Hemɔkɛyeli Tsirɛɔ Wɔ ni Wɔfeɔ Nii!
“Oona akɛ hemɔkɛyeli kɛ [Abraham] enitsumɔi lɛ nyiɛ, ni nitsumɔi lɛ amli ejɛ ni ehemɔkɛyeli lɛ ye emuu lɛ.”—YAKOBO 2:22.
1, 2. Mɛɛ gbɛ nɔ wɔɔtsɔ wɔfee wɔnii kɛ wɔyɛ hemɔkɛyeli?
MƐI pii kɛɔ akɛ amɛyɛ hemɔkɛyeli yɛ Nyɔŋmɔ mli. Ni kɛlɛ, wala bɛ hemɔkɛyeli kɛkɛ ni akɛɛ ayɔɔ lɛ mli tamɔ bɔ ni gbonyo ji lɛ. Kaselɔ Yakobo ŋma akɛ: “Hemɔkɛyeli hu, kɛ́ nitsumɔi bɛ he lɛ, eji hemɔkɛyeli gbonyo.” Ekɛɛ hu akɛ Abraham ni sheɔ Nyɔŋmɔ gbeyei lɛ yɛ hemɔkɛyeli ni “kɛ enitsumɔi lɛ nyiɛ.” (Yakobo 2:17, 22) Mɛni ji nɔ ni wiemɔi ni tamɔ nɛkɛ tsɔɔ kɛhaa wɔ?
2 Kɛ wɔyɛ anɔkwa hemɔkɛyeli lɛ, wɔheŋ nɔ ni wɔnuɔ yɛ Kristofoi akpeei ashishi lɛ pɛ wɔye. Wɔbaaye wɔhemɔkɛyeli lɛ he odase, ejaakɛ wɔji Yehowa Odasefoi ni yɔɔ ekãa. Hɛɛ, hemɔkɛyeli baakanya wɔ ni wɔkɛ Nyɔŋmɔ Wiemɔ lɛ atsu nii yɛ shihilɛ mli ni ebaatsirɛ wɔ ni wɔfee nii.
Hiɛaŋkwɛmɔ kɛ Hemɔkɛyeli Kpãaa Gbee
3, 4. Te esa akɛ hemɔkɛyeli aná gbɛ ni wɔtsɔɔ nɔ wɔkɛ mɛi krokomɛi yeɔ lɛ nɔ hewalɛ eha tɛŋŋ?
3 Kɛ wɔyɛ hemɔkɛyeli diɛŋtsɛ yɛ Nyɔŋmɔ kɛ Kristo mli lɛ, wɔkwɛŋ mɛi ahiɛaŋ. (Yakobo 2:1-4) Mɛi komɛi ni Yakobo ŋma amɛ wolo lɛ ejieee hiɛaŋ ni akwɛɛɛ ni ataoɔ kɛjɛɔ anɔkwa Kristofoi adɛŋ lɛ kpo. (Romabii 2:11) No hewɔ lɛ, Yakobo kɛɛ amɛ akɛ: “Nyɛkɛ mɛi ahiɛaŋkwɛmɔ akahiɛa wɔ-Nuntsɔ Yesu Kristo ni ji anunyam nuntsɔ lɛ hemɔkɛyeli lɛ.” Kɛ niiatsɛ ni heee yeee ni wo shikagai kɛ atadei fɛfɛji ba kpee kɛ agbɛnɛ hu “ohiafo ko hu ni wo atade taŋtaŋ” ni heee yeee lɛ, esa akɛ kulɛ ahere gbɔmɛi enyɔ lɛ fɛɛ jogbaŋŋ, shi kɛlɛ akɛ kwɛmɔ krɛdɛɛ ko miiha niiatsɛmɛi lɛ. Ahãa amɛ sɛii yɛ “he kpakpa,” ni akɛɔ ohiafoi ni heee yeee lɛ akɛ amɛdamɔ shi loo amɛtara shikpɔŋ yɛ mɔ ko najiashi.
4 Yehowa kɛ Yesu Kristo kpɔmɔ afɔleshaa lɛ ha yɛ niiatsɛmɛi kɛ ohiafoi fɛɛ ahewɔ. (2 Korintobii 5:14) No hewɔ lɛ, kɛji akɛ wɔɔkwɛ niiatsɛmɛi ahiɛaŋ lɛ, belɛ wɔmiikpa yɛ Kristo, ‘ni tsɔ ohiafo koni wɔtsɔ ehia lɛ mli wɔtsɔmɔ niiatsɛmɛi’ lɛ hemɔkɛyeli lɛ sɛɛ. (2 Korintobii 8:9) Nyɛkahaa wɔkojoa gbɔmɛi yɛ nɛkɛ gbɛ nɔ kɔkɔɔkɔ—kɛ jwɛŋmɔ fɔŋ ni akɛwoɔ gbɔmɛi ahiɛ nyam. Nyɔŋmɔ jeee mɛi ahiɛaŋkwɛlɔ, shi kɛ wɔkwɛ mɛi ahiɛaŋ lɛ, belɛ wɔtsɔmɔ “kojolɔi ni hiɛ jwɛŋmɔi fɔji.” (Hiob 34:19) Akɛni wɔmiisumɔ ni wɔsa Nyɔŋmɔ hiɛ hewɔ lɛ, yɛ anɔkwale mli lɛ, wɔŋmɛŋ wɔhe wɔhaŋ kaa ni baaha wɔkwɛ mɛi ahiɛaŋ loo ‘ni wɔɔsa gbɔmɛi ahiɛ yɛ wɔ diɛŋtsɛ wɔsɛɛnamɔ hewɔ.’—Yuda 4, 16.
