Nyɛkwɛa ni Ahia yɛ Hemɔkɛyeli ni Bɛ He
“Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ hiɛkalɔ lɛ, he.”—HEBRIBII 3:12.
1. Mɛni ni haa mɔ he jɔ̃ɔ lɛ diɛŋtsɛ Paulo wiemɔi ni eŋma eyaha Hebri Kristofoi lɛ gbalaa wɔjwɛŋmɔ kɛyaa nɔ?
MƐƐ susumɔ ni yɔɔ gbeyei po nɛ—akɛ gbɔmɛi ni be ko lɛ amɛnáa amɛkɛ Yehowa teŋ wekukpaa mli ŋɔɔmɔ lɛ aaaná “tsui fɔŋ” ni ‘amɛkpale kɛjɛ Nyɔŋmɔ hiɛkalɔ lɛ he’! Ni mɛɛ kɔkɔbɔɔ po enɛ ji nɛkɛ! Jeee mɛi ni jeee heyelilɔi bɔfo Paulo ŋma nɛkɛ wiemɔi nɛɛ eha, shi moŋ eŋma eha gbɔmɛi ni damɔ Yesu Kristo kpɔmɔ afɔleshãa lɛ mli hemɔkɛyeli nɔ amɛjɔɔ amɛhe nɔ amɛha Yehowa.
2. Mɛɛ sanebimɔi ehe hiaa ni wɔsusu he?
2 Te aaafee tɛŋŋ ni mɔ ko ni yɔɔ mumɔŋ shihilɛ ni jɔɔmɔ yɔɔ mli nɛkɛ lɛ aaaná “tsui fɔŋ ni heee yeee” hu? Yɛ anɔkwale mli lɛ, te aaafee tɛŋŋ ni mɔ ko ni kɛ Nyɔŋmɔ suɔmɔ kɛ eduromɔ lɛ esa enaa lɛ aaaje gbɛ atsi ehe kɛjɛ ehe hu? Ani enɛ aaanyɛ aba wɔteŋ mɔ ko nɔ? Susumɔi ni hiɛdɔɔ yɔɔ mli ji enɛɛmɛi, ni ebaafee nɔ ni hi akɛ wɔɔkwɛ yiŋtoo ni yɔɔ kɔkɔbɔɔ nɛɛ sɛɛ lɛ mli.—1 Korintobii 10:11.
Mɛni Hewɔ akɛ Ŋaawoo ni Mli Wa Nɛkɛ Ha?
3. Tsɔɔmɔ bɔ ni shihilɛi ni saa klɛŋklɛŋ afii oha lɛ mli Kristofoi lɛ ahe yɛ Yerusalem kɛ esɛɛ lɛ yɔɔ ha lɛ mli.
3 Etamɔ nɔ ni Paulo ŋma ewolo lɛ eyaha Hebri Kristofoi ni yɔɔ Yudea yɛ afi 61 Ŋ.B. lɛ. Yinɔsaneŋmalɔ ko ŋma akɛ enɛ ji be mli ni “toiŋjɔlɛ loo he ko ni yɔɔ shweshweeshwe bɛ kɛha hii hiɛshikalɔi kɛ anɔkwafoi yɛ Yerusalem maŋtiase lɛ mli loo he kroko yɛ nɔyelihe lɛ fɛɛ mli.” Eji mlakwamɔ kɛ awuiyeli be, ni Roma asraafoi ni yɔɔ jɛmɛ ni waa mɔ yi lɛ kɛ Yudafoi Hiɛdɔlɔi ni kwaa amɛfeɔ amɛhe ekãalɔi lɛ kɛ julɔi anɔ fɔŋ feemɔ nitsumɔi ni ŋɔ basabasafeemɔ bei lɛ amɛkɛtsu nii lɛ ba. Enɛɛmɛi fɛɛ ha nibii amli bawa kɛha Kristofoi lɛ ni bɔ mɔdɛŋ waa koni amɛkɛ amɛhe akawo saji ni tamɔ nɛkɛ mli lɛ. (1 Timoteo 2:1, 2) Yɛ anɔkwale mli lɛ, yɛ amɛshidaamɔ akɛ mɛi ni kɛ amɛhe wooo maŋ saji amli hewɔ lɛ, mɛi komɛi buɔ amɛ akɛ mɛi ni sɛɛnamɔ bɛ amɛhe kɛha maŋ, ákɛ maŋjwalɔi po. Afɔɔ Kristofoi niseniianiifeemɔ, ni ashɔ̃ɔ amɛnibii kɛjɛɔ amɛdɛŋ.—Hebribii 10:32-34.
