Kpɛlɛmɔ Nyɔŋmɔ Shiwooi Anɔ Kɛtsɔ Emli Hemɔkɛyeli Namɔ Nɔ
“Ni [Yehowa Nyɔŋmɔ] [e]ŋɔ shiwooi kpleikplei ni jara wa lɛ [e]ke wɔ.”—2 PETRO 1:4
1. Mɛni yeɔ buaa wɔ ni wɔnyɛɔ wɔkɛ anɔkwa hemɔkɛyeli tsuɔ nii?
YEHOWA miisumɔ ni wɔna eshiwooi lɛ amli hemɔkɛyeli. Ni kɛlɛ, “jeee mɛi fɛɛ yɔɔ hemɔkɛyeli.” (2 Tesalonikabii 3:2) Nɛkɛ su nɛɛ ji Nyɔŋmɔ mumɔ krɔŋkrɔŋ loo enifeemɔ hewalɛ lɛ yibii. (Galatabii 5:22, 23) No hewɔ lɛ, mɛi ni Yehowa mumɔ lɛ kudɔɔ amɛ lɛ pɛ baanyɛ ana hemɔkɛyeli.
2. Te bɔfo Paulo tsɔɔ “hemɔkɛyeli” mli ehaa tɛŋŋ?
2 Shi mɛni ji hemɔkɛyeli? Bɔfo Paulo tsɛɔ lɛ “nii ni anaaa lɛ ahe odaseyeli kɛ nɔmimaa.” Nibii ni yɔɔ diɛŋtsɛ ni anaaa nɛɛ ahe odaseyeli lɛ amli wa aahu akɛ anyɛɔ akɛɔ akɛ ekɛ hemɔkɛyeli yeɔ egbɔ. Akɛɔ hu akɛ hemɔkɛyeli ji “nii ni mɛi ahiɛ ka nɔ lɛ anɔmimaa,” ejaakɛ mɛi ni hiɛ nɛkɛ su nɛɛ yɛ nɔmimaa akɛ nɔ fɛɛ nɔ ni Yehowa Nyɔŋmɔ ewo shi yɛ he lɛ ji anɔkwale aahu akɛ etamɔ nɔ ni eba mli momo po.—Hebribii 11:1, New World Translation.
Hemɔkɛyeli kɛ Yehowa Shiwooi Lɛ
3. Mɛni Kristofoi ni afɔ amɛ mu lɛ baana kɛ amɛkɛ hemɔkɛyeli tsu nii?
3 Bɔni afee ni wɔsa Yehowa hiɛ lɛ, esa akɛ wɔna hemɔkɛyeli yɛ eshiwooi lɛ amli. Bɔfo Petro tsɔɔ enɛ yɛ ewolo ni ji enyɔ ni jɛ mumɔŋ, ni aŋma aaafee afi 64 Ŋ.B. lɛ mli. Etsɔɔ mli akɛ kɛji akɛ enanemɛi Kristofoi ni afɔ amɛ mu lɛ jie hemɔkɛyeli kpo lɛ, amɛbaana Nyɔŋmɔ “shiwooi kpleikplei ni jara wa lɛ.” Ni yɛ enɛ hewɔ lɛ, amɛbaana “Nyɔŋmɔ fɔmɔ su lɛ eko” akɛ nanemɛi hefatalɔi niyelɔi kɛ Kristo yɛ ŋwɛi Maŋtsɛyeli lɛ mli. Yɛ hemɔkɛyeli kɛ Yehowa Nyɔŋmɔ yelikɛbuamɔ hewɔ lɛ, amɛjo je nɛŋ subaŋi kɛ nifeemɔi ni ekpɔtɔ lɛ anaa foi. (2 Petro 1:2-4) Ni bo lɛ susumɔ he okwɛ! Mɛi ni kɛ anɔkwa hemɔkɛyeli tsuɔ nii lɛ naa heyeli ni jara wa waa lɛ nɔŋŋ mli ŋɔɔmɔ ŋmɛnɛ.
