Hiɛnɔkamɔ Eha Amɛfi Shi Shiŋŋ, Suɔmɔ Ekanya amɛ
“Agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ.”—1 KORINTOBII 13:13.
1. Mɛɛ kɔkɔbɔɔ bɔfo Paulo kɛhaa wɔ?
BƆFO Paulo bɔɔ wɔ kɔkɔ akɛ, wɔhemɔkɛyeli baanyɛ asha shi tamɔ lɛlɛ. Ewieɔ akɛ “ohiɛ hemɔkɛyeli kɛ henilee kpakpa, nɔ ni mɛi komɛi shɛrɛ shwie ni amɛkɛ hemɔkɛyeli lɛ yasha shi lɛ.” (1 Timoteo 1:19) Tsei akɛkpɛ ŋshɔ hiɛ lɛji yɛ Ŋ.B. klɛŋklɛŋ afii oha lɛ mli. Amɛhilɛ yɛ ŋshɔ hiɛ lɛ damɔ tso ni akɛkpɛ lɛ kɛ hesaa ni akɛkpɛɔ lɛlɛ lɛ nɔ.
2. Mɛni hewɔ esa akɛ wɔhemɔkɛyeli lɛlɛ lɛ afee nɔ ni akpɛ lɛ jogbaŋŋ lɛ, ni mɛni enɛ biɔ kɛjɛɔ wɔdɛŋ?
2 Esa akɛ nɔ ni abaanyɛ atsɛ lɛ akɛ wɔhemɔkɛyeli lɛlɛ lɛ anyɛ atɛo nu hiɛ yɛ adesai ŋshɔi ni efee hamahama lɛ mli. (Yesaia 57:20; Kpojiemɔ 17:15) No hewɔ lɛ esa akɛ efee nɔ ni akpɛ lɛ jogbaŋŋ, ni enɛ damɔ wɔnɔ. Beni Yudafoi kɛ Roma je lɛ mli “ŋshɔi” lɛ bɔi hamahamafeemɔ kɛha mra be mli Kristofoi lɛ, Yuda ŋma akɛ: “Suɔmɔmɛi, nyɛ lɛ nyɛhaa nyɛnane amɔa shi yɛ nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ Mumɔ krɔŋkrɔŋ lɛ mli, ni nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuntsɔ Yesu Kristo mɔbɔnalɛ lɛ gbɛ, koni nyɛná naanɔ wala.” (Yuda 20, 21) Akɛni Yuda wie hu yɛ ‘hemɔkɛyeli ni atu awo krɔŋkrɔŋbii lɛ adɛŋ’ lɛ ni aaapele he lɛ he hewɔ lɛ, wiemɔ ni ji “nyɛhemɔkɛyeli ni yɔɔ krɔŋkrɔŋ fe fɛɛ” lɛ baanyɛ akɔ Kristofoi anitsɔɔmɔ lɛ fɛɛ he, ní yiwalaheremɔ lɛ he sanekpakpa lɛ fata he. (Yuda 3) Kristo ji nakai hemɔkɛyeli lɛ shishitoo. Hemɔkɛyeli ni mli wa he miihia kɛji akɛ wɔɔnyɛ wɔkpɛtɛ anɔkwa Kristofoi ahemɔkɛyeli lɛ he.