5. Namɛi ji mɛi ni Nyɔŋmɔ ehala amɛ koni amɛfee “niiatsɛmɛi yɛ hemɔkɛyeli gbɛfaŋ” lɛ, ni te niiatsɛmɛi yɛ heloo gbɛfaŋ lɛ fɔɔ feemɔ yɛ amɛnifeemɔ mli?
5 Yakobo tsɔɔ mɛi ni ji niiatsɛmɛi lɛɛlɛŋ lɛ, ni ewoɔ hewalɛ akɛ ajie suɔmɔ kpo atsɔɔ gbɔmɛi fɛɛ ni hiɛaŋkwɛmɔ bɛ mli. (Yakobo 2:5-9) ‘Nyɔŋmɔ ehala ohiafoi lɛ koni amɛtsɔmɔ niiatsɛmɛi yɛ hemɔkɛyeli gbɛfaŋ kɛ niyelɔi yɛ maŋtsɛyeli lɛ mli.’ Nakai enɛ ji, ejaakɛ ohiafoi lɛ boɔ sanekpakpa lɛ toi babaoo. (1 Korintobii 1:26-29) Ákɛ kuu lɛ, mɛi ni yɔɔ heloonaa nibii lɛ nyɛ̃ɛɔ mɛi krokomɛi anɔ yɛ nyɔmɔ ni amɛhiɛ, nyɔmɔwoo, kɛ mla naa nifeemɔi amli. Amɛwieɔ Kristo he efɔŋ, ni amɛwaa wɔ yi ejaakɛ egbɛi kã wɔnɔ. Shi nyɛhaa efea wɔfaishitswaa akɛ wɔɔbo ‘mla lɛ mli otu kɛ ewulu,’ ni biɔ naanyo suɔmɔ—ni tsɔɔ akɛ esa akɛ wɔsumɔ niiatsɛmɛi kɛ ohiafoi fɛɛ lɛ toi. (3 Mose 19:18; Mateo 22:37-40) Akɛni Nyɔŋmɔ taoɔ enɛ lɛ, belɛ mɛi ahiɛaŋ ni akwɛɔ lɛ ji ‘esha ni afeɔ.’
“Mɔbɔnalɛ Shwãa Eshiɔ Kojomɔ”
6. Mɛɛ gbɛ nɔ wɔɔfee mla mlikulɔi yɛ kɛ wɔkɛ mɛi krokomɛi yeee yɛ mɔbɔnalɛ naa?
6 Kɛ wɔkwɛ gbɔmɛi ahiɛaŋ yɛ gbɛ ni mɔbɔnalɛ bɛ mli nɔ lɛ, belɛ wɔkuɔ mla mli. (Yakobo 2:10-13) Kɛ wɔtɔ̃ yɛ enɛ mli lɛ, wɔbafeɔ mɛi ni etɔ̃ Nyɔŋmɔ mlai lɛ fɛɛ nɔ. Israelbii ni fiteee gbala shi amɛji julɔi lɛ bafee mɛi ni etɔ̃ Mose Mla lɛ nɔ. Ákɛ Kristofoi lɛ, “heyeli mla” lɛ akɛkojoɔ wɔ—mumɔŋ Israel ni yɔɔ kpaŋmɔ hee lɛ mli, ni emla lɛ yɔɔ amɛtsuii amli lɛ.—Yeremia 31:31-33.
7. Mɛni hewɔ mɛi ni yaa nɔ amɛkwɛɔ mɛi ahiɛaŋ lɛ nyɛŋ akpa mɔbɔnalɛ gbɛ kɛjɛ Nyɔŋmɔ dɛŋ lɛ?
7 Kɛ wɔkɛɛ wɔyɛ hemɔkɛyeli, shi wɔtee nɔ wɔkwɛ mɛi ahiɛaŋ lɛ, wɔyɛ oshara mli. Mɛi ni bɛ suɔmɔ ni amɛnaaa mɔbɔ lɛ baaná amɛkojomɔ ni mɔbɔnalɛ bɛ mli. (Mateo 7:1, 2) Yakobo kɛɔ akɛ: “Shwãa mɔbɔnalɛ shwãa eshiɔ kojomɔ.” Kɛ wɔkpɛlɛ Yehowa mumɔ krɔŋkrɔŋ lɛ gbɛtsɔɔmɔ nɔ kɛtsɔ mɔbɔnalɛ kpo ni wɔjieɔ yɛ wɔnifeemɔi fɛɛ mli lɛ nɔ lɛ, abuŋ wɔ fɔ yɛ be mli ni akojoɔ wɔ lɛ. Shi moŋ, abaana wɔ mɔbɔ, ni wɔbaaye kojomɔ ni yɔɔ keketee loo fɔbuu kojomɔ nɔ kunim.