4. Mɛɛ sui kpakpai nɛkɛ esa akɛ wɔkɛfata wɔhemɔkɛyeli he?
4 Esa akɛ hemɔkɛyeli yɛ Yehowa shiwooi lɛ amli kɛ shidaa kɛha heyeli ni Nyɔŋmɔ kɛha wɔ lɛ atsirɛ wɔ ni wɔfee nɔ ni hi fe fɛɛ ni wɔɔnyɛ koni wɔtsɔmɔ Kristofoi ni toɔ okadi kpakpa. Petro kɛɛ: “Belɛ enɛ nɔŋŋ hewɔ hu lɛ, nyɛkɛ mɔdɛŋbɔɔ fɛɛ afataa he, ni nyɛkɛ jeŋba kpakpa afataa nyɛ hemɔkɛyeli lɛ he, ni nyɛkɛ nilee afataa nyɛ jeŋba kpakpa lɛ he, ni nyɛkɛ henɔyeli afataa nyɛ nilee lɛ he, ni nyɛkɛ tsuishiŋmɛɛ afataa nyɛ henɔyeli lɛ he, ni nyɛkɛ Nyɔŋmɔ jamɔ hetuu-kɛhamɔ afataa nyɛ tsuishiŋmɛɛ lɛ he, ni Nyɔŋmɔ jamɔ hetuu-kɛhamɔ mli hu lɛ nyɛmimɛi ahedɔɔ, ni nyɛmimɛi ahedɔɔ mli lɛ, suɔmɔ.” (2 Petro 1:5-7, NW) No hewɔ lɛ Petro eha wɔ nibii ni ato naa ni wɔɔfee jogbaŋŋ kɛ wɔɔkase wɔwo wɔyitsoŋ. Nyɛhaa wɔkwɛa nɛkɛ sui nɛɛ jogbaŋŋ.
Hemɔkɛyeli Mli Nibii ni He Hiaa
5, 6. Mɛni ji jeŋba kpakpa, ni te wɔɔfee tɛŋŋ ni wɔkɛ enɛ afata wɔhemɔkɛyeli he?
5 Petro kɛɛ akɛ, esa ákɛ akɛ jeŋba kpakpa, nilee, henɔyeli, tsuishiŋmɛɛ, Nyɔŋmɔ-jamɔ hetuu-kɛhamɔ, nyɛmimɛi ahedɔɔ, kɛ suɔmɔ aha wɔteŋ mɔ fɛɛ mɔ, ni wɔkɛfata wɔhemɔkɛyeli he. Esa akɛ wɔtsu nii waa ni wɔha nɛkɛ sui nɛɛ afee wɔhemɔkɛyeli lɛ mli nibii ni he hiaa. Akɛ nɔkwɛmɔ nɔ lɛ, jeŋba kpakpa jeee su ni wɔjieɔ lɛ kpo ni hemɔkɛyeli fataaa he. W. E. Vine ni tsɔɔ wiemɔi komekomei ashishi lɛ tsɔɔ akɛ, “akɛ jeŋba kpakpa fataa he akɛ su ni he hiaa yɛ hemɔkɛyeli he nitsumɔ mli” yɛ 2 Petro 1:5. Esa akɛ sui sɔrɔtoi kpawo ni Petro tsi tã lɛ ateŋ eko fɛɛ eko afee wɔhemɔkɛyeli lɛ mli nɔ ko.
6 Klɛŋklɛŋ lɛ, esa akɛ wɔkɛ jeŋba kpakpa afata wɔhemɔkɛyeli he. Mɔ ni yɔɔ jeŋba kpakpa lɛ tsɔɔ akɛ efeɔ nɔ ni hi yɛ Nyɔŋmɔ hiɛ. Ejaakɛ shishitsɔɔmɔi komɛi kɛ “ekpakpafeemɔ” moŋ tsuɔ nii yɛ Hela wiemɔ ni akɛtsu nii yɛ biɛ akɛ “jeŋba kpakpa” lɛ najiaŋ. (New International Version; The Jerusalem Bible; Today’s English Version) Jeŋba kpakpa kanyaa wɔ koni wɔkafee efɔŋ loo wɔye wɔnanemɛi gbɔmɛi awui. (Lala 97:10) Ekanyaa ekaafeemɔ hu koni afee ekpakpa ni ehe aba sɛɛnamɔ aha mɛi krokomɛi yɛ mumɔŋ, gbɔmɔtsoŋ, kɛ henumɔŋ
7. Mɛni hewɔ esa akɛ wɔkɛ nilee afata wɔhemɔkɛyeli kɛ jeŋba kpakpa he?
7 Mɛni hewɔ Petro woɔ wɔ hewalɛ ni wɔkɛ ni lee afata wɔhemɔkɛyeli kɛ jeŋba kpakpa he lɛ? Ojogbaŋŋ, yɛ be mli ni wɔkɛ wɔhemɔkɛyeli he kaai heei kpeɔ lɛ, ehe hiaa ni wɔna nilee kɛ wɔɔnyɛ wɔle nɔ ni ji ekpakpa kɛ efɔŋ. (Hebribii 5:14) Wɔtsɔɔ Biblia kasemɔ kɛ hesaa yɛ Nyɔŋmɔ Wiemɔ lɛ kɛ nitsumɔ mli kɛ nilee loo jwɛŋmɔ kɛ nitsumɔ yɛ wɔdaa gbi shihilɛ mli lɛ nɔ wɔhaa wɔnilee faa. Nɔ ni jɛɔ mli baa ji akɛ ehaa wɔnyɛɔ wɔhiɛɔ wɔhemɔkɛyeli lɛ mli ni wɔyaa nɔ wɔfeɔ nɔ ni ja gbɛ kɛ wɔbaje kaa shishi.—Abɛi 2:6-8; Yakobo 1:5-8.
