Odasefoi Babaoo Tamɔ Atatu!
“Gbii obɔ ni wɔyɔɔ odasefoi babaoo ni ebɔle wɔ tamɔ atatu nɛɛ, . . . wɔkɛ tsuishitoo ada foi ni ka wɔhiɛ lɛ”—HEBRIBII 12:1.
1, 2. (a) Mɛɛ nɔkwɛmɔ nɔ ekolɛ no yɔɔ Paulo jwɛŋmɔ mli beni eŋmaa wolo eyaha Hebri Kristofoi lɛ? (b) Mɛni hewɔ hemɔkɛyeli ni ma shi shiŋŋ he hiaa nanemɛi Hebri heyelilɔi lɛ?
ŊƆƆ ohe akɛ oji foidalɔ yɛ akaŋshii he ko.Oomia ohiɛ, okɛ ohewalɛ fɛɛ miijo foi,okɛ ohiŋmɛi ema oti lɛ nɔ. Ní mɛi ni kwɛɔ bo lɛ? Amɛ fɛɛ amɛji foidalɔi ni eye omanye pɛŋ! Jeee akɛ amɛji mɛi ni miikwɛ nɔ ni yaa lɛ pɛ kɛkɛ, shi moŋ, odasefoi yɛ wiemɔ kɛ nifeemɔ fɛɛ mli.
2 Ekolɛ bɔfo Paulo yɛ mfoniri ko ni tamɔ nɛkɛ yɛ ejwɛŋmɔ mli yɛ be mli ni eŋmaa wolo eyaha Hebri Kristofoi lɛ (aaafee afi 61 Ŋ.B.) Hemɔkɛyeli ni ma shi shiŋŋ he miihia amɛ. (Hebribii 10:32-39) Hemɔkɛyeli pɛ nɔ amɛbaatsɔ amɛbo Yesu kɔkɔbɔɔ akɛ amɛjo foi kɛ esraafoi gba bɔle Yerusalem he (yɛ afi 66 Ŋ.B.) afii fioo dani Romabii lɛ kpata hiɛ (yɛ afi 70 Ŋ.B.) lɛ. Hemɔkɛyeli hu ji nɔ ni baawaje amɛ kɛ́ “awa amɛ yi yɛ jalɛ hewɔ” lɛ.—Mateo 5:10; Luka 21:20,24.
3. Mɛni ji “esha ni ebɔle wɔhe kpula lɛ” ni yɔɔ Hebribii 12:1 lɛ, ni awo Kristofoi ahewalɛ ni amɛkɛ tsuishitoo ada mɛɛ foi?
3 Yɛ be mli ni ewie hemɔkɛyeli nitsumɔi ni tsɔ Kristofoi abe lɛ hiɛ lɛ he (yɛ Hebribii yitso 11) lɛ, Paulo wo hewalɛ akɛ: “Bei abɔ ni wɔyɔɔ Odasefoi babaoo ni ebɔle wɔ tamɔ atatu nɛɛ, nyɛhaa wɔkɛ jatsu fɛɛ jatsu (ni baatsi wɔ gbɛ yɛ mumɔŋ) aŋmɛa shi, kɛ esha (hemɔkɛyeli ni bɛ) ni ebɔle wɔhe kpula, ni wɔkɛ tsuishitoo ada (naanɔ wala) foi ni ka wɔhiɛ lɛ.” (Hebribii 12:1) Hemɔkɛyeli he nitsumɔi ni Paulo ti mli lɛ tsɔɔ bɔ ni ehewɔ nibii fɛɛ kɛ ehe nii ni yɔɔ lɛ baanyɛ eye ebua wɔ, kɛji akɛ wɔji Kristofoi ni afɔ amɛ mu ni miida shihilɛ ni gbele bɛ mli yɛ ŋwɛi lɛ he foi eloo wɔji “asafo babaoo” ni naanɔ wala yɛ shikpɔŋ nɔ paradeiso lɛ he oti ji nɔ ni ma wɔhiɛ. (Kpojiemɔ 7:4-10; Luka 23:43; Romabii 8:16, 17) Shi mɛni kwraa ji hemɔkɛyeli? Mɛni ji nɛkɛ mumɔŋ jwetri nɛɛ mli fai komɛi lɛ? Ní kɛji akɛ wɔyɛ hemɔkɛyeli lɛ, te wɔbaafee wɔ nii wɔha tɛŋŋ? Yɛ be mli ni otaoɔ hetoo oha nɛkɛ sanebimɔi nɛɛ lɛ, ofainɛ kanemɔ ŋmalɛi ni atsɛ ni ji Hebribii yitso 11 kɛ 12 lɛ mli kukuji lɛ fɛɛ yɛ oteemɔŋ kɛ asafoŋ nikasemɔ shishi.
