Omumɔ​—Te Ooofee Tɛɛŋ Oye Nɔ?

WƆFƐƐ wɔyɛ wɔsui komɛi ni akɛ bɔwɔ aloo wɔna kɛjɛ wɔ fɔlɔi ni yeee emuu lɛ aŋɔɔ, ni enɛ tsɔɔ nɔ̃ su ni wɔhiɛ lɛ kɛya shɛɔ heko.Agbɛnɛ hu nibii ni ebɔle wɔhe kɛkpe kɛ bɔni atsɔse wɔ aha lɛ hu naa hewalɛ yɛ wɔ su kɛ baŋ nɔ babaoo. Ani esa akɛ wɔku wɔhiɛ wɔshwie sane lɛ nɔ ni wɔkɛɛ akɛ, “Minyɛŋ mafee bɔni miyɔɔ lɛ he nɔ ko”? Eka shi faŋŋ akɛ enɛ jeee gbɛ ni Biblia lɛ tsɔɔ wɔ. Shi moŋ awoɔ wɔ hewalɛ ni ‘wɔtsake wɔ jwɛŋmɔ’ ni “wɔwo gbɔmɔ hee” lɛ. Enɛ tsɔɔ akɛ wɔbaawuu wɔshi “gbɔmɔ momo” lɛ ni wɔjie esui fɔji lɛ kɛjɛ wɔhe wɔshwie​—Efe. 4:​20-24; Rom. 12:⁠2.

Wɔyeŋ omanye yɛ bei komɛi amli moŋ, ejaakɛ gbɔmɔ ko bɛ ni aaanyɛ aye emumɔ nɔ yɛ emuuyeli mli. Shi, kɛji akɛ wɔsusu Nyɔŋmɔ Wiemɔ lɛ he ni wɔsɔle wɔbi emumɔ lɛ koni etsɔɔ wɔ gbɛ lɛ, wɔbaanyɛ wɔfee babaoo ni wɔkɛte shi wɔwo “mumɔ” ni ehiii ni ekolɛ wɔyɔɔ lɛ, ni wɔye nɔ. (Luka 11:​13; Gal. 5: 22, 23, 25) Mɛni baanyɛ aye abua wɔ ni wɔfee enɛ?

Nii Ni Yeɔ Bua Koni Wɔye Nɔ

Bɔ fɛɛ bɔ ni nɔ ni aaaha wɔmli afu lɛ ji lɛ, nibii sɔrɔtoi yɛ ni wɔbaanyɛ wɔsusu he ni baaye abuɔ wɔ ni wɔfee dioo yɛ nɔnyɛɛ shishi. Nyɛhaa wɔsusua ŋaawooi sɔrɔtoi etɛ ni ye ebua mɛi komɛi lɛ ahe.

Kaa Bo Diɛŋtsɛ Ohe Okwɛ. Kɛji akɛ wɔtao wɔhenumɔi amli lɛ eyeɔ ebuaa. Wɔbaanyɛ: wɔsusu naagba lɛ he, ni wɔbi wɔhe “nɔ hewɔ” ni wɔhao lɛ. Yɛ bei pii lɛ kɛ wɔfee enɛ lɛ wɔnaa akɛ “nɔ̃ hewɔ” lɛ jeee nɔ ko kwraa. Aloo ekolɛ wɔbaayoo su ko ni yɔɔ wɔmli ni wɔleee akɛ eyɛ.