8. Mɛni ji henɔyeli, ni ekɔɔ tsuishiŋmɛɛ he yɛ mɛɛ gbɛ nɔ?
8 Bɔni afee ni eye ebua wɔ ni wɔkɛ hemɔkɛyeli adamɔ kaai anaa lɛ, ehe miihia ni wɔkɛ henɔyeli afata wɔnilee lɛ he. Hela wiemɔ kɛha “henɔyeli” tsɔɔ bɔ ni wɔnyɛɔ wɔyeɔ wɔhe nɔ. Nɛkɛ Nyɔŋmɔ mumɔ lɛ yibii nɛɛ yeɔ ebuaa wɔ koni wɔba wɔsusumɔ, wiemɔ, kɛ subaŋ shi. Kɛ wɔtee nɔ wɔkɛ henɔyeli tsu nii lɛ, wɔkɛ tsuishiŋmɛɛ fataa he. Hela wiemɔ kɛha “tsuishiŋmɛɛ” tsɔɔ ekaa-feemɔ ni akɛdamɔɔ shi shiŋŋ, jeee hiɛ-mɔbɔmɔbɔ-feemɔ ni akɛŋmɛɛɔ he ahaa shihilɛ ni wa ni anyɛɛɛ ajo naa foi. Nyamɔ ni akɛma Yesu hiɛ lɛ ji nɔ ni ha eŋmɛ etsui shi yɛ sɛŋmɔtso nɔ gbele mli lɛ. (Hebribii 12:2) Hewalɛ ni Nyɔŋmɔ kɛhaa ni tsuishiŋmɛɛ fata he lɛ wajeɔ wɔhemɔkɛyeli ni eyeɔ ebuaa wɔ koni wɔmli afili wɔ yɛ amanehulu bei amli, wɔdamɔ kaa naa, ni wɔkaŋmɛɛ saji ahe beni awaa wɔ yi.—Filipibii 4:13.
9. (a) Mɛni ji Nyɔŋmɔ-jamɔ hetuu-kɛhamɔ? (b) Mɛni hewɔ esa akɛ wɔkɛ nyɛmimɛi ahedɔɔ afata wɔ Nyɔŋmɔ-jamɔ hetuu-kɛhamɔ he? (d) Te wɔɔfee tɛŋŋ ni wɔkɛ suɔmɔ aaafata wɔnyɛmimɛi ahedɔɔ lɛ he?
9 Esa akɛ wɔkɛ Nyɔŋmɔ jamɔ hetuu-kɛhamɔ—woo, jamɔ, kɛ sɔɔmɔ kɛha Yehowa afata wɔ tsuishiŋmɛɛ lɛ he. Wɔhemɔkɛyeli daa yɛ be mli ni wɔkɛ Nyɔŋmɔ-jamɔ hetuu-kɛhamɔ tsuɔ nii ni wɔnaa bɔ ni Yehowa kɛ ewebii yeɔ haa lɛ. Ni kɛlɛ, kɛ wɔɔnyɛ wɔjie Nyɔŋmɔ gbeyeishemɔ ni tamɔ nɛkɛ kpo lɛ, ehe miihia ni wɔna nyɛmimɛi ahedɔɔ. Ejaakɛ “mɔ ni sumɔɔɔ lɛ diɛŋtsɛ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni eeenyɛ lɛ esumɔ hu?” (1 Yohane 4:20) Esa akɛ wɔtsuii atsirɛ wɔ ni wɔjie anɔkwa hedɔɔ kpo wɔtsɔɔ Yehowa tsuji krokomɛi ni wɔtao amɛhilɛ-kɛhamɔ yɛ bei fɛɛ mli. (Yakobo 2:14-17) Shi mɛni hewɔ akɛɔ wɔ akɛ wɔkɛ suɔmɔ afata wɔ nyɛmimɛi ahedɔɔ lɛ he lɛ? Eka shi faŋŋ akɛ Petro miitsɔɔ akɛ esa akɛ wɔjie suɔmɔ kpo wɔtsɔɔ adesai fɛɛ, jeee wɔnyɛmimɛi lɛ pɛ. Ni ajieɔ suɔmɔ nɛɛ kpo titri lɛ kɛtsɔɔ sanekpakpa lɛ shiɛmɔ kɛ gbɔmɛi lɛ ayelikɛbuamɔ yɛ mumɔŋ lɛ nɔ.—Mateo 24:14; 28:19, 20.
