Saamɔ Ohe Oto!

“Nyɛsaa nyɛhe nyɛtoa, ejaakɛ nɔ̃ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.”—MAT. 24:44.

1, 2. (a) Mɛɛ nifeemɔi ni Biblia lɛ egba efɔ̃ shi abaanyɛ akɛto kootsɛ ko tutuamɔ he? (b) Te tutuamɔ ni baa lɛ kɔɔ ohe ehaa tɛŋŋ?

HIƐTSERƐJIELƆ ko ni ale lɛ waa lɛ kɛ kootsɛmɛi komɛi ni etsɔse amɛ lɛ shwɛɔ ni amɛfeee lɛ nɔ ko, ni ekɛjieɔ mɛi ahiɛtserɛ, ni ekɛ afii babaoo fee enɛ. Ekɛɛ akɛ: “Kɛ́ kooloo ko ná hekɛnɔfɔ̃ɔ yɛ omli lɛ, ehaa onuɔ he oookɛɛ akɛ nikeenii ni yɔɔ fɛo fe fɛɛ yɛ je lɛŋ eha bo.” Shi yɛ October 3, 2003 lɛ, hekɛnɔfɔ̃ɔ nɛɛ sɛɛ fo. Kooloi nɛɛ ateŋ ekome ni ji kootsɛ yɛŋ ko ni tsiimɔ ji kilogram 172 lɛ tutua lɛ, ni aleee nɔ hewɔ. Akpaaa nakai tutuamɔ lɛ gbɛ, ni asaŋ nuu lɛ esako ehe etoko tutuamɔ lɛ.

² Nɔ ni sa kadimɔ ji akɛ Biblia lɛ egba “kooloo” ko tutuamɔ he sane efɔ̃ shi, ni esa akɛ wɔsaa wɔhe wɔto nakai tutuamɔ lɛ. (Nyɛkanea Kpojiemɔ 17:15-18.) Namɔ kooloo nɛɛ baatutua? Yɛ gbɛ ni akpaaa gbɛ nɔ lɛ, Abonsam je lɛ baagbá ewo lɛ diɛŋtsɛ ehe. Kooloo ni tsũɔ tamɔ muneele lɛ damɔ shi kɛha Jeŋmaji Ekomefeemɔ lɛ, ni “akolontoi nyɔŋma” lɛ damɔ shi kɛha maŋkwramɔŋ nɔyelii fɛɛ. Kooloo lɛ kɛ akolontoi nyɔŋma lɛ baate shi amɛwo yoo ajwamaŋ ni ji Babilon Kpeteŋkpele ní damɔ shi kɛha apasa jamɔi fɛɛ ni yɔɔ je lɛŋ lɛ, ni amɛaakpata ehiɛ. Mɛɛ be enɛ baaba? Wɔleee gbi lɛ kɛ ŋmɛlɛtswaa lɛ. (Mat. 24:36) Wɔle akɛ ebaaba yɛ ŋmɛlɛtswaa ni wɔkpaaa gbɛ nɔ, ni akɛ be ni eshwɛ ni tutuamɔ nɛɛ baabaa lɛ faaa. (Mat. 24:44; 1 Kor. 7:29) Belɛ ehe miihia waa ni wɔya nɔ wɔsaa wɔhe wɔto yɛ mumɔŋ bɔni afee ni kɛ́ nakai tutuamɔ lɛ ba ni Kristo ba akɛ Blafo lɛ, etsɔ wɔ-Kpɔlɔ! (Luka 21:28) Wɔbaanyɛ wɔkase nii kɛjɛ Nyɔŋmɔ tsuji anɔkwafoi ni saa amɛhe amɛto ni no ha amɛkɛ amɛhiŋmɛii na Nyɔŋmɔ shiwoi lɛ mlibaa lɛ anɔkwɛmɔnii lɛ amli koni wɔnyɛ wɔsaa wɔhe wɔto. Ani wɔbaaha wala shihilɛ mli saji ni ba mli lɛɛlɛŋ nɛɛ akã wɔtsui nɔ?

