Gbɛnaa Nii Fata Anɔkwale Jamɔ Ni Aleɔ Lɛ He
“Miishɛɛ ji mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!” —LUKA 11:28, New World Translation.
1. Kɛji amɛna anɔkwale jamɔ lɛ nɔŋŋ pɛ lɛ, mɛɛ gbɔmɛi nɛkɛ tswaa amɛshihilɛ kɛbɔleɔ he?
LE NI aaale anɔkwale jamɔ lɛ pɛ kɛkɛ faaa. Kɛ wɔji mɛi ni sumɔɔ nɔ ni ja kɛ nɔ ni ji anɔkwale lɛ, no lɛ kɛ wɔna nɔŋŋ pɛ lɛ, wɔbaatswa wɔshihilɛ kɛbɔle he. Anɔkwa jamɔ lɛ jeee jwɛŋmɔ nilee folo ko kɛkɛ; eji shihilɛ gbɛ.—Lala 119:105; Yesaia 2:3; okɛto Bɔfoi lɛ Asaji 9:2 he.
2, 3. (a) Te Yesu ma bɔ ni Nyɔŋmɔ suɔmɔnaa nifeemɔ he hiaa ha lɛ nɔ mi eha tɛŋŋ? (b) Mɛɛ sɔ̃ ka mɔ fɛɛ mɔ ni le anɔkwale jamɔ lɛ nɔ?
2 Yesu Kristo ma bɔ ni ehe hiaa ni afee nɔ ni Nyɔŋmɔ ejie lɛ kpo akɛ E-suɔmɔnaa nii lɛ nɔ mi. Beni egbeɔ nɔ ni abale akɛ Gɔŋ nɔ Shiɛmɔ lɛ naa lɛ, Yesu ha ale akɛ, jeee mɛi fɛɛ ni tsɛɔ lɛ Nuŋtsɔ (ni amɛkɛ nakai feemɔ tsɛɔ amɛhe Kristofoi) lɛ baabote Maŋtsɛyeli lɛ mli; shi moŋ mɛi ni feɔ e-Tsɛ suɔmɔnaa nii lɛ pɛ baabote mli. Ewie akɛ abaakpoo mɛi krokomɛi lɛ ákɛ mɛi ni “tsuɔ nibii ni ejaaa gbɛ.” Mɛni hewɔ nii ni ejaaa gbɛ? Ejaakɛ taakɛ Biblia lɛ kɛɔ lɛ, Nyɔŋmɔ suɔmɔnaa nii ni afeee lɛ, esha ni, ni esha fɛɛ esha lɛ, eji ni nii ni ejaaa gbɛ. (Mateo 7:21-23; 1 Yohane 3:4; okɛto Romabii 10:2, 3 he.) Mɔ ko baanyɛ ale jamɔ ni ja lɛ, ni ekolɛ ejieɔ mɛi ni tsɔɔ lɛ po ayi, ni ewieɔ mɛi ni tsuɔ he nii lɛ hu ahe ekpakpa, shi sɔ̃ kã enɔ akɛ esa akɛ etsu he nii yɛ lɛ diɛŋtsɛ eshihilɛ mli. (Yakobo 4:17) Kɛ ekpɛlɛ nakai gbɛnaa nii lɛ nɔ lɛ, ebaana akɛ eshihilɛ baafee miishɛɛ waa, ni ebaana miishɛɛ ni anyɛŋ atsɔ gbɛ kroko nɔ ana lɛ.
3 Wɔsusu kadimɔ nii ni akɛyooɔ anɔkwa jamɔ lɛ mli ekpaa he yɛ nikasemɔ ni tsɔ hiɛ lɛ mli. Jeee akɛ amɛteŋ eko fɛɛ eko yeɔ ebuaa wɔ ni wɔyooɔ anɔkwale jamɔ lɛ kɛkɛ, shi moŋ ekɛ kaai kɛ hegbɛi komɛi hu shwieɔ wɔhiɛ aŋkroaŋkro. Yɛ mɛɛ gbɛ nɔ?
Te Otsuɔ Nyɔŋmɔ Wiemɔ lɛ he Nii Ohaa Tɛŋŋ?
4. (a) Beni mɛi heei lɛ jeɔ shishi amɛkɛ Yehowa Odasefoi bɔɔ lɛ, mɛni etsɛɛɛ ni amɛnaa yɛ bɔ ni Odasefoi kɛ Biblia lɛ tsuɔ nii amɛhaa lɛ he? (b) Mumɔŋ niyenii kpakpa ni amɛyeɔ lɛ saa Yehowa tsuji ahe yɛ mɛɛ gbɛ nɔ?
