Ani Okɛ Mɔdɛŋbɔɔ Miitao Yehowa Sɛɛ Gbɛ?

KRISTOFONYO nuu ko miisumɔ waa koni ekɛ gbɛfalɔi krokomɛi ni yɔɔ oketeke lɛ mli lɛ agba sanekpakpa ni yɔɔ Biblia lɛ mli lɛ he sane. (Marko 13:10) Ni kɛlɛ, gbeyei mɔ lɛ. Ani enijiaŋ je wui? Dabi, ekɛwo sɔlemɔ mli, ni ekase bɔ ni ajeɔ sanegbaa shishi ahaa. Yehowa Nyɔŋmɔ bo nuu nɛɛ sɔlemɔ lɛ toi ni eha ená ekãa ni ekɛshiɛ.

Mɔdɛŋbɔɔ ni tamɔ nɛkɛ he miihia kɛji wɔmiitao Yehowa sɛɛ gbɛ ni wɔná enɔkpɛlɛmɔ lɛ. Bɔfo Paulo kɛɛ akɛ: “Mɔ ni baa Nyɔŋmɔ ŋɔɔ lɛ, esa akɛ ehe eye akɛ eyɛ ni eji mɛi ni [kɛ mɔdɛŋbɔɔ, NW] taoɔ esɛɛ gbɛ lɛ anyɔmɔwolɔ hu.” (Hebribii 11:6) Yehowa sɛɛ gbɛ ní wɔɔtao lɛ kɛkɛ faaa. Hela wiemɔ ni atsɔɔ shishi akɛ “kɛ mɔdɛŋbɔɔ taoɔ sɛɛ gbɛ” lɛ yɛ wiemɔ su ko mli ni tsɔɔ ekãa kɛ mɔdɛŋbɔɔ diɛŋtsɛ. Enɛ kɔɔ mɔ tsui, ejwɛŋmɔ, esusuma, kɛ ehewalɛ fɛɛ he. Kɛ́ wɔkɛ mɔdɛŋbɔɔ miitao Yehowa sɛɛ gbɛ lɛ, wɔhiŋ shi akɛ mɛi ni nɔ ko gbaaa wɔnaa, mɛi ni ejieee ekãa kpo, loo hejɔ̃lɔi. Yɛ no najiaŋ moŋ lɛ, wɔkɛ ekãa diɛŋtsɛ baatao esɛɛ gbɛ. (Bɔfoi lɛ Asaji 15:17)

Mɛi ni Kɛ Mɔdɛŋbɔɔ Tao Yehowa Sɛɛ Gbɛ

Ŋmalɛi lɛ eyi obɔ kɛ nɔkwɛmɔnii ni kɔɔ mɛi ni kɛ mɔdɛŋbɔɔ diɛŋtsɛ tao Yehowa sɛɛ gbɛ lɛ he. Mɛi nɛɛ ateŋ mɔ kome ji Yakob, mɔ ni kɛ Nyɔŋmɔ bɔfo ko ni jie ehe kpo akɛ gbɔmɔ lɛ nɔ̃ kɛ ekãa kɛyashi jetsɛremɔ lɛ. Enɛ hewɔ lɛ, awo Yakob gbɛi akɛ Israel (Mɔ ni kɛ Nyɔŋmɔ shiɔ mple) ejaakɛ ekɛ Nyɔŋmɔ “shi mple,” loo “ekã he,” “emia ehiɛ,” “efi shi.” Bɔfo lɛ jɔɔ lɛ yɛ mɔdɛŋ ni ebɔ waa lɛ hewɔ.—1 Mose 32:24-30, NW shishigbɛ niŋmaa.

