaje tsuii ni egbɔjɔ, ni ekɛ toiŋjɔlɛ ato jwɛŋmɔŋ haomɔi anajiaŋ. (Kwɛmɔ Lala 119:165.) Hɛɛ, ehe miihia waa ni wɔtɛo ŋmalɛi yɛ wɔjwɛŋmɔi amli bianɛ yɛ be mli ni hegbɛ yɔɔ lolo ni wɔkɛaafee nakai lɛ.

11. Yɛ mɛɛ gbɛ nɔ nyɛminuu ko ni hi Netherlands lɛ jie bɔ ni mumɔŋ niyenii he hiaa lɛ lɛ kpo etsɔɔ yɛ?

¹¹ Arthur Winkler ji mɔ ni hiɛ sɔɔ Biblia lɛ jogbaŋŋ, titri lɛ yɛ be mli ni Nazibii ba he shi yɛ Netherlands, ni ehe bahia ni Odasefoi lɛ atsu amɛ-Kristofoi anitsumɔ lɛ yɛ teemɔŋ lɛ. Gestapo, ni ji Germane polisifoi lɛ miigbɔbi kɛmiitao Nyɛminuu Winkler. Beni amɛmɔ lɛ yɛ naagbee lɛ, amɛbɔ mɔdɛŋ ni amɛha eŋmɛɛ ehemɔkɛyeli lɛ he koni ekɛsaa, shi amɛnyɛɛɛ. Amɛyi lɛ aaahu ni nɔ nyɔ enɔ. Amɛkumɔ enyanyɔji, ekadaa kpɔ, ni amɛkɛ nii tswia egbɔmɔtso, kɛkɛ ni ashɛ lɛ awo gbokɛlɛfoi atsu ko ni mli ewo duŋŋ kpii mli. Shi mɔ ni kwɛɔ enɔ lɛ mli hi ni ehiɛ naanyobɔɔ su. Nyɛminuu Winkler tao Yehowa gbɛtsɔɔmɔ yɛ sɔlemɔ mli. Agbɛnɛ ele akɛ mumɔŋ niyenii he miihia lɛ waa ni ebi bulɔ lɛ koni eye ebua lɛ. Yɛ sɛɛ mli lɛ, agbele gbokɛlɛfoi ashinaa lɛ, ni ashɛ Biblia ko afɔ mli aha lɛ. Nyɛminuu Winkler kai akɛ, “mɛɛ miishɛɛ enɛ ji, akɛ mana anɔkwale wiemɔ ni ŋɔɔ lɛ mli nibii daa gbi . . . minu he akɛ mihe miiwa mi yɛ mumɔŋ.”a

Nyɔŋmɔ Toiŋjɔlɛ Aloo Hejɔlɛ Baabu Ohe

12. Mɛni hewɔ ehe hiaa ni wɔbu wɔtsuii kɛ wɔjwɛŋmɔŋ nyɛmɔi ahe waa lɛ?

¹² Yehowa ewo shi akɛ etoiŋjɔlɛ “aaabu nyɛtsuii kɛ nyɛjwɛŋmɔŋ nyɛmɔi ahe.” (Filipibii 4:​7, New World Translation.) Enɛ he miihia waa! Tsui lɛ ji kanyamɔ kɛ henumɔi ajɛɛhe. Wɔtsuii baanyɛ agbɔjɔ oya yɛ gbeyeishemɔ aloo tsuiyeli hewɔ, yɛ naagbee be nɛɛ mli, aloo ebaanyɛ elaka wɔ ni wɔfee efɔŋ. Shihilɛ gbɛi fɛɛ miifite oyayaayai. Esa akɛ wɔhiɛ ahi wɔhe nɔ yɛ be fɛɛ mli. Kɛfata tsui ni he wa ni wɔɔna he lɛ, esa akɛ wɔha Nyɔŋmɔ awaje ni ekudɔ “wɔjwɛŋmɔŋ nyɛmɔi” kɛtsɔ e-Wiemɔ lɛ kɛ esafo lɛ nɔ.

