Tooi Krokomɛi lɛ kɛ Kpaŋmɔ Hee Lɛ
“Gbɔi . . .: mɔ fɛɛ mɔ ni yeɔ hejɔɔmɔ gbi lɛ ni ebuleee lɛ, ni emɔɔ mikpaŋmɔ lɛ mli lɛ, amɛ hu mikɛ amɛ aaaba migɔŋ krɔŋkrɔŋ lɛ nɔ.”—YESAIA 56:6, 7.
1. (a) Taakɛ Yohane ninaa lɛ tsɔɔ lɛ, mɛni anyɛɔ atsuɔ yɛ be mli ni ahiɛ Yehowa kojomɔ kɔɔyɔi lɛ amli lɛ? (b) Mɛɛ gbɔmɛi asafoku ni sa kadimɔ Yohane na?
YƐ KPOJIEMƆ wolo lɛ mli ninaa ni ji ejwɛ lɛ mli lɛ, bɔfo Yohane na hiɛkpatamɔ kɔɔyɔi ni ji Yehowa kojomɔ lɛ ni atsĩ naa yɛ be mli ni asɔoɔ “Nyɔŋmɔ Israel lɛ” mli bii lɛ fɛɛ anaa kɛgbeɔ naa kwraa lɛ. Mɛnɛɛmɛi ji mɛi ni ajɔɔ amɛ klɛŋklɛŋ kɛtsɔ Yesu, mɔ ni ji Abraham seshi lɛ mli mɔ titri lɛ nɔ lɛ. (Galatabii 6:16; 1 Mose 22:18; Kpojiemɔ 7:1-4) Yɛ nakai ninaa lɛ nɔŋŋ mli lɛ, Yohane na “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli . . . , ni amɛbolɔ kɛ gbee waa amɛkɛɛ: Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ kɛ toobi lɛ nɔ̃!” (Kpojiemɔ 7:9, 10) Asafo babaoo lɛ kɛ kɛɛmɔ ni amɛkɛɔ akɛ, “Yiwalaheremɔ lɛ ji . . . toobi lɛ nɔ̃” lɛ tsɔɔ akɛ ajɔɔ amɛ hu kɛtsɔ Abraham Seshi lɛ nɔ.
2. Mɛɛ be asafo babaoo lɛ pue, ni te ayɔse lɛ aha tɛŋŋ?
2 Abayɔse nɛkɛ asafo babaoo nɛɛ yɛ afi 1935 mli tɔ̃ɔ, ni ŋmɛnɛ lɛ amɛyi fa fe akpekpei enumɔ. Akɛni akadi amɛ akɛ amɛbaafo amanehulu kpeteŋkpele lɛ hewɔ lɛ, abaagbála emli bii lɛ amli kɛha naanɔ wala beni Yesu gbálaa “gwantɛŋi” lɛ amli kɛjɛɔ “abotiai” lɛ ateŋ lɛ. Kristofoi ni yɔɔ asafo babaoo lɛ mli lɛ fata “tooi krokomɛi” lɛ ahe yɛ Yesu abɛbua ni kɔɔ tookui ahe lɛ mli. Amɛhiɛ kã nɔ akɛ amɛbaahi shi kɛya naanɔ yɛ paradeiso shikpɔŋ nɔ.—Mateo 25:31-46; Yohane 10:16; Kpojiemɔ 21:3, 4.
3. Esoro Kristofoi ni afɔ amɛ mu lɛ kɛ tooi krokomɛi lɛ yɛ kpaŋmɔ hee lɛ gbɛfaŋ yɛ mɛɛ gbɛ nɔ?
3 Yɛ mɛi 144,000 lɛ agbɛfaŋ lɛ, atsuɔ Abraham kpaŋmɔ lɛ mli jɔɔmɔ lɛ he nii kɛtsɔɔ kpaŋmɔ hee lɛ nɔ. Ákɛ mɛi ni yɔɔ gbɛfaŋnɔ yɛ kpaŋmɔ nɛɛ mli lɛ, amɛbajeɔ ‘duromɔ shishi,’ ni ‘amɛyɛ Kristo mla shishi.’ (Romabii 6:15; 1 Korintobii 9:21) Enɛ hewɔ lɛ, Nyɔŋmɔ Israel lɛ mli bii 144,000 lɛ pɛ ji mɛi ni yeɔ okadi nibii lɛ eko yɛ gbɛ ni ja nɔ yɛ Yesu gbele lɛ Kaimɔ be lɛ mli, ni amɛ pɛ ji mɛi ni Yesu kɛfee ekpaŋmɔ kɛha Maŋtsɛyeli lɛ. (Luka 22:19, 20, 29) Asafo babaoo lɛ mli bii lɛ bɛ gbɛfaŋnɔ yɛ kpaŋmɔ hee lɛ mli. Shi kɛlɛ, amɛkɛ Nyɔŋmɔ Israel lɛ bɔɔ ni amɛkɛ amɛ hiɔ shi yɛ amɛ “shikpɔŋ” lɛ nɔ. (Yesaia 66:8) No hewɔ lɛ nilee yɛ mli akɛ aaawie akɛ amɛ hu amɛbajeɔ Yehowa duromɔ shishi, ni amɛyɛ Kristo mla lɛ shishi. Eyɛ mli akɛ amɛbɛ gbɛfaŋnɔ yɛ kpaŋmɔ hee lɛ mli moŋ, shi amɛnáa he sɛɛ.
