Nyɛyimɔa Obɔbɔ Kɛ Miishɛɛ
“Ni kaselɔi Iɛ yimɔ obɔbɔ kɛ miishɛɛ kɛ mumɔ krɔŋkrɔŋ.”—Bɔfoi lɛ Asaji 13:52.
1. (a) Mɛni yibii nɛkɛ ji miishɛɛ? (b) Mɛɛ gbɛjianɔ ko ni Nyɔŋmɔ to ni yɔɔ miishɛɛ esa akɛ awo ehiɛ nyam yɛ he?
MIISHƐƐ! Nɛkɛ Kristofoi asu nɛɛ ji nɔ ni ji enyɔ nɔ ni nyiɛ suɔmɔ sɛɛ yɛ bɔ ni Paulo tsɔɔ mumɔ lɛ yibii lɛ mli eha lɛ mli. (Galatabii 5:22-25) Ni mɛni haa anaa nakai miishɛɛ lɛ? No ji sanekpakpa ni Nyɔŋmɔ bɔfo lɛ tswa he adafi etsɔɔ tookwɛlɔi heshibalɔi lɛ nɔ ni fe afii 1,900 ni eho nɛ lɛ: “Naa, mibagba nyɛ miishɛɛ sane kpele ni ji maŋ fɛɛ nɔ; akɛ ŋmɛnɛ afɔ walaherelɔ ni ji Kristo, Nuŋtsɔ lɛ, aha nyɛ, yɛ David maŋ lɛŋ.” Kɛkɛ ni bɔfoi akuu lɛ hu pue ni amɛbafata bɔfo lɛ he ni amɛkɛ miishɛɛ jie Nyɔŋmɔ yi ni amɛkɛɛ: “Anunyam aha Nyɔŋmɔ yɛ ŋwɛi fooflo, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ!”—Luka 2:10-14.
2, 3. (a) Mɛni hewɔ esa jogbaŋŋ akɛ Nyɔŋmɔ tsu ekromɔ Bi Iɛ kɛba koni ebatsɔ adesai a-Kpɔlɔ lɛ? (b) Mɛɛ gbɛi krokomɛi anɔ Yesu sɔmɔ yɛ Nyɔŋmɔ yiŋtoi ahe yɛ be mli ni eyɔɔ shikpɔŋ nɔ lɛ?
2 Tsuijurɔ ni Yehowa yɔɔ yɛ gbɔmɛi ahe lɛ jeɔ kpo yɛ yiwalaheremɔ ni ekɛha kɛtsɔ Nuŋtsɔ Kristo nɔ lɛ mli. Nɛkɛ Nyɔŋmɔ kromɔ Bi nɛɛ feɔ anɔkwa nilee he mfoniri kwraa kɛmɔɔ shi, ni atsɔɔ mli akɛ ewie yɛ e-Tsɛ he yɛ be mli ni ebɔɔ nibii lɛ akɛ: “No mli lɛ mibatsɔ nitsulɔ ni he wa ni le nii yɛ emasɛi, ni miyiɔ obɔ kɛ miishɛɛ daa gbi, ni mimli filiɔ mi yɛ ehiɛ be fɛɛ be; mimli filiɔ mi yɛ eshikpɔŋ ni woɔ yibii babaoo lɛ nɔ, hɛɛ nɔ ni minaa he miishɛɛ fe fɛɛ ji gbɔmɛi abii.”—Abɛi 8:30, 31, Rotherham.
3 No hewɔ lɛ, eja gbɛ akɛ Yehowa tsu Bi nɛɛ ni naa adesai abii ahe miishɛɛ nɛkɛ lɛ kɛba koni ebafee adesai a-Kpɔlɔ. Ni mɛɛ gbɛ nɔ enɛ kɛ anunyam baaha Nyɔŋmɔ yɛ? Ebaagbele gbɛ eha lɛ bɔni afee ni etsu eyiŋtoi ni yɔɔ nyam akɛ eeeha shikpɔŋ lɛ fɛɛ nɔ ayi obɔ kɛ adesai ni ji jalɔi kɛ mɛi ni sumɔɔ toiŋjɔlɛ lɛ he nii. (1 Mose 1:28) Kɛfata he lɛ, beni Bi nɛɛ, ni ji Yesu yɔɔ shikpɔŋ nɛɛ nɔ lɛ, ebaatsɔɔ yɛ kaai ni mli wawai fe fɛɛ lɛ po mli akɛ adesa ni eye emuu lɛ baanyɛ ekɛ anɔkwayeli abo Yehowa toi akɛ Jeŋ Muu Fɛɛ Nuŋtsɔ, koni etsɔ nakai feemɔ nɔ ebu ja ni eja akɛ e-Tsɛ aaaye E-debɔɔ nii anɔ yɛ gbɛ ni ja nɔ lɛ bem. (Hebribii 4:15; 5:8, 9) Anɔkwayeli mli hiɛmɔ gbɛ ni Yesu kɔ lɛ hu shi nɔkwɛmɔ nɔ ko efɔ shi eha anɔkwa Kristofoi fɛɛ koni amɛnyiɛ enanemaa hei lɛ asɛɛ kpaakpa.—1 Petro 2:21.