Saamɔ Ohe Oto—Tamɔ Noa

 3. Mɛɛ shihilɛi ha ewa kɛha Noa akɛ ebaaye Nyɔŋmɔ anɔkwa?

³ Yɛ bɔ ni shihilɛ ni yɔɔ shikpɔŋ lɛ nɔ yɛ Noa beaŋ lɛ haa mɔ haoɔ waa lɛ fɛɛ sɛɛ lɛ, Noa saa ehe eto, ni ena Nyɔŋmɔ shiwoo lɛ mlibaa. Kwɛ bɔ ni ebawa kɛha Noa akɛ ebaaya nɔ eye anɔkwa yɛ ŋwɛi bɔfoi atuatselɔi ni eŋɔ adesai agbɔmɔtsei ni amɛkɛ yei ni he yɔɔ fɛo ebahi shi lɛ ateŋ! Ŋwɛi bɔfoi nɛɛ kɛ yei lɛ fɔfɔɔ oblaŋi, gbɔmɛi “kakalɔi” ni kɛ hewalɛ kpele ni amɛyɔɔ lɛ ye mɛi krokomɛi awui. (1 Mose 6:4) Susumɔ yiwalɛ ni tee nɔ beni oblaŋi nɛɛ feɔ basabasa yɛ he fɛɛ he ni amɛyaa lɛ he okwɛ. No hewɔ lɛ, efɔŋfeemɔ yi shikpɔŋ lɛ nɔ obɔ, ni adesai asusumɔ kɛ amɛjeŋba fee efɔŋ sɔŋŋ. Kɛkɛ ni Nuŋtsɔ Ofe Yehowa wo akpɔ kɛtsɔɔ be ni ekɛbaakpata nakai jeŋ fɔŋ lɛ hiɛ.—Nyɛkanea 1 Mose 6:3, 5, 11, 12.a

4, 5. Mɛɛ gbɛi anɔ shihilɛi ni yaa nɔ yɛ wɔgbii nɛɛ amli lɛ tamɔ shihilɛi ni tee nɔ yɛ Noa gbii lɛ amli lɛ?

⁴ Yesu gba akɛ shihilɛi ni wɔkɛbaakpe yɛ wɔgbii nɛɛ amli lɛ baatamɔ shihilɛi ni tee nɔ yɛ Noa gbii lɛ amli lɛ. (Mat. 24:37) Ákɛ nɔkwɛmɔnɔ lɛ, wɔ hu mumɔ fɔji kɛ amɛhe ewo wɔ shihilɛ mli. (Kpoj. 12:7-9, 12) Ŋwɛi bɔfoi ni ji daimonioi nɛɛ ŋɔ adesai agbɔmɔtsei yɛ Noa gbii lɛ amli. Eyɛ mli akɛ amrɔ nɛɛ amɛnyɛŋ amɛŋɔ adesai agbɔmɔtsei moŋ, shi amɛbɔɔ mɔdɛŋ koni amɛná onukpai kɛ gbekɛbii fɛɛ anɔ hewalɛ. Kɛ́ daimonioi ni nyaa bɔlɛnamɔ he nɛɛ na ni mɛi ni yɔɔ shikpɔŋ lɛ nɔ ní amɛbaanyɛ amɛbule amɛ lɛ kɛ amɛhe miiwo efɔŋfeemɔ kɛ jeŋba sha mli lɛ, amɛnáa miishɛɛ, eyɛ mli akɛ adesai enaaa enɛ moŋ.—Efe. 6:11, 12.

⁵ Nyɔŋmɔ Wiemɔ lɛ tsɛɔ Abonsam akɛ “gbɔmɔgbelɔ,” ni ekɛɔ akɛ, Abonsam yɛ “gbele nɔ hewalɛ,” loo ebaanyɛ eha mɛi agboi. (Yoh. 8:44; Heb. 2:14) Shi Abonsam hewalɛ nɛɛ yawaa he ko. Fɛɛ sɛɛ lɛ, ŋwɛi bɔfo awuiyelɔ nɛɛ shishiuɔ mɛi ni elakaa mɛi. Eduɔ susumɔi ni haa mɛi sumɔɔ akɛ amɛgbe mɛi krokomɛi lɛ ewoɔ mɛi atsuii kɛ jwɛŋmɔi amli. Ákɛ nɔkwɛmɔnɔ lɛ, akɔntaabuu ko tsɔɔ akɛ kɛ́ abua gbekɛbii ni afɔɔ yɛ United States lɛ ateŋ 142 naa lɛ, mɔ ko baagbe amɛteŋ mɔ kome. Ani osusuɔ akɛ Yehowa enaaa yiwalɛ nifeemɔi ni eyi shikpɔŋ lɛ nɔ ŋmɛnɛ lɛ taakɛ ena lɛ yɛ Noa gbii lɛ amli lɛ? Ani efeŋ he nɔ ko?