Sɔrɔto-Feemɔi ni Jɛɔ Mli Baa
10. (a) Te wɔɔfee wɔnii wɔha tɛŋŋ kɛ wɔkɛ jeŋba kpakpa, nilee, henɔyeli, tsuishiŋmɛɛ, Nyɔŋmɔjamɔ hetuu-kɛbamɔ, nyɛmimɛi ahedɔɔ, kɛ suɔmɔ fata wɔhemɔkɛyeli he lɛ? (b) Mɛni baa kɛ mɔ ni kɛɔ akɛ eji Kristofonyo lɛ bɛ nɛkɛ sui kpakpai nɛɛ.
10 Kɛ wɔkɛ jeŋba kpakpa, nilee, henɔyeli, tsuishiŋmɛɛ, Nyɔŋmɔ-jamɔ hetuu-kɛhamɔ, nyɛmimɛi ahedɔɔ, kɛ suɔmɔ fata wɔhemɔkɛyeli he lɛ, wɔbaajwɛŋ, wɔwie, ni wɔfee nii yɛ gbɛi ni Nyɔŋmɔ kpɛlɛɔ nɔ lɛ anɔ. Nɔ ni tamɔɔɔ nakai lɛ, kɛ mɔ ni kɛɔ akɛ eji Kristofonyo lɛ ejieee sui ni tamɔ nɛkɛ kpo lɛ, ebafeɔ mɔ ni eshwila yɛ mumɔŋ. ‘Eŋamɔɔ ehiŋmɛi kɛjɛɔ la’ ni kpɛɔ kɛjɛɔ Nyɔŋmɔ ŋɔɔ lɛ he ni ehiɛ kpaa nɔ akɛ atsuu ehe kɛjɛ etsutsu eshai lɛ amli. (2 Petro 1:8-10; 2:20-22) Wɔnine akanyɛ shi yɛ nɛkɛ gbɛ nɔ kɔkɔɔkɔ ni no ha wɔlaaje hemɔkɛyeli yɛ Nyɔŋmɔ shiwooi lɛ amli.
11. Mɛni wɔbaanyɛ wɔkpa gbɛ yɛ gbɛ ni ja nɔ yɛ anɔkwafoi ni afɔ amɛ mu lɛ ahe?
11 Kristofoi anɔkwafoi ni afɔ amɛ mu lɛ yɛ Yehowa shiwooi lɛ amli hemɔkɛyeli ni amɛbɔɔ mɔdɛŋ waa ni amɛha amɛtsɛmɔ kɛ halamɔ lɛ afee nɔ ni ma shi shiŋŋ. Yɛ pampii ni bajeɔ amɛgbɛ nɔ lɛ fɛɛ sɛɛ lɛ, wɔbaanyɛ wɔkpa gbɛ akɛ amɛbaajie sui ni Nyɔŋmɔ gbeyeishemɔ yɔɔ mli lɛ akpo. Kɛha anɔkwafoi ni afɔ amɛ mu lɛ, ‘Yesu Kristo naanɔ maŋtsɛyeli lɛ mlibotemɔ he hegbɛ yɛ kɛha amɛ aahu’ kɛtsɔ amɛ shitee kɛmiiya mumɔŋ wala mli yɛ ŋwɛi lɛ nɔ.—2 Petro 1:11.
12. Te esa akɛ wɔnu wiemɔi ni yɔɔ 2 Petro 1:12-15 lɛ shishi wɔha tɛŋŋ?
12 Petro yɔse akɛ etsɛŋ ni ebaagbo, ni ekpa gbɛ akɛ enine baashɛ shitee kɛmiiya ŋwɛi wala mli lɛ nɔ yɛ naagbee. Shi bei abɔ ni ehiɛ ka yɛ nɛkɛ “buu”—adesa gbɔmɔtso ni eyɔɔ mli lɛ mli lɛ—ebɔ mɔdɛŋ ni etswa enanemɛi heyelilɔi lɛ ahemɔkɛyeli ema shi ni ekanya amɛ kɛtsɔ nibii ni he hiaa kɛha ŋwɛi duromɔ ni eeekai amɛ yɛ he lɛ nɔ. Yɛ egbele sɛɛ lɛ, Petro mumɔŋ nyɛmimɛi hii kɛ yei lɛ baanyɛ awo amɛ diɛŋtsɛ amɛhemɔkɛyeli hewalɛ kɛtsɔ ewiemɔi lɛ akaimɔ nɔ.—2 Petro 1:12-15.