“Gbɔi” kɛ “Nyɔŋmɔ Israel Lɛ”
4, 5. (a) Taakɛ Yesaia tsɔɔ lɛ, mɛɛ kuu ko baasɔmɔ Yehowa? (b) Yesaia 56:6, 7 ba mli yɛ asafo babaoo lɛ nɔ yɛ mɛɛ gbɛ nɔ?
4 Gbalɔ Yesaia ŋma akɛ: “Gbɔi ni kɛ amɛhe bakpɛtɛɔ Yehowa he ni amɛsɔmɔɔ lɛ ni amɛsumɔɔ Yehowa gbɛi lɛ, ni amɛtsɔmɔɔ etsuji lɛ: mɔ fɛɛ mɔ ni yeɔ hejɔɔmɔ gbi lɛ ni ebuleee lɛ, ni emɔɔ mikpaŋmɔ lɛ mli lɛ, amɛ hu mikɛ amɛ aaaba migɔŋ krɔŋkrɔŋ lɛ nɔ, ni maha amɛnya yɛ misɔlemɔwe lɛ: amɛshãa afɔlei kɛ amɛgbee afɔlei lɛ aaasa mihiɛ yɛ mifɔleshaa latɛ lɛ nɔ.” (Yesaia 56:6, 7) Yɛ Israel lɛ, enɛ tsɔɔ akɛ “gbɔi,” mɛi ni jeee Israelbii, baajá Yehowa—amɛbaasumɔ egbɛi lɛ, amɛbaaye Mla kpaŋmɔ lɛ mli wiemɔi lɛ anɔ, amɛbaaye Hejɔɔmɔ Gbi lɛ, ni amɛbaashã afɔlei yɛ sɔlemɔtsu, ni ji Nyɔŋmɔ “sɔlemɔwe” lɛ mli.—Mateo 21:13.
5 Yɛ wɔgbii nɛɛ amli lɛ, “gbɔi ni kɛ amɛhe bakpɛtɛɔ Yehowa he” lɛ ji asafo babaoo lɛ. Mɛnɛɛmɛi fataa Nyɔŋmɔ Israel he ni amɛkɛ sɔɔmɔ haa Yehowa. (Zakaria 8:23) Amɛkɛ afɔlei ni akpɛlɛɔ nɔ haa tamɔ bɔ ni Nyɔŋmɔ Israel lɛ hu feɔ lɛ pɛpɛɛpɛ. (Hebribii 13:15, 16) Amɛjáa yɛ Nyɔŋmɔ mumɔŋ sɔlemɔtsu, ni ji ‘esɔlemɔwe’ lɛ mli. (Okɛto Kpojiemɔ 7:15 he.) Ani amɛyeɔ daa otsi Hejɔɔmɔ Gbi lɛ? Akɛ famɔ hako mɛi ni afɔ amɛ mu lɛ kɛ tooi krokomɛi lɛ akɛ amɛfee nakai. (Kolosebii 2:16, 17) Shi kɛlɛ, Paulo kɛɛ Hebri Kristofoi ni afɔ amɛ mu lɛ akɛ: “Hejɔɔmɔ gbi yeli ko kã shi kɛ̃ ha Nyɔŋmɔ maŋ lɛ. Ejaakɛ mɔ ni ebote ehejɔɔmɔ lɛ mli lɛ, lɛ diɛŋtsɛ hu ejɔɔ ehe kɛjɛ enitsumɔi lɛ amli, taakɛ bɔ ni Nyɔŋmɔ jɔɔ ehe kɛjɛ enɔ̃ lɛ mli lɛ.” (Hebribii 4:9, 10) Nakai Hebribii lɛ bote nɛkɛ “hejɔɔmɔ gbi yeli” nɛɛ mli beni amɛba amɛhe shi amɛha “Nyɔŋmɔ jalɛ lɛ” ni amɛjɔɔ amɛhe kɛjɛ mɔdɛŋ ni amɛbɔɔ akɛ amɛaabu amɛhe bem kɛtsɔ Mla lɛ nitsumɔi anɔ lɛ mli. (Romabii 10:3, 4) Jeŋmajiaŋbii Kristofoi ni afɔ amɛ mu lɛ náa nakai hejɔɔmɔ lɛ nɔŋŋ mli ŋɔɔmɔ kɛtsɔɔ amɛhe shi ni amɛbaa amɛhaa Yehowa jalɛ lɛ nɔ. Asafo babaoo lɛ fataa amɛhe yɛ nakai hejɔɔmɔ lɛ mli.
