Rahab —Atsɔ Hemɔkɛyeli Nitsumɔi Anɔ Abu Lɛ Jalɔ
BO LƐ susumɔ he okwɛ! Abu yoo ajwamaŋ ko jalɔ yɛ Nyɔŋmɔ hiɛ. Mɛi pii aaakɛɛ akɛ, “Enɛ nyɛŋ aba mli kɔkɔɔkɔ!” Kɛlɛ, nakai pɛpɛɛpɛ eba mli yɛ Rahab, yoo ajwamaŋ ni jɛ blema Kanaan maŋtiase Yeriko lɛ gbɛfaŋ.
Biblia ŋmalɔ Yakobo ŋma akɛɛ “Nitsumɔi amli ajɛɔ abuɔ gbɔmɔ bem [jalɔ], shi jeee hemɔkɛyeli kɛkɛ mli. Nakai nɔŋŋ Rahab, ajwamaŋ lɛ hu, ani jeee nitsumɔi amli ajɛ abu lɛ bem [jalɔ], beni ehere bɔfoi lɛ atuu ni ejie amɛ gbɛ kɛtsɔ gbɛ kroko nɔ lɛ? Ejaakɛ taakɛ bɔ ni gbɔmɔtso ni mumɔ bɛ mli lɛ ji gbonyo lɛ, nakai nɔŋŋ hemɔkɛyeli ni nitsumɔi bɛ he lɛ ji hemɔkɛyeli gbonyo.” (Yakobo 2:24-26) Mɛni hewɔ abu Rahab jalɔ lɛ? Mɛni efee ni ekɛna shidaamɔ ni duromɔ yɔɔ mli nɛkɛ yɛ Nyɔŋmɔ hiɛ lɛ?
Isrealbii lɛ Miiba!
Ha wɔsusu afi 1473 D.Ŋ.B. lɛ he wɔkwɛ. Feemɔ bɔ ni enɛ tee nɔ ha lɛ he mfoniri yɛ ojwɛŋmɔ mli. Awaje Yeriko maŋ lɛ jogbaŋŋ kɛmɔ shi. Rahab ajwamaŋ lɛ shia ma maŋtiase lɛ gbogboi anɔ. Ekolɛ ebaanyɛ edamɔ he ni kwɔ grɔŋŋ nɛɛ ekwɛ bokagbɛ ni ena Yordan faa lɛ mli nui ni eyi kɛteke nɔ ni hoɔ lɛ. (Yoshua 3:15) Ekolɛ ebaanyɛ ena ni lsraelbii lɛ ebɔ ŋsra yɛ faa lɛ naa bokagbɛ lɛ kɛ amɛteŋ asraafoi ni fa fe 600,000. Amɛkɛ lɛ teŋ jɛkɛmɔ feɔ shitoi fioo ko pɛ!
Rahab ena ele bɔ ni Israel feɔ ekaa yɛ tawuu mli lɛ he. Ena enu saji hu ni kɔɔ hewalɛ ni Yehowa jieɔ lɛ kpo lɛ he, titri lɛ beni egbele gbɛ kɛtsɔ Ŋshɔ Tsuru lɛ mli ni lsraelbii lɛ jo foi kɛtsɔ mli lɛ. Belɛ, eka shi faŋŋ akɛ Yordan nui ni eyi babaoo lɛ efeŋ gbɛtsii nii kwraa. Fimɔ be nɛ! Te Rahab baafee enii eha tɛŋŋ?
Rahab Kɔ Eshidaamɔ
Etsɛɛɛ nɔŋŋ ni Rahab na gbɔi enyɔ komɛi ni ekpaaa amɛ gbɛ—saralɔi ni jɛ lsraelbii aŋsara lɛ mli. Amɛmiitao he ko amɛto, ni ehere amɛ kɛba ewe lɛ. Shi jɛmɛ ni amɛtee lɛ he amaniɛbɔɔ yashɛ Yeriko maŋtsɛ lɛ toiaŋ. Oya nɔŋŋ kɛkɛ ni etsu emaŋnɔkwɛlɔi lɛ koni amɛyamɔmɔ amɛ amɛwo tsuŋ.—Yoshua 2:1, 2.
