Okɛ Afɔlei Ni Saa Yehowa Hiɛ Aha
“Belɛ nyɛhaa wɔtsɔa [Yesu Kristo] enɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi Iɛ ayibii Iɛ.”—HEBRIBII 13:15.
1. Mɛni Yehowa wo Israelbii eshafeelɔi lɛ hewalɛ ni amɛfee?
YEHOWA ji mɛi ni kɛ afɔlei ni saa ehiɛ lɛ haa lɛ lɛ a-Yelikɛbualɔ. No hewɔ lɛ, be ko lɛ eduromɔ hi lsraelbii ni shaa afɔlei amɛhaa lɛ lɛ anɔ. Shi mɛni ba beni amɛtee nɔ amɛfee esha shii abɔ lɛ? Yehowa tsɔ gbalɔ Hoshea nɔ ewo amɛ hewalɛ akɛ: ‘Israel, kpalemɔ oba Yehowa, o-Nyɔŋmɔ lɛ ŋɔɔ! Ejaakɛ onishaianii lɛ hewɔ lɛ, ogbee shi. Nyɛŋɔa wiemɔi nyɛhiɛa nyɛdɛ, ni nyɛkua nyɛsɛɛ nyɛyaa Yehowa ŋɔɔ! Nyɛyakɛa lɛ akɛ: ‘Ŋɔɔ nishaianii fɛɛ ofa, ni omli ahi aha wɔ, ni wɔɔŋɔ wɔnaabui wɔfee tsina hii wɔhao.”—Hoshea 14:2, 3.
2. Mɛni ji ‘wɔnaabui ni wɔkɛfee tsina hii lɛ,’ ni bɔfo Paulo gbala jwɛŋmɔ kɛtee Hoshea gbalɛ lɛ nɔ yɛ mɛɛ nɔ?
2 No hewɔ lɛ nɛkɛ gbɛ nɔ atsɔ ni awo Nyɔŋmɔ blema webii lɛ ahewalɛ ni amɛkɛ ‘amɛnaabui afee tsina hii’ ni amɛkɛsha afɔle amɛha Yehowa Nyɔŋmɔ. Mɛni ji enɛɛmɛi? Yijiemɔ afɔlei ni ji anɔkwale nɔ diɛŋtsɛ! Yɛ be mli ni ewieɔ nɛkɛ gbalɛ nɛɛ he lɛ, bɔfo Paulo wo Hebri Kristofoi lɛ ahewalɛ ni amɛkɛ ‘yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.” (Hebribii 13:15) Mɛni baanyɛ aye abua Yehowa Odasefoi ni amɛkɛ afɔlei ni tamɔ nɛkɛ aha ŋmɛnɛ?
“Nyɛkasea Amɛhemɔkɛyeli Lɛ”
3. Mɛni bɔfo Paulo kɛɔ yɛ Hebribii 13:7 diɛŋtsɛ,ni mɛɛ sanebimɔ enɛ teɔ lɛ shi?
3 Ŋaawoo ni Paulo kɛha Hebribii lɛ ni wɔkɛaatsu nii lɛ baaye abua wɔ ni wɔkɛ afɔlei ni saa hiɛ aha wɔ Yelikɛbualɔ kpeteŋkpele lɛ, Yehowa Nyɔŋmɔ. Akɛ nɔkwɛmɔ nɔ lɛ, bɔfo lɛ ŋma akɛ: “Nyɛkaia nyɛtsɔɔlɔi, mɛi ni wie Nyɔŋmɔ wiemɔ lɛ tsɔɔ nyɛ lɛ, nyɛkwɛa amɛjeŋba lɛ naagbee, ni nyɛkasea amɛhemɔkɛyeli lɛ.” (Hebribii 13:7) Namɛi Paulo wieɔ amɛhe beni ekɛɛ: “Nyɛkaia nyɛtsɔɔlɔi,” aloo “mɛi ni ji nyɛnɔyelɔi lɛ”?—New World Translation Reference Bible, shishigbɛ niŋmaa.
4. (a) Taakɛ Hela ŋmalɛ lɛ tsɔɔ lɛ, mɛni “tsɔɔlɔi” loo mɛi ni nyiɛɔ hiɛ lɛ feɔ? b) Namɛi ji “tsɔɔlɔi” loo mɛi ni nyiɛɔ hiɛ yɛ Yehowa Odasefoi lɛ ateŋ?
