Maŋtsɛyeli Lɛ—Ani Eji Nɔ Ni Yɔɔ Diɛŋtsɛ Kɛha Bo?
“Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛŋ jikulɛ, misɔɔlɔi lɛ aaapele he, koni akaŋɔmi aha Yudafoi lɛ; shi enɛ lɛ, mimaŋtsɛyeli lɛ jɛɛɛ biɛ.”—Yoh. 18:36.
1. (a) Mɛɛ gbɛ nɔ akɛ maŋtsɛyeli kɛ nɔyeli etsa yɛ Yesaia 9:5, 6? (b) Nɛgbɛ ewie maŋtsɛyeli kɛ nɔyeli he yɛ okadi gbɛ nɔ yɛ mra be mli?
1 NƆ NI fe afii 2,600 ni eho nɛ, ni Yesaia tsɔ gbalɛ ninaa nɔ ewie yɛ nɔyeli kɛ maŋtsɛyeli he akɛ:
“Ejaakɛ afɔ bi fufɔoo aha wɔ, aha wɔ binuu hu; ni elumɔyeli [nɔyeli] lɛ aaaka ekɔŋ nɔ, ni aaatsɛ egbɛi akɛ Naakpɛɛ, Ŋaawolɔ, Nyɔŋmɔ Hewalɔ, Namɔ Tsɛ, Hejɔlɛ Lumɔ. Elumɔyeli [nɔyeli] lɛ shweremɔ kɛ hejɔlɛ lɛ sɛɛ efoŋ yɛ David maŋtsɛsɛi lɛ nɔ kɛ emaŋtsɛyeli lɛ nɔ, ni ekɛ kojomɔ kɛ jalɛ aaaha ema shi shiŋŋ, ni eeewo lɛ hewalɛ kɛjɛ ŋmɛnɛ nɔ aahu kɛyashi naanɔ. Yehowa Zebaot hiɛdɔɔ lɛ aaafee enɛ.” (Yes. 9:5, 6; akɛto “An American Translation”; “Authorized Version” lɛ ahe.)
Wɔ ŋwɛi Tsɛ lɛ wie nɛkɛ maŋtsɛyeli kɛ nɔyeli nɛɛ nɔŋŋ he yɛ okadi gbɛ nɔ afii ohai pii ni eho nɛ akɛ eje nifeemɔ shishi. Mɔ ni ji hiɛnyiɛlɔ kɛha nɛkɛ nifeemɔ nɛɛ ji ‘E-yoo lɛ seshi’ lɛ, ni lɛ ji mɔ ni baatswa Maŋtsɛyeli nɔyeli lɛ henyɛlɔ kpeteŋkpele lɛ nɔ̃ kɛbote gbele mli.—1 Mose 3:15.
2. Yɛ mɛɛ gbɛ nɔ Abraham jie ehemɔkɛyeli ni eyɔɔ yɛ Maŋtsɛyeli nɔyeli lɛ he shiwoo lɛ mli lɛ kpo?
2 Ŋwɛi kɛ shikpɔŋ Bɔlɔ lɛ haaa nakai shishijee shiwoo lɛ agbo. Afii komɛi asɛɛ lɛ, Yehowa kɛɛ enaanyo Abraham akɛ:
“Ni majɔɔ mɛi ni jɔɔo, ni mɔ ni lomɔɔo lɛ, malomɔ lɛ; ni omli aaajɛ ajɔɔ shikpɔŋ lɛ nɔ wekui fɛɛ.” (1 Mose 12:3)
Jɔɔmɔ kɛha “shikpɔŋ lɛ nɔ wekui fɛɛ” lɛ baaba kɛtsɔ nakai klɛŋklɛŋ shiwoo lɛ mlibaa nɔ pɛ, ni esa akɛ ayoo nɛkɛ Abraham nɛɛ. No hewɔ lɛ, Kristofonyo bɔfo Paulo bɔ amaniɛ akɛ: “Hemɔkɛyeli [Abraham] ekɛ yato gbɔ yɛ shiwoo shikpɔŋ lɛ nɔ tamɔ mɔkpɔŋ, ni ekɛ Isak kɛ Yakob ni ekɛ amɛ ji nakai shiwoo lɛ nɔŋŋ yelɔi lɛ hi shi yɛ buui amli, ejaakɛ ekwɛ maŋ [maŋtsɛyeli ni yɔɔ shishitoo ni wa ni etolɔ kɛ emalɔ ji Nyɔŋmɔ lɛ gbɛ.” (Heb. 11:9, 10) Abraham kɛ ejwɛŋmɔ ma ehiɛnɔkamɔ ni eyɔɔ yɛ nakai Maŋtsɛyeli nɔyeli lɛ mli lɛ nɔ aahu akɛ efee ehe mɔkpɔŋ eyɛ mli akɛ no mli lɛ Shiwoo Shikpɔŋ lɛ nɔ eyɔɔ po.