Hemɔkɛyeli Woɔ Yibii ni Ji Nitsumɔi Kpakpai
8. Mɛɛ shihilɛ mli mɔ ni kɛɔ akɛ eyɛ hemɔkɛyeli shi nitsumɔi fataaa he lɛ yɔɔ?
8 Yɛ mɛi ni yɔɔ suɔmɔ ni naa mɔbɔ ni efeɔ wɔ lɛ sɛɛ lɛ, hemɔkɛyeli woɔ nitsumɔi kpakpai krokomɛi akɛ yibii. (Yakobo 2:14-26) Shi, hemɔkɛyeli ni akɛ naabu kɛɔ kɛkɛ ni nitsumɔi bɛ he lɛ hereŋ wɔyiwala. Eji anɔkwale akɛ, wɔnyɛŋ wɔtsɔ Mla nitsumɔi anɔ wɔná jalɛ shidaamɔ yɛ Nyɔŋmɔ hiɛ. (Romabii 4:2-5) Yakobo miiwie nitsumɔi ni hemɔkɛyeli kɛ suɔmɔ kanyaa amɛ lɛ ahe, shi jeee mla nɔ̃. Kɛ sui kpakpai ni tamɔ nɛkɛ kanyaa wɔ lɛ, wɔwieŋ mlihilɛ wiemɔi kɛkɛ wɔtsɔɔŋ naanyo jálɔ ko ni ehia lɛ. Wɔkɛ heloonaa nibii baaye abua nyɛmi nuu loo yoo ni bɛ atade loo hɔmɔ yeɔ lɛ lɛ. Yakobo biɔ akɛ: ‘Kɛ nyɛkɛɛ nyɛmi ko ni ehia lɛ lɛ akɛ: “Nyɛyaa yɛ hejɔlɛ mli: nyɛyawerea la, ni nyɛyayea nii nyɛtɔrɔa” shi akɛ nibii ni he hiaa amɛ lɛ haaa amɛ lɛ, mɛɛ sɛɛnamɔ yɔɔ enɛ he?’ Sɛɛnamɔ ko bɛ he. (Hiob 31:16-22) “Hemɔkɛyeli” ni tamɔ nɛkɛ lɛ egbo!
9. Mɛni tsɔɔ akɛ wɔyɛ hemɔkɛyeli?
9 Ekolɛ wɔkɛ Nyɔŋmɔ webii lɛ ebɔ kɛyashɛ he ko, shi nitsumɔi ni jɛ susuma muu fɛɛ mli pɛ baanyɛ afi kɛɛmɔ ni wɔkɛɔ akɛ wɔyɛ hemɔkɛyeli lɛ sɛɛ. Kɛji akɛ wɔkpoo Triniti tsɔɔmɔ lɛ, ni wɔheɔ wɔyeɔ akɛ anɔkwa Nyɔŋmɔ kome pɛ yɔɔ lɛ, belɛ ehi. Ni kɛlɛ nɔ ko kɛkɛ ni aheɔ ayeɔ lɛ jeee hemɔkɛyeli. “Daimonioi hu heɔ yeɔ” ni amɛhe ‘kpokpoɔ’ kɛ gbeyeishemɔ ejaakɛ hiɛkpatamɔ miimɛ amɛ. Kɛji akɛ wɔyɛ hemɔkɛyeli lɛɛlɛŋ lɛ, ebaatsirɛ wɔ ni wɔwo nitsumɔi ni tamɔ sanekpakpa lɛ shiɛmɔ kɛ niyenii kɛ hehaa nii ni wɔkɛaaha nanemɛi heyelilɔi ni ehia amɛ lɛ. Yakobo biɔ akɛ: “Oo yaka gbɔmɔ [ni Nyɔŋmɔ he anɔkwa nilee bɛ emli], ootao ole akɛ hemɔkɛyeli ni nitsumɔi bɛ he lɛ hemɔkɛyeli gbonyo ni lo?” Hɛɛ, hemɔkɛyeli biɔ nifeemɔ.