4. Mɛɛ miishɛɛ kpele jɛ Yesu tsuishiŋmɛɛ lɛ mli ba, ni te esa akɛ enɛ awo wɔ hewalɛ aha tɛŋŋ?
4 No hewɔ lɛ Yesu na miishɛɛ ni fa kɛteke nɔ yɛ e-Tsɛ suɔmɔnaa nifeemɔ mli, kɛ agbɛnɛ hu yɛ miishɛɛ babaoo ni ekpaa gbɛ lɛ mli, taakɛ bɔfo Paulo tsɔɔ mli yɛ Hebribii 12:1, 2 lɛ: “Wɔkɛ tsuishitoo ada foi ni ka wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni ka ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.” Mɛɛ miishɛɛ nɛ? No ji miishɛɛ ni Yesu yɔɔ lɛ, jeee akɛ eeetse e-Tsɛ lɛ gbɛi lɛ he ni ekpɔ adesai kɛjɛ gbele mli kɛkɛ, shi moŋ yɛ nɔyeli ni eeeye nɔ akɛ Maŋtsɛ kɛ Osɔfonukpa yɛ be mli ni ekɛ adesai ni feɔ toiboo lɛ saa baa wala ni bɛ naagbee mli yɛ shikpɔŋ nɔ paradeiso mli ekoŋŋ lɛ.—Mateo 6:9; 20:28; Hebribii 7:23-26
5. Namɛi ji Yesu “nyɛmimɛi” lɛ, ni mɛɛ miishɛɛ krɛdɛɛ ko amɛnaa mli gbɛfaŋnɔ?
5 Hɛɛ, Nyɔŋmɔ Bi lɛ naa adesai ni esɔmɔɔ amɛ lɛ he miishɛɛ be fɛɛ be. Ni ena he miishɛɛ hu akɛ ekɛ e-Tsɛ lɛ aaasɔmɔ ni amɛkɛhala adesai akuu ni ji emuuyeli mlihiɛlɔi, mɛi ni etsɛɔ amɛ “enyɛmimɛi” kɛ mɛi ni ateeɔ amɛ shi kɛyaa ŋwɛi yɛ amɛgbele sɛɛ lɛ. Mɛnɛɛmɛi kɛ Yesu boteɔ miishɛɛ krɛdɛɛ ko mli. Awieɔ amɛhe akɛ “mɛi ni yɔɔ miishɛɛ kɛ mɛi krɔŋkrɔŋi” ni “amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.”—Hebribii 2:11; Kpojiemɔ 14:1, 4; 20:6, NW.
6. (a) Mɛɛ miishɛɛ ninefɔɔ ko Maŋtsɛ lɛ kɛhaa “[e]tooi krokomɛi” lɛ? (b) Mɛɛ hegbɛi tooi nɛɛ ateŋ mɛi babaoo naa mli ŋɔɔmɔ ŋmɛnɛ?
6 Kɛfata he lɛ, asafo babaoo ni ji “tooi krokomɛi,” ni Maŋtsɛ ni yeɔ nɔ lɛ gbalaa amɛmli ni ehaa amɛdamɔɔ eninejurɔ nɔ kɛha enɔkpɛlɛmɔ lɛ nine shɛɔ nɛkɛ ninefɔɔ nɛɛ nɔ: “Nyɛbaa, nyɛ mɛi ni mi-Tsɛ ejɔɔ nyɛ, nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ!” (Yohane 10:16; Mateo 25:34) Mɛɛ hegbɛ ni haa mɔ mii shɛɔ ehe nɛ! Yɛ nɛkɛ mɛi nɛɛ ni amɛnine baashɛ Maŋtsɛyeli lɛ shikpɔŋ nɔ nɔyeli he lɛ nɔ lɛ ahe lɛ, amɛteŋ mɛi pii po miikpɛlɛ nitsumɔi ahe gbɛnaa nii anɔ kɛfata shwɛɛnii lɛ ahe, taakɛ bɔ ni Yehowa gba efɔ shi lɛ pɛpɛɛpɛ: “Ni maŋsɛɛbii aaadamɔ shi ni amɛaalɛ nyɛtooi lɛ, ni mɛi kpɔji aaatsɔmɔ nyɛhulɔi kɛ nyɛweintrom saalɔi. Shi nyɛ lɛ, aaatsɛ nyɛ Yehowa osɔfoi, ni aaakɛɛ nyɛ akɛ: Wɔ-Nyɔŋmɔ lɛ suɔlɔi ji nyɛ.” Mɛnɛɛmɛi fɛɛ fataa Nyɔŋmɔ gbalɔ lɛ he ni amɛkɛɔ akɛ: “Manya yɛ Yehowa mli, ni misusuma mli aaafili lɛ yɛ mi-Nyɔŋmɔ lɛ mli; ejaakɛ ewo mi yiwalaheremɔ atadei.”—Yesaia 61:5, 6, 10.