4 Beni Yehowa Odasefoi kɛ mɛi heei ni yɔɔ wiemɔ lɛ he miishɛɛ lɛ kaseɔ Biblia lɛ, nɛkɛ mɛi heei nɛɛ ateŋ mɛi pii yooɔ akɛ nɔ ni atsɔɔ amɛ lɛ jɛ Biblia lɛ mli. Kɛji aaha amɛsanebimɔi lɛ ahetoo lɛ, agbalaaa amɛjwɛŋmɔ kɛyaaa sɔlemɔ hemɔkɛyeli jajemɔi, kɛ adesai ablema saji, aloo gbɔmɛi ni ehe gbɛi asusumɔi anɔ. Nyɔŋmɔ diɛŋtsɛ Wiemɔ lɛ ji nɔ ni kudɔɔ amɛ. Kɛ amɛtee Maŋtsɛyeli Asa lɛ nɔ lɛ, amɛnaa akɛ, Biblia lɛ ji nikasemɔ wolo titri ni akɛtsuɔ nii yɛ jɛmɛ hu. Etsɛɛɛ ni mɛi ni kɛ anɔkwayeli taoɔ anɔkwale lɛ yooɔ akɛ nɔ titri ni kɛ miishɛɛ ni amɛnaa yɛ Yehowa Odasefoi ateŋ lɛ baa ji anɔkwale ni eji akɛ alɛɔ amɛ jogbaŋŋ yɛ mumɔŋ kɛjɛɔ Nyɔŋmɔ Wiemɔ lɛ mli.—Yesaia 65:13, 14.
5. (a) Mɛɛ kaa ko akɛfɔɔ mɛi ni naa Yehowa Odasefoi lɛ ahiɛ? (b) Te amɛaafee tɛŋŋ ni amɛna Odasefoi amiishɛɛ lɛ mli gbɛfaŋnɔ?
5 Kɛ oyoo enɛ lɛ, te otsuɔ he nii ohaa tɛŋŋ? Kɛ onu shishi jogbaŋŋ lɛ, onyɛŋ ofee mɔ ko ni miikwɛ nɔ ni yaa nɔ lɛ kɛkɛ ni ekɛ ehe wooo mli, ni esaaa akɛ ofeɔ nakai hu. Biblia lɛ tsɔɔ akɛ mɛi ni ji “nulɔi kɛkɛ” shi jeee “wiemɔ lɛ nɔyelɔi” lɛ ‘kɛ amale susumɔi miishishiu amɛ diɛŋtsɛ amɛhe.’ (Yakobo 1:22) Amɛlakaa amɛhe ejaakɛ amɛyooo akɛ, nɔ fɛɛ nɔ ni amɛaakɛɛ lɛ fɛɛ sɛɛ lɛ, Nyɔŋmɔ toi ni amɛbooo lɛ tsɔɔ akɛ amɛbɛ suɔmɔ diɛŋtsɛ kɛha lɛ. Hemɔkɛyeli ni awieɔ akɛ ayɔɔ, shi nitsumɔi fataaa he lɛ ji hemɔkɛyeli ni egbo. (Yakobo 2:18-26; 1 Yohane 5:3) Nɔ ni tamɔɔɔ nakai lɛ, mɔ ni suɔmɔ ni eyɔɔ kɛha Yehowa lɛ tsirɛɔ lɛ ni etsɔɔ mɔ ni “tsuɔ he nii lɛ,” ‘eeena miishɛɛ yɛ ehe nitsumɔ lɛ mli.’ Hɛɛ, taakɛ Yesu Kristo tsɔɔ mli lɛ, “miishɛɛ ji mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!”—Yakobo 1:25; Luka 11:28, NW; Yohane 13:17.