Nɔ Ni Hemɔkɛyeli Ji
4. Mɛni ji hemɔkɛyeli?
4 Klɛŋklɛŋ lɛ Paulo tsɔɔ hemɔkɛyeli mli. (Kanemɔ Hebribii 11:1-3, NW.) Yɛ gbɛ ko nɔ lɛ, hemɔkɛyeli ji “nii ni mɛi ahiɛ ka nɔ lɛ agbɛkpamɔ nɔmimaa.” Mɔ ni yɔɔ hemɔkɛyeli lɛ yɛ nɔmimaa akɛ nɔ fɛɛ nɔ ni Nyɔŋmɔ ewo shi yɛ he lɛ tamɔ nɔ ni eba mli momo po. Hemɔkɛyeli hu ji “nii ni yɔɔ diɛŋtsɛ lɛ ahe odaseyeli yɛ faŋŋ, tsɛ anaaa.” Odaseyeli ni tsɔɔ mɔ yiŋ akɛ nii ni anaaa lɛ yɛ diɛŋtsɛ lɛ mli wa aahu akɛ anyɛɔ akɛɔ akɛ hemɔkɛyeli kɛ nakai odaseyeli lɛ yeɔ egbɔ.
5. Wɔtsɔɔ hemɔkɛyeli nɔ wɔnaa mɛni?
5 Hemɔkɛyeli nɔ atsɔ “aye blemabii lɛ ahe odase kpakpa yɛ” akɛ amɛsa Nyɔŋmɔ hiɛ. Agbɛnɛ hu, “hemɔkɛyeli wɔkɛyoɔ akɛ nibii agbɛjianɔtoo lɛ”—shikpɔŋ lɛ, hulu lɛ, nyɔɔŋtsere kɛ ŋulamii lɛ—“Nyɔŋmɔ Wiemɔ lɛ akɛsaa, no hewɔ lɛ nii ni anaa lɛ bafee nii ni jɛ nibii ni anaaa lɛ amli.” Wɔyɛ hekɛnɔfɔɔ akɛ Yehowa ji nibii ni tamɔ nɛkɛ lɛ a-Bɔlɔ, eyɛ mli akɛ wɔnaaa lɛ, ejaakɛ eji Mumɔ ni anaaa.—1 Mose 1:1; Yohane 4:24; Romabii 1:20.
Hemɔkɛyeli Kɛ “Blema Je Lɛ”
6. Mɛni hewɔ Habel yɔɔ “gbɛkpamɔ kɛ nɔmimaa” akɛ Yehowa gbalɛ wiemɔi ni kɔɔ ‘yoo lɛ seshi’ lɛ he lɛ baaba mli anɔkwale?
6 Hemɔkɛyeli he nibii babaoo lɛ ekome ji hiɛsɔɔ ni ayɔɔ kɛha bɔ ni eshai ahe afɔleshaa he hiaa ha. (Kanemɔ Hebribii 11:4.) Habel, adesai enyɔ ni ji Adam kɛ Hawa binuu ni ji enyɔ lɛ tsɔɔ hemɔkɛyeli yɛ lá ni akɛshaa afɔle mli yɛ “blema je lɛ mli.” (2 Petro 2:5) Ŋwanejee ko bɛ he akɛ Habel yoo nibii ni kɛ gbele baa ni jɛ esha ni ena kɛjɛ fɔmɔ mli lɛ yɛ lɛ diɛŋtsɛ emli. (1 Mose 2:16, 17; 8: 6, 7; Romabii 5:12) Eka shi faŋŋ akɛ eyoo Nyɔŋmɔ mla ni kɛ tɔlɛ nitsumɔ ba Adam nɔ kɛ fɔmɔ mli piŋmɔ ni Hawa baana lɛ mlibaa. (1 Mose 3:16-19) No hewɔ lɛ Habel yɛ “gbɛkpamɔ kɛ nɔmiima” akɛ nibii krokomɛi ni Yehowa ewie lɛ baaba mli anɔkwale. Nɔ ni fata enɛɛmɛi ahe ji gbalɛ wiemɔi ni awie ashi shishiulɔ-nukpa Satan Abonsam beni Nyɔŋmɔ kɛɛ onufu lɛ akɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ̃ ni bo hu oootswa enanetsitsi nɔ” lɛ.—1 Mose 3:15.
7. (a) Yɛ mɛɛ gbɛ nɔ Habel tsɔɔ hiɛsɔɔ kɛha bɔ ni eshai ahe afɔleshaa he hiaa ha lɛ? (b) Nyɔŋmɔ ‘ye Habel nikee nii lɛ ahe odase’ yɛ mɛɛ gbɛ nɔ?