7. Mɛni hewɔ ni nɛkɛ “gbi” nɛɛ ni je shishi kɛjɛ 1914 lɛ ji gbi krɛdɛɛ ko lɛ?
7 Wɔyɛ gbi krɛdɛɛ ko mli amrɔ nɛɛ. Kɛjɛ 1914 kɛbaa nɛɛ, ebafee gbi ni Kristo kɛmiiye nɔ akɛ ŋwɛi Maŋtsɛ, taakɛ bɔ ni atsɔɔ mli yɛ Lala 118:24, 25 lɛ: “Ŋmɛnɛ ji gbi ni Yehowa fee lɛ; wɔmli aaafili wɔ ni wɔnya yɛ mli! O Yehowa, heremɔ wɔyiwala ko! O Yehowa, ha omanye aba ko!” Eji gbi ni baashɛ enaagbee kwraa yɛ be mli ni Yehowa aaakpata Babilon jamɔi lɛ fɛɛ ahiɛ ni eeefee Kristo ayemforo ni ji nyɛmimɛi 144,000 lɛ kɛ amɛŋwɛi Maŋtsɛ lɛ ekome lɛ. Nyɔŋmɔ webii lɛ fɛɛ ‘amii baashɛ amɛhe ni amɛmli aaafili amɛ’ yɛ enɛ he. Amɛmii aaashɛ amɛhe hu yɛ be mli ni amɛ-Mesia Maŋtsɛ lɛ wuuɔ ta yɛ Harmagedon koni ekɛbaa emaŋ ni ji anɔkwafoi lɛ ayi kɛya ejalɛ jeŋ hee lɛ mli lɛ. (Kpojiemɔ 19:1-7, 11-16) Ani Yehowa haa ewebii lɛ yeɔ kunim yɛ be mli ni amɛjajeɔ nɛkɛ hiɛnɔkamɔ ni haa mɔ miishɛɛ nɛɛ amɛtsɔɔ lɛ? Amaniɛbɔɔ ni nyiɛ sɛɛ nɛɛ baatsɔɔ mli faŋŋ.
Jeŋ Muu Fɛɛ Shweremɔ
8. (a) Mɛɛ gbɛ nɔ anaa miishɛɛ ni anaa yɛ mumɔ krɔŋkrɔŋ lɛ mli lɛ yɛ akɔntaabuu ni yɔɔ baafai 18 kɛyashi 21 yɛ wolo tɛtrɛɛ nɛɛ mli lɛ yɛ? (b) Mɛni ji akɔntaabuu lɛ mli otii lɛ ekomɛi?
8 Ŋmɛnɛŋmɛnɛ beaŋ Yehowa Odasefoi lɛ yɛ “hiɛnɔkamɔ ni eteke nɔ yɛ mumɔ krɔŋkrɔŋ hewalɛ mli.” (Romabii 15:13) Anaa enɛ jogbaŋŋ yɛ tao ni afee yɛ baafai 18 kɛyashi 21 yɛ wolo tɛtrɛɛ nɛɛ mli, he ni atsɔɔ Maŋtsɛyeli lɛ he sɔɔmɔ nitsumɔ yɛ jeŋ muu fɛɛ akɔntaabuu lɛ mli fitsofitso yɛ lɛ. Kwɛ bɔ ni wɔnaa miishɛɛ akɛ wɔɔna yibɔ hee ni fa fe fɛɛ ni ji sɔɔlɔi 4,017,213 ni yɔɔ ekaa yɛ shiɛmɔ nitsumɔ lɛ mli! Enɛ feɔ oha mlijaa 77 nɔyaa yɛ afii nyɔŋma ni eho lɛ mli, yɛ be mli ni tooi lɛ anaabuamɔ yaa hiɛ oyayaayai yɛ shikpɔji 212 nɔ yɛ jeŋ fɛɛ lɛ. Afii 15 sɛɛ lɛ, mɛi ni abaptisi lɛ ayifalɛ yashɛɔ nɔ ni fe fɛɛ—ni ji 301,518! Mɛi ni abaptisi amɛ lɛ ayi fa waa yɛ kpeei pii ashishi, titri lɛ yɛ kpeei ni Odasefoi ni jɛ Europa Bokagbɛ lɛ tee lɛ ashishi. Mɛi ni fata mɛnɛɛmɛi ahe ji obalaŋtai babaoo, ni amɛha nɔ ni kwamaŋ nɔyelɔi lɛ wie akɛ kɛ mɛi ni egbɔlɔ lɛ gboi lɛ jamɔ sɛɛ baafo lɛ efee amale.
9. (a) Mɛɛ miishɛɛ nɔ ko jɛɔ tsɔsemɔ ni fɔlɔi jeɔ shishi mra amɛkɛhaa lɛ mli baa? (b) Mɛɛ niiashikpamɔi ni nyɛna aloo ekrokomɛi yeɔ enɛ he odase?