13. Mɛɛ sɛɛnamɔi baanyɛ ajɛ wɔjwɛŋmɔŋ nyɛmɔi ni wɔɔbu he lɛ mli aba?

¹³ Taakɛ W. E. Vine tsɔɔ lɛ, Hela wiemɔ noʹe·ma (ni atsɔɔ shishi akɛ “jwɛŋmɔŋ nyɛmɔi”) lɛ shishi tsɔɔ “yiŋtoo” aloo “yiŋshwiemɔ.” (An Expository Dictionary of New Testament Words) No hewɔ lɛ, Nyɔŋmɔ toiŋjɔlɛ baanyɛ awaje yiŋtoo ni wɔhiɛ akɛ Kristofoi lɛ ni ebu wɔhe kɛjɛ su ni baaha wɔgbɔjɔ aloo wɔtsake wɔjwɛŋmɔ ni yiŋtoo kpakpa ko bɛ sɛɛ lɛ he. No hewɔ lɛ nijiaŋwujee loo naagbai nyɛŋ atsi wɔ kɛjɛ wɔgbɛ nɔ oya. Akɛ nɔkwɛmɔ nɔ lɛ, kɛ wɔto wɔyiŋ akɛ wɔbaasɔmɔ Yehowa yɛ gbɛ krɛdɛɛ ko nɔ lɛ, tamɔ be fɛɛ gbɛgbalɔ sɔɔlɔ ni wɔɔtsɔ aloo ni wɔɔfa wɔyasɔmɔ yɛ he ni sɔɔlɔi he hiaa babaoo yɛ lɛ, “Nyɔŋmɔ hejɔlɛ” aloo toiŋjɔlɛ lɛ baaye abua wɔ babaoo koni wɔya nɔ wɔtiu nakai oti lɛ. (Okɛto Luka 1:3; Bɔfoi lɛ Asaji 15:​36; 19:​21; Romabii 15:​22-24, 28; 1 Tesalonikabii 2:​1, 18 he.) Bɔni afee ni owaje ojwɛŋmɔŋ nyɛmɔi lɛ lolo lɛ, tuu be ni sa oha Nyɔŋmɔ Wiemɔ lɛ kasemɔ kɛ Kristofoi anaanyobɔɔ. Enɛ haa okɛ nibii ni he tse, kɛ nibii ni tswaa mɔ emaa shi lɛɔ ojwɛŋmɔ kɛ otsui. Ani onyɛɔ otoɔ be ni fa bɔ ni sa omaa shi koni okɛ ohe awo Nyɔŋmɔ mumɔ naa “wiemɔi” lɛ amli? Ani esa akɛ ojwɛŋ nɔ babaoo?

14. Mɛɛ ŋaawoo ni jɛ mumɔŋ esa akɛ wɔbo toi jogbaŋŋ, ni mɛni hewɔ?

¹⁴ Obaanyɛ ona akɛ tsui lɛ kɛ jwɛŋmɔ lɛ fɛɛ, aloo jwɛŋmɔŋ nyɛmɔi lɛ kɔɔ “Nyɔŋmɔ hejɔlɛ” ni wɔɔna ni ehe aba sɛɛnamɔ aha wɔ lɛ he. Enɛ jeɔ kpo yɛ ŋwɛi ŋaawoo nɛɛ mli: “Mi bi, bo miwiemɔi lɛ atoi, ka otoi oha nɔ ni mitsɔɔ bo lɛ! Kaaha amɛmiije ohiɛ, ŋɔɔ amɛ oto otsui teŋ! Ejaakɛ amɛji wala ha mɛi ni naa amɛ lɛ, kɛ nɔ ni tsaa amɛhewojiaŋ fɛɛ. Ohiɛ aka otsui he fe bɛ fɛɛ; ejaakɛ no mli wala jɛɔ.”​—Abɛi 4:​20-23.