4 Paulo wie “tsɔɔlɔi” aloo mɛi ni yeɔ nɔ lɛ ahe. (Heb 13 Kukuji 7, 17, 24) Ŋleshi wiemɔ “ye nɔ” lɛ jɛ Latin wiemɔ mli, ni enɛ hu jɛ Hela wiemɔ ky·ber·naʹo, ni eshishi ji “akɛ akudɔ lɛlɛ, atsɔɔ gbɛ, aye nɔ” mli. Onukpai ni ji Kristofoi lɛ yɔɔ nɔ kɛtsɔ “amɛnyɛmɔi ni amɛkɛkudɔɔ” (Hela, ky·ber·neʹseis) ni amɛkɛ hiɛnyiɛmɔ kɛ gbɛtsɔɔmɔ haa yɛ asafoi lɛ amli lɛ nɔ. (1 Korintobii 12:28) Shi bɔfoi lɛ kɛ onukpai ni yɔɔ Yerusalem lɛ sɔmɔ akɛ kuu koni amɛkɛ gbɛtsɔɔmɔ kɛ ŋaawoo aha asafoi lɛ fɛɛ. (Bɔfoi lɛ Asaji 15:1, 2, 27-29) No hewɔ lɛ ŋmɛnɛ, onukpai akuu ko ni ji nɔyeli kuu kɛ mumɔŋ nɔkwɛmɔ haa Yehowa Odasefoi yɛ jeŋ fɛɛ.
5. Mɛni hewɔ ni mɛɛ bɛ nɔ esa akɛ wɔtsɔ wɔsɔle wɔha asafoŋ onukpai kɛ Nɔyeli Kuu lɛ mli bii yɛ?
5 Asafoŋ onukpai kɛ Nɔyeli Kuu lɛ mli bii nyiɛɔ hiɛ loo amɛtsɔɔ nii yɛ wɔteŋ; no hewɔ lɛ, esa akɛ wɔkɛ bulɛ aha amɛ koni wɔsɔle ni Nyɔŋmɔ aha amɛ nilee ni he hiaa ni amɛkɛye asafo lɛ nɔ. (Okɛto Efesobii 1:15-17 he.) Kwɛ bɔ ni esa jogbaŋŋ akɛ wɔkai ‘mɔ fɛɛ mɔ ni wie Nyɔŋmɔ wiemɔ lɛ etsɔɔ wɔ lɛ’! Jeee Timoteo nyɛ kɛ enaa pɛ tsɔɔ lɛ nii, shi moŋ yɛ sɛɛ mli lɛ Paulo kɛ mɛi krokomɛi. (2 Timoteo 1:5, 6; 3:14) No hewɔ lɛ Timoteo baanyɛ asusu loo ejwɛŋ nɔ ni jɛ mɛi ni nyiɛɔ hiɛ lɛ ajeŋba mli ba lɛ he ni enyɛ ekase amɛhemɔkɛyeli lɛ.
6. Namɛi ahemɔkɛyeli esa akɛ wɔkase, shi namɔ sɛɛ wɔnyiɛɔ?
6 Aŋkroaŋkroi tamɔ Habel, Noa, Abraham, Sara, Rahab kɛ Mose tsɔɔ hemɔkɛyeli. (Hebribii 11:1-40) No hewɔ lɛ, wɔbaanyɛ wɔkase amɛhemɔkɛyeli lɛ ni shishashaomɔ ko bɛ mli ejaakɛ amɛgboi akɛ anɔkwafoi amɛha Nyɔŋmɔ. Shi wɔbaanyɛ ‘wɔkase’ gbɔmɛi anɔkwafoi ni nyiɛɔ wɔhiɛ bianɛ lɛ ‘ahemɔkɛyeli hu.’ Eji anɔkwale akɛ wɔnyiɛɛɛ adesa ni yeee emuu sɛɛ moŋ, ejaakɛ wɔhaa wɔhiŋmɛii hiɔ Kristo nɔ. Taakɛ Biblia shishitsɔɔlɔ Edgar J. Goodspeed kɛɛ lɛ: “Blemabii ni he gbɛi lɛ jeee mɛi ni heyelilɔ lɛ kwɛɔ, ejaakɛ eyɛ nɔkwɛmɔ nɔ kpakpa yɛ Kristo mli . . . Esa akɛ Kristofonyo foidalɔ kpakpa lɛ atuu ehiŋmɛi ema Yesu nɔ.” Hɛɛ, ‘Kristo na amanehulu eha wɔ, ni eshi wɔ nɔkwɛmɔ nɔ, akɛ wɔnyiɛ enanemaahei lɛ asɛɛ kpaakpa.’—1 Petro 2:21; Hebribii 12:1-3.