9 Obalaŋtai babaoo miihere ninefɔɔ ni yɔɔ Lala 32:11 lɛ nɔ: “Nyɛ jalɔi, nyɛmii ashɛa nyɛhe yɛ Yehowa mli, ni nyɛmli afilia nyɛ, ni nyɛbɔa oshe kɛ nyamɔ, nyɛ mɛi ni nyɛja yɛ nyɛtsuii amli lɛ!” Etamɔ nɔ ni fɔlɔi pii kɛ ŋaawoo ni akɛha akɛ amɛtsɔse amɛbii lɛ kɛjɛ “gbekɛbiiashi” lɛ miitsu nii. (2 Timoteo 3:15) Akɛ woji kɛ cassette ni afee aha gbekɛbii ni darako kwraa lɛ miitsu nii waa diɛŋtsɛ. Yɛ be mli ni gbekɛbii nɛɛ jeɔ skulyaa shishi lɛ, etsɛɛɛ ni amɛyeɔ odase fɛfɛo, taakɛ bɔ ni Japannyo gbekɛyoo ko ni eye afii kpaanyɔ lɛ nɔkwɛmɔ nɔ lɛ tsɔɔ lɛ: “Beni aha skul gbɛ yɛ hulutsoo be lɛ mli lɛ, mitee mitsɔɔlɔ lɛ ŋɔɔ ni miyabi lɛ akɛ: ‘Ani otee otsɛ gbonyobu lɛ he yɛ hejɔɔmɔ be lɛ mli?’ Eha hetoo akɛ: ‘Hɛɛ, mitsɛ he jɔ waa, ni miyaa egbonyobu lɛ he daa afi.’ Ni mikɛɛ: ‘Kɛ okase Biblia lɛ ni onyiɛ Nyɔŋmɔ tsɔɔmɔi lɛ asɛɛ lɛ, no lɛ obaanyɛ ona otsɛ ni yɔɔ suɔmɔ lɛ yɛ shikpɔŋ nɔ paradeiso mli.’ Kɛkɛ ni mikɛ My Book of Bible Stories wolo lɛ ekome ha lɛ. Amrɔ nɛɛ wɔtsɔɔlɔ lɛ kaneɔ wolo nɛɛ mli yitso kome ehaa klasbii lɛ fɛɛ yɛ be mli ni wɔkpa skul kɛha shwane niyeli lɛ daa otsi.”
10. Mɛɛ yiŋtoo kpakpa ko Young People Ask wolo lɛ etsu he nii, ni mɛni ji nɔkwɛmɔ nii lɛ ekomɛi?
10 Obalaŋtai ni eye aaafee afii nyɔŋma kɛ etɛ kɛyaa lɛ hu kɛ Questions Young People Ask—Answers That Work wolo lɛ etsu nii waa kɛha amɛ diɛŋtsɛ amɛ teemɔŋ nikasemɔ ni amɛkɛye obalaŋtai krokomɛi hu odase. Fɔlɔi hu ahiɛ esɔ wolo nɛɛ waa diɛŋtsɛ. Nyɛmiyoo ko ni jɛ Switzerland, ni kɛ ehe wo gbɛgbalɔi awalɔi sɔɔmɔ lɛ mli lɛ kpɛ eyiŋ akɛ ebaaya eyasara ebi lɛ klasbii lɛ afɔlɔi. Enɛ ha ena hegbɛ ni ekɛ fɔlɔi babaoo gba sane, ni eshi woji wuji 20 (titri lɛ Young People Ask woji lɛ) kɛ woji tɛtrɛbii hu 27 eha amɛ. Beni obalayoo fioo ko ni yaa skul yɛ Trinidad lɛ kɛ wolo nɛɛ ha etsɔɔlɔ lɛ yɛ skul lɛ, enyɛ yasara amɛtsɔɔlɔ lɛ, ni enɛ ha enyɛ eja woji 25 eha tsɔɔlɔi 36 ni yɔɔ skul lɛ. Etsa nɔ yɛ nyɔŋ ni nyiɛ sɛɛ lɛ mli ni eha ejwɛŋmɔ hi fɔlɔi ni ele amɛ jogbaŋŋ lɛ anɔ titri, ni eja woji krokomɛi 92 ni eje shia Biblia mli nikasemɔi heei hu shishi. Teŋgbɛ skul tsɔɔlɔ ko ni jɛ Korea lɛ kɛ Young People Ask wolo lɛ tsu nii ni ekɛha shiɛmɔ wiemɔi kukuji komɛi yɛ saneyitsei tamɔ ‘Te Mafee Tɛŋŋ ni Makase Nii Waa Lɛ?’ kɛ ‘Te Mafee Tɛŋŋ ni Mikɛ Mitsɔɔlɔ lɛ Afee Ekome Lɛ?’ he ni no sɛɛ lɛ ekɛ wolo lɛ ha. Yɛ be mli ni skulbii lɛ ehe woji 39 sɛɛ lɛ, fɔlɔi lɛ ekomɛi bɔi he wiemɔ. Shi tsɔɔlɔ-nukpa lɛ he wolo lɛ ekome ni ekwɛ mli fɛɛ jogbaŋŋ, ni ewie he akɛ “ehi waa diɛŋtsɛ,” ni no sɛɛ lɛ ehe ekome eha lɛ diɛŋtsɛ ebiyoo.
Tsɔsemɔ ni Hi fe Fɛɛ
11, 12. Mɛni ji odaseyelii komɛi ni yɔɔ ni maa nɔ mi akɛ Buu Mɔɔ Asafo lɛ woji lɛ kɛ tsɔsemɔ ni hi fe fɛɛ haa?
