Mɛni Hewɔ Esa Akɛ Onyiɛ Jalɛ Sɛɛ?

Yɛ AWUIYELI je ni tsɔ Nu Afua lɛ hiɛ lɛ mli lɛ, gbɔmɔ kome ko bajie ehe kpo akɛ mɔ ni esoro lɛ. Nakai nuu lɛ ji Noa. Lɛ kɛ eweku lɛ kɛ Nyɔŋmɔ nyiɛ beni adesai ni eshwɛ lɛ ku amɛhiɛ amɛshwie E-nɔ. Nɔ ni jɛ mli ba ji, “Noa ji jalɔ” yɛ nakai yiwalɛ bei lɛ amli, ni ebatsɔ “jalɛ shiɛlɔ” eha je lɛŋ bii ni booo sane toi lɛ.​—1 Mose 6:9; 2 Petro 2:⁠5.

Be ko mli, aaafee wɔ Ŋmɛnɛŋmɛnɛ Beaŋ afi 56 mli lɛ, no mli lɛ awo bɔfo Paulo tsuŋ yɛ Kaisarea Beni atsɛ lɛ kɛjɛ etsuŋwoo he lɛ kɛtee Amralo Felike hiɛ lɛ, Paulo ŋɔ hegbɛ lɛ koni eshiɛ etsɔɔ nɛkɛ Roma nɔyeli lɛ mli onukpa nɛɛ. Mɛni ji ewiemɔ lɛ mli sane titri? “Ewieɔ jalɛ kɛ henɔyeli kɛ kojomɔ ni baaba lɛ he.” (Bɔfoi lɛ Asaji 24:​25, NW) Hɛɛ, Paulo hu ji jalɛ shiɛlɔ.

Bɔ ni nɛkɛ Nyɔŋmɔ tsuji anɔkwafoi enyɔ nɛɛ tsɔɔ akɛ amɛsusuɔ jalɛ he waa lɛ ji nɔ ko ni sa diɛŋtsɛ. Yehowa ji “Mawu jalɔ kɛ yiwalaherelɔ.” (Yesaia 45:21) No hewɔ lɛ, abɛbua ni jɛ mumɔŋ lɛ kɛɔ wɔ akɛ: “Gbɔmɔ fɔŋ gbɛ lɛ, Yehowa miihi; shi mɔ ni nyiɛɔ jalɛ sɛɛ lɛ, esumɔɔ lɛ.” (Abɛi 15:⁠9) Esa akɛ Nyɔŋmɔ tsuji fɛɛ anyiɛ jalɛ sɛɛ.

Shi nɔ ni miishɛɛ bɛ mli ji akɛ, mɛi pii efee shikpilikpii yɛ nɛkɛ su nɛɛ he ŋmɛnɛ. Amɛkɛɔ akɛ: ‘Miyeee minaanyo awui, no hewɔ lɛ miyɛ nɔmimaa akɛ misaa Nyɔŋmɔ hiɛ.’ Aloo amɛbaama nɔ mi akɛ: ‘Gbɛi pii yɛ ni atsɔɔ nɔ akɛshɛɔ jalɛ he. Bei abɔ ni miyeɔ mijamɔ anɔkwale nɛɛ, nɔ fɛɛ nɔ baaja.’ Ani osusuɔ akɛ ogbɔjɔ shihilɛ loo su ni tamɔ nɛkɛ saa Nyɔŋmɔ hiɛ?

Mɛi krokomɛi hu baatee sane kroko kwraa shi. Ekolɛ amɛle Paulo wiemɔ nɛɛ: “Atsɔ hemɔkɛyeli nɔ abu wɔ bem.” (Romabii 5:⁠1) Yɛ enɛ hewɔ lɛ, amɛbaasusu akɛ: ‘Mɛni hewɔ Kristofoi, ni abu amɛ jalɔi loo bem momo lɛ aya nɔ anyiɛ jalɛ sɛɛ?’ Te obaaha sanebimɔ ni tamɔ nɛkɛ hetoo oha tɛŋŋ?

Jalɛ Nyɔŋmɔ

Taakɛ wiemɔi komekomei ashishitsɔɔmɔ wolo lɛ tsɔɔ mli lɛ, jalɛ ji jeŋba ni ja, jalɛsaneyeli, ŋwɛi loo jeŋba mla kɛ gbeekpamɔ. Akɛni Yehowa ji jalɛ Nyɔŋmɔ hewɔ lɛ, esa akɛ mɔ fɛɛ mɔ ni sumɔɔ ni esa ehiɛ lɛ asusu su ni he hiaa nɛɛ he. Lalatsɛ lɛ kɛɛ, “Yehowa lɛ, jalɔ ji lɛ, ni esumɔɔ jalɛnifeemɔ; mɛi ni ja lɛ aaana ehiɛ.” (Lala 11:7; 5 Mose 32:⁠4) Bɔfo Petro kɛɛ: “Nuntsɔ lɛ [Yehowa] hiŋmɛii ka jalɔi ahe, ni eboɔ amɛfaikpamɔi atoi.”​—1 Petro 3:⁠12.