4. Mɛɛ jamɔ mli nɔnyɛɛ akɛba Hebri Kristofoi lɛ anɔ?
4 Hebri Kristofoi lɛ hu baje jamɔ mli nɔnyɛɛ ni mli wa waa shishi. Ekãa ni Yesu kaselɔi anɔkwafoi lɛ yɔɔ lɛ kɛ nɔ ni jɛ mli ba ni ji Kristofoi asafo lɛ shweremɔ oyayaayai lɛ tee Yudafoi lɛ awuŋayeli kɛ mlifu shi—titri lɛ amɛjamɔ mli hiɛnyiɛlɔi lɛ. Amɛŋmɛŋ gbɛ ni nɔ ko atsi amɛnaa yɛ haomɔ kɛ yiwaa ni amɛkɛaaba Yesu Kristoa sɛɛnyiɛlɔi lɛ anɔ lɛ mli. (Bɔfoi lɛ Asaji 6:8-14; 21:27-30; 23:12, 13; 24:1-9) Kɛji ákɛ akɛ yiwaa baaa Kristofoi lɛ ateŋ mɛi komɛi anɔ tɛ̃ɛ po lɛ, kɛlɛ, Yudafoi lɛ liɔ amɛ ni amɛyeɔ amɛhe fɛo. Agbe Kristojamɔ he guɔ akɛ jamɔ hee ni agbojee ni yɔɔ Yuda jamɔ he lɛ eko bɛ mli, amɛbɛ sɔlemɔtsu, amɛbɛ osɔfoyeli, amɛyeee gbi jurɔ ko, amɛshãaa afɔlei, kɛ nibii krokomɛi. Agbe amɛhiɛnyiɛlɔ Yesu po akɛ awuiyelɔ ní abu lɛ fɔ. Kɛji akɛ Kristofoi aaatsu amɛjamɔ lɛ he nii lɛ, belɛ esa akɛ amɛná hemɔkɛyeli, ekãa, kɛ tsuishiŋmɛɛ.
5. Mɛni hewɔ ehe hiaa akɛ Kristofoi ni yɔɔ Yudea lɛ aaahi shi akɛ mɛi ni hiɛ yɔɔ amɛhe nɔ yɛ mumɔŋ lɛ?
5 Nɔ ni fe fɛɛ lɛ, no mli lɛ Hebri Kristofoi lɛ ni yɔɔ Yudea lɛ miihi shi yɛ nakai maŋ lɛ yinɔsane be ni he jaraa waa mli. No mli lɛ, nibii pii ni amɛ-Nuntsɔ, Yesu Kristo wie akɛ ebaakadi Yudafoi anibii agbɛjianɔtoo lɛ naagbee lɛ eba mli momo. Naagbee lɛ efeŋ nɔ ni yɔɔ shɔŋŋ. Kɛ amɛbaaje mli lɛ, ebaabi ni Kristofoi lɛ ahi shi akɛ mɛi ni hiɛ yɔɔ amɛhe nɔ yɛ mumɔŋ, ni ámɛfee klalo akɛ ‘amɛaajo foi kɛaaya gɔji lɛ anɔ.’ (Mateo 24:6, 15, 16) Ani amɛbaaná hemɔkɛyeli kɛ mumɔŋ hewalɛ ni he hiaa ni aaaha amɛfee nii oya, taakɛ Yesu etsɔɔ lɛ? Efee tamɔ nɔ ni yiŋkɔshikɔshifeemɔ ko yɛ.
6. Mɛni he hiaa Kristofoi ni yɔɔ Yudea lɛ waa diɛŋtsɛ?
6 Yɛ naagbee afii nyɔŋma lɛ mli, dani Yudafoi anibii agbɛjianɔtoo lɛ fɛɛ hiɛkpatamɔ aaaba lɛ, no mli lɛ eyɛ faŋŋ akɛ Hebri Kristofoi lɛ yɛ nɔnyɛɛ ni mli wa waa ni jɛ asafo lɛ mli kɛ esɛɛ fɛɛ lɛ shishi. Hewalɛwoo he miihia amɛ. Shi ŋaawoo kɛ gbɛtsɔɔmɔ ni baaye abua amɛ ni amɛna akɛ gbɛ ni amɛhala lɛ ji nɔ ni ja lɛ, ni ákɛ, amɛnako amanehulu ni amɛŋmɛko amɛtsui shi yakatswaa hu he miihia amɛ. Miishɛɛ sane ji akɛ, Paulo kɛ hiɛmiamɔ tsu shihilɛ lɛ he nii ni ebaye ebua amɛ.
7. Mɛni hewɔ esa akɛ wɔnya sane ni Paulo ŋma eyaha Hebri Kristofoi lɛ he lɛ?
7 Esa akɛ nɔ ni Paulo ŋma eyaha Hebri Kristofoi lɛ afee nɔ ni wɔyɔɔ he miishɛɛ babaoo. Mɛni hewɔ? Ejaakɛ be ni tamɔ amɛnɔ̃ lɛ mli pɛpɛɛpɛ wɔyɔɔ lɛ. Wɔnuɔ nɔnyɛɛi ni jɛ jeŋ ni yɔɔ Satan kudɔmɔ shishi lɛ mli lɛ he daa gbi. (1 Yohane 5:19) Nɔ ni baa mli yɛ wɔgbii nɛɛ amli ji Yesu kɛ bɔfoi lɛ agbalɛi ni kɔɔ naagbee gbii lɛ kɛ ‘nibii agbɛjianɔtoo lɛ naagbee’ lɛ ahe. (Mateo 24:3-14; 2 Timoteo 3:1-5; 2 Petro 3:3, 4; Kpojiemɔ 6:1-8) Nɔ ni fe fɛɛ lɛ, ehe miihia ni wɔhi shi akɛ mɛi ni hiɛ kã yɛ mumɔŋ, koni wɔnyɛ ‘nii ni baaba lɛ fɛɛ mli wɔje.’—Luka 21:36.
Mɔ ni Da Fe Mose
8. Yɛ nɔ ni ewie ni aŋma yɛ Hebribii 3:1 lɛ hewɔ lɛ, mɛni Paulo woɔ enanemɛi Kristofoi lɛ hewalɛ ni amɛfee?
8 Beni Paulo tsiɔ sane titri ko tã lɛ, eŋma akɛ: “Nyɛtɛ̃jea nyɛhiɛ nyɛkwɛa wɔhemɔkɛyeli jajemɔ lɛ he bɔfo kɛ osɔfonukpa ni ji Kristo Yesu lɛ.” (Hebribii 3:1) “Nyɛkwɛa” lɛ tsɔɔ “ayoo sɛɛ faŋŋ . . . , anu shishi jogbaŋŋ, atɛ̃je hiɛ akwɛ jogbaŋŋ.” (Vine’s Expository Dictionary of Old and New Testament Words) No hewɔ lɛ, Paulo miiwo enanemɛi heyelilɔi lɛ hewalɛ koni amɛkɛ hiɛdɔɔ amia amɛhiɛ koni amɛhiɛ asɔ nii ni Yesu tsu yɛ amɛhemɔkɛyeli kɛ yiwalaheremɔ mli lɛ diɛŋtsɛ. Enɛ feemɔ baawo amɛfaishitswaa akɛ amɛaadamɔ shi shiŋŋ yɛ hemɔkɛyeli mli lɛ mli hewalɛ. Belɛ, mɛni ji Yesu nitsumɔ, ni mɛni hewɔ esa akɛ ‘wɔkwɛ’ lɛ lɛ?
9. Mɛni hewɔ Paulo wie Yesu he akɛ “bɔfo” kɛ “osɔfonukpa” lɛ?
9 Paulo kɛ wiemɔi “bɔfo” kɛ “osɔfonukpa” to Yesu he. “Bɔfo” ji mɔ ko ni atsu lɛ, ni ekɔɔ nɔ ni Nyɔŋmɔ tsɔɔ nɔ ekɛ adesai yeɔ sharamɔ lɛ he yɛ biɛ. “Osɔfonukpa” ji mɔ ni gbɔmɛi tsɔɔ enɔ amɛbɛŋkɛɔ Nyɔŋmɔ. Nɛkɛ gbɛjianɔtoi enyɔ nɛɛ he hiaa kɛha anɔkwa jamɔ, ni enyɔ lɛ fɛɛ yɛ Yesu mli. Lɛ ji mɔ ni atsu lɛ kɛjɛ ŋwɛi koni ebatsɔɔ adesai anɔkwale ni kɔɔ Nyɔŋmɔ he. (Yohane 1:18; 3:16; 14:6) Yesu hu ji mɔ ni ahala lɛ akɛ mfonirifeemɔŋ Osɔfonukpa yɛ Yehowa mumɔŋ sɔlemɔtsu gbɛjianɔtoo lɛ mli kɛha eshaifaa. (Hebribii 4:14, 15; 1 Yohane 2:1, 2) Kɛji akɛ wɔhiɛ sɔɔ jɔɔmɔi ni wɔnine baanyɛ ashɛ nɔ kɛtsɔ Yesu nɔ diɛŋtsɛ lɛ, wɔbaana ekãa kɛ faishitswaa ni baaha wɔfee shiŋŋ yɛ hemɔkɛyeli mli.
10. (a) Mɛɛ gbɛ nɔ Paulo tsɔ eye ebua Hebri Kristofoi lɛ koni amɛhiɛ asɔ bɔ ni Kristojamɔ nɔ kwɔ fe Yuda jamɔ lɛ? (b) Mɛɛ jeŋ muu fɛɛ anɔkwale ko Paulo tsɛ́ sɛɛ koni ekɛfi esane lɛ sɛɛ?
10 Bɔni afee ni ema Kristofoi ahemɔkɛyeli lɛ jarawalɛ nɔ mi lɛ, Paulo kɛ Yesu to Mose, ni Yudafoi lɛ bu lɛ akɛ amɛblematsɛmɛi lɛ ateŋ gbalɔ ni fe fɛɛ lɛ he. Kɛji akɛ Hebri Kristofoi lɛ kɛ amɛtsui fɛɛ baamɔ anɔkwale ni eji akɛ Yesu da fe Mose lɛ mli lɛ, no lɛ nɔ ni amɛaadamɔ nɔ ni amɛha amɛyiŋ afee amɛ kɔshikɔshi yɛ Kristojamɔ ni nɔ kwɔ fe Yuda jamɔ lɛ bɛ. Paulo tsɔɔ mli akɛ, yɛ be mli ni abu Mose akɛ mɔ ni sa ákɛ akɛ Nyɔŋmɔ “we”—Israel maŋ lɛ, loo asafo lɛ—woɔ edɛŋ lɛ, eji sɔɔlɔ loo tsulɔ anɔkwafo kɛkɛ. (4 Mose 12:7) Yɛ gbɛ kroko nɔ lɛ, Yesu ji Bi lɛ, we lɛ nɔ nuntsɔ lɛ. (1 Korintobii 11:3; Hebribii 3:2, 3, 5) Bɔni afee ni efi esane lɛ sɛɛ lɛ, Paulo tsɛ́ jeŋ muu fɛɛ anɔkwa sane nɛɛ sɛɛ: “Ejaakɛ shia fɛɛ shia lɛ, mɔ ko kɛ̃ ma, shi mɔ ni saa nii fiaa to ji Nyɔŋmɔ.” (Hebribii 3:4) Ákɛ Nyɔŋmɔ kwɔ fe mɔ fɛɛ mɔ lɛ, mɔ ko mɔ ko bɛ ni baaje enɛ he ŋwane, ejaakɛ lɛ ji nibii fɛɛ a-Feelɔ, loo Bɔlɔ lɛ. Yɛ sane naatsɔɔmɔ ni ja naa lɛ, akɛni Yesu ji Nyɔŋmɔ hefatalɔ nitsulɔ hewɔ lɛ, esa akɛ efee mɔ ni da fe bɔɔnii krokomɛi fɛɛ, ni Mose fata he.—Abɛi 8:30; Kolosebii 1:15-17.
11, 12. Mɛni Paulo wo Hebri Kristofoi lɛ hewalɛ akɛ amɛmɔ mli “kpɛŋŋ kɛyashi naagbee” lɛ, ni mɛɛ gbɛ nɔ wɔɔtsɔ ni wɔkɛ eŋaawoo lɛ atsu nii?
11 Yɛ anɔkwale mli lɛ, Hebri Kristofoi lɛ yɛ gbɛhe ko ni aduro amɛ waa yɛ mli lɛ mli. Paulo kai amɛ akɛ amɛji “mɛi ni ená ŋwɛi tsɛmɔ lɛ eko,” hegbɛ ni esa akɛ abu lɛ akɛ ejara wa waa fe nɔ fɛɛ nɔ ni Yudafoi agbɛjianɔtoo lɛ yɔɔ ni ekɛbaaha. (Hebribii 3:1) Ekolɛ Paulo wiemɔi lɛ ha nakai Kristofoi ni afɔ amɛ mu lɛ ná shidaa henumɔ akɛ amɛnyiɛ gbɛ ni kɛ mɔ yaa gboshiniyeli hee mli lɛ nɔ, fe ni amɛaanu dɔlɛ he akɛ ámɛŋmɛɛ nibii ni kɔɔ amɛ Yudafoi agboshiniyeli lɛ he. (Filipibii 3:8) Beni ewoɔ amɛ hewalɛ ni amɛmɔ nakai hegbɛ lɛ mli shi amɛkabu enɛ akɛ nɔ ko kɛkɛ lɛ, Paulo kɛɛ: “Kristo ye anɔkwa akɛ Bi yɛ [Nyɔŋmɔ] we lɛ nɔ. Wɔji nakai Mɔ lɛ we, kɛ wɔhiɛ wɔwiemɔ mli heyeli lɛ kɛ wɔshwãa yɛ hiɛnɔkamɔ lɛ he lɛ mli kpɛŋŋ kɛyashi naagbee lɛ.”—Hebribii 3:6, NW.