6, 7. Mɛni Noa kɛ eweku lɛ fee kɛtsɔɔ akɛ amɛyɛ hemɔkɛyeli kɛ Nyɔŋmɔ gbeyeishemɔ?

⁶ Sɛɛ mli lɛ, Nyɔŋmɔ ha Noa le eyiŋ ni ekpɛ akɛ, ekɛ nu afua baakpata heloo fɛɛ hiɛ yɛ shikpɔŋ lɛ nɔ lɛ. (1 Mose 6:13, 17) Yehowa fã Noa ni ekpɛ adeka agbo ko. Kɛkɛ ni Noa kɛ eweku lɛ bɔi adeka lɛ kpɛɛ. Mɛni ye bua amɛ ni amɛfee toi ni amɛsaa amɛhe amɛto hiɛkpatamɔ ni Nyɔŋmɔ kɛba lɛ?

⁷ Hemɔkɛyeli ni mli wa kɛ Nyɔŋmɔ gbeyeishemɔ tsirɛ Noa kɛ eweku lɛ ni amɛfee bɔ ni Nyɔŋmɔ fã amɛ lɛ. (1 Mose 6:22; Heb. 11:7) Ákɛ weku yitso lɛ, Noa tee nɔ eha ehiɛ hi ehe nɔ yɛ mumɔŋ, ni ekpoo nibii ni buleɔ mɔ ni yɔɔ nakai blema je lɛ mli lɛ. (1 Mose 6:9) Ele akɛ esa akɛ eweku lɛ akwɛ amɛhe nɔ jogbaŋŋ yɛ yiwalɛ kɛ toigbele ni mɛi ni ebɔle amɛ lɛ kɛfee amɛsu lɛ he. Ehe miihia ni amɛkaha nibii ni amɛfeɔ daa gbi koni amɛkɛbaa amɛwala yi lɛ heɔ amɛjwɛŋmɔ fɛɛ. Nyɔŋmɔ etuu nitsumɔ ko ewo amɛdɛŋ, ni no ji nɔ ni esa akɛ weku muu lɛ fɛɛ aha efee nɔ ni he hiaa amɛ fe nɔ fɛɛ nɔ.—Nyɛkanea 1 Mose 6:14, 18.

Noa kɛ Eweku lɛ Saa Amɛhe Amɛto

 8. Mɛni tsɔɔ akɛ Noa weku lɛ mlibii lɛ já Nyɔŋmɔ?

⁸ Eyɛ mli akɛ Biblia lɛ mli amaniɛbɔɔ lɛ gbala jwɛŋmɔ kɛtee Noa ni ji weku yitso lɛ nɔ titri moŋ, shi Noa ŋa lɛ kɛ ebihii lɛ kɛ amɛŋamɛi lɛ hu já Yehowa. Gbalɔ Ezekiel ma enɛ nɔ mi. Ekɛɛ Noa hi shi yɛ Ezekiel beaŋ kulɛ, jeee Noa jalɛ lɛ nɔ abaadamɔ akpɔ̃ Noa bii lɛ. Amɛdara bɔ ni amɛbaanyɛ amɛkpɛ amɛyiŋ kɛji amɛbaafee toi loo amɛfeŋ nakai. No hewɔ lɛ, amɛ diɛŋtsɛ amɛnifeemɔ amɛkɛtsɔɔ akɛ amɛyɛ suɔmɔ kɛha Nyɔŋmɔ kɛ egbɛi lɛ. (Ezek. 14:19, 20) Noa weku lɛ kpɛlɛ egbɛtsɔɔmɔ nɔ, amɛkɛ lɛ hiɛ hemɔkɛyeli kome, ni amɛhaaa mɛi krokomɛi ni bɔle amɛ lɛ aná amɛnɔ hewalɛ gbonyo koni amɛkanyɛ amɛtsu nitsumɔ ni Nyɔŋmɔ kɛwo amɛdɛŋ lɛ.

 9. Ŋmɛnɛ lɛ, namɛi jieɔ hemɔkɛyeli ni tamɔ Noa nɔ lɛ kpo?

