Nyɛyea Odase Nyɛhaa Yehowa Ni Nyɛkahaa Ejea Nyɛtsine
“Nyɛjwɛŋa mɔ ni ŋmɛ etsui shi eha naashai ni eshafeelɔi ŋmɛ lɛ nɛɛ he, koni ekaje nyɛtsine ni nyɛsusumai lɛ anijiaŋ miije wui.”—HEBRIBII 12:3.
1, 2. Mɛɛ odaseyeli ni tsɔɔ mɔ yiŋ Yesu kɛha ekaselɔi lɛ akɛ atee lɛ shi kɛjɛ gbohii ateŋ?
“MINA Nuŋtsɔ lɛ!” Enɛ ji miishɛɛ wiemɔi ni Maria Magdalena kɛgba Yesu shitee lɛ he sane etsɔɔ. (Yohane 20:18) Enɛ kadi gbii 40 ni nibii babaoo eyi mli obɔ kɛha Kristo kaselɔi lɛ, ni tsutsu lɛ egbele lɛ eha amɛmiiye awerɛho lɛ shishijee.
2 Yesu sumɔɔɔ ni eshi yiŋkɔshikɔshifeemɔ ko yɛ ekaselɔi lɛ ajwɛŋmɔ mli akɛ eyɛ wala mli diɛŋtsɛ. No hewɔ lɛ, taakɛ Luka gba lɛ: “Mɛi hu ni emanehulu lɛ sɛɛ lɛ [Yesu] etsɔ saji pii anɔ ejie ehe kpo etsɔɔ amɛ akɛ hiɛkalɔ, ni eha amɛna lɛ gbii nyɔŋmai ejwɛ sɔŋŋ.” (Bɔfoi lɛ Asaji 1:3) Yɛ anɔkwale mli lɛ, yɛ bei nɛɛ ekome mli lɛ “ejie ehe kpo etsɔɔ aaafee nyɛmimɛi ohai enumɔ aloo nɔ shikome.” (1 Korintobii 15:6) Eji anɔkwale akɛ agbɛnɛ yiŋkɔshikɔshifeemɔ ko kwraa bɛ dɔŋŋ. Yesu yɛ Wala mli!
3. Mɛɛ sanebimɔ ni kɔɔ Maŋtsɛyeli lɛ he Yesu kaselɔi lɛ bi lɛ, ni mɛni hewɔ ehetoo lɛ ha amɛnaa kpɛ amɛhe lɛ?
3 No mli lɛ Yesu kaselɔi lɛ susuɔ “Nyɔŋmɔ maŋtsɛyeli” ni baaba shikpɔŋ nɔ pɛ he, nɔ ni abaasaa ato aha Israel pɛ lɛ. (Luka 19:11; 24:21) No hewɔ lɛ amɛbi Yesu akɛ: “Nuŋtsɔ, ani nɛkɛ bei nɛɛ amli obaatee maŋtsɛyeli lɛ shi oma shi oha Israel lɛ?” Ŋwanejee ko bɛ he akɛ ehetoo lɛ ha amɛnaa kpɛ amɛhe, ejaakɛ ekɛɛ: “Jeee nyɛhe sane ko ji akɛ nyɛaale be loo yinɔi lɛ ni tsɛ lɛ eto yɛ lɛ diɛŋtsɛ ehewalɛ mli lɛ; shi moŋ kɛ mumɔ krɔŋkrɔŋ lɛ ba nyɛnɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” (Bɔfoi lɛ Asaji 1:6-8) Mɛɛ kaa loo sane ni mli wa akɛfɔ kaselɔi lɛ ahiɛ nɛkɛ! Ni mɛɛ gbɛnaa nii hu enɛ ji! Te amɛaafee tɛŋŋ ni amɛtsu nitsumɔ ni tamɔ nɛkɛ? Etsɛɛɛ ni hetoo lɛ ba yɛ naakpɛɛ gbɛ nɔ.
Kaa Loo Sane Ni Mli Wa Lɛ Naa Ni Amɛdamɔ
4. Tsɔɔmɔ nɔ ni ba yɛ Pentekoste gbi lɛ nɔ lɛ mli.
4 Luka gba akɛ: “Ni beni Pentekoste gbi (aloo gbi ni ji nyɔŋmai enumɔ) lɛ shɛ lɛ, amɛ fɛɛ amɛnaa bakpe shi kɛ jwɛŋmɔ kome yɛ he kome. Ni trukaa lɛ gbɛɛmɔ ko ni tamɔ ahum ni tswaa waa jɛ ŋwɛi ba, ni ebayi shia he ni amɛtara lɛ fɛɛ obɔ. Ni lilɛii ni agbalagbalaa mli ni tamɔ lalilɛii pue; ni ebatara amɛyiteaŋ ekomekome; ni mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi sɔrɔtoi awiemɔ, taakɛ bɔ ni mumɔ lɛ ŋɔwo amɛnaa lɛ.” Bɔ ni gbɛɛmɔ nɛɛ naa wa ha sɔŋŋ hewɔ lɛ, egbala Yudafoi babaoo ko ni amɛba Yerusalem kɛha gbijurɔ lɛ yeli lɛ ajwɛŋmɔ. Amɛhaa kpɛ amɛhe akɛ amɛnu ni ‘aawie Nyɔŋmɔ nibii wuji lɛ yɛ amɛ diɛŋtsɛ amɛmaŋ wiemɔi amli.’—Bɔfoi lɛ Asaji 2:1-11.