Hemɔkɛyeli ni Aaana yɛ Gbalɛ Wiemɔ lɛ Mli
13. Mɛɛ gbɛ nɔ Nyɔŋmɔ tsɔ ni ekɛ Kristo baa lɛ he odaseyeli ni woɔ mɔ hemɔkɛyeli hewalɛ ha yɛ?
13 Nyɔŋmɔ diɛŋtsɛ ye odase ni woɔ mɔ hemɔkɛyeli hewalɛ yɛ anɔkwale ni Yesu baa “kɛ hewalɛ kɛ anunyam babaoo” lɛ ji lɛ he. (Mateo 24:30; 2 Petro 1:16-18) Yɛ odaseyeli ni amɛbɛ lɛ hewɔ lɛ, osɔfoi wɔŋjalɔi lɛ maleɔ yɛ amɛ nyɔŋmɔi lɛ ahe, shi Petro, Yakobo kɛ Yohane ji mɛi ni kɛ amɛhiŋmɛii na Kristo anunyam tsakemɔ lɛ. (Mateo 17:1-5) Amɛna bɔ ni awo ehiɛ nyam aha lɛ ni amɛnu Nyɔŋmɔ diɛŋtsɛ gbee ni miikpɛlɛ Yesu nɔ akɛ E-suɔmɔ Bi. Nakai nɔkpɛlɛmɔ lɛ kɛ bɔ ni aha Kristo pue kɛ kpɛlɛmɔ lɛ ji woo kɛ anunyam ni akɛhaa lɛ. Yɛ nɛkɛ ŋwɛi kpojiemɔ nɛɛ hewɔ lɛ, Petro tsɛ nɛkɛ he nɛɛ, ni eka shi faŋŋ akɛ eyɔɔ Hermon gɔŋ lɛ nɔ he ko lɛ akɛ “gɔŋ krɔŋkrɔŋ.”—okɛto 2 Mose 3:4, 5 he.
14. Te esa akɛ Yesu tsakemɔ lɛ asa wɔhemɔkɛyeli he aha tɛŋŋ?
14 Te esa akɛ Yesu tsakemɔ lɛ asa wɔhemɔkɛyeli he aha tɛŋŋ? Petro kɛɛ: “Ni ama gbalɛ wiemɔ lɛ nɔ mi aha wɔ fe tsutsu lɛ, nɔ ni kɛji nyɛŋɔ nyɛhiɛ nyɛto nɔ akɛ la ni tsoɔ yɛ he ko ni woɔ duŋ, kɛyashi beyinɔ ni je aaatsɛre, ni toloo lɛ aaate shi yɛ nyɛtsuii amli lɛ, no lɛ nyɛmiifee jogbaŋŋ.” (2 Petro 1:19) Eka shi faŋŋ akɛ “gbalɛ wiemɔ lɛ” jeee Hebri Ŋmalɛi lɛ pɛ ni kɔɔ Mesia lɛ he lɛ, shi Yesu wiemɔi akɛ ebaaba “kɛ hewalɛ kɛ anunyam babaoo” hu lɛ. Mɛɛ gbɛ nɔ tsakemɔ lɛ “ma gbalɛ wiemɔ lɛ nɔ mi” yɛ? Nakai nifeemɔ lɛ ye gbalɛ wiemɔ ni kɔɔ Kristo baa kɛ anunyam yɛ Maŋtsɛyeli hewalɛ mli lɛ he lɛ he odase.
15. Gbalɛ wiemɔ lɛ ni wɔɔbo toi jogbaŋŋ lɛ kɔɔ mɛni he?
15 Bɔni afee ni wɔwo wɔhemɔkɛyeli hewalɛ lɛ, esa akɛ wɔbo gbalɛ wiemɔ lɛ toi. Enɛ kɔɔ nakai wiemɔ lɛ kasemɔ, ehe wiemɔ yɛ Kristofoi akpeei ashishi, kɛ emli ŋaawoo lɛ kɛ nitsumɔ he. (Yakobo 1:22-27) Esa akɛ wɔha efee tamɔ “la ni tsoɔ yɛ he ko ni woɔ duŋ,” ni kpɛɔ wɔtsuii amli. (Efesobii 1:18) Ni nɛkɛ gbɛ nɔ pɛ eeetsɔ ekudɔ wɔ kɛyashi be mli ni “toloo,” loo “leebi ŋulami ni kpɛɔ,” Yesu Kristo, aaajie ehe kpo yɛ anunyam mli. (Kpojiemɔ 22:16) Nakai kpojiemɔ lɛ baatsɔ hiɛkpatamɔ aha mɛi ni bɛ hemɔkɛyeli lɛ kɛ jɔɔmɔi kɛha mɛi ni kɛ hemɔkɛyeli tsuɔ nii lɛ.—2 Tesalonikabii 1:6-10.