3. Mɛɛ saji wɔbaanyɛ wɔbi wɔ diɛŋtsɛ wɔhe ni kɔɔ hemɔkɛyeli ni wɔyɔɔ yɛ Maŋtsɛyeli nɔyeli lɛ mli lɛ he?
3 Te wɔ diɛŋtsɛ lɛ wɔkwɛɔ nɛkɛ je nɛɛ wɔhaa tɛŋŋ? Ani wɔnaa wɔhe akɛ ‘mɛi kpɔji,’ eyɛ mli akɛ ekolɛ shikpɔŋ ni afɔ wɔ yɛ nɔ yɛ wɔ diɛŋtsɛ wɔjakubii ateŋ wɔyɔɔ? Ani mɛi krokomɛi yɛ akutsoŋ heni wɔyɔɔ lɛ ni buɔ wɔ akɛ wɔyɛ sɔrɔto? Ani amɛnaa wɔ akɛ mɛi ni esoro wɔ? Kɛ jeee nakai lɛ, te wɔhemɔkɛyeli ni yɔɔ nakai Maŋtsɛyeli nɔyeli lɛ mli lɛ mli wa ha tɛŋŋ? Ani wɔsu kɛ baŋ tamɔ wɔkutsoŋbii lɛ? Aloo, wɔji Nyɔŋmɔ nanemɛi taakɛ Abraham ji lɛ?—Yak. 2:23.
4. Namɛi baaná kpɛlɛmɔ ni amɛaakpɛlɛ ŋwɛi nɔyeli lɛ “seshi” lɛ nɔ lɛ he sɛɛ, ni mɛni esa akɛ amɛfee ni ehe aba sɛɛnamɔ aha amɛ?
4 Yehowa ha nakai hiɛnɔkamɔ lɛ tee nɔ etso yɛ Abraham mli kɛtsɔ nɔ ni ekai lɛ yɛ he yɛ sɛɛ mli nɛɛ nɔ:
“Hewɔ lɛ jɔɔmɔ majɔɔo, ni fa maha oseshi afa tamɔ ŋwɛi ŋulamii lɛɛ ŋshɔ naa shia, ni oseshi lɛ aaaye ehenyɛlɔi agboi lɛ anɔ; ni oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ, ejaakɛ obo migbee toi.” (1 Mose 22:17, 18)
Yɛ anɔkwale mli lɛ, kɛtsɔ nakai “seshi” lɛ nɔŋŋ ni atsi eta yɛ 1 Mose 3:15 lɛ nɔ “shikpɔŋ Iɛ nɔ jeŋmaji fɛɛ” aaaná jɔɔmɔ aha amɛhe shi jeee ekomɛi kɛkɛ. Hɛɛ, ni nakai nɔŋŋ ji aŋkroaŋkroi ni yɔɔ nakai jeŋmaji lɛ amli, ni maŋ nɔ ni amɛjɛ kɔɔɔ he eko aloo kɛji akɛ amɛji niiatsɛmɛi loo ohiafoi, nɔ ni he hiaa pɛ ji ni nakai gbɔmɛi lɛ aaayoo ni amɛkpɛlɛ bɔ ni “seshi” lɛ he hiaa ha lɛ nɔ. Yɛ anɔkwale mli lɛ, taakɛ saji ba ha lɛ, “mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” Hegbɛ yɛ kɛha mɛi pii ni amɛbafee nakai nɔyeli lɛ shishi bii, kɛji akɛ amɛtsɔɔ hemɔkɛyeli.—Yoh. 3:16; Bɔf. 10:34, 35.