10. Mɛni hewɔ atsɛɔ Abraham akɛ ‘mɛi fɛɛ ni heɔ yeɔ lɛ atsɛ’ lɛ?
10 Blematsɛ Abraham ni sheɔ Nyɔŋmɔ gbeyei lɛ hemɔkɛyeli kanya lɛ kɛtee nifeemɔ mli. Ákɛ “mɛi fɛɛ ni heɔ yeɔ . . . lɛ atsɛ” lɛ, “abu lɛ bem beni ekɛ ebi Isak yaŋmɛ afɔleshaa latɛ lɛ nɔ” lɛ. (Romabii 4:11, 12; 1 Mose 22:1-14) Eji Abraham bɛ hemɔkɛyeli akɛ Nyɔŋmɔ baanyɛ atee Isak shi ni eha E-shiwoo ni kɔɔ seshi ko ni baatsɔ emli aba lɛ he lɛ aba mli kulɛ mɛni? Kulɛ Abraham ebɔŋ mɔdɛŋ akɛ ekɛ ebinuu lɛ aaashã afɔle. (Hebribii 11:19) Abraham toiboo nitsumɔi lɛ amli ajɛ “ni ehemɔkɛyeli lɛ ye emuu,” loo ehi kɛwula shi. No hewɔ lɛ, “ŋmalɛ [1 Mose 15:6] lɛ ni kɛɔ akɛ: ‘Shi Abraham he Nyɔŋmɔ eye, ni abu enɛ jalɛ aha lɛ’ lɛ ba mli.” Abraham nitsumɔi ni ji mɔdɛŋ ni ebɔ koni ekɛ Isak ashã afɔle lɛ ma nɔ ni Nyɔŋmɔ etsɔ hiɛ ejaje akɛ Abraham ji jalɔ lɛ nɔ mi. Etsɔ hemɔkɛyeli nitsumɔi anɔ ejie suɔmɔ ni eyɔɔ kɛha Nyɔŋmɔ lɛ kpo ni abatsɛ lɛ akɛ “[Yehowa, NW] shieŋtsɛ.”
11. Mɛɛ hemɔkɛyeli he odaseyeli wɔyɔɔ yɛ Rahab sane lɛ gbɛfaŋ?
11 Abraham ye odase etsɔɔ akɛ “nitsumɔi amli ajɛɔ abuɔ gbɔmɔ bem, shi jeee hemɔkɛyeli kɛkɛ mli.” Enɛ hu ji anɔkwale yɛ Rahab, ajwamaŋ lɛ ni yɔɔ Yeriko lɛ gbɛfaŋ. “Nitsumɔi amli ajɛ abu lɛ bem, beni ehere [Israel] bɔfoi lɛ atuu ni ejie amɛ gbɛ kɛtsɔ gbɛ kroko nɔ” koni amɛnyɛ amɛwi amɛhe kɛjɛ amɛhenyɛlɔi Kanaanbii lɛ ahe yɛ ŋaa mli lɛ. Dani ekɛ Israel saralɔi lɛ aaakpe lɛ, eyoo Yehowa akɛ anɔkwa Nyɔŋmɔ lɛ, ni ewiemɔi ni nyiɛ sɛɛ kɛ ajwamaŋbɔɔ ni etsi ehe kɛjɛ he lɛ ye ehemɔkɛyeli lɛ he odase. (Yoshua 2:9-11; Hebribii 11:31) Yɛ hemɔkɛyeli he nɔkwɛmɔnɔ ni ji enyɔ ni akɛ nitsumɔi tsɔɔ nɛɛ sɛɛ lɛ, Yakobo kɛɛ: “Bɔ ni gbɔmɔtso ni mumɔ bɛ mli lɛ ji gbonyo lɛ, nakai nɔŋŋ hemɔkɛyeli ni nitsumɔi bɛ he lɛ ji hemɔkɛyeli gbonyo.” Kɛ mɔ ko egbo lɛ, hewalɛ loo “mumɔ” ko ni yɔɔ emli ni kanyãa lɛ lɛ bɛ emli, ni enyɛɛɛ etsu nɔ ko. Hemɔkɛyeli kɛkɛ ni akɛ naabu jajeɔ lɛ egbo ni sɛɛnamɔ bɛ he tamɔ gbonyo. Shi kɛji akɛ wɔyɛ hemɔkɛyeli diɛŋtsɛ lɛ, ebaatsirɛ wɔ ni wɔfee nii ni Nyɔŋmɔ gbeyeishemɔ yɔɔ mli.
Ye Nakai Lilɛi lɛ Nɔ!