12 Hɛɛ, kɛji akɛ Hebri Kristofoi lɛ baaje Yudafoi anibii agbɛjianɔtoo lɛ naagbee ni baa lɛ mli shweshweeshwe lɛ, ehe miihia ni amɛmɔ hiɛnɔkamɔ ni Nyɔŋmɔ kɛha amɛ lɛ mli “kpɛŋŋ kɛyashi naagbee.” Esa akɛ wɔfee nakai nɔŋŋ ŋmɛnɛ, kɛji akɛ wɔmiisumɔ ni wɔje gbɛjianɔtoo nɛɛ naagbee lɛ mli. (Mateo 24:13) Esaaa akɛ wɔhaa shihilɛ mli yeyeeyefeemɔ, gbɔmɛi ashikpilikpiifeemɔ, loo wɔ diɛŋtsɛ wɔ subaŋi ni yeee emuu lɛ haa wɔhosoɔ yɛ hemɔkɛyeli ni wɔyɔɔ yɛ Nyɔŋmɔ shiwoi amli lɛ mli. (Luka 21:16-19) Bɔni afee ni wɔna bɔ ni wɔɔfee ni wɔwaje wɔhe lɛ, nyɛhaa wɔboa Paulo wiemɔi krokomɛi lɛ atoi.
“Nyɛkawajea Nyɛtsuii”
13. Mɛɛ kɔkɔbɔɔ Paulo kɛha, ni ekɛ Lala 95 tsu nii yɛ mɛɛ gbɛ nɔ?
13 Beni esusu gbɛhe ni duromɔ yɔɔ mli ni Hebri Kristofoi lɛ yɔɔ mli lɛ he lɛ sɛɛ lɛ, Paulo kɛ kɔkɔbɔɔ nɛɛ ha: “Taakɛ bɔ ni Mumɔ krɔŋkrɔŋ lɛ kɛɛ lɛ, ‘ŋmɛnɛ, kɛji nyɛnu egbee lɛ, nyɛkawajea nyɛtsuii, taakɛ bɔ ni afee yɛ mlilawoo lɛ mli, yɛ naatsɔ̃ɔ gbi lɛ nɔ, yɛ ŋa lɛ nɔ lɛ.’ ” (Hebribii 3:7, 8) Paulo miitsɛ́ wiemɔ sɛɛ kɛmiijɛ Lala 95, ni yɛ enɛ hewɔ lɛ, ebaanyɛ ekɛɛ akɛ “mumɔ krɔŋkrɔŋ lɛ kɛɛ.”b (Lala 95:7, 8; 2 Mose 17:1-7) Ŋmalɛi lɛ jɛ Nyɔŋmɔ mumɔ mli kɛtsɔ emumɔ krɔŋkrɔŋ lɛ nɔ.—2 Timoteo 3:16.
14. Te Israelbii lɛ here nɔ ni Yehowa efee kɛha amɛ lɛ nɔ amɛha tɛŋŋ, ni mɛni hewɔ?
14 Beni aha Israelbii lɛ ye amɛhe kɛjɛ Mizraim nyɔŋyeli mli lɛ sɛɛ lɛ, akɛ woo ni da waa ni ji Yehowa ni amɛkɛ lɛ aaabote kpaŋmɔ wekukpaa mli ha amɛ. (2 Mose 19:4, 5; 24:7, 8) Yɛ nɔ najiaŋ ni amɛaajie hiɛsɔɔ kpo yɛ nɔ ni Nyɔŋmɔ efee kɛha amɛ lɛ he moŋ lɛ, etsɛɛɛ ni amɛfee nii yɛ atuatsemɔ gbɛ nɔ. (4 Mose 13:25–14:10) Mɛni ha eba lɛ nakai? Paulo tsɔɔ nɔ hewɔ lɛ: amɛtsuii ni amɛwaje lɛ. Shi te ebaa lɛ tɛŋŋ ni tsuii ni nuɔ nii ahe ni kpɛlɛɔ Nyɔŋmɔ Wiemɔ nɔ lɛ bafeɔ nɔ ni ewa lɛ? Ni mɛni esa akɛ wɔfee koni wɔkɛtsĩ enɛ gbɛ?
15. (a) Mɛɛ gbɛ nɔ atsɔ anu ‘Nyɔŋmɔ diɛŋtsɛ gbee’ yɛ tsutsu kɛ ŋmɛnɛŋmɛnɛ? (b) Mɛɛ sanebimɔi ehe hiaa ni wɔbi wɔ diɛŋtsɛ wɔhe yɛ ‘Nyɔŋmɔ gbee’ lɛ he?