6. Tooi krokomɛi lɛ kɛ amɛhe woɔ kpaŋmɔ hee lɛ shishi ŋmɛnɛ yɛ mɛɛ gbɛ nɔ?
6 Kɛfata he lɛ, tooi krokomɛi lɛ kɛ amɛhe woɔ kpaŋmɔ hee lɛ shishi tamɔ bɔ ni gbɔi ni hi shi yɛ blema lɛ kɛ amɛhe wo Mla kpaŋmɔ lɛ shishi lɛ. Yɛ mɛɛ gbɛ nɔ? Jeee kɛtsɔ mɛi ni náa mli gbɛfaŋnɔ ni amɛaatsɔmɔ lɛ nɔ, shi moŋ kɛtsɔ amɛhe shi ni amɛbaa amɛhaa mlai ni kɔɔ he lɛ kɛ egbɛjianɔtoi lɛ ahe sɛɛ ni amɛnáa lɛ nɔ. (Okɛto Yeremia 31:33, 34 he.) Taakɛ amɛnanemɛi ni afɔ amɛ mu lɛ ji lɛ, aŋmala Yehowa mla lɛ yɛ tooi krokomɛi lɛ ‘atsui mli.’ Amɛsumɔɔ Yehowa kitai kɛ shishitoo mlai lɛ waa, ni amɛboɔ toi. (Lala 37:31; 119:97) Taakɛ Kristofoi ni afɔ amɛ mu lɛ ji lɛ, amɛle Yehowa. (Yohane 17:3) Ni ketiafoo hu? Aaashɛ afii 1,500 dani aaafee kpaŋmɔ hee lɛ, Mose wo Israelbii lɛ hewalɛ akɛ: “Nyɛfolɔa nyɛtsuii aketia.” (5 Mose 10:16; Yeremia 4:4) Eyɛ mli akɛ heloonaa ketiafoo ni awo he kita lɛ sɛɛ fo beni ajie Mla lɛ moŋ, shi esa akɛ mɛi ni afɔ amɛ mu lɛ kɛ tooi krokomɛi lɛ fɛɛ afolɔ amɛtsuii “ketia.” (Kolosebii 2:11) Yɛ naagbee lɛ, Yehowa damɔɔ Yesu ‘kpaŋmɔ lá’ ni efɔse eshwie shi lɛ nɔ ekɛ tooi krokomɛi lɛ atɔmɔi keɔ amɛ. (Mateo 26:28; 1 Yohane 1:9; 2:2) Nyɔŋmɔ eŋɔɔɔ amɛ akɛ emumɔŋ bii, tamɔ bɔ ni efee yɛ mɛi 144,000 lɛ agbɛfaŋ lɛ. Shi ebuɔ tooi krokomɛi lɛ jalɔi, yɛ shishinumɔ ni akɛbu Abraham jalɔ akɛ Nyɔŋmɔ shieŋtsɛ lɛ naa.—Mateo 25:46; Romabii 4:2, 3; Yakobo 2:23.
7. Mɛɛ gbɛkpamɔ naa gbeleɔ kɛhaa tooi krokomɛi lɛ ŋmɛnɛ, ni namɛi abuɔ amɛ jalɔi taakɛ abu Abraham jalɔ lɛ?
7 Yɛ mɛi 144,000 lɛ agbɛfaŋ lɛ, jalɔi ni abuɔ amɛ lɛ gbeleɔ gbɛ kɛhaa hiɛnɔkamɔ ni amɛnáa akɛ amɛkɛ Yesu baaye maŋtsɛ yɛ ŋwɛi Maŋtsɛyeli lɛ mli. (Romabii 8:16, 17; Galatabii 2:16) Kɛha tooi krokomɛi lɛ, jalɔi ni abuɔ amɛ akɛ Nyɔŋmɔ shieŋtsɛmɛi lɛ haa amɛnáa hiɛnɔkamɔ kɛha naanɔ wala yɛ paradeiso shikpɔŋ nɔ—kɛtsɔ Harmagedon ni amɛaafo akɛ asafo babaoo lɛ fã, loo kɛtsɔ ‘jalɔi lɛ agbohiiashitee’ lɛ nɔ. (Bɔfoi lɛ Asaji 24:15) Kwɛ hegbɛ ni eji akɛ aaaná hiɛnɔkamɔ ni tamɔ nɛkɛ, ní afee jeŋ muu fɛɛ Maŋtsɛ lɛ shieŋtsɛ, ni ‘ato ebuu lɛ mli’! (Lala 15:1, 2) Hɛɛ, ajɔɔ mɛi ni afɔ amɛ mu lɛ kɛ tooi krokomɛi lɛ fɛɛ yɛ naakpɛɛ gbɛ nɔ kɛtsɔ Yesu, mɔ ni ji Abraham Seshi lɛ nɔ.