12. Mɛni esa akɛ onukpai ni yɔɔ asafo lɛ mli lɛ afee?
12 Wiemɔ kɛ nitsɔɔmɔ hu baanyɛ ni ekɛ hemɔkɛyeli he odaseyeli aha, shi ehe miihia ni aye henumɔi anɔ. (Yakobo 3:1-4) Ákɛ tsɔ̃ɔlɔi ni yɔɔ asafo lɛ mli lɛ, onukpai lɛ yɛ gbɛnaa nii ni tsii kɛ akɔntaa kpele ni amɛbaabu amɛha Nyɔŋmɔ. No hewɔ lɛ, esa akɛ amɛkɛ heshibaa apɛi amɛyiŋtoi kɛ hesaai amli. Yɛ nilee kɛ nyɛmɔ sɛɛ lɛ, esa akɛ nɛkɛ hii nɛɛ aná suɔmɔ ni mli kwɔ amɛha Nyɔŋmɔ kɛ amɛnanemɛi heyelilɔi lɛ. (Romabii 12:3, 16; 1 Korintobii 13:3, 4) Esa akɛ onukpai lɛ kɛ amɛ ŋaawoo adamɔ Ŋmalɛi lɛ anɔ. Kɛ́ onukpa ko tɔ̃ yɛ enitsɔɔmɔ mli ni enɛ kɛ naagbai ba mɛi krokomɛi anɔ lɛ, Nyɔŋmɔ baatsɔ Kristo nɔ ekɛ fɔbuu kojomɔ aba enɔ. No hewɔ lɛ, esa akɛ onukpai lɛ aba amɛhe shi ni amɛfee mɛi ni kaseɔ nii, mɛi ni kɛ amɛhe kpɛtɛɔ Nyɔŋmɔ Wiemɔ lɛ he yɛ anɔkwayeli mli.
13. Mɛni hewɔ wɔtɔ̃ɔ yɛ wiemɔ mli lɛ?
13 Tsɔ̃ɔlɔi kpakpai po—yɛ anɔkwale mli lɛ, wɔ fɛɛ—“wɔtɔ̃ɔ babaoo” yɛ emuu ni wɔyeee hewɔ. Tɔ̃mɔ yɛ wiemɔ mli lɛ ji fãtɔɔi ni yeɔ awui waa ni wɔfɔɔ feemɔ lɛ ateŋ ekome. Yakobo kɛɔ akɛ: “Kɛ́ mɔ ko tɔ̃ɔɔ yɛ wiemɔ mli lɛ, lɛ lɛ nuu ni hi kɛwula shi ji lɛ, ni eyɛ hewalɛ akɛ ekɛaawo gbɔmɔtso muu lɛ fɛɛ manyoflɛ.” Wɔtamɔɔɔ Yesu Kristo, no hewɔ lɛ wɔnyɛɛɛ wɔye lilɛi nɔ yɛ emuuyeli mli. Kɛ wɔnyɛ wɔfee nakai lɛ, wɔbaanyɛ wɔye wɔgbɔmɔtso lɛ he nibii krokomɛi lɛ anɔ. Yɛ fɛɛ sɛɛ lɛ, manyoflɛi kɛ okpɔŋɔi adaaŋ dadei haa okpɔŋɔi yaa he ni wɔbaatsɔɔ, ni abaanyɛ atsɔ kudɔɔ bibioo ko nɔ akudɔ lɛlɛ wulu po ni kɔɔyɔi ni naa wa kpalaa lɛ lɛ kɛya he ni kudɔɔtsɛ lɛ sumɔɔ.
14. Yakobo maa bɔ ni ehe hiaa ni wɔbɔ mɔdɛŋ wɔye lilɛi lɛ nɔ lɛ nɔ mi yɛ mɛɛ gbɛ nɔ?
14 Esa akɛ wɔ fɛɛ wɔkpɛlɛ nɔ yɛ anɔkwayeli mli akɛ mɔdɛŋbɔɔ diɛŋtsɛ he miihia koni akɛkudɔ lilɛi lɛ. (Yakobo 3:5-12) Kɛ akɛto okpɔŋɔ he lɛ, manyoflɛ yɛ bibioo; ni nakai ji kudɔɔ kɛ akɛto lɛlɛ he. Ni kɛ akɛto adesa gbɔmɔtso lɛ he lɛ, lilɛi lɛ yɛ bibioo “ni eshwãa nii wuji.” Akɛni Ŋmalɛi lɛ feɔ lɛ faŋŋ akɛ shwãa esaaa Nyɔŋmɔ hiɛ hewɔ lɛ, nyɛhaa wɔtaoa eyelikɛbuamɔ koni wɔkafee nakai. (Lala 12:4, 5; 1 Korintobii 4:7) Eba akɛ wɔɔtsĩ wɔlilɛi hu gbɛ beni awo wɔ mlila, ni wɔkai akɛ la bibioo kɛkɛ woɔ koo muu fɛɛ mli la. Taakɛ Yakobo tsɔɔ lɛ, “lilɛi lɛ hu, la ni” ni ebaanyɛ efite nii babaoo. (Abɛi 18:21) Lilɛi ni anyɛɛɛ nɔ aye lɛ “ji nishaianii ajeŋ”! Jeŋ ni leee Nyɔŋmɔ nɛɛ mli nishaianii sui lɛ fɛɛ kɔɔ lilɛi ni anyɛɛɛ nɔ aye lɛ he. Lɛ ekɛ nibii ni fiteɔ nii ni tamɔ heguɔgbee kɛ apasa tsɔɔmɔ baa. (3 Mose 19:16; 2 Petro 2:1) Te osusuɔ tɛŋŋ? Ani esaaa akɛ wɔhemɔkɛyeli tsirɛɔ wɔ koni wɔtsu nii waa yɛ wɔlilɛi lɛ kudɔmɔ he?