7. Te esa akɛ Hebribii 13:8 asa subaŋ ni wɔhiɛ yɛ amanehulu ni wɔɔna wɔha Yesu Kristo lɛ he aha tɛŋŋ?
7 Yɛ Nyɔŋmɔ Bi lɛ ni wɔɔgbala jwɛŋmɔ kɛaaba enɔ lɛ gbɛfaŋ lɛ, Paulo kɛfata he akɛ: “Yesu Kristo lɛ, bɔ ni eyɔɔ nyɛ kɛ ŋmɛnɛ lɛ, nakai nɔŋŋ eyɔɔ kɛyaa naanɔ.” (Hebribii 13:8) Odasefoi anɔkwafoi tamɔ Stefano kɛ Yakobo jie emuuyeli mlihiɛmɔ ni anyɛɛɛ ahoso lɛ lɛ kpo, amɛkɛkase Yesu nɔkwɛmɔ nɔ ni ma shi shiŋŋ lɛ. (Bɔfoi lɛ Asaji 7:1-60; 12:1, 2) Akɛni amɛmiisumɔ ni amɛgboi akɛ Kristo sɛɛnyiɛlɔi hewɔ lɛ, amɛhemɔkɛyeli lɛ sa kasemɔ. Gbɔmɛi ni sheɔ Nyɔŋmɔ gbeyei lɛ ejooo amanehulu ni amɛaana akɛ la odasefonyo taakɛ Yesu kaselɔi lɛ fee yɛ tsutsu, kɛ ŋmɛnɛŋmɛnɛ, kɛ agbɛnɛ yɛ wɔsɛɛ be mli lɛ naa foi.
Kwa Apasa Tsɔɔmɔi
8. Te oootsɔɔ Paulo wiemɔi ni yɔɔ Hebribii 13:9 lɛ mli kuku oha tɛŋŋ?
8 Esa akɛ bɔ ni Yesu su kɛ baŋ kɛ etsɔɔmɔi lɛ tsakeee lɛ aha wɔkɛ wɔhe akpɛtɛ nɔ ni ekɛ ebɔfoi lɛ tsɔɔ lɛ ahe. Akɛɛ Hebribii lɛ akɛ: “Nyɛkahaa tsɔɔmɔi sɔrɔtoi kɛ tsɔɔmɔi krokomɛi kɛ nyɛ miilalaa shi; ejaakɛ ehi akɛ akɛ duromɔ awo tsui hewalɛ, shi jeee niyenii ni haaa mɛi ni tsuɔ he nii lɛ ana sɛɛ ko yɛ mli lɛ.”—Hebribii 13:9.
9. Mɛɛ nibii ni he hiaa titri Paulo tsɔɔ yɛ ewolo ni eŋma eyaha Hebri Kristofoi lɛ mli?
9 Yudafoi lɛ kɛ amɛnine tsɔɔ nibii tamɔ bɔni akɛ Mla lɛ ha yɛ naakpɛɛ gbɛ nɔ yɛ Sinai Gɔŋ lɛ nɔ lɛ kɛ David naanɔ maŋtsɛyeli lɛ. Shi Paulo kɛɛ Hebri Kristofoi lɛ akɛ eyɛ mli akɛ Mla kpaŋmɔ lɛ ni akɛha lɛ yɛ gbeyei kɛ naakpɛɛ moŋ, shi Yehowa kɛ okadii, naakpɛɛ nii, hewalɛ nitsumɔi, kɛ mumɔ krɔŋkrɔŋ ni aja aha yɛ be mli ni akɛ kpaŋmɔ hee lɛ ba lɛ ye odase babaoo kɛ hewalɛ. (Bɔfoi lɛ Asaji 2:1-4; Hebribii 2:2-4) Anyɛŋ ahoso Kristo ŋwɛi Maŋtsɛyeli lɛ, taakɛ ahoso David nɔyelɔi amaŋtsɛyeli ni yɔɔ shikpɔŋ lɛ nɔ yɛ afi 607 D.Ŋ.B. lɛ. (Hebribii 1:8, 9; 12:28) Agbɛnɛ, Yehowa buaa mɛi ni afɔ amɛ mu lɛ anaa yɛ nɔ ko ni yɔɔ naakpɛɛ kɛ gbeyei kwraa fe naakpɛɛ nii ni ajie lɛ kpo yɛ Sinai Gɔŋ lɛ shishi lɛ hiɛ, ejaakɛ amɛbɛŋkɛ ŋwɛi Zion Gɔŋ lɛ he.—Hebribii 12:18-27.