7 Habel jie hemɔkɛyeli kpo yɛ shiwoo Seshi lɛ mli kɛtsɔ kooloo afɔleshaa ni ebaanyɛ ekɛto lɛ diɛŋtsɛ ewala najiaŋ yɛ mfonirifeemɔ gbɛ nɔ lɛ ni ekɛha Nyɔŋmɔ lɛ nɔ. Shi enyɛminukpa Kain ni heee yeee lɛ kɛ ŋmɔshi nii ni lá bɛ mli sha afɔle. Ákɛ gbɔmɔgbelɔ lɛ, yɛ no sɛɛ lɛ, Kain shwie Habel lá shi. (1 Mose 4:1-8) Ni kɛlɛ, Habel gbo ní ele akɛ Yehowa buɔ lɛ jalɔ, “Nyɔŋmɔ ye enikee nii lɛ ahe odase.” Yɛ mɛɛ gbɛ nɔ? Kɛtsɔ kpelɛmɔ ni ekpɛlɛ Habel afɔle ni esha yɛ hemɔkɛyeli mli lɛ nɔ. Yɛ hemɔkɛyeli kɛ ŋwɛi nɔkpɛlɛmɔ ni Mumɔ naa ŋmalɛ lɛ yaa nɔ eyeɔ he odase hewɔ lɛ, ‘eyɛ mli akɛ Habel gbo moŋ, shi eewie lolo.’ Ena akɛ eshai ahe afɔleshaa he miihia. Ani oyɛ hemɔkɛyeli yɛ Yesu Kristo kpɔmɔ afɔleshaa ni he hiaa kwraa fe no Iɛ mli?—1 Yohane 2:1, 2; 3:23.
8. (a) Mɛni wɔkaseɔ yɛ hemɔkɛyeli he kɛjɛɔ ekãa ni Henok kɛye odase lɛ mli? (b) Yɛ mɛɛ gbɛ nɔ aŋɔ Henok “ kɛtee koni ekana gbele”?
8 Hemɔkɛyeli baatsirɛ wɔ ni wɔwie Nyɔŋmɔ shɛɛsane lɛ kɛ ekaa. (Kanemɔ Hebribii 11:5, 6.) Yehowa mra be mli Odasefonyo Henok kɛ ekaa gba akɛ Nyɔŋmɔ kɛ fɔbuu kojomɔ baaba gbɔmɛi ni leee Nyɔŋmɔ lɛ anɔ. (Yuda 14, 15) Ŋwanejee ko bɛ he akɛ Henok henyɛlɔi lɛ tao akɛ amɛaagbe lɛ, shi Nyɔŋmɔ “ŋɔ lɛ kɛtee” no hewɔ lɛ, enaaa gbele piŋmɔi amli amanehulu. (1 Mose 5: 24) Shi, klɛŋklɛŋ lɛ, “aye ehe odase akɛ esa Nyɔŋmɔ hiɛ.” Yɛ mɛɛ gbɛ nɔ? “Hemɔkɛyeli hewɔ aŋɔ Henok kɛtee koni ekana gbele.” Nakai nɔŋŋ hu aŋɔ Paulo kɛtee aloo “asha lɛ kɛtee Paradeiso,” eka shi faŋŋ akɛ enine shɛ wɔsɛɛ be Kristofoi asafo lɛ mumɔŋ paradeiso lɛ he ninaa nɔ. (2 Korintobii 12:1-4) No hewɔ lɛ, eka shi faŋŋ akɛ Henok miina shikpɔŋ nɔ Paradeiso ni baa lɛ he ninaa yɛ be mli ni Yehowa ha ewɔ yɛ gbele mli, ni ehenyɛlɔi anine shɛɛɛ enɔ lɛ. Kɛ wɔɔnyɛ wɔsa Nyɔŋmɔ hiɛ lɛ, belɛ esa akɛ wɔkɛ ekaa ashiɛ Nyɔŋmɔ wiemɔ lɛ tamɔ Henok. (Bɔfoi lɛ Asaji 4:29-31) Esa akɛ wɔhe wɔye hu akɛ Nyɔŋmɔ yɛ ni “eji mɛi ni taoɔ esɛɛgbɛ lɛ anyɔmɔwolɔ hu.”