15. Mɛɛ awui lilɛi ni anyɛɛɛ nɔ aye lɛ baanyɛ aye?
15 Lilɛi ni awooo lɛ manyoflɛ lɛ ‘buleɔ wɔ’ kwraa. Akɛ nɔkwɛmɔnɔ lɛ, kɛ amɔ wɔ akɛ wɔmaleɔ shii abɔ lɛ, ekolɛ abaale wɔ akɛ amalelɔi. Shi mɛɛ gbɛ nɔ lilɛi ni anyɛɛɛ aye nɔ lɛ ‘maa adebɔɔ wala koklolonto lɛ naa la’ yɛ? Ehaa shihilɛ feɔ nɔ ko gbonyo ni bɔleɔ shi. Lilɛi kome ni anyɛɛɛ aye nɔ lɛ baanyɛ ahao asafo muu lɛ fɛɛ. Yakobo tsĩɔ “gehena,” Hinom Jɔɔ lɛ tã. Be ko lɛ akɛtsu nii akɛ he ni akɛ gbekɛbii shãa afɔle yɛ, ni ebatsɔ tumu, he ni ashɛrɛɔ Yerusalem jwɛi ashwieɔ ni akɛ la shãa. (Yeremia 7:31) No hewɔ lɛ Gehena ji hiɛkpatamɔ kwraa he okadi. Yɛ shishinumɔ ko naa lɛ, Gehena kɛ ehewalɛ ni fiteɔ nii lɛ toɔ lilɛi ni anyɛɛɛ nɔ aye lɛ he. Kɛji akɛ wɔwooo wɔlilɛi manyoflɛ lɛ, ekolɛ wɔ diɛŋtsɛ hu wɔbaatsɔmɔ mɛi ni la ni wɔshɛre lɛ baagbe. (Mateo 5:22) Abaanyɛ ashwie wɔ kɛjɛ asafo lɛ mli po yɛ mɔ ko ni wɔɔjɛ lɛ lɛ hewɔ.—1 Korintobii 5:11-13.
16. Yɛ nii ni lilɛi ni anyɛɛɛ nɔ aye lɛ baanyɛ afite hewɔ lɛ, mɛni esa akɛ wɔfee?
16 Taakɛ ekolɛ ole kɛjɛ Nyɔŋmɔ Wiemɔ lɛ kanemɔ mli lɛ, Yehowa fã akɛ gbɔmɔ aye bɔɔ nii ni ji kooloi lɛ anɔ. (1 Mose 1:28) Ni ájɔɔ kooloi sɔrɔtoi fɛɛ he. Akɛ nɔkwɛmɔnɔ lɛ, akɛ laalɔɔi komɛi ni átsɔse amɛ tsuɔ nii yɛ gbɔbimɔ mli. Kooloi komɛi ni baanyɛ afata “nii ni wamɔɔ” ni Yakobo tsĩ tã lɛ ahe ji onufui ni ŋkunyaayelɔi kɛtsuɔ nii lɛ. (Lala 58:5, 6) Gbɔmɔ baanyɛ akudɔ bonsoi po, shi akɛ adesai eshafeelɔi lɛ, wɔnyɛŋ wɔjɔɔ lilɛi lɛ he kɛmɔ shi. Shi kɛlɛ, esa akɛ wɔkwa mɛi ajɛmɔ, kɛ heguɔgbee wiemɔi ni yeɔ awui lɛ. Lilɛi ni anyɛɛɛ aye nɔ lɛ baanyɛ afee dɛŋdade ko ni yɔɔ oshara ni ebɔɔ ni gbeɔ mɔ eyi mli obɔ. (Romabii 3:13) Dɔlɛ sane ji akɛ, apasa tsɔ̃ɔlɔi komɛi alilɛi ha mra be mli Kristofoi komɛi tsi amɛhe kɛjɛ Nyɔŋmɔ he. No hewɔ lɛ, nyɛkahãa wɔhãa hemɔkɛyeli kwamɔ wiemɔi ni ebɔɔ yɔɔ mli miiye wɔnɔ, kɛ eji nɔ ni akɛ naabu wie loo aŋma.—1 Timoteo 1:18-20; 2 Petro 2:1-3.
17, 18. Mɛni ni kɛ ehe kpãaa gbee atsɔɔ yɛ Yakobo 3:9-12, ni mɛni esa akɛ wɔfee yɛ enɛ gbɛfaŋ?
