Nyɛfea Toiboo Nyɛhaa Mɛi ni Nyiɛɔ Hiɛ Lɛ
“Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa.”—HEBRIBII 13:17.
1. Nɔkwɛlɔi ni ji Kristofoi lɛ anitsumɔ he baa sɛɛnamɔ kɛhaa wɔ yɛ mɛɛ gbɛ nɔ?
YEHOWA kɛ nɔkwɛlɔi eha egbɛjianɔtoo lɛ yɛ “naagbee be” nɛɛ mli. (Daniel 12:4) Amɛnyiɛɔ hiɛ yɛ mɛi ni tamɔ gwantɛŋi lɛ akwɛmɔ mli, ni amɛ nɔkwɛmɔ lɛ haa mɔ he jɔɔ lɛ. (Yesaia 32:1, 2) Kɛfata he lɛ, onukpai lɛ ni kɛ Nyɔŋmɔ asafo kuu lɛ yeɔ yɛ mlijɔlɛ naa lɛ asuɔmɔ nɔkwɛmɔ feɔ tamɔ hebuu nɔ kɛjɛɔ Satan kɛ eyiwalɛ nibii agbɛjianɔtoo Iɛ he.—Bɔfoi lɛ Asaji 20:28-30; 1 Petro 5:8; 1 Yohane 5:19.
2. Te mɛi komɛi susu bɔfo Paulo he amɛha tɛŋŋ, shi mɛɛ su ni wɔɔna yɛ onukpai lɛ ahe lɛ ji nɔ ni sa jogbaŋŋ?
2 Shi te obuɔ loo osusuɔ onukpai lɛ ahe ohaa tɛŋŋ? Ani okɛɔ yɛ otsuiŋ akɛ: ‘Miyaŋ onukpa ko ni yɔɔ esafo nɛɛ mli lɛ ŋɔɔ kɔkɔɔkɔ kɛji akɛ miyɛ naagba, ejaakɛ mibɛ hekɛnɔfɔɔ yɛ amɛteŋ mɔ ko mɔ ko mli’? Kɛji nakai ji bɔ ni onuɔ he lɛ, ani benɛ oomɛ emuu ni amɛyeee lɛ nɔ mi kɛmiiteke nɔ? Mɛi komɛi wie bɔfo Paulo he yɛ blema Korinto akɛ: “(E) woji lɛ amli saji tsii ni amɛmli wa moŋ; shi kɛ lɛ gbɔmɔ Iɛ diɛŋtsɛ eyɛ biɛ lɛ, no lɛ ehe waaa ni ewiemɔ lɛ he bɛ akɔnɔ ko.” Ní kɛlɛ, Nyɔŋmɔ kɛ sɔɔmɔ wo Paulo dɛŋ ni ekɛ lɛ tsu nii akɛ “bɔfo kɛha jeŋmaji lɛ.” (2 Korintobii 10:10; Romabii 11:13; 1 Timoteo 1:12) Hiɛnɔkamɔ ji akɛ, belɛ obaanu he babaoo tamɔ bɔ ni nyɛmi yoo ko ni kɛɛ nɛkɛ lɛ fee lɛ: “Wɔyɛ onukpai ni hi fe fɛɛ yɛ je lɛŋ. Kɛ yelikɛbuamɔ ko he miihia lɛ, onaa amɛ yɛ biɛ amrɔ nɔŋŋ.”
Mɛni Hewɔ Esa Akɛ Wɔbo Amɛ Toi?
3. Kɛji akɛ Nuŋtsɔ lɛ kɛ mumɔ ni wɔjieɔ lɛ kpo baahi shi lɛ, belɛ te esa akɛ wɔbu tookwɛlɔi bihii ni ji Kristofoi lɛ tɛŋŋ?
3 Akɛni Tookwɛlɔ Kpeteŋkpele, Yehowa Nyɔŋmɔ, kɛ Kristofoi ni ji tookwɛlɔi eha hewɔ lɛ, te osusuɔ akɛ esumɔɔ ni wɔbu amɛ wɔha tɛŋŋ? Yɛ anɔkwale mli lɛ, Nyɔŋmɔ miikpa wɔ gbɛ koni wɔnyiɛ gbɛtsɔɔmɔ ni damɔ Biblia nɔ ni nine shɛɔ nɔ kɛjɛɔ nɔkwɛlɔi ni yɔɔ suɔmɔ ni yɔɔ Yehowa Odasefoi a-Nɔyeli Kuu lɛ nɔkwɛmɔ shishilɛ dɛŋ lɛ sɛɛ. Kɛkɛ lɛ ‘Nuŋtsɔ lɛ kɛ mumɔ ni wɔjieɔ lɛ kpo lɛ baahi shi,’ ni wɔbaana toiŋjɔlɛ mli ŋɔɔmɔ, abaatswa wɔ ama shi yɛ mumɔŋ.—2 Timoteo 4:22; okɛto Bɔfoi lɛ Asaji 9:31;15:23-32 he.