16. Mɛni hewɔ wɔbaanyɛ wɔna hemɔkɛyeli akɛ Nyɔŋmɔ Wiemɔ lɛ mli gbalɛ shiwooi lɛ fɛɛ baaba mli lɛ?
16 Nyɔŋmɔ gbalɔi lɛ jeee hii ni kɛ hiɛtɛɛ tsuɔ nii ni kɛ nilee gbaa kɛkɛ, ejaakɛ Petro kɛɛ: “Ŋmalɛ lɛŋ gbalɛ fɛɛ gbalɛ lɛ, ejɛɛɛ gbɔmɔ ko shishitsɔɔmɔ mli. Ejaakɛ gbalɛ ko bako yɛ gbɔmɔ suɔmɔnaa pɛŋ, shi moŋ mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.” (2 Petro 1:20, 21) Akɛ nɔkwɛmɔ nɔ lɛ, David kɛɛ: “Yehowa mumɔ lɛ tsɔ minɔ wie.” (2 Samuel 23: 1, 2) Ni Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ.” (2 Timoteo 3:16) Akɛni Nyɔŋmɔ mumɔ lɛ ji nɔ ni tsirɛ egbalɔi lɛ hewɔ lɛ, wɔbaanyɛ wɔna hemɔkɛyeli akɛ shiwooi ni yɔɔ e-Wiemɔ lɛ mli lɛ fɛɛ baaba mli.
Amɛna Hemɔkɛyeli yɛ Nyɔŋmɔ Shiwooi Amli
17. Habel hemɔkɛyeli lɛ damɔ mɛɛ shiwoo nɔ?
17 Yehowa shiwooi lɛ anɔ ‘atatu babaoo’ ni ji edasefoi ni hi shi dani Kristofoi abe lɛ shɛ ahemɔkɛyeli damɔ. (Hebribii 11:1–12:1) Akɛ nɔkwɛmɔ nɔ lɛ, Habel na hemɔkɛyeli yɛ Nyɔŋmɔ shiwoo ni kɔɔ “seshi” ni baatswa “onufu lɛ” yitso nɔ lɛ mli. Odaseyeli yɛ ni tsɔɔ akɛ Nyɔŋmɔ fɔbuu kojomɔ lɛ ba Habel fɔlɔi lɛ anɔ. Yɛ Eden sɛɛ lɛ, Adam kɛ eweku lɛ kɛ amɛhiɛ latsaa ye aboloo ejaakɛ shikpɔŋ ni alomɔ lɛ lɛ wo ŋmei kɛ aŋlɛŋlɛ. Eka shi faŋŋ akɛ Habel na bɔ ni Hawa taoɔ ewu sɛɛ gbɛ lɛ ni ena akɛ Adam ye enɔ. Eka shi faŋŋ akɛ ewie efɔmɔ mli piŋmɔi lɛ ahe. Ní kerubim kɛ lalilɛi klante buɔ Eden abɔɔ lɛ naa gbɛ lɛ he. (1 Mose 3:14-19, 24) Enɛɛmɛi fɛɛ ji “odaseyeli” ni maa nɔ mi kɛhaa Habel akɛ kpɔmɔ baaba kɛtsɔ shiwoo Seshi lɛ nɔ. Akɛni ekɛ hemɔkɛyeli tsu nii hewɔ lɛ, Habel sha afɔle ni sa loo ejara wa kwraa fe Kain nɔ lɛ eha Nyɔŋmɔ.—Hebribii 11:1, 4.
18, 19. Abraham kɛ Sara kɛ hemɔkɛyeli tsu nii yɛ mɛɛ gbɛi anɔ?
18 Blematsɛmɛi ni ji Abraham, Isak, kɛ Yakob hu na hemɔkɛyeli yɛ Yehowa shiwooi amli. Abraham na hemɔkɛyeli yɛ Nyɔŋmɔ shiwoo akɛ lɛ enɔ abaatsɔ ajɔɔ shikpɔŋ lɛ nɔ wekui fɛɛ ni ákɛ akɛ shikpɔŋ ko baaha eseshibii lɛ mli. (1 Mose 12:1-9; 15:18-21) Ebinuu Isak kɛ enabi Yakob “ji nakai shiwoo lɛ nɔŋŋ yelɔi.” Hemɔkɛyeli Abraham “kɛyato gbɔ yɛ shiwoo shikpɔŋ lɛ nɔ tamɔ mɔkpɔŋ” ni emɛ “maŋ ni yɔɔ shishitoo ni wa,” Nyɔŋmɔ ŋwɛi Maŋtsɛyeli lɛ ni eshishi ni abaatee lɛ shi kɛba wala mli yɛ shikpɔŋ nɔ lɛ. (Hebribii 11:8-10) Ani oyɛ hemɔkɛyeli ni tamɔ nakai nɔŋŋ?