Sɛɛnamɔ ni yɔɔ wɔ diɛŋtsɛ wɔhe ni wɔɔɔka wɔkwɛ lɛ mli ji akɛ egbalaa wɔjwɛŋmɔ kɛbaa nɔ ni kɔɔ wɔ diɛŋtsɛ wɔhe yɛ naagba lɛ mli lɛ nɔ, koni wɔfee he nɔ ko, fe moŋ ni wɔnijiaŋ aaaje wui kɛtsɔ mɔ kroko lɛ fatɔɔi ni wɔɔsusu he lɛ nɔ, yɛ be mli ni wɔnyɛŋ wɔfee he nɔ ko. Saji ni wɔɔnyɛ wɔbi wɔhe lɛ ekomɛi nɛ: Ani mɛi krokomɛi asui aloo amɛ fatɔɔi haoɔ mi? Kɛji nakai ni lɛ, ani akɛni amɛsu lɛ kɛ Ŋmalɛi kpaaa hewɔ, aloo ejɛ bɔni atsɔse mi aha ni esoro no yɛ amɛ nɔ̃ lɛ he lɛ hewɔ? (Yɛ naagbee sanebimɔ nɛɛ mli lɛ ekolɛ naagba lɛ jɛ wɔ diɛŋtsɛ moŋ fe mɔ kroko lɛ.) Ani mimli fuɔ kɛji akɛ agbe, mi, aloo maŋ nɔ mijɛ aloo miweku lɛ he guɔ? Aloo kɛji aawo mi ŋaa lɛ, mimli fuɔ? Kɛ nakai ni lɛ, ani ekolɛ misusuɔ mihe fe nine tsɔ, ni etsɛɛɛ ni sane dɔɔ mi? Ani mɔ ko diɛŋtsɛ yɛ ni haoɔ mi? Ani (kɛji miji nɔkwɛlɔ aloo fɔlɔ lɛ) minijiaŋ jeɔ wui kɛ anyiɛɛɛ ŋaawoo sɛɛ?

Wɔbaanyɛ wɔtsɔ wɔdiɛŋtsɛ wɔhe ni wɔɔɔka wɔkwɛ nɛɛ nɔ wɔyoo heni wɔtɔɔ fɔ yɛ. No baaha wɔnyɛ ‘wɔgbála wɔgbɔmɔtso lɛ mai’ ni wɔwuu waa ni wɔye nɔ.​—1 Kor. 9:⁠27.

Jee Gbɛ Okwɛ Mɔkroko lɛ Jogbaŋŋ. Kɛ mɔ ko wo wɔmli la lɛ wɔfɔɔ etɔmɔ lɛ pɛ namɔ. No hewɔ lɛ eyeɔ ebuaa kɛji wɔɔɔnyɛ wɔkwɛ lɛ yɛ gbɛ ni Nyɔŋmɔ kwɛɔ lɛ lɛ nɔ. Ani nuu loo yoo lɛ ejɔɔ ehe nɔ eha Yehowa ni esumɔɔ lɛ? Yɛ fɛɛ sɛɛ lɛ, ani gbɔmɔ lɛ miijie “mumɔ” kpakpa kpo, ni ekolɛ nɔ bibioo kome loo enyɔ ko pɛ etɔɔ fa yɛ mli? Kɛji nakai ni lɛ, ani efeŋ nɔ ni sɛɛnamɔ yɔɔ he akɛ wɔɔɔsusu ‘ejalɛ,’ ‘ehe tsemɔ,’ kɛ esui ni ‘suɔmɔ yɔɔ mli’ lɛ ahe.​—Fil. 4:⁠8.

Yɛ anɔkwale mli lɛ, ani ebaafee nɔ ni ja aloo nɔni sa akɛ wɔɔɔkojo mɔ ko yɛ nɔ kome loo nibii enyɔ ko ni ji sui ni haoɔ wɔ, tamɔ nɔ ni wɔje gbɛ ni wɔsumɔɔɔ ni wɔna nɔkpakpa ko kwraa yɛ emli? Mɛni hewɔ esa akɛ wɔkojo mɛi krokomɛi yɛ be mli ni wɔhenumɔi yɛ nakai be lɛ mli lɛ ji nɔ ni baana wɔkojomɔi anɔ hewalɛ lɛ? Yakobo ha sane lɛ mli ka shi faŋŋ, ni ebi akɛ: “Namɔ jio ni okojoɔ onaanyo?”​—Yak. 4:⁠12.