4. Te wɔɔfee tɛŋŋ ni wɔ diɛŋtsɛ lɛ wɔkɛ Hebribii 13:7 atsu nii?
4 Paulo wo hewalɛ akɛ: “Nyɛkaia nyɛtsɔɔlɔi, mɛi ni wie Nyɔŋmɔ wiemɔ lɛ tsɔɔ nyɛ lɛ; nyɛkwɛa amɛjeŋba lɛ naagbee, ni nyɛkasea amɛ hemɔkɛyeli lɛ.” (Hebribii 13:7) Yɛ mra be mli Kristofoi lɛ ateŋ lɛ, bɔfoi lɛ titri ji mɛi ni nyiɛ hiɛ. Ŋmɛnɛ, wɔbaanyɛ wɔna mɛi ni feɔ Yehowa Odasefoi a-Nɔyeli Kuu lɛ, nɔkwɛlɔi krokomɛi ni afɔ amɛ mu lɛ, aloo “asafo babaoo” lɛ mlibii lɛ ni nyiɛɔ hiɛ yɛ wɔteŋ lɛ. (Kpojiemɔ 7:9) Eyɛ mli akɛ awooo wɔ hewalɛ ni wɔkase bɔ ni amɛgbee yɔɔ, bɔ ni amɛdamɔɔ shi amɛhaa, aloo amɛsui krokomɛi tamɔ adesai moŋ, shi esa akɛ wɔha wɔ jeŋba atamɔ amɛnɔ lɛ kɛtsɔ amɛ hemɔkɛyeli kasemɔ nɔ.
5. Namɛi akɛ gbɛnaa nii titri kɛha Kristofoi asafo lɛ nɔkwɛmɔ ewo amɛdɛŋ yɛ shikpɔŋ nɔ ŋmɛnɛ, ni mɛni ji nɔ ni sa amɛ?
5 Gbɛnaa nii titri kɛha wɔ mumɔŋ hiamɔ nii anɔkwɛmɔ yɛ shikpɔŋ nɔ lɛ ji nɔ ko ni akɛwo “tsulɔ anɔkwafo kɛ nilelɔ” lɛ dɛŋ. Nɔ ni damɔ enajiaŋ ni ji Nɔyeli Kuu lɛ nyiɛɔ hiɛ ni ekudɔɔ jeŋ muu fɛɛ Maŋtsɛyeli shiɛmɔ nitsumɔ lɛ. (Mateo 24:14, 45-47) Abaanyɛ asusu nɛkɛ onukpai ni akɛ mumɔ efɔ amɛ mu nɛɛ ahe akɛ mumɔŋ nɔyelɔi, ejaakɛ abaanyɛ atsɔɔ Hebribii 13:7 shishi akɛ: “Nyɛhaa nyɛhiɛ ahia mɛi ni yeɔ nyɛnɔ . . . lɛ anɔ.”(Kingdom Interlinear) Akɛni wɔyɔɔ asafoi fe 57,000 kɛ Maŋtsɛyeli jajelɔi fe 3,500,000 hewɔ lɛ, onukpai 12 ni feɔ Nɔyeli Kuu lɛ yɛ ‘babaoo feemɔ yɛ Nuŋtsɔ lɛ nitsumɔ lɛ mli.’ (1 Korintobii 15:58) Yɛ nitsumɔ ni Nyɔŋmɔ kɛwo amɛdɛŋ lɛ hewɔ lɛ, esa akɛ wɔkɛ amɛ afee ekome nɔ fɛɛ nɔ mli, taakɛ bɔ ni mra be mli Kristofoi lɛ kɛ klɛŋklɛŋ afii oha lɛ mli nɔyeli kuu lɛ fee ekome lɛ.—Bɔfoi lɛ Asaji 15:1, 2.
6. Mɛni ji nibii komɛi ni onukpai lɛ feɔ koni ehe aba sɛɛnamɔ aha Yehowa webii?
6 Akɛ mumɔ ehala nɔkwɛlɔi lɛ koni amɛkwɛ asafo lɛ mumɔŋ hiamɔ nii anɔ. (Bɔfoi lɛ Asaji 20:28) Amɛkwɛɔ koni ashiɛ Maŋtsɛyeli lɛ he sane lɛ yɛ asafo lɛ shikpɔŋkuku lɛ mli. Nɛkɛ hii ni he esa yɛ Ŋmalɛ naa nɛɛ hu kɛ mumɔŋ gbɛtsɔɔmɔ haa yɛ suɔmɔ mli. Amɛwoɔ ŋaa, amɛshɛjeɔ mɔ mii, mi amɛyeɔ amɛmumɔŋ nyɛmimɛi hii kɛ yei lɛ odase, bɔni afee ni mɛnɛɛmɛi aya nɔ anyiɛ gbɛ ni sa Nyɔŋmɔ hiɛ nɔ. (1 Tesalonikabii 2:7,8,11,12) Kɛji akɛ mɔ ko tsɔ gbɛ ni ejaaa nɔ po dani eyoo enɛ lɛ, nɛkɛ hii nɛɛ bɔɔ mɔdɛŋ koni amɛjaje lɛ “yɛ mlijɔlɛ mli.”—Galatabii 6:1.
7. Mɛɛ ŋaawoo Paulo kɛha yɛ Hebribii 13:17?
7 Wɔtsuii tsirɛɔ wɔ koni wɔkɛ nɔkwɛlɔi ni yɔɔ suɔmɔ nɛɛ afee ekome. Enɛ sa jogbaŋŋ taakɛ Paulo ŋma lɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa; koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.” (Hebribii 13:17) Te wɔɔfee tɛŋŋ wɔnu nɛkɛ ŋaawoo nɛɛ shishi hu?