Kpatamɔ Gbi Kpeteŋkpele Ko
8. Afɔlei ni ashãa yɛ Kpatamɔ Gbi lɛ nɔ yɛ Mla lɛ shishi lɛ feɔ mɛni he mfoniri?
8 Beni ewieɔ kpaŋmɔ hee lɛ he lɛ, Paulo kai ekanelɔi lɛ yɛ daa afi Kpatamɔ Gbi ni yɔɔ Mla kpaŋmɔ lɛ shishi lɛ he. Ashãa afɔlei sɔrɔtoi ni hiɛ amɛhe, yɛ nakai gbi lɛ nɔ—ekome kɛha Levi akutso lɛ ni yeɔ osɔfoi lɛ kɛ ekroko kɛha akutsei 12 ni yeee osɔfoi lɛ. Ajɛ jeeŋmɔ atsɔɔ enɛ mli akɛ efeɔ Yesu afɔleshaa kpeteŋkpele ni he baaba sɛɛnamɔ kɛha mɛi 144,000 ni yɔɔ ŋwɛi hiɛnɔkamɔ lɛ kɛ akpekpei abɔ ni yɔɔ shikpɔŋ nɔ hiɛnɔkamɔ lɛ fɛɛ he mfoniri.a Paulo tsɔɔ akɛ yɛ emlibaa mli lɛ, akɛ Yesu afɔleshaa lɛ mli sɛɛnamɔi lɛ haa kɛtsɔɔ Kpatamɔ Gbi kpeteŋkpele ko nɔ yɛ kpaŋmɔ hee lɛ mli. Ákɛ Osɔfonukpa kɛha nɛkɛ gbi kpeteŋkpele nɛɛ, Yesu kɛ ewala ni eye emuu lɛ hã akɛ kpatamɔ afɔleshaa, bɔni afee ni enine ashɛ “naanɔ kpɔmɔ” nɔ kɛha adesai.—Hebribii 9:11-24.
9. Akɛni amɛyɔɔ kpaŋmɔ hee lɛ mli hewɔ lɛ, mɛni Hebri Kristofoi ni afɔ amɛ mu lɛ anine baanyɛ ashɛ nɔ?
9 Hebri Kristofoi ni hi shi yɛ klɛŋklɛŋ afii oha lɛ mli lɛ ateŋ mɛi pii ji “[Mose] Mla lɛ he hiɛdɔlɔi” lolo. (Bɔfoi lɛ Asaji 21:20) Belɛ, esa jogbaŋŋ akɛ Paulo kai amɛ akɛ: “[Yesu] ji kpaŋmɔ hee mlidamɔlɔ lɛ, beni afee ni ekɛ gbele akpata klɛŋklɛŋ kpaŋmɔ lɛ nɔ tɔmɔi lɛ, ní mɛi ni atsɛ amɛ lɛ anine ashɛ naanɔ gboshinii lɛ ahe shiwoo lɛ nɔ.” (Hebribii 9:15) Kpaŋmɔ hee lɛ ha Hebri Kristofoi lɛ ye amɛhe kɛjɛ kpaŋmɔ momo lɛ, ni jie amɛ eshafeemɔ lɛ kpo lɛ shishi. Yɛ kpaŋmɔ hee lɛ hewɔ lɛ, amɛnine baanyɛ ashɛ “naanɔ [ŋwɛi] gboshinii lɛ ahe shiwoo lɛ nɔ.”
10. Mɛi ni afɔ amɛ mu lɛ kɛ tooi krokomɛi lɛ daa Nyɔŋmɔ shi yɛ mɛni he?
10 “Mɔ fɛɛ mɔ” ni “heɔ bi lɛ nɔ yeɔ lɛ” baaná kpɔmɔ afɔleshaa lɛ he sɛɛ. (Yohane 3:16, 36) Paulo wie akɛ: “Kristo hu, nɔ ni aŋɔ lɛ aha shikome, koni etere mɛi pii ahe eshai kɛya lɛ, nɔ ni ji shii enyɔ lɛ eeeshi esha ebapue eha mɛi ni kwɛɔ lɛ gbɛ lɛ ayiwalaheremɔ.” (Hebribii 9:28) Ŋmɛnɛ, mɛi ni kɛ ekãa kwɛɔ Yesu gbɛ lɛ ateŋ mɛi komɛi ji Kristofoi ni afɔ amɛ mu, ni ji Nyɔŋmɔ Israel lɛ ateŋ mɛi ni yɔɔ wala mli lɛ kɛ gbɔmɛi akpekpei abɔ ni feɔ asafo babaoo lɛ, ni amɛ hu amɛyɔɔ gboshinii ni hiɔ shi kɛyaa naanɔ lɛ. Kui enyɔ lɛ fɛɛ daa Nyɔŋmɔ shi yɛ kpaŋmɔ hee lɛ kɛ jɔɔmɔi ni haa mɔ wala, ni jɛɔ mli kɛbaa, ní Kpatamɔ Gbi kpeteŋkpele lɛ kɛ Osɔfonukpa, Yesu, sɔɔmɔ yɛ ŋwɛi He Krɔŋkrɔŋ Fe Fɛɛ lɛ fata he lɛ he.