5. Yesu gbalɛ ni yɔɔ Bɔfoi lɛ Asaji 1:8 lɛ ba mli oya kɛyashɛ nɛgbɛ?
5 Petro fiteee be ko kwraa yɛ shiɛmɔ ko ni mli wa ni ekɛha lɛ mli, ni eye odase ni yiŋkɔshikɔshi ko kwraa bɛ he akɛ “Yesu Nazarenyo lɛ,” ni amɛsɛŋ lɛ lɛ ji “Nuŋtsɔ” ni David gba ehe sane efɔ shi yɛ nɛkɛ wiemɔi nɛɛ amli lɛ: “Nuŋtsɔ [Yehowa] lɛ kɛɛ mi-Nuŋtsɔ lɛ akɛ: Ta mininejurɔ nɔ kɛyashi beyinɔ ni maŋɔ ohenyɛlɔi lɛ mafee onajiashi maaŋoo.” Akɛni Petro sane lɛ tsurɔ etoibolɔi lɛ atsuiiaŋ hewɔ lɛ, amɛbi akɛ: “Ataamɛi kɛ anyɛmimɛi, te wɔɔfee tɛŋŋ?” Yɛ hetoohamɔ mli lɛ, Petro wo amɛ hewalɛ akɛ: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisi lɛ awo Yesu Kristo gbɛi amli koni aŋɔ nyɛhe eshai lɛ afa nyɛ.” Mɛni jɛ mli ba? Abaptisi mɛi akpei etɛ! (Bɔfoi lɛ Asaji 2:14-41) No mli lɛ aaye odase lɛ yɛ Yerusalem. Yɛ sɛɛ mli lɛ, emli gbele kɛtee Yudea, kɛkɛ lɛ Samaria fɛɛ kɛ agbɛnɛ naagbee lɛ “kɛtee shikpɔŋ lɛ naagbee hei lɛ.” Bɔ ni Maŋtsɛyeli shiɛmɔ nitsumɔ lɛ tee nɔ oyayaayai ha hewɔ lɛ, bɔfo Paulo baanyɛ akɛɛ yɛ aaafee afi 60 Ŋ.B. lɛ mli akɛ sanekpakpa lɛ efee nɔ ni “ashiɛɔ atsɔɔ bɔɔ nii fɛɛ ni yɔɔ ŋwɛi shishi lɛ.”—Kolosebii 1:23.
Maŋtsɛyeli Mlilɛɛmɔ Kɛ Yiwaa
6, 7. (a) Yɛ mɛɛ gbɛ nɔ Maŋtsɛyeli lɛ mlilɛɛmɔ kɛ Kristofoi lɛ ayiwaa tee nɔ yɛ nakai beaŋ nɔŋŋ yɛ klɛŋklɛŋ afii oha lɛ mli? (b) Mɛɛ hehiamɔ ko te shi yɛ Kristofoi ni yɔɔ Yerusalem lɛ ateŋ, ni mɛɛ gbɛ nɔ atsɔ atsu hiamɔ nii nɛɛ he nii yɛ?
6 Pentekoste yɛ afi 33 Ŋ.B. lɛ sɛɛ etsɛɛɛ ni Yesu kaselɔi lɛ na hegbɛ akɛ amɛaakai ewiemɔi nɛɛ: “Nyɔŋ efeee enuŋtsɔ. Kɛ amɛwa mi yi lɛ, amɛaawa nyɛ hu yi.” (Yohane 15:20) Yudafoi ahiɛnyiɛlɔi lɛ amli fu beni “Nyɔŋmɔ wiemɔ lɛ shwere ni kaselɔi lɛ ayi bafa babaoo diɛŋtsɛ yɛ Yerusalem lɛ.” Amɛkɛ amale folɔ kaselɔ Stefano naa ni amɛtswia lɛ tɛi ni amɛgbe lɛ. Enɛ bafee tamɔ okadi ni mɛi pii miimɛ lɛ, ejaakɛ “ni nakai gbi lɛ nɔŋŋ lɛ yiwalɛ kpele te shi wo asafo ni yɔɔ Yerusalem lɛ; ni amɛ fɛɛ amɛgbɛ amɛshwa Yudea kɛ Samaria niiaŋ, ja bɔfoi lɛ kɛkɛ shwɛ.”—Bɔfoi lɛ Asaji 6:7; 7:58-60; 8:1.