“Teemɔŋ Jamɔ Kuu He Gbeyeiwoo” Ahum lɛ Naa ni Adamɔɔ
3. Mɛi komɛi kɛ “teemɔŋ jamɔ kuu he gbeyeiwoo” lɛ miitsu nii yɛ mɛɛ gbɛ nɔ?
3 Yɛ nyɛsɛɛ afii nɛɛ amli lɛ, saji ni kɔɔ gbɔmɛi babaoo ni gbeɔ amɛhe, gbɔmɔgbeei, kɛ gbɔmɛi ni kɛ awuiyeli nibii tutuaa mɛi lɛ ji nɔ ni jɛ teemɔŋ jamɔ kui bibii lɛ. Anuɔ shishi akɛ, gbɔmɛi aŋkroaŋkroi babaoo, ni maŋkwramɔŋ hiɛnyiɛlɔi ni hiɛ jwɛŋmɔ kpakpa lɛ fata he lɛ etsɔɔ bɔ ni amɛsusuɔ bɔ ni amɛaafee ni amɛbu gbɔmɛi ni leee nɔ ni yaa nɔ lɛ ahe nɔ ko, titri lɛ gbekɛbii ahe kɛjɛ nɛkɛ teemɔŋ jamɔ kui ni he yɔɔ gbeyei nɛɛ ahe. Ŋwanejee ko bɛ he akɛ, akɛni “je nɛŋ nyɔŋmɔ lɛ” hɔ awuiyelii kpelei nɛɛ asɛɛ hewɔ lɛ, etsɔ nɔ ekɛ nɔ ni mɛi komɛi tsɛɔ lɛ akɛ teemɔŋ jamɔ kuu he gbeyeiwoo eba, ni ekɛ enɛ miitsu nii koni ekɛte shi ewo Yehowa webii. (2 Korintobii 4:4; Kpojiemɔ 12:12) Mɛi komɛi kɛ shihilɛ nɛɛ etsu nii yɛ gbɛ ni ejaaa nɔ koni amɛkɛtee shitee-kɛ-woo shi amɛwo wɔ nitsumɔ lɛ. Ámɛje tafaa shishi yɛ maji komɛi anɔ ni yiŋtoo lɛ ji ni amɛkɛbu gbɔmɛi ahe kɛjɛ “teemɔŋ jamɔ kui ni he yɔɔ oshara” lɛ ahe, shi amɛkɛ Yehowa Odasefoi fataa he yɛ gbɛ ni ejaaa nɔ, ni amɛkɛ nakai feemɔ haa amɛhiɛ koni amɛkɛfolɔ wɔ naa. Enɛ eha odaseyeli yɛ shia kɛ shia ewa yɛ Europa maji komɛi anɔ, ni eha mɛi komɛi ekpa Biblia ni amɛkɛ wɔ kaseɔ lɛ. Enɛ hu eha eje wɔnyɛmimɛi lɛ ekomɛi anijiaŋ wui.
4. Mɛni hewɔ esaaa akɛ shitee-kɛ-woo jeɔ wɔnijiaŋ wui lɛ?
4 Shi, yɛ nɔ najiaŋ ni shitee-kɛ-woo aaaje wɔnijiaŋ wui lɛ, esa akɛ ewo wɔhekɛnɔfɔɔ lɛ hewalɛ ákɛ, anɔkwa Kristo jamɔ sɛɛ wɔnyiɛ lɛ. (Mateo 5:11, 12) Afolɔ mra be mli Kristofoi lɛ anaa akɛ amɛji maŋjwalɔi ajamɔ kuu, ni ákɛ “awieɔ he efɔŋ” yɛ he fɛɛ he. (Bɔfoi lɛ Asaji 24:5; 28:22) Shi bɔfo Petro shɛje enanemɛi heyelilɔi lɛ amii, ni eŋma akɛ: “Suɔmɔmɛi, nyɛkahaa amanehulu la ni aŋɔkaa nyɛ lɛ miifee nyɛ sane srɔto ko, tamɔ akɛ nɔ ko srɔto ko feɔ nyɛ lɛ, shi moŋ babaoo ni nyɛnáa Kristo amanehului lɛ eko lɛ, nyɛmii ashɛa, koni enunyam kpojiemɔ lɛ mli hu nyɛmii ashɛa ni nyɛmli afilia nyɛ.” (1 Petro 4:12, 13) Nakai nɔŋŋ klɛŋklɛŋ afii oha lɛ mli nɔyeli kuu lɛ mlinyo ko ŋma akɛ: “Minyɛmimɛi, kɛji nyɛgbee kaai srɔtoi pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛɔ tsuishiŋmɛɛ kɛbaa. Ni nyɛhaa tsuishiŋmɛɛ lɛ agbea enitsumɔ naa kɛwulaa shi, ni nyɛye emuu, ni nɔ ko nɔ ko akashwɛ nyɛ.” (Yakobo 1:2-4) Bɔ ni kɔɔyɔɔ ni naa wa waa kaa ŋshɔ hiɛ lɛlɛ ko hilɛ ekwɛɔ lɛ, nakai nɔŋŋ shitee-kɛ-woo ahum baajie gbɔjɔmɔi komɛi ni yɔɔ wɔhemɔkɛyeli lɛlɛ lɛ mli lɛ kpo.
Amanehulu Kɛ Tsuishiŋmɛɛ Baa
5. Te wɔɔfee tɛŋŋ wɔná nɔmimaa akɛ wɔhemɔkɛyeli lɛ yɛ shiŋŋ yɛ amanehulu shishi?
5 Kristofoi baanyɛ aná nɔmimaa yɛ amɛ tsuishiŋmɛɛ kɛ amɛhemɔkɛyeli ni aaafee shiŋŋ lɛ he, beni ámɛnyɛ amɛkpee amanehulu ahum ni tswaa lɛ naa yɛ omanyeyeli mli lɛ sɛɛ. Wɔ tsuishiŋmɛɛ lɛ ‘baagbe enitsumɔ naa kɛwula shi’ yɛ ŋshɔi ni tswaa hamahama lɛ nɔ kɛji akɛ ‘wɔye emuu ni nɔ ko nɔ ko eshwɛɛɛ wɔ,’ ni hemɔkɛyeli ni wa fata he. Paulo ŋma akɛ: “Nɔ fɛɛ nɔ mli lɛ, wɔkɛ wɔhe tsɔɔ akɛ Nyɔŋmɔ sɔɔlɔi, yɛ tsuishiŋmɛɛ babaoo mli, yɛ amanehului amli, yɛ fimɔi amli, yɛ haomɔi amli.”—2 Korintobii 6:4.
