Sanebimɔi Ni Jɛ Kanelɔi Adɛŋ
Hebribii 9:16 kɛɔ akɛ ja mɔ ni feɔ kpaŋmɔ Iɛ egbo dani kpaŋmɔ lɛ baana hewalɛ yɛ mla naa. Shi Nyɔŋmɔ fee kpaŋmɔ hee Iɛ ni egbooo. No hewɔ lɛ te esa akɛ wɔnu kuku nɛɛ shishi wɔha tɛŋŋ?
Wɔkaneɔ yɛ Hebribii 9:15-17 akɛ: “Ni enɛ nɔŋŋ hewɔ ni [Kristo] ji kpaŋmɔ hee lɛ mlidamɔlɔ lɛ, bɔni afee ni ekɛ gbele akpata klɛŋklɛŋ kpaŋmɔ lɛ nɔ tɔmɔi lɛ, ni mɛi ni atsɛ amɛ lɛ anine ashɛ naanɔ gboshinii lɛ ahe shiwoo lɛ nɔ. Ejaakɛ he ni awo shamaŋsheo [afee kpaŋmɔ] yɛ lɛ, ehia akɛ [adesa] ni wo [fee] lɛ agbo da, ejaakɛ shamaŋsheo [kpaŋmɔ] lɛ, ja agbo dani enaa hewalɛ, shi kɛ [adesa] ni wo [fee] lɛ hiɛ ka lolo lɛ, ebɛ hewalɛ.”a
Yehowa ji kpaŋmɔ hee lɛ Feelɔ diɛŋtsɛ. Yɛ Yeremia 31:31-34 lɛ, Nyɔŋmɔ je gbɛ egba efɔ shi akɛ Iɛ diɛŋtsɛ ekɛ ewebii lɛ baafee nɛkɛ kpaŋmɔ hee nɛɛ. Bɔfo Paulo tsɛ ŋmalɛ nɛɛ yisɛɛ yɛ Hebribii 8:8-13, ni tsɔɔ akɛ Paulo nu shishi jogbaŋŋ akɛ, yɛ anɔkwale mli Iɛ, Nyɔŋmɔ diɛŋtsɛ ji mɔ ni fee nɛkɛ ŋwɛi kpaŋmɔ nɛɛ.
Shi, yɛ Hebribii yitso 9 lɛ mli Iɛ, Paulo tee nɔ ewie gbɛhei sɔrɔtoi ni Yesu tsu he nii yɛ nɔ ni kɔɔ kpaŋmɔ hee lɛ he lɛ mli. Kristo ba akɛ nɛkɛ kpaŋmɔ nɛɛ he Osɔfo Nukpa.Kɛji okwɛ yɛ gbɛ kroko hu nɔ lɛ, Yesu ji afɔleshaa nɔ kɛha kpaŋmɔ hee Iɛ; Kristo la lɛ pɛ baanyɛ ‘atsumɔ wɔhenilee he kɛjɛ nitsumɔi gbohii amli.’ Kristo ji nɛkɛ kpaŋmɔ nɛɛ Teŋdamɔlɔ hu, taakɛ bɔ ni Mose ji mɔ ni fee Mla kpaŋmɔ lɛ teŋdamɔlɔ lɛ.—Hebribii 9:11-15.
Paulo tsi ta akɛ gbele he miihia, bɔni afee ni akɛwo kpaŋmɔi ni yɔɔ Nyɔŋmɔ kɛ adesai ateŋ lɛ mli hewalɛ. Mla kpaŋmɔ lɛ ji enɛ he nɔkwɛmɔ nɔ. Mose ji eteŋdamɔlɔ, mɔ ni kɛ nɛkɛ gbeekpamɔ ni ka Nyɔŋmɔ kɛ heloo naa Israel teŋ nɛɛ baaba. Enɛ hewɔ lɛ Mose tsu gbɛfaŋnɔ ko ni he hiaa waa he nii, ni lɛ ji adesa ni tsu lsraelbii ni akɛ amɛ bote kpaŋmɔ mli lɛ ahe nii. No hewɔ lɛ anyɛ abu Mose akɛ adesa nilee kpaŋmɔ, ni ji Mla kpaŋmɔ ni jɛ Yehowa ŋɔɔ lɛ. Shi ani ehe bahia ni Mose afɔse ela ni ji ewala eshwie shi koni no aha Mla kpaŋmɔ lɛ abɔi nitsumɔ? Dabi. Akɛ kooloi ha yɛ enajiaŋ, ni akɛ amɛla lɛ ye Mose la najiaŋ.—Hebribii 9:18-22.