19 Abraham ŋa Sara eye aaafee afii 90 ni efo fɔmɔ kwraa beni ena hemɔkɛyeli yɛ Nyɔŋmɔ shiwoo lɛ mli ni aha lɛ “hewalɛ ni ekɛna musu” ni efɔ Isak lɛ. No hewɔ lɛ, yɛ naagbee lɛ, ajɛ Abraham ni eye afii 100, ni tamɔ mɔ ni “egbo momo” yɛ efɔmɔ hewalɛ gbɛfaŋ lɛ mli “afɔ mɛi ni fa babaoo tamɔ ŋwɛi ŋulamii.”—Hebribii 11: n, 12; 1 Mose 17:15-17; 18:11; 21:1-7.
20. Eyɛ mli akɛ blematsɛmɛi lɛ enaaa shiwooi ni Nyɔŋmɔ kɛha amɛ lɛ amlibaa lɛ fɛɛ moŋ, shi mɛni amɛfee?
20 Blematsɛmɛi anɔkwafoi lɛ gboi ni amɛnaaa shi ni Nyɔŋmɔ wo amɛ lɛ mlibaa fɛɛ. Ni kɛlɛ, “shɔŋŋ kɛkɛ amɛna [shiwoo nibii lɛ] yɛ, ni amɛkɛshɛje amɛmii, ni amɛnya he, ni amɛjaje akɛ gbɔi kɛ mɛikpɔji ji amɛ yɛ shikpɔŋ lɛ nɔ.” Yinɔi ho dani Shiwoo Shikpɔŋ lɛ batsɔ Abraham seshibii lɛ anɔ̃. Shi, blematsɛmɛi ni sheɔ Nyɔŋmɔ gbeyei lɛ na hemɔkɛyeli yɛ Yehowa shiwooi lɛ amli yɛ amɛshihilɛ be fɛɛ mli. Akɛni amɛlaajeee hemɔkɛyeli hewɔ lɛ, etsɛŋ ni abatee amɛ shi kɛba wala mli yɛ “maŋ” ni Nyɔŋmɔ saa to amɛ, Mesia Maŋtsɛyeli lɛ shikpɔŋ nɔ nɔyeli he lɛ mli. (Hebribii 11:13-16) Yɛ nakai gbɛ nɔ nɔŋŋ lɛ, hemɔkɛyeli baaha wɔye Yehowa anɔkwale kɛji akɛ wɔnaaa eshiwooi ni yɔɔ naakpɛɛ lɛ amlibaa amrɔ nɔŋŋ po lɛ. Wɔhemɔkɛyeli lɛ hu baatsirɛ wɔ ni wɔbo Nyɔŋmɔ toi, taakɛ Abraham fee lɛ. Ni taakɛ ekɛ mumɔŋ gboshinii ha eshwiei lɛ, nakai nɔŋŋ wɔbaanyɛ wɔye wɔbua wɔbii ni amɛna hemɔkɛyeli yɛ Yehowa shiwooi ni jara wa waa lɛ amli.—Hebribii 11:17-21.
Hemɔkɛyeli He Miihia Kristofoi
21. Kɛ wɔɔna Nyɔŋmɔ nɔkpɛlɛmɔ ŋmɛnɛ lɛ, mɛni esa akɛ efata hemɔkɛyeli ni wɔkɛtsuɔ nii lɛ he?
21 Shi babaoo yɛ ni kɔɔ hemɔkɛyeli he fe hekɛnɔfɔɔ ni ayɔɔ yɛ Yehowa shiwooi lɛ amlibaa mli. Ehe ebahia yɛ adesa yinɔsane be fɛɛ mli akɛ aaana hemɔkɛyeli yɛ Nyɔŋmɔ mli yɛ gbɛi sɔrɔtoi anɔ kɛ wɔɔna enɔkpɛlɛmɔ mli ŋɔɔmɔ. Paulo tsɔɔ mli akɛ, “kɛ hemɔkɛyeli bɛ lɛ anyɛŋ [Yehowa] Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛ gbɛ lɛ anyɔmɔwolɔ hu.” (Hebribii 11:6) Kɛ Yehowa aaakpɛlɛ mɔ ko nɔ ŋmɛnɛ lɛ, esa akɛ mɔ lɛ ana Yesu Kristo kɛ kpɔmɔ afɔleshaa ni Nyɔŋmɔ tsɔ enɔ ekɛha lɛ mli hemɔkɛyeli (Romabii 5:8; Galatabii 2: 15, 16) Etamɔ bɔ pɛ ni Yesu diɛŋtsɛ wie lɛ: “Nɛkɛ Nyɔŋmɔ sumɔ [adesai] [a]je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala. Mɔ ni heɔ Bi lɛ nɔ yeɔ lɛ, eyɛ naanɔ wala; shi mɔ ni booo Bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.”—Yohane 3:16, 36.