5. Akɛ shiwoo “Seshi” kɛ Maŋtsɛ lɛ, mɛni abaatsɔ Kristo nɔ atsu?
5 Te wɔfeɔ tɛŋŋ wɔleɔ akɛ Yesu Kristo ji nakai Abraham “seshi” lɛ mli mɔ titri diɛŋtsɛ? Paulo wie yɛ faŋŋ mli yɛ naakpɛɛ gbɛ nɔ akɛ:
“Shi Abraham lɛ, awie shiwoo wiemɔi lɛ aha lɛ kɛ eseshi lɛ. Ekɛɛɛ akɛ: ‘Kɛ eseshi bii lɛ,’ taakɛ mɛi pii anɔ̃, shi moŋ taakɛ mɔ kome nɔ, akɛ, ‘Kɛ oseshi lɛ,’ mɔ ni ji Kristo lɛ.” (Gal. 3:16) Kɛkɛ ni beni eŋmaa eyaha Efeso Kristofoi lɛ, bɔfo Paulo tsɔɔ gbɛ ni Yehowa tsɔɔ nɔ etsuɔ saji ahe nii yɛ Yesu kaselɔi lɛ ni efeɔ amɛ ekome yɛ Kristo, shiwoo “Seshi” kɛ Maŋtsɛ lɛ shishi lɛ ahe, kɛ bɔ ni ekɛ adesai ni amɛshwɛ yɛ shikpɔŋ nɔ lɛ baa amɛ kɛ Nyɔŋmɔ teŋ gbeekpamɔ mli kɛtsɔɔ E-Bi lɛ nɔ. Paulo ŋma akɛ:
“Ni eto eyiŋ yɛ mli eha bei lɛ ayinɔ lɛ gbɛjianɔtoo, koni eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ, yɛ emli.”—Efe.1:8-10.
MAŊTSƐYELI NƆYELI BAFEE SANE NI KA SHI
6. Mɛni hewɔ ni Yesu le wɔsɛɛ be mli nii ni ebaatsu yɛ Maŋtsɛyeli nɔyeli lɛ mli Iɛ?
6 Dani eeeba shikpɔŋ nɔ lɛ, no mli lɛ “Kristo” etsu nii akɛ Wiemɔ lɛ (aloo, Logos) , wɔ ŋwɛi Tsɛ lɛ naawielɔ. (Yoh. 1:1) No hewɔ lɛ Yesu le gbalɛi ni aŋma yɛ 1 Mose 3:15 kɛ Yesaia 9:5, 6 lɛ. Ele nɔ ni awie yɛ Abraham he lɛ. (1 Mose 12:3; 22:17, 18) Nɔ ni fata he lɛ, ele anɔkwale ni ji akɛ lɛ ji mɔ ni baaha shiwooi ni yɔɔ naakpɛɛ ni kɔɔ shiwoo seshi lɛ kɛ Maŋtsɛyeli nɔyeli lɛ he lɛ aba mli.
7. Mɛɛ gbɛ nɔ Yesu tsɔ egbala jwɛŋmɔ kɛba enitsumɔ akɛ maŋtsɛ lɛ nɔ yɛ?
7 Yesu gbala jwɛŋmɔ kɛtee nakai nii ni ebaatsu akɛ maŋtsɛ lɛ nɔ yɛ eshikpɔŋ nɔ shihilɛ be, titri lɛ yɛ afii etɛ kɛ fa ni ekɛsɔmɔ lɛ mli. Wiemɔi tamɔ “Nyɔŋmɔ maŋtsɛyeli lɛ yɛ nyɛteŋ” kɛ “Nyɔŋmɔ maŋtsɛyeli lɛ ebɛŋkɛ” lɛ ji nɔ ni anu kɛjɛ enaa. Yesu tsɔ nɔkwɛmɔ nii kɛ abɛbuai sɔrɔtoi anɔ egbala jwɛŋmɔ kɛtee nakai maŋtsɛyeli lɛ nɔ.—Mat.13:1-52; Mar.1:14, 15; Luka 17:21.