15. Mɛɛ gbɛfaŋnɔ Yesu tsuɔ yɛ “Nyɔŋmɔ hejɔlɛ” ni wɔɔna lɛ mli?

¹⁵ “Nyɔŋmɔ hejɔlɛ” loo toiŋjɔlɛ ni baa kɛjɛɔ ekomefeemɔ ni mli wa ni ka mɔ kɛ Yehowa teŋ lɛ buɔ wɔtsuii kɛ wɔjwɛŋmɔŋ nyɛmɔi ahe “yɛ Kristo Yesu mli!” (Filipibii 4:⁠7) Mɛɛ nii Yesu tsuɔ yɛ enɛ mli? Paulo tsɔɔ mli: “Duromɔ kɛ hejɔlɛ ni jɛ tsɛ Nyɔŋmɔ lɛ kɛ wɔ-Nuŋtsɔ Yesu Kristo dɛŋ ahanyɛ; mɔ hu ni ŋɔ lɛ diɛŋtsɛ ehe eha yɛ wɔhe eshai lɛ ahewɔ, koni ejie wɔ kɛjɛ jeŋ fɔŋ ni yɔɔ ŋmɛnɛŋmɛnɛ nɛɛ mli, yɛ Nyɔŋmɔ kɛ wɔ-Tsɛ lɛ suɔmɔ naa.” (Galatabii 1:​3, 4) Hɛɛ, Yesu jɛ esuɔmɔ mli ekɛ ewala ha koni akpɔwɔ. (Mateo 20:28) No hewɔ lɛ, Yehowa baanyɛ akpɛlɛ wɔ nɔ akɛ etsuji ni amɛjɔɔ amɛhe nɔ amɛha lɛ “kɛtsɔ Kristo Yesu” nɔ koni wɔna nakai ŋwɛi toiŋjɔlɛ ni baanyɛ abu wɔhe lɛ eko.

Osharai Ni Woɔ Ŋwɛi Toiŋjɔlɛ He Gbeyei

16. Mɛɛ ŋaawoo ni Paulo kɛhaa baanyɛ aye abua wɔ ni wɔmɔ “Nyɔŋmɔ hejɔlɛ” lɛ mli?

¹⁶ Kɛ wɔnine shɛ toiŋjɔlɛ ni jɛ Nyɔŋmɔ ŋɔɔ lɛ nɔ ni wɔna mli ŋɔɔmɔ pɛ lɛ, esa akɛ wɔkwɛ jogbaŋŋ ni wɔhiɛ mli. Nibii pii baanyɛ ashɔ Kristofonyo lɛ toiŋjɔlɛ kɛjɛ edɛŋ. Nɔ ni egbɛ eshwa yɛ enɛ mli ni eji nɔ ni eshara yɔɔ he fe fɛɛ ji obalaŋtaiaŋ akɔnɔi. Yɛ Paulo wolo ni ji enyɔ ni eŋma eyaha Timoteo, ni no mli lɛ, eka shi faŋŋ akɛ eye kɛjɛ afii 30 kɛyaa lɛ mli lɛ, ekɛ nɛkɛ ŋaawoo nɛɛ fata he akɛ: “Shi Obalahiiaŋ sɛɛdii lɛ, joo naa foi: shi moŋ okɛ mɛi ni tsɛɔ Nuŋtsɔ lɛ kɛjɛɔ tsui ni mli tse mli lɛ atiu hejɔlɛ, hemɔkɛyeli, suɔmɔ kɛ hejɔlɛ.”​—2 Timoteo 2:⁠22.