⁹ Kwɛ bɔ ni wɔnáa miishɛɛ babaoo akɛ yɛ wɔnyɛmimɛi ni yɔɔ jeŋ fɛɛ lɛ ateŋ lɛ, wɔnaa weku yitsei ni miibɔ mɔdɛŋ waa koni amɛkase Noa! Amɛle akɛ jeee niyenii, atadei, wɔɔhei, kɛ wolokasemɔ kɛkɛ esa akɛ amɛha amɛwekui lɛ nine ashɛ nɔ. Esa akɛ amɛtsu amɛwekui lɛ amumɔŋ hiamɔ nii hu ahe nii. Nɔ ni weku yitsei nɛɛ feɔ lɛ tsɔɔ akɛ amɛmiisaa amɛhe amɛmiito nɔ ni etsɛŋ Yehowa baafee lɛ.

10, 11. (a) Beni Noa kɛ eweku lɛ yɔɔ adeka lɛ mli lɛ, te amɛnu he amɛha tɛŋŋ? (b) Mɛɛ sane esa jogbaŋŋ akɛ wɔbi wɔhe?

¹⁰ Eeenyɛ efee akɛ Noa, eŋa, ebihii lɛ, kɛ ebihii lɛ aŋamɛi lɛ kɛ aaafee afii 50 ni kpɛ adeka lɛ. Eeenyɛ efee akɛ beni amɛkpɛɔ adeka lɛ, amɛfee nibii srɔtoi babaoo. Beni amɛkpɛ adeka lɛ amɛgbe naa lɛ, amɛwo emli kɛ ehe fɛɛ amã koni nu akabote mli, ni amɛkɛ niyenii kɛ kooloi lɛ wo mli. Bo lɛ feemɔ nɔ ni nyiɛ sɛɛ nɛɛ he mfoniri yɛ ojwɛŋmɔŋ okwɛ. Gbi wulu ni akpaa gbɛ lɛ bashɛ. Eji afi 2370 D.Ŋ.B. nyɔɔŋ ni ji enyɔ lɛ nɔ gbi ni ji gbi nyɔŋma kɛ kpawo lɛ. Noa kɛ eweku lɛ bote adeka lɛ mli. Yehowa ŋã amɛyi, ni nugbɔ lɛ bɔi nɛmɔ. Ejeee nu afua ni ba yɛ he kome kɛkɛ. Nui ni yɔɔ atatu lɛ yiteŋ lɛ fɛlɛ, ni nu babaoo tue ni enɛ eshwie adeka lɛ nɔ. (1 Mose 7:11, 16) Beni mɛi ni bɛ adeka lɛ mli lɛ miigboi, aabaa mɛi ni yɔɔ adeka lɛ mli lɛ ayi. Te ekolɛ Noa weku lɛ baanu he amɛha tɛŋŋ? Hɛɛ, amɛbaada Nyɔŋmɔ shi babaoo. Shi ŋwanejee ko bɛ he akɛ amɛbaashwie amɛyiŋ akɛ, ‘Kwɛ bɔ ni wɔtsui enyɔ wɔmli akɛ wɔkɛ anɔkwa Nyɔŋmɔ lɛ nyiɛ, ni wɔsaa wɔhe wɔto!’ (1 Mose 6:9) Ani obaanyɛ ofee ohe mfoniri yɛ ojwɛŋmɔŋ akɛ ofo Harmagedon ni otsui eyi kɛ hiɛsɔɔ ni tamɔ nakai?

¹¹ Nɔ ko nɔ ko bɛ ni baanyɛ atsi Ofe lɛ naa koni shi ni ewo akɛ ebaakpata Satan nibii agbɛjianɔtoo nɛɛ hiɛ lɛ akaba mli. Bi ohe akɛ, ‘Ani miyɛ nɔmimaa ni gbugbaaa akɛ Nyɔŋmɔ shiwoi lɛ fɛɛ baaba mli fitsofitso, ni akɛ fɛɛ baaba mli yɛ be ni eto lɛ naa?’ Kɛ́ nakai ni lɛ, saamɔ ohe oto kɛtsɔ ‘Yehowa gbi’ lɛ ni etsɛŋ ebaaba lɛ ni oooha ehi ojwɛŋmɔŋ daa lɛ nɔ.—2 Pet. 3:12.