8, 9. (a) Yɛ Hebribii 13:17 hewɔ lɛ, mɛni hewɔ esa akɛ wɔfee toiboo ni wɔba wɔhe shi wɔha mɛi ni nyiɛɔ hiɛ lɛ? (b) Wɔ toiboo kɛ heshibaa baanyɛ asa mɛi ahe yɛ gbɛ kpakpa nɔ yɛ mɛɛ gbɛ nɔ?
8 Paulo woɔ wɔ hewalɛ ni wɔfee toiboo wɔha mɛi ni yeɔ wɔnɔ yɛ mumɔŋ lɛ. Esa akɛ “wɔba wɔhe shi,” wɔŋmɛɛ wɔhe wɔha nɛkɛ tookwɛlɔi bibii nɛɛ. Mɛni hewɔ? Ejaakɛ ‘amɛ amɛbuɔ wɔsusumai lɛ ahe,’ aloo wɔwala ni wɔjɔɔ nɔ wɔha Nyɔŋmɔ lɛ he. Mɛɛ gbɛ nɔ amɛtsɔɔ ‘amɛbuɔ he’? Hela feemɔ-wiemɔ ni akɛtsu nii yɛ biɛ ni ji a·gru·pneʹo lɛ shishi diɛŋtsɛ tsɔɔ akɛ onukpai lɛ “wɔɔɔ.” Enɛ kaiɔ wɔ tookwɛlɔ ni yɔɔ he ko banee ni laajeɔ lɛ ewɔ bɔni afee ni ekɛbu etooi lɛ ahe kɛjɛ osharai ni baanyɛ aba gbɛkɛ lɛ he lɛ. Eshɛɔ be ni onukpai lɛ wɔɔɔ gbɛkɛ shi moŋ amɛsɔleɔ yɛ Nyɔŋmɔ asafo kuu lɛ he aloo yɛ mumɔŋ yelikɛbuamɔ ni amɛkɛhaa amɛnanemɛi heyelilɔi lɛ ahe. Kwɛ bɔ ni esa akɛ wɔhiɛ asɔ amɛsɔɔmɔ ni amɛkɛ anɔkwayeli tsuɔ nɛɛ he jogbaŋŋ hã! Yɛ anɔkwale mli lɛ, wɔsumɔɔɔ ni wɔtamɔ “nɔshafeelɔi” ni hi shi yɛ Yuda gbii lɛ amli ni ‘buleɔ heloo ni amɛgbɛɔ nɔyeli he guɔ ni amɛwieɔ gbɔmɛi agboi ni ji Kristofoi onukpai ni afɔ amɛ mu ni anunyam loo woo ni Nyɔŋmɔ kɛha amɛ lɛ yɔɔ amɛnɔ lɛ ‘ahe wiemɔi fɔji lɛ.’—Yuda 3, 4, 8.
9 Ebafeŋ nɔ ni baasa Yehowa hiɛ kɛji akɛ wɔbooo Kristofoi nɔkwɛlɔi nɛɛ atoi ni wɔbaaa wɔhe shi wɔhaaa amɛ. Enɛ hu baanyɛ atsɔ tamɔ jatsu ko aha amɛ ni ebaaye wɔ awui yɛ mumɔŋ. Kɛji akɛ wɔkɛ amɛ efeee ekome lɛ, onukpai lɛ kɛ ŋtsɔidɔɔmɔ baatsu amɛnitsumɔi lɛ ahe nii, ekolɛ yɛ nijiaŋwujee yɛ mumɔ mli, ni nɔ ni baajɛ enɛ mli aba mli ji miishɛɛ ni baŋ wɔ Kristofoi anitsumɔi amli. Shi wɔ toiboo kɛ heshibaa lɛ kɛ jeŋba ni Nyɔŋmɔ gbeyeishemɔ yɔɔ mli baa ni ewoɔ wɔ hemɔkɛyeli hewalɛ. ‘Nuŋtsɔ lɛ kɛ mumɔ ni wɔjieɔ lɛ po lɛ hiɔ shi,’ ni miishɛɛ loo nyamɔ shwereɔ yɛ gbeekpamɔ, toiŋjɔlɛ kɛ ekomefeemɔ ni tamɔ nɛkɛ mli.—2 Timoteo 4:22; Lala 133:1