9. Yɛ mɛɛ gbɛ nɔ Noa gbɛ lɛ tsɔɔ akɛ Nyɔŋmɔ famɔi asɛɛnyiɛmɔ kpaakpa lɛ ji hemɔkɛyeli nitsumɔi lɛ fa?
9 Nyɔŋmɔ famɔi lɛ asɛɛ ni aaanyiɛ kpaakpa hu ji hemɔkɛyeli he nibii lɛ eko. (Kanemɔ Hebribii 11:7.) Akɛni ekɛ hemɔkɛyeli miitsu nii hewɔ lɛ, Noa ‘wie bɔ ni Nyɔŋmɔ fa lɛ lɛ pɛpɛɛpɛ.’ (1 Mose 6:22; 7:16) Noa nine shɛ “nii ni anako lɛ ahe kɔkɔbɔɔ nɔ kɛjɛ ŋwɛi” ni ehe Yehowa wiemɔ akɛ jeŋ muu fɛɛ nu afua baaba lɛ eye. Hemɔkɛyeli kɛ Nyɔŋmɔ bulɛ kɛ gbeyeishemɔ Noa “kɛsaa adeka eha ewe lɛ yiwalaheremɔ.” Yɛ toiboo kɛ jalɛ nitsumɔi ahewɔ lɛ, ebu je ni heee yeee lɛ fɔ yɛ ehewalɛ nitsumɔi ahewɔ, ni ekɛtsɔɔ akɛ nakai je lɛ sa hiɛkpatamɔ.—1 Mose 6:13-22.
10. Eyɛ mli akɛ Noa miikpɛ adeka lɛ moŋ, shi ehe be ekɛtsu mɛni hu?
10 Noa ji Yehowa odasefoi lɛ ateŋ mɔ kome ejaakɛ eji “jalɛ shiɛlɔ.” (2 Petro 2:5) Eyɛ mli akɛ ebɛ deka kɛ adeka lɛ kpɛɛ moŋ, shi ehe be ni ekɛshiɛ, taakɛ Yehowa Odasefoi feɔ ŋmɛnɛ lɛ. Yɛ anɔkwale mli lɛ, Noa wie yɛ ekaa naa akɛ Nyɔŋmɔ kɔkɔbɔɔ lɛ he adafitswalɔ kɛha mɛi ni tsɔ Nu Afua lɛ hiɛ lɛ, shi “amɛbooo toi kɛyashi Nu Afua lɛ baloo amɛ fɛɛ kɛtee.”—Mateo 24:36-39, NW.
Hemɔkɛyeli Yɛ Nu Afua Lɛ Sɛɛ Blematsɛmɛi Ateŋ
11. (a) Mɛɛ gbɛ nɔ Abraham tsɔɔ yɛ akɛ nɔ ni fata hemɔkɛyeli he hu ji hekɛnɔfɔɔ kwraa yɛ Yehowa shiwoi amli? (b) Abraham miimɛ mɛɛ “maŋ” yɛ hemɔkɛyeli mli?
11 Nɔ ni fata hemɔkɛyeli he hu ji hekɛnɔfɔɔ kwraa yɛ Nyɔŋmɔ shiwoi amli. (Kanemɔ Hebribii 11:8-12.) Hemɔkɛyeli nɔ Abraham (Abram) tsɔ ni ebo Nyɔŋmɔ famɔ toi ni eshi Kaldeabii Ur lɛ, maŋ ni heloo gbɛfaŋ nibii babaoo yɔɔ jɛmɛ lɛ. Ehe Yehowa shiwoo akɛ abaatsɔ enɔ ajɔɔ “shikpɔŋ Iɛ nɔ wekui fɛɛ” ni akɛ eseshi akɛ shikpɔŋ lɛ baaha lɛ eye. (1 Mose 12:1-9; 15:18-21) Abraham bi Isak kɛ enabi Yakob ji “nakai shiwoo lɛ nɔŋŋ yelɔi.” Hemɔkɛyeli Abraham “kɛyato gbɔ yɛ shiwoo shikpɔŋ lɛ nɔ tamɔ mɔkpɔŋ.” Eekwɛ “maŋ ni yɔɔ shishitoo ni wa ni etolɔ kɛ emalɔ ji Nyɔŋmɔ lɛ gbɛ.” Hɛɛ, Abraham mɛ Nyɔŋmɔ ŋwɛi maŋtsɛyeli lɛ ni eshishi abaatee lɛ shi kɛjɛ gbohii ateŋ kɛba wala mli yɛ shikpɔŋ nɔ lɛ. Ani Maŋtsɛyeli lɛ yɛ gbɛhe ko ni he hiaa waa yɛ oshihilɛ mli?—Mateo 6:33.
12. Mɛni ba yɛ hemɔkɛyeli ni Sara yɔɔ yɛ Yehowa shiwoi amli lɛ hewɔ?
12 Blematsɛmɛi ni sheɔ Nyɔŋmɔ gbeyei lɛ aŋamɛi lɛ hu yɛ hemɔkɛyeli yɛ Yehowa shiwoi amli. Akɛ nɔkwɛmɔ nɔ lɛ, hemɔkɛyeli Abraham ŋa Sara, tsɛ eji kene ni eye afii 90 moŋ, ni “egbɔ eho he aahu,” shi aha lɛ hewalɛ “ni ekɛna musu . . . ejaakɛ mɔ ni wo shi [Nyɔŋmɔ] lɛ, ebu lɛ anɔkwafo.” Yɛ be ni sa mli lɛ, Sara fɔ lsak. No hewɔ lɛ, beni Abraham eye afi 100 kɛyaa “ni lɛ tete egbo momo” yɛ fɔmɔ gbɛfaŋ lɛ mli “afɔ mɛi ni fa babaoo tamɔ ŋwɛi ŋulamii” yɛ naagbee lɛ yɛ.—1 Mose 17:15-17; 18:11; 21:1-7.