Mose Tee nɔ Eha Ehiɛ Hi Ehe Nɔ

12. Mɛɛ nibii kulɛ ebaaha Mose hiɛ akahi ehe nɔ yɛ mumɔŋ?

¹² Nyɛhaa wɔsusua nɔkwɛmɔnɔ kroko he wɔkwɛa. Yɛ adesai asusumɔ naa lɛ, etamɔ nɔ ni Mose ná hegbɛ kpele yɛ Mizraim. Akɛni Farao biyoo lɛ eŋɔ lɛ akɛ ebi hewɔ lɛ, mɛi jie bulɛ kpele kpo amɛtsɔɔ lɛ, eye niyenii kpakpai, ewo atadei ni nɔ bɛ, ni ehi shi yɛ ogbɔjɔ shihilɛ mli. Enine shɛ woloŋ nilee babaoo nɔ. (Nyɛkanea Bɔfoi lɛ Asaji 7:20-22.) Kulɛ enine baashɛ gboshinii babaoo nɔ.

13. Mɛɛ gbɛ nɔ Mose tee nɔ ekɛ ejwɛŋmɔ ma Nyɔŋmɔ shiwoi lɛ anɔ?

¹³ Eeenyɛ efee akɛ tsɔsemɔ ni Mose fɔlɔi kɛha lɛ yɛ ebibioo mli lɛ ha ena akɛ wɔŋjamɔ ni Mizraimbii lɛ kɛ amɛhe woɔ mli lɛ ji yaka nii. (2 Mose 32:8) Mose haaa bɔ ni ato wolokasemɔ he gbɛjianɔ yɛ Mizraim, kɛ ogbɔjɔ shihilɛ ni yɔɔ maŋtsɛwe lɛ aha ekwa anɔkwa jamɔ. Eeenyɛ efee akɛ esusu shiwoi ni Nyɔŋmɔ ewo eblematsɛmɛi lɛ he jogbaŋŋ, ni ená shwelɛ ni mli wa akɛ ebaasaa ehe eto kɛfee Nyɔŋmɔ suɔmɔnaa nii. Wɔnaa enɛ yɛ wiemɔi ni Mose kɛɛ Israelbii lɛ mli akɛ: “Yehowa . . . Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ tsu mi nyɛŋɔɔ nɛɛ.”—Nyɛkanea 2 Mose 3:15-17.

14. Mɛɛ gbɛ nɔ aka Mose hemɔkɛyeli kɛ ekãa ni eyɔɔ lɛ?

¹⁴ Nɔ ni tamɔɔɔ Mizraim wɔ́ji ni wala bɛ amɛmli lɛ, Mose le akɛ Yehowa, anɔkwa Nyɔŋmɔ lɛ ji mɔ ni yɔɔ diɛŋtsɛ. Eba ejeŋ oookɛɛ eena “mɔ ni anaaa lɛ lɛ.” Mose yɛ hemɔkɛyeli akɛ abaakpɔ̃ Nyɔŋmɔ webii lɛ, shi eleee be ni ebaaba mli. (Heb. 11:24, 25, 27) Nɔ ni efee kɛfã Israelnyo ko ni ji nyɔŋ lɛ he beni ena ni aafee Israelnyo lɛ niseniianii lɛ tsɔɔ akɛ eeshwe waa ni akpɔ̃ Hebribii lɛ. (2 Mose 2:11, 12) Shi jeee be ni Yehowa eto lɛ ni, no hewɔ lɛ Mose yabɔ mɔfro yɛ he ko shɔŋŋ. Ŋwanejee ko bɛ he akɛ beni Mose shi ogbɔjɔ shihilɛ ni eyɔɔ mli yɛ Mizraim maŋtsɛwe lɛ kɛyahi ŋa lɛ nɔ lɛ, enáaa lɛ mlɛo kwraa. Fɛɛ sɛɛ lɛ, Mose kɛ gbɛtsɔɔmɔ fɛɛ ni Yehowa kɛha lɛ lɛ tsu nii, ni ekɛsaa ehe eto. No hewɔ lɛ, beni ekɛ afii 40 ehi Midian lɛ sɛɛ lɛ, Nyɔŋmɔ kɛ lɛ tsu nii kɛkpɔ̃ enyɛmimɛi lɛ. Mose bo Nyɔŋmɔ fãmɔ toi, ni eku esɛɛ etee Mizraim. Nakai be lɛ Nyɔŋmɔ kɛ nitsumɔ ko wo Mose dɛŋ koni Mose atsu nitsumɔ nɛɛ yɛ gbɛ ni Nyɔŋmɔ taoɔ lɛ nɔ. (2 Mose 3:2, 7, 8, 10) Agbɛnɛ Mose ni ji ‘mɔ ni he jɔ fe gbɔmɛi fɛɛ’ lɛ eku sɛɛ eyahi Mizraim, ni ehe bahia ni ená hemɔkɛyeli kɛ ekãa koni enyɛ eyapue yɛ Farao hiɛ. (4 Mose 12:3) Efee enɛ shii abɔ beni haomɔi lɛ tsaraa nɔ kɛbaa lɛ, ni eleee shii abɔ ni ebaayapue yɛ Farao hiɛ yɛ haomɔ ko sɛɛ kɛyashi haomɔ kroko baaba.