Beni maŋtsɛ lɛ onukpai lɛ shɛ shi lɛ, no mli lɛ Rahab ekɔ eshidaamɔ kɛha Yehowa Nyɔŋmɔ. Maŋtsɛ lɛ onukpai lɛ kɛɛ akɛ: “Jiemɔ hii lɛ ni ba oŋɔɔ, . . . lɛ kɛba.” Rahab eha saralɔi lɛ eyatee yɛ gbɔlɔ niji ni eka yɛ etsu lɛ yiteŋ koni egbi lɛ ateŋ. Ekɛɛ akɛ: “Yɛŋ, hii lɛ ba miŋɔɔ, shi mileee he ni amɛjɛ. Ni eba mli akɛ, beni je ena ni abaaŋa [maŋtiase lɛ] agbo lɛ, ni hii lɛ je kpo; shi mileee he ni hii lɛ tee; nyɛtiua amɛ mramra, ni nyɛaanina amɛ!” (Yoshua 2:3-5) Nakai pɛpɛɛpɛ maŋtsɛ lɛ hii lɛ fee—fɛɛ fee efolo.
Rahab elaka henyɛlɔi lɛ. Amrɔ nɔŋŋ kɛkɛ ni ekɔ shidaamɔ kroko ni jieɔ Yehowa mli hemɔkɛyeli ni eyɔɔ lɛ kpo kɛtsɔ nitsumɔi anɔ. Ekwɔ kɛtee tsu lɛ yiteŋ eyakɛɛ saralɔi lɛ akɛ: “Mile akɛ Yehowa eŋɔ shikpɔŋ lɛ eha nyɛ.” Rahab kpɛlɛ nɔ akɛ ŋmiŋmi emɔmɔ maŋbii lɛ fɛɛ ejaakɛ amɛnu akɛ Nyɔŋmɔ “ha Ŋshɔ Tsuru lɛ mli nu gbi” yɛ lsraelbii lɛ ahiɛ afii 40 ni eho lɛ. Gbɔmɛi lɛ le hu akɛ lsraelbii lɛ kpata Amorbii amaŋtsɛmɛi enyɔ hiɛ. Rahab kɛɛ: “Ni amrɔ ni wɔnu lɛ, wɔtsui fa, ni ekaa bɛ nuu ko nuu ko mli dɔŋŋ yɛ nyɛ hewɔ; ejaakɛ Yehowa, nyɛ-Nyɔŋmɔ lɛ, lɛ ji Nyɔŋmɔ yɛ ŋwɛi ni yɔɔ ŋwɛi shɔŋŋ lɛ kɛ shikpɔŋ ni yɔɔ shishi lɛ nɔ.”—Yoshua 2:8-11.
Rahab kpa fai akɛ: “Agbɛnɛ, miikpa nyɛ fai, nyɛnaa Yehowa nyɛtsɔa mi akɛ gbii abɔ ni mifee nyɛ ejurɔ nɛɛ, nyɛ hu nyɛaafee mitsɛ we lɛ ejurɔ nakai, ni nyɛtsɔɔ mi anɔkwa okadi ko, akɛ nyɛaahere mitsɛ kɛ minyɛ kɛ minyɛmimɛi hii kɛ minyɛmimɛi yei kɛ nii fɛɛ ni amɛyɔɔ lɛ ayiwala.”—Yoshua 2:12, 18.