Mɔ kroko hu ji Galilea yoo ko ni atsĩii egbɛi atã ni lá eho lɛ afii 12, ni eha “ena nɔ̃ babaoo” lɛ. Yɛ shihilɛ ni eyɔɔ mli lɛ hewɔ lɛ, esaaa akɛ ekɛ enine taa mɛi krokomɛi ahe. Ni kɛlɛ, ená ekãa ni eyi gbɛ koni ekɛ Yesu ayakpe. Ekɛɛ akɛ: “Kɛji miná etade lɛ he mita kɛkɛ lɛ mihe aaawa mi.” Susumɔ be mli ni ebɔɔ mɔdɛŋ ni etsɔ ‘mɛi pii ni nyiɛ Yesu sɛɛ ni amɛmiaa lɛ’ lɛ ateŋ lɛ he okwɛ. Beni eta Yesu atade lɛ he lɛ, enu he akɛ ‘elá bu lɛ naa emɔ’—atsá ehela ni ehiii tsamɔ lɛ! Beni Yesu bi akɛ, “Namɔ ta mitade lɛ he lɛ?” eshe gbeyei. Shi Yesu kɛ miishɛɛ kɛɛ lɛ akɛ: “Biyoo ohemɔkɛyeli eha ohe ewao; yaa yɛ hejɔlɛ mli, ni ohela lɛ aaajɔo.” Awo emɔdɛŋbɔɔ lɛ he nyɔmɔ.—Marko 5:24-34; 3 Mose 15:25-27.

Yɛ be kroko mli lɛ, Foenike yoo ko kɛ hiɛdɔɔ kpa Yesu fai koni etsá ebiyoo ko eha lɛ. Yesu ha lɛ hetoo akɛ, ejaaa akɛ aŋɔɔ bii aboloo lɛ ahaa shifɔ̃ji abii. Eetsɔɔ akɛ enyɛŋ ekwɛ mɛi ni amɛjeee Israelbii lɛ ní esusuuu Yudafoi ni sa lɛ ahe. Akɛni yoo lɛ yɔse sane oti ni yɔɔ ebɛbua lɛ mli hewɔ lɛ, ekpa fai akɛ: “Nuŋtsɔ, eyɛ mli moŋ; shi bɛ shifɔ̃ji abii lɛ hu yeɔ fufuji ni shwieɔ amɛnuŋtsɔmɛi akpɔlɔi lɛ ashishi lɛ eko!” Ehemɔkɛyeli ni mli wa kɛ enɔkwayeli lɛ tsirɛ Yesu ni ekɛɛ lɛ akɛ: “Oo yoo, ohemɔkɛyeli da! Afee ahao tamɔ bɔ ni otaoɔ lɛ!”—Mateo 15:22-28.

Eji aŋkroaŋkroi nɛɛ eyaaa nɔ amɛmiaaa amɛhiɛ yɛ amɛmɔdɛŋbɔi lɛ amli kulɛ, mɛni baaba? Eji amɛnijiaŋ je wui yɛ gbɛtsii nii ni amɛkɛkpe loo kpoomɔ ni akpoo amɛ klɛŋklɛŋ kwraa lɛ kulɛ, ani amɛnine baashɛ jɔɔmɔi lɛ anɔ? Dabi! Nɛkɛ nɔkwɛmɔnii nɛɛ maa sane oti ni Yesu tsɔɔ lɛ nɔ mi jogbaŋŋ, ni ji akɛ ‘ya ni aaaya nɔ akã he kɛ ekãa’ lɛ ja, ni ehe miihia po yɛ Yehowa sɛɛ gbɛ taomɔ mli.—Luka 11:5-13.

Yɛ Esuɔmɔ Naa

Ani mɔdɛŋbɔɔ pɛ ji taomɔ nii ni abi yɛ mɛi ni atsa amɛ yɛ naakpɛɛ gbɛ nɔ ni atsĩ amɛ tã kɛtsɔ hiɛ lɛ agbɛfaŋ kɛha amɛtsamɔ lɛ? Dabi, esa akɛ amɛnibimɔ lɛ kɛ Nyɔŋmɔ suɔmɔnaa nifeemɔ akpã gbee. Aha Yesu hewalɛ ni yɔɔ naakpɛɛ koni ekɛ odaseyeli ni nɔ bɛ aha akɛ lɛ ji Nyɔŋmɔ Bi lɛ, Mesia ni awo shi yɛ ehe lɛ. (Yohane 6:14; 9:33; Bɔfoi lɛ Asaji 2:22) Kɛfata he lɛ, naakpɛɛ nibii ni Yesu fee lɛ fee jɔɔmɔi ni yɔɔ nyam ni Yehowa kɛbaajɔɔ adesai yɛ shikpɔŋ lɛ nɔ yɛ Kristo Afii Akpe Nɔyeli lɛ shishi lɛ he mfoniri.—Kpojiemɔ 21:4; 22:2.