10. Taakɛ 1 Timoteo 5:17 tsɔɔ lɛ, mɛni hewɔ ni mɛi ni yeɔ nɔ jogbaŋŋ lɛ sa woo lɛ?
10 Ni wɔɔfee toiboo kɛ heshibaa wɔha asafo lɛ mli onukpai lɛ etsɔɔɔ akɛ wɔji mɛi ni saa gbɔmɛi ahiɛ. Enɛ kɛ ŋmalɛ kpaŋ gbee, ejaakɛ akɛɛ klɛŋklɛŋ afii oha lɛ mli tsuji ni ji Kristofoi lɛ akɛ amɛfee toiboo amɛha amɛnuŋtsɔmɛi, “jeee kɛ hiɛaŋ sɔɔmɔ, tamɔ mɛi ni taoɔ gbɔmɛi ahiɛ nyam, shi moŋ yɛ tsui krɔŋŋ mli akɛ mɛi ni sheɔ Nyɔŋmɔ gbeyei.” (Kolosebii 3:22; Efesobii 6:5, 6) Nɔkwɛlɔi ‘ni yeɔ nɔ jogbaŋŋ ni tsuɔ nii waa yɛ wiemɔ-kɛ-tsɔɔmɔ mli’ lɛ sa woo titri lɛ akɛni amɛtsɔɔmɔ lɛ damɔ Nyɔŋmɔ Wiemɔ lɛ nɔ hewɔ. Taakɛ Paulo ŋma lɛ: “Onukpai ni yeɔ nɔ jogbaŋŋ lɛ, esa akɛ aŋɔ woo toi enyɔ awo amɛ, titri lɛ mɛi ni bɔɔ wiemɔ-kɛ-tsɔɔmɔ he mɔdɛŋ, Ejaakɛ ŋmalɛ lɛ kɛɔ akɛ: ‘Kaawo tsina ni gbɛlɛɔ abele naabu kotoku’; kɛ: ‘nitsulɔ lɛ enyɔmɔwoo sa lɛ.’”—1 Timoteo 5:17, 18.
11. Te aaafee tɛŋŋ ni onukpa ko aaana “woo toi enyɔ” lɛ, shi mɛni esa akɛ ekwa?
11 Paulo wiemɔi ni wɔtsɔ hiɛ wɔtsɛ yisɛɛ bianɛ lɛ tsɔɔ akɛ abaanyɛ ni akɛ heloo naa yelikɛbuamɔ aha mɛi ni kwɛɔ mɛi krokomɛi amumɔŋ hiamɔ nii anɔ lɛ yɛ gbɛ ni sa nɔ. Shi, enɛ etsɔɔɔ akɛ esa akɛ onukpai lɛ anine ashɛ daa nyɔŋ nɔ nyɔmɔ woo ko nɔ, ni “woo toi enyɔ lɛ” lɛ jeee nɔ ko ni onukpa nyɛɔ mɔ nɔ ebiɔ. Ebaanyɛ ejɛ asafo lɛ mlibii lɛ adɛŋ aba trukaa, akɛ nɔ ko ni jɛ amɛsuɔmɔ mli, shi esaaa akɛ ekɛ nitsumɔ ni akɛwo adɛŋ lɛ tsuɔ nii koni ekɛna hewalɛ loo heloo gbɛfaŋ nibii ni ebaana hewɔ koni ekɛku ehiɛ eshwie mɛi krokomɛi anɔ. (Abɛi 25:27; 29:23; Yuda 16) Shi moŋ esa akɛ nɔkwɛlɔ lɛ akwɛ Nyɔŋmɔ asafo kuu lɛ nɔ, ‘yɛ suɔmɔ naa, shi jeee sɛɛnamɔ ni yɔɔ hiɛgbele lɛ hewɔ, shi moŋ yɛ tsuijurɔ naa.’—1 Petro 5:2.
12. Mɛni kɛ wɔha ehi wɔjwɛŋmɔ mli lɛ eeeye ebua wɔ ni wɔfee toiboo wɔha mɛi ni nyiɛɔ hiɛ yɛ wɔteŋ lɛ?
12 Kɛji akɛ wɔkai akɛ Nyɔŋmɔ diɛŋtsɛ ji mɔ ni kɛ nɛkɛ onukpai nɛɛ ha lɛ, enɛ baaye abua wɔ ni wɔbo amɛ toi ni wɔkɛ woo aha mɛi ni nyiɛɔ hiɛ nɛɛ. (Efesobii 4:7-13) Akɛni nɛkɛ hii nɛɛ ji mɛi ni akɛ mumɔ ehala amɛ ni Nyɔŋmɔ gbɛjianɔtoo lɛ yɛ gbɛhe ko ni he hiaa mli yɛ Yehowa Odasefoi ashihilɛ mli hewɔ lɛ, eji anɔkwale akɛ wɔmiisumɔ ni wɔjie shidaa kɛ bulɛ kpo wɔtsɔɔ teokrase gbɛjianɔtoo lɛ. Agbɛnɛ, wɔbaanyɛ wɔye wɔbua mɛi heei ni amɛna su ni tamɔ nɛkɛ kɛji akɛ wɔto toiboo kɛ heshibaa kɛha nɛkɛ kɛji akɛ wɔto toiboo kɛ heshibaa kɛha mɛi ni nyiɛɔ hiɛ yɛ wɔteŋ lɛ he okadi kpakpa wɔfɔ shi lɛ.
Meni Hewɔ Esa Akɛ Ohiɛ Asɔ Amɛsɔɔmɔ Lɛ
13. (a) Mɛɛ hiɛnyiɛmɔ ni kɛ ehe kpaaa gbee yɔɔ je lɛ mli kɛ agbɛnɛ yɛ Nyɔŋmɔ gbɛjianɔtoo lɛ mli? (b) Mɛɛ yiŋtoo kpakpa wɔyɔɔ ni haa wɔnaa hekɛnɔfɔɔ yɛ gbɔmɛi ni nyiɛɔ hiɛ yɛ wɔteŋ lɛ amli? (d) Ni wɔɔha emuu ni onukpai ni tsuɔ nii waa lɛ yeee lɛ aje kpo moŋ lɛ, mɛni esa akɛ wɔfee?