17. Mɛni baa yɛ be babaoo mli yɛ bɔlɛnamɔ he gbɛjianɔ ni Yehowa eto lɛ mli?

¹⁷ Nɔ ni fata nakai sɛɛdii loo akɔnɔi lɛ ahe ji bɔlɛnamɔ mli henumɔ, ni yɔɔ gbɛhe ni woo yɔɔ mli yɛ gbalashihilɛ mli lɛ. Akɛ nɛkɛ henumɔ nɛɛ etsu nii yɛ gbɛ ni ejaaa nɔ yɛ bɔlɛnamɔ ni tsɔɔ gbalashihilɛ hiɛ loo gbalashihilɛ sɛɛ bɔlɛnamɔ mli, yɛ yinɔsane fɛɛ mli, eyɛ mli akɛ wɔ-Bɔlɔ ni yɔɔ nilee lɛ ekpɛlɛɛɛ enɛ nɔ. (Hebribii 13:4; 1 Mose 34:​1-3) Oshara ni aaanyɛ aba kɛ mɔ ko aaaŋmɛɛ ehe aha bɔlɛnamɔ mli jeŋba shara lɛ miiwo Kristofoi ahe gbeyei ŋmɛnɛ, obalaŋtai kɛ mɛi ni amɛdara fɛɛ. Yɛ nɛkɛ sakasakafeemɔ je nɛɛ naagbee gbii nɛɛ amli lɛ, bɔlɛnamɔ ebatsɔ heloo mli akɔnɔ kɛha mɛi pii, ni amɛnifeemɔ tamɔ nibii ni yaa nɔ yɛ hii kɛ hii ni kɛ amɛhe feɔ yakayakanii aloo yei kɛ yei ni kɛ amɛhe feɔ nakai lɛ ateŋ lɛ pɛpɛɛpɛ​—Romabii 1:​24-27.

18. Mɛni hewɔ mɛi komɛi atsui bɛ shiŋŋ lolo lɛ, ni enɛ baanyɛ ekɛ mɛni aba?

¹⁸ Anɔkwale ni eji akɛ wɔyɔɔ shihilɛ ni tamɔ nɛkɛ mli lɛ tsɔɔ bɔ ni ehe hiaa kɛha wɔ akɛ wɔna tsuii ni he wa ni yɔɔ shiŋŋ ni atuu aha Yehowa lɛ. Mɛi komɛi ni amɛkpɛlɛ Maŋtsɛyeli lɛ he sane lɛ nɔ lɛ heɔ Biblia mli anɔkwalei lɛ anɔ amɛyeɔ, ni amɛkɛ amɛhe bɔɔ Yehowa webii ahe daa, shi amɛnaaa hiɛsɔɔ ni mli kwɔ amɛhaaa Yehowa, e-Wiemɔ lɛ kɛ ejeŋ muu fɛɛ asafo lɛ. Amɛtsuii efeko shiŋŋ lolo. “Obalahiiaŋ sɛɛdii” lɛ baanyɛ agbala amɛ oya. Amɛteŋ mɛi komɛi baanyɛ ate shi awo kaa akɛ amɛbɔ ajwamaŋ aloo amɛfite gbala lɛ, shi amɛbatsɔmɔɔ, nɔ ni Paulo bɔ he kɔkɔ lɛ, “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” (2 Timoteo 3:⁠4) Amɛfiteɔ be ni fa fe nine amɛkɛkwɛɔ TV, amɛkaneɔ je lɛŋ woji, aloo amɛboɔ lalai ni yɔɔ hoo lɛ atoi fe amɛ diɛŋtsɛ amɛteemɔŋ nikasemɔi ni amɛkɛ amɛhe aaawo mli, Kristofoi akpeei ni amɛaaya, aloo Maŋtsɛyeli sɔɔmɔ lɛ ni amɛkɛ amɛhe aaawo mli. Nɔ ni jɛɔ enɛ mli baa oya ji mumɔŋ gbedemɔ kɛ agbɛnɛ yɛ naagbee lɛ, eshafeemɔ ni hiɛdɔɔ yɔɔ mli lɛ mli ni agbeɔ.

