Nɔ ni Esa akɛ Ole yɛ Awuŋayeli He
MƐNI ji awuŋayeli? Eji henumɔ ko ni mli wa waa ni baaha mɔ ko afee yeyeeye, ewerɛ aho ehe, loo emli afu. Ekolɛ wɔbaanu awuŋayeli he beni efeɔ tamɔ nɔ ni mɔ ko eye omanye babaoo yɛ nitsumɔ ko mli fe bɔ ni wɔfee. Aloo ekolɛ wɔbaaye awuŋa beni naanyo ko nine shɛɔ yijiemɔ babaoo nɔ fe wɔ. Shi ani be fɛɛ be awuŋayeli ehiii?
Gbɔmɛi ni awuŋayeli ena amɛnɔ hewalɛ lɛ jieɔ amɛhiɛ amɛkaa mɛi ni amɛsusuɔ akɛ amɛkɛ amɛ shiɔ akaŋ lɛ. Blema Israel Maŋtsɛ Saul ji enɛ he nɔkwɛmɔ nɔ. Klɛŋklɛŋ lɛ, ena suɔmɔ kɛha etawuu-nii-hiɛlɔ, David, ni ekɛ lɛ fee asraafoi lɛ ahiɛnyiɛlɔ po. (1 Samuel 16:21; 18:5) Kɛkɛ ni gbi ko lɛ Maŋtsɛ Saul nu ni yei kɛ wiemɔi nɛɛ miijie David yi: “Saul egbe ekpekpei lɛ, shi David egbe ekpei-nyɔŋmanyɔŋmai lɛ!” (1 Samuel 18:7) Kulɛ esaaa akɛ Saul haa enɛ fiteɔ wekukpaa kpakpa ni ka ekɛ David teŋ lɛ. Shi, emli fu. “Ni kɛjɛ nakai gbi lɛ nɔ kɛyaa lɛ, Saul jie ehiɛ eka David.”—1 Samuel 18:9.
Ekolɛ awuŋayelɔ lɛ basumɔŋ ni efɔŋ aba mɔ kroko nɔ. Ekolɛ esumɔɔɔ omanye ni enaanyo lɛ eye lɛ kɛkɛ, ni ebaashwe ni ena hesaai loo shihilɛi lɛ nɔŋŋ eko. Yɛ gbɛ kroko nɔ lɛ, hiɛkɔ̃ɔ ji awuŋayeli ni ehiii lɛ fã ko diɛŋtsɛ. Gbɔmɔ hiɛkɔ̃lɔ baanyɛ ekɛ nɔ ko kpakpa ko atee mɔ ni teeɔ ewuŋayeli shi lɛ, loo ebaasumɔ ni efɔŋ ko anina nakai mɔ lɛ. Yɛ bei komɛi amli lɛ hiɛkɔlɔ lɛ nyɛŋ ekɛ ehenumɔi atee. Enɛ baanyɛ atsirɛ lɛ ni eye mɔ ko awui yɛ faŋŋ mli, tamɔ bɔ pɛ ni Maŋtsɛ Saul bɔ mɔdɛŋ ni egbe David lɛ. Saul fɔ̃ akpɔlɔ fe shikome koni “[ekɛ]tsu David kɛmɔ gbogbo.”—1 Samuel 18:11; 19:10.
Ekolɛ, obaakɛɛ akɛ, ‘Shi mijeee awuŋayelɔ.’ Eyɛ mli, ekolɛ awuŋayeli kudɔɔɔ oshihilɛ. Shi, awuŋayeli saa wɔ fɛɛ wɔhe yɛ gbɛ ko nɔ—wɔ awuŋayeli henumɔi kɛ mɛi krokomɛi anɔ̃. Eyɛ mli akɛ wɔhe feɔ oya kɛ mɛi krokomɛi awuŋayeli kadimɔ moŋ, shi wɔbaafee shɔ̃ɔ yɛ enamɔ yɛ wɔ diɛŋtsɛ wɔmli.