13 Su ni yɔɔ je lɛ mli ji akpoo hiɛnyiɛmɔ. Taakɛ tsɔɔlɔnukpa ko kɛɛ lɛ: “Woloŋlee ni etee hiɛ lɛ eha mɛi ele nii aahu akɛ sɛɛnyiɛlɔi ni tamɔ etee hiɛ lɛ eha mɛi ele nii aahu akɛ sɛɛnyiɛlɔi nɛkɛ lɛ ebatsɔmɔ mɛi ni wieɔ shiɔ nii aahu akɛ anyɛɛɛ anyiɛ amɛhiɛ dɔŋŋ.” Shi heyeli susumɔ loo jwɛŋmɔ ko bɛ Nyɔŋmɔ asafo lɛ mli,‘ ni wɔyɛ nɔ ni wɔɔdamɔ nɔ wɔna hekɛnɔfɔɔ yɛ hii ni nyiɛɔ hiɛ yɛ wɔteŋ lɛ amli. Akɛ nɔkwɛmɔ nɔ lɛ, mɛi ni anaa Ŋmalɛ naa nii yɛ amɛhe lɛ pɛ ahalaa amɛ akɛ onukpai. (1 Timoteo 3:1-7) Atsɔse amɛ koni amɛfee mɛi ni mli hi, mɛi ni yɔɔ suɔmɔ, mɛi sumɔɔ ni amɛye amɛbua, ni kɛlɛ amɛyɛ shiŋŋ yɛ Nyɔŋmɔ jalɛ tɛi ni efolɔ eshwie shi lɛ asɛɛdii mli. Onukpai lɛ kɛ amɛhe kpɛtɛɔ Ŋmalɛ naa anɔkwale he, ‘amɛkɛ amɛhe kpɛtɛɔ anɔkwa wiemɔ lɛ he shiŋŋ, bɔni afee ni amɛnyɛ ni amɛkɛ tsamɔ tsɔɔmɔ lɛ awie atsɔɔ mɛi.’ (Tito 1:5-9) Shi, esaaa akɛ wɔwoɔ emuu ni amɛyeee akɛ adesai lɛ anɔ gojoo, ejaakɛ wɔ fɛɛ wɔyeee emuu. (1 Maŋtsɛmɛi 8:46; Romabii 5:12) Ni wɔɔnu he akɛ wɔnijiaŋ eje wui yɛ amɛfatɔɔi ahewɔ ni wɔbo ŋaawoo ni amɛkɛhaa wɔ lɛ akɛ flɛflɛ lɛ, nyɛhaa wɔhiɛ asɔa ni wɔkpɛlɛa gbɛtsɔɔmɔ ni damɔ Biblia nɔ ni onukpai lɛ kɛhaa lɛ nɔ akɛ nɔ ko ni jɛ Nyɔŋmɔ ŋɔɔ.
14. Yɛ 1 Timoteo 1:12 hewɔ lɛ, te esa akɛ onukpa ko abu sɔɔmɔ ni akɛwo edɛŋ lɛ tɛŋŋ?
14 Paulo, nuu ko ni hiɛ sɔɔ nii lɛ kɛɛ: “Miida wɔ nuŋtsɔ Kristo Yesu ni wo mi hewalɛ lɛ shi, akɛ ebu mi anɔkwafo ni eŋɔ mi ewo sɔɔmɔ lɛ mli.” (1 Timoteo 1:12) Nɔ ni fata nakai sɔɔmɔ lɛ he ji shiɛmɔ nitsumɔ lɛ kɛ nanemɛi heyelilɔi lɛ asɔɔmɔ. Eyɛ mli akɛ nɔkwɛlɔ lɛ yɛ nitsumɔ ko ni jɛ mumɔ krɔŋkrɔŋ lɛ dɛŋ akɛ esɔmɔ akɛ tookwɛlɔ moŋ, shi esaaa akɛ enɛ haa enuɔ he akɛ enɔ kwɔ fe mɛi krokomɛi, ejaakɛ lɛ diɛŋtsɛ lɛ eji Nyɔŋmɔ esafo kuu ni tamɔ gwantɛŋi lɛ fa.(1 Petro 5:4) Shi moŋ, esa akɛ eda shi akɛ asafo lɛ Yitso, Yesu Kristo, ebu lɛ mɔ ni sa akɛ esɔmɔɔ asafo kuu lɛ mlibii lɛ, ni akɛ Nyɔŋmɔ ha ehe sa kɛtsɔ nilee, jwɛŋmɔ kɛ sane shishinumɔ ni ekɛha lɛ nɔ. (2 Korintobii 3:5) Akɛni onukpa lɛ yɛ mɔ ni eeedamɔ nɔ eda shi yɛ nɛkɛ hegbɛi ni Nyɔŋmɔ kɛha lɛ nɛɛ hewɔ lɛ, esa akɛ asafo lɛ mlibii krokomɛi lɛ ahiɛ asɔ nɛkɛ sɔɔmɔ nɛɛ.