6. Kɛ wɔhiɛ sɔɔ Nyɔŋmɔ Wiemɔ lɛ lɛlɛŋ lɛ, mɛɛ hegbɛi wɔbaabɔ mɔdɛŋ aŋkroaŋkro ni wɔkɛtsu nii jogbaŋŋ?
6 Nakai miishɛɛ lɛ baafa babaoo beni oyaa hiɛ yɛ Nyɔŋmɔ suɔmɔnaa nii he nilee mli ni okɛ nibii babaoo ni okaseɔ lɛ tsuɔ nii lɛ. Mɔdɛŋbɔɔ enyiɛ okɛaatsu nii ni okɛkase Nyɔŋmɔ Wiemɔ lɛ? Aŋkroaŋkroi akpei nyɔŋmai abɔ ni tsutsu ko lɛ amɛleee woloŋ lɛ emia amɛhiɛ waa ni amɛkase nikanemɔ, ni nɔ hewɔ titri ni amɛfee enɛ ji, koni amɛnyɛ amɛkane Ŋmalɛi lɛ ni amɛtsɔɔ mɛi krokomɛi hu. Mɛi krokomɛi hu teɔ shi mra daa leebi koni amɛnyɛ amɛna be daa gbi ni amɛkɛkane Biblia lɛ kɛ Biblia kasemɔ woji, tamɔ Buu-Mɔɔ nɛkɛ. Beni bo diɛŋtsɛ okaneɔ Biblia lɛ kɛtsaraa nɔ daa gbi aloo otaoɔ ŋmalɛi ni atsɛ yɛ wolo kroko ni okaseɔ lɛ mli lɛ, kadimɔ Yehowa mlai kɛ ekitai lɛ jogbaŋŋ, ni obɔ mɔdɛŋ akɛ obaayoo shishitoo mlai babaoo ni yɔɔ mli kɛha wɔ gbɛtsɔɔmɔ lɛ hu. Jwɛŋmɔ nɔ ni efã fɛɛ fã jieɔ lɛ kpo yɛ Nyɔŋmɔ, kɛ eyiŋtoo, kɛ bɔ ni ekɛ adesai yeɔ haa lɛ he lɛ nɔ jogbaŋŋ. Ŋmɛɛ gbɛ ni enɛ anyɛ akudɔ otsui. Susumɔ he okwɛ akɛ ani gbɛi komɛi yɛ ni ooonyɛ otsɔ nɔ okɛ Biblia ŋaawoo lɛ atsu nii jogbaŋŋ kɛmɔ shi yɛ oshihilɛ mli lo.—Lala 1:1, 2; 19:8-12; 1 Tesalonikabii 4:1.
Ani Otuu Ohe Fɛɛ Oha Yehowa?
7. (a) Triniti tsɔɔmɔ lɛ saa mɔdɛŋ ni gbɔmɛi bɔɔ akɛ amɛaaja Nyɔŋmɔ lɛ he yɛ mɛɛ gbɛ nɔ? (b) Mɛni baanyɛ aba kɛji mɔ ko kase anɔkwale ni kɔɔ Yehowa he lɛ?
7 Ebafee heyeli eha mɛi akpekpei abɔ akɛ amɛaale akɛ anɔkwa Nyɔŋmɔ lɛ jeee Triniti. Naatsɔɔmɔ ni akɛhaa akɛ “eji teemɔŋ sane” lɛ haaa amɛtsui anyɔ amɛmli kwraa. Te amɛaafee tɛŋŋ amɛbɛŋkɛ Nyɔŋmɔ ni anyɛɛɛ anu bɔ ni eji shishi hu lɛ? Nɔ ni tsɔɔmɔ nɛɛ kɛbaa ji akɛ, ehaa amɛkuɔ amɛhiɛ amɛfɔɔ Tsɛ lɛ (ni amɛnuko egbɛi yɛ sɔlemɔ lɛ mli dã lɛ) nɔ, ni amɛjaa Yesu akɛ Nyɔŋmɔ, aloo amɛkɛ amɛjamɔ haa Maria (mɔ ni amɛtsɔɔ akɛ eji “Nyɔŋmɔ Nyɛ” lɛ). Shi kɛ Yehowa Odasefonyo ko gbele Biblia lɛ ni etsɔɔ amɛ Nyɔŋmɔ gbɛi diɛŋtsɛ, ni ji Yehowa lɛ, ehaa amɛtsuii nyaa waa kɛ miishɛɛ. (Lala 83:19) Venezuela yoo ko na miishɛɛ waa beni atsɔɔ lɛ Nyɔŋmɔ gbɛi lɛ, aahu akɛ efua Odasefonyo obalayoo ni tsɔɔ lɛ nakai anɔkwale ni he yɔɔ sɛɛnamɔ waa lɛ, ni ekpɛlɛ nɔŋŋ akɛ akɛ lɛ afee shia Biblia mli nikasemɔ. Kɛ gbɔmɛi ni tamɔ nɛkɛ ná amɛle akɛ Yesu wie e-Tsɛ lɛ he akɛ “mi-Nyɔŋmɔ kɛ nyɛ hu nyɛ-Nyɔŋmɔ,” ni ákɛ Yesu tsɛ e-Tsɛ lɛ akɛ “anɔkwa Nyɔŋmɔ kome lɛ,” amɛyooɔ akɛ nɔ ni Biblia lɛ tsɔɔ yɛ Nyɔŋmɔ he lɛ jeee nɔ ni anyɛŋ anu shishi. (Yohane 17:3; 20:17) Beni amɛbaleɔ Yehowa sui lɛ, amɛnuɔ he akɛ amɛbɛŋkɛ lɛ kpaakpa, ni amɛjeɔ shishi amɛsɔleɔ amɛhaa lɛ, ni amɛsumɔɔ ni amɛsa ehiɛ. Mɛni jɛɔ enɛ mli baa?
8. (a) Suɔmɔ ni amɛyɔɔ amɛha Yehowa kɛ suɔmɔ ni amɛyɔɔ akɛ amɛaasa ehiɛ lɛ hewɔ lɛ, mɛni gbɔmɛi akpekpei abɔ efee? (b) Mɛni hewɔ Kristofoi abaptisimɔ he hiaa waa lɛ?
8 Yɛ afii nyɔŋma ni ho lɛ mli lɛ, mɛi 2,528,524 jɔɔ amɛwala nɔ amɛha Yehowa, ni no sɛɛ lɛ amɛfee nɛkɛ henɔjɔɔmɔ nɛɛ he okadi kɛtsɔ nu mli baptisimɔ nɔ yɛ shikpɔji wuji ekpaa kɛ ŋshɔkpɔi nyɔŋmai abɔ nɔ. Ani oji amɛteŋ mɔ ko, aloo kpaako osaa ohe ni oha abaptisi bo? Baptisimɔ ji nifeemɔ ko ni he hiaa waa yɛ anɔkwa Kristofonyo fɛɛ Kristofonyo shihilɛ mli. Yesu kɛ nitsumɔ wo esɛɛnyiɛlɔi lɛ adɛŋ akɛ amɛfee gbɔmɛi ni jɛ jeŋmaji fɛɛ mli lɛ ekaselɔi ni amɛbaptisi amɛ. (Mateo 28:19, 20) Nɔ ni sa kadimɔ hu ji akɛ, Yesu diɛŋtsɛ baptisimɔ lɛ sɛɛ nɔŋŋ ni Yehowa diɛŋtsɛ wie kɛjɛ ŋwɛi, ni ekɛɛ: “Bo ji misuɔmɔ Bi lɛ; bo ohe tsui minaa.”—Luka 3:21, 22.
9. Kɛji wɔkɛ Yehowa baahi wekukpaa ni ekpɛlɛɔ nɔ mli daa lɛ, mɛni he hiaa yɛ wɔ gbɛfaŋ?
9 Esa akɛ wɔbu wɔkɛ Yehowa teŋ wekukpaa ni ekpɛlɛɔ nɔ lɛ akɛ nɔ ko ni jara wa waa. Kɛji óbote nɛkɛ wekukpaa mli kɛtsɔ henɔjɔɔmɔ kɛ baptisimɔ nɔ lɛ, no lɛ tsi ohe kɛjɛ nɔ fɛɛ nɔ ni baafite lɛ lɛ he. Kaaha shihilɛ mli haomɔi kɛ heloonaa nii ahe susumɔ miitsi kɛmiiwo gbɛhe ni ji enyɔ mli. (1 Timoteo 6:8-12) Hii shi yɛ ŋaawoo ni yɔɔ Abɛi 3:6 lɛ naa diɛŋtsɛ, akɛ: “Kaimɔ [Yehowa] yɛ ogbɛi fɛɛ mli, ni lɛ eeejaje otempɔŋi lɛ.”
Te Kristo Suɔmɔ lɛ Saa Ohe Jogbaŋŋ Ehaa Tɛŋŋ?
10. Mɛni hewɔ Yehowa ni wɔjaa lɛ lɛ haaa wɔku wɔhiɛ wɔfɔ Yesu nɔ lɛ?
10 Shi yɛ anɔkwale mli lɛ, hiɛsɔɔ kpakpa ni wɔɔna wɔha Yehowa akɛ anɔkwa Nyɔŋmɔ komɛ lɛ haaa mɔ aku ehiɛ efɔ Yesu Kristo nɔ. Nɔ ni tamɔɔɔ nakai lɛ, Kpojiemɔ 19:10 kɛɔ akɛ: “Yesu odase lɛ ji gbalɛ mumɔ lɛ.” Kɛjɛ 1 Mose aahu kɛyashi Kpojiemɔ lɛ, gbalɛi ni ajɛ mumɔŋ akɛha lɛ wieɔ saji ni tsɔɔ gbɛhe ni Yesu Kristo yɔɔ yɛ Yehowa yiŋtoo mli lɛ he fitsofitso. Beni mɔ ko banaa eleɔ nakai saji ni atsɔɔ mli fitsofitso lɛ, enyɛɔ enaa mfoniri ko ni lakamɔi kɛ susumɔi ni ejaaa, ni ejɛ Kristendom apasa tsɔɔmɔi lɛ amli eba lɛ eko kwraa bɛ mli.