11 11 Mɛi pii ahiɛ sɔɔ nilee ni yɔɔ wɔwoji tɛtrɛbii lɛ amli lɛ waa, akɛ nɔkwɛmɔ nɔ lɛ U.S. Amerika skul ko ni he Awake! ni je kpo yɛ July 22, 1990 (ni wieɔ crack ni akɛtsuɔ nii ni anyɛɛɛ akpa lɛ he) lɛ ekomekomei 1,200 koni amɛkɛkase nii yɛ klas lɛ. Nɔ ni fe fɛɛ lɛ, Yehowa Odasefoi abii ni yɔɔ skul lɛ ajeŋba kpakpa lɛ miiya nɔ eena mɛi krokomɛi anɔ hewalɛ kpakpa. Yɛ Thailand lɛ, tsɔɔlɔ ko tsɛ gbekɛnuu fioo ko ni atsɛɔ lɛ Racha ni eye afii 11 lɛ yɛ eklasbii ni bolɔɔ waa lɛ ahiɛ ni ejie eyi yɛ ejeŋba kpakpa lɛ hewɔ ni ekɛɛ: “Mɛni hewɔ nyɛ fɛɛ nyɛkɛ lɛ efeee nyɛnɔkwɛmɔ nɔ? Ebɔɔ mɔdɛŋ waa yɛ enikasemɔ mli ni eyɛ jeŋba kpakpa hu.” Kɛkɛ ni ekɛfata he akɛ: “Ojogbaŋŋ, misusuɔ akɛ esa akɛ nyɛtsɔmɔ Yehowa Odasefoi tamɔ Racha ji lɛ bɔni afee ni nyɛjeŋba ahi.”—Okɛto Abɛi 1:8; 23:22, 23 he.
12 Nyɛmiyoo fioo ko ni jɛ Dominican Republic lɛ ŋma akɛ: “Beni miye afii ejwɛ pɛ lɛ, no mli lɛ eshwɛ fioo ni magbe jamɔ ko gbekɛbii askul, he ni mikase nikanemɔ kɛ niŋmaa yɛ lɛ naa. Mikɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ekome ha osɔfoyoo ni tsɔɔ mi nii lɛ akɛ nɔ ni mikɛmiike lɛ ni mikɛɛ lɛ kɛfata he akɛ: ‘Miida bo shi waa akɛ otsɔɔ mi nikanemɔ kɛ niŋmaa. Mina ni kulɛ onu mihemɔkɛyeli lɛ shishi ni obana hiɛnɔkamɔ akɛ ooohi shi kɛya naanɔ yɛ shikpɔŋ nɛɛ nɔ yɛ be mli ni aaafee lɛ paradeiso lɛ.’ Nifeemɔ nɛɛ hewɔ lɛ ashwie mi kɛjɛ skul lɛ. Afii kpaanyɔ sɛɛ lɛ, mikɛ tsɔɔlɔ nɛɛ kpe ekoŋŋ. Egba mi bɔ ni efee ni enyɛ ekane wolo lɛ, yɛ shitee-kɛ-woo babaoo ni ena kɛjɛ osɔfo lɛ dɛŋ lɛ fɛɛ sɛɛ. Efa kɛba maŋtiase lɛ mli, ni enyɛ ekɛ Odasefonyo ko kase Biblia lɛ yɛ jɛmɛ. Abaptisi mikɛ lɛ fɛɛ yɛ ‘Wiemɔ Krɔŋŋ’ Kpokpaa Wulu nɔ kpee ni afee lɛ shishi.” Taakɛ agba afɔ shi lɛ, nilee baanyɛ ajɛ “abifabii kɛ fufɔbii anaa” po aje kpo!—Mateo 21:16; Lala 8:1, 2.
13. Mɛɛ gbɛ nɔ obalaŋtai babaoo hereɔ Salomo ŋaawoo lɛ nɔ yɛ, ni mɛɛ gbɛ nɔ enɛ jeɔ kpo faŋŋ yɛ jeŋ muu fɛɛ akɔntaabuu lɛ mli yɛ?
13 Salomo kɛ ŋaawoo ni woɔ mɔ hewalɛ nɛɛ ha: “Obalanyo, ha omii ashɛ ohe yɛ obalahiaŋ, ni ona tsuijurɔ yɛ obalahiaŋ gbii lɛ amli, ni onyiɛ otsui gbɛi lɛ asɛɛ.” (Jajelɔ 11:9) Eji miishɛɛ sane akɛ aaana Yehowa Odasefoi abii pii ni kɛ wiemɔi nɛɛ miitsu nii ŋmɛnɛ, ni amɛkɛ amɛbalaŋtaiaŋ afii lɛ miitsu nii kɛmiisaa amɛhe kɛha be-fɛɛ sɔɔmɔ kɛha Yehowa ni amɛkɛ amɛhe woɔ wala be fɛɛ mli nitsumɔ ni nɔ kwɔ fe fɛɛ nɛɛ mli yɛ be mli ni amɛgbe skul naa. Gbɛgbalɔi lɛ miiya nɔ amɛyi miifa daa nɛɛ, ni 821,108 bu akɔntaa yɛ afi lɛ mli. Kɛ amɛfata nyɛmimɛi hii kɛ yei 11,092 ni sɔmɔ yɛ Betel lɛ ahe lɛ, enɛ feɔ shiɛlɔi lɛ fɛɛ amli oha mlijaa 21!
14. Mɛɛ yelikɛbuamɔ wɔnyɛmimɛi yei lɛ kɛhaa, ni mɛɛ yijiemɔ esa akɛ akɛha amɛ?
14 Eji miishɛɛ sane akɛ aaale akɛ yɛ shikpɔji pii anɔ, tamɔ United States, Amerika nɛkɛ lɛ, gbɛgbalɔi fɛɛ ni yɔɔ lɛ amli oha mlijaa 75 ji nyɛmimɛi yei, ni enɛ woɔ wiemɔi ni yɔɔ Lala 68:12 lɛ mli hewalɛ: “Nuŋtsɔ lɛ [Yehowa] ha anu hewalɛ wiemɔ; yei ni shiɛɔ kunimyeli lɛ fa babaoo.” Esa akɛ wɔjie wɔnyɛmimɛi yei lɛ ayi waa diɛŋtsɛ ejaakɛ amɛmiitsu shiɛmɔ nitsumɔ lɛ babaoo. Bɔ ni amɛkɛ hesaa tsɔɔ nii yɛ shia Biblia mli nikasemɔi amli lɛ kɛ mɛi pii miiba anɔkwale lɛ mli, ni bɔ ni nyɛmimɛi yei ni ebote gbalashihilɛ mli lɛ fiɔ amɛwumɛi lɛ asɛɛ yɛ asafoŋ nitsumɔi babaoo lɛ amli lɛ hu sa yijiemɔ babaoo.—Abɛi 31:10-12; Efesobii 5:21-25, 33.
Biblia Mli Tsɔsemɔ Miishwere
15. (a) Mɛɛ gbɛ nɔ maji komɛi ni atsi amɛ tã yɛ jeŋ muu fɛɛ akɔntaabuu lɛ mli lɛ ebɔ mɔdɛŋ waa yɛ shia Biblia mli nikasemɔi afeemɔ mli yɛ? (b) Mɛɛ niiashikpamɔi obaanyɛ ogba, ni tsɔɔ bɔ ni Biblia mli nikasemɔi nyɛɔ eyeɔ omanye ha?
15 Biblia mli tsɔsemɔ nitsumɔ lɛ miishwere, ni kɛ aja mli lɛ, afeɔ nikasemɔi yɛ hei 3,624,091 yɛ je lɛŋ fɛɛ daa nyɔŋ nɔ. Biblia mli anɔkwale lɛ nyɛɔ etsakeɔ gbɔmɛi asu, taakɛ amaniɛbɔɔ ni jɛ Australia lɛ tsɔɔ lɛ. Mra mli yɛ January 1987, ashwie nuu ko kɛjɛ Australia kɛtee New Zealand yɛ be mli ni awo lɛ tsuŋ nyɔji 25 sɛɛ yɛ ojotswaa kɛ juu kɛ fɔ̃ hewɔ lɛ. Ekɛ tsofai fɔji tsuɔ nii ni enyɛɛɛ ekpa ni ekɛ nɔ ni fe afii 17 hu ehɔ̃ɔ aahu. Afi ni nyiɛ sɛɛ lɛ, eŋa kɛ Yehowa Odasefoi bɔi Biblia lɛ kasemɔ, ni yɛ be mli ni enilee lɛ yaa hiɛ lɛ, nuu lɛ na akɛ tsakemɔ ko ni sa kadimɔ waa eba yoo lɛ jeŋba mli. Ebatsɔ ŋa kɛ nyɛ kpakpa. Ni bɔ ni eŋa lɛ wo lɛ hewalɛ ha hewɔ lɛ, nuu nɛɛ tee kpokpaa nɔ kpee ko yɛ June 1989 mli. Agbɛnɛ ekpɛlɛ shia Biblia mli nikasemɔ nɔ, ni abɔi tsakemɔi kpele namɔ yɛ nuu lɛ hesaamɔ kɛ eshihilɛ fɛɛ mli. Eweku lɛ mlibii kpawo lɛ fɛɛ bɔi kpeeiyaa. Abaptisi lɛ yɛ January 1990 mli akɛ mɔ ko ni nyiɛɔ Paulo ŋaawoo fɛfɛo ni yɔɔ Efesobii 4:17-24 lɛ sɛɛ.
16. (a) Mɛɛ gbɛ nɔ 1990 Kaimɔ lɛ he akɔntaabuu lɛ haa mɔ mii shɛɔ ehe yɛ? (b) Mɛɛ oyaiyeli ko esa akɛ atsu he nii, ni mɛɛ mɔdɛŋ esa akɛ wɔbɔ ni wɔkɛye wɔbua?