Aatsu Nii kɛ Hiɛdɔɔ yɛ Sɔɔmɔ Krɔŋkrɔŋ Mli
11. Akɛni atsuu amɛ henileei ahe kɛtsɔ Yesu afɔleshaa lɛ nɔ hewɔ lɛ, mɛni mɛi ni afɔ amɛ mu lɛ kɛ tooi krokomɛi lɛ fɛɛ kɛ miishɛɛ feɔ?
11 Yɛ ewolo ni eŋma emaje Hebribii lɛ mli lɛ, Paulo mã bɔ ni Yesu afɔleshaa lɛ jara wa ha yɛ kpaŋmɔ hee lɛ he gbɛjianɔtoo lɛ mli, kɛ́ akɛto eshai ahe afɔlei ahe yɛ kpaŋmɔ momo lɛ shishi lɛ nɔ mi. (Hebribii 9:13-15) Yesu afɔleshaa ni hi lɛ nyɛɔ ‘etsumɔɔ wɔ henilee lɛ he kɛjɛɔ nitsumɔi gbohii amli, koni wɔkɛ sɔɔmɔ krɔŋkrɔŋ aha Nyɔŋmɔ hiɛkalɔ lɛ.’ Yɛ Hebri Kristofoi lɛ agbɛfaŋ lɛ, “nitsumɔi gbohii” lɛ ekomɛi ji “klɛŋklɛŋ kpaŋmɔ lɛ nɔ tɔmɔi lɛ.” Yɛ Kristofoi ni yɔɔ ŋmɛnɛ lɛ agbɛfaŋ lɛ, ekomɛi ji eshai ni afee yɛ bei ni eho lɛ amli, ní ajie anɔkwa tsuitsakemɔ kpo yɛ he, ní Nyɔŋmɔ kɛke lɛ. (1 Korintobii 6:9-11) Akɛni atsuu amɛ henileei ahe hewɔ lɛ, Kristofoi ni afɔ amɛ mu lɛ kɛ ‘sɔɔmɔ krɔŋkrɔŋ haa Nyɔŋmɔ hiɛkalɔ lɛ.’ Ni asafo babaoo lɛ hu feɔ nakai. Akɛni amɛtsuu amɛ henileei ahe kɛtsɔ “toobi lɛ lá lɛ” nɔ hewɔ lɛ, amɛyɛ Nyɔŋmɔ mumɔŋ sɔlemɔtsu kpeteŋkpele lɛ mli, “ni amɛjáa lɛ nyɔɔŋ kɛ shwane.”—Kpojiemɔ 7:14, 15.
12. Mɛɛ gbɛ nɔ wɔtsɔɔ yɛ akɛ, wɔyɛ “hemɔkɛyeli ni wɔyɔɔ hewalɛ yɛ nɔ”?
12 Kɛfata he lɛ, Paulo wie akɛ: “Nyɛhaa wɔkɛ anɔkwa tsuii abɛŋkɛa yɛ hemɔkɛyeli ni wɔyɔɔ hewalɛ yɛ nɔ lɛ mli, kɛ tsui hu ni atsuu he ni ebɛ henilee fɔŋ ko dɔŋŋ, kɛ gbɔmɔtso ni akɛ nu ni mli tse eju he.” (Hebribii 10:22) Mɛɛ gbɛ nɔ wɔɔtsɔɔ yɛ akɛ wɔyɛ “hemɔkɛyeli ni wɔyɔɔ hewalɛ yɛ nɔ”? Paulo wo Hebri Kristofoi lɛ hewalɛ akɛ: “Nyɛhaa wɔmɔa wɔ [ŋwɛi] hiɛnɔkamɔ jajemɔ lɛ mli ni awaa ni ekagbugbãa, ejaakɛ mɔ ni wo shi lɛ anɔkwafo ni, ni nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Hebribii 10:23-25) Kɛ́ wɔhemɔkɛyeli lɛ hiɛ kã lɛ, wɔ hu ‘wɔkwaŋ wɔhe naabuamɔ.’ Wɔɔná miishɛɛ akɛ wɔɔkanya wɔnyɛmimɛi lɛ ni amɛ hu amɛkanya wɔ kɛha suɔmɔ kɛ nitsumɔi kpakpai, koni wɔwowoo wɔhe hewalɛ kɛha nitsumɔ ni he hiaa, ni ji wɔhiɛnɔkamɔ lɛ ni wɔɔjaje yɛ faŋŋ mli, kɛ́ eji shikpɔŋ nɔ nɔ̃ loo ŋwɛi nɔ̃.—Yohane 13:35.
“Naanɔ Kpaŋmɔ” Lɛ
13, 14. Kpaŋmɔ hee lɛ ji naanɔ nɔ̃ yɛ mɛɛ gbɛi anɔ?