11. Te kasemɔ ni ekase nɔ ni Biblia lɛ tsɔɔ yɛ Nyɔŋmɔ Bi lɛ he lɛ sa yoo ko he yɛ Poland eha tɛŋŋ?
11 Anɔkwale ni kɔɔ Nyɔŋmɔ Bi lɛ he ni aaale lɛ baanyɛ ana mɔ nɔ hewalɛ waa. Nakai ji bɔ ni ba yɛ Danuta, ni ji Poland yoo lɛ gbɛfaŋ. Ekɛ Yehowa Odasefoi ebɔ aahu afii kpaanyɔ sɔŋŋ, ni enáa nɔ ni amɛtsɔɔ lɛ lɛ he miishɛɛ waa, shi ehaaa anɔkwa jamɔ afee eshihilɛ gbɛ. Kɛkɛ ni gbi ko lɛ enine shɛ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ, ni wieɔ Kristo shihilɛ mli saji ahe yɛ gbɛ ni shishinumɔ waaa kwraa nɔ lɛ ekome nɔ.a Gbɛkɛ beni je ena waa lɛ, egbele wolo lɛ mli, kɛ yiŋtoo akɛ ebaakane yitso kome pɛ. Shi, maŋkɛ̃ mra, beni egbe wolo lɛ kanemɔ naa lɛ, no sɛɛ fɛɛ lɛ, ekɛ wolo lɛ efɔɔɔ shi. Kɛkɛ ni ebɔi yaafo. Ekpa fai akɛ, “Yehowa, okɛ mihe ake mi.” Nɔ ni jɛ nii ni ekane nɛɛ mli ba ji akɛ, ena suɔmɔ ni Yehowa kɛ e-Bi lɛ jie lɛ kpo lɛ jogbaŋŋ fe bei fɛɛ ni eho dã. Eyoo akɛ afii kpaanyɔ sɔŋŋ nɛ ni ekɛ trumu-feemɔ etswa yelikɛbuamɔ ni Nyɔŋmɔ ejɛ tsuishitoo mli ekpã mli eha lɛ aahu lɛ efɔ̃. Yɛ 1993 mli lɛ, abaptisi lɛ ni ekɛfee ehenɔjɔɔmɔ kɛha Yehowa kɛtsɔ Yesu Kristo mli hemɔkɛyeli nɔ lɛ he okadi.
12. Te anɔkwa nilee ni kɔɔ Yesu Kristo he lɛ saa wɔshihilɛ he ehaa tɛŋŋ?
12 “Wɔ-Nuŋtsɔ Yesu Kristo he nilee lɛ” fata Kristofoi ni yɔɔ ekaa ni amɛwoɔ yibii hu ni wɔɔfee lɛ he. (2 Petro 1:8) Nɛgbɛ obaana nitsumɔ ni tamɔ nɛkɛ mli gbɛfaŋnɔ kɛyashi, ni okɛ mɛi krokomɛi awie Maŋtsɛyeli shɛɛ sane lɛ he? Shihilɛi babaoo saa bɔ ni aŋkroaŋkroi nyɛɔ amɛtsuɔ lɛ he. (Mateo 13:18-23) Shihilɛi lɛ ekomɛi yɛ ni wɔnyɛŋ wɔtsake; ekrokomɛi hu yɛ ni wɔbaanyɛ wɔtsake. Mɛni baakanya wɔ ni wɔna tsakemɔi ni wɔbaanyɛ wɔfee lɛ, koni wɔfee hu? Bɔfo Paulo ŋma akɛ: “Kristo suɔmɔ lɛ nyɛɔ wɔnɔ”; yɛ wiemɔ kroko mli lɛ, suɔmɔ ni ejie kpo etsɔɔ beni ekɛ ewala fɔ shi eha wɔ lɛ sa kadimɔ jogbaŋŋ aahu akɛ beni hiɛsɔɔ ni wɔyɔɔ kɛha enɛ lɛ yaa hiɛ lɛ, ebaatsirɛ wɔ diɛŋtsɛ wɔtsuii waa. Nɔ ni jɛɔ mli baa ji akɛ, wɔyooɔ akɛ ebafeŋ nɔ ni sa kwraa kɛha wɔ akɛ wɔɔya nɔ wɔdi pɛsɛmkunya otii asɛɛ, ni wɔhi shi ni wɔfee wɔtsui naa nii. Shi moŋ, wɔtsakeɔ wɔnifeemɔi koni wɔha nitsumɔ ni Kristo tsɔɔ ekaselɔi lɛ ni amɛtsu lɛ aye klɛŋklɛŋ gbɛhe.—2 Korintobii 5:14, 15.
Atsi he Kɛjɛ Je lɛ He —Kɛyashi Nɛgbɛ?
13. Mɛni hewɔ wɔsumɔŋ akɛ wɔɔfee jamɔ ni efee ehe je lɛ fã lɛ mli nyo kɔkɔɔkɔ lɛ?
13 Ewaaa kwraa akɛ abaana nibii ni Kristendom kɛ jamɔi krokomɛi lɛ efee ni aŋmala ashwie shi lɛ ejaakɛ amɛmiisumɔ ni amɛfee je lɛ fã. Akɛ sɔlemɔ shika etsu nii kɛfi maŋ hiɛ atuatsemɔ nifeemɔi asɛɛ. Osɔfoi etsɔmɔ asraafoi ni wuɔ shiɔ nɔyelii. Daa gbi lɛ, adafitswaa woji amli saji wieɔ jamɔ kui ni yɔɔ shikpɔŋ lɛ nɔ hei sɔrɔtoi fɛɛ, ni kɛ amɛhe miiwuu ta lɛ ahe. La miitsere kɛmiishwie shi yɛ amɛniji ahe. (Yesaia 1:15) Ni yɛ je lɛŋ fɛɛ lɛ, osɔfoi lɛ bɔɔ mɔdɛŋ akɛ amɛaakudɔ maŋkwramɔŋ shihilɛi. Anɔkwa jalɔi bɛ gbɛfaŋnɔ ko yɛ enɛ mli.—Yakobo 4:1-4.
14. (a) Kɛji wɔɔya nɔ wɔtsi wɔhe kɛjɛ je lɛ he lɛ, mɛni esa akɛ wɔkwa akɛ aŋkroaŋkroi? (b) Mɛni baanyɛ aye ebua wɔ koni wɔkaha je lɛ sui kɛ enifeemɔi miitsɔ wɔ tsɔne?
14 Shi he ni aaatsi kɛaajɛ je lɛ he lɛ biɔ babaoo fe no kɛkɛ. Ale je lɛ jogbaŋŋ kɛtsɔ shika suɔmɔ kɛ suɔmɔ ni eyɔɔ kɛha nɔ ni shika baanyɛ ahe, kɛ shwe ni ashweɔ ni ana gbɛhe wulu, kɛ miishɛɛnamɔ sɛɛ ni atiuɔ shɛii, kɛfata nibii krokomɛi tamɔ mɛi krokomɛi ahe ni akɛ anɔkwayeli susuuu, malemɔ kɛ mɔ jɛmɔ, atua ni atseɔ ashiɔ nɔyelɔi, kɛ henɔyeli ni akɛtsuuu nii lɛ he lɛ nɔ. (2 Timoteo 3:2-5; 1 Yohane 2:15, 16) Emuu ni wɔyeee hewɔ lɛ, bei komɛi lɛ, ekolɛ wɔɔjie nakai sui lɛ ekomɛi akpo yɛ gbɛi komɛi anɔ. Mɛni baanyɛ aye abua wɔ yɛ mple ni wɔshiɔ̃ ni wɔtsi wɔhe kɛjɛ nɛkɛ tsɔnei nɛɛ ahe lɛ mli? Esa akɛ wɔkai wɔhe yɛ mɔ ni hɔ enɛ fɛɛ sɛɛ lɛ he. “Jeŋ muu lɛ fɛɛ ka mɔ fɔŋ lɛ mli.” (1 Yohane 5:19) Bɔ ni gbɛ ko baanyɛ afee nɔ ni lakaa mɔ ha lɛ kɔɔɔ he eko, ni mɛi krokomɛi abɔ ni hiɔ shi nakai lɛ kɔɔɔ he eko, kɛ wɔna Yehowa henyɛlɔ ni fe fɛɛ, Satan Abonsam akɛ lɛ ehɔ sɛɛ lɛ, wɔnaa bɔ ni eyɔɔ taŋ diɛŋtsɛ ha.—Lala 97:10.
Nɛgbɛ Osuɔmɔ lɛ Yaa Shɔŋŋ Kɛyashɛɔ?
15. Yɛ mɛɛ gbɛ nɔ suɔmɔ ni pɛsɛmkunya bɛ mli ni ona lɛ ye ebua bo ni okɛna anɔkwale jamɔ lɛ?
15 Beni okɛ Yehowa Odasefoi bɔi bɔɔ klɛŋklɛŋ kwraa lɛ, ŋwanejee ko bɛ he akɛ oná suɔmɔ ni amɛjieɔ lɛ kpo yɛ amɛteŋ lɛ he miishɛɛ yɛ bɔ ni eyɔɔ sɔrɔto kɛ akɛto je lɛŋ mumɔ lɛ he lɛ hewɔ. Bɔ ni amaa suɔmɔ ni pɛsɛmkunya bɛ mli nɔ mi lɛ haa esoroɔ Yehowa jamɔ krɔŋŋ lɛ yɛ jamɔ gbɛi krokomɛi fɛɛ he. Ekolɛ eeenyɛ efee akɛ enɛ ji nɔ ni ha oyiŋ tsɔ akɛ Yehowa Odasefoi miitsu anɔkwale jamɔ he nii lɛlɛŋ lɛ. Yesu Kristo diɛŋtsɛ wie akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.
16. Mɛɛ hegbɛi baanyɛ aba aha wɔ aŋkroaŋkro ni wɔkɛlɛɛ wɔsuɔmɔ lɛ mli?
16 Ani nakai su lɛ hu haa ayooɔ bo akɛ Kristo kaselɔi lɛ ateŋ mɔ ko? Ani gbɛi komɛi yɛ ni oootsɔ nɔ olɛɛ suɔmɔ ni ojieɔ kpo otsɔɔ lɛ mli? Ŋwanejee ko bɛ he akɛ wɔ fɛɛ wɔbaanyɛ. Babaoo fata suɔmɔ he fe naanyobɔɔ su ni wɔɔjie kpo wɔtsɔɔ mɛi krokomɛi yɛ Maŋtsɛyeli Asa lɛ nɔ. Ni kɛji wɔɔjie suɔmɔ kpo wɔtsɔɔ mɛi ni sumɔɔ wɔ lɛ pɛ lɛ, ani eeesoro wɔ yɛ je lɛ he yɛ gbɛ ko nɔ? Biblia lɛ woɔ hewalɛ akɛ: “Shi titri lɛ nyɛsuɔmɔ ni nyɛkɛsumɔsumɔɔ nyɛhe lɛ mli awaa.” (1 Petro 4:8) Namɛi esa akɛ wɔjie suɔmɔ babaoo kpo wɔtsɔɔ? Ani Kristofonyo nyɛmi nuu loo nyɛmi yoo ni esoro maŋ nɔ ni ejɛ, ni bɔ ni efeɔ nibii komɛi ehaa lɛ woɔ wɔmlila lɛ? Ani mɔ ko ni, hela kɛ gbɔlɛ hewɔ lɛ, enyɛɛɛ eba kpeei daa lɛ? Ani wɔgbalashihilɛ mli hefatalɔ? Aloo ani ekolɛ wɔfɔlɔi ni edara yɛ afii amli lɛ? Mɛi ni miibɔ mɔdɛŋ yɛ mumɔ lɛ yibii, ni suɔmɔ fata he lɛ kpojiemɔ mli lɛ ateŋ mɛi komɛi enu he tamɔ nɔ ni amɛmiikase enɛɛmɛi fɛɛ ekoŋŋ kɛmiijɛ shishijee kwraa beni amɛkɛ shihilɛi ni mli wawai ni baanyɛ ate shi yɛ kwɛmɔ ni akɛaaha weku lɛ mlinyo ko ni ekolɛ etsɔ helatsɛ ni enyɛɛɛ nɔ ko kwraa efee lɛ gbɛfaŋ lɛ kpeɔ lɛ. Shi yɛ anɔkwale mli lɛ, kɛ wɔkɛ nɛkɛ shihilɛi nɛɛ kpe po lɛ, esa akɛ wɔsuɔmɔ lɛ mli alɛɛ kɛteke wɔshia mlibii pɛ.
Maŋtsɛyeli Odaseyeli—Te Ehe Hiaa Kɛha Bo Tɛŋŋ?
17. Kɛ wɔ diɛŋtsɛ lɛ wɔna saramɔi ni Yehowa Odasefoi basara wɔ lɛ he sɛɛ lɛ, mɛni esa akɛ wɔnu he amrɔ nɛɛ akɛ wɔɔfee?
17 Gbɛ ni he hiaa ni wɔtsɔɔ nɔ wɔjieɔ suɔmɔ kpo wɔtsɔɔ wɔnaanyo gbɔmɔ ji kɛtsɔ Nyɔŋmɔ Maŋtsɛyeli lɛ he odase ni wɔɔye amɛ lɛ nɔ. Kuu kome pɛ tsuɔ nɛkɛ nitsumɔ ni Yesu gba efɔ shi akɛ abaatsu nɛɛ. (Marko 13:10) Amɛji Yehowa Odasefoi. Wɔ diɛŋtsɛ hu wɔna he sɛɛ. Amrɔ nɛɛ eji hegbɛ ni wɔna akɛ wɔye wɔbua mɛi krokomɛi. Kɛ wɔkɛ bɔ ni Nyɔŋmɔ susuɔ yɛ he lɛ kpaa gbee lɛ, no lɛ nɛkɛ nitsumɔ nɛɛ baafee nɔ ni he hiaa fe fɛɛ yɛ wɔshihilɛ mli.
18. Kanemɔ ni wɔɔkane Jehovah’s Witnesses—Proclaimers of God’s Kingdom wolo lɛ baanyɛ ana gbɛfaŋnɔ ni wɔnaa yɛ Maŋtsɛyeli odaseyeli lɛ mli lɛ nɔ hewalɛ yɛ mɛɛ gbɛ nɔ?