6. Mɛni hewɔ esa akɛ “wɔshwã yɛ amanehului amli,” ni enɛ wajeɔ wɔhiɛnɔkamɔ lɛ yɛ mɛɛ gbɛ nɔ?
6 Esa akɛ wɔsusu amanehulu kɔɔyɔɔ ni tswaa waa ni ekolɛ wɔkɛbaakpe yɛ bei komɛi amli lɛ ahe akɛ hegbɛi ni wɔkɛaatsɔɔ akɛ wɔhemɔkɛyeli lɛlɛ lɛ yɛ hewalɛ ni ema shi shiŋŋ. Paulo ŋma kɛyaha Kristofoi ni yɔɔ Roma lɛ akɛ: “Wɔshwãa yɛ amanehului amli hu, ejaakɛ wɔle akɛ amanehulu lɛ tsɛɔ tsuishiŋmɛɛ kɛbaa, ni tsuishiŋmɛɛ lɛ hu tsɛɔ nɔhiɛkamɔ kɛbaa; ni nɔhiɛkamɔ lɛ wooo mɔ hiɛgbele.” (Romabii 5:3-5) Shiŋŋfeemɔ yɛ kaai ashishi lɛ kɛ Yehowa nɔkpɛlɛmɔ bahaa wɔ. Ni enɛ hu wajeɔ wɔhiɛnɔkamɔ lɛ.
Nɔ Hewɔ ni Mɛi Komɛi Yashaa Shi
7. (a) Taakɛ Paulo wiemɔi lɛ tsɔɔ lɛ, mɛi komɛi eyasha shi yɛ mumɔŋ yɛ mɛɛ gbɛ nɔ? (b) Mɛi komɛi ekpalaŋ kɛjɛ anɔkwale lɛ he ŋmɛnɛ yɛ mɛɛ gbɛ nɔ?
7 Beni Paulo bɔ kɔkɔ yɛ ‘shishamɔ’ he lɛ, no mli lɛ nɔ ni yɔɔ ejwɛŋmɔ mli ji mɛi komɛi ni ‘eshɛrɛ’ amɛhenilee kpakpa lɛ ‘amɛshwie’ ni amɛlaaje amɛhemɔkɛyeli lɛ. (1 Timoteo 1:19) Mɛi ni fata amɛhe ji Himeneo kɛ Aleksandro ni yagbee hemɔkɛyeli kwamɔ mli, ni amɛdu gbɛ kɛjɛ anɔkwale lɛ he lɛ ni jɛ́ɔ mɛi lɛ. (1 Timoteo 1:20; 2 Timoteo 2:17, 18) Ŋmɛnɛ, hemɔkɛyeli kwalɔi ni amɛdu gbɛ kɛjɛ anɔkwale lɛ he lɛ kɛ wiemɔi kũɔ “tsulɔ anɔkwafo kɛ nilelɔ” lɛ naa, ni amɛkɛ nakai feemɔ kɔ̃ɔ nine ni lɛɔ amɛ yɛ mumɔŋ lɛ. Mɛi komɛi tamɔ “tsulɔ fɔŋ” lɛ, ni amɛkɛɔ yɛ amɛtsui mli akɛ, “Minuntsɔ lɛ miitsi ebaa be lɛ eeto.” (Mateo 24:44-49; 2 Timoteo 4:14, 15) Amɛjeɔ yiwalɛ nibii agbɛjianɔtoo nɛɛ naagbee ni ebɛŋkɛ lɛ he ŋwane, ni amɛwieɔ amɛshiɔ tsulɔ kuu lɛ ni hiɛ yɔɔ ehe nɔ yɛ mumɔŋ lɛ yɛ hehiamɔ mumɔ ni amɛhaa ehiɔ Yehowa webii ateŋ lɛ hewɔ. (Yesaia 1:3) Hemɔkɛyeli kwalɔi ni tamɔ nɛkɛ lɛ nyɛɔ “amɛbutuɔ mɛi komɛi ahemɔkɛyeli,” ni amɛhaa mɛi yashaa shi yɛ mumɔŋ.—2 Timoteo 2:18.