Shi kpaŋmɔ hee ni ka Yehowa kɛ maŋ ni ji mumɔŋ Israel teŋ lɛ hu? Yesu Kristo na hegbɛ ko ni yɔɔ nyam akɛ mlidamɔlɔ, ni ji Teŋdamɔlɔ yɛ Yehowa kɛ mumɔŋ Israel teŋ. Eyɛ mli akɛ nɛkɛ kpaŋmɔ nɛɛ jɛ Yehowa ŋɔɔ moŋ, shi edamɔ Yesu Kristo nɔ titri. Kɛfata Teŋdamɔlɔ ni eji lɛ he lɛ, Yesu kɛ mɛi ni baafee klɛŋklɛŋbii ni abaaŋɔ amɛ awo nɛkɛ kpaŋmɔ nɛɛ mli lɛ na sharamɔ tɛɛ yɛ heloo mli. (Luka 22:20, 28, 29) Kɛfata he Iɛ, lɛ ji mɔ ni sa akɛ ekɛ afɔleshaa ni he hiaa ni akɛaawo kpaŋmɔ lɛ mli hewalɛ lɛ aha. Jeee kooloi foji komɛi kɛkɛ akɛsha afɔle nɛɛ, shi moŋ adesa wala ni eye emuu. No hewɔ lɛ Paulo baanyɛ awie Kristo he akɛ adesa ni fee kpaŋmɔ ni ji kpaŋmɔ hee lɛ. Beni “Kristo yabote . . . ŋwɛi diɛŋtsɛ . . . , koni agbɛnɛ eyapue yɛ Nyɔŋmɔ hiɛ eha wɔ” lɛ sɛɛ, dani ewo kpaŋmɔ hee lɛ mli hewalɛ.—Hebribii 9:12-14, 24.
Yɛ wiemɔi ni ewie yɛ Mose kɛ Yesu he akɛ adesai ni fee kpaŋmɔ lɛ, Paulo etsɔɔɔ akɛ amɛ diɛŋtsɛ amɛŋɔɔ kpaŋmɔi sɔrɔtoi ni kɔɔ amɛhe, ni Nyɔŋmɔ diɛŋtsɛ fee lɛ, jɛ kɛba. Shi nakai adesai enyɔ lɛ kɛ amɛhe wo mli vii ni amɛtsu nii akɛ teŋdamɔlɔi ni akɛfee kpaŋmɔi sɔrɔtoi ni kɔɔ amɛhe lɛ. Ni yɛ amɛteŋ eko fɛɛ eko mli lɛ, gbele he miihia—akɛ kooloi to Mose najiaŋ, ni Yesu kɛ ela ni ji ewala ha kɛha mɛi ni yɔɔ kpaŋmɔ hee lɛ mli lɛ.
[Shishigbɛ niŋmai]
a Atsɔɔ Hela wiemɔi enyɔ ni akɛtsu nii yɛ biɛ kɛha “mɔ ni fee kpaŋmɔ” lɛ shishi ŋmiiŋmi akɛ “yɛ (mɔ) ni kɛ ehe fee kpaŋmɔ lɛ gbɛfaŋ” aloo “yɛ [mɔ] ni feɔ kpaŋmɔ lɛ gbɛfaŋ.”—The Kingdom Interlinear Translation of the Greek Scriptures, ni Watchtower Bible and Tract Society of New York, Inc. fee Iɛ, kɛ The Interlinear Greek-English New Testament, ni Dr. Alfred Marshall fee lɛ lɛ.