8. Mɛɛ naakpɛɛ nii Yesu fee?
8 Akɛ Maŋtsɛ ni ahala lɛ lɛ, Yesu fee naakpɛɛ nii pii hu. Etsɔ mumɔ krɔŋkrɔŋ lɛ hewalɛ nɔ enyiɛ nui ahiɛ. Eha shwilafoi na nii ni eha toimulɔi atooi gbele. Eha helatsɛmɛi ahe wa amɛ ni eha obubuafoi nyiɛ, ni etee gbohii ashi kɛha wala mli. Shi eji aabi nuu ni tamɔ nɛkɛ sane ŋmɛnɛ yɛ television hiɛ kulɛ, susumɔ saji ni abaabi lɛ lɛ ekomɛi ahe okwɛ! ‘Bo ji nuu ni nyiɛ nui ahiɛ lɛ? Te fee tɛŋŋ ni otsa shwilafo lɛ, oha toimulɔi nu wiemɔi ni oha gbohii te shi—mɛɛ gbɛ nɔ kwraa otsɔ ofee enɛ?’ Ojogbaŋŋ, beni eyɔɔ “sanebilɔ” Pontio Pilato hiɛ lɛ, mɛni Yesu Kristo fee?
9. Mɛni ji nɔ ni ama nɔ mi waa yɛ be mli ni Yesu damɔ Pilato hiɛ lɛ?
9 Yesu ha Maŋtsɛyeli lɛ he sane lɛ fee nɔ titri. Pilato kase enɛ he nii kɛjɛ Kristo dɛŋ, yɛ bɔ ni enyiɛ Maŋtsɛyeli nɔyeli he saneyitso lɛ sɛɛ ni ema nɔ mi lɛ hewɔ. Shi kɛlɛ, Pilato he nɔ ni ebaakɛɛ, yɛ ŋaa gbɛ ni Yesu tsɔ nɔ etsu saji ahe nii yɛ eshikpɔŋ nɔ shihilɛ lɛ naagbee ŋmlɛtswaai lɛ amli lɛ hewɔ. Nyɛhaa wɔkɔlɔa wɔ Biblia ni wɔgbele Yohane Sanekpakpa lɛ, yitso 18, kuku 33.
10. Mɛni ji klɛŋklɛŋ sane ni Pilato bi Yesu ni mɛni hewɔ sanebimɔ nɛɛ sa jogbaŋŋ Iɛ?
10 Pilato bi Yesu sane yɛ eklɛŋklɛŋ sanebimɔ lɛ mli akɛ, “Ani bo ji Yudafoi amaŋtsɛ lɛ?” No hewɔ lɛ akɛ Saneyitso lɛ ema shi momo yɛ Roma amralo lɛ jwɛŋmɔ mli. No pɛ ji saneyitso ni esa akɛ agba he sane yɛ nakai gbi lɛ nɔ ejaakɛ beni Pilato bi Yudafoi lɛ nɔ̃ he ni amɛfolɔɔ Yesu naa yɛ lɛ, amɛkɛɛ akɛ: “Wɔna nuu nɛɛ ni eewo maŋ lɛ yiŋ ni eegu oniatsumɔ kɛ Kaisare hamɔ, ni ekɛɔ akɛ lɛ diɛŋtsɛ ji Kristo, maŋtsɛ lɛ.” Kɛkɛ ni Pilato bi Yesu sane yɛ gbɛ ni ja nɔ akɛ: “Ani bo ji Yudafoi lɛ amaŋtsɛ lɛ?”—Luka 23:1-3.
11. Mɛni ekolɛ Yesu baanyɛ afee koni ekɛha Pilato sanebimɔi krokomɛi lɛ ahetoo? (b) Mɛni ji nɔ ni efee sane titri ni ka Nyɔŋmɔ webii lɛ ahiɛ yɛ be fɛɛ mli?