Hii lɛ kpɛlɛ nɔ, ni amɛkɛɛ Rahab nɔ ni sa akɛ efee. Esa akɛ ekɛ taŋkpee tsuru lɛ ni eha saralɔi lɛ tsotsoro he kɛyi Yeriko gbogboi lɛ asɛɛ lɛ atsotsoro esamfɛlɛ lɛ naa. Esa akɛ ebua eweku lɛ naa ewo ewe lɛ, ni jɛi ji he ni sa akɛ amɛhi ni ahere amɛyiwala. Rahab kɛ shikpɔŋ lɛ shikamɔ he sane ni he baaba sɛɛnamɔ lɛ ha saralɔi ni yaa lɛ ni ekɛɛ amɛ bɔ ni amɛaafee ni amɛjo amɛsɛɛtiulɔi lɛ amɔɔmɔ naa foi. Saralɔi lɛ jo amɛsɛɛtiulɔi lɛ anaa foi lɛlɛŋ. Beni ekɛ taŋkpee tsuru lɛ etsotsoro shi ni ebua eshiabii lɛ anaa egbe naa lɛ, Rahab tee nɔ emɛ nibii ni baaba yɛ sɛɛ.—Yoshua 2:14-24.
Mɛni Rahab etsu? No ji akɛ, etsɔɔ akɛ ena Nyɔŋmɔ Ofe, Yehowa mli hemɔkɛyeli! Ebaahi shi yɛ etaomɔ nii anaa. Hɛɛ, ni abaabu lɛ jalɔ yɛ nakai hemɔkɛyeli nitsumɔi lɛ ahewɔ.
Gbogboi lɛ Kumɔ Shwie Shi!
Otsii fioo komɛi ho. Osɔfoi lɛ fata amɛhe —mɛi komɛi hiɛ too agboi akolontoi ni mɛi krokomɛi hu tere kpaŋmɔ adeka krɔŋkrɔŋ lɛ —kɛkɛ ni Israel tabilɔi lɛ bɔi Yeriko he bɔlemɔ. Gbii ekpaa sɔŋŋ nɛ ni amɛfeɔ enɛ shikome daa gbi. Shi yɛ gbi ni ji gbi kpawo nɛɛ nɔ lɛ, amɛnyiɛ kɛbɔle maŋtiase lɛ shii ekpaa momo. Naa, amɛ amɛyaa ekoŋŋ lɛ!
Beni agbe maŋ lɛ hebɔlemɔ ni ji kpawo lɛ naa lɛ, akolontoi ni akɛ be kakadaŋŋ kpãa lɛ agbɛɛmɔ yi kɔɔyɔŋ obɔ. Kɛkɛ ni Israelbii lɛ kɛ ekaa bo. Kɛkɛ ni Yehowa ha Yeriko gbogboi ni buɔ maŋ lɛ he lɛ bɔi kuumɔ kɛ shishwiemɔ tamɔ nugbɔshiimɔ gbɛɛmɔi. Efa ni Rahab shia ma nɔ lɛ pɛ ma shi lolo. Akpata maŋtiase lɛ fai ni shwɛ lɛ kɛ emlibii lɛ ahiɛ. Akɛni ekɛ nitsumɔi fi ehemɔkɛyeli lɛ sɛɛ hewɔ lɛ, ahere yoo ajwamaŋ ni tsake etsui lɛ kɛ eshiabii fɛɛ ayiwala, ni ebɔi Yehowa webii lɛ ateŋ hilɛ.—Yoshua 6:1-25.
Rahab Sui lɛ Amlipɛimɔ
Rahab jeee yoo hejɔlɔ ni efite, ni feɔ anihao, ejaakɛ aka gbɔlɔ niji yɛ etsu lɛ yiteŋ ni egbi yɛ hulu lɛ nɔ. Akɛ gbɔlɔ lɛ mli kpãi lɛ baafee kalala. Agbɛnɛ, kpãi tsuji hu yɛ ni abua naa yɛ Rahab shia lɛ mli. (Yoshua 2:6, 18) No hewɔ lɛ, ekolɛ ekɛfeɔ kalala ni eeenyɛ eba akɛ eyɛ tsofa ni akɛtsakeɔ nɔ ko su he ŋaa. Hɛɛ, Rahab ji yoo ko ni hiɛ wa kɛ nitsumɔ. Nɔ ni fe fɛɛ lɛ, ebana Yehowa he gbeyeishemɔ ni woo yɔɔ mli.—Okɛto Abɛi 31:13, 19, 21, 22, 30 he.