15. Yɛ shihilɛi ni jeɔ mɔ nijiaŋ wui ni Mose kɛkpe lɛ fɛɛ sɛɛ lɛ, mɛni tsirɛ lɛ ni etee nɔ eŋɔ hegbɛi kɛwo eŋwɛi Tsɛ lɛ hiɛ nyam?

¹⁵ Yɛ afii 40 ni nyiɛ sɛɛ, ni ji kɛjɛ afi 1513 D.Ŋ.B. kɛyashi afi 1473 D.Ŋ.B. lɛ amli lɛ, Mose kɛ shihilɛi ni jeɔ mɔ nijiaŋ wui kpe. Kɛlɛ, eŋɔɔ hegbɛi ekɛwoɔ Yehowa hiɛ nyam ni ejɛɔ etsui fɛɛ mli ewoɔ enyɛmimɛi Israelbii lɛ hewalɛ koni amɛ hu amɛfee nakai. (5 Mose 31:1-8) Mɛni hewɔ? Ejaakɛ Mose yɛ suɔmɔ kɛha Yehowa gbɛ́i lɛ kɛ enɔyeli lɛ kwraa fe lɛ diɛŋtsɛ egbɛ́i lɛ. (2 Mose 32:10-13; 4 Mose 14:11-16) Wɔ hu ekɔɔɔ he eko shihilɛi ni jeɔ mɔ nijiaŋ wui ni wɔkɛbaakpe lɛ, esa akɛ wɔya nɔ wɔfi Nyɔŋmɔ nɔyeli lɛ sɛɛ, ni wɔná nɔmimaa akɛ nilee yɛ gbɛ ni etsɔɔ nɔ efeɔ enii lɛ mli, eja, ni ehi fe gbɛi krokomɛi fɛɛ. (Yes. 55:8-11; Yer. 10:23) Ani nakai ji bɔ ni onuɔ he?

Nyɛyaa nɔ Nyɛshia Kpe!

16, 17. Mɛni hewɔ Marko 13:35-37 lɛ kã otsui nɔ jogbaŋŋ lɛ?

¹⁶ “Nyɛkwɛa jogbaŋŋ, nyɛshia kpe . . . ejaakɛ nyɛleee beyinɔ ni be lɛ shɛɔ.” (Mar. 13:33) Yesu bɔ kɔkɔ nɛɛ beni ewieɔ okadi ni baatsɔɔ akɛ nibii agbɛjianɔtoo fɔŋ nɛɛ miiba naagbee lɛ he lɛ. Susumɔ bɔ ni Yesu mu gbalɛ kpele nɛɛ naa taakɛ Marko bɔ he amaniɛ lɛ he okwɛ, Yesu kɛɛ akɛ: “Nyɛsaraa; ejaakɛ nyɛleee beyinɔ ni shiatsɛ lɛ baa: ekolɛ gbɛkɛ, loo nyɔɔŋteŋ, loo wuɔgbɛɛmɔ, loo leebi; koni ekaba trukaa ebanina nyɛ akɛ nyɛmiiwɔ. Shi nɔ ni mikɛɔ nyɛ nɛɛ, mɛi fɛɛ mikɛɔ: Nyɛsaraa!”—Mar. 13:35-37.