10. Taakɛ Hebribii 13:9 tsɔɔ lɛ, mɛni woɔ tsui lɛ hewalɛ aloo ehaa efiɔ shi?
10 No hewɔ lɛ ehe miihia ni Hebribii lɛ akwɛ jogbaŋŋ ni amɛkwa Yudafoi ‘lɛ atsɔɔmɔi kɛ tsɔɔmɔi sɔrɔtoi ni akɛaagbala amɛ kɛaaya lɛ.’ (Galatabii 5:1-6) Jeee kɛtsɔ nɛkɛ tsɔɔmɔi nɛɛ nɔ, shi moŋ, ‘kɛtsɔ Nyɔŋmɔ duromɔ nɔ aaatsɔ awo tsui lɛ hewalɛ’ bɔni afee ni edamɔ shi shiŋŋ yɛ anɔkwale lɛ mli. Eka shi faŋŋ akɛ mɛi komɛi je ŋwane yɛ niyenii kɛ afɔleshai ahe, ejaakɛ Paulo kɛɛ akɛ “jeee niyenii ni haaa mɛi ni tsuɔ he nii lɛ ana sɛɛ ko yɛ mli lɛ” anɔ atsɔɔ ahaa tsui lɛ fiɔ shi shiŋŋ loo awoɔ lɛ hewalɛ. Mumɔŋ sɛɛnamɔi baa kɛjɛɔ Nyɔŋmɔ jamɔ hetuu kɛ hamɔ kɛ hiɛsɔɔ kɛha kpɔmɔ nɔ lɛ nɔ, shi jeee niyenii komɛi ayeli kɛ gbii pɔtɛɛ komɛi agbijurɔyeli ni agbaa he naa yakatswaa yɛ he lɛ nɔ. (Romabii 14:5-9) Agbɛnɛ, Kristo afɔleshaa lɛ ha Levi afɔleshai lɛ fee nɔ ni sɛɛnamɔ bɛ he.—Hebribii 9:9-14; 10:5-10.
Afɔlei Ni Saa Nyɔŋmɔ Hiɛ
11. (a) Mɛni ji sane titri ni yɔɔ Paulo wiemɔi ni yɔɔ Hebribii 13:10, 11 lɛ mli? (b) Mɛɛ okadi afɔleshaa latɛ Kristofoi yɔɔ?
11 Levi osɔfoi lɛ yeɔ kooloi ni akɛsha afɔle lɛ eko, shi Paulo ŋma akɛ: ‘Wɔyɛ afɔleshaa latɛ ko ni mɛi ni sɔmɔɔ yɛ buu lɛ mli lɛ bɛ hegbɛ akɛ amɛyeɔ enɔ nii. Ejaakɛ kooloi ni osɔfonukpa lɛ ŋɔo amɛla kɛyaa he krɔŋkrɔŋ lɛ yɛ esha hewɔ lɛ agbohii lɛ ayashaa yɛ ŋsra lɛ sɛɛ” yɛ Kpatamɔ Gbi lɛ nɔ. (Hebribii 13:10, 11; 3 Mose 16:27; 1 Korintobii 9:13) Kristofoi yɛ okadi afɔleshaa latɛ ko ni tsɔɔ Nyɔŋmɔ ni ayaa eŋɔɔ kɛtsɔɔ Yesu afɔleshaa ni kpataa esha ni nɔ ni jɛɔ mli baa ji eshaifaa ni Yehowa kɛhaa kɛ yiwalaheremɔ ni kɛ mɔ yaa naanɔ wala mli lɛ nɔ.
12. Mɛni awo Kristofoi ni afɔ amɛ mu lɛ hewalɛ akɛ amɛfee yɛ Hebribii 13:12-14?
12 Paulo eyaaa nɔ etsɔɔɔ Kpatamɔ Gbi lɛ mli, ni kɛlɛ ekɛfata he akɛɛ “No hewɔ lɛ Yesu hu, bɔni afee ni ekɛ lɛ diɛŋtsɛ ela lɛ atsuu maŋ lɛ he lɛ, [Yerusalem] agbo lɛ sɛɛ ena amanehulu lɛ yɛ.” Jɛmɛ ji he ni Kristo gbo yɛ ni ekɛ kpatamɔ afɔle ni sa ni mɔɔ shi kwraa ha yɛ. (Hebribii 13:12; Yohane 19:17; 1 Yohane 2:1, 2) Bɔfo Paulo wo nanemɛi Kristofoi ni afɔ amɛ mu lɛ hewalɛ akɛ: “No hewɔ lɛ agbɛnɛ nyɛhaa wɔjea kpo kɛyaa [Kristo] eŋɔɔ yɛ ŋsra lɛ sɛɛ ni wɔtere ehorabɔɔ lɛ. Ejaakɛ wɔbɛ maŋ ni kaa shi yɛ biɛ, shi moŋ maŋ ni baaba lɛ moŋ sɛɛ gbɛ wɔtaoɔ.” (Hebribii 13:13, 14; 3 Mose 16:10) Eyɛ mli akɛ abɔɔ wɔ ahora taakɛ afee Yesu lɛ moŋ, shi wɔtoɔ wɔtsui shi yɛ mli akɛ Yehowa Odasefoi. ‘Wɔkpooɔ nɔshafeemɔ kɛ je nɛŋ akɔnɔi ni wɔkɛ jwɛŋmɔ ni mli tse kɛ jalɛ kɛ Nyɔŋmɔ jamɔ hetuu kɛ hamɔ hiɔ shi yɛ ŋmɛnɛŋmɛnɛ nibii agbɛjianɔtoo nɛɛ mli’ yɛ be mli ni wɔkwɛɔ jeŋ hee lɛ. (Tito 2:11-14; 2 Petro 3:13; 1 Yohane 2:15-17) Ni mɛi ni afɔ amɛ mu lɛ ni yɔɔ wɔteŋ lɛ hu kɛ hiɛdɔɔ taoɔ “maŋ” ni ji ŋwɛi Maŋtsɛyeli lɛ.—Hebribii 12:22.