Ni Rahab nitsumɔ kroko lɛ hu? Ejeee mɔ ni hereɔ gbɔi yɛ gbɔi atoohe ko kɛkɛ. Dabi, Ŋmalɛi lɛ kɛ Hebri kɛ Hela wiemɔi ni tsɔɔ yoo ajwamaŋ lɛ tsɛɔ lɛ. Akɛ nɔkwɛmɔ nɔ lɛ, Hebri wiemɔ zoh-nah’ lɛ kɔɔ jeŋba shara mli wekukpaa he. Abuuu ajwamaŋ shihilɛ akɛ jeŋba shara mli jarayeli ni yeɔ awui yɛ Kanaanbii lɛ ateŋ.
Yoo ajwamaŋ ni Yehowa kɛtsu nii lɛ tsɔɔ emɔbɔnalɛ ni fa. Kponɔgbɛ okadii baanyɛ alaka wɔ, shi Nyɔŋmɔ lɛ “tsui ekwɛɔ.” (1 Samuel 16:7) No hewɔ lɛ, yei ajwamaŋi ni yɔɔ tsui jurɔ ni tsakeɔ amɛtsui kɛjɛɔ amɛ ajwamaŋ shihilɛ mli lɛ baanyɛ ana Nyɔŋmɔ dɛŋ eshaifaa. (Okɛto Mateo 21:23, 31, 32.) Rahab diɛŋtsɛ fɔ̃ɔ eshafeemɔ ni etsɔ jalɛ gbɛ lɛ nɔ ena ŋwɛi nɔkpɛlɛmɔ.
Israel saralɔi lɛ hi shi yɛ Nyɔŋmɔ Mla naa, no hewɔ lɛ amɛtooo Rahab we lɛ yɛ jeŋba shara yiŋtoi komɛi ahewɔ. Ekolɛ amɛyiŋtoo ji anyɛŋ ayoo amɛ tsɔ akɛ amɛyɛ yoo ajwamaŋ ko shia. Shia lɛ ni atswa ama maŋtiase lɛ gbogbo nɔ lɛ hu baanyɛ eha amɛfoijee kɛ jɛmɛ shimɔ afee oya. Eka shi faŋŋ akɛ Yehowa nyiɛ amɛhiɛ kɛtee eshafeelɔ ko ni bɔ ni ajɛ ŋwɛi akɛ lsraelbii lɛ ye ha lɛ he amaniɛbɔɔ esa etsui he yɛ gbɛ kpakpa nɔ akɛ etsake etsui ni etsake egbɛi lɛ ŋɔɔ. Nyɔŋmɔ wiemɔ ni ekɛha lsraelbii lɛ akɛ amɛkpata Kanaanbii lɛ ahiɛ yɛ amɛjeŋba shara nifeemɔi lɛ hewɔ, kɛ ejɔɔmɔ ni ekɛba Rahab nɔ kɛ agbɛnɛ Yeriko hiɛkpatamɔ lɛ nɔ lɛ feɔ lɛ faŋŋ akɛ saralɔi lɛ kɛ amɛhe wooo jeŋba shara mli.—3 Mose 18:24-30.
Ni lakamɔ wiemɔi ni Rahab kɛlaka mɛi ni tiuɔ saralɔi lɛ asɛɛ lɛ hu? Nyɔŋmɔ kpɛlɛ egbɛ ni etsɔ nɔ lɛ nɔ. (Okɛto Romabii 14:4 he.) Ekɛ ehe wo oshara mli bɔni afee ni ekɛbu esɔɔlɔi lɛ ahe, ni yeɔ ehemɔkɛyeli lɛ he odase. Yɛ be mli ni amale ni gbeɔ mɔ he guɔ lɛ ejaaa yɛ Yehowa hiɛ lɛ, gbɛnaa nii kaaa mɔ ko nɔ akɛ ejie anɔkwa sane ko kpo etsɔɔ mɛi ni jeee amɛgbɛnaa ji akɛ amɛaale. Yesu Kristo po etsɔɔɔ nii amli fitsofitso loo ni eeeha hetoi tɛɛ kɛ nakai feemɔ kɛ naagba ni esaaa aaaba enɔ. (Mateo 7:6; 15:1-6; 21:23-27; Yohane 7:3-10) Eka shi faŋŋ akɛ, nakai jwɛŋmɔ naa nɔŋŋ hu akɛkwɛɔ bɔ ni Rahab laka henyɛlɔi asraafoi lɛ.