17 Nyɔŋmɔ mli hemɔkɛyeli kɛ suɔmɔ ni ayɔɔ akɛ aaasa ehiɛ lɛ baanyɛ abu wɔhe kɛjɛ hemɔkɛyeli kwamɔ he ni ebaanyɛ etsĩ wɔ gbɛ koni wɔkɛ lilɛi lɛ akatsu nii yɛ gbɛ ni kɛ ehe kpãaa gbee nɔ. Beni ewieɔ bɔ ni ekomɛi kɛ amɛhe kpãaa gbee he lɛ, Yakobo kɛɔ akɛ, ‘lilɛi lɛ wɔkɛjɔɔ wɔ-Tsɛ, Yehowa, ni wɔkɛlomɔɔ gbɔmɛi ni abɔ amɛ yɛ Nyɔŋmɔ subaŋ nɔ lɛ.’ (1 Mose 1:26) Yehowa ji wɔ-Tsɛ, akɛni “lɛ moŋ edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ” lɛ hewɔ. (Bɔfoi lɛ Asaji 17:24, 25) Eji Tsɛ hu kɛha Kristofoi ni afɔ amɛ mu lɛ yɛ mumɔŋ shishinumɔ naa. Abɔ wɔ fɛɛ “yɛ Nyɔŋmɔ subaŋ nɔ” yɛ jwɛŋmɔŋ kɛ jeŋba mli sui anaa, ni suɔmɔ, jalɛ saneyeli, kɛ nilee ni feɔ wɔ sɔrɔto yɛ kooloi ahe lɛ fata he. No hewɔ lɛ, te esa akɛ wɔfee wɔnii wɔha tɛŋŋ kɛ́ wɔyɛ hemɔkɛyeli yɛ Yehowa mli?
18 Kɛ eeeba akɛ wɔlomɔ gbɔmɛi lɛ, no baatsɔɔ akɛ wɔmiikpa fai, aloo wɔmiibo wɔtsɛ ni efɔŋ aba amɛnɔ. Akɛni wɔjeee gbalɔi ni Nyɔŋmɔ ekanya amɛ ni akɛ hegbɛ eha wɔ ni wɔtsɛ ni efɔŋ aba mɔ ko nɔ hewɔ lɛ, wiemɔ ni tamɔ nɛkɛ baafee hetsɛ̃ he odaseyeli ni baaha Nyɔŋmɔ ni wɔjɔɔ lɛ lɛ afee efolo. Esaaa akɛ “jɔɔmɔ kɛ loomɔ” fɛɛ jɛɔ daa kome too lɛ nɔŋŋ mli. (Luka 6:27, 28; Romabii 12:14, 17-21; Yuda 9) Kwɛ esha ni eeefee akɛ wɔɔla yijiemɔ lalai wɔha Nyɔŋmɔ yɛ kpeei ashishi, kɛkɛ lɛ yɛ sɛɛ mli lɛ wɔyawie wɔnanemɛi heyelilɔi ahe efɔŋ! Nu ŋma kɛ nu ni jooɔ lɛ fɛɛ nyɛŋ aho kɛjɛ nuhiŋmɛi kome lɛ nɔŋŋ mli. Bɔ ni ‘agbamitso nyɛŋ awo mutso yibii loo wein awo agbamii’ lɛ, nakai nɔŋŋ ŋoo nu nyɛŋ atsɔ̃ nu ŋma. Kɛji akɛ wɔ ni esa akɛ wɔwie nɔ ni hi lɛ, wɔtee nɔ wɔwie wiemɔi ni yeɔ awui lɛ, belɛ nɔ ko ejaaa yɛ mumɔŋ. Kɛji akɛ nɔ ni wɔfɔɔ feemɔ nɛ lɛ, belɛ nyɛhaa wɔsɔlea kɛha Yehowa yelikɛbuamɔ koni wɔkpa wiemɔ ni wɔwieɔ yɛ nɛkɛ gbɛ nɔ lɛ.—Lala 39:2.