11 Eji oyɛ shihilɛ ni Yesu yɔɔ mli lɛ mli ni abi bo nɛkɛ sane nɛɛ nɔŋŋ kulɛ te obaaha hetoo oha tɛŋŋ? Ani obaagba nibii fɛɛ ni ofee kɛ nɔ ni ofeko bɔni afee ni no aha okojomɔ lɛ afee fɛlɛfɛlɛ, aloo ekolɛ ni no akaha agbe bo? Enɛ ji nɔ ni mɛi pii baafee, shi jeee nɛkɛ sane lɛ ji kɛha Yesu. Ebaanyɛ ni kulɛ enyiɛ Pilato hiɛ kɛjɛ Maŋtsɛyeli he saneyitso lɛ he. Shi maŋtsɛyeli nɔyeli diɛŋtsɛ ji sane ni ka shi lɛ. Maŋtsɛyeli lɛ efee sane ni ka shi yɛ afii nyɔŋmai abɔ lɛ amli, ni amrɔ nɛɛ, yɛ Nyɔŋmɔ webii ni yɔɔ ŋmɛnɛŋmɛnɛ gbii nɛɛ amli lɛ agbɛfaŋ lɛ, Maŋtsɛyeli lɛ kahe eji sane titri ni ka shi. Nakai ebalɛ yɛ Nazi Germane, Fasist Italia, Amerika, Australia, Kanada kɛ shikpɔŋ lɛ nɔ hei krokomɛi yɛ Jeŋ Ta II be lɛ mli. Sanebimɔ lɛ efee akɛ, Mɛɛ nɔyeli ji nɔ ni kwɔ fe fɛɛ yɛ mɔ aŋkro lɛ shihilɛ mli—gbɔmɔ nɔ̃ aloo Nyɔŋmɔ nɔ̃? Sane lɛ ebafee nakai nɔŋŋ yɛ nyɛsɛɛ afii nɛɛ amli, kɛ́ yɛ Malawi, China, Soviet Russia aloo yɛ maji krokomɛi anɔ jio. Sane titri ni ka shi lɛ jeee nɔ ni kɔɔ lá ni aaahe he aloo nɔ kroko ni agu, shi moŋ yɛ be fɛɛ mli lɛ, eji, Mɛɛ nɔyeli ji nɔ ni hi fe fɛɛ yɛ mɔ ko shihilɛ mli?
12. Yɛ mɛɛ gbɛ nɔ Yesu tsɔ egbala jwɛŋmɔ kɛtee Maŋtsɛyeli lɛ nɔ ekoŋŋ, ni mɛɛ sane enɛ ha Pilato bi?
12 Yesu haaa Pilato sanebimɔ lɛ hetoo tɛ̃ɛ, shi ekɛɛ akɛ:
“Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔmi aha Yudafoi lɛ; shi enɛ lɛ, mimaŋtsɛyeli Iɛ jɛɛɛ biɛ.”
Kadimɔ akɛ Yesu tsi Maŋtsɛyeli lɛ ta shii etɛ yɛ hetoo kuku nɛɛ mli. Enɛ gbala Pilato kɛ mɛi fɛɛ ni boɔ toi lɛ ajwɛŋmɔ kɛba Maŋtsɛyeli nɔyeli he saneyitso lɛ nɔ ekoŋŋ, yɛ be mli ni Pilato kɛɛ akɛ: “Belɛ maŋtsɛ jio kɛ̃?” (Yoh. 18:36, 37) Akɛ sane ni yaa nɔ yɛ nikwɛmɔhe lɛ ema shi shiŋŋ, ni mɔ ko mɔ ko nyɛŋ aku ehiɛ ashwie yiŋtoo hewɔ ni akojoɔ Kristo lɛ nɔ. Kadimɔ bɔ ni nibii tee nɔ ha lɛ. Yesu ha hetoo ni ekɛɛ akɛ:
“Okɛɛ; ejaakɛ maŋtsɛ ji mi. Mi lɛ, enɛ hewɔ afɔmi ni enɛ hewɔ nɔŋŋ miba je lɛ mli koni mibaye anɔkwale lɛ he odase. Mɔ fɛɛ mɔ ni jɛ anɔkwale lɛ mli lɛ nuɔ migbee.”—Yoh. 18:37.