‘Su ni Haa Anaa Hiɛkɔ̃ɔ’
Adesa eshafeemɔ su, ni Nyɔŋmɔ Wiemɔ ni ji Biblia lɛ jieɔ lɛ kpo ni aŋma afɔ shi lɛ fɔɔ hiɛkɔ̃ɔ he eshai anɔmimaa. Ani okaiɔ Kain kɛ Habel sane lɛ? Adam kɛ Hawa bihii nɛɛ fɛɛ sha afɔlei amɛha Nyɔŋmɔ. Habel fee nakai ejaakɛ eji nuu ni yɔɔ hemɔkɛyeli. (Hebribii 11:4) Eyɛ hemɔkɛyeli yɛ Nyɔŋmɔ nyɛmɔ ni ekɛaaha E-yiŋtoi wuji ni kɔɔ shikpɔŋ lɛ he lɛ aba mli lɛ mli. (1 Mose 1:28; 3:15; Hebribii 11:1) Habel he eye hu akɛ Nyɔŋmɔ kɛ wala baawo adesai anɔkwafoi nyɔmɔ yɛ shikpɔŋ nɔ Paradeiso ni baa lɛ mli. (Hebribii 11:6) No hewɔ lɛ, Nyɔŋmɔ mii shɛ Habel afɔleshãa lɛ he. Eji Kain na suɔmɔ diɛŋtsɛ kɛha enyɛmi nuu lɛ kulɛ, ebaana miishɛɛ akɛ Nyɔŋmɔ jɔɔ Habel. Shi moŋ, Kain “mli wo la naakpa.”—1 Mose 4:5.
Nyɔŋmɔ wo Kain hewalɛ koni efee ekpakpa koni lɛ hu enine ashɛ jɔɔmɔ nɔ. Kɛkɛ ni Nyɔŋmɔ bɔ kɔkɔ akɛ: “Shi kɛji ofeee ekpakpa lɛ, esha bu shinaa lɛ shi, ni bo osɛɛgbɛ etaoɔ; shi bo lɛ ye enɔ.” (1 Mose 4:7) Mɔbɔ sane ji akɛ, Kain yeee ewuŋayeli kɛ mlila lɛ nɔ. Etsirɛ lɛ ni egbe enyɛmi jalɔ lɛ. (1 Yohane 3:12) Kɛjɛ nakai be lɛ mli kɛbaa nɛɛ, nɔmɔi kɛ tawuui egbe gbɔmɛi foji akpekpei ohai abɔ. The World Book Encyclopedia lɛ tsɔɔ mli akɛ: “Shishijee nibii ni kɛ tawuu baa lɛ ekomɛi baanyɛ afee bɔ ni ashweɔ ni ana shikpɔji babaoo, bɔ ni ashweɔ ninamɔ babaoo, bɔ ni ashweɔ hewalɛ babaoo, loo bɔ ni ashweɔ ni ahi shi shweshweeshwe.”
Anɔkwa Kristofoi kɛ amɛhe wooo je nɛŋ tai lɛ amli. (Yohane 17:16) Shi, nɔ ni yɔɔ awerɛho ji akɛ, yɛ bei komɛi amli lɛ, aŋkroaŋkro Kristofoi komɛi kɛ amɛhe woɔ naabu nɔmɔi amli. Kɛ asafo lɛ mli bii komɛi yafi afã ko sɛɛ lɛ, nɛkɛ nɔmɔi nɛɛ baanyɛ atsɔ naabu tawuui ni yeɔ awui. Biblia ŋmalɔ Yakobo bi enanemɛi heyelilɔi lɛ akɛ: “Nɛgbɛ tawuui kɛ nɔmɔi ni yɔɔ nyɛteŋ lɛ jɛ?” (Yakobo 4:1) Eha nakai sanebimɔ lɛ hetoo kɛtsɔ amɛ heloonaa hiɛjoomɔi ni ekpa he mama lɛ nɔ, ni ekɛfata he akɛ, “Nyɛyaa nɔ . . . nyɛhaa nyɛhiɛ kɔ̃ɔ nii anɔ,” loo “nyɛyeɔ awuŋa.” (Yakobo 4:2, NW, shishigbɛ niŋmaa) Hɛɛ, heloonaa nibii asɛɛdii baaha mɔ ko hiɛ akɔ̃ nii anɔ ni amɛye mɛi ni etamɔ nɔ ni shihilɛi ehi kɛha amɛ lɛ ahe awuŋa. Yɛ enɛ hewɔ lɛ, Yakobo bɔ kɔkɔ eshi adesa ‘hiɛkɔ̃ɔ su’ lɛ.—Yakobo 4:5.