Okɛ Nilee ni Jɛ Ŋwɛi Atsu Nii
19. Kɛji akɛ ŋwɛi nilee ji nɔ ni kudɔɔ wɔ lɛ, te wɔbaaná mɛi krokomɛi anɔ hewalɛ wɔha tɛŋŋ?
19 Nilee he miihia wɔ fɛɛ koni wɔwie ni wɔfee nii ni sa mɛi ni yɔɔ hemɔkɛyeli. (Yakobo 3:13-18) Kɛ wɔkɛ woo sheɔ Nyɔŋmɔ gbeyei lɛ, ehaa wɔ ŋwɛi nilee, nyɛmɔ ni aaaha wɔkɛ nilee atsu nii yɛ gbɛ ni ja nɔ. (Abɛi 9:10; Hebribii 5:14) E-Wiemɔ lɛ tsɔɔ wɔ gbɛ ni wɔɔtsɔ nɔ wɔjie ‘nilee ni yɔɔ kpoo’ kpo. Ni akɛni wɔyɔɔ kpoo hewɔ lɛ, wɔhaa toiŋjɔlɛ hiɔ asafo lɛ mli. (1 Korintobii 8:1, 2) Mɛi fɛɛ ni shwãa akɛ amɛji amɛ nanemɛi heyelilɔi lɛ atsɔ̃ɔlɔi kpelei lɛ, ‘amɛmiimale kɛmiishi Kristofoi anɔkwale lɛ’ ni buɔ amɛ henɔwomɔ lɛ fɔ lɛ. (Galatabii 5:26) Amɛ “nilee” lɛ ji “shikpɔŋ nɔ nɔ̃”—ni ji adesai eshafeelɔi ni amɛtsi amɛhe kɛjɛ Nyɔŋmɔ he lɛ anɔ̃. Eji ‘kooloi anɔ̃,’ ejaakɛ heloonaa susumɔi ni. Eji “daimonioi anɔ̃” po, ejaakɛ mumɔi fɔji wóɔ amɛhe nɔ! (1 Timoteo 3:6) No hewɔ lɛ, nyɛhaa wɔkɛ nilee kɛ heshibaa atsua nii, koni wɔkatee shihilɛ ko ni baaha “nishaianii” ni tamɔ heguɔgbee kɛ hiɛaŋkwɛmɔ anyɛ ashwere yɛ mli lɛ shi.
20. Te obaatsɔɔ ŋwɛi nilee mli oha tɛŋŋ?
20 “Nilee ni jɛ ŋwɛi lɛ, tsutsu lɛ ehe tse,” ehaa wɔhe tseɔ yɛ jeŋba mli kɛ mumɔŋ fɛɛ. (2 Korintobii 7:11) “Ehe jɔ,” etsirɛɔ wɔ koni wɔdi toiŋjɔlɛ sɛɛ. (Hebribii 12:14) Ŋwɛi nilee feɔ wɔ ‘hiɛshikalɔi,’ jeee mɛi ni yɔɔ keketee ni ewa akɛ akɛ amɛ aaaye. (Filipibii 4:5) Nilee ni jɛ ŋwɛi lɛ ‘efee klalo kɛha toiboo,’ ehaa toiboo kɛha ŋwɛi nitsɔɔmɔ kɛ gbee ni akɛ Yehowa gbɛjianɔtoo lɛ kpãa lɛ yaa hiɛ. (Romabii 6:17) Nilee ni jɛ ŋwɛi lɛ hu haa wɔfeɔ mɛi ni naa mɔbɔ, musuŋtsɔlɔi. (Yuda 22, 23) Akɛni eyi obɔ kɛ “yibii kpakpai” hewɔ lɛ, ekanyaa mɛi krokomɛi ahe susumɔ kɛ nifeemɔi ni kɛ ejurɔfeemɔ, jalɛ nifeemɔ, kɛ anɔkwale kpãa gbee. (Efesobii 5:9) Ni ákɛ mɛi ni sumɔɔ toiŋjɔlɛ lɛ, wɔnáa “jalɛ yibii” ni shwereɔ yɛ toiŋjɔlɛ shihilɛi ashishi lɛ mli ŋɔɔmɔ.
21. Taakɛ Yakobo 2:1–3:18 tsɔɔ lɛ, mɛɛ nifeemɔi esa akɛ Nyɔŋmɔ mli hemɔkɛyeli ni wɔyɔɔ lɛ atsirɛ wɔ kɛya he?
21 Belɛ eyɛ faŋŋ akɛ, hemɔkɛyeli kanyaa wɔ ni wɔfeɔ nii. Efeɔ wɔ mɛi ni kwɛɛɛ hiɛaŋ, mɛi ni naa mɔbɔ, ni feɔ ekãa yɛ nitsumɔi kpakpai amli. Hemɔkɛyeli yeɔ ebuaa wɔ ni wɔyeɔ lilɛi lɛ nɔ, ni wɔkɛ ŋwɛi nilee tsuɔ nii. Shi jeee saji ni wɔbaanyɛ wɔkase kɛjɛ ewolo lɛ mli lɛ fɛɛ nɛ. Yakobo yɛ ŋaawoo kroko ni baanyɛ aye abua wɔ ni wɔba wɔjeŋ yɛ gbɛ ni sa mɛi ni yɔɔ Yehowa mli hemɔkɛyeli lɛ nɔ.
Te Obaaha Hetoo Oha Tɛŋŋ?
◻ Mɛni ejaaa yɛ mɛi ahiɛaŋkwɛmɔ mli?
◻ Hemɔkɛyeli kɛ nitsumɔi yɛ tsakpaa yɛ mɛɛ gbɛ nɔ?
◻ Mɛni hewɔ ehe hiaa waa akɛ aaaye lilɛi lɛ nɔ lɛ?
◻ Ŋwɛi nilee tamɔ mɛni?