Hemɔkɛyeli Hãa Wɔtoɔ Wɔtsui Shi ni Wɔsɔleɔ
“Nyɛŋmɛa nyɛtsui shi; nyɛwoa nyɛtsuii ekãa, ejaakɛ ba ni Nuntsɔ lɛ eba lɛ ebɛŋkɛ.”—YAKOBO 5:8, NW.
1. Mɛni hewɔ esa akɛ wɔsusu Yakobo 5:7, 8 he lɛ?
“BA NI” Yesu Kristo “eba” ni amɛ aahu lɛ efee anɔkwa sane agbɛnɛ. (Mateo 24:3-14, NW) Gbɔmɛi fɛɛ ni kɛɔ akɛ amɛyɔɔ hemɔkɛyeli yɛ Nyɔŋmɔ kɛ Kristo mli lɛ yɛ nɔ ni amɛaadamɔ nɔ amɛsusu kaselɔ Yakobo wiemɔi nɛɛ ahe fe be fɛɛ ni eho: “Nyɛŋmɛa nyɛtsui shi, anyɛmimɛi, kɛyashia ba ni Nuntsɔ lɛ eba lɛ. Naa! Okwaafonyo lɛ yaa nɔ emɛɔ shikpɔŋ lɛ nɔ yibii ni jara wa lɛ, etoɔ etsui shi yɛ he kɛyashiɔ be mli ni enáa mra nugbɔnɛmɔ kɛ sɛɛkpee nugbɔnɛmɔ lɛ. Belɛ nyɛ hu nyɛŋmɛa nyɛtsui shi; nyɛwoa nyɛtsuii ekãa, ejaakɛ ba ni Nuntsɔ lɛ eba lɛ ebɛŋkɛ.”—Yakobo 5:7, 8, NW.
2. Mɛni ji naagbai komɛi ni mɛi ni Yakobo ŋma amɛ wolo lɛ kɛkpeɔ?
2 Ehe miihia ni mɛi ni Yakobo ŋma ewolo ni jɛ mumɔŋ lɛ eyaha amɛ lɛ aŋmɛ amɛtsui shi ni amɛkɛsaa naagbai sɔrɔtoi. Mɛi pii miifee nii ni kɛ nɔ ni akpaa gbɛ yɛ mɛi ni kɛɔ akɛ amɛyɔɔ hemɔkɛyeli yɛ Nyɔŋmɔ mli lɛ ahe lɛ kpãaa gbee. Ákɛ nɔkwɛmɔnɔ lɛ, ehe miihia ni afee nɔ ko yɛ akɔnɔi komɛi ni ete shi yɛ tsuii komɛi amli lɛ he. Ehe miihia ni aha kpoofeemɔ ahi nakai mra be mli Kristofoi lɛ ateŋ. Esa akɛ awo amɛ ŋaa yɛ bɔ ni esa akɛ amɛŋmɛ amɛtsui shi ni amɛsɔle hu he. Yɛ be mli ni wɔsusuɔ nɔ ni Yakobo kɛɛ amɛ lɛ he lɛ, nyɛhaa wɔkwɛa bɔ ni wɔɔfee ni wɔkɛ ewiemɔi lɛ atsu nii yɛ wɔshihilɛ mli.
Akɔnɔ Fɔŋ Fiteɔ Nii
3. Mɛni kɛ béi baa asafo lɛ mli lɛ, ni mɛni wɔbaanyɛ wɔkase kɛjɛ enɛ mli?
3 Toiŋjɔlɛ bɛ mɛi ni kɛɔ akɛ amɛji Kristofoi lɛ ekomɛi ateŋ, ni akɔnɔ fɔŋ ji shihilɛ nɛɛ shishifã. (Yakobo 4:1-3) Béi kɛ mligbalamɔ miiba, ni mɛi komɛi miikojo amɛnyɛmimɛi lɛ yɛ gbɛ ni suɔmɔ bɛ mli nɔ. Enɛ miiya nɔ ejaakɛ bɔlɛnamɔ he akɔnɔi ni ashweɔ miiwuu ta yɛ amɛgbɔmɔtso lɛ henii amli. Ehe baahia ni wɔ diɛŋtsɛ lɛ wɔsɔle kɛha yelikɛbuamɔ koni wɔnyɛ wɔte shi wɔwo helooŋ akɔnɔi kɛha gbɛihemɔ, hewalɛnamɔ, kɛ heloonaa nibii lɛ, koni wɔkafee nɔ ko ni wɔkɛfite asafo lɛ toiŋjɔlɛ. (Romabii 7:21-25; 1 Petro 2:11) Hiɛjoomɔ etee hiɛ yɛ klɛŋklɛŋ afii oha lɛ mli Kristofoi lɛ ekomɛi ateŋ kɛyashɛ hetsɛ̃ kɛ mɔgbee mumɔ he. Akɛni Nyɔŋmɔ haŋ amɛ akɔnɔ fɔŋ lɛ aba mli hewɔ lɛ, amɛyaa nɔ amɛnɔ̃ɔ koni amɛkɛbɔ mɔdɛŋ ni amɛnine ashɛ otii ni mamɔ amɛhiɛ lɛ anɔ. Kɛji akɛ wɔyɛ akɔnɔi fɔji ni tamɔ nɛkɛ lɛ, wɔbaanyɛ wɔbi nii, shi wɔnine shɛŋ nɔ, ejaakɛ wɔ-Nyɔŋmɔ ni yɔɔ krɔŋkrɔŋ lɛ haaa sɔlemɔi ni tamɔ nɛkɛ hetoo.—Yaafo 3:44; 3 Yohane 9, 10.