8. Mɛni eha mɛi komɛi efite loo amɛshiu amɛhemɔkɛyeli lɛlɛ lɛ?
8 Kristofoi krokomɛi ni amɛjɔɔ amɛhe nɔ lɛ kɛ amɛhemɔkɛyeli lɛlɛ lɛ eyasha shi kɛtsɔ amɛ henilee ni amɛshɛrɛ amɛshwie ni amɛkɛ amɛhe yawo je nɛɛ miishɛɛ sɛɛdii kɛ bɔlɛnamɔ jeŋba shara ni naatsii bɛ mli lɛ mli lɛ hewɔ. (2 Petro 2:20-22) Kɛlɛ, mɛi krokomɛi shiuɔ amɛhemɔkɛyeli lɛlɛ lɛ, ejaakɛ yɛ amɛsusumɔ naa lɛ, etamɔ nɔ ni nibii agbɛjianɔtoo hee lɛ hejɔɔmɔhe lɛ nako aba. Akɛni amɛnyɛɛɛ amɛbu gbalɛi komɛi amlibaa be he akɔntaa, ni amɛjieɔ “Yehowa gbi lɛ” kɛjɛɔ amɛjwɛŋmɔ mli hewɔ lɛ, amɛshĩɔ anɔkwa jamɔ lɛ. (2 Petro 3:10-13; 1 Petro 1:9) Etsɛɛɛ ni amɛnaa amɛhe akɛ amɛyabote ŋmɛnɛŋmɛnɛ nibii agbɛjianɔtoo nɛɛ mli nui ni efee hamahama kɛ ŋmɔtɔ lɛ mli ekoŋŋ. (Yesaia 17:12, 13; 57:20) Mɛi komɛi ni amɛkpa Kristofoi asafo lɛ kɛbɔɔ lɛ heɔ yeɔ lolo akɛ Kristofoi asafo lɛ tsuɔ anɔkwale jamɔ he nii. Shi kɛlɛ, amɛbɛ tsuishitoo kɛ tsuishiŋmɛɛ ni he hiaa ni akɛaamɛ jeŋ hee ni Yehowa Nyɔŋmɔ ewo shi yɛ he lɛ. Paradeiso shihilɛ sɛɛ etsɛ tsɔ kɛha amɛ.
9. Mɛni Kristofoi fioo komɛi ni amɛjɔɔ amɛhe nɔ lɛ feɔ, ni esa akɛ anɔkwa saji nɛɛ aha wɔsusu mɛni he?
9 Kristofoi ni ámɛjɔɔ amɛhe nɔ lɛ ateŋ mɛi fioo ko ni yɔɔ je lɛŋ hei komɛi lɛ tamɔ mɛi ni ámɛjie amɛhemɔkɛyeli lɛlɛ lɛ mli abalai lɛ ekomɛi. Lɛlɛ lɛ ma nu hiɛ moŋ, shi yɛ nɔ najiaŋ ni amɛaaya amɛhiɛ tɛ̃ɛ yɛ hemɔkɛyeli ni yeɔ emuu mli lɛ, ámɛgbɔjɔ foi ni esa akɛ amɛkɛya amɛhiɛ lɛ mli tamɔ mɛi ni miishara shi. Akɛni “Paradeiso miiba nɔŋŋ” he hiɛnɔkamɔ lɛ gbala amɛ hewɔ lɛ, amɛteŋ mɛi komɛi miisumɔ ni amɛmia amɛhiɛ waa koni amɛnine ashɛ nɔ—amɛfeɔ ekãa yɛ shiɛmɔ nitsumɔ lɛ mli ni amɛyaa kpeei, kpokpaa nɔ kpeei, kɛ kpokpaa wulu nɔ kpeei lɛ fɛɛ daa. Agbɛnɛ akɛni amɛmiisusu akɛ amɛhiɛnɔkamɔ lɛ mlibaa yɛ shɔŋŋ fe bɔ ni amɛkpa gbɛ hewɔ lɛ, amɛsumɔɔɔ ni amɛmiaa amɛhiɛ tamɔ amɛfee yɛ tsutsu ko lɛ. Anaa enɛ yɛ shiɛmɔ nitsumɔ ni baa shi, kpeei ni afɔɔɔ yaa, kɛ amɛsuɔmɔ mli ni amɛjɛɔ amɛhaa kpokpaa loo kpokpaa wuji anɔ kpeei lɛ mli wiemɔi lɛ ekomɛi jeɔ amɛsɛɛ lɛ mli. Mɛi krokomɛi miituu be babaoo kɛmiiha hiɛtserɛjiemɔ kɛ heloonaa nibii ataomɔ ni baaha amɛhe ajɔ amɛ. Nɛkɛ anɔkwa saji nɛɛ haa wɔsusuɔ nɔ ni esa akɛ efee hewalɛ ni tsirɛɔ wɔ yɛ wɔshihilɛ mli, yɛ wɔhe nɔ ni wɔjɔɔ wɔha Yehowa lɛ he. Ani esa akɛ ekãa ni wɔɔfee yɛ esɔɔmɔ mli lɛ adamɔ “Paradeiso miiba nɔŋŋ” he hiɛnɔkamɔ lɛ nɔ?
Akɛ Hiɛnɔkamɔ to Sɛkɛ He
10, 11. Paulo kɛ wɔhiɛnɔkamɔ lɛ to mɛni he, ni mɛni hewɔ nɔ ni akɛto he nɛɛ sa jogbaŋŋ lɛ?
10 Paulo tsɔɔ akɛ, Yehowa kɛ jɔɔmɔi ni baaba kɛtsɔ Abraham nɔ lɛ he shiwoo eha. Kɛkɛ ni bɔfo lɛ tsɔɔ mli akɛ: “Nyɔŋmɔ . . . kɛ kitakamɔ damɔ mli; koni wɔtsɔ saji enyɔ ni tsakeee [ewiemɔ kɛ ekitakamɔ] ni Nyɔŋmɔ nyɛŋ emale yɛ mli lɛ anɔ wɔná miishɛjemɔ ni wa, ni wɔ mɛi ni wɔyaba abo lɛ wɔkɛmɔ nɔhiɛkamɔ ni kã wɔhiɛ lɛ mli; nɔ ni wɔhiɛ tamɔ wɔsusuma sɛkɛ ni tseee ni efi shi shiŋŋ” lɛ. (Hebribii 6:17-19; 1 Mose 22:16-18) Hiɛnɔkamɔ ni akɛma Kristofoi ni afɔ amɛ mu lɛ ahiɛ ji wala ni gbele bɛ mli yɛ ŋwɛi. Ŋmɛnɛ, Yehowa tsuji lɛ ateŋ mɛi ni fa babaoo yɛ naanɔ wala he hiɛnɔkamɔ ni yɔɔ miishɛɛ yɛ paradeiso shikpɔŋ nɔ. (Luka 23:43) Kɛji akɛ hiɛnɔkamɔ ni tamɔ nɛkɛ bɛ lɛ, mɔ ko nyɛŋ aná hemɔkɛyeli.
11 Sɛkɛ ji yibaamɔ nɔ̃ ni yɔɔ hewalɛ waa, ni eji nii ni he hiaa waa ni haa lɛlɛ damɔɔ he kome ni ehaaa ekpalaŋ kɛya. Amlaku ko bɛ ni baashi lɛjiadaamɔhe kɛ ebɛ sɛkɛ. Akɛni Paulo kɛ lɛlɛ esha shi shii abɔ hewɔ lɛ, ele kɛjɛ niiashikpamɔ mli akɛ, bei pii lɛ amlakui awala damɔ amɛ lɛji lɛ asɛkɛi anɔ. (Bɔfoi lɛ Asaji 27:29, 39, 40; 2 Korintobii 11:25) Lɛlɛ ko bɛ tsɔne ni kã mli ni baanyɛ aha lɛlɛtsɛ lɛ akudɔ lɛ bɔ ni esumɔɔ yɛ klɛŋklɛŋ afii oha lɛ mli. Yɛ ta lɛji ni akɛ tabɔlɔ wiriɔ lɛ asɛɛ lɛ, lɛji fɛɛ kɛ amɛhe fɔ̃ɔ kɔɔyɔɔ nɔ titri kɛhaa amɛyaa kɛ baa. Kɛji akɛ oshara ba lɛlɛ ko he akɛ ahum miigbala lɛ kɛmiiya tɛsaa nɔ lɛ, lɛlɛtsɛ lɛ yelikɛbuamɔ nɔ̃ pɛ ji sɛkɛ ni eeeŋmɛɛ he koni ekɛje ahum lɛ mli shweshweeshwe, kɛ hiɛnɔkamɔ akɛ sɛkɛ lɛ tseŋ yɛ ŋshɔ lɛ shishi. No hewɔ lɛ, Paulo kɛ Kristofonyo hiɛnɔkamɔ lɛ to “wɔsusuma sɛkɛ ni tseee ni efi shi shiŋŋ” he. (Hebribii 6:19) Kɛji akɛ shitee-kɛ-woo ahumii loo kaai krokomɛi tutua wɔ lɛ, wɔhiɛnɔkamɔ ni yɔɔ naakpɛɛ lɛ tamɔ sɛkɛ ni haa wɔfiɔ shi shiŋŋ tamɔ susumai ni hiɛ kamɔ, koni wɔhemɔkɛyeli lɛ akakpalaŋ kɛmiiya yiŋkɔshikɔshifeemɔ nui ni mli ekwɔɔɔ ni yɔɔ oshara lɛ amli loo hemɔkɛyeli kwamɔ tɛsaai ni yɔɔ oshara lɛ anɔ.—Hebribii 2:1; Yuda 8-13.
12. Te wɔɔfee tɛŋŋ wɔkwa Yehowa he ni wɔɔkpalaŋ kɛaajɛ lɛ?
12 Paulo bɔ Hebri Kristofoi lɛ kɔkɔ akɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ hiɛkalɔ lɛ he.” (Hebribii 3:12) Yɛ Hela ŋmalɛ lɛ mli lɛ, wiemɔ “ekpale kɛjɛ” lɛ shishinumɔ diɛŋtsɛ ji “tsi he kɛjɛ,” ni ji akɛ, akwa hemɔkɛyeli lɛ. Shi wɔbaanyɛ wɔkwa shishamɔ kwraa nɛɛ. Hemɔkɛyeli kɛ hiɛnɔkamɔ baanyɛ aha wɔkɛ wɔhe akpɛtɛ Yehowa he yɛ ahum kaai ni ehiii fe fɛɛ lɛ po mli. (5 Mose 4:4; 30:19, 20) Wɔhemɔkɛyeli lɛ efeŋ tamɔ lɛlɛ ni hemɔkɛyeli kwamɔ tsɔɔmɔ he kɔɔyɔɔ tswaa lɛ kɛyaa kɛbaa kɛkɛ. (Efesobii 4:13, 14) Ni akɛni hiɛnɔkamɔ ji wɔ sɛkɛ hewɔ lɛ, wɔbaanyɛ wɔje shihilɛ mli ahumii lɛ mli shweshweeshwe akɛ Yehowa tsuji.
Suɔmɔ kɛ Mumɔ Krɔŋkrɔŋ Tsirɛ Wɔ
13, 14. (a) Mɛni hewɔ wɔhiɛnɔkamɔ sɛkɛ lɛ diɛŋtsɛ pɛ faaa lɛ? (b) Mɛni esa akɛ efee hewalɛ ni kanyaa wɔ yɛ sɔɔmɔ krɔŋkrɔŋ ni wɔkɛhaa Yehowa lɛ mli, ni mɛni hewɔ?
13 Kristofonyo shwereŋ kɛyaŋ gbɛjianɔtoo hee lɛ mli kɛji akɛ jwɛŋmɔ pɛ ni ekɛsɔmɔɔ Yehowa ji hiɛnɔkamɔ akɛ eeehi shi kɛya naanɔ yɛ paradeiso shikpɔŋ nɔ. Yɛ be mli ni ehiɛɔ ehiɛnɔkamɔ sɛkɛ lɛ mli akɛ nɔ ni haa efiɔ shi shiŋŋ yɛ shihilɛ mli lɛ, ehe miihia ni ekɛ suɔmɔ hewalɛ ni tsirɛɔ wɔ lɛ afata no kɛ ehemɔkɛyeli lɛ he. Paulo ma anɔkwa sane nɛɛ nɔ mi beni eŋma akɛ: “Agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ.”—1 Korintobii 13:13.
14 Esa akɛ hewalɛ ni kanyaa wɔ ni haa wɔkɛ sɔɔmɔ krɔŋkrɔŋ haa lɛ afee tsuiŋ suɔmɔ ni wɔyɔɔ kɛha Yehowa, yɛ esuɔmɔ babaoo ni eyɔɔ kɛha wɔ lɛ nɔkpɛlɛmɔ mli. Bɔfo Yohane ŋma akɛ: “Mɔ ni sumɔɔɔ mɔ lɛ, eleee Nyɔŋmɔ; ejaakɛ Nyɔŋmɔ lɛ, suɔmɔ ji lɛ. Enɛ mli Nyɔŋmɔ suɔmɔ ni ekɛsumɔɔ wɔ lɛ je kpo yɛ, akɛ Nyɔŋmɔ tsu lɛ diɛŋtsɛ ebi koome lɛ kɛba je nɛŋ, koni wɔtsɔ enɔ wɔná wala. Wɔsumɔɔ lɛ, ejaakɛ lɛ tsutsu esumɔ wɔ.” (1 Yohane 4:8, 9, 19) Yɛ shidaa ni wɔkɛhaa Yehowa hewɔ lɛ, esaaa akɛ nɔ ni he hiaa wɔ titri lɛ afee yiwalaheremɔ ni wɔ diɛŋtsɛ wɔɔná, shi moŋ ni wɔye egbɛi krɔŋkrɔŋ lɛ hetsemɔ kɛ jeŋ muu fɛɛ maŋtsɛ ni eji yɛ gbɛ ni ja nɔ lɛ bembuu lɛ he odase.