No hewɔ lɛ, wɔnyɛŋ wɔfee mɛi ni hiɛ edɔɔɔ yɛ nɛkɛ sane nɛɛ he, taakɛ Yudafoi lɛ ateŋ mɛi pii ji lɛ. Ŋwanejee ko bɛ he akɛ amɛteŋ mɛi pii ji gbɔmɛi ni sa ni amɛfeee amɛnanemɛi efɔŋ ko. Amɛyeɔ anɔkwa hu​—ekaalɔi po​—yɛ amɛjamɔ he. Shi yɛ klɛŋklɛŋ afii oha lɛ mli lɛ, no mli lɛ amɛteŋ mɛi ni fa ji mɛi ni ejaaa yɛ Nyɔŋmɔ hiɛ. Paulo kɛɛ: “Ejaakɛ miiye amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee yɛ nilee naa. Ejaakɛ ni amɛleee Nyɔŋmɔ jalɛ lɛ, shi amɛ diɛŋtsɛ amɛjalɛ moŋ amɛtaoɔ amɛŋɔma shi hewɔ lɛ, amɛbaaa amɛhe shi amɛhaaa Nyɔŋmɔ jalɛ lɛ.”​—Romabii 10: 2, 3.

Nɛgbɛ ji he ni Yudafoi lɛ tɔ̃ yɛ? Paulo kɛɛ amɛnyiɛɛɛ jalɛ sɛɛ yɛ anɔkwa nilee naa. Amɛ kɔkɔbɔɔ nɔkwɛmɔ nɔ nɛɛ kɛɔ wɔ akɛ efaaa kɛkɛ akɛ wɔɔfee gbɔmɛi kpakpai ni wɔyeee mɔ ko awui. Etsɔɔ hu akɛ jeee gbɛi pii yɔɔ ni atsɔɔ nɔ akɛyaa jalɛ he. Eka shi faŋŋ akɛ nɔ ko ejaaa yɛ gbɛ ni Yudafoi lɛ ateŋ mɛi pii hala yɛ bɔfoi lɛ agbii lɛ amli lɛ he. Wɔbaanyɛ wɔnyiɛ loo wɔdi jalɛ sɛɛ yɛ omanyeyeli mli kɛji akɛ wɔbo Nyɔŋmɔ toi. Abɛi awolo lɛ kɛɔ akɛ: “Mibi, kɛ omɔ miwiemɔi lɛ amli, ni okɛ mikitai lɛ to omasɛi [lɛ], no dani ooonu jalɛ kɛ kojomɔ kɛ nɔ ni ja, kɛ gbɛ kpakpa fɛɛ gbɛ kpakpa shishi.”​—Abɛi 2:​1, 9.

Jalɛ Gbɛ Lɛ

Akɛ jalɛ to Nyɔŋmɔ famɔi atoiboo ni ajaje yɛ Mose Mla lɛ mli lɛ he kɛjɛ Mose nɔ aahu kɛbashi Yesu nɔ. Akɛni Israelbii ni yeee emuu lɛ nyɛɛɛ aye nɛkɛ famɔi loo kitai nɛɛ anɔ ni amɛtɔ̃ɔ yɛ mli hewɔ lɛ, ehe bahia ni amɛsha afɔlei kɛ eshai ahe afɔlei ni Mla lɛ kɛha lɛ koni amɛkɛha amɛhe eshai lɛ anɔ. Mose kɛɛ Israelbii lɛ akɛ: “Ni no aaatsɔ wɔjalɛ yɛ Yehowa, wɔ-Nyɔŋmɔ lɛ hiɛ, kɛji wɔɔjwɛŋ nɔ ni wɔye nɛkɛ kitai nɛɛ fɛɛ nɔ, taakɛ bɔ ni efa wɔ lɛ.”​—5 Mose 6:⁠25.