13 Mɛni baaba kɛji mɛi 144,000 lɛ ateŋ naagbee bii lɛ anine shɛ amɛ ŋwɛi hiɛnɔkamɔ lɛ nɔ? Ani kpaŋmɔ hee lɛ baakpa nitsumɔ? Yɛ nakai beaŋ lɛ, Nyɔŋmɔ Israel mli bii ni eshwɛ lɛ ateŋ mɔ ko bɛ shikpɔŋ nɔ dɔŋŋ. Mɛi fɛɛ ni yɔɔ gbɛfaŋnɔ yɛ kpaŋmɔ lɛ mli lɛ kɛ Yesu baahi “[e-Tsɛ] maŋtsɛyeli lɛ mli.” (Mateo 26:29) Shi wɔkaiɔ Paulo wiemɔi ni yɔɔ ewolo ni eŋma eyaha Hebribii lɛ mli lɛ, akɛ: “Hejɔlɛ Nyɔŋmɔ lɛ . . . jie tooi lɛ akwɛlɔ kpeteŋkpele . . . [lɛ] kɛjɛ gbohii ateŋ yɛ naanɔ kpaŋmɔ lɛ lá lɛ mli.” (Hebribii 13:20; wɔma efã ko nɔ mi; Yesaia 55:3) Kpaŋmɔ hee lɛ ji naanɔ nɔ̃ yɛ mɛɛ shishinumɔ naa?
14 Klɛŋklɛŋ lɛ, ákɛ nɔ ni tamɔɔɔ Mla kpaŋmɔ lɛ, akɛ ekroko yeŋ najiaŋ kɔkɔɔkɔ. Nɔ ni ji enyɔ lɛ, nibii ni baajɛ enitsumɔ mli aba lɛ baahi shi daa, taakɛ Yesu maŋtsɛyeli lɛ hu ji lɛ. (Okɛ Luka 1:33 ato 1 Korintobii 15:27, 28 he.) Ŋwɛi Maŋtsɛyeli lɛ yɛ gbɛhe ni hiɔ shi kɛyaa naanɔ yɛ Yehowa yiŋtoi amli. (Kpojiemɔ 22:5) Ni nɔ ni ji etɛ lɛ, tooi krokomɛi lɛ baaya nɔ amɛná kpaŋmɔ hee lɛ he gbɛjianɔtoo lɛ he sɛɛ. Yɛ Kristo Afii Akpe Nɔyeli lɛ mli lɛ, adesai anɔkwafoi baaya nɔ ‘amɛkɛ sɔɔmɔ krɔŋkrɔŋ aha Yehowa nyɔɔŋ kɛ shwane yɛ esɔlemɔtsu lɛ mli,’ taakɛ amɛfeɔ bianɛ lɛ. Yehowa kaiŋ amɛ tsutsu eshai ni edamɔ Yesu “kpaŋmɔ lɛ lá” lɛ nɔ ekɛke amɛ lɛ dɔŋŋ. Amɛbaaya nɔ amɛná jalɛ shidaamɔ mli ŋɔɔmɔ akɛ Yehowa shieŋtsɛmɛi, ni abaakã he aŋma emla lɛ yɛ amɛtsuii amli.
15. Tsɔɔmɔ wekukpaa ni kã Yehowa kɛ eshikpɔŋ nɔ jalɔi lɛ ateŋ yɛ jeŋ hee lɛ mli lɛ mli.
15 Ani Yehowa baanyɛ awie yɛ nakai beaŋ yɛ etsuji adesai nɛɛ ahe akɛ: ‘Miji amɛ-Nyɔŋmɔ, ni amɛji mimaŋ’? Hɛɛ. “Eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi.” (Kpojiemɔ 21:3; wɔma efã ko nɔ mi.) Amɛbaatsɔmɔ “mɛi krɔŋkrɔŋi lɛ ansara lɛ,” “maŋ ni asumɔɔ lɛ,” Yesu Kristo ŋwɛi ayemforo lɛ najiaŋdamɔlɔi yɛ shikpɔŋ nɔ. (Kpojiemɔ 14:1; 20:9; 21:2) Enɛɛmɛi fɛɛ baaba mli, yɛ Yesu “kpaŋmɔ lɛ lá” ni afɔse ashwie shi lɛ mli hemɔkɛyeli ni amɛyɔɔ kɛ amɛhe shi ni amɛbaa amɛhaa ŋwɛi maŋtsɛmɛi kɛ osɔfoi, ní beni amɛyɔɔ shikpɔŋ nɔ lɛ, amɛji Nyɔŋmɔ Israel lɛ hewɔ.—Kpojiemɔ 5:10.
16. (a) Mɛɛ hegbɛi mɛɔ mɛi ni abaatee amɛ shi kɛba shikpɔŋ nɔ lɛ? (b) Mɛɛ jɔɔmɔi baaba yɛ afii akpe lɛ naagbee?