15. Mɛni ji sane titri ni yɔɔ Paulo ŋaawoo ni yɔɔ 1 Tesalonikabii 5:12, 13 lɛ mli?
15 Yehowa Odasefoi daa shi yɛ gbɛjianɔtoo ni Nyɔŋmɔ eto ema shi yɛ nɛkɛ naagbee gbii nɛɛ amli lɛ hewɔ, ni akɛ hiɛsɔɔ nɛɛ tsirɛɔ wɔ koni wɔjie bule kpo wɔtsɔɔ onukpai lɛ. Esa akɛ wɔna miishɛɛ akɛ wɔkɛ amɛ aaafe ekome yɛ gbɛjianɔ ni amɛtoɔ koni ehe aba sɛɛnamɔ aha wɔ lɛ mli. Paulo kɛɛ: “Shi anyɛmimɛi, wɔmiikpa nyɛ fai akɛ nyɛle mɛi ni tsuɔ nii yɛ nyɛteŋ lɛ ni amɛyeɔ nyɛnɔ onukpai yɛ Nuŋtsɔ lɛ mli ni amɛwieɔ amɛtsɔɔ nyɛ lɛ, ni nyɛbua amɛ naakpa diɛŋtsɛ yɛ suɔmɔ mli yɛ amɛ nitsumɔ lɛ hewɔ.”(1 Tesalonikabii 5:12, 13) Ŋaawoo nɛɛ kɛ nitsumɔ kɛ miishɛɛ kɛ Yehowa jɔɔmɔ baa.
Ohe Afee Oya Yɛ Ŋaawoo Kɛ Nitsumɔ Mli
16, 17. Mɛɛ ŋaawoo onukpai baanyɛ ni amɛkɛha yɛ gbalashihilɛ he, ni mɛni baanyɛ ajɛ esɛɛnyiɛmɔ mli aba?
16 Paulo wo Tito hewalɛ koni ‘eya nɔ ekɛ ŋaawoo kɛ kamɔ ni hewalɛ yɔɔ mli aha.’ (Tito 2:15) Nakai nɔŋŋ hu ŋmɛnɛ Nyɔŋmɔ najiaŋdamɔlɔi lɛ kudɔɔ wɔ kɛyaa Biblia mli shishitoo mlai kɛ mlai krokomɛi ahe. Yiŋtoo kpakpa yɛ ni wɔɔdamɔ nɔ wɔkpɛlɛ ŋaa ni awoɔ wɔ nɔtonɔto lɛ nɔ koni wɔkɛ ŋaawoo kɛ gbɛtsɔɔmɔ ni jɛɔ Yehowa gbɛjianɔtoo lɛ kɛ onukpai ni ahala amɛ lɛ ŋɔɔ lɛ atsu nii.
17 Kɛ wɔɔfee enɛ he nɔkwɛmɔ nɔ lɛ, onukpai lɛ baawo Kristofonyo ko ŋaa koni enyiɛ Biblia mli ŋaawoo akɛ ebote gbalashihilɛ mli “yɛ Nuŋtsɔ lɛ mli” lɛ sɛɛ. (1 Korintobii 7:39; 5 Mose 7:3, 4) Amɛbaanyɛ amɛtsɔɔ akɛ ni okɛ gbɔmɔ ni abaptisiko lɛ aaabote gbalashihilɛ mli lɛ kɛ naagbai ni hiɛdɔɔ yɔɔ mli baaba, taakɛ bɔ ni Maŋtsɛ Salomo tɔ babaoo kɛtsɔ maŋsɛɛ ŋamɛi ni eŋɔ amɛ, ni dɔ etsui kɛtee apasa nyɔŋmɔi anɔ kɛjɛ Yehowa he lɛ fee lɛ.(1 Maŋtsɛmɛi 11:1-6) Onukpai Iɛ baanyɛ atsɔɔ mli hu akɛ Ezra ha Yuda hii lɛ shwie amɛŋamɛi ni ji wɔŋjalɔi lɛ, ni,Nehemia kɛɛ akɛ mɛi ni kɛ mɛi ni heee yeee lɛ boteɔ gbalashihilɛ mli lɛ ‘miifee efɔŋ kpeteŋkpele ni amɛmiitsɔɔ akɛ amɛheee amɛ-Nyɔnmɔ lɛ amɛyeee.’ (Nehemia 13:23-27; Ezra 10:10-14; kwɛmɔ The Watchtower, March 15, 1982, baafa 31, November 15, 1986 baafai 26-30.) Jɔɔmɔi kɛ tsui ni nyɔɔ mɔ mli akɛ mɔ ko miisa Yehowa hiɛ lɛ baa kɛjɛɔ Ŋmalɛ naa ŋaawoo ni tamɔ nɛkɛ ni onukpai ni yɔɔ suɔmɔ lɛ kɛhaa lɛ kɛ nitsumɔ mli.
18. Kɛ wɔsusu nɔ ni Paulo ŋma yɛ 1 Korintobii 5:9-13 lɛ he lɛ, te esa akɛ wɔfee wɔnii wɔha tɛŋŋ beni ashwie weku lɛ mli nyo ko lɛ?