Afii ohai abɔ ho ni mɔ ko mɔ ko nyɛɛɛ aye Mla lɛ nɔ yɛ emuuyeli mli. Ni kɛlɛ mɛi pii bɔ mɔdɛŋ ni amɛkɛ anɔkwayeli anyiɛ jalɛ sɛɛ kɛtsɔ no nɔ, ni Biblia lɛ wieɔ amɛteŋ mɛi komɛi ahe akɛ amɛja. Akɛ nɔkwɛmɔ nɔ lɛ, awie Yohane Baptisilɔ lɛ fɔlɔi ahe akɛ “jalɔi ji amɛ yɛ Nyɔŋmɔ hiɛ, ni amɛyeɔ Nuntsɔ lɛ [Yehowa] kitai kɛ ekpɔi lɛ fɛɛ nɔ, ni kpa ko bɛ amɛhe.”​—Luka 1:⁠6.

Shi kɛlɛ, Yesu gbele gbɛ hee ni aaatsɔ anɔ anyiɛ jalɛ sɛɛ. Eye Mose Mla lɛ nɔ yɛ emuuyeli mli​—gbɔmɔ kome pɛ ni nyɛ efee nakai. Yesu gbo yɛ sɛŋmɔtso nɔ, ni Yehowa kpɛlɛ ewala ni yeɔ emuu lɛ jara lɛ nɔ akɛ kpɔmɔ nɔ kɛha adesai fɛɛ. Kɛjɛ no nɔ kɛyaa lɛ, afɔlei ni ashaa yɛ Mla Kpaŋmɔ lɛ shishi lɛ bafee nɔ ni ehe ehiaaa dɔŋŋ. Yesu afɔleshaa ni yeɔ emuu lɛ ha adesai ni hiɛ jalɛ tsui lɛ fɛɛ ahe eshai anɔ.​—Hebribii 10:​4, 12.

Abu Anɔkwa Kristofoi Jalɔi

No hewɔ lɛ kɛjɛ Yesu gbele lɛ nɔ kɛbaa nɛɛ, akɛ jalɛ toɔ hemɔkɛyeli ni aaana yɛ nɛkɛ Nyɔŋmɔ Bi ni ji jalɔ nɛɛ mli lɛ he. (Yohane 3:16) Yɛ be mli ni shishijee Yudafoi ni hi shi yɛ Paulo bei lɛ amli lɛ anine shɛɛɛ jalɛ nɔ akɛni amɛkpoo anɔkwale nilee ni kɔɔ Yesu he lɛ hewɔ lɛ, wɔkaneɔ yɛ anɔkwa Kristofoi ahe akɛ: “Akɛ eduromɔ lɛ buɔ amɛ bem yaka kɛtsɔɔ kpɔmɔ ni yɔɔ Kristo Yesu mli lɛ nɔ.”​—Romabii 3:⁠24.

Yɛ wiemɔ nɛɛ mli lɛ, nɛkɛ wiemɔ nɛɛ kɔɔ Kristofoi ni afɔ amɛ mu lɛ, ni yɛ hemɔkɛyeli ni amɛyɔɔ yɛ Yesu afɔleshaa lɛ mli hewɔ lɛ, abu amɛ jalɔi koni amɛkɛ Kristo abatsɔmɔ nanemɛi niyelɔi yɛ ŋwɛi Maŋtsɛyeli lɛ mli lɛ ahe diɛŋtsɛ. Shi ŋmɛnɛ, taakɛ bɔfo Yohane na lɛ, Kristofoi asafo babaoo ko ni yɔɔ shikpɔŋ nɛɛ nɔ shihilɛ he hiɛnɔkamɔ hu eba shihilɛ mli. Mɛnɛɛmɛi hu tsɔɔ hemɔkɛyeli yɛ kpɔmɔ nɔ lɛ mli. ‘Amɛfɔɔ amɛ atadei lɛ ahe ni amɛhaa eyɛɔ futaa yɛ Toobi lɛ la lɛ mli,’ ni yɛ enɛ hewɔ lɛ, abuɔ amɛ jalɔi akɛ Nyɔŋmɔ shieŋtsɛmɛi koni amɛje amanehulu kpeteŋkpele lɛ mli.​—Kpojiemɔ 7:​9, 14; okɛto Yakobo 2:​21-26 he.

Yaa Nɔ Onyiɛ Jalɛ Sɛɛ

Shi kadimɔ akɛ, jalɛ sɛɛnyiɛmɔ lɛ baaa naagbee kɛ wɔhe Yesu nɔ wɔye. Beni Paulo ŋma wiemɔi nɛɛ eyaha Timoteo lɛ, no mli lɛ eji mɔ ni ejɔɔ ehe nɔ, Kristofonyo ni afɔ lɛ mu afii babaoo: “Onyiɛ jalɛ, Nyɔŋmɔ jamɔ, hemɔkɛyeli, suɔmɔ, tsuishitoo kɛ mlijɔlɛ sɛɛ. Wuu hemɔkɛyeli he ta kpakpa lɛ.” (1 Timoteo 6:​11, 12; 2 Timoteo 2:22) Mɛni hewɔ esa akɛ Timoteo ‘anyiɛ jalɛ sɛɛ’ kɛji akɛ Nyɔŋmɔ ebu lɛ jalɔ momo?