13, 14. (a) Eyɛ mli akɛ Abraham, Esau kɛ Yakob “anine shɛɛɛ nii ni awo shi lɛ anɔ” moŋ, shi te amɛfee amɛ nii amɛha tɛŋŋ? (b) Te wɔɔfee tɛŋŋ ni blematsɛmɛi lɛ anɔkwayeli kɛha Yehowa lɛ he susumɔ he aaaba sɛɛnamɔ aha wɔ, kɛji shiwoi lɛ baaa mli amrɔ nɔŋŋ po!
13 Hemɔkɛyeli baaha wɔyɛ Yehowa anɔkwale kɛji akɛ wɔnaaa eshiwoi lɛ amlibaa amrɔ po. (Kanemɔ Hebribii 11:13-16.) Blematsɛmɛi anɔkwafoi lɛ fɛɛ gboi ni amɛnaaa Nyɔŋmɔ shiwoi ni ekɛhaa amɛ lɛ mlibaa kwraa lɛ. Shi “shɔŋŋ kɛkɛ amɛna [shiwoo nibii lɛ] yɛ, ni amɛkɛshɛje amɛmii, ni amɛnya he, ni amɛjaje akɛ gbɔi kɛ mɛi kpɔji ji amɛ yɛ shikpɔŋ lɛ nɔ.” Hɛɛ, amɛhi shi akɛ mɛi ni yɔɔ hemɔkɛyeli, ejaakɛ yinɔi pii ho dani Shiwoo Shikpɔŋ lɛ batsɔ Abraham Seshibii lɛ anɔ.
14 Anɔkwale ni eji akɛ Nyɔŋmɔ shiwoi nɛɛ baaa mli yɛ amɛwala be mli lɛ haaa Abraham, Isak kɛ Yakob mli afu aloo ni eeeha amɛtsɔmɔ hemɔkɛyeli kwalɔi. Amɛshiii Yehowa ni amɛku sɛɛ amɛya Ur, ni amɛkɛ amɛhe ayawo je lɛŋ nitsumɔi amli. (Okɛto Yohane 17:16; 2 Timoteo 4:10; Yakobo 1:27; 1 Yohane 2:15-17 he.) Dabi, nakai blematsɛmɛi lɛ ‘nine shɛ’ he ko ni hi fe Ur nɔ, “ni ji ŋwɛi nɔ lɛ.” No hewɔ lɛ, ‘Yehowa hiɛ gbooo akɛ amɛaatsɛ lɛ amɛ-Nyɔŋmɔ.’ Amɛhiɛ amɛhemɔkɛyeli yɛ Ŋwɛi Flooflonyo lɛ mli kɛyashi gbele mli ni etsɛŋ ni abaatee amɛ shi kɛba wala mli yɛ shikpɔŋ nɔ, nɔ ni ji “maŋ” lɛ nɔyeli hé lɛ fa ni Mesia Maŋtsɛyeli lɛ Nyɔŋmɔ lɛ esaa eto kɛha amɛ lɛ nɔ. Shi bo hu? Kɛji akɛ ‘onyiɛ yɛ anɔkwale lɛ mli’ afii babaoo, ni ooda aloo oogbɔ yɛ Yehowa sɔɔmɔ mli po lɛ, esa akɛ omɔ hekɛnɔfɔɔ ni oyɔɔ yɛ gbɛjianɔtoo hee ni ewo shi yɛ he lɛ mli lɛ mli. (3 Yohane 4; 2 Petro 3:11-13) Mɛɛ nyɔmɔwoo po bo kɛ blematsɛ anɔkwafoi lɛ fɛɛ aaana yɛ hemɔkɛyeli ni tamɔ nɛkɛ hewɔ!
15. (a) Mɛni ye bua Abraham ni ekɛ Isak ha kwraa akɛ akɛ lɛ asha afɔle lɛ? (b) Te esa akɛ saji ni kɔɔ Abraham kɛ Isak he lɛ asa wɔhemɔkɛyeli he aha tɛŋŋ? (d) Nakai nifeemɔ lɛ feɔ mɛni he mfoniri yɛ gbalɛ mli?