19. Mɛni esa akɛ wɔfee koni wɔkakplaŋ kɛmiiya?

¹⁹ Nɛkɛ gbɔmɛi nɛɛ tamɔ lɛlɛ ni bɛ sɛkɛ, ni amɛmiikplaŋ kɛmiiya yɛ mɛi ahiɛ kɛmiibɛŋkɛ oshara he. Mɛni esa akɛ amɛfee? Paulo wo ŋaa akɛ: “No hewɔ lɛ, esa akɛ wɔmɔ nii ni wɔnu lɛ mli ni awa, koni wɔkakplaŋ kɛjɛ he be ko.” (Hebribii 2:⁠1) No hewɔ lɛ, esa ni mɛi ni yɔɔ oshara mli lɛ ‘amɔ nii ni amɛnu lɛ mli ni awa’ yɛ Nyɔŋmɔ Wiemɔ lɛ kasemɔ mli, amɛhesaamɔ kɛha Kristofoi akpeei amli, kɛ Maŋtsɛyeli anɔkwalei lɛ ni amɛaagba mɛi krokomɛi lɛ. Shi, ebaafee mlɛo akɛ mɔ ko aaasusu akɛ, ‘Ŋaawoo kpakpa nɛ, shi mibɛ nakai shihilɛ lɛ mli, no hewɔ lɛ, ekɔɔɔ mihe.’ Kwɛ bɔ ni nilee yɔɔ mli babaoo moŋ ha akɛ wɔteŋ mɔ fɛɛ mɔ kɛ hiɛdɔɔ aaasusu gbɛ ni wɔɔtsɔ nɔ wɔtsuu wɔtsuii ahe, wɔmligbɛ susumɔi lɛ ahe, kɛ wɔ akɔnɔi lɛ ahe koni “okɛ mɛi ni tsɛɔ Nuŋtsɔ lɛ kɛjɛɔ tsui ni mli tse mli lɛ atiu jalɛ, hemɔkɛyeli, suɔmɔ kɛ hejɔlɛ.” (2 Timoteo 2:22) Nɔ ni fe fɛɛ lɛ, esa akɛ wɔbi Nyɔŋmɔ kɛha gbɛtsɔɔmɔ kɛ emumɔ lɛ ni wajeɔ wɔ lɛ yelikɛbuamɔ.

20. Mɛni esa akɛ mɔ fɛɛ mɔ ni feɔ esha ni mli wa lɛ afee?

²⁰ Kɛ mɔ ko fee esha ni mli wa ni eha nɔ lɛ, mɛi ni tamɔ nɛkɛ lɛ baalaaje Yehowa nɔkpɛlɛmɔ yɛ faŋŋ mli kɛ “Nyɔŋmɔ hejɔlɛ” ni amɛyɔɔ lɛ hu. Amɛbaalaaje amɛ diɛŋtsɛ amɛjwɛŋmɔŋ toiŋjɔlɛ lɛ hu. (Okɛto 2 Samuel 24:​10; Mateo 6:​22, 23 he.) Belɛ obaanyɛ ona nɔ hewɔ ni ehe hiaa akɛ Kristofonyo fɛɛ Kristofonyo ni ebote esha ni hiɛdɔɔ yɔɔ mli ko mli lɛ ajaje enɛ atsɔɔ Yehowa kɛ onukpai ni yɔɔ suɔmɔ lɛ, mɛi ni baanyɛ aye abua lɛ ni ena mumɔŋ tsamɔ ekoŋŋ lɛ. (Yesaia 1:​18, 19; 32:​1, 2; Yakobo 5:​14, 15) Kɛ mɔ ko ni elaaje pɛpɛɛpɛ ni eŋmɛɔ yɛ mumɔŋ lɛ yɛ esha gbɛ ni shamɔɔ lɛ nɔ lɛ miitao yelikɛbuamɔ kɛmiijɛ nyɛmimɛi ni amɛdara yɛ mumɔŋ lɛ aŋɔɔ lɛ, eyaŋ nɔ enaŋ henilee ni ehao dɔŋŋ, aloo ni eeehi shi akɛ mɔ ni bɛ ŋwɛi toiŋjɔlɛ.

21. Wɔbaanyɛ wɔda Yehowa shi waa ŋmɛnɛ yɛ mɛni he, ni mɛni esa akɛ efee wɔ hu wɔfaishitswaa?

²¹ Mɛɛ hegbɛ wɔna nɛkɛ akɛ wɔɔfee Yehowa Odasefoi ni amɛjɔɔ amɛhe nɔ ŋmɛnɛ lɛ ateŋ mɔ kome! Nibii ni ebɔle wɔhe kɛkpe lɛ fɛɛ, nɛkɛ Satan jeŋ nɛɛ miikumɔ kɛmiishwie shi ni eekumɔ dukuduku. Etsɛŋ ni ebaaho eya. Mɛi pii “atsui efa yɛ nibii ni baa je lɛŋ lɛ agbɛkwɛmɔ hewɔ.” Shi wɔ lɛ wɔbaanyɛ wɔhole wɔyitsei anɔ akɛni wɔle akɛ wɔ “kpɔmɔ miibɛŋkɛ” hewɔ lɛ. (Luka 21:​25-28) Bɔni afee ni wɔtsɔɔ bɔ ni wɔhiɛ sɔɔ Yehowa kɛ “ehejɔlɛ . . . ni fe jwɛŋmɔi fɛɛ” lɛ, nyɛhaa wɔfea bɔ fɛɛ bɔ ni wɔɔnyɛ ni wɔsɔmɔ “Nyɔŋmɔ ni haa toiŋjɔlɛ” lɛ yɛ anɔkwayeli mli.​—Romabii 15:​33; 1 Korintobii 15:​58, New World Translation.b