Ejaakɛ akɛ wiemɔ “jalɛ” lɛ hu tsuɔ nii yɛ Biblia lɛ mli yɛ gbɛ ni lɛɛ nɔ akɛtoɔ mɔ ni hiɔ shi yɛ hetsemɔ, kɛ jeŋba kpakpa mli, ni ebɔɔ mɔdɛŋ koni ebo Nyɔŋmɔ kitai atoi lɛ he. Shishinumɔ nɛɛ mli akɛbu Yohane Baptisilɔ lɛ fɔlɔi lɛ akɛ jalɔi yɛ lɛ. (Luka 1:⁠6) Tsɛ ni ŋɔ Yesu efee ebi, Yosef, kɛ Yosef ni jɛ Arimatea lɛ hu ji jalɔi yɛ nɛkɛ gbɛ nɔ. (Mateo 1:​19; Luka 23:50) Anɔkwale ni eji akɛ abu Kristofoi jalɔi lɛ ejieee gbɛnaa nii ni ka amɛnɔ akɛ amɛdi jalɛ sɛɛ lɛ kɛyaaa yɛ nɛkɛ shishinumɔ nɛɛ mli. Yɛ anɔkwale mli lɛ, Kristofonyo fɛɛ Kristofonyo ni ehiii shi akɛ mɔ ni he tse, mɔ ni baa ejeŋ jogbaŋŋ loo ebooo Nyɔŋmɔ kitai atoi dɔŋŋ lɛ baalaaje jalɛ shidaamɔ ni eyɔɔ yɛ Yehowa hiɛ lɛ.

Jalɛ Sɛɛnyiɛmɔ​—Eji Kaa

Jalɛ sɛɛnyiɛmɔ ji kaa. Mɛni hewɔ? Ejaakɛ wɔteŋ mɔ fɛɛ mɔ yeee emuu, ni su akɛ wɔfee nii ni ejaaa lɛ mli wa yɛ wɔmli. (1 Mose 8:​21; Romabii 7:​21-23) Agbɛnɛ, je ni woɔ susumɔi kɛ nifeemɔi ni ejaaa he hewalɛ ni agbɛnɛ eyɔɔ Satan Abonsam “mɔ fɔŋ” lɛ kudɔmɔ shishi mli wɔyɔɔ lɛ. (1 Yohane 5:​19; 2 Korintobii 4:⁠4) Belɛ ŋwanejee ko bɛ he akɛ no hewɔ ni beni eŋma wolo eyaha Timoteo lɛ, Paulo kɛ jalɛ sɛɛdii to ‘hemɔkɛyeli he ta kpakpa ni aaawuu’ lɛ he lɛ!​—1 Timoteo 6:​11, 12.

Ani wɔbaanyɛ wɔye omanye yɛ nɛkɛ “ta kpakpa” nɛɛ mli? Hɛɛ, shi ja wɔna tsuiŋ suɔmɔ wɔha tɛi ni Yehowa efolɔ eshwie shi loo etaomɔ nii lɛ kɛ nyɛɛ kɛha efɔŋ. Biblia lɛ wie Yesu he akɛ: “Osumɔɔ jalɛ ni onyɛɔ efɔŋfeemɔ.” (Hebribii 1:⁠9) Esa akɛ wɔna su ni tamɔ nakai nɔŋŋ: suɔmɔ ni mli wa akɛ wɔɔfee nɔ ni sa Nyɔŋmɔ hiɛ, ni wɔna hetsɛ wɔha nɔ fɛɛ nɔ ni esaaa ehiɛ.

Yɛ nakai beaŋ nɔŋŋ lɛ esa akɛ wɔkai akɛ jalɛ sɛɛnyiɛmɔ jeee akaŋshii. Kɛ wɔsusu wɔhe loo wɔbu wɔhe akɛ wɔhi fe mɛi krokomɛi, aloo wɔpupuu wɔhe yɛ wɔ diɛŋtsɛ wɔjalɛ he lɛ, belɛ wɔtamɔ Farisifoi Yudafoi lɛ. (Mateo 6:​1-4) Mɛi ni nyiɛ jalɛ sɛɛ yɛ omanyeyeli mli lɛ buɔ amɛ diɛŋtsɛ amɛhe akɛ mɛi ni baa shi diɛŋtsɛ, ‘amɛsusuɔ akɛ mɛi krokomɛi anɔ kwɔlɔ fe amɛ.’​—Filipibii 2:⁠3.