13. Afɔlei ni saa Nyɔŋmɔ hiɛ lɛ jeee mɛni kɛkɛ?
13 Yɛ no sɛɛ lɛ, Paulo tsi afɔlei ni saa Nyɔŋmɔ hiɛ lɛ ta, ni eŋma akɛ: “Belɛ nyɛhaa wɔtsɔa [Yesu] enɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ. Shi ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.” (Hebribii 13:15, 16) Jeee ejurɔfeemɔ nitsumɔ pɛ feɔ Kristofonyo lɛ afɔleshai. Gbɔmɛi fɛɛ feɔ nibii ni tamɔ nɛkɛ. Akɛ nɔkwɛmɔ nɔ lɛ, enɛ ba mli nakai yɛ be mli ni gbɔmɛi ni jɛ jeŋmaji pii amli baye bua gbɔmɛi ni shikpɔŋhosomɔ ye amɛ awui yɛ Soviet Armenia yɛ afi 1988 naagbee be mli lɛ.
14. Afɔle ni saa Nyɔŋmɔ hiɛ ni akɛaaha lɛ lɛ maa mɛɛ nitsumɔ nɔ mi?
14 Ato sɔɔmɔ krɔŋkrɔŋ ni wɔkɛhaa Yehowa “kɛ Nyɔŋmɔ gbeyeishemɔ kɛ woo” lɛ shishi ama he-kɛ-afɔleshaa suɔmɔ ni Yesu jie eko kpo lɛ nɔ. (Hebribii 12:28; Yohane 13:34; 15:13) Nɛkɛ sɔɔmɔ nɛɛ maa wɔshiɛmɔ nitsumɔ lɛ nɔ mi, ejaakɛ wɔtsɔɔ Kristo ni ji Osɔfonukpa lɛ nɔ ‘wɔkɛ yijiemɔ afɔle haa Nyɔŋmɔ, ni no ji wɔnaabui ni wɔkɛfee yibii ni jajeɔ egbɛi lɛ yɛ faŋŋ lɛ.’ (Hoshea 14:2; Romabii 10:10-15 Hebribii 7:26) Shi, ‘wɔhiɛ kpaaa ejurɔfeemɔ kɛ nikee,’ ni wɔkɛhaa mɛi krokomɛi ni jeee “hemɔkɛyeli lɛ webii lɛ” po ‘nɔ.’ (Galatabii 6:10) Titri lɛ kɛji akɛ nanemɛi Kristofoi bote amanehulu mli aloo nɔ ko he ehia amɛ aloo oshara ko eba amɛnɔ lɛ, wɔjɛɔ suɔmɔ mli wɔyeɔ wɔbuaa yɛ heloo naa kɛ mumɔŋ fɛɛ. Mɛni hewɔ? Ejaakɛ wɔsumɔɔ wɔhe. Wɔmiisumɔ hu ni amɛnyɛ amɛmɔ amɛhiɛnɔkamɔ jajemɔ lɛ mli waa koni ekahoso, ejaakɛ “nakai afɔlei saa Nyɔŋmɔ hiɛ jogbaŋŋ.”—Hebribii 10:23-25; Yakobo 1:27.
Nyɛbaa Nyɛhe Shi
15. (a) Mɛɛ gbɛ nɔ oootsɔ otsɔɔ woo ni yɔɔ Hebribii 13:17 lɛ mli kuku? (b) Mɛni hewɔ esa akɛ wɔjie bulɛ kpo wɔtsɔɔ mɛi ni nyiɛɔ hiɛ lɛ?