7 Yiwaa lɛ naa ba shi fioo. Shi yɛ no sɛɛ etsɛɛɛ lɛ, Herode Agripa I gbe bɔfo Yakobo. Awo Petro tsuŋ shi bɔfo ko jie lɛ. Yɛ sɛɛ mli lɛ, ohia bahia nyɛmimɛi ni yɔɔ Yerusalem lɛ, ni ehe bahia ni atsu ni akɛ yelikɛbuamɔ nibii ni nanemɛi heyelilɔi ni yɔɔ hei krokomɛi kɛha lɛ ayaha amɛ. (Bɔfoi lɛ Asaji 9:31; 12:1-11; 1 Korintobii 16:1-3) Be ko ni bɔfo Paulo yasara Yerusalem lɛ, kɛkɛ ni jamɔ he sɛkɛyeli bate shi ejaakɛ asafoi lɛ bolɔ akɛ: “Akɛ nɛkɛ gbɔmɔ nɛɛ aje shikpɔŋ lɛ nɔ! Ejaakɛ esaaa akɛ ehiɔ jeŋ.” (Bɔfoi lɛ Asaji 22:22) Eka shi faŋŋ akɛ hewalɛwoo he miihia nakai Kristofoi ni yɔɔ Yerusalem kɛ Yudea lɛ koni amɛya nɔ amɛye Maŋtsɛyeli lɛ he odase yɛ anɔkwayeli mli. Yesu ewo kaselɔi lɛ ashi akɛ “mumɔ krɔŋkrɔŋ lɛ, . . . ni Tsɛ lɛ baatsu yɛ migbɛi anɔ lɛ,” baatsu nii akɛ “yelikɛbualɔ.” (Yohane 14:26, New World Translation) Shi te aaafee tɛŋŋ ni Tsɛ lɛ kɛ yelikɛbuamɔ loo miishɛjemɔ ni he hiaa nɛɛ aaaha lɛ? Hetoo lɛ fa ko ba kɛtsɔ bɔfo Paulo nɔ.
Paulo Wolo Ni Eŋma Eyaba Hebribii Lɛ
8. (a) Mɛni kanya Paulo ni eŋma ewolo lɛ eyaha Hebribii lɛ? (b) Mɛɛ ewolo lɛ fa wɔbaagbala wɔjwɛŋmɔ kɛya nɔ, ni mɛni hewɔ?
8 Aaafee afi 61 Ŋ.B., ni awo Paulo tsuŋ yɛ Roma, shi ele nɔ ni baa enyɛmimɛi ni yɔɔ Yerusalem lɛ anɔ. No hewɔ lɛ, yɛ Yehowa mumɔ lɛ kudɔmɔ naa lɛ, eŋma ewolo ni sa jogbaŋŋ yɛ ebe naa pɛpɛɛpɛ lɛ eha Hebribii lɛ. Nɔ ni eyi obɔ yɛ mli ji suɔmɔ ni ekɛsusuɔ enyɛmimɛi hii kɛ yei Hebribii lɛ ahe. Paulo le nɔ ni he hiaa amɛ ni etswa amɛhemɔkɛyeli kɛ hekɛnɔfɔɔ ema shi yɛ Yehowa mli akɛ amɛ Yelikɛbualɔ. Kɛkɛ lɛ amɛbaanyɛ ni ‘amɛkɛ tsuishiŋmɛɛ ada foi ni ka amɛhiɛ lɛ’ ni amɛkɛ hekɛnɔfɔɔ akɛɛ akɛ: “Yehowa ji miyelikɛbualɔ; misheŋ gbeyei. Mɛni gbɔmɔ baanyɛ afee mi?” (Hebribii 12:1; 13:6, New World Translation) No hewɔ lɛ Paulo wolo ni ekɛyaha Hebribii lɛ (Heb yitsei 11-13) fa nɛɛ wɔsumɔɔ ni agbɛnɛ wɔgbala wɔjwɛŋmɔ kɛya nɔ. Mɛni hewɔ? Ejaakɛ shihilɛ ni nakai mra be mli Kristofoi lɛ kɛkpe lɛ tamɔ nɔ ni Yehowa Odasefoi kɛkpeɔ ŋmɛnɛ lɛ nɔŋŋ.
9. Mɛɛ sane ni ka Kristofoi lɛ ahiɛ yɛ klɛŋklɛŋ afii oha lɛ mli ka Kristofoi ahiɛ ŋmɛnɛ, ni mɛɛ gbɛ pɛ nɔ aaatsɔ ni akpee naa?