Ejeee Nyɔŋmɔ suɔmɔnaa nii dɔŋŋ akɛ mɛi ni tsuɔ anɔkwa jamɔ he nii lɛ aná hewalɛ ni yɔɔ naakpɛɛ, tamɔ nyɛmɔ ni akɛtsáa mɛi kɛ lilɛi srɔtoi awiemɔ nɛkɛ. (1 Korintobii 13:8, 13) Nɔ ni fata esuɔmɔnaa nifeemɔ yɛ wɔgbii nɛɛ amli lɛ he ji Maŋtsɛyeli lɛ he sanekpakpa lɛ ní aaashiɛ atsɔɔ je nɛŋ fɛɛ koni ‘gbɔmɛi fɛɛ ashɛ anɔkwale lɛ lee mli.’ (1 Timoteo 2:4; Mateo 24:14; 28:19, 20) Nyɔŋmɔ tsuji baanyɛ akpa gbɛ yɛ gbɛ ni ja nɔ akɛ ebaabo sɔlemɔi ni amɛkɛ hiɛdɔɔ sɔleɔ lɛ toi kɛji amɛha mɔdɛŋ ni amɛbɔɔ yɛ anɔkwayeli mli lɛ kɛ esuɔmɔnaa nii kpã gbee.

Ekolɛ mɛi komɛi baasusu akɛ, ‘Mɛni hewɔ ehe hiaa ni wɔmia wɔhiɛ kɛji akɛ yɛ naagbee kwraa lɛ Nyɔŋmɔ yiŋtoo baaba mli lɛ?’ Yɛ be mli ni eji anɔkwale akɛ Yehowa baatsu eyiŋtoo he nii ekɔɔɔ he eko mɔdɛŋbɔi ni adesai kɛwoɔ mli lɛ fɛɛ sɛɛ lɛ, eyɛ he miishɛɛ ákɛ eeená aŋkroaŋkroi ni miitsu esuɔmɔnaa nii ahe nii. Abaanyɛ akɛ Yehowa ato nuu ko ni miima shia he. Tsumalɔ lɛ yɛ tsumaa he gbɛjianɔtoo ni atɛŋ yɛ wolo nɔ kɛha shia ni ebaama lɛ, shi ekɛ nibii ni akɛmaa tsũ ni yɔɔ he ni eyɔɔ lɛ tsuɔ nii. Nakai nɔŋŋ hu Yehowa yɛ nitsumɔ ko ni ebaatsu ŋmɛnɛ, ni eyɛ he miishɛɛ akɛ ekɛ etsuji ni jɛɔ amɛsuɔmɔ mli amɛkɛ amɛhe haa lɛ aaatsu nii.—Lala 110:3; 1 Korintobii 9:16, 17.