Bɔɔ Mɔdɛŋ ni Ona Bɔni Mɔ Kroko lɛ Susuɔ. Enɛ feemɔ bɛ mlɛo, titri lɛ yɛ be mli ni nɔ ni esusuɔ lɛ teɔ shi woɔ wɔ nɔ lɛ. Shi nɔ ni wɔfeɔ akɛ wɔɔɔbɔ mɔdɛŋ ni wɔna nii yɛ bɔni enaa lɛ lɛ nɔ lɛ yeɔ ebuaa yɛ bei komɛi ni ejieɔ wɔhenumɔi lɛ kɛyaa ni ehaa wɔfeɔ dioo. Kɛ hoo kwraa lɛ wɔbaanyɛ wɔnu nɔ hewɔ ni efee enii nakai lɛ shishi. Yɛ anɔkwale mli lɛ, kɛ wɔfee enɛ lɛ wɔkɛ ŋaawoo ni bɔfo Paulo kɛha Filipibii lɛ miitsu nii akɛ, “nyɛbubua nyɛnanemɛi fe nyɛdiɛŋtsɛ nyɛhe; nyɛteŋ mɔ fɛɛ mɔ akafo enɔ mli, shi efo enaanyo nɔ mli.”​—Fil. 2: 3, 4.

Enɛ yeɔ ebuaa wɔ ni wɔkwa oshara ni yɔɔ mɔ ko ni wɔɔkojo lɛ ni wɔnuko saji enyɔ lɛ fɛɛ mli lɛ. (Abɛi 18:13) Shishijee mli lɛ ebaatamɔ nɔ ni wɔsane ja kwraa yɛ be mli ni wɔnyɛmi lɛ sane lɛ ejaaa. Shi kɛji akɛ wɔkwɛ nibii amli jogbaŋŋ lɛ, wɔnaa akɛ ebɛ mlɛo. Abɛi 18:17 wie yɛ nilee mli akɛ: “Klɛŋklɛŋ nuu ni baawie yɛ saneyelihe lɛ sane lɛ bafeɔ tamɔ nɔ ni eja kɛyashiɔ be mli ni mɔ ni teɔ shi woɔ lɛ lɛ biɔ lɛ saji.”​—Today’s English Version.

Yaa Nɔ Ni Otsu He Nii

Kɛ wɔnyiɛ nɛkɛ ŋaawooi nɛɛ asɛɛ lɛ belɛ wɔmiitsu wɔnaagba lɛ he nii. Jeee nijiaŋwujee su wɔhiɛ ni wɔɔɔkɛɛ akɛ “Minyɛŋ he nɔ ko mafee.” Yɛ anɔkwale ni eji akɛ wɔmiitsu naagba lɛ he nii lɛ haŋ wɔmli afu. Ehaa wɔhiɛ hiɔ wɔhe nɔ beni afee ni wɔtsake wɔ susumɔi, titri lɛ kɛ mɛi krokomɛi anifeemɔi kɛ amɛfatɔɔi haoɔ wɔ lɛ.

Yɛ be mli ni wɔbɔɔ wɔhenumɔi nɛɛ ahe mɔdɛŋ lɛ, ehe hiaa ni wɔtao yelikɛbuamɔ kɛjɛ wɔ-Nyɔŋmɔ ni ji Yehowa ŋɔɔ yɛ be fɛɛ mli. Oblayoo ko ni yɔɔ New Jersey, Amerika ná haomɔ kpele yɛ enɛ mli. Emli etsɛɛɛ fumɔ. Yɛ be mli ni ewuɔ shiɔ nɛkɛ su nɛɛ, lɛ hu ekɛɛ wɔ akɛ: “Misɔle miha Yehowa waa, koni ejie miyiŋkɔshikɔshifeemɔ lɛ kɛya. Mikɛɛ akɛ etao mimli tɔɔ, kɛya mimli gbɛ gbɔmɔtso lɛ mli ni ejie susumɔi fɔji fɛɛ yɛ mimli kɛya.” Eka shi faŋŋ akɛ Yehowa ha esɔlemɔ ni efee yɛ anɔkwale mli lɛ hetoo, ejaakɛ ekɛɛ akɛ: “Agbɛnɛ nyɔji babaoo nɛ ni sane fɔŋ ko ejɛko minaa; mimlifu lɛ ebashi agbɛnɛ.”