¹⁷ Yesu wiemɔi nɛɛ haa mɔ susuɔ nii ahe waa. Etsĩ bei srɔto ejwɛ ni akɛsaraa yɛ gbɛkɛ lɛ atã. Naagbee be ni akɛsaraa lɛ baafee be ni ebaawa waa akɛ mɔ baaya nɔ ashi kpe, ejaakɛ ejeɔ shishi kɛjɛɔ maŋkɛ ŋmɛji etɛ kɛyashiɔ hulushitee beaŋ. Mɛi ni le tawuu mli ŋaa lɛ buɔ be nɛɛ akɛ be ni sa jogbaŋŋ kɛha henyɛlɔ ko tutuamɔ, ejaakɛ ewaaa akɛ aaana amɛ akɛ ‘amɛmiiwɔ.’ Nakai nɔŋŋ ŋmɛnɛ lɛ, akɛni je lɛ ewɔ vii yɛ mumɔŋ hewɔ lɛ, ekolɛ ebaawa waa kɛha wɔ akɛ wɔbaaya nɔ wɔshi kpe. Ani wɔbɛ nɔmimaa yɛ he akɛ be nɛɛ ji be ni esa akɛ ‘wɔya nɔ wɔshi kpe’ ni ‘wɔya nɔ wɔkwɛ jogbaŋŋ’ yɛ gbalɛ ni kɔɔ naagbee lɛ kɛ wɔkpɔ̃mɔ lɛ he lɛ hewɔ?

18. Ákɛ Yehowa Odasefoi lɛ, mɛɛ hegbɛ ni nɔ bɛ wɔyɔɔ?

¹⁸ Kooloi atsɔselɔ ni atsi etã kɛtsɔ hiɛ lɛ wala yi tɔ̃ɔɔ beni kootsɛ lɛ tutua lɛ lɛ. Shi Biblia gbalɛ haa efeɔ faŋŋ akɛ abaakpata apasa jamɔ kɛ nibii agbɛjianɔtoo fɔŋ nɛɛ fãi krokomɛi lɛ ahiɛ yɛ naagbee ni etsɛŋ ebaaba lɛ mli. (Kpoj. 18:4-8) Eba akɛ, Nyɔŋmɔ tsuji fɛɛ, gbekɛbii kɛ onukpai, baana bɔ ni eyɔɔ hiɛdɔɔ akɛ esa akɛ amɛfee bɔ fɛɛ bɔ ni amɛaanyɛ kɛsaa amɛhe amɛto Yehowa gbi lɛ taakɛ Noa kɛ eweku lɛ fee lɛ. Wɔyɛ jeŋ ni wooo Nyɔŋmɔ hiɛ nyam mli, jeŋ ni apasa jamɔ mli tsɔɔlɔi, mɛi ni amɛyiŋ etɛɛɛ amɛ akɛ Nyɔŋmɔ yɛ, kɛ mɛi ni kɛɛ Nyɔŋmɔ bɛ lɛ fɛɛ kɛ amɛwiemɔi yeɔ Bɔlɔ lɛ he fɛo. Shi esaaa akɛ wɔhaa amɛnáa wɔnɔ hewalɛ. Nyɛhaa wɔhaa nɔkwɛmɔnii ni wɔsusu he lɛ akã wɔtsuii anɔ jogbaŋŋ, ni wɔya nɔ wɔŋɔ hegbɛi kɛfã Yehowa, “nyɔŋmɔi a-Nyɔŋmɔ” lɛ, hɛɛ, “Mawu ni da ni he wa ni ehe yɔɔ gbeyei” lɛ he, ni wɔwo ehiɛ nyam.—5 Mose 10:17.

[Shishigbɛ niŋmaa]

Ani Okaiɔ?

• Mɛni hewɔ Noa kɛ eweku lɛ mumɔŋ hiamɔ nii lɛ ye klɛŋklɛŋ gbɛhe lɛ?

• Mɛɛ gbɛ nɔ shihilɛ ni wɔkɛkpeɔ yɛ wɔbei nɛɛ amli lɛ tamɔ Noa beaŋ nɔ lɛ pɛpɛɛpɛ?

• Mɛni hewɔ Mose tee nɔ eha ejwɛŋmɔ hi Yehowa shiwoi lɛ anɔ yɛ nijiaŋwujee ni ekɛkpe lɛ fɛɛ sɛɛ?

• Mɛɛ Biblia mli gbalɛi tsirɛɔ bo koni oya nɔ oshi kpe yɛ mumɔŋ?

[Mfoniri ni yɔɔ baafa 25]

Noa kɛ eweku lɛ tee nɔ amɛha amɛjwɛŋmɔ hi Yehowa nitsumɔ lɛ nɔ

[Mfoniri ni yɔɔ baafa 26]

Nyɔŋmɔ shiwoi ni ekaaa shi lɛ wo Mose hewalɛ ni etee nɔ esara