[Shishigbɛ niŋmai]

Saji Otii Ni Akɛtiɔ Mli

◻ “Nyɔŋmɔ toiŋjɔlɛ” Iɛ yeɔ ebuaa wɔ ŋmɛnɛ yɛ mɛɛ gbɛ nɔ, ni yɛ mɛɛ gbɛ nɔ ‘efe jwɛŋmɔi fɛɛ’ Iɛ?

◻ Mɛɛ nibii sɔrɔtoi yeɔ buaa wɔ ni wɔhiɛɔ jwɛŋmɔŋ toiŋjɔlɛ mli?

◻ Mɛɛ oshara ni baa nigii woɔ Kristofoi pii ahe gbeyei ŋmɛnɛ lɛ, ni ebaanyɛ ekɛ mɛni aba?

◻ Kɛ Kristofonyo ko fee eeha ni hiɛdɔɔ yɔɔ mli lɛ, mɛni esa akɛ efee?

[Akrabatsa/Mfoniri ni yɔɔ baafa 27]

Ekase Ele Akɛ Eji Anɔkwale

Yɛ Jeŋ Ta ll be lɛ mli lɛ, Nazibii lɛ kɛ Elsa Abt wu tee Sachsenhausen gbokɛlɛfoi aŋsaraŋ yɛ Kristofoi ashiɛmɔ nitsumɔ Iɛ hewɔ. Kɛkɛ ni yɛ May 1942 lɛ, Gestapo ni ji Nazi polisifoi lɛ ba nyɛmiyoo Iɛ shia, ni amɛhe ebiyoo fioo Iɛ kɛjɛ edɛŋ, ni amɛha Elsa tee koni eyatsu nii ni epiŋ yɛ ŋsaraŋ sɔrɔtoi amli. Lɛ diɛŋtsɛ eye odase ni tamɔ nɛkɛ:

“Afii ni miye yɛ German gbokɛlɛfoi aŋsaraŋ Iɛ etsɔɔ mi nikasemɔ ko ni ekaaa. Ni no ji, bɔ ni Yehowa mumɔ Iɛ baanyɛ awaje bo beni ni akaa bo waa Iɛ! Dani aaamɔ mi lɛ, no mli lɛ mikane nyɛmiyoo ko wolo ni tsɔɔ akɛ kɛ aaka mɔ ko waa lɛ, Yehowa mumɔ lɛ haa dioofeemɔ ko baa mɔ lɛ nɔ. Misusu akɛ benɛ eewo sane lɛ he fioo. Shi beni mitsɔ nakai kaai lɛ amli mi diɛŋtsɛ lɛ, miyoo akɛ nɔ ni ewie lɛ, anɔkwaleŋ. Ebaa Iɛ nakai pɛpɛɛpɛ. Ewa akɛ ooosusu he nakai, kɛji akɛ wɔnako niiashikpamɔ ni tamɔ nakai aloo wɔtsɔko mli. Hɛɛ eba minɔ diɛŋtsɛ. Yehowa yeɔ ebuaa.”

[Mfoniri ni yɔɔ baafa 25]

Paulo le kɛjɛ niiashikpamɔ mli akɛ Nyɔŋmɔ toiŋjɔlɛ lɛ baanyɛ abu wɔtsuii ahe

[Mfoniri ni yɔɔ baafa 28]

Ani oshara yɛ ohe akɛ ookplaŋ kɛmiiya yɛ mumuŋ?