18 Eji nɔ ni sa hu ákɛ akɛ bule aaaha onukpai lɛ akojomɔ yiŋkpɛɛi lɛ. Paulo kɛɛ Kristofoi ni yɔɔ Korinto lɛ akɛ: “kɛji mɔ ko ni atsɛɔ lɛ nyɛmi lɛ ji ajwamaŋbɔlɔ loo hiɛjoolɔ loo wɔŋjalɔ loo mɔjɛlɔ loo daatɔlɔ loo amimyelɔ lɛ, lɛ lɛ nyɛkɛ lɛ akayea nii tete.” Esa akɛ ‘amɛjie mɔ fɔŋ nɛɛ kɛjɛ amɛteŋ.’ (1 Korintobii 5:9-13) Shi te obaafee onii oha tɛŋŋ kɛji akɛ ashwie owekumɛi lɛ ateŋ mɔ ko? Yɛ be mli ni ehe baahia ni okɛ lɛ abɔ yɛ gbɛ ni husu yɔɔ mli nɔ ni nyɛkɛkwɛ weku mli saji anɔ lɛ abaafo mumɔŋ naanyobɔɔ fɛɛ ni ka okɛ wekunyo ni ashwie lɛ lɛ teŋ lɛ mli, (Kwɛmɔ The Watchtower, September 15, 1981, baafai 29-31.) Yɛ anɔkwale mli lɛ, esa akɛ anɔkwale ni ayeɔ Nyɔŋmɔ kɛ egbɛjianɔtoo lɛ atsirɛ wɔ ni wɔkɛ bulɛ aha nɔkwɛlɔi akojomɔ yiŋkpɛɛi lɛ.
19. Mɛni esa akɛ wɔfee beni onukpai lɛ tsɔɔ wɔ akɛ gbɛ ni ejaaa nɔ wɔnyiɛ yɛ mumɔŋ lɛ?
19 Ebɛ mlɛo akɛ aaahi gbɛ fintɔŋŋ ni kɛ mɔ yaa wala mli lɛ nɔ. Kɛ wɔnyɛ wɔfee nakai lɛ, belɛ esa akɛ wɔnyɛ wɔnyiɛ gbɛtsɔɔmɔ ni akɛha yɛ Nyɔŋmɔ Wiemɔ lɛ mli lɛ sɛɛ kɛ agbɛnɛ nɔ ni jɛɔ mɛi ni akɛ egbɛjianɔtoo lɛ he gbɛnaa nii ewo amɛdɛŋ akɛ amɛkwɛ nɔ lɛ dɛŋ lɛ sɛɛ. (Mateo 7:13, 14) Kɛji akɛ wɔmiifa gbɛ kɛmiijɛ maŋ kome mli kɛmiiya ekroko mli kɛ tsɔne loo kar ni wɔtsɔ gbɛ ni baaha wɔdu gbɛ lɛ nɔ lɛ, esa akɛ wɔfee nii ni wɔkɛjaje gbɛ ni wɔtsɔ nɔ lɛ. Kɛ jeee nakai Iɛ, wɔshɛŋ he ni wɔyaa lɛ kɔkɔɔkɔ. Nakai nɔŋŋ hu kɛji akɛ onukpai lɛ tsɔɔ wɔ akɛ wɔnyiɛ mumɔŋ gbɛ ni ejaaa lɛ nɔ, ekolɛ kɛtsɔ mɔ ni heee yeee ni wɔkɛ Iɛ bɔɔ lɛ hewɔ lɛ nɔ lɛ, esa akɛ wɔhe afee oya ni wɔkɛ Ŋmalɛ naa ŋaawoo lɛ atsu nii. Enɛ baafee gbɛ kome ni baatsɔɔ akɛ ‘wɔkɛ wɔhiɛ fɔɔ Yehowa nɔ’ diɛŋtsɛ.—Abɛi 3:5, 6.
Jiemɔ Bulɛ Kpo Yɛ Nibii Bibii Po Mli
20. Mɛɛ saji kɛ wɔbi wɔ diɛŋtsɛ wɔhe lɛ eeenyɛ eye ebua wɔ ni wɔjie bulɛ kpo wɔha gbɛtsɔɔmɔ ni onukpai lɛ kɛhaa lɛ yɛ saji bibii mli?
20 Ehe miihia ni wɔjie bulɛ kpo wɔtsɔɔ gbɛtsɔɔmɔ ni onukpai lɛ kɛhaa lɛ yɛ saji bibii po mli. No hewɔ lɛ wɔbaanyɛ wɔbi wɔ diɛŋtsɛ wɔhe akɛ: ‘Kɛji akɛ onukpai lɛ kɛɛ wɔ akɛ wɔyasara mɛi ni he yeɔ lɛ loo wɔyatsɔse mɛi heei lɛ yɛ suɔmɔ nitsumɔ lɛ mli lɛ, ani mifeɔ nakai? Ani mikpɛlɛɔ kpeei he gbɛnaa nii ni akɛfɔɔ minɔ lɛ nɔ amrɔ nɔŋŋ ni misaa mihe jogbaŋŋ? Kɛji akɛ onukpai lɛ kɛ gbɛtsɔɔmɔ ha yɛ sɛii ni wɔshiɔ wɔhaa mɛi krokomɛi yɛ kpeei ashishi, wɔ atadewoo he kɛ agbɛnɛ yɛ nibii krokomɛi ahe lɛ, ani wɔkpɛlɛɔ nɔ? Kɛji akɛ amɛbi wɔ ni wɔye wɔbua ni asaa Maŋtsɛyeli Asa lɛ nɔ koni jɛmɛ atse, wɔbu wɔsɔɔmɔ nitsumɔ lɛ he akɔntaa amrɔ nɔŋŋ, aloo wɔba kpee mra lɛ ani wɔfeɔ nakai?’