15 Toiboo ni afeɔ ahaa Nyɔŋmɔ ni abiii sane ko yɛ mli lɛ ji hemɔkɛyeli he nibii krokomɛi ni he hiaa lɛ. (Kanemɔ Hebribii 11:17-19.) Akɛni Abraham bo Yehowa toi ni ebiii sane hewɔ lɛ, ‘ekɛ Isak ha akɛ ekɛ lɛ asha afɔle, ebi koome lɛ’—nɔ pɛ ni etsɔ Sara nɔ ena. Mɛni hewɔ Abraham nyɛ efee nakai? Ejaakɛ “ebu akɛ Nyɔŋmɔ yɛ hewalɛ ni ekɛaatee [Isak] lɛ shi kɛaajɛ gbohii ateŋ tete,” kɛ ehe miihia nakai koni eha shi ni ewo akɛ seshi ko aaatsɔ enɔ aba lɛ aba mli. Shwe fioo ni kakla ni yɔɔ Abraham dɛŋ lɛ aha Isak wala aba naagbee, shi ŋwɛibɔfoi ko gbee tsi enɛ feemɔ naa. No hewɔ lɛ Abraham nine shɛ enɔ ekoŋŋ kɛjɛ gbele mli “yɛ okadi gbɛ nɔ.” Esa akɛ hemɔkɛyeli atsirɛ wɔ ni wɔbo Nyɔŋmɔ toi nakai nɔŋŋ kɛji akɛ wɔwala aloo wɔbii awala tete po ka oshara mli. (1 Yohane 5:3) Nɔ ni sa kadimɔ hu ji akɛ Abraham kɛ Isak fɛɛ feɔ bɔ ni Yehowa Nyɔŋmɔ kɛ e-Bi koome, Yesu Kristo baaha akɛ kpɔmɔ nɔ bɔni afee ni mɛi ni tsɔɔ emli hemɔkɛyeli lɛ ana naanɔ wala lɛ he mfoniri yɛ gbalɛ mli.—1 Mose 22:1-19; Yohane 3:16.
16. Mɛɛ nɔkwɛmɔ nɔ blematsɛmɛi lɛ kɛha yɛ wɔbii kɛ Nyɔŋmɔ shiwoi amli hemɔkɛyeli he?
16 Kɛ wɔyɛ hemɔkɛyeli lɛ, wɔbaaye wɔbua wɔseshibii lɛ ni amɛkɛ amɛhiɛnɔkamɔ afɔ nɔ ni Nyɔŋmɔ ewo shi kɛha wɔsɛɛ be lɛ nɔ. (Kanemɔ Hebribii 11:20-22.) Bɔ ni blematsɛmɛi nɛɛ ahemɔkɛyeli mli wa waa ha hewɔ lɛ eyɛ mli akɛ Yehowa shiwoi kɛha amɛ lɛ baaa mli kwraa yɛ amɛwala be mli moŋ, shi aha amɛkɛ nɛkɛ shiwoi nɛɛ ha amɛbii akɛ gboshi nii ni amɛbaanya he. No hewɔ lɛ “Isak kɛjɔɔ Yakob kɛ Esau yɛ nii ni baaba lɛ ahewɔ,” ni Yakob ni gboɔ lɛ jɔɔ Yosef bihii Efraim kɛ Manase Akɛni Yosef diɛŋtsɛ yɔɔ hemɔkɛyeli ni mli wa akɛ Israelbii lɛ baashi Mizraim ni amɛyahi shiwoo shikpɔŋ lɛ nɔ hewɔ lɛ, eha enyɛmimɛi lɛ ka lɛ kita akɛ amɛbaaloo ewui amɛfata amɛhe beni amɛshiɔ lɛ. (1 Mose 27:27-29, 38-40; 48:8-22; 50:24-26) Ani ooye oobua oweku lɛ ni amɛna hemɔkɛyeli ni tamɔ nɛkɛ yɛ nɔ ni Yehowa ewo shi yɛ he lɛ mli?
Hemɔkɛyeli Haa Wɔkɛ Nyɔŋmɔ Yeɔ Klɛŋklɛŋ Gbehe
17. Mose fɔlɔi tsu nii yɛ hemɔkɛyeli mli yɛ mɛɛ gbɛ nɔ?
17 Hemɔkɛyeli kanyaa wɔ koni wɔkɛ Yehowa kɛ ewebii lɛ aye nɔ fɛɛ nɔ ni je lɛ yɔɔ ni ekɛaaha lɛ hiɛ. (Kanemɔ Hebribii 11:23-26.) Israelbii lɛ etsɔmɔ nyɔji ni kpɔmɔ kɛmiijɛ Mizraim nyɔŋyeli mli he miihia amɛ yɛ be mli ni Mose fɔlɔi feɔ nii yɛ hemɔkɛyeli mli lɛ. ‘Amɛsheee maŋtsɛ lɛ akpɔ’ akɛ agbe Hebri gbekɛbii yɛ fɔmɔ mli lɛ gbeyei. Shi moŋ, amɛkɛ Mose tee nyɔji etɛ, ni yɛ naagbee lɛ, akɛ lɛ fɔ adeka ko ni akɛ ama ekpa he mli ni akɛ lɛ yama galai amli yɛ Nilo Faa lɛ toi. Akɛni Farao biyoo lɛ yana lɛ hewɔ lɛ, ‘alɛ lɛ akɛ lɛ diɛŋtsɛ ebi.’ Klɛŋklɛŋ lɛ, Mose tsɛ Amram kɛ enyɛ Yokebed ha lɛ fufɔ ni amɛtsɔse lɛ yɛ mumɔŋ yɛ amɛ diɛŋtsɛ amɛshia. Ni agbɛnɛ akɛ Farao shiabii lɛ ateŋ mɔ ko lɛ, atsɔɔ lɛ “Mizraim nilee fɛɛ,” “ni ena hewalɛ yɛ wiemɔi kɛ nitsumɔi amli,” ehe wa yɛ nilee kɛ gbɔmɔtsoŋ nyɛmɔi amli.—Bɔfoi lɛ Asaji 7:20-22; 2 Mose 2:1-10; 6:20.
18. Yɛ hemɔkɛyeli hewɔ lɛ, mɛɛ shidaamɔ Mose kɔ yɛ Yehowa jamɔ he?
18 Ni kɛlɛ, Mizraim tsɔsemɔ kɛ heloo gbɛfaŋ ŋɔɔmɔyeli yɛ maŋtsɛmɛi awe lɛ haaa Mose akwa Yehowa jamɔ ni ebatsɔ hemɔkɛyeli kwalɔ. Shi moŋ, “hemɔkɛyeli Mose diɛŋtsɛ kɛkpe yɛ enɔ, beni eda lɛ, akɛ akatsɛ lɛ Farao biyoo lɛ bi,” ni efee mɔ ko ni etsu he nii, be mli ni efa enyɛmi ko ni ji Hebrinyo he lɛ. (2 Mose 2:11, 12) Mose hala “akɛ ekɛ Nyɔŋmɔ maŋ [Israelbii ni ji enanemɛi jalɔi lɛ] aaana amanehulu fe nɔ ni eeeye esha mli ŋɔɔmɔ be fioo ko.” Kɛ oji Yehowa tsulɔ ni abaptisi bo ni atsɔse bo yɛ gbɛ ni ja nɔ yɛ mumɔŋ, ni ofi shi shiŋŋ lɛ, ani Obaanyiɛ Mose nɔkwɛmɔ nɔ lɛ sɛɛ ni odamɔ shi shiŋŋ oha anɔkwale jamɔ?
19. (a) Yɛ mɛɛ gbɛ nɔ eka shi faŋ akɛ Mose kɛ Yehowa kɛ Ewebii ye klɛŋklɛŋ gbɛ yɛ eshihilɛ mli? (b) Mɛɛ nyɔmɔwoo gbɛ Mose kwɛɔ lɛ?
19 Mose kɛ ehe yabɔ Yehowa webii ahe ejaakɛ “ebuɔ Kristo hewɔ ahorabɔɔ lɛ akɛ nii babaoo fe Mizraim jwetri lɛ.” Eka shi faŋŋ akɛ Mose ‘bu ahorabɔɔ ni aaaba enɔ lɛ akɛ blema Kristo ko aloo Mɔ Ni Nyɔŋmɔ Efɔ Lɛ Mu lɛ ahorabɔɔ lɛ akɛ ninamɔ kpeteŋkpele fe Mizraim jwetri lɛ.’ Akɛ odehei awe lɛ mlinyo lɛ, kulɛ ebaana nii babaoo kɛ gbɛi hu yɛ Mizraim. Shi ekɛ hemɔkɛyeli tsu nii ni “nyɔmɔwoo lɛ ekwɛɔ”—naanɔ wala kɛtsɔ shitee nɔ kɛmiiba shikpɔŋ nɛɛ nɔ yɛ Nyɔŋmɔ gbɛjianɔtoo hee ni ewo shi yɛ he lɛ mli.