16 Ni mɛi ni egboi ni ateeɔ amɛ shi yɛ shikpɔŋ nɔ lɛ hu? (Yohane 5:28, 29) Amɛ hu abaafɔ̃ amɛ nine ni ‘amɛbaná jɔɔmɔi amɛha amɛhe’ kɛtsɔ Yesu, ni ji Abraham Seshi lɛ nɔ. (1 Mose 22:18) Ehe baahia ni amɛ hu amɛsumɔ Yehowa gbɛi lɛ, ni amɛsɔmɔ lɛ, ni amɛshã afɔlei ni ekpɛlɛɔ nɔ, ni amɛkɛ sɔɔmɔ krɔŋkrɔŋ aha lɛ yɛ esɔlemɔwe lɛ. Mɛi ni feɔ nakai lɛ baabote Nyɔŋmɔ hejɔɔmɔ lɛ mli. (Yesaia 56:6, 7) Beni afii akpe lɛ baaba naagbee lɛ, no mli lɛ akɛ anɔkwafoi lɛ fɛɛ eba adesa emuuyeli mli kɛtsɔ Yesu Kristo kɛ enanemɛi osɔfoi 144,000 lɛ asɔɔmɔ lɛ nɔ. Amɛ baatsɔmɔ jalɔi, jeee akɛ abaatsɛ amɛ jalɔi akɛ Nyɔŋmɔ shieŋtsɛmɛi kɛkɛ. ‘Amɛbaaba wala mli,’ ni amɛbaaye amɛhe kwraa kɛjɛ esha kɛ gbele ni amɛná kɛjɛ Adam ŋɔɔ lɛ mli. (Kpojiemɔ 20:5; 22:2) Mɛɛ jɔɔmɔ po eeeji nɛkɛ! Yɛ wɔ shishinumɔ naa ŋmɛnɛ lɛ, etamɔ nɔ ni no mli lɛ Yesu kɛ mɛi 144,000 lɛ etsu amɛ osɔfoyeli nitsumɔ lɛ amɛgbe naa. Amɛkɛ Kpatamɔ Gbi kpeteŋkpele lɛ mli jɔɔmɔi lɛ etsu nii kɛmɔ shi. Kɛfata he lɛ, Yesu ‘baaŋɔ maŋtsɛyeli lɛ eha e-Nyɔŋmɔ kɛ Tsɛ lɛ.’ (1 Korintobii 15:24) Naagbee kaa baaba kɛha adesai, ni no sɛɛ lɛ abaakpata Satan kɛ edaimonioi lɛ ahiɛ kɛya naanɔ.—Kpojiemɔ 20:7, 10.
17. Yɛ miishɛɛ ni mɛɔ wɔ lɛ hewɔ lɛ, mɛni esa akɛ wɔteŋ mɔ fɛɛ mɔ atswa efai shi akɛ ebaafee?
17 Mɛɛ gbɛfaŋnɔ, kɛji eko yɛ lɛ, “naanɔ kpaŋmɔ” lɛ baatsu yɛ miishɛɛ yinɔ ni baaje shishi yɛ nakai be mli lɛ mli? Jeee wɔ ji mɛi ni baatsɔɔ. Nɔ ni Yehowa ejie lɛ kpo kɛbashi bianɛ lɛ fa kɛha wɔ amrɔ nɛɛ. Ehaa wɔnaa kpɛɔ wɔhe waa diɛŋtsɛ. Susumɔ he okwɛ—naanɔ wala ákɛ “ŋwɛi hee kɛ shikpɔŋ hee” lɛ fã! (2 Petro 3:13) Eba akɛ nɔ ko kwraa gbɔjɔŋ bɔ ni wɔshweɔ ni wɔnine ashɛ nakai shiwoo lɛ nɔ lɛ mli. Ekolɛ efeŋ mlɛo akɛ wɔɔdamɔ shi shiŋŋ. Paulo kɛɛ: “Tsuishitoo ehia nyɛ, koni, beni nyɛfee Nyɔŋmɔ suɔmɔnaa nii lɛ, nyɛnine ashɛ shiwoo lɛ nɔ.” (Hebribii 10:36) Shi kaimɔ akɛ, naagba fɛɛ naagba ni esa akɛ wɔye nɔ kunim, shitee-kɛ-woo fɛɛ shitee-kɛ-woo ni esa akɛ wɔye nɔ lɛ, feɔ nɔ ko bibioo kwraa kɛ akɛmiito miishɛɛ ni mɛɔ wɔ lɛ he. (2 Korintobii 4:17) No hewɔ lɛ, eba akɛ wɔteŋ mɔ ko mɔ ko efeŋ “mɛi ni kpaleɔ kɛyaa hiɛkpatamɔ mli lɛ ateŋ mɛi komɛi.” Shi moŋ, eba akɛ wɔɔjie wɔhe kpo akɛ wɔji “mɛi ni kɛ hemɔkɛyeli náa amɛsusuma yiwalaheremɔ lɛ ateŋ mɛi komɛi.” (Hebribii 10:39) Eba akɛ wɔ fɛɛ wɔɔná Yehowa, kpaŋmɔi a-Nyɔŋmɔ lɛ mli hekɛnɔfɔɔ kɛmɔ shi, koni no afee naanɔ jɔɔmɔ kɛha wɔteŋ mɔ fɛɛ mɔ.