Paulo ma bɔ ni Biblia lɛ kasemɔ he hiaa yɛ jalɛ sɛɛnyiɛmɔ mli lɛ nɔ mi, beni eŋma akɛ: “Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ, ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ.” (2 Timoteo 3:16) Kɛ wɔkase Biblia lɛ ni wɔtee Kristofoi akpeei he ni asusuɔ Biblia lɛ he yɛ lɛ, abaatsɔse wɔ yɛ jalɛ mli. Biblia lɛ baanyɛ asaa wɔ ni wɔwo ‘gbɔmɔ hee lɛ ni abɔɔ yɛ anɔkwa jalɛ kɛ anɔkwayeli mli lɛ.’​—Efesobii 4:⁠24.

Kɛ jalɛ bafee wɔsu kɛ baŋ fa lɛ, wɔbaanyɛ mlakwamɔ diɛŋtsɛ. Nɔ ko ekaŋ wɔ koni wɔtao nanemɛi gbohii ni yɔɔ je nɛŋ lɛ. (1 Korintobii 15:33) Nɔ ko nɔ ko naŋ wɔnɔ hewalɛ koni wɔsumɔ nibii ni yɔɔ je nɛŋ lɛ aloo ni wɔhi shi tamɔ bɔ ni je ni diɔ heloo naa nibii asɛɛ nɛɛ hiɔ shi lɛ. (Abɛi 16:8; 1 Timoteo 6:​9, 10; 1 Yohane 2:​15-17) Eka shi faŋŋ akɛ, jeŋba gbonyo kɛ awuiyeli hiɛtserɛjiemɔ ni egbɛ eshwa ŋmɛnɛ yɛ he fɛɛ he lɛ efeŋ wɔ fɛo.​—Efesobii 5:​3, 4.

Jalɛ Mli Jɔɔmɔi

Hɛɛ, jalɛ sɛɛnyiɛmɔ yɛ Yehowa gbɛ nɔ lɛ ji kaa, shi mple ni ashiɔ yɛ he lɛ sa. Mɛni hewɔ? Ejaakɛ ehaa wɔnaa wɔkɛ Yehowa diɛŋtsɛ teŋ wekukpaa mli ŋɔɔmɔ. Mɛɛ hegbɛ ni yɔɔ naakpɛɛ po nɛ! Biblia lɛ kɛɔ wɔ akɛ: “[Yehowa] ejɔɔ jalɔi ashihilɛ he lɛ.” “Yehowa kɛ mɛi fɔji ateŋ jɛkɛ; shi eboɔ jalɔi afaikpamɔ toi.” (Abɛi 3:​33; 15:29) Kɛfata he lɛ, wɔbanaa Yehowa yiŋtoi ahe shishinumɔ babaoo. “Jalɔi atempɔŋ lɛ tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ.”​—Abɛi 4:⁠18.

Biblia lɛ woɔ hebuu shi ehaa mɛi ni taoɔ jalɛ yɛ be mli ni nibii agbɛjianɔtoo ni ejaaa nɛɛ baa enaagbee lɛ. “Nyɛtaoa Yehowa sɛɛ gbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtao jalɛ sɛɛ gbɛ, nyɛtaoa heshibaa sɛɛ gbɛ: ekolɛ aaaŋɔ nyɛ atee yɛ Yehowa mlifu gbi lɛ nɔ!” (Zefania 2:⁠3) Yɛ no sɛɛ lɛ, Biblia lɛ kɛ gbɛkpamɔ ni yɔɔ naakpɛɛ diɛŋtsɛ haa mɛi ni yɔɔ shikpɔŋ nɔ shihilɛ he hiɛnɔkamɔ lɛ: “Jalɔi lɛ shikpɔŋ lɛ aaatsɔ amɛnɔ ni amɛaahi nɔ daa.”​—Lala 37:⁠29.

Mɛɛ yiŋtoi ni yɔɔ naakpɛɛ ahewɔ ni esa akɛ wɔnyiɛ jalɛ sɛɛ nɛ! Taakɛ Nyɔŋmɔ diɛŋtsɛ kɛɔ lɛ: “Mɔ ni nyiɛɔ jalɛ kɛ mɔbɔnalɛ sɛɛ lɛ, enaa wala, jalɛ, kɛ hiɛnyam.”​—Abɛi 21:⁠21.