16 Afi lɛ akɔntaabuu lɛ mli oti ko ni sa kadimɔ waa ji yibɔ ni fa fe fɛɛ ni ji 9,950,058 ni ba Kaimɔ lɛ ni afee yɛ Jufɔ, April 10, 1990 lɛ shishi lɛ. Maji 212 lɛ amli nɔ ni fe 70 bɔ yibɔi ni fa fe Odasefoi ni yɔɔ nakai maji lɛ amli lɛ toi etɛ he amaniɛ. Akɛ nɔkwɛmɔ nɔ lɛ, yɛ naatsii lɛ fɛɛ sɛɛ lɛ, Afrika maji kpawo komɛi ni amɛshiɛlɔi ayibɔ ni fa fe fɛɛ ni abua naa ji 62,712 lɛ bɔ yibɔ ni ji 204,356 ni ba Kaimɔ lɛ he amaniɛ. Liberia ni awuuɔ ta yɛ ni amɛshiɛlɔi ayibɔ ji 1,914 lɛ na miishɛɛ akɛ mɛi 7,811 ba Kaimɔ lɛ. Haiti, ni amɛshiɛlɔi ayibɔ ni fa fe fɛɛ ji 6,427 lɛ bɔ 36,551 he amaniɛ. Shiɛlɔi 886 ni yɔɔ Micronesia ŋshɔkpɔi ni egbɛ eshwa lɛ anɔ lɛ na mɛi 3,958. Sri Lanka shiɛlɔi 1,298 lɛ bɔ 4,521 he amaniɛ, ni Zambia, ni amɛshiɛlɔi ayibɔ ji 73,729 lɛ na mɛi 326,991 ni ba Kaimɔ lɛ, ni kɛ aja mli lɛ, shiɛlɔ kome kɛha Zambiabii 25. Jeŋ muu fɛɛ akɔntaabuu lɛ hu tsɔɔ akɛ gbɔmɛi anɔkwafoi akpekpei abɔ yɛ ni miimɛ ni abua amɛnaa afata tooku lɛ he. Shi anɔkwayeli kɛkɛ faaa. Ani wɔbaanyɛ wɔya hiɛ yɛ wɔ shia Biblia mli nikasemɔ kɛ be ni wɔkɛfeɔ lɛ hu mli, bɔni afee ni wɔye wɔbua mɛi ni ba Kaimɔ lɛ ateŋ mɛi pii ni amɛna hemɔkɛyeli ni mli wa? Wɔmiitao ni amɛbafata wɔhe akɛ mɛi ni yɔɔ ekaa, ni amɛjie Yehowa yi. No baatsɔɔ amɛwala namɔ diɛŋtsɛ!—Lala 148:12, 13; Yohane 17:3; 1 Yohane 2:15-17.
Bɔ ni Miishɛɛ lɛ Faa Kɛtekeɔ Nɔ
17. Mɛɛ klɛŋklɛŋ afii oha lɛ mli nɔkwɛmɔ nii komɛi esa akɛ ewo wɔfaishitswaa akɛ wɔɔhiɛ wɔmiishɛɛ lɛ mli lɛ mli hewalɛ?
17 Bɔ fɛɛ bɔ ni kaai ni wɔkɛkpeɔ lɛ ji lɛ, nyɛhaa wɔtswaa wɔfai shi akɛ wɔɔhiɛ wɔmiishɛɛ lɛ mli. Ekolɛ ehe ehiaŋ ni wɔkɛ niiashikpamɔ ko ni mli wa tamɔ Stefano nɔ lɛ akpe, shi kɛlɛ enɔkwɛmɔ nɔ lɛ baanyɛ awo wɔ hewalɛ. Be ni afolɔɔ enaa lɛ, enyɛ ehiɛ miishɛɛ ni eyɔɔ lɛ mli. Ehenyɛlɔi lɛ “na ehiɛ tamɔ Nyɔŋmɔ bɔfo ko hiɛ.” Nyɔŋmɔ fi esɛɛ yɛ emanehulu lɛ fɛɛ mli. Ekɛ ekaa ye odase ni “mumɔ krɔŋkrɔŋ eyi lɛ obɔ” kɛyashi be mli ni egbo akɛ la odasefonyo. Yɛ be mli ni Paulo kɛ Barnaba gbala amɛjwɛŋmɔ kɛtee jeŋmaji lɛ anɔ yɛ amɛshiɛmɔ nitsumɔ lɛ mli lɛ, mɛnɛɛmɛi hu “na miishɛɛ, ni amɛwo Yehowa wiemɔ lɛ hiɛ nyam.” Kɛkɛ ni yiwaa te shi ekoŋŋ. Shi ehaaa mɛi ni heɔ yeɔ lɛ ahe ajɔ. “Kaselɔi lɛ yimɔ obɔbɔ kɛ miishɛɛ kɛ mumɔ krɔŋkrɔŋ.” (Bɔfoi lɛ Asaji 6:15; 7:55; 13:48-52) No hewɔ lɛ nɔ fɛɛ nɔ ni wɔhenyɛlɔi lɛ aaafee wɔ, aloo bɔ fɛɛ bɔ ni wɔ daa gbi shihilɛ mli kaai lɛ aaaji lɛ, esaaa ni wɔhaa mumɔ krɔŋkrɔŋ lɛ mli miishɛɛ ni wɔnaa lɛ he miijɔ. Paulo woɔ wɔ ŋaa akɛ: “Nyɛnyaa yɛ hiɛnɔkamɔ mli; nyɛmiaa nyɛhiɛ yɛ amanehulu mli; nyɛhiɛa sɔlemɔ mli daa.”—Romabii 12:12.