9 Gbɔmɛi asafoi babaoo ekpɛlɛ Maŋtsɛyeli lɛ he sane lɛ nɔ yɛ wɔyinɔ nɛɛ mli ni amɛjɔɔ amɛhe nɔ amɛha Yehowa ni abaptisi amɛ akɛ e-Dasefoi. Shi, nɔ ni fataa nɛkɛ anɔkwa jamɔ mlilɛɛmɔ nɛɛ he baa ji yiwaa ni mli wa, ni Kristofoi pii po laajeɔ amɛ wala tamɔ Stefano, Yakobo kɛ odasefoi anɔkwafoi krokomɛi ni hi shi yɛ klɛŋklɛŋ afii oha lɛ mli lɛ. No hewɔ lɛ, bɔ ni sane lɛ ji yɛ be ko ni eho lɛ nakai nɔŋŋ eji ŋmɛnɛ: Ŋamɛi baanyɛ adamɔ amɛ emuuyeli he kaa lɛ naa yɛ Maŋtsɛyeli lɛ he sane lɛ he shitee-kɛ-woo ni yaa hiɛ nɛɛ mli? Kɛfata he lɛ, namɛi baanyɛ adamɔ nibii ni yɔɔ gbeyei ni baaba yɛ be mli ni “amanehulu kpeteŋkpele” ni eko bɛ ni tamɔ nakai da lɛ baa ŋmɛnɛŋmɛnɛ yinɔ nɛɛ nɔ lɛ naa? (Mateo 24:21) Hetoo lɛ ji, mɛi ni esaa amɛhe akɛ ‘amɛbaawuu hemɔkɛyeli he ta kpakpa lɛ,’ mɛi ni efee “shiŋŋ yɛ hemɔkɛyeli lɛ mli lɛ.” Mɛnɛɛmɛi ji mɛi ni yɛ naagbee lɛ amɛbaanyɛ amɛkɛɛ akɛ “Enɛ ji nɔ ni ye je lɛ nɔ kunim lɛ, wɔhemɔkɛyeli lɛ.”—1 Timoteo 6:12; 1 Petro 5:9; 1 Yohane 5:4, New World Translation.
Anɔkwafoi Lɛ Anɔkwɛmɔ Nii Lɛ Ahe Sɛɛ Ni Wɔɔna
10. a) Mɛni ji hemɔkɛyeli? (b) Te Nyɔŋmɔ nuɔ he ehaa tɛŋŋ yɛ hii kɛ yei anɔkwafoi ni hi shi yɛ blema bei lɛ amli lɛ ahe?
10 Mɛni ji hemɔkɛyeli? Paulo haa hetoo: “Hemɔkɛyeli ji nii ni mɛi ahiɛ ka nɔ lɛ anɔ hewalɛnamɔ kɛ nii ni anaaa lɛ anɔmimaa. Ejaakɛ no mli aye blemabii lɛ ahe odase kpakpa yɛ.” (Hebribii 11:1, 2) Kɛkɛ ni Paulo kɛ hemɔkɛyeli ni tsuɔ nii fi bɔ ni etsɔɔ hemɔkɛyeli mli eha nɛɛ sɛɛ. Ema “blemabii” lɛ ashihilɛ mli nitsumɔi anɔ mi, kɛ agbɛnɛ yei tamɔ Sara kɛ Rahab. Kwɛ hewalɛwoo ni eji akɛ aaana akɛ “efeee Nyɔŋmɔ hiɛgbele akɛ aaatsɛ lɛ amɛ-Nyɔŋmɔ”! (Hebribii 11:16) Ani Nyɔŋmɔ baanyɛ akɛɛ nakai nɔŋŋ yɛ wɔhe yɛ wɔhemɔkɛyeli lɛ hewɔ? Ekaba akɛ wɔɔha Iɛ nɔ ko ni eeedamɔ nɔ ni ehiɛ agbo yɛ wɔhe beni gbi fɛɛ gbi baa naagbee lɛ.