Susumɔ oblanyo fioo Toshio niiashikpamɔ lɛ he okwɛ. Beni eyɔɔ nɔtsamɔ skul lɛ, esumɔ koni eye odase jogbaŋŋ bɔ ni eeenyɛ yɛ eshikpɔŋkuku ni ekaaa nɛɛ mli. Be fɛɛ be lɛ efee klalo ni ekɛ Biblia lɛ baatsu nii, ni ebɔ mɔdɛŋ waa koni ehi shi akɛ Kristofonyo ni feɔ nɔkwɛmɔnɔ kpakpa. Kɛmiiba eklɛŋklɛŋ afi yɛ skul lɛ naagbee gbɛ lɛ, ená hegbɛ akɛ edamɔ eklasbii lɛ ahiɛ ni eha wiemɔ. Toshio sɔle eha Yehowa kɛha yelikɛbuamɔ, ni ená miishɛɛ waa beni ena akɛ eklasbii lɛ fɛɛ miibo ewiemɔ ni yitso ji “Oti ni Mikɛma Mihiɛ ákɛ Matsu Gbɛgbamɔ Nitsumɔ Lɛ” toi jogbaŋŋ lɛ. Etsɔɔ mli akɛ eesumɔ ni etsɔ Yehowa Odasefoi abe fɛɛ sɔɔlɔ. Skulbii lɛ ateŋ mɔ kome kpɛlɛ akɛ ekɛ lɛ akase Biblia lɛ, ni etee hiɛ kɛyashɛ baptisimɔ mli. Ajɔɔ Toshio babaoo yɛ mɔdɛŋ ni ebɔ waa koni eha enifeemɔ kɛ esɔlemɔ lɛ akpã gbee lɛ hewɔ.

Te Obɔɔ Mɔdɛŋ Ohaa Tɛŋŋ?

Obaanyɛ otsɔ gbɛ̀i srɔtoi anɔ ni otsɔɔ akɛ okɛ mɔdɛŋbɔɔ miitao Yehowa sɛɛ gbɛ ni oná edɛŋ jɔɔmɔi. Klɛŋklɛŋ lɛ, nibii komɛi yɛ ni he hiaa ni obaanyɛ ofee, tamɔ ohe ni obaasaa jogbaŋŋ kɛha Kristofoi akpee nɛkɛ. Mɔdɛŋ ni obɔɔ waa kɛtaoɔ Yehowa sɛɛ gbɛ lɛ jeɔ kpo kɛtsɔ saji ahetoo ni ooosaa ohe jogbaŋŋ yɛ mli lɛ mli, wiemɔi ni kanyaa mɔ ni oooha, kɛ nɔkwɛmɔnii ni mɔɔ shi ni ooofee lɛ nɔ. Mɔdɛŋ ni obɔɔ lɛ hu baanyɛ aje kpo kɛtsɔ oshiɛmɔ nitsumɔ lɛ ni oooha eya hiɛ lɛ nɔ. Ni mɔdɛŋ ni ooobɔ koni ojie naanyobɔɔ su ni mli wa kpo otsɔɔ beni okɛ shiatsɛ ko wieɔ lɛ, kɛ agbɛnɛ hiɛkpamɔ wiemɔi ni mɔɔ shi jogbaŋŋ ni sa oshikpɔŋkuku lɛ ni okɛaatsu nii lɛ hu? (Kolosebii 3:23) Kɛtsɔ Kristofonyo nuu ko tsui muu fɛɛ mli ni ebaajɛ ni etuu ehe eha lɛ nɔ lɛ, enine baanyɛ ashɛ nitsumɔi anɔ, tamɔ ni eeesɔmɔ akɛ asafoŋ sɔɔlɔ loo onukpa nɛkɛ. (1 Timoteo 3:1, 2, 12, 13) Kɛtsɔ ohe ni okɛaaha lɛ nɔ lɛ, obaanyɛ oná miishɛɛ ni anáa yɛ nɔhamɔ mli lɛ mli ŋɔɔmɔ. Ekolɛ obaanya he akɛ okɛ gbɛbimɔ wolo aaaha koni oyatsu nii yɛ nitsumɔhe nine tsumaa nitsumɔ lɛ eko mli loo ni oyatsu nii yɛ Yehowa Odasefoi anitsumɔhe nine lɛ eko mli. Kɛ́ oji nuu oshijafonyo ni he esa lɛ, ekolɛ obaasumɔ koni oya Sɔɔmɔ Tsɔsemɔ Skul ni akɛsáa mumɔŋ gbɔmɛi koni amɛfee nɔkwɛlɔi kpakpai lɛ eko. Kɛ óbote gbalashihilɛ mli lɛ, ekolɛ maŋsɛɛ sanekpakpa shiɛmɔ nitsumɔ lɛ mli ni okɛ ohe aaawo lɛ baafee gbɛ ni oootsɔ nɔ ojie bɔ ni oshweɔ waa akɛ oootsu babaoo yɛ Yehowa sɔɔmɔ mli lɛ kpo. Ekolɛ obaanya he akɛ ofã ni oyasɔmɔ yɛ he ni Maŋtsɛyeli shiɛlɔi ahe hiaa waa yɛ lɛ.—1 Korintobii 16:9.