22. Mɛɛ shiwoo Mesia Maŋtsɛyeli lɛ baaha eba mli?
22 Yesu tsuɔ nitsumɔ ko ni he hiaa waa yɛ Nyɔŋmɔ shiwooi ni kɔɔ Maŋtsɛyeli ni Kristofoi sɔleɔ yɛ he lɛ mlibaa mli. (Yesaia 9:6, 7; Daniel 7:13, 14; Mateo 6:9, 10) Taakɛ Petro tsɔɔ lɛ, tsakemɔ lɛ ye anɔkwale ni gbalɛ wiemɔ ni kɔɔ bɔ ni Yesu baaba Maŋtsɛyeli hewalɛ mli kɛ anunyam lɛ ji lɛ he lɛ he odase. Mesia Maŋtsɛyeli lɛ baaha Nyɔŋmɔ shiwoo kroko aba mli, ejaakɛ Petro ŋma akɛ: “Yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Gbalɛ ko ni tamɔ nakai nɔŋŋ ba mli beni akɛ Yudafoi ni tsɔmɔ nomii yɛ Babilon lɛ ba amɛshikpɔŋ nɔ ekoŋŋ yɛ 537 D.Ŋ.B. yɛ nɔyeli ko ni Zerubabel ji nɔyelɔ ni Yoshua ji osɔfonukpa yɛ mli lɛ shishi lɛ. (Yesaia 65:17) Shi Petro miitsɔɔ wɔsɛɛ be mli, beni “ŋwɛi hee”—ŋwɛi Mesia Maŋtsɛyeli lɛ—baaye adesai ajalɛ aweku ko ni feɔ “shikpɔŋ hee” ni hiɔ shikpɔŋ nɛɛ nɔ lɛ anɔ lɛ.—Okɛto Lala 96:1 he.
23. Mɛɛ sanebimɔi ni kɔɔ jeŋba kpakpa he wɔbaasusu he yɛ enɛ sɛɛ?
23 Akɛ Yehowa tsuji kɛ esuɔmɔ Bi Yesu Kristo sɛɛnyiɛlɔi anɔkwafoi lɛ, wɔmiishwe ni Nyɔŋmɔ shiwoo jeŋ hee lɛ aba. Wɔle akɛ ebɛŋkɛ, ni wɔyɛ hemɔkɛyeli akɛ Yehowa shiwooi wuji lɛ fɛɛ baaba mli. Ni bɔni afee ni wɔnyiɛ bɔ ni sa wɔ-Nyɔŋmɔ lɛ hiɛ lɛ, esa akɛ wɔwaje wɔhemɔkɛyeli kɛtsɔ jeŋba kpakpa, nilee, henɔyeli, tsuishiŋmɛɛ, Nyɔŋmɔ-jamɔ hetuu-kɛhamɔ, nyɛmimɛi ahedɔɔ, kɛ suɔmɔ ni wɔkɛaafata he lɛ nɔ.a Abaanyɛ abi yɛ he ni wɔshɛ nɛɛ akɛ, Te wɔɔfee tɛŋŋ wɔjie jeŋba kpakpa kpo hu? Ni mɛɛ gbɛ nɔ jeŋba kpakpa ni wɔɔjie lɛ kpo lɛ he aaaba sɛɛnamɔ aha wɔ kɛ mɛi krokomɛi, titri lɛ wɔnanemɛi Kristofoi ni amɛkpɛlɛ Nyɔŋmɔ shiwooi lɛ anɔ kɛtsɔ hemɔkɛyeli ni amɛna yɛ mli lɛ nɔ lɛ yɛ?
[Shishigbɛ niŋmai]
a Awie hemɔkɛyeli kɛ jeŋba kpakpa he yɛ Buu-Mɔɔ nɛɛ mli. Abaasusu nilee, henɔyeli, tsuishiŋmɛɛ, Nyɔŋmɔ-jamɔ hetuu-kɛhamɔ, nyɛmimɛi ahedɔɔ, kɛ suɔmɔ he babaoo yɛ wɔsɛɛ be mli nɔ ni baaba lɛ amli.
Mɛni Ji Ohetoo?
◻ Te abaanyɛ atsɔɔ “hemɔkɛyeli” mli aha tɛŋŋ?
◻ Taakɛ 2 Petro 1:5-7 lɛ tsɔɔ lɛ, mɛɛ sui kpakpai nɛkɛ esa akɛ wɔkɛfata wɔhemɔkɛyeli he?
◻ Te esa akɛ Yesu tsakemɔi lɛ asa wɔhemɔkɛyeli he eha tɛŋŋ?
◻ Mɛɛ hemɔkɛyeli he nɔkwɛmɔ nii Habel, Abraham, Sara, kɛ mɛi krokomɛi ni hi shi yɛ blema bei amli lɛ fee?
[Mfoniri ni yɔɔ baafa15]
Ani ole bɔ ni Yesu tsakemɔ lɛ baanyɛ asa mɔ ko hemɔkɛyeli he aha?