Shi kɛji akɛ yɛ be mli ni wɔkɛ ŋaawooi nɛɛ etsu nii ni wɔye omanye yɛ mli lɛ, yɛ sɛɛ mli lɛ wɔnaa ákɛ, nibii gbaa wɔnaa yɛ bei kɛ bei amli hu? Klɛŋklɛŋ lɛ wɔkaŋmɛ gbɛ ni enɛ je wɔnijiaŋ wui ni wɔŋmɛɛ he. Shi moŋ, esa akɛ wɔya nɔ wɔbi Yehowa dɛŋ eshaifaa kɛ eyelikɛbuamɔ koni wɔya nɔ wɔwuu wɔshi enɛ. Nɔ ni ji enyɔ lɛ, yɛ be mli ni wɔhao diɛŋtsɛ lɛ, sɛɛnamɔ aaaba he akɛ wɔɔkai ŋaawoo ni yɔɔ Lala 4:4 lɛ: “Nyɛhe akpokpoa ni nyɛkafea esha! Nyɛkɛ nyɛtsui awiea yɛ nyɛsaa nɔ, ni nyɛfea dioo!”

Ani No Ji Gbɛ Ni Hi Fe Fɛɛ?

Shi mɛi komɛi baabi akɛ, ‘Ani ehiii akɛ ooojie mlifu lɛ kpo moŋ beni afee ni eje omli kwraa?’ Nakai ji bɔni mɛi pii nuɔ he. Shi ŋa ko ni bɔ mɔdɛŋ akɛ eeefee enɛ yɛ lebi niyeli shishi gbi ko ni eha ewu kɛ efai ni ekɛfɔɔ okpɔlɔ lɛ nɔ lɛ atsotsoro shi lɛ kpɛlɛ nɔ yɛ be mli ni emli fu lɛ akɛ: “Mimli fuko nakai da, ni kɛ mimli fu nakai lɛ mihe yeɔ gbii enyɔ loo etɛ yɛ no sɛɛ. Makɛɛnyɛ anɔkwale akɛ mihiɛ gbo waa yɛ lebi niyeli lɛ sɛɛ, yɛ anɔkwale mli lɛ miwu lɛ shiɔ efai lɛ yɛ okpɔlɔ lɛ nɔ yɛ be babaoo mli fe be ni ekɛ-tsotsoroɔ shi.” Ani enɛ tamɔ nɔ ni emlifu kpo ni ejie lɛ he ba sɛɛnamɔ kɛha nɛkɛ yoo nɛɛ aloo ewu lɛ?

Mɛi komɛi ni mli fu waa nakai lɛ bɔ amaniɛ nɛɛ: “Miná musuŋ hela.” “Mihe kpokpo waa diɛŋtsɛ, ni minaaa nii kpakpa hu.” Ani sɛɛnamɔi yɛ enɛ he?

Jeee fɛɛ nɛ. Yɛ gbɔmɔtsoŋ awui ni oyeɔ ohe lɛ fɛɛ sɛɛ lɛ, efiteɔ okɛ mɛi krokomɛi ateŋ. Nibii pii ni akɛɔ ni afeɔ yɛ mlifu mli lɛ yeɔ mɛi awui ni anyɛɛɛ asaa. Naagbee lɛ onuɔ he akɛ ohiɛ egbo, akɛni ole akɛ mlifu gbɛ ni oŋmɛ lɛ esaaa Yehowa hiɛ lɛ hewɔ.

Mɔ ko nyɛŋ aje anɔkwale ni Biblia mli sane nɛɛ ji lɛ he ŋwane: “Mɔ ni mli etsɛɛɛ fumɔ lɛ, eyeɔ kwashiai asane.” “Mɔ ni mli fuuu mra lɛ eyɛ jwɛŋmɔ jogbaŋŋ.”​—Abɛi 14:​17, 29.

Agbɛnɛ hu kwɛ bɔni abɛi nɛɛ ji anɔkwale ha yɛ shihilɛ mli: “Mlilatsɛ teeɔ bei shi; shi mɔ ni mli fuuu mra lɛ, ekpataa bei.” Ŋwanejee ko kwraa bɛ he akɛ mɔ ni nyɛɛɛ aye emumɔ nɔ lɛ ‘tsirɛɔ lai yisɛɛ ewoɔ la mli” ni ehaa sane lɛ daa agbo, yɛ be mli ni mɔ ni jieɔ mumɔ ni he jɔ ni yɔɔ kpoo kpo lɛ baa nibii ashi. “Naajɔlɛ hetoo kuɔ mlila naa; shi wiemɔ ni wa teeɔ mlifu shi.”​—Abɛi 15:⁠1.

Hɛɛ, wɔmumɔ nɔ ni wɔɔɔye lɛ he aaanyɛ aba sɛɛnamɔ. Jeee akɛ wɔkwaa nibii gbohii ni aaaba kɛkɛ, shi moŋ wɔkaseɔ bɔni wɔfeɔ wɔkɛ mɛi krokomɛi hiɔ shi. Wɔnyɛɔ wɔkɛ wɔhe fɔɔ wɔmumɔŋ nyɛmimɛi lɛ anɔ. Ani enɛ jeee gbɛ ni hi jogbaŋŋ moŋ fe ni wɔɔɔsusu amɛfatɔɔi ahe? Kɛ wɔtao sui ni hi ni wɔkase enɛ lɛ, wɔnaa miishɛɛ. Nɔ ni baajɛ mli aba ji akɛ ebaagbala mɛi kɛbɛŋkɛ wɔ.

Ŋwanejee ko bɛ he akɛ kɛ gbɔmɛi akuu ko bakpe yɛ yiŋtoo ko hewɔ lɛ amɛjieɔ “mumɔ” ko kpo titri. (Filem. 25) Kɛji akɛ enɛ hi ni etswaa mɔ emaa shi jio, aloo ehiii ni ejeɔ mɔ nijiaŋ wui jio, enɛɛmɛi fɛɛ damɔɔ aŋkroaŋkroi ni feɔ kuu nɛɛ nɔ. Yehowa Odasefoi ni yɔɔ asafoi akpekpei babaoo mli yɛ je lɛŋ fɛɛ lɛ jieɔ mumɔ ni hi ni gblaa mɛi lɛ kpɔ.

Kɛ oji Yehowa Odasefoi lɛ ateŋ mɔ kome lɛ, belɛ mɛni hewɔ ni okɛfeee oti ni ma ohiɛ akɛ oooye obua asafo lɛ kɛtsɔ mumɔ kpakpa ni ooojie lɛ kpo otsɔɔ mɛi ni okɛ amɛ bɔɔ lɛ nɔ? Obaanyɛ ofee enɛ kɛtsɔ bo diɛŋtsɛ omumɔ ni oooye nɔ kɛ miishɛɛ ni ooona yɛ mɛi krokomɛi ahe kɛ naanyobɔɔ su ni ooojie lɛ kpo otsɔɔ mɛi lɛ nɔ. Nɛkɛ gbɛ nɔ otsɔɔ ni ohaa weku mumɔ ni yɔɔ miishɛɛ lɛ mli lɛɛɔ kɛbɔleɔ omumɔŋ nyɛmimɛi hii kɛ yei fɛɛ. Yɛ be mli ni ojɛɔ osuɔmɔ mli ohaa babaoo nɛkɛ Iɛ obaakpa yelikɛbuamɔ oha bo diɛŋtsɛ ohe ni onyɛ oye omumɔ nɔ. Nɔ hewɔ lɛ ji akɛ mumɔ kpakpa tsɛŋeɔ mɔ, ni mɔ ni nine kpɔɔ lɛ akeɔ lɛ nii. Taakɛ bɔni nilelɔ lɛ kɛɛ lɛ: “Mɔ ni nine kpɔɔ lɛ, eeewo fɔ, ni mɔ ni haa mɛi tɔrɔɔ lɛ, lɛ hu eeetɔ.”​—Abɛi 11:⁠25.

[Mfoniri ni yɔɔ baafa 5]

Ani mɛi krokomɛi asui aloo amɛ fatɔɔi haoɔ mi?