15 Paulo je ekɔkɔbɔɔ lɛ shishi kɛ wiemɔ-fã, “kɛji nyɛnu egbee lɛ.” Nyɔŋmɔ tsɔ Mose kɛ gbalɔi krokomɛi anɔ ewie etsɔɔ ewebii lɛ. Kɛkɛ ni Yehowa tsɔ e-Bi Yesu Kristo nɔ ewie etsɔɔ amɛ. (Hebribii 1:1, 2) Ŋmɛnɛ, wɔyɛ Nyɔŋmɔ Wiemɔ, Ŋmalɛ Krɔŋkrɔŋ Biblia ni jɛ mumɔŋ lɛ fɛɛ. Wɔyɛ “tsulɔ anɔkwafo kɛ nilelɔ,” ni Yesu hala lɛ koni eha wɔ mumɔŋ “ŋmãa yɛ be ni sa nɔ” lɛ. (Mateo 24:45-47) No hewɔ lɛ, Nyɔŋmɔ miiwie lolo. Shi ani wɔmiibo toi? Akɛ nɔkwɛmɔnɔ lɛ, te wɔtsũɔ ŋaawoo ni akɛhaa wɔ yɛ atadewoo kɛ hesaamɔ loo hiɛtserɛjiemɔ kɛ lalai ahe lɛ he nii wɔhaa tɛŋŋ? Ani ‘wɔboɔ toi,’ ni ji akɛ, wɔfeɔ toiboo ni wɔyeɔ nɔ ni wɔnuɔ lɛ nɔ? Kɛji akɛ wɔsubaŋ ji ni wɔjie saji anaa loo wɔte shi wɔwo ŋaawoo lɛ, belɛ wɔmiiŋmɛɛ wɔhe wɔha oshara ni baa nigii ni ji wɔtsuii ni wɔwajeɔ lɛ.
16. Mɛni ji gbɛ kome ni wɔtsuii baanyɛ atsɔ nɔ awa?
16 Wɔtsuii baanyɛ awa hu kɛji akɛ wɔgbala wɔhe shi kɛjɛ nɔ ni wɔbaanyɛ wɔfee ni esa akɛ wɔfee hu lɛ feemɔ he. (Yakobo 4:17) Yɛ nɔ fɛɛ nɔ ni Yehowa fee kɛha Israelbii lɛ fɛɛ sɛɛ lɛ, amɛnáaa emli hemɔkɛyeli, amɛtse atua amɛshi Mose, amɛhala akɛ amɛaabo amaniɛbɔɔ fɔŋ ni jɛ Kanaan lɛ toi, ni amɛkpoo akɛ amɛaabote Shiwoo Shikpɔŋ lɛ nɔ. (4 Mose 14:1-4) No hewɔ lɛ, Yehowa wo akpɔ akɛ amɛbaahi ŋa lɛ nɔ afii 40—be kakadaŋŋ bɔ ni no aaaha nakai yinɔ lɛ mli bii atuatselɔi lɛ fɛɛ agboi kwraa. Akɛni Nyɔŋmɔ mli fu amɛ hewɔ lɛ, ekɛɛ akɛ: “Daa nɛɛ amɛduɔ gbɛ yɛ amɛtsui mli. Shi amɛleee migbɛ̀i lɛ; no ha mikã kita yɛ mimlifu lɛŋ akɛ: Kɛ́ amɛbote mihejɔɔmɔ lɛ mli fĩi.” (Hebribii 3:9-11) Ani wɔnaa akɛ nikasemɔ ko yɛ enɛ mli kɛha wɔ?
Nikasemɔ Kɛha Wɔ
17. Eyɛ mli akɛ amɛna Yehowa hewalɛ nifeemɔi lɛ ni amɛnu saji ni ejaje etsɔɔ amɛ lɛ moŋ, shi mɛni hewɔ Israelbii lɛ bɛ hemɔkɛyeli lɛ?
17 Yinɔ ni ji Israelbii ni je Mizraim lɛ kɛ amɛ diɛŋtsɛ amɛhiŋmɛi na ni amɛkɛ amɛtoii nu Yehowa nitsumɔi wuji kɛ ewiemɔi lɛ. Ni kɛlɛ, amɛbɛ hemɔkɛyeli akɛ Nyɔŋmɔ baanyɛ anyiɛ amɛhiɛ shweshweeshwe kɛya Shiwoo Shikpɔŋ lɛ nɔ. Mɛni hewɔ? Yehowa kɛɛ, “amɛleee migbɛ̀i lɛ.” Amɛle nɔ ni Yehowa éwie ni éfee, shi amɛnáko emli hemɔkɛyeli kɛ hekɛnɔfɔɔ yɛ enyɛmɔ ni ekɛaakwɛ amɛnɔ lɛ mli. Amɛ diɛŋtsɛ amɛtaomɔ nii kɛ hiamɔ nii eye amɛ sɛkɛ aahu akɛ amɛsusuuu Nyɔŋmɔ gbɛ̀i kɛ eyiŋtoi ahe fioo po. Hɛɛ, amɛbɛ eshiwoo lɛ mli hemɔkɛyeli.
18. Taakɛ Paulo tsɔɔ lɛ, mɛɛ nifeemɔ gbɛ kɛ “tsui fɔŋ ni heee yeee” baaba?
18 Nɛkɛ wiemɔi lolo ni ekɛha Hebribii lɛ kɔɔ wɔhe nakai nɔŋŋ kɛ hewalɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ, hiɛkalɔ lɛ, he.” (Hebribii 3:12) Paulo tsɔɔ nɔ ni hɔ saji lɛ ashishi tɔ̃ɔ lɛ, kɛtsɔ nɔ ni ekɛɛ akɛ, nɔ ni kɛ “tsui fɔŋ ni heee yeee” lɛ ba ji ‘Nyɔŋmɔ hiɛkalɔ lɛ he ni amɛkpale kɛjɛ’ lɛ nɔ. No mli lɛ etsɔ ehiɛ ewie ‘kpalaŋmɔ ni akpalaŋɔ kɛyaa’ yɛ toiboo ni afeee hewɔ lɛ he momo yɛ ewolo lɛ mli. (Hebribii 2:1) Shi kɛlɛ, Hela wiemɔ ni atsɔɔ shishi akɛ “kpale kɛjɛ” lɛ shishi ji “atsi he kɛjɛ,” ni ekɔɔ wiemɔ, “hemɔkɛyeli kwamɔ” he. Etsɔɔ nɔ ko ni ajeɔ gbɛ akũɔ naa, he ni atsiɔ kɛjɛɔ nɔ ko he, kɛ kwamɔ ni hiɛ kãa he ni ajeɔ gbɛ afeɔ kɛ heguɔgbee ni fata he.
19. Ŋaawoo toi ni abooo lɛ kɛ nibii ni hiɛdɔɔ yɔɔ mli baaba yɛ mɛɛ gbɛ nɔ? Feemɔ ehe nɔkwɛmɔnɔ.
19 No hewɔ lɛ, nii ni wɔkaseɔ kɛjɛɔ mli lɛ ji akɛ, kɛji akɛ wɔyagbee su ni ji ‘lɛ diɛŋtsɛ egbee toi’ ni wɔbooo lɛ mli, wɔku wɔhiɛ wɔshwie ŋaawoo ni jɛ Yehowa ŋɔɔ kɛtsɔ e-Wiemɔ lɛ kɛ tsulɔ anɔkwafo kuu lɛ nɔ lɛ nɔ lɛ, no lɛ etsɛŋ ni wɔtsuii baafee nɔ ni nuuu nii ahe, ebaawa. Akɛ nɔkwɛmɔnɔ lɛ, nuu kɛ yoo ni boteko gbalashihilɛ mli lɛ baafee mɛi ni kɛ amɛhe bɔɔ gbagbalii tsɔ̃. Shi kɛ amɛku amɛhiɛ amɛshwie sane nɛɛ nɔ hu? Ani no baabu amɛhe ni amɛkatĩ nɔ ni amɛfee lɛ mli, aloo no baaha efee mlɛo moŋ kɛha amɛ akɛ amɛaafee ekoŋŋ? Nakai nɔŋŋ hu kɛji akɛ tsulɔ kuu lɛ kɛ ŋaawoo ko ha yɛ bɔ ni ehe hiaa ni wɔhala wɔlalai kɛ hiɛtserɛjiemɔ, kɛ nibii krokomɛi amli lɛ, ani wɔkɛ shidaa kpɛlɛɔ nɔ, ni wɔfeɔ tsakemɔi yɛ hei ni he hiaa lɛ? Paulo wo wɔ hewalɛ koni ‘wɔkakwa wɔhe naabuamɔ.’ (Hebribii 10:24, 25) Yɛ nɛkɛ ŋaawoo nɛɛ fɛɛ sɛɛ lɛ, mɛi komɛi ebuuu Kristofoi akpeei akɛ ehe hiaa tsɔ̃ ko. Ekolɛ amɛbaanu he akɛ ekomɛi ni aaaje osɛɛ loo kpeei lɛ ekomɛi ni oyaŋ po lɛ he ehiaaa kwraa.