13. Yɛ mɛɛ gbɛ nɔ ama Maŋtsɛyeli he sane ni ka shi lɛ nɔ mi lolo yɛ kpe ni Yesu kɛ Herode kpe lɛ mli?
13 Agbɛnɛ Pilato kɛɛ nakai jamɔ mli hiɛnyiɛlɔi lɛ kɛ Yudafoi asafo yuu lɛ akɛ: “Mi lɛ, minaaa fɔbuu sane ko kwraa yɛ ehe.” Shi asafo lɛ ekpɛlɛɛɛ nɔ ni amɛkɛɛ Pilato bɔ ni Yesu Maŋtsɛyeli lɛ he tsɔɔmɔ lɛ egbɛ eshwa Yudea fɛɛ, ni eje shishi kɛjɛ Galilea. No mli lɛ Herode Antipa ji nɔyelɔ yɛ Galilea ni eebɔ mɔdɛŋ ni etsɔ Yudafoi amaŋtsɛ. kɛha Pilato lɛ, mɛni ji nɔ ni baahi jogbaŋŋ nɛkɛ akɛ Yesu kɛ Herode aaakpe, akɛni Herode eba Yerusalem yɛ nakai be lɛ mli lɛ hewɔ? No hewɔ lɛ etsu ni akɛ Yesu aya Herode ŋɔɔ ni lɛ hu ebi lɛ saji babaoo kɛ hiɛnɔkamɔ akɛ eeefee naakpɛɛ okadi ko yɛ ehiɛ. Shi Yesu, Yehowa Maŋtsɛ ni efɔ lɛ mu lɛ sumɔɔɔ akɛ ebaa emaŋtsɛyeli lɛ shi koni ekɛ sa Herode ni taoɔ nɔ ko ana lɛ hiɛ. Efee diŋŋ. Beni enijiaŋ eje wui lɛ, Herode ni taoɔ maŋtsɛ aye lɛ ye maŋtsɛ ni Yesu ji lɛ he fɛo, ni eha esraafoi lɛ kɛ odehei atade ko wo Yesu ni eha amɛkɛ lɛ ku sɛɛ kɛtee Pilato ŋɔɔ.—Luka 23:4-11.
14. Mɛni baajɛ mli aba yɛ naagbee kwraa aha Herode kɛ Yesu yɛ maŋtsɛ ni amɛteŋ mɔ ko aaye lɛ mli?
14 Eyɛ mli akɛ Pilato kɛ Herode babɔ naanyo ekoŋŋ yɛ nakai gbi lɛ nɔ moŋ, shi eyeee ebuaa Herode. Wɔbaanyɛ wɔkadi sɔrɔtofeemɔ ni ba Herode kɛ Yesu naagbee gbii lɛ anɔ lɛ kuku. Yinɔsane kɛɔ akɛ yɛ sɛɛ mli afii komɛi lɛ, Herode ni taoɔ hiɛnyam lɛ ŋa ni ekɛ lɛ efite gbala, Herodia, wolɛ hewalɛ ni eya Roma ni eyabi Maŋtsɛ Kaligula ni efee lɛ maŋtsɛ. Shi enɛ wo Kaisare mlila waa ni etswa Herode naneshi tu kɛtee Gaul. Herode laaje egbɛhe lɛ kɛ nibii babaoo ni eyɔɔ lɛ fɛɛ. Shi Yesu lɛ, ekpoo akɛ aaafee lɛ shikpɔŋ nɔ maŋtsɛ. Eŋmɛɛ nɔ fɛɛ nɔ ni kulɛ ebaana yɛ shikpɔŋ nɛɛ nɔ lɛ he. (Mat. 8:20; Yoh. 6:15) Eba ehe shi, eba ehe shi kwraa kɛha Yehowa suɔmɔnaa nifeemɔ. Ena miishɛɛ akɛ eeefee nakai suɔmɔnaa nii lɛ ni ekɛ ŋwɛi maŋtsɛyeli lɛ afee oti ni ma ehiɛ. Yɛ “nyamɔ ni ka ehiɛ lɛ hewɔ lɛ,” eto etsui shi ena amanehulu yɛ gbɛ ni ejaaa nɔ yɛ yiwaa kɛ piimɔ ni ehenyɛlɔi kɛba enɔ lɛ fɛɛ mli, akɛni ele akɛ emuuyeli mli ni eeehiɛ kɛyashi gbele mli lɛ baaha efee mɔ ni sa kɛha anunyam maŋtsɛyeli ni ka ehiɛ lɛ.—Heb. 12:2; Mat. 25:31.