11. Te aaafee tɛŋŋ ni ŋmɛnɛ wɔɔna “odasefoi babaoo ni ebɔle wɔ tamɔ atatu” lɛ he sɛɛ?
11 Yɛ nɛkɛ hii kɛ yei anɔkwafoi nɛɛ ashihilɛ he saji lɛ asɛɛ lɛ, Paulo kɛɔ akɛ: “No hewɔ lɛ agbɛnɛ wɔ hu, gbii abɔ ni wɔyɔɔ odasefoi babaoo ni ebɔle wɔ tamɔ atatu nɛɛ, nyɛhaa wɔkɛ jatsu fɛɛ jatsu aŋmɛa shi, kɛ esha ni ebɔle wɔhe kpula lɛ, ni wɔkɛ tsuishitoo ada foi ni ka wɔhiɛ lɛ.” (Hebribii 12:1) Eyɛ mli akɛ amrɔ nɛɛ amɛwɔ yɛ amɛgbohiiabui amli moŋ, shi ani nɛkɛ odasefoi ni fee nɔkwɛmɔ nɔ nɛɛ yɛ shihilɛ mli yɛ wɔjwɛŋmɔ mli? Ani ole amɛ kɛ amɛniiashikpamɔi lɛ jogbaŋŋ bɔ ni no aaaha oha hetoo akɛ hɛɛ? Enɛ ji nyɔmɔwoo babaoo ni jɛɔ daa Biblia kasemɔ mli baa lɛ eko, ni wɔkɛ wɔhenumɔi fɛɛ atsu nii ni wɔkɛsusu nɛkɛ “odasefoi babaoo ni ebɔle wɔ tamɔ atatu nɛɛ” lɛ ashihilɛ mli niiashikpamɔi ahe. Lɛlɛŋ, kɛ wɔkɛ amɛnɔkwɛmɔ nɔ kpakpa lɛ to wɔtsui mli lɛ eeeye ebua wɔ babaoo ni wɔye hemɔkɛyeli fɛɛ ni wɔɔlaaje lɛ nɔ kunim. Nɔ ni baajɛ mli aba ji akɛ, enɛ baaye abua wɔ koni wɔkɛ ekaa aye anɔkwale lɛ he odase yɛ shihilɛi fɛɛ mli ni gbeyeishemɔ bɛ mli.—Romabii 15:4.
Ni Wɔhaaa Eje Wɔtsine
12. (a) Yesu nɔkwɛmɔ nɔ lɛ baanyɛ aye abua wɔ koni ‘ekaje wɔtsine ni wɔsusuma anijiaŋ miije wui’ yɛ mɛɛ bɛ nɔ? (b) Mɛɛ ŋmɛnɛŋmɛnɛ beaŋ nɔkwɛmɔ nii komɛi yɔɔ ni kɔɔ mɛi ni ejeee amɛtsine lɛ ahe?
12 Wɔhemɔkɛyeli he nɔkwɛmɔ nɔ ni fe fɛɛ ji Yesu. Paulo woɔ wɔ hewalɛ akɛ: “Wɔkɛ tsuishitoo ada foi ni ka wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ. . . . No hewɔ lɛ nyɛjwɛŋa mɔ ni ŋmɛ etsui shi eha naashai ni eshafeelɔi ŋmɛ lɛ nɛɛ he, koni akaje nyɛtsine ni nyɛsusumai lɛ anijiaŋ miije wui.” (Hebribii 12:1-3) Ani ‘ojwɛŋ’ Yesu nɔkwɛmɔ nɔ lɛ he ‘jogbaŋŋ?’ Ani ‘okwɛ’ lɛ jogbaŋŋ diɛŋtsɛ? (1 Petro 2:21) Satan miisumɔ ni ‘eje wɔtsine ni wɔsusumai anijiaŋ aje wui.’ Eesumɔ ni wɔkpa odaseyeli nitsumɔ lɛ. Mɛɛ gbɛ nɔ etsɔɔ efeɔ enɛ yɛ? Yɛ bei komɛi amli lɛ kɛtsɔ shitee-kɛ-woo diɛŋtsɛ ni jamɔ kɛ je lɛŋ nɔyelɔi kɛbaa lɛ nɔ, taakɛ eji yɛ klɛŋklɛŋ afii oha lɛ mli lɛ. Yɛ nyɛsɛɛ afi lɛ mli lɛ, atsi Maŋtsɛyeli shiɛmɔ nitsumɔ lɛ naa yɛ maji aaafee 40 mli. Shi ani enɛ ha eje wɔnyɛmimɛi lɛ atsine? Dabi! Nɔ ni jɛ amɛnitsumɔ yɛ anɔkwayeli mli lɛ mli ba ji 17,000 kroko ni abaptisi amɛ yɛ nakai maji lɛ anɔ yɛ 1988 mli. Mɛɛ kanyamɔ esa akɛ enɛ afee aha mɛi fɛɛ ni hiɔ maji ni amɛyɔɔ heyeli ko lɛ amli lɛ nɛkɛ! Nyɛkahaa Maŋtsɛyeli lɛ he sanekpakpa lɛ shiɛmɔ miije wɔtsine!
13. (a) Mɛni ji nibii komɛi ni yɔɔ nigii ni baanyɛ aha etɔ wɔ ni wɔnijiaŋ aje wui yɛ wɔshiɛmɔ nitsumɔ lɛ mli lɛ ateŋ ekomɛi? (b Mɛni ji ‘nyamɔ ni ka Yesu hiɛ lɛ,’ ni te wɔɔfee tɛŋŋ wɔna miishɛɛ loo nyamɔ su ni tamɔ nɛkɛ?
13 Shi, nibii babaoo yɛ ni baa nigii ni baanyɛ aha eje wɔtsine. Nɔ ni fata enɛɛmɛi ahe ji shitee-kɛ-woo ni baa yɛ shia ni mli egbala, jwɛŋmɔŋ nɔnyɛɛ, gbɔmɔtsoŋ hewalɛnamɔ mli naagbai, nɔnyɛɛ ni jɛ tipɛŋfoi aŋɔɔ, nijiaŋwujee ni baa kɛjɛɔ omanye ni wɔyeee yɛ wɔ shiɛmɔ nitsumɔ lɛ mli, aloo ekolɛ wɔnaaa tsui ejaakɛ nibii agbɛjianɔtoo nɛɛ naagbee bako lolo. Ojogbaŋŋ, mɛni ye bua Yesu ni eŋmɛ etsui shi yɛ jwɛŋmɔŋ kɛ gbɔmɔtsɔŋ piŋmɔi amli? No ji “nyamɔ ni ka ehiɛ lɛ hewɔ.” (Hebribii 12:2) Nɔ ni waje Yesu ji miishɛɛ ni ena akɛ eha e-Tsɛ lɛ tsui anya kɛtsɔ bem ni eeebu Lɛ kɛ sɛɛ mli miishɛɛ ni ekpaa gbɛ ni enine baashɛ nɔ yɛ be mli ni ekɛ Mesia Maŋtsɛyeli lɛ mli naakpɛɛ jɔɔmɔi lɛ haa mɛi lɛ. (Lala 2:6-8; 40: 9, 10; Abɛi 27:11) Ani wɔɔnyɛ wɔnyiɛ nɛkɛ miishɛɛ su ni Yesu na nɛɛ sɛɛ jogbaŋŋ? Ni kaimɔ nɔmimaa ni Petro kɛha yɛ 1 Petro 5:9 lɛ: “Nakai amanehului lɛ nɔŋŋ nyɛnyɛmimɛi ni yɔɔ je lɛŋ lɛ hu naa.” Akɛni wɔle akɛ Yehowa nuɔ shishi hewɔ lɛ, kɛ wɔnu jeŋ muu fɛɛ nyɛmimɛi ahedɔɔ kɛ miishɛɛ lɛ he, ni wɔha wɔhiɛ hi miishɛɛ ni ka wɔhiɛ yɛ Maŋtsɛyeli nɔyeli lɛ shishi lɛ anɔ lɛ—enɛɛmɛi fɛɛ baaye ebua wɔ ni ekaje wɔtsine yɛ Yehowa sɔɔmɔ mli yɛ hemɔkɛyeli mli koni wɔshiɛ beni naagbee lɛ ebɛŋkɛ kpaakpa nɛɛ.
Nɔ Hewɔ Ni Yehowa Tsɔseɔ Mɔ
14. Mɛɛ sɛɛnamɔi baanyɛ ajɛ kaai kɛ amanehului ni wɔbaaŋmɛ wɔtsui shi yɛ mli lɛ mli aba?
14 Agbɛnɛ Paulo tsɔɔ nɔ hewɔ ni esa akɛ wɔŋmɛ wɔtsui shi yɛ kaai kɛ amanehului amli lɛ mli. Ewoɔ ŋaa akɛ wɔkwɛ enɛ akɛ nɔ ko ni tamɔ tsɔsemɔ ko. Paulo susuɔ akɛ: “Mibi, kaabu Nuŋtsɔ [Yehowa] tsɔsemɔ lɛ akɛ nɔ ko bibioo, ni asaŋ kɛ eka ohiɛ lɛ, kaaha onijiaŋ miije wui; ejaakɛ mɔ ni Nuŋtsɔ [Yehowa] lɛ sumɔɔ lɛ, lɛ etsɔseɔ.” (Hebribii 12:5, 6) Yesu po “kase toiboo yɛ amanehului ni ena lɛ amli.” (Hebribii 5:8) Hɛɛ, ehe miihia ni wɔ hu wɔkase toiboo. Kadimɔ sɛɛnamɔi ni baa beni wɔŋmɛ gbɛ ni tsɔsemɔ ekudɔ wɔ lɛ. Paulo kɛɛ: “Ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.” Kwɛ hewalɛwoo ni enɛ ji! —Hebribii 12:11.
15. Te wɔɔfee tɛŋŋ ni wɔkɛ Paulo ŋaawoo akɛ ‘wɔto wɔnajiashi jogbaŋŋ ni wɔnyiɛ trɔmɔɔ’ lɛ atsu nii?
15 Kɛji akɛ wɔkpɛlɛ “Nuŋtsɔ lɛ [Yehowa] tsɔsemɔ” nɔ yɛ enɛ mli lɛ, wɔkɛ Paulo ŋaawoo kpakpa nɛɛ baato wɔtsui mli: “Hewɔ lɛ nyɛwajea niji ni mli eje wui kɛ nakutsei ni egbɔjɔ lɛ, ni nyɛtoa nyɛnajiashi jogbaŋŋ ni nyɛnyiɛa trɔmɔɔ.” (Hebribii 12:12, 13) Yɛ bei komɛi amli lɛ ewaaa akɛ mɔ ko aaakpalaŋ kɛaajɛ gbɛ fintɔŋŋ ni nɔ etsa ni kɛ mɔ yaa wala mli lɛ nɔ.’ (Mateo 7:14) Bɔfo Petro kɛ mɛi krokomɛi ni yɔɔ Antiokia lɛ ye enɛ he fɔ yɛ be ko mli. Mɛni hewɔ? Ejaakɛ “amɛnyiɛɛɛ trɔmɔɔ yɛ sanekpakpa lɛ anɔkwale lɛ naa.” (Galatabii 2:14) Ŋmɛnɛ, esa akɛ wɔya nɔ wɔbo wɔ Tsɔɔlɔ Kpele Yehowa Nyɔŋmɔ toi. Ehe miihia ni wɔkɛ nibii ni ekɛyeɔ ebuaa wɔ kɛtsɔɔ “tsulɔ anɔkwafo kɛ nilelɔ” lɛ nɔ lɛ atsu nii kɛmɔ shi. Enɛ baaha wɔnyɛ ‘wɔjaje wɔnaji trɔmɔɔ.’—Mateo 24:45-47; Yesaia 30:20, 21.
16. (a) Te aaafee tɛŋŋ ni “shishifa kɛ joomɔ” ko aaanyɛ aba asafo lɛ mli lɛ? (b) Mɛni hewɔ Paulo kɛ jeŋba shara tsaa hiɛsɔɔ ni abɛ kɛha krɔŋkrɔŋ nibii lɛ anɔ lɛ, ni te wɔɔfee tɛŋŋ wɔtsi wɔhe kɛjɛ nɛkɛ osharai nɛɛ ahe lɛ?
16 Yɛ enɛ sɛɛ lɛ Paulo bɔ kɔkɔ akɛ “nyɛkwɛa ni ahia, koni mɔ ko akaŋmɛɛ Nyɔŋmɔ duromɔ lɛ he, koni shishifa kɛ joomɔ ko akakwɛ ni ehao nyɛ ni aŋɔbule mɛi pii.” (Hebribii 12:15) Kɛ wɔje shishi wɔbɔi wiemɔ huhuuhu, ni nɔ ko nɔ ko esaaa wɔhiɛ, ni wɔtao tɔmɔ yɛ gbɛ ni afeɔ nibii yɛ asafo lɛ mli lɛ he lɛ, eeenyɛ etamɔ “shishifa kɛ joomɔ ko” ni baanyɛ agbɛ ashwa oyayaayai ni efite mɛi krokomɛi ni yɔɔ asafo lɛ mli lɛ ajwɛŋmɔi kpakpai lɛ. Wɔbaanyɛ wɔtsi nɛkɛ susumɔi ni ejaaa nɛɛ naa kɛtsɔ jɔɔmɔi ni anɔkwale lɛ kɛba wɔshihilɛ mli lɛ ahe susumɔ nɔ. (Lala 40:5) Oshara kroko ji jeŋba shara sui aloo ‘hiɛsɔɔ ni wɔnaŋ kɛhaŋ krɔŋkrɔŋ nibii tamɔ Esau’ ni eeeba wɔshihilɛ mli. (Hebribii 12:16) Paulo kɛ nɛkɛ osharai enyɔ nɛɛ tsaa, ejaakɛ ekome baanyɛ ni ekɛ ekroko lɛ aba. Ehe ehiaaa ni Kristofonyo ko aŋmɛɛ ehe eha pɛsɛmkunya akɔnɔi kɛ ekɛ Petro wiemɔi nɛɛ tsu nii: “Nyɛdamɔa shi shiŋŋ yɛ hemɔkɛyeli lɛ mli nyɛtsia [Abonsam] lɛ gbɛ.”—1 Petro 5:9.
“Nii Ni Yɔɔ Diɛŋtsɛ Lɛ Ahe Odaseyeli Yɛ Faŋŋ, Tsɛ Anaaa”
17. Okɛ nibii ni yɔɔ gbeyei ni ba yɛ Sinai Gɔŋ lɛ shishi lɛ ato nɔ ni Kristofoi kɛkpeɔ ŋmɛnɛ lɛ ahe.
17 Wɔhemɔkɛyeli damɔ “nii ni yɔɔ diɛŋtsɛ lɛ ahe odaseyeli yɛ faŋŋ, tsɛ anaaa” nɔ. (Hebribii 11:1, New World Translation) Nibii ni anaaa ni yɔɔ diɛŋtsɛ nɛɛ ekomɛi ahe Paulo yaa nɔ ewieɔ yɛ Hebribii 12:18-27 lɛ. Etsɔɔ naakpɛɛ nibii ni tee nɔ yɛ Sinai Gɔŋ lɛ nɔ lɛ mli yɛ be mli ni Nyɔŋmɔ wie fɛɛ etsɔɔ Israel kɛ be mli ni Mose kɛɛ: “Miishe gbeyei, ni mihe miikpokpo” lɛ. Kɛkɛ ni bɔfo lɛ kɛfata he akɛ: “Shi moŋ, Zion Gɔŋ lɛ he nyɛba, kɛ Nyɔŋmɔ hiɛkalɔ lɛ maŋ ni ji ŋwɛi Yerusalem lɛ, kɛ ŋwɛibɔfoi akpei akpei abɔ lɛ anaabuamɔ kɛ asafo lɛ.” Yɛ blema Israelbii ni kpe yɛ Sinai Gɔŋ lɛ shishi lɛ agbɛfaŋ lɛ, Paulo kɛɛ akɛ Nyɔŋmɔ gbee hoso shikpɔŋ lɛ, shi agbɛnɛ, E-wo shi akɛ: “Eshwɛ shikome ni mahoso, jeee shikpɔŋ lɛ kɛkɛ, shi ŋwɛi hu.” Eyɛ mli akɛ awie nɛkɛ wiemɔi nɛɛ titri atsɔɔ Kristofoi ni afɔ amɛ mu lɛ moŋ, shi “asafo babaoo” lɛ ni jɛ tooi krokomɛi lɛ ateŋ lɛ hu baanyɛ aŋɔ ato amɛtsui mli. (Kpojiemɔ 7:9) Ani onuɔ nɔ ni Paulo kɛɔ lɛ shishi jogbaŋŋ? Wɔdamɔ ŋwɛibɔfoi akpei nyɔŋma nyɔŋmai abɔ ko agwabɔɔ hiɛ. Shi wɔdamɔ Yehowa hu hiɛ. Mɔ ni yɔɔ eninejurɔ gbɛ ji Yesu Kristo. Yɛ anɔkwale mli lɛ, wɔyɛ gbɛhe ko ni yɔɔ gbeyei waa mli ni gbɛnaa nii ni tsii waa ka wɔnɔ fe blema Hebribii lɛ ni yɔɔ Sinai Gɔŋ lɛ shishi lɛ! Nikaimɔ akɛ, hosomɔ ni baaba yɛ Harmagedon ta ni baa lɛ mli lɛ baaha ŋmɛnɛŋmɛnɛ yiwalɛ ŋwɛi kɛ shikpɔŋ lɛ alaaje. Enɛ jeee be ni ‘akɛaakpa’ Nyɔŋmɔ Wiemɔ lɛ toiboo kɛ ekɛ nitsumɔi
18. Mɛɛ gbɛ wɔɔnyɛ wɔtsɔ nɔ wɔya nɔ wɔye odase wɔha Yehowa ni ejeee wɔtsine?
18 Yɛ anɔkwale mli lɛ, adesa yinɔsane be ni yɔɔ gbeyei fe fɛɛ mli wɔyɔɔ nɛɛ. Akɛ Yehowa Odasefoi lɛ, atsu wɔ ni wɔya shikpɔŋ lɛ naagbee hei tɔɔ ni wɔyashiɛ Nyɔŋmɔ Maŋtsɛyeli ni ato ama shi lɛ he sanekpakpa lɛ. Bɔni afee ni wɔnyɛ wɔfee nakai lɛ, esa akɛ wɔna hemɔkɛyeli ni nyɛŋ ahoso, hemɔkɛyeli ni etɔɔɔ lɛ loo ejeee etsine, hemɔkɛyeli ni yeɔ ebuaa wɔ koni wɔkpɛlɛ Yehowa tsɔsemɔ nɔ. Kɛ wɔyɛ hemɔkɛyeli ni tamɔ nɛkɛ lɛ, abaana wɔ yɛ mɛi ni “baaya nɔ ana duromɔ, ni no mli wɔbaanyɛ wɔtsɔ ni wɔkɛ sɔɔmɔ krɔŋkrɔŋ ni sa nɔkpɛlɛmɔ aha Nyɔŋmɔ kɛ gbeyeishemɔ kɛ woo” lɛ ateŋ. (Hebribii 12:28) Hɛɛ, ni wɔbaaya nɔ wɔye odase wɔha Yehowa ni ejeŋ wɔtsine.
Te Obaaha Hetoo Oha Tɛŋŋ?
◻ Mɛni hewɔ Paulo wolo ni eŋma eyaha Hebribii Iɛ he yɔɔ sɛɛnamɔ kɛhaa wɔ Iɛ?
◻ Mɛɛ sane titri esa akɛ Kristofoi kɛkpe ŋmɛnɛ?
◻ Te wɔɔfee tɛŋŋ ni blema Odasefoi anɔkwafoi Iɛ ahe aba sɛɛnamɔ aha wɔ?
◻ Mɛni hewɔ Yehowa tsɔseɔ mɛi ni esumɔɔ amɛ lɛ?
◻ Mɛni ji nɔ titri ni haa ayeɔ odase ni ejeee mɔ tsine Iɛ?