15 Bɔni afee ni wɔkɛ afɔlei ni saa hiɛ aha lɛ, esa akɛ wɔkɛ Nyɔŋmɔ gbɛjianɔtoo lɛ afee ekome kɛmɔ shi. Yɛ be mli ni eti nɔyeli hegbɛ he sane lɛ mli lɛ, Paulo ŋma akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ. shi jeee ŋtsɔidɔɔmɔ; ejaakɛ no ehiii haaa nyɛ.” (Hebribii 13:17) Esa akɛ wɔkɛ bulɛ aha onukpai ni ahala amɛ ni nyiɛɔ asafo lɛ hiɛ lɛ, koni amɛkɛ haomɔ akadɔmɔ ŋtsɔi yɛ ekome ni wɔkɛ amɛ efeee lɛ hewɔ. Kɛ wɔbaaa wɔhe shi lɛ, enɛ baanyɛ atsɔ tamɔ jatsu ko aha nɔkwɛlɔi lɛ ni ebaaye wɔ awui yɛ mumɔŋ. Mumɔ ni feɔ ekome loo ekpaa gbee lɛ haa efeɔ mlɛo kɛhaa onukpai lɛ akɛ amɛkɛ yelikɛbuamɔ aaaha ni enɛ haa ekomefeemɔ kɛ nɔyaa baa Maŋtsɛyeli shiɛmɔ nitsumɔ lɛ mli.—Lala 133:1-3.
16. Mɛni hewɔ esa jogbaŋŋ akɛ aaaba he shi aha mɛi ni nyiɛɔ hiɛ yɛ wɔteŋ lɛ?
16 Kwɛ bɔ ni esa jogbaŋŋ eha akɛ wɔɔba wɔhe shi wɔha mɛi ni nyiɛɔ hiɛ lɛ! Amɛtsɔɔ nii yɛ wɔkpeei ashishi ni amɛyeɔ amɛbuaa wɔ yɛ sɔɔmɔ lɛ mli. Akɛ nɔkwɛlɔi lɛ, amɛtaoɔ wɔhilɛ-kɛhamɔ. (1 Petro 5:2, 3) Amɛyeɔ amɛbuaa wɔ koni wekukpaa kpakpa aba wɔkɛ Nyɔŋmɔ teŋ kɛ agbɛnɛ kɛ asafo lɛ teŋ. (Bɔfoi lɛ Asaji 20:28-30) Kɛ wɔba wɔhe shi wɔha nɔkwɛmɔ ni nilee kɛ suɔmɔ yɔɔ mli lɛ, no tsɔɔ akɛ wɔmiijie bule kpo wɔtsɔɔ Nɔkwɛlɔ Fe Fɛɛ, Yehowa Nyɔŋmɔ, kɛ e-Nɔkwɛlɔ Sɛɛyelɔ, Yesu Kristo.—1 Petro 2:25; Kpojiemɔ 1:1; 2:1–3:22.
Feemɔ Mɔ Ni Sɔleɔ
17. Mɛɛ sɔlemɔi Paulo bi, ni mɛni hewɔ ebaanyɛ ebi enɛ yɛ gbɛ ni ja nɔ lɛ?
17 Akɛni Paulo kɛ ehefatalɔi lɛ kɛ Hebribii lɛ ateŋ ejɛkɛ, ekolɛ yɛ yiwaa hewɔ lɛ, ekɛɛ: “Nyɛsɔlea nyɛhaa wɔ; ejaakɛ wɔhiɛ ka nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli. Ni miikpa nyɛ fai babaoo akɛ nyɛfee nakai, koni akpale mi aha nyɛ oya.” (Hebribii 13: 18, 19) Eji Paulo fee gbɔmɔ ni bɛ trɔmɔɔ ni henilee egbo kulɛ, mɛɛ hegbɛ eyɔɔ ni ekɛaabi Hebribii lɛ ni amɛsɔle amɛha lɛ koni ebafata amɛhe? (Abɛi 3:32; 1 Timoteo 4:1, 2) Shi eji sɔɔlɔ anɔkwafo, mɔ ni kɛ henilee kpakpa damɔ shi eshi Yudafoi lɛ. (Bɔfoi lɛ Asaji 20:17-27) Paulo yɛ hekɛnɔfɔɔ hu akɛ etsɛŋ ni ebaafata Hebribii lɛ ahe kɛ amɛsɔle koni ebalɛ nakai.