20. Mɛni yɔɔ Mose niiashikpamɔ lɛ mli ni tsɔɔ akɛ hemɔkɛyeli feɔ wɔ mɛi ni sheee gbeyei akɛ Yehowa tsuji?
20 Hemɔkɛyeli feɔ wɔ mɛi ni sheee gbeyei, ejaakɛ wɔyɛ hekɛnɔfɔɔ yɛ Yehowa mli akɛ yiwalaheremɔ. (Kanemɔ Hebribii 11:27-29.) Yɛ be mli ni Farao nu akɛ Mose egbe Mizraimnyo ko lɛ, lɛ hu eyatao akɛ egbe lɛ. “Shi Mose jo foi kɛjɛ Farao hiɛ, ni eyahi Midian shikpɔŋ lɛ nɔ.” (2 Mose 2:11-15) No hewɔ lɛ, etamɔ nɔ ni Paulo miiwie Hebribii lɛ agbɛfaa kɛmiijɛ Mizraim yɛ no sɛɛ lɛ he beni ekɛɛ akɛ: “Hemɔkɛyeli [Mose] ekɛje Mizraim ni esheee maŋtsɛ [ni kɛ gbele wo ehe gbeyei akɛni edamɔ Nyɔŋmɔ najiaŋ eha Israelbii lɛ hewɔ] lɛ mlifu lɛ gbeyei; ejaakɛ emɔ Mɔ ni anaaa lɛ lɛ mli tamɔ nɔ ni eena lɛ.” (2 Mose 10:28, 29) Eyɛ mli akɛ Mose enaaa Nyɔŋmɔ diɛŋtsɛ moŋ, shi bɔ ni Yehowa kɛ lɛ ye ha lɛ ji nɔ ko ni yɔɔ faŋŋ hewɔ lɛ, efee enii tamɔ nɔ ni eena ‘Mɔ ni anaaa lɛ lɛ.’ (2 Mose 33:20) Ani wekukpaa ni ka okɛ Yehowa teŋ lɛ mli wa nakai?—Lala 37:5; Abɛi 16:3.
21. Mɛni ba ni kɔɔ “hemɔkɛyeli” he yɛ shi ni Israel shi Mizraim lɛ mli?
21 Dani Israel aaashi Mizraim lɛ, “hemɔkɛyeli [Mose] ekɛto heloo lɛ kɛ lá dikimɔ lɛ, koni mɔ ni fiteɔ [Israelbii] kromɔbii lɛ akata amɛhe.” Hɛɛ, ebi hemɔkɛyeli dani amɛye Hehoo lɛ kɛ hekɛnɔfɔɔ akɛ Israelbii akromɔbii baaje mli, ni Mizraim kromɔbii baagboi, ni awo nɛkɛ hemɔkɛyeli nɛɛ he nyɔmɔ. (2 Mose 12:1-39) Agbɛnɛ hu “hemɔkɛyeli [Israelbii lɛ] amɛkɛfo Ŋshɔ Tsuru lɛ tamɔ yɛ shikpɔŋ gbiŋ, nɔ ni Mizraimbii lɛ hu ka feemɔ, ni emi amɛ lɛ.” Mɛɛ naakpɛɛ kpɔlɔ Nyɔŋmɔ jie ehe kpo akɛ eji nɛkɛ! Ní yɛ nɛkɛ kpɔmɔ nɛɛ hewɔ lɛ, Israelbii lɛ “je shishi amɛshe Yehowa gbeyei ni amɛhe Yehowa kɛ etsulɔ Mose amɛye.”—2 Mose 14:21-31, NW.
22. Mɛɛ sanebimɔi yɔɔ lolo ni abaasusu he yɛ hemɔkeyeli he?
22 Mose kɛ blematsɛmɛi lɛ ahemɔkɛyeli lɛ ji nɔkwɛmɔ nɔ diɛŋtsɛ kɛha Yehowa Odasefoi ŋmɛnɛ. Shi mɛni ba beni Nyɔŋmɔ kɛ Abraham seshibii lɛ ye lolo akɛ teokrase maŋ gbɛjianɔtoo lɛ? Mɛni wɔbaanyɛ wɔkase lolo kɛjɛ blema bei lɛ amli hemɔkɛyeli nitsumɔi lɛ amlii
[Shishigbɛ niŋmai]
Ajie kɛjɛ January 15, 1987 Watchtower lɛ mli.
Te Obaaha Hetoo Oha Tɛŋŋ?
◻ Mɛni ji hemɔkɛyeli?
◻ Henok nɔkwɛmɔ mɔ lɛ tsɔɔ wɔ mɛni yɛ hemɔkɛyeli he?
◻ Yɛ mɛɛ gbɛ nɔ blematsɛmɛi ni she Nyɔŋmɔ gbeyei Lɛ tsɔɔ akɛ nɔ ni fata hemɔkɛyeli he ji hekɛnɔfɔɔ kwraa ni aaana yɛ Yehowa shiwoi amli?
◻ Mɛɛ Abraham nifeemɔ tsɔɔ akɛ toiboo ni afeɔ ahaa Nyɔŋmɔ ni sanebimɔ ko kwraa bɛ mli lɛ ji hemɔkɛyeli nitsumɔi lɛ eko?
◻ Mɛɛ Mose nifeemɔi tsɔɔ akɛ hemɔkɛyeli tsɔɔ Yehowa kɛ E-webii lɛ ni akɛaaye nɔ fɛɛ ni je lɛ yɔɔ ni ekɛaaha lɛ hiɛ?