20. Mɛni hewɔ ehe hiaa ni wɔkpɛlɛ Ŋmalɛ mli ŋaawoo nɔ yɛ gbɛ kpakpa nɔ lɛ?
20 Kɛji akɛ wɔkpɛlɛɛɛ Yehowa “gbee” taakɛ ejieɔ kpo faŋŋ yɛ Ŋmalɛi lɛ kɛ Biblia kasemɔ he woji lɛ amli lɛ nɔ yɛ gbɛ kpakpa nɔ lɛ, etsɛŋ ni wɔbaana wɔhe akɛ ‘wɔmiikpale kɛmiijɛ Nyɔŋmɔ hiɛkalɔ lɛ he.’ Nɔ ni baajɛ hiɛ ni akuɔ ashwieɔ ŋaawoo nɔ lɛ mli aba yɛ gbɛ ni waaa nɔ baanyɛ atsɔ̃ gbɛ ni ajeɔ akɛ abuuu mɔ, wiemɔ kɛ shimɔ, kɛ shi ni ateɔ awoɔ enɛ. Kɛji akɛ ajajeee enɛ lɛ, nɔ ni baajɛ mli aba ji “tsui fɔŋ ni heee yeee,” ni bei pii lɛ gbɛ ni tamɔ nɛkɛ mli ni ajeɔ lɛ wa waa. (Okɛto Efesobii 4:19 he.) Yeremia ŋma anɔkwale akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale?” (Yeremia 17:9) Yɛ yiŋtoo nɛɛ hewɔ lɛ, Paulo wo enanemɛi Hebribii heyelilɔi lɛ hewalɛ akɛ: “Nyɛwiea nyɛtsɔɔtsɔɔa nyɛhe gbi fɛɛ gbi ni atsɛɔ lɛ ŋmɛnɛ lɛ, koni akɛ esha shishiumɔ lɛ akawaje nyɛteŋ mɔ ko.”—Hebribii 3:13.
21. Mɛni awoɔ wɔ ŋaa ni wɔfee, ni mɛɛ gbɛkpamɔi wɔyɔɔ?
21 Kwɛ miishɛɛ ni wɔyɔɔ akɛ Yehowa kɛ wɔ miiwie lolo ŋmɛnɛ kɛmiitsɔ e-Wiemɔ lɛ kɛ egbɛjianɔtoo lɛ nɔ! Wɔdaa shi akɛ “tsulɔ anɔkwafo kɛ nilelɔ lɛ” yaa nɔ eyeɔ ebuaa wɔ koni “wɔhiɛ wɔhe ni wɔŋɔ-fɔ̃ɔ enɔ kɛjɛ shishijee lɛ mli kpɛŋŋ kɛyashi naagbee.” (Hebribii 3:14) Be ni wɔkɛaahere Nyɔŋmɔ suɔmɔ kɛ gbɛtsɔɔmɔ lɛ nɔ lɛ nɛ. Yɛ be mli ni wɔfeɔ nakai lɛ, wɔbaanyɛ wɔná Yehowa shiwoi ni yɔɔ naakpɛɛ lɛ ekroko mli ŋɔɔmɔ—no ji, ehejɔɔmɔ ‘lɛ mli ni wɔɔbote.’ (Hebribii 4:3, 10) No ji sane ni nyiɛ sɛɛ ni Paulo kɛ Hebri Kristofoi lɛ wie he, ni eji nɔ ni wɔbaasusu he yɛ nikasemɔ ni nyiɛ sɛɛ lɛ mli.
[Shishigbɛ niŋmai]
a Josephus bɔ amaniɛ akɛ, yɛ Festus gbele sɛɛ nɔŋŋ lɛ, Ananus (Ananias) ni jɛ Sadukifoi ajamɔ kuu fã lɛ mli lɛ batsɔ osɔfonukpa. Ekɛ Yakobo, Yesu nyɛ bi lɛ kɛ kaselɔi krokomɛi ba Akuashɔŋ lɛ hiɛ ni eha abu amɛ gbele fɔ ni atswia amɛ tɛi.
b Eyɛ faŋŋ akɛ Paulo tsɛ́ wiemɔ sɛɛ kɛjɛ Hela Septuagint lɛ ni tsɔɔ Hebri wiemɔ kɛha “Meriba” kɛ “Masa” shishi akɛ “mlilawoo” kɛ “naatsɔɔ” lɛ mli. Kwɛmɔ Insight on the Scriptures wolo lɛ ni Watchtower Bible and Tract Society of New York, Inc. fee lɛ Kpo 2 lɛ baafai 350 kɛ 379 lɛ mli.
Ani Obaanyɛ Otsɔɔ Mli?
◻ Mɛni hewɔ Paulo ŋma ŋaawoo ni mli wa waa nɛkɛ eha Hebri Kristofoi lɛ?
◻ Yɛ mɛɛ gbɛ nɔ Paulo ye ebua Hebri Kristofoi lɛ koni amɛyoo akɛ amɛyɛ nɔ ko ni hi fe shihilɛ yɛ Yuda jamɔ shishi?
◻ Mɛɛ gbɛ nɔ mɔ ko tsui tsɔɔ ewaa yɛ?
◻ Mɛni esa akɛ wɔfee koni wɔkwa “tsui fɔŋ ni heee yeee” ni wɔɔná lɛ?
[Mfoniri ni yɔɔ baafa 10]
Ani ootsɔɔ hemɔkɛyeli yɛ Yesu, Mose Kpeteŋkpele lɛ mli?