18. Kɛ wɔmiikpa gbɛ ni mɛi krokomɛi asɔle aha wɔ lɛ, mɛɛ saji wɔbaanyɛ wɔbi wɔ diɛŋtsɛ wɔhe?
18 Paulo ni biɔ Kristofoi lɛ asɔlemɔi lɛ tsɔɔ akɛ eja gbɛ akɛ Kristofoi aaasɔle amɛha amɛhe, ni amɛtsi amɛgbɛii ata po. (Okɛto Efesobii 6:17-20 he.) Kɛ wɔmiikpa gbɛ akɛ mɛi krokomɛi aaasɔle aha wɔ lɛ, ani esaaa akɛ wɔfeɔ tamɔ bɔfo lɛ ni wɔkwɛɔ koni ‘wɔna henilee kpakpa ni wɔba wɔjeŋ fɛfɛo yɛ nibii fɛɛ mli’? Ani oyeɔ anɔkwa yɛ onibii fɛɛ mli? Ni ani oyɛ nakai hekɛnɔfɔɔ lɛ nɔŋŋ yɛ sɔlemɔ mli taakɛ Paulo yɔɔ lɛ? —1 Yohane 5:14, 15.
Naagbee Wiemɔi Kɛ Kɔkɔbɔɔ
19. (a) Mɛni ji Paulo taomɔ nii kɛha Hebribii lɛ yɛ sɔlemɔ mli? (b) Mɛni hewɔ kpaŋmɔ hee lɛ ji naanɔ kpaŋmɔ lɛ?
19 Akɛni ebi sɔlemɔ kɛjɛ Hebribii lɛ adɛŋ hewɔ lɛ, Paulo tsɔ sɔlemɔ nɔ ebi nɔ ko ni etaoɔ, akɛ: “Shi hejɔlɛ Nyɔŋmɔ lɛ, mɔ ni jie tooi lɛ akwɛlɔ kpeteŋkpele ni ji wɔ-Nuŋtsɔ Yesu kɛjɛ gbohii ateŋ yɛ naanɔ kpaŋmɔ lɛ la lɛ mli lɛ, lɛ esaa nyɛ eha nitsumɔ kpakpa fɛɛ nitsumɔ kpakpa, ni nyɛfee esuɔmɔnaa nii, ni etsɔ Yesu Kristo nɔ efee nɔ ni sa lɛ diɛŋtsɛ ehiɛ yɛ nyɛmli; lɛ aŋɔ anunyam aha kɛyashi naanɔi anaanɔ lɛ! Amen.” (Hebribii 13:20, 21) Akɛni toiŋjɔlɛ shikpɔŋ ko yɔɔ ejwɛŋmɔ mli hewɔ lɛ, “toiŋjɔlɛ Nyɔŋmɔ” lɛ tee Kristo shi kɛtee wala ni gbele bɛ mli lɛ mli yɛ ŋwɛi, he ni Yesu kɛ ela ni efɔse eshwie shi lɛ jara ni haa kpaŋmɔ hee lɛ tsuɔ nii lɛ yaha yɛ lɛ. (Yesaia 9:6, 7; Luka 22:20) Eji naanɔ kpaŋmɔ ejaakɛ mɛi ni yɔɔ shikpɔŋ lɛ nɔ lɛ nine shɛɔ naanɔ sɛɛnamɔi anɔ kɛjɛɔ Nyɔŋmɔ mumɔŋ bii 144,000 lɛ ni kɛ Yesu yeɔ maŋtsɛ yɛ ŋwɛi ni yɔɔ kpaŋmɔ hee lɛ mli lɛ asɔɔmɔi amli. (Kpojiemɔ 14:1-4; 20:4-6) Nyɔŋmɔ, ni wɔwoɔ ehiɛ nyam lɛ tsɔ Kristo nɔ ‘ekɛ nibii kpakpai fɛɛ ni he hiaa wɔ koni wɔnyɛ wɔfee esuɔmɔnaa nii ni wɔsa ehiɛ jogbaŋŋ lɛ wulaa wɔ.’
20. Te oootsɔɔ Paulo naagbee kɔkɔbɔɔ ni ekɛha Hebri Kristofoi lɛ mli kuku oha tɛŋŋ?
20 Akɛni eleee bɔ ni Hebribii nɛɛ baahere ewolo lɛ nɔ aha hewɔ lɛ, Paulo kɛɛ: “Shi anyɛmimɛi, miikpa nyɛ fai ni nyɛmɔ wiemɔ kɛ tsɔɔmɔ nɛɛ mli [nyɛboa Nyɔŋmɔ Bi lɛ toi, jeee Yudafoi lɛ], ejaakɛ wiemɔ kukuoo miŋma mimaje nyɛ nɛɛ [yɛ bɔ ni emli sane lɛ he hiaa ha lɛ hewɔ]. Nyɛnaa nyɛlea akɛ aŋmɛɛ wɔnyɛmi Timoteo he [kɛjɛ gbokɛlɛfoi atsuŋ], ni kɛ eba mra lɛ, mikɛ lɛ aaaba mabana nyɛ.” Ekolɛ akɛni eeŋma kɛmiijɛ Roma hewɔ lɛ, bɔfo lɛ hiɛ ka nɔ akɛ lɛ kɛ Timoteo baaya ni amɛyasara Hebribii lɛ yɛ Yerusalem. Kɛkɛ ni Paulo kɛɛ: “Wɔmiibi nyɛtsɔɔlɔi lɛ fɛɛ [akɛ onukpai ni tsuɔ nii waa ni nyiɛɔ hiɛ lɛ] kɛ mɛi krɔŋkrɔŋi [mɛi ni yɔɔ ŋwɛi hiɛnɔkamɔ] lɛ fɛɛ tswɛm. Mɛi ni jɛ Italia lɛ miibi nyɛ. [Nyɔŋmɔ] duromɔ lɛ kɛ nyɛ fɛɛ ahi shi!”—Hebribii 13:22-25.
Wolo Ni Hiɛ Naanɔ Sɛɛnamɔ
21. Wolo ni aŋma ayaha Hebribii lɛ yeɔ ebuaa wɔ ni wɔnuɔ mɛɛ saji otii ashishi?
21 Ekolɛ, wolo ni aŋma ayaha Hebribii lɛ yeɔ ebuaa wɔ ni wɔnuɔ nɔ ni afɔlei ni ashaa yɛ Mla lɛ shishi lɛ tsɔɔ lɛ shishi babaoo fe Ŋmalɛi Krɔŋkrɔŋi lɛ amli wolo fɛɛ wolo. Wolo ni aŋma lɛ tsɔɔ faŋŋ akɛ Yesu Kristo afɔleshaa lɛ ji nɔ pɛ ni kɛ kpɔmɔ nɔ ni he hiaa kɛha adesai eshafeelɔi lɛ haa. Ní sane ko ni sa kadimɔ ni anaa yɛ wolo lɛ mli ji akɛ esa akɛ wɔbo Nyɔŋmɔ Bi lɛ toi.
22. Mɛni ji yiŋtoi komɛi ni yɔɔ hewɔ ni esa akɛ wɔda shi yɛ wolo ni aŋma ayaha Hebribii lɛ hewɔ.
22 Kɛfata he lɛ, taakɛ wɔna yɛ nikasemɔi enyɔ ni tsɔ hiɛ lɛ mli lɛ, wɔyɛ nibii ni wɔbaanyɛ wɔdamɔ nɔ ni wɔda shi yɛ wolo ni aŋma ayaha Hebribii nɛɛ ni jɛ mumɔŋ lɛ hewɔ. Eyeɔ ebuaa wɔ koni wɔsɔɔmɔ nitsumɔ lɛ akaje wɔtsine, ni ewoɔ wɔ ekaa, ejaakɛ wɔle akɛ Yehowa ji wɔ Yelikɛbualɔ. Agbɛnɛ, ewoɔ wɔ hewalɛ ni wɔkɛ wɔlilɛi kɛ wɔnyɛmɔi fɛɛ atsu nii ni pɛsɛmkunya bɛ mli yɛ sɔɔmɔ krɔŋkrɔŋ ni wɔkɛhaa yɛ jetsɛremɔ kɛ jenamɔ mli lɛ mli ni wɔjɛ wɔtsui muu fɛɛ mli wɔkɛ afɔlei ni saa wɔ-Nyɔŋmɔ ni yɔɔ suɔmɔ, Yehowa, ni sa yijiemɔ lɛ hiɛ lɛ aha.
Te Obaaha Hetoo Oha Tɛŋŋ?
◻ Wolo ni aŋma ayaha Hebribii Iɛ yɛ bua amɛ koni amɛkwa apasa tsɔɔmɔi yɛ mɛɛ gbɛ nɔ?
◻ Afɔlei ni saa Nyɔŋmɔ hiɛ Iɛ gbalaa jwɛŋmɔ kɛyaa mɛɛ nitsumɔ ni he hiaa nɔ?
◻ Namɛi ji”tsɔɔlɔi“’ loo mɛi ni nyiɛɔ hiɛ Iɛ, ni mɛni hewɔ esa akɛ wɔba wɔhe shi wɔha amɛ? Wolo ni aŋma ayaha Hebribii Iɛ maa sɔlemɔ nɔ mi yɛ mɛɛ gbɛ nɔ?
◻ Mɛni hewɔ wɔbaanyɛ wɔkɛɛ akɛ wolo ni aŋma ayaha Hebri Kristofoi lɛ he yɛ sɛɛnamɔ kɛmiiya naanɔ Iɛ?