15. Yɛ mɛɛ gbɛ nɔ suɔmɔ ni wɔyɔɔ kɛha Yehowa lɛ kɔɔ jeŋ muu fɛɛ maŋtsɛ ni eji he sane lɛ he?
15 Yehowa miisumɔ ni wɔsɔmɔ lɛ ejaakɛ wɔsumɔɔ lɛ, shi jeee Paradeiso kɛkɛ. Biblia ensaiklopedia ni ji Insight on the Scripturesa lɛ kɛɔ akɛ: “Yehowa hiɛ baa nyam yɛ anɔkwale ni eji akɛ jeŋ muu fɛɛ maŋtsɛ ni eji lɛ kɛ ebɔɔ nii ni fiɔ sɛɛ lɛ damɔ suɔmɔ nɔ titri lɛ mli. Esumɔɔ mɛi ni sumɔɔ jeŋ muu fɛɛ maŋtsɛ ni eji yɛ esui kpakpai ahewɔ, kɛ bɔ ni amɛja ha, kɛ bɔ ni amɛsumɔɔ jeŋ muu fɛɛ maŋtsɛ ni eji lɛ fe ekrokomɛi fɛɛ hewɔ lɛ pɛ. (1 Korintobii 2:9) Amɛhalaa akɛ amɛaasɔmɔ yɛ jeŋ muu fɛɛ maŋtsɛ ni eji lɛ shishi fe ni amɛaabɔ mɔdɛŋ ni amɛye amɛhe—enɛ jɛ ehe nilee ni amɛná kɛ esuɔmɔ, ejalɛ saneyeli, kɛ enilee ni amɛyoo akɛ enɔ kwɔ kwraa fe amɛnɔ̃ lɛ hewɔ. (Lala 84:10, 11)”—Kpo 2, baafã 275.
16. Yɛ mɛɛ gbɛ nɔ suɔmɔ kɛha Yesu ji hewalɛ ni tsirɛɔ wɔ yɛ wɔshihilɛi amli lɛ?
16 Ákɛ Kristofoi lɛ, wɔjieɔ suɔmɔ kpo wɔtsɔɔ Yesu hu kɛkpɛ̃lɛɔ suɔmɔ ni eyɔɔ kɛha wɔ lɛ nɔ. Paulo wie akɛ: “Kristo suɔmɔ lɛ nyɛɔ wɔnɔ ni wɔkojoɔ nɛkɛ, akɛ, kɛ́ mɔ kome gbo mɛi fɛɛ yigbele lɛ, belɛ mɛi lɛ fɛɛ egboi. Ni egbo mɛi fɛɛ yigbele, koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ, shi moŋ amɛhiɛ akamɔ aha mɔ ni gbo ni atee lɛ shi ekoŋŋ aha amɛ lɛ.” (2 Korintobii 5:14, 15) Kristo ji shishitoo diɛŋtsɛ ni atswaa wɔmumɔŋ shihilɛi, wɔhemɔkɛyeli, kɛ wɔhiɛnɔkamɔ amaa nɔ. Suɔmɔ ni wɔyɔɔ kɛha Kristo Yesu lɛ wajeɔ wɔhiɛnɔkamɔ ni ehaa wɔhemɔkɛyeli maa shi shiŋŋ, titri lɛ yɛ kaa ni tamɔ ahum bei amli.—1 Korintobii 3:11; Kolosebii 1:23; 2:6, 7.
17. Mɛɛ hewalɛ ni kanyaa mɔ waa Yehowa kɛhaa wɔ, ni yɛ mɛɛ gbɛ nɔ átsɔɔ bɔ ni ehe hiaa ha lɛ yɛ Bɔfoi lɛ Asaji 1:8 kɛ Efesobii 3:16?
17 Yɛ be mli ni suɔmɔ kɛha Nyɔŋmɔ kɛ e-Bi lɛ ji hewalɛ titri ni tsirɛɔ wɔ yɛ wɔshihilɛ mli akɛ Kristofoi lɛ, Yehowa kɛ nɔ kroko ni tsirɛɔ wɔ, ni kanyaa wɔ, ni haa wɔ hewalɛ koni wɔya wɔhiɛ yɛ esɔɔmɔ nitsumɔ lɛ mli lɛ haa wɔ. No ji enifeemɔ hewalɛ loo emumɔ krɔŋkrɔŋ lɛ. Hebri kɛ Hela wiemɔi ni atsɔɔ shishi akɛ “mumɔ” lɛ kɔɔ kɔɔyɔɔ ni tswaa kɛ hewalɛ he titri. Abalaa lɛji ni tamɔ nɔ ni Paulo yabote mli kɛha gbɛfaa lɛ kɛ amɛhe fɔ̃ɔ kɔɔyɔɔ hewalɛ ni anaaa lɛ nɔ koni amɛshɛ amɛyaahe. Nakai nɔŋŋ hu suɔmɔ kɛ Nyɔŋmɔ nifeemɔ hewalɛ ni anaaa lɛ he hiaa wɔ kɛ́ wɔhemɔkɛyeli lɛlɛ lɛ kɛ wɔ aaaya hiɛ yɛ Yehowa sɔɔmɔ mli.—Bɔfoi lɛ Asaji 1:8; Efesobii 3:16.