15. Yɛ mɛɛ gbɛ nɔ ama maŋtsɛyeli he sane lɛ nɔ mi kɛtsɔ sanegbaa ni tee nɔ yɛ mli ni Yesu damɔ Pilato hiɛ lɛ mli?
15 Yesu yadamɔ Pilato hiɛ ekoŋŋ. Ni Maŋtsɛyeli lɛ he sane lɛ te shi waa ekoŋŋ, beni Pilato biɔ Yudafoi asafo babaoo lɛ sane lɛ: “No hewɔ lɛ nyɛmiisumɔ akɛ miŋmɛɛ Yudafoi lɛ amaŋtsɛ lɛ he mihanyɛ lo?” Shi enɛ baaa naagbee yɛ jɛmɛ. Roma asraafoi lɛ nu saneyitso lɛ shishi akɛ maŋtsɛyeli kɛ nɔyeli he sane ji nɔ ni ka shi lɛ. Yɛ ehe fɛoyeli mli lɛ amɛfee ŋmei akekre ni amɛkɛfi eyitso ni amɛkɛ atade tsuru ko wo Yesu. Amɛgbala ehiɛ ma, ni amɛtsɛ lɛ Yudafoi amaŋtsɛ. (Yoh. 18:39–19:3) Nɔ ko bɛ ni tsɔɔ akɛ Yesu bɔ mɔdɛŋ ni ejie nakai ŋmei akekre lɛ. Ehi eyitso nɔ, ni enɛ ye ebua ni ema sane ni ka shi lɛ nɔ. Ashiŋ mɔ ko mɔ ko yɛ yiŋkɔshikɔshifeemɔ mli. Beni Pilato wo Yudafoi lɛ aŋaa akɛ amɛ diɛŋtsɛ amɛŋɔ Yesu ni amɛyasɛŋ lɛ lɛ, amɛtsɔ ŋaa gbɛ ni ji amale nɔ amɛgbala jwɛŋmɔ kɛba naagba ni enɛ kɛaaba Roma nɔyeli hegbɛ lɛ nɔ, ni amɛkɛɛ: “Kɛji oŋmɛɛ mɔ nɛ he lɛ, ojeee Kaisare shieŋtsɛ; mɔ fɛɛ mɔ ni feɔ ehe maŋtsɛ lɛ, ete shi ewo Kaisare.”—Yoh. 19:12.
16. Yɛ mɛɛ gbɛ nɔ mɛi ni yɔɔ jɛmɛ beni akojoɔ Yesu lɛ ye sane ni ka shi ni abaagbe Yesu yɛ he lɛ he odase?
16 Etamɔ nɔ ni Pilato miitsu Nyɔŋmɔ yiŋtoo he nii yɛ nakai gbi lɛ nɔ, taakɛ Koresh ni ji Persianyo lɛ fee yɛ blema Iɛ. (Okɛto Yesaia 45:1-7 he.) Nɔ ni nyiɛ sɛɛ lɛ, Pilato je shishi ekɛ saji ba naagbee akɛ: “Naa, nyɛ maŋtsɛ lɛ!” Kɛkɛ ni Yudafoi lɛ bolɔ ni asɛŋ Yesu, ni Pilato hu bi akɛɔ “Nyɛ maŋtsɛ lɛ, misɛŋlɛ lo?” Mɛni ji amɛhetoo? “Wɔbɛ maŋtsɛ ko akɛ ja Kaisare.” (Yoh. 19:14, 15) Ni tsɔɔ akɛ, nɛkɛ gbɔmɛi nɛɛ diɛŋtsɛ miiye odase kɛmiikɔ sane ni ka shi ni no hewɔ ni abaagbe Kristo lɛ he, ni ehe ehiaaa ni Yesu atswa esɛŋ. Amɛ diɛŋtsɛ amɛnaabui miima sane lɛ nɔ mi waa.