Mumɔ ni okɛtsuɔ nitsumɔ ko he nii lɛ ji nɔ ni he hiaa waa. Nitsumɔ fɛɛ nitsumɔ ni akɛaawo odɛŋ lɛ, jɛɛ “tsui krɔŋŋ” mli ni okɛ mɔdɛŋbɔɔ kɛ ekãa atsu he nii. (Bɔfoi lɛ Asaji 2:46; Romabii 12:8) Esa akɛ obu nitsumɔ fɛɛ nitsumɔ akɛ hegbɛ ni oná ni okɛaatsɔɔ bɔ ni osumɔɔ ni okɛ yijiemɔ aha Yehowa. Sɔlemɔ daa kɛha Yehowa yelikɛbuamɔ, ni obɔ mɔdɛŋ waa. Kɛkɛ lɛ obaaná jɔɔmɔi babaoo.

Awo Mɔdɛŋ ni Abɔ Waa lɛ He Nyɔmɔ

Ani okaiɔ Kristofonyo nuu lɛ ni sɔle koni eye gbeyei ni esheɔ lɛ nɔ bɔni afee ni enyɛ eshiɛ eha gbɛfalɔi krokomɛi ni ekɛ amɛ yɔɔ oketeke lɛ mli lɛ? Yehowa jɔɔ suɔmɔ ni eyɔɔ ni jɛ anɔkwayeli mli lɛ nɔ. Nyɛmi nuu lɛ tswa efai shi akɛ ebaaya hiɛ yɛ gbɛ ni etsɔɔ nɔ ebɛŋkɛɔ mɔ lɛ mli, ni esaa ehe kɛ saneyitsei babaoo ni akɛjeɔ sanegbaa shishi. Enyɛ ekɛ Biblia lɛ tsu nii ni ekɛye nuu ko ni adesai ateŋ sharamɔ he yeyeeyefeemɔ ehao lɛ lɛ odase. Nɔ ni jɛ sɛɛkuu kɛ saramɔ ni etee nɔ efee yɛ oketeke lɛ mli ba yɛ bei srɔtoi amli ba ji akɛ, aje Biblia mli nikasemɔ shishi. Lɛɛlɛŋ, Yehowa jɔɔ lɛ yɛ mɔdɛŋ ni ebɔ waa lɛ hewɔ!

Obaanyɛ oná jɔɔmɔi ni tamɔ nakai nɔŋŋ kɛji otee nɔ okɛ mɔdɛŋbɔɔ tao Yehowa sɛɛ gbɛ. Kɛ́ okɛ heshibaa fi shi shiŋŋ, ni ojɛ otsuiŋ fɛɛ otsu teokrase nitsumɔi srɔtoi fɛɛ ni onáa mli gbɛfaŋnɔ lɛ he nii lɛ, Yehowa kɛ bo baatsu nii yɛ eyiŋtoi lɛ kɛ gbeekpamɔ naa, ni ebaajɔɔ bo babaoo.

[Mfoniri ni yɔɔ baafa 26]

Eji yoo nɛɛ kãaa he emiaaa ehiɛ kulɛ, mɛni baaba enɔ?

[Mfoniri ni yɔɔ baafa 27]

Ani okãa he okpaa Yehowa fai kɛha ejɔɔmɔi?

[Mfonirii ni yɔɔ baafa 28]

Yɛ mɛɛ gbɛ nɔ obaatsɔ ni otsɔɔ akɛ okɛ mɔdɛŋbɔɔ miitao Yehowa sɛɛ gbɛ?