[Shishigbɛ niŋmai]
a Kwɛmɔ Yibaamɔ Kɛmiiya Shikpɔŋ Hee Nɔ, ni Watchtower Bible and Tract Society of New York, Inc. fee lɛ, yitso 13.
Ani Onu Shishi?
◻ Yɛ Kristofoi ni afɔ amɛ mu lɛ asɛɛ lɛ, namɛi ajɔɔ amɛ kɛtsɔɔ Abraham Seshi lɛ nɔ?
◻ Tooi krokomɛi lɛ ni ajɔɔ amɛ kɛtsɔɔ kpaŋmɔ hee lɛ nɔ lɛ tamɔ mɛi ni atsake amɛ kɛba Yudafoi ajamɔ mli yɛ kpaŋmɔ momo lɛ shishi lɛ yɛ mɛɛ gbɛ nɔ?
◻ Ajɔɔ tooi krokomɛi lɛ kɛtsɔɔ Kpatamɔ Gbi kpeteŋkpele lɛ he gbɛjianɔtoo lɛ nɔ yɛ mɛɛ gbɛ nɔ?
◻ Mɛni hewɔ Paulo tsɛ kpaŋmɔ hee lɛ akɛ “naanɔ kpaŋmɔ” lɛ?
[Akrabatsa ni yɔɔ baafa 21]
Sɔɔmɔ Krɔŋkrɔŋ yɛ Sɔlemɔwe Lɛ
Asafo babaoo lɛ kɛ Kristofoi ni afɔ amɛ mu lɛ jáa yɛ Yehowa mumɔŋ sɔlemɔtsu kpeteŋkpele lɛ shikpɔŋ nɔ kpo lɛ nɔ. (Kpojiemɔ 7:14, 15; 11:2) Yiŋtoo ko bɛ ni aaadamɔ nɔ amu sane naa akɛ amɛyɛ Jeŋmajiaŋbii Akpo ni etse ehe lɛ nɔ. Beni Yesu yɔɔ shikpɔŋ nɔ lɛ, no mli lɛ ayɛ Jeŋmajiaŋbii Akpo nɔ yɛ sɔlemɔwe lɛ. Shi, atooo gbɛjianɔ kɛhaaa Jeŋmajiaŋbii Akpo nɔ, yɛ Salomo kɛ Ezekiel sɔlemɔtsui ni ajɛ ŋwɛi akɛ amɛhe gbɛjianɔtoi ha lɛ amli. Yɛ Salomo sɔlemɔtsu lɛ mli lɛ, ayɛ agbo naa kpo teŋ, he ni Israelbii kɛ mɛi ni etsake kɛba Yudafoi ajamɔ lɛ mli, hii kɛ yei fɛɛ, jáa kutuu yɛ. Enɛ ji mumɔŋ sɔlemɔtsu lɛ shikpɔŋ nɔ kpo lɛ nɔ, he ni Yohane na asafo babaoo lɛ ni amɛkɛ sɔɔmɔ krɔŋkrɔŋ miiha yɛ lɛ he gbalɛ mfoniri.
Shi kɛlɛ, osɔfoi kɛ Levibii pɛ nyɛɔ amɛyaa mligbɛ kpo lɛ nɔ, he ni afɔleshaa latɛ kpeteŋkpele lɛ mã lɛ; osɔfoi pɛ nyɛɔ amɛyaa He Krɔŋkrɔŋ lɛ; ni osɔfonukpa lɛ pɛ nyɛɔ eyaa He Krɔŋkrɔŋ Fe Fɛɛ lɛ. Anuɔ mligbɛ kpo lɛ kɛ He Krɔŋkrɔŋ lɛ shishi akɛ amɛfeɔ Kristofoi ni afɔ amɛ mu ni yɔɔ shikpɔŋ nɔ lɛ amumɔŋ shihilɛ ni yɔɔ sɔrɔto kwraa lɛ he mfoniri. Ni He Krɔŋkrɔŋ Fe Fɛɛ lɛ feɔ ŋwɛi diɛŋtsɛ, he ni Kristofoi ni afɔ amɛ mu lɛ anine shɛɔ wala ni gbele bɛ mli nɔ yɛ, kɛfata amɛ ŋwɛi Osɔfonukpa lɛ he lɛ he mfoniri.—Hebribii 10:19, 20.
[Mfoniri ni yɔɔ baafa 23]
Miishɛɛ ni mɛɔ lɛ hewɔ lɛ, nyɛhaa wɔfea “mɛi ni kɛ hemɔkɛyeli náa amɛsusuma yiwalaheremɔ”