18 Awie miishɛɛ sane ni tsɔɔ bɔ ni ajaje Maŋtsɛyeli shɛɛ sane lɛ kɛtee shikpɔŋ lɛ naagbee hei lɛ tɔ̃ɔ yɛ nɛkɛ naagbee gbii nɛɛ amli lɛ he yɛ Jehovah’s Witnesses—Proclaimers of God’s Kingdom wolo lɛ mli. Kɛji onyɛɔ okaneɔ Blɔfo lɛ, no lɛ bɔɔ mɔdɛŋ waa ni okane. Beni okaneɔ lɛ, kadimɔ gbɛi fɛɛ ni mɛi aŋkroaŋkroi etsɔ nɔ amɛye Maŋtsɛyeli lɛ he odase lɛ titri. Ani mɛi komɛi yɛ mli ni obaanyɛ okase amɛnɔkwɛmɔ nɔ lɛ? Hegbɛi pii anaa egbele eha wɔ fɛɛ. Eba akɛ suɔmɔ ni wɔyɔɔ kɛha Yehowa lɛ baatsirɛ wɔ ni wɔkɛtsu nii jogbaŋŋ kɛmɔ shi.
19. Kɛ wɔkpɛlɛ gbɛnaa nii ni fataa le ni aleɔ anɔkwale jamɔ lɛ he lɛ nɔ lɛ, te wɔnaa he sɛɛ wɔhaa tɛŋŋ?
19 Kɛ wɔtsɔ nɛkɛ gbɛ nɔ wɔkɛ wɔhe wo Yehowa suɔmɔnaa nifeemɔ mli lɛ, wɔbaana hetoo wɔha sanebimɔ ni ji, Mɛni ji shishinumɔ ni yɔɔ shihilɛ he? lɛ. (Kpojiemɔ 4:11) Wɔyaŋ nɔ wɔgbugbuŋ shi dɔŋŋ, ní wɔɔnu he akɛ wɔshihilɛ efee shwɛm. Nitsumɔ ko bɛ ni obaanyɛ otuu ohe oha, ni baaha otsui anyɔ omli babaoo fe nɔ ni ooona kɛji ojɛ otsui muu fɛɛ mli okɛ ohe ha kɛha Yehowa Nyɔŋmɔ sɔɔmɔ. Ni mɛɛ wɔsɛɛ be ni yɔɔ nyam ka shi kɛha wɔ nɛkɛ! Naanɔ shihilɛ ni haa mɔ tsui nyɔɔ emli yɛ ejeŋ hee lɛ mli, he ni wɔbaanyɛ wɔkɛ wɔjwɛŋmɔŋ nyɛmɔi fɛɛ atsu nii yɛ kɛmɔ shi, yɛ yiŋtoo ni tsɔɔ suɔmɔ ni Nyɔŋmɔ kɛbɔ adesai lɛ kɛ gbeekpamɔ naa.
[Shishigbɛ niŋmai]
a Mɛi ni fee ji Watchtower Bible and Tract Society of New York, Inc.
Te Obaaha Hetoo Tɛŋŋ?
◻ Mɛni hewɔ ehe hiaa ni jamɔ ko akpɛlɛ Biblia lɛ nɔ akɛ Nyɔŋmɔ Wiemɔ, ni ewo Yehowa hiɛ nyam akɛ anɔkwa Nyɔŋmɔ lɛ?
◻ Mɛni anɔkwa jamɔ tsɔɔ yɛ Yesu nitsumɔ akɛ Kpɔlɔ lɛ he?
◻ Mɛni hewɔ esa akɛ Kristofoi aya nɔ atsi amɛhe kɛjɛ je lɛ he ni amɛjie suɔmɔ ni pɛsɛmkunya bɛ mli kpo lɛ?
◻ Mɛɛ gbɛfaŋnɔ Maŋtsɛyeli odaseyeli yɔɔ yɛ anɔkwale jamɔ mli?
[Mfoniri ni yɔɔ baafa 16]
Baptisimɔ ji gbɛ ni he hiaa ni akɛkpɛlɛɔ gbɛnaa nii ni yɔɔ anɔkwa jamɔ mli lɛ nɔ. Daa nyɔŋ nɔ lɛ, mɛi aaashɛ 25,000 kɔɔ nakai gbɛ lɛ yɛ jeŋ fɛɛ
Russia
Senegal
Papua New Guinea
U.S.A.
[Mfoniri ni yɔɔ baafa 17]
Biblia mli anɔkwale lɛ ni okɛ mɛi krokomɛi aaagba he sane lɛ ji anɔkwa jamɔ fa
U.S.A.
Brazil
U.S.A.
Hong Kong