21. Bulɛ kpo ni wɔɔjie wɔtsɔɔ onukpai lɛ baaha wɔkai mɛɛ Yesu wiemɔi?
21 Asafoŋ nɔkwɛlɔi ahiɛ sɔɔ ekome ni wɔkɛ amɛ feɔ yɛ enɛ mli lɛ, ni nɔ kpakpa ji nɔ ni jɛɔ mli baa. Yɛ anɔkwale mli lɛ, bulɛ ni wɔɔjie lɛ kpo kɛ sane nɔkpɛlɛmɔ yɛ nibii bibii po mli lɛ baaha wɔkai Yesu wiemɔi lɛ: “Mɔ ni yeɔ nɔ ko bibioo nɔ mli anɔkwa lɛ, eyeɔ babaoo hu mli anɔkwa.” (Luka 16:10) Yɛ anɔkwale mli lɛ, wɔmiisumɔ ni abu wɔ anɔkwafoi.
Yaa Nɔ Okpɛlɛ Suɔmɔ Nɔkwɛmɔ Lɛ Nɔ
22. Mɛni ji sɛɛnamɔi komɛi ni jɛɔ tsulɔ onɔkwafo lɛ kɛ esafo lɛ mli onukpai lɛ asuɔmɔ nɔkwɛmɔ mli baa lɛ ekomɛi?
22 Sɛɛnamɔi ni jɛɔ tsulɔ anɔkwafo lɛ kɛ asafo lɛ mli onukpai lɛ asuɔmɔ nɔkwɛmɔ mli baa lɛ yeɔ odase akɛ Yehowa jɔɔmɔi babaoo yɛ eshikpɔŋ nɔ gbɛjianɔtoo lɛ nɔ. Kɛfata he lɛ, hesaa yɛ gbɛtsɔɔmɔ mli ni onukpai lɛ kɛhaa lɛ fataa amɛnyɛmɔi ahe ni ehaa ekomefeemɔ shwereɔ yɛ wɔteŋ. Nɔ ni jɛɔ mli baa lɛ hu ji mɔdɛŋbɔɔ yɛ ekomefeemɔ mli kɛ hiɛmiamɔ ni yeɔ omanye koni akɛha Maŋtsɛyeli lɛ he nibii lɛ ashwere. Yɛ anɔkwale mli lɛ, nɔ kpakpa ko ni jɛɔ hiɛsɔɔ ni wɔkɛkpɛlɛɔ mɛi ni nyiɛɔ hiɛ lɛ anɔkwɛmɔ lɛ mi baa ji akɛ Nyɔŋmɔ jɔɔ wɔshiɛmɔ kɛ kaselɔ feemɔ nitsumɔ lɛ nɔ. (Mateo 28:19; 20) Ekomefeemɔ kɛ gbeekpamɔ ni kaa wɔkɛ onukpai lɛ ateŋ lɛ hu miisaa wɔ kɛha naanɔ wala yɛ gbɛjianɔtoo hee lɛ mli.
23. Yɛ nɔ ni 1 Yohane 5:3 tsɔɔ lɛ hewɔ lɛ, esa akɛ enɛ atsirɛ wɔ ni wɔfee mɛni?
23 Akɛni wɔsumɔɔ Yehowa hewɔ lɛ, toiboo ni wɔfeɔ wɔhaa lɛ lɛ jeee nitsumɔ ko ni eŋɔɔɔ. Bɔfo Yohane ŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.” (1 Yohane 5:3) Kristofoi anɔkwafoi kɛ miishɛɛ boɔ Yehowa kitai atoi ni enɛ tsirɛɔ amɛ koni amɛkɛ mɛi ni ekɛ esafo lɛ nɔkwɛmɔ ewo amɛdɛŋ lɛ afee ekome. Kwɛ bɔ ni wɔdaa shi akɛ wɔyɔɔ Nyɔŋmɔ gbɛjianɔtoo lɛ mli ni wɔna “nikeenii ni ji gbɔmɛi” ni tamɔ nɛkɛ! (Efesobii 4:8, New World Translation) Akɛni wɔyɔɔ hekɛnɔfɔɔ kwraa akɛ Nyɔŋmɔ miikudɔ ewebii hewɔ lɛ, nyɛhaa wɔfea toiboo daa wɔhaa mɛi ni ena hegbɛ akɛ amɛaanyiɛ hiɛ yɛ Yehowa Odasefoi ateŋ lɛ.
Mɛni Okɛɔ?
◻ Mɛni hewɔ esa akɛ wɔfee toiboo wɔha mɛi ni nyiɛ hiɛ yɛ wɔteŋ Iɛ?
◻ Mɛɛ su esa akɛ wɔna yɛ sɔɔmɔ ni onukpai ni tsuɔ nii waa Iɛ kɛhaa Iɛ he?
◻ Mɛni hewɔ esa akɛ wɔhe afee oyɛ ni wɔkɛ ŋaawoo ni onukpai Iɛ kɛhaa Iɛ atsu nii Iɛ?
◻ Mɛɛ sɛɛnamɔi jɛɔ hiɛsɔɔ ni wɔkɛaatsu suɔmɔ nɔkwɛmɔ he nii Iɛ mli baa?