Rahab Nyɔmɔwoo
Te awo Rahab nyɔmɔ aha tɛŋŋ yɛ hemɔkɛyeli ni ejie lɛ kpo lɛ hewɔ? Eka shi faŋŋ akɛ eyi ni abaa yɛ Yeriko hiɛkpatamɔ lɛ mli lɛ ji jɔɔmɔ ni jɛ Yehowa ŋɔɔ. Sɛɛ mli lɛ, ekɛ Salma ni ji ŋa lɛ nɔ lumɔ Nahashon ni jɛ Yuda akutso lɛ mli lɛ binuu bote gbalashihilɛ mli. Akɛ fɔlɔi kɛha Nyɔŋmɔjalɔ Boaz lɛ, Salma kɛ Rahab feɔ tsakpaa ko yɛ seshi ni yaa aahu kɛyashiɔ Israel Maŋtsɛ David nɔ lɛ mli. (1 Kronika 2:3-15; Rut 4:20-22) Nɔ ni sa kadimɔ fe fɛɛ lɛ, tsutsu Rahab yoo ajwamaŋ lɛ ji yei ejwɛ pɛ ni atsi amɛgbɛi ata yɛ Mateo weku shishitsɔɔmɔ ni kɔɔ Yesu Kristo he lɛ ateŋ mɔ kome. (Mateo 1:5, 6) Mɛɛ jɔɔmɔ ni jɛ Yehowa ŋɔɔ enɛ ji nɛkɛ!
Eyɛ mli akɛ ejeee Israelnyo ni tsutsu ko lɛ eji yoo ajwamaŋ moŋ, shi Rahab ji nɔkwɛmɔ nɔ ni mli wa ni tsɔɔ yoo ko ni kɛ enitsumɔi tsɔɔ akɛ eyɛ Yehowa mli hemɔkɛyeli (Hebribii 11:30, 31) Ebaana nyɔmɔwoo kroko hu tamɔ bɔ ni eji yɛ mɛi krokomɛi ni amɛteŋ mɛi komɛi ekwa ajwamaŋ shihilɛ lɛ agbɛfaŋ lɛ—shitee kɛmiijɛ gbohii ateŋ kɛmiiya shihilɛ yɛ paradeiso shikpɔŋ nɔ. (Luka 23:43) Akɛni ekɛ nitsumɔi fi ehemɔkɛyeli lɛ sɛɛ hewɔ lɛ, Rahab na wɔŋwɛi Tsɛ ni yɔɔ suɔmɔ ni ŋɔfaa lɛ nɔkpɛlɛmɔ. (Lala 130:3, 4) Ni eka shi faŋŋ akɛ enɔkwɛmɔ nɔ kpakpa lɛ woɔ mɛi fɛɛ ni sumɔɔ jalɛ nifeemɔ lɛ hewalɛ koni amɛkwɛ Yehowa Nyɔŋmɔ gbɛ kɛha naanɔ wala.
[Mfoniri ni yɔɔ baafa 23]
Abu Rahab jalɔ ejaakɛ enitsumɔi lɛ tsɔɔ hemɔkɛyeli ni eyɔɔ
[Mfoniri ni yɔɔ baafa 24]
Shitsalɔi etsa blema Yeriko hiɛkpatamɔ lɛ mli nibii komɛi kɛba, ni mra be mli gbogbo lɛ fa fioo ko fata he
[He ni Sane lɛ Jɛ]
Pictorial Archive (Near Eastern History) Est.