18. (a) Mɛni ji Yerusalem Hee lɛ, ni mɛni hewɔ ni esa akɛ Nyɔŋmɔ webii lɛ kɛ lɛ anya lɛ? (b) Mɛɛ gbɛ nɔ “ŋwɛi hee kɛ shikpɔŋ hee” lɛ baajɔɔ adesai yɛ?
18 Kwɛ bɔ ni nakai hiɛnɔkamɔ lɛ yɔɔ naakpɛɛ ha! Yehowa jajeɔ etsɔɔ ewebii fɛɛ akɛ: “Ejaakɛ naa, miibɔ ŋwɛi hee kɛ shikpɔŋ hee, ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ; shi moŋ, nyɛnyaa ni nyɛmli afilia nyɛ kɛyaa naanɔ yɛ nii ni mibɔɔ lɛ ahewɔ.” Kristo ni ji Nuŋtsɔ lɛ kɛ “Yerusalem Hee” lɛ (ni amrɔ nɛɛ eji Nyɔŋmɔ ŋwɛi gbɛjianɔtoo, “ŋwɛi Yerusalem” lɛ maŋtiase lɛ) kɛ jeŋ hee asafo ni yɔɔ shikpɔŋ nɔ lɛ kɛ miishɛɛ ni fa babaoo baaha adesai. (Galatabii 4:26) Adesai ni egboi ni aaatee amɛ shi, kɛ holemɔ ni aaahole mɛi ni feɔ toiboo lɛ anɔ kɛyashɛ naanɔ wala mli yɛ adesai emuuyeli mli, yɛ naanɔ shihilɛ he ni yɔɔ sɛɛnamɔ, kɛ shihilɛ ni miishɛɛ yɔɔ mli yɛ paradeiso mli—mɛɛ hiɛnɔkamɔ ni yɔɔ nyam kɛ nɔ ni wɔɔdamɔ nɔ wɔmli afili wɔ enɛ ji nɛkɛ! Taakɛ bɔ ni Yehowa diɛŋtsɛ ‘mli filiɔ lɛ yɛ Yerusalem he, ni enyaa yɛ emaŋbii lɛ ahe lɛ,’ nakai nɔŋŋ egbalɔ lɛ yaa nɔ ekɛ ninefɔɔ lɛ haa Nyɔŋmɔ webii lɛ lolo: “Nyɛkɛ Yerusalem anyaa, ni nyɛmli afilia nyɛ yɛ ehewɔ, nyɛ mɛi fɛɛ ni nyɛsumɔɔ lɛ lɛ; nyɛkɛ lɛ anaa miishɛɛ.” (Yesaia 65:17-19; 66:10; Kpojiemɔ 14:1; 20:12, 13; 21:2-4) Eba akɛ wɔɔya nɔ wɔyimɔ obɔbɔ kɛ miishɛɛ kɛ mumɔ krɔŋkrɔŋ daa nɛɛ yɛ be mli ni wɔboɔ bɔfo Paulo ŋaawoo nɛɛ toi lɛ: “Nyɛmii ashɛa yɛ Nuŋtsɔ lɛ mli daa! Misaa miikɛɛ: Nyɛmii ashɛa!”—Filipibii 4:4.
Yɛ Wɔmiishɛɛ lɛ Naamuamɔ Mli lɛ:
◻ Mɛɛ tsuishiŋmɛɛ yɛ miishɛɛ mli he nɔkwɛmɔ nɔ Yesu fee efɔ shi eha wɔ?
◻ Mɛɛ yiŋtoo kui enyɔ komɛi ni ejɔɔ amɛhe nɔ yɔɔ ni amɛmli aaafili amɛ?
◻ Mɛɛ gbɛ nɔ obalaŋtai kɛ mɛi ni edara fɛɛ amli filiɔ amɛ yɛ anɔkwale lɛ mli yɛ?
◻ Kɛ wɔɔti 1990 akɔntaabuu lɛ mli ekoŋŋ lɛ, mɛɛ hetoo ahaa sɔlemɔ ni ji “Yehowa, ha omanye aba ko!” lɛ amrɔ nɛɛ?
◻ Mɛɛ be abaana miishɛɛ lɛ ni eyi obɔ kwraa ni yɛ mɛɛ gbɛ nɔ?
[Akrabatsa ni yɔɔ baafa 18-21]
1990 YEHOWA ODASEFOI AJEŊ FƐƐ SƆƆMƆ AFI AKƆNTAABUU
(Kwɛmɔ “bound volume”)
[Mfoniri ni yɔɔ baafa 16]
Yehowa bɔfo lɛ tswa Kristo ni ji Nuŋtsɔ lɛ fɔmɔ Iɛ he adafi akɛ “miishɛɛ sane kpele”