17. Pilato naagbee nifeemɔ yɛ Yesu he lɛ ma Maŋtsɛyeli nɔyeli he sane ni ka shi lɛ nɔ yɛ mɛɛ gbɛ nɔ?
17 Pilato nifeemɔ ni eha aŋma sane ko yɛ Hebri, Latin kɛ Hela wiemɔi amli yɛ Yesu sɛŋmɔtso lɛ nɔ lɛ maa Maŋtsɛyeli nɔyeli he sane lɛ diɛŋtsɛ nɔ mi waa yɛ naagbee. Mɛi fɛɛ ni yɔɔ jɛmɛ yɛ nakai gbi lɛ nɔ lɛ baanyɛ akane ni eshiŋ yiŋkɔshikɔshifeemɔ ko yɛ amɛmli yɛ nɔ hewɔ ni asɛŋ lɛ lɛ he. Nɔ ni aŋma lɛ ji: “Yesu, Nazarenyo, Yudafoi lɛ amaŋtsɛ lɛ.” Beni Yudafoi asɔfonukpai lɛ na lɛ, amɛmli fu ni amɛkɛɛ Pilato akɛ: “Kaaŋma akɛ: Yudafoi lɛ amaŋtsɛ lɛ, shi moŋ akɛ, lɛ ekɛɛ akɛ: Miji Yudafoi lɛ amaŋtsɛ lɛ.” Shi Pilato ha hetoo akɛ: “Nɔ ni miŋma lɛ, miŋma.”—Yoh.19:19-22.
18. (a) Mɛni esa akɛ wɔtswa wɔshihilɛ wɔbɔIe he ŋmɛnɛ? (b) Mɛɛ saji esa akɛ wɔbi wɔ diɛŋtsɛ wɔhe?
18 Esa akɛ nakai nibii ni yɔɔ naakpɛɛ ni ba yɛ nakai kaa gbi lɛ nɔ lɛ aha Kristofoi fɛɛ ale nɔ krɛdɛɛ ni esa akɛ amɛtswa amɛshihilɛ amɛbɔle he ŋmɛnɛ. Esa akɛ Yehowa tsulɔ fɛɛ tsulɔ ni ejɔɔ ehe nɔ lɛ aka lɛ diɛŋtsɛ ehe ekwɛ ni ekwɛ bɔ ni nakai Maŋtsɛyeli lɛ ji nɔ ni yɔɔ diɛŋtsɛ kɛha lɛ lɛ. Ani wɔnaa wɔhe akɛ nakai nɔyeli lɛ shishi bii diɛŋtsɛ? Mɛɛ mɔdɛŋ wɔbɔɔ akɛ Maŋtsɛyeli nɔyeli lɛ sɛɛfilɔi? Mɛɛ ekaa wɔkɛ woɔ wɔ nitsumɔ mli akɛ nakai nɔyeli lɛ sɛɛfilɔi? Wɔbaana nɔ ni wɔbaadamɔ nɔ wɔna miishɛɛ babaoo yɛ Maŋtsɛyeli he sane ni ka shi lɛ mli yɛ nɔ ni abaakase ni baanyiɛ enɛ sɛɛ lɛ mli. Ni wɔbaana akɛ ehe miihia ni wɔkɛ oyaiyeli kɛ hehiamɔ awo nakai miishɛɛ ni wɔnaa yɛ he lɛ mli. ‘Eba akɛ Nuŋtsɔ lɛ kɛ mumɔ ni wɔjieɔ lɛ kpo lɛ aaahi shi’ yɛ Maŋtsɛyeli lɛ sɛɛfimɔ mli!a—2 Tim. 4:22.
[Shishigbɛ niŋmai]
a Ajie Kɛjɛ May 15, 1981 Blɔfo Buu-Mɔɔ lɛ mli
[Mfoniri ni yɔɔ baafa 10]
Maŋtsɛyeli lɛ ji nɔ ni yɔɔ diɛŋtsɛ kɛha Yesu