Wɔya Wɔhiɛ Kɛyashɛ Wɔshɛɛhe!
18. Mɛni baanyɛ aha wɔŋmɛ wɔtsui shi yɛ wɔsɛɛ be mli kaai ni baaba wɔhemɔkɛyeli nɔ lɛ eko fɛɛ eko mli?
18 Abaanyɛ aka wɔhemɔkɛyeli kɛ suɔmɔ lɛ waa diɛŋtsɛ dani wɔbaabote nibii agbɛjianɔtoo hee lɛ mli. Shi Yehowa kɛ sɛkɛ “ni tseee ni ma shi shiŋŋ”—ni ji wɔhiɛnɔkamɔ ni yɔɔ naakpɛɛ lɛ eha wɔ. (Hebribii 6:19; Romabii 15:4, 13) Kɛ shitee-kɛ-woo loo kaai krokomɛi tswia wɔ shi aahu lɛ, wɔbaanyɛ wɔŋmɛ wɔtsui shi yɛ mli kɛji akɛ wɔfi shi shiŋŋ kɛtsɔ wɔhiɛnɔkamɔ lɛ nɔ. Kɛji akɛ haomɔ ahum kome ba shi, shi ekroko te shi lɛ, nyɛhaa wɔtswaa wɔfai shi akɛ, wɔbaawaje wɔhiɛnɔkamɔ lɛ ni wɔwo wɔhemɔkɛyeli lɛ mli hewalɛ.
19. Te wɔɔfee tɛŋŋ wɔha wɔhemɔkɛyeli lɛlɛ lɛ aya ehiɛ tɛ̃ɛ ni eyashɛ Nyɔŋmɔ jeŋ hee lɛ mli hejɔɔmɔhe lɛ?
19 Dani Paulo aaatsi “susuma sɛkɛ” lɛ tã lɛ, ekɛɛ akɛ: “Wɔmiitao akɛ nyɛteŋ mɔ fɛɛ mɔ atsɔɔ nɛkɛ mɔdɛŋbɔɔ nɛɛ nɔŋŋ, koni ama nɔhiɛkamɔ lɛ nɔ mi kɛyashi naagbee, koni nyɛkafee kpɔkee, shi moŋ nyɛkɔ mɛi ni tsɔɔ hemɔkɛyeli kɛ tsuishitoo nɔ náa shiwoi lɛ anane.” (Hebribii 6:11, 12) Akɛni suɔmɔ kɛha Yehowa kɛ e-Bi lɛ tsirɛɔ wɔ, ni mumɔ krɔŋkrɔŋ lɛ ewo wɔ hewalɛ hewɔ lɛ, nyɛhaa wɔhemɔkɛyeli lɛlɛ lɛ ayaa ehiɛ tɛ̃ɛ kɛyashi be mli ni wɔɔshɛ Nyɔŋmɔ shiwoo jeŋ hee lɛ hejɔɔmɔhe lɛ.
[Shishigbɛ niŋmaa]
a Mɛi ni fee ji Watchtower Bible and Tract Society of New York, Inc.
Kɛha Emlitii
◻ Mɛɛ kɔkɔbɔɔ Paulo kɛha wɔ yɛ wɔhemɔkɛyeli he?
◻ Mɛi komɛi eyasha shi yɛ mumɔŋ yɛ mɛɛ gbɛ nɔ, ni mɛi krokomɛi hu miiba amɛnitsumɔ lɛ shi yɛ mɛɛ gbɛ nɔ?
◻ Mɛɛ Nyɔŋmɔ gbeyeishemɔ su ehe hiaa ni wɔkɛfata wɔhemɔkɛyeli he?
◻ Mɛni baaye abua wɔ koni wɔyashɛ Nyɔŋmɔ shiwoo jeŋ hee lɛ hejɔɔmɔhe lɛ?
[Mfoniri ni yɔɔ baafa 16]
Esa akɛ wɔhemɔkɛyeli lɛlɛ lɛ afee nɔ ni akpɛ lɛ jogbaŋŋ koni enyɛ edamɔ shihilɛ mli ahumii lɛ anaa
[Mfoniri ni yɔɔ baafa 17]
Wɔhemɔkɛyeli baanyɛ asha shi
[Mfoniri ni yɔɔ baafa 18]
Hiɛnɔkamɔ ji sɛkɛ kɛha wɔshihilɛ akɛ Kristofoi