Mɛɛ sɛɛnamɔ yɔɔ nibii ni kɛ awuŋayeli baa lɛ mlipɛimɔ mli? Ojogbaŋŋ, enɛ baanyɛ aye abua wɔ ni wɔye anɔkwa ni ebaaha wekukpaa kpakpa aba wɔkɛ mɛi krokomɛi ateŋ. Ebaaye ebua wɔ ni wɔnu sane shishi, wɔŋmɛ wɔtsui shi, ni wɔkɛ sane ake babaoo. Nɔ ni hi fe fɛɛ lɛ, emaa bɔ ni Nyɔŋmɔ gbɛjianɔtoo ni suɔmɔ yɔɔ mli kɛha yiwalaheremɔ kɛ kpɔmɔ kɛmiijɛ adesa eshafeemɔ sui lɛ amli lɛ he hiaa gbɔmɔ waa ha lɛ nɔ mi.—Romabii 7:24, 25.
Jeŋ ni Eshafeemɔ Awuŋayeli Bɛ Mli
Kɛ akwɛ sane lɛ yɛ adesa susumɔ naa lɛ, jeŋ ni eshaafeemɔ awuŋayeli bɛ mli lɛ baatamɔ nii ni nyɛŋ aba. Niŋmalɔ Rom Landau kpɛlɛ nɔ akɛ: “Yinɔi babaoo mli nilee ni abua naa, kɛ nɔ ni jeŋ nilelɔi . . . kɛ jwɛŋmɔ he nilelɔi fɛɛ ewie yɛ sane lɛ he lɛ kɛ gbɛtsɔɔmɔ ko haaa gbɔmɔ ni awuŋayeli piiɔ lɛ lɛ. . . . Ani datrɛfonyo ko etsa nuu awuŋayelɔ ko pɛŋ?”
Shi, Nyɔŋmɔ Wiemɔ lɛ kɛ hiɛnɔkamɔ haa akɛ nine baashɛ adesa shihilɛ ni yeɔ emuu nɔ, yɛ jeŋ hee ko ni awuŋayeli loo hetsɛ̃ ni Nyɔŋmɔ gbeyeishemɔ bɛ mli haoŋ mɔ ko mɔ ko dɔŋŋ mli. Agbɛnɛ hu, gbɔmɛi ni jieɔ sui gbohii ni tamɔ nɛkɛ kpo lɛ fiteŋ nakai jeŋ hee lɛ mli toiŋjɔlɛ lɛ.—Galatabii 5:19-21; 2 Petro 3:13.
Kɛlɛ, jeee awuŋayeli fɛɛ ehiii lɛ. Yɛ anɔkwale mli lɛ, Biblia lɛ kɛɔ akɛ Yehowa “ji Mawu awuŋayelɔ.” (2 Mose 34:14) Mɛni no tsɔɔ? Ni mɛni Biblia lɛ kɛɔ yɛ awuŋayeli ni ja he? Yɛ nakai beaŋ nɔŋŋ lɛ, te mɔ ko aaafee tɛŋŋ aye awuŋayeli ni ejaaa nɔ? Kwɛmɔ saji ni aŋmala kɛnyiɛ enɛ sɛɛ lɛ.