4. Mɛni hewɔ Yakobo tsɛɔ mɛi komɛi akɛ “gbalafitelɔi” lɛ, ni te esa akɛ wiemɔ nɛɛ asa wɔhe aha tɛŋŋ?
4 Je lɛ su, hiɛkɔ̃ɔ, kɛ henɔwomɔ yɛ mra be mli Kristofoi lɛ ekomɛi ateŋ. (Yakobo 4:4-6) Yakobo tsɛɔ mɛi komɛi akɛ “gbalafitelɔi”, ejaakɛ amɛji je lɛ nanemɛi ni yɛ enɛ hewɔ lɛ ámɛye mumɔŋ gbalafitemɔ he fɔ. (Ezekiel 16:15-19, 25-45) Yɛ anɔkwale mli lɛ, wɔsumɔɔɔ ni wɔtamɔ je lɛ yɛ subaŋ, wiemɔ, kɛ nifeemɔi amli, ejaakɛ no baaha wɔfee Nyɔŋmɔ henyɛlɔi. E-Wiemɔ lɛ tsɔɔ wɔ akɛ ‘hiɛkɔ̃ɔ su’ ji su fɔŋ, loo “mumɔ,” ni yɔɔ adesai eshafeelɔi amli lɛ fã. (1 Mose 8:21; 4 Mose 16:1-3; Lala 106:16, 17; Jajelɔ 4:4) No hewɔ lɛ, kɛ wɔyɔse akɛ ehe miihia ni wɔwuu wɔshi hiɛkɔ̃ɔ, henɔwomɔ, loo su fɔŋ ko lɛ, nyɛhaa wɔtaoa Nyɔŋmɔ yelikɛbuamɔ kɛtsɔ mumɔ krɔŋkrɔŋ lɛ nɔ. Nakai hewalɛ ni Nyɔŋmɔ tsɔɔ mlihilɛ ni esaaa wɔ nɔ ekɛhaa lɛ da fe ‘hiɛkɔ̃ɔ su.’ Ni yɛ be mli ni Yehowa teɔ shi ewoɔ henɔwolɔi lɛ, ekɛ duromɔ baaha kɛ wɔwuu wɔshi eshafeemɔ sui.
5. Kɛji akɛ wɔɔná Nyɔŋmɔ duromɔ mli ŋɔɔmɔ lɛ, mɛɛ taomɔ nii esa akɛ ana yɛ wɔhe?
5 Te wɔɔfee tɛŋŋ ni wɔnine aaashɛ Nyɔŋmɔ duromɔ ni esaaa wɔ lɛ nɔ? (Yakobo 4:7-10) Kɛji akɛ wɔɔná duromɔ ni jɛ Yehowa ŋɔɔ lɛ mli ŋɔɔmɔ lɛ, esa akɛ wɔbo lɛ toi, wɔkpɛlɛ egbɛjianɔtoi anɔ, ni wɔba wɔhe shi wɔha nɔ fɛɛ nɔ ni ji esuɔmɔnaa nii. (Romabii 8:28) Esa akɛ ‘wɔte shi wɔwo’ loo ‘wɔdamɔ shi wɔshi’ Abonsam. ‘Ebaajo wɔnaa foi’ kɛji akɛ wɔfee shiŋŋ kɛhi shi akɛ Yehowa jeŋ muu fɛɛ maŋtsɛyeli lɛ sɛɛfilɔi. Wɔyɛ Yesu, mɔ ni tsĩɔ nibii fɔji ni je lɛ kɛtsuɔ nii lɛ agbɛ koni nɔ ko akaye wɔ awui kɛmiiya naanɔ lɛ yelikɛbuamɔ. Ni kaaha ohiɛ kpa enɛ nɔ: Wɔtsɔɔ sɔlemɔ, toiboo, kɛ hemɔkɛyeli nɔ wɔtsiɔ wɔbɛŋkɛɔ Nyɔŋmɔ he, ni efeɔ mɔ ni bɛŋkɛ wɔ.—2 Kronika 15:2.
6. Mɛni hewɔ Yakobo tsɛɔ Kristofoi komɛi akɛ “eshafeelɔi” lɛ?
6 Mɛni hewɔ Yakobo kɛ wiemɔ “eshafeelɔi” toɔ mɛi komɛi ni kɛɔ akɛ amɛyɔɔ Nyɔŋmɔ mli hemɔkɛyeli lɛ ahe lɛ? Ejaakɛ amɛye “tawuui” kɛ hetsɛ̃—subaŋi ni akpɛlɛɛɛ nɔ akɛ Kristofoi, ni gbeɔ mɔ lɛ ahe fɔ. (Tito 3:3) Esa akɛ amɛtsuu ‘amɛniji’ ni nitsumɔi gbohii eyi mli obɔ lɛ ahe. Ehe miihia hu ni amɛha ‘amɛtsuii’ ni ji kanyamɔ jɛɛhe lɛ ahe atse. (Mateo 15:18, 19) Nakai “jwɛŋmɔi enyɔnyɔtsɛmɛi” lɛ shashao shi yɛ Nyɔŋmɔ kɛ naanyobɔɔ kɛ je lɛ kɛ naanyobɔɔ teŋ. Akɛni amɛ nɔkwɛmɔnɔ gbonyo lɛ ebɔ wɔ kɔkɔ hewɔ lɛ, nyɛhaa wɔhiɛ ahia wɔhe nɔ be fɛɛ be koni nɛkɛ nibii nɛɛ akafite wɔhemɔkɛyeli.—Romabii 7:18-20.
7. Mɛni hewɔ Yakobo kɛɔ mɛi komɛi akɛ ‘amɛwerɛ aho amɛhe ni amɛye ŋkɔmɔ’ lɛ?
7 Yakobo kɛɔ ekanelɔi lɛ akɛ ‘amɛwerɛ ahoa amɛhe ni amɛye ŋkɔmɔ ni amɛfó.’ Kɛji akɛ amɛjie dɔlɛ ni Nyɔŋmɔ gbeyeishemɔ yɔɔ mli kpo lɛ, ebaafee tsuitsakemɔ he odaseyeli. (2 Korintobii 7:10, 11) Ŋmɛnɛ, mɛi ni kɛɔ akɛ amɛyɔɔ hemɔkɛyeli lɛ ateŋ mɛi komɛi miitao je lɛ kɛ naanyobɔɔ. Kɛji akɛ wɔteŋ mɛi komɛi miidi gbɛ ni tamɔ nɛkɛ sɛɛ lɛ, ani esaaa akɛ wɔfóɔ yɛ wɔmumɔŋ shihilɛ ni eba shi lɛ he, ni wɔto gbɛjianɔ amrɔ nɔŋŋ ni wɔkɛjaje saji? Tsakemɔi ni he hiaa ni wɔɔfee kɛ Nyɔŋmɔ dɛŋ eshaifaa ni wɔnine shɛɔ nɔ lɛ baaha wɔná mlifilimɔ henumɔ yɛ henilee ni mli tse mli, kɛ naanɔ wala gbɛkpamɔ he miishɛɛ.—Lala 51:12-19; 1 Yohane 2:15-17.
Nyɛkakojoa Nyɛhe
8, 9. Mɛni hewɔ esaaa akɛ wɔwieɔ wɔshiɔ wɔhe loo wɔkojoɔ wɔhe lɛ?
8 Eji esha akɛ aaawie ashi naanyo heyelilɔ. (Yakobo 4:11, 12) Ni kɛlɛ mɛi komɛi wieɔ shiɔ nanemɛi Kristofoi, ekolɛ yɛ su ni ji jalɔi ni amɛbuɔ amɛ diɛŋtsɛ amɛhe loo akɛni amɛmiisumɔ ni amɛhole amɛhe nɔ ni amɛba mɛi krokomɛi ashi lɛ hewɔ. (Lala 50:20; Abɛi 3:29) Hela wiemɔ ni atsɔɔ shishi akɛ ‘wie shi’ lɛ tsɔɔ béi, ni etsɔɔ apasa naafolɔmɔ ni awo he. Enɛ feɔ enyɛmi lɛ kojomɔ yɛ gbɛ fɔŋ nɔ. Yɛ mɛɛ gbɛ nɔ enɛ ji ‘Nyɔŋmɔ mla lɛ ni awieɔ ashiɔ ni akojoɔ’? Ojogbaŋŋ, woloŋmalɔi lɛ kɛ Farisifoi lɛ ‘kɛ ŋaa tsi Nyɔŋmɔ kitai lɛ amɛma afã’ ni amɛkojo yɛ tɛi ni amɛfolɔ amɛshwie shi lɛ anaa. (Marko 7:1-13) Nakai nɔŋŋ hu kɛ wɔkojo nyɛmi ko ni Yehowa ebuŋ lɛ fɔ lɛ, ani jeee ‘Nyɔŋmɔ mla lɛ wɔkojoɔ’ ni wɔkɛ eshafeemɔ miikɛɛ akɛ eshɛɛɛ? Ni akɛni wɔmiikojo wɔnyɛmi lɛ yɛ gbɛ ni ejaaa nɔ hewɔ lɛ, wɔjeee mɛi ni yeɔ suɔmɔ mla lɛ nɔ.—Romabii 13:8-10.
9 Nyɛhaa wɔkaia enɛ: “Mɔ kome ji mlawolɔ kɛ kojolɔ”—Yehowa. ‘Emla lɛ hi kɛwula shi,’ kpa ko bɛ he. (Lala 19:8; Yesaia 33:22) Nyɔŋmɔ pɛ ji mɔ ni yɔɔ hegbɛ akɛ ekɛ taomɔ nii kɛ mlai kɛha yiwalaheremɔ mamɔɔ shi. (Luka 12:5) No hewɔ lɛ, Yakobo biɔ akɛ: “Namɔ jio ni okojoɔ onaanyo?” Wɔbɛ hegbɛ akɛ wɔkojoɔ ni wɔbuɔ mɛi krokomɛi fɔ. (Mateo 7:1-5; Romabii 14:4, 10) Esa akɛ jeŋ muu fɛɛ maŋtsɛ ni Nyɔŋmɔ ji lɛ kɛ gbɔmɛi ahiɛaŋ ni ekwɛɛɛ kɛ wɔ diɛŋtsɛ wɔ eshafeemɔ su lɛ aye abua wɔ ni wɔtsi wɔhe kɛjɛ jalɔi ni wɔɔbu wɔhe kɛtsɔ mɛi krokomɛi akojomɔ nɔ lɛ he.
Kwá Shwãa kɛ He ni Akɛfɔ̃ɔ He Nɔ
10. Mɛni hewɔ esa akɛ wɔsusu Yehowa he yɛ wɔ daa gbi shihilɛi amli lɛ?
10 Esa akɛ wɔsusu Yehowa kɛ emla lɛ he be fɛɛ be. (Yakobo 4:13-17) Akɛni mɔ ni kɛ ehe fɔɔ lɛ diɛŋtsɛ ehe nɔ lɛ ebuuu Nyɔŋmɔ hewɔ lɛ, ekɛɔ akɛ: ‘Wɔbaaya maŋ ko nɔ ŋmɛnɛ loo wɔ́, ni wɔyaye afi yɛ jɛmɛ, ni wɔtsu nii, ni wɔná shika ko.’ Kɛji akɛ ‘wɔbɔ jwetri wɔha wɔhe shi wɔjeee niiatsɛmɛi yɛ Nyɔŋmɔ gbɛfaŋ lɛ,’ wɔwala baanyɛ aba naagbee wɔ́, ni wɔnáŋ hegbɛ ko ni wɔkɛaasɔmɔ Yehowa. (Luka 12:16-21) Taakɛ Yakobo kɛɔ lɛ, wɔtamɔ leebi futufuli ni “pueɔ fioo ko, ni kɛ fee sɛɛ lɛ elaajeɔ.” (1 Kronika 29:15) Yehowa mli hemɔkɛyeli ní wɔɔná lɛ pɛ nɔ wɔɔtsɔ wɔná miishɛɛ ni sɛɛ tsɛɔ kɛ naanɔ wala he hiɛnɔkamɔ.
11. Mɛni ji kɛɛmɔ ni akɛɔ akɛ, “Kɛji [Yehowa, NW] miisumɔ” lɛ shishi?
11 Yɛ nɔ najiaŋ ni wɔkɛ henɔwomɔ aaaku wɔhiɛ wɔshwie Nyɔŋmɔ nɔ lɛ, esa akɛ wɔkɔ shidaamɔ ni tamɔ nɛkɛ: “Kɛji [Yehowa, NW] miisumɔ ni wɔyi na wala lɛ, no lɛ wɔɔfee enɛ loo enɛ.” Kɛɛmɔ ni wɔkɛɔ akɛ “kɛji [Yehowa, NW] miisumɔ” lɛ tsɔɔ akɛ wɔmiibɔ mɔdɛŋ ni wɔfee nii yɛ esuɔmɔnaa nifeemɔ kɛ gbeekpamɔ naa. Ekolɛ ehe baahia ni wɔtsu nii ni wɔkɛye wɔbua wɔ weku lɛ, wɔfã gbɛ yɛ Maŋtsɛyeli nitsumɔ lɛ mli, kɛ nibii krokomɛi. Shi nyɛkahãa wɔshwãa. “Nɛkɛ shwãa nɛɛ fɛɛ lɛ efɔŋ ni” ejaakɛ etswaa he ni akɛfɔ̃ɔ Nyɔŋmɔ nɔ lɛ efɔ̃ɔ afã.—Lala 37:5; Abɛi 21:4; Yeremia 9:23, 24.
12. Mɛni ji wiemɔi ni yɔɔ Yakobo 4:17 lɛ shishi?
12 Eka shi faŋŋ akɛ, bɔni afee ni egbe wiemɔi ni kɔɔ he ni mɔ heɔ lɛ diɛŋtsɛ ehe eyeɔ kɛ shwãa he lɛ naa lɛ, Yakobo kɛɔ akɛ: “Mɔ ni le ekpakpafeemɔ ni efeee lɛ, esha ji no ha lɛ.” Esa akɛ Kristofonyo fɛɛ Kristofonyo kɛ heshibaa akpɛlɛ ehe ni ekɛfɔ̃ɔ Nyɔŋmɔ nɔ lɛ nɔ. Kɛji akɛ efeee nakai lɛ, “esha ji no ha lɛ.” Shi kɛlɛ, nakai shishitoo mla lɛ nɔŋŋ kɔɔ nɔ ni hemɔkɛyeli ni ayɔɔ yɛ Nyɔŋmɔ mli lɛ biɔ ni wɔfee, ni kɛlɛ wɔfeee lɛ he.—Luka 12:47, 48.
Kɔkɔbɔɔ ni Kɔɔ Niiatsɛmɛi Ahe
13. Mɛni Yakobo wieɔ yɛ mɛi ni kɛ amɛ ninámɔ tsuɔ nii yɛ gbɛ ni ejaaa nɔ lɛ ahe?
13 Akɛni mra be mli Kristofoi lɛ ateŋ mɛi komɛi etsɔmɔ shikasuɔlɔi loo amɛmiikwɛ niiatsɛmɛi ahiɛaŋ hewɔ lɛ, Yakobo wie waa eshi niiatsɛmɛi komɛi. (Yakobo 5:1-6) Je lɛŋ hii ni kɛ amɛ ninámɔ lɛ tsuɔ nii yɛ gbɛ fɔŋ nɔ lɛ ‘baaye awerɛho ni amɛbaawo lele yɛ haomɔi ni baaba amɛnɔ’ lɛ he, yɛ be mli ni Nyɔŋmɔ woɔ amɛ nyɔmɔ yɛ amɛ nifeemɔnii anaa lɛ. Yɛ no gbii lɛ amli lɛ, nii ni mɛi pii yɔɔ titri ji atadei, ŋmãa, kɛ wein. (Yoel 2:19; Mateo 11:8) Nibii nɛɛ ekomɛi baanyɛ afee nɔ ni ekpɔtɔ loo “omlɛgɛi eye,” shi Yakobo miima sɛɛnamɔ ni bɛ ninámɔ he lɛ nɔ mi, shi jeee bɔ ni enyɛɔ efiteɔ lɛ. Eyɛ mli akɛ shika tsuru kɛ jwiɛtɛi ebɔɔɔ ŋkanale moŋ, shi kɛ wɔbua naa wɔto lɛ, amɛbaafee nii ni sɛɛnamɔ bɛ he tamɔ nibii ni amɛbɔ ŋkanale pɛpɛɛpɛ. “Ŋkanale” tsɔɔ ákɛ akɛ heloo gbɛfaŋ ninámɔ tsuko nii yɛ gbɛ kpakpa nɔ. No hewɔ lɛ, esa akɛ wɔ fɛɛ wɔkai akɛ, nɔ ko ni “tamɔ la” ji nɔ ni mɛi ni kɛ amɛhe fɔ̃ɔ amɛheloo gbɛfaŋ nibii anɔ lɛ ‘ebua naa eto yɛ naagbee gbii lɛ amli,’ beni Nyɔŋmɔ mlifu baa amɛnɔ lɛ. Akɛni “naagbee be lɛ” mli wɔyɔɔ hewɔ lɛ, wiemɔi ni tamɔ nɛkɛ lɛ tsɔ̃ɔ nɔ ko diɛŋtsɛ kɛhaa wɔ.—Daniel 12:4; Romabii 2:5.
14. Mɛni niiatsɛmɛi lɛ fɔɔ feemɔ, ni mɛni esa akɛ wɔfee yɛ he?
14 Niiatsɛmɛi lɛ fɔɔ amɛ nitsulɔi ni kpaa amɛŋmɔjiaŋ nii lɛ shishiumɔ, mɛi ni amɛ nyɔmɔwoi ni atsi naa lɛ ‘bolɔɔ’ koni atɔ owele lɛ. (Okɛto 1 Mose 4:9, 10 he.) Je lɛŋ niiatsɛmɛi ‘eye amɛnaa nii.’ Amɛkɛ amɛhe ewo ahoshwibɔɔ mli babaoo, amɛle tsuii ni ewo fɔ ni nuuu nii ahe, ni amɛbaaya nɔ amɛfee enɛ yɛ amɛgbee “gbi” lɛ nɔ. ‘Amɛbu jalɔ fɔ ni amɛgbe lɛ.’ Yakobo biɔ akɛ: ‘Ani jeee [niiatsɛ lɛ] teɔ shi woɔ nyɛ lɛ?’ Shi, shishitsɔ̃ɔmɔ kroko ji akɛ, “jalɔ lɛ; eteee shi ewooo nyɛ.” Yɛ fɛɛ sɛɛ lɛ, esaaa akɛ wɔkwɛɔ niiatsɛ lɛ hiɛaŋ. Esa akɛ wɔha mumɔŋ nibii ahi klɛŋklɛŋ gbɛhe yɛ shihilɛ mli.—Mateo 6:25-33.
Hemɔkɛyeli Yeɔ Ebuaa Wɔ Koni Wɔŋmɛ Wɔtsui Shi
15, 16. Mɛni hewɔ ehe hiaa babaoo akɛ wɔɔŋmɛ wɔtsui shi lɛ?
15 Beni ewie je lɛŋ niiatsɛmɛi ni waa mɛi ayi lɛ ahe lɛ sɛɛ lɛ, agbɛnɛ Yakobo wo Kristofoi ni awaa amɛyi lɛ hewalɛ ni amɛŋmɛ amɛtsui shi. (Yakobo 5:7, 8) Kɛji akɛ heyelilɔi kɛ tsuishiŋmɛɛ damɔ amɛ piŋmɔi lɛ anaa lɛ, abaawo amɛ anɔkwayeli lɛ he nyɔmɔ yɛ ba ni Kristo eba lɛ mli, beni akɛ kojomɔ baaba mɛi ni waa amɛyi lɛ anɔ lɛ. (Mateo 24:37-41) Ehe bahia ni nakai mra be mli Kristofoi lɛ atamɔ okwaafonyo ni kɛ tsuishiŋmɛɛ mɛɔ mra gbo be mli nugbɔnɛmɔ lɛ, beni ebaanyɛ edu nii, kɛ sɛɛkpee agbiɛnaa nugbɔnɛmɔ ni kɛ yibiiwoo baa lɛ. (Yoel 2:23) Ehe miihia ni wɔ hu wɔŋmɛ wɔtsui shi ni wɔha wɔtsuii afi shi shiŋŋ, titri lɛ akɛni “ba ni Nuntsɔ” Yesu Kristo “eba lɛ” eshɛ shi agbɛnɛ lɛ hewɔ!
16 Mɛni hewɔ esa akɛ wɔŋmɛ wɔtsui shi? (Yakobo 5:9-12) Tsuishiŋmɛɛ yeɔ ebuaa wɔ koni wɔkadɔmɔ ŋtsɔi loo wɔye awerɛho kɛ́ nanemɛi heyelilɔi hao wɔ. Kɛ wɔkɛ mumɔ ni yeɔ awui ‘dɔmɔ ŋtsɔi wɔwo wɔhe’ lɛ, Kojolɔ Yesu Kristo baakojo wɔ. (Yohane 5:22) Amrɔ nɛɛ ni “ba ni eba” lɛ eje shishi ni ‘edamɔ’ “shinaai lɛ asɛɛ” nɛɛ, nyɛhaa wɔhaa toiŋjɔlɛ ashwerea kɛtsɔ wɔtsui shi ni wɔɔŋmɛ wɔha wɔnyɛmimɛi ni kɛ hemɔkɛyeli he kaai pii kpeɔ lɛ nɔ. Kɛji akɛ wɔkai akɛ Nyɔŋmɔ wo Hiob nyɔmɔ ejaakɛ ekɛ tsuishiŋmɛɛ damɔ ekaai lɛ anaa lɛ, ewoɔ wɔ diɛŋtsɛ wɔhemɔkɛyeli hewalɛ. (Hiob 42:10-17) Kɛji akɛ wɔjie hemɔkɛyeli kɛ tsuishiŋmɛɛ kpo lɛ, wɔbaana akɛ “[Yehowa, NW] mli tsɔ̃ɔ lɛ babaoo ni emli jɔ hu.”—Mika 7:18, 19.
17. Mɛni hewɔ Yakobo kɛɔ akɛ, “Nyɛkakãa kita” lɛ?
17 Kɛji akɛ wɔbɛ tsuishiŋmɛɛ lɛ, wɔkɛ lilɛi lɛ baatsu nii yɛ gbɛ ni esaaa nɔ kɛ́ wɔyɛ nɔnyɛɛ shishi. Ákɛ nɔkwɛmɔnɔ lɛ, wɔkɛ tsui hahaaha bakãmɔ kitai. Yakobo kɛɛ: “Nyɛkakãa kita,” ni ekɛ enɛ bɔ kɔkɔ eshi kitakamɔi kɛkɛ ni he ehiaaa. Ní akɛ kitakãmɔi aaafi wiemɔi asɛɛ yɛ be kɛ bei amli lɛ hu tsɔɔ tamɔ osatofeemɔ. No hewɔ lɛ, esa akɛ wɔwie anɔkwale lɛ kɛkɛ, ni wɔha wɔ hɛ̃ɛ afee hɛ̃ɛ, ni wɔ dabi afee dabi. (Mateo 5:33-37) Kɛlɛ, Yakobo ekɛɛɛ akɛ ejaaa akɛ aaakã kita ákɛ aaawie anɔkwale yɛ saneyelihe.
Hemɔkɛyeli kɛ Wɔsɔlemɔi
18. Mɛɛ shihilɛi ashishi esa akɛ ‘wɔya nɔ wɔsɔle ni wɔla yijiemɔ lalai’ lɛ?
18 Esa akɛ sɔlemɔ atsu gbɛfaŋnɔ ko ni da yɛ wɔshihilɛ mli kɛ́ wɔɔnyɛ wɔye wɔwiemɔ nɔ, wɔŋmɛ wɔtsui shi, ni wɔná Nyɔŋmɔ mli hemɔkɛyeli kpakpa. (Yakobo 5:13-20) Be mli ni wɔyɔɔ kaa shishi lɛ titri esa akɛ ‘wɔya nɔ wɔsɔle.’ Kɛji akɛ wɔná tsuijurɔ lɛ, nyɛhaa ‘wɔlaa yijiemɔ lalai,’ taakɛ Yesu kɛ ebɔfoi lɛ fee beni eto egbele lɛ he Kaimɔ lɛ shishi lɛ. (Marko 14:26, NW shishigbɛ niŋmaa) Yɛ bei komɛi amli lɛ, ekolɛ shidaa kɛha Nyɔŋmɔ yiɔ wɔmli obɔ akɛ wɔlaa yijiemɔ lalai yɛ wɔtsui mli po. (1 Korintobii 14:15; Efesobii 5:19) Ni mɛɛ miishɛɛ eji nɛkɛ akɛ wɔɔkafo Yehowa yɛ lala mli yɛ Kristofoi akpeei ashishi!
19. Mɛni esa akɛ wɔfee kɛ wɔhe baye yɛ mumɔŋ, ni mɛni hewɔ esa akɛ wɔkɔ gbɛ ni tamɔ nɛkɛ?
19 Wɔnuŋ he akɛ esa akɛ wɔla kɛ wɔhe miiye yɛ mumɔŋ, ekolɛ yɛ subaŋ gbonyo ko loo Yehowa okpɔ̃lɔ nɔ niyenii ni wɔyeee be fɛɛ be lɛ hewɔ. Kɛji akɛ wɔyɛ shihilɛ ni tamɔ nɛkɛ mli lɛ, nyɛhaa wɔkɛ heshibaa atsɛa onukpai lɛ koni ‘amɛsɔle amɛha wɔ.’ (Abɛi 15:29) Amɛkɛ ‘mu hu baakpa wɔ yɛ Yehowa gbɛi amli.’ Taakɛ mu jɔɔ pilamɔ he lɛ, nakai amɛ miishɛjemɔ wiemɔi kɛ Ŋmalɛ mli ŋaawoo lɛ baaye abua ni ejie nɔnyɛɛ, yiŋkɔshikɔshifeemɔ, kɛ gbeyeishemɔ kɛya. ‘Hemɔkɛyeli sɔlemɔ lɛ baaha wɔhe awa wɔ’ kɛ́ wɔ diɛŋtsɛ wɔhemɔkɛyeli fiɔ sɛɛ. Kɛji akɛ onukpai lɛ na akɛ esha ko ni hiɛdɔɔ yɔɔ mli kɛ wɔmumɔŋ hela lɛ ba lɛ, amɛkɛ mlihilɛ baaha wɔle wɔtɔ̃mɔ lɛ faŋŋ, ni amɛbaabɔ mɔdɛŋ ni amɛye amɛbua wɔ. (Lala 141:5) Ni kɛji akɛ wɔshwa wɔhe lɛ, wɔbaanyɛ wɔná hemɔkɛyeli akɛ Nyɔŋmɔ baabo amɛsɔlemɔi lɛ atoi ni ekɛbaake wɔ.
20. Mɛni hewɔ esa akɛ wɔjaje wɔhe eshai ni wɔsɔle wɔha wɔhe lɛ?
20 Esa akɛ ‘wɔnɔtɔ̃mɔi ni wɔjajeɔ wɔtsɔɔ wɔhe yɛ faŋŋ’ lɛ afee nɔ ni tsĩɔ esha ni wɔɔya nɔ wɔfee lolo lɛ gbɛ. Esa akɛ ewo mɔbɔnalɛ, su ni baatsirɛ wɔ koni ‘wɔsɔle wɔha wɔhe’ lɛ he hewalɛ. Wɔbaanyɛ wɔná hemɔkɛyeli akɛ enɛ he baaba sɛɛnamɔ, ejaakɛ “jalɔ”—mɔ ni yɔɔ hemɔkɛyeli ni Nyɔŋmɔ buɔ lɛ akɛ eja lɛ—sɔlemɔ tsuɔ nii babaoo yɛ Yehowa hiɛ. (1 Petro 3:12) Gbalɔ Elia yɛ gbɔjɔmɔi ni tamɔ wɔnɔ̃ lɛ nɔŋŋ, shi esɔlemɔi lɛ wo yibii. Esɔle, ni nugbɔ enɛɛɛ afii etɛ kɛ fã. Beni esɔle ekoŋŋ lɛ, nugbɔ nɛ.—1 Maŋtsɛmɛi 17:1; 18:1, 42-45; Luka 4:25.
21. Mɛni ekolɛ wɔbaanyɛ wɔfee kɛ alaka naanyo Kristofonyo ko ni ‘edu gbɛ kɛjɛ anɔkwale lɛ mli’?
21 Shi kɛji akɛ aha asafo lɛ mli nyo ko “du gbɛ kɛjɛ anɔkwale lɛ mli,” ni egba afã kɛjɛ tsɔ̃ɔmɔ kɛ jeŋba ni ja he hu? Ekolɛ wɔbaanyɛ wɔkpale lɛ kɛjɛ etɔ̃mɔ lɛ mli kɛtsɔ Biblia mli ŋaawoo, sɔlemɔ, kɛ yelikɛbuamɔ kroko nɔ. Kɛji akɛ wɔye omanye lɛ, enɛ haa ehiɔ Kristo kpɔmɔnɔ lɛ shishi ni ehereɔ eyiwala kɛjɛɔ mumɔŋ gbele kɛ hiɛkpatamɔ kojomɔ mli. Nɔtɔ̃lɔ lɛ ni wɔyeɔ wɔbuaa lɛ lɛ haa wɔhaà eshai babaoo nɔ. Kɛ eshafeelɔ ni akã ehiɛ lɛ kpale kɛjɛ egbɛ fɔŋ lɛ nɔ, etsake etsui, ni etao eshaifaa lɛ, wɔmii baashɛ wɔhe akɛ wɔtsu nii kɛhà ehe eshai lɛ anɔ.—Lala 32:1, 2; Yuda 22, 23.
Nɔ̃ ko Kɛha Wɔ Fɛɛ
22, 23. Te esa akɛ Yakobo wiemɔi lɛ aná wɔnɔ hewalɛ aha tɛŋŋ?
22 Eyɛ faŋŋ akɛ, nɔ̃ ko ni sɛɛnamɔ yɔɔ he yɛ Yakobo wolo lɛ mli kɛha wɔ fɛɛ. Etsɔɔ wɔ bɔ ni wɔɔfee wɔkpee kaai anaa, ewoɔ wɔ ŋaa ni wɔkakwɛ gbɔmɛi ahiɛaŋ, ni ewoɔ wɔ hewalɛ ni wɔkɛ wɔhe awo nitsumɔi ni ja mli. Yakobo woɔ wɔ hewalɛ ni wɔye wɔlilɛi nɔ, wɔte shi wɔshi hewalɛ ni je lɛ náa yɛ wɔ nɔ lɛ, ni wɔha toiŋjɔlɛ ashwere. Esa akɛ ewiemɔi lɛ aha wɔŋmɛ wɔtsui shi ni wɔfee mɛi ni sɔleɔ.
23 Eji anɔkwale akɛ, aŋma Yakobo wolo lɛ diɛŋtsɛ ayaha mra be mli Kristofoi ni afɔ amɛ mu lɛ. Ni kɛlɛ, esa akɛ wɔ fɛɛ wɔha emli ŋaawoo lɛ aye abua wɔ ni wɔkɛ wɔhe akpɛtɛ wɔhemɔkɛyeli lɛ he. Yakobo wiemɔi lɛ baanyɛ awo hemɔkɛyeli ni tsirɛɔ wɔ ni haa wɔfeɔ nii oya kɛ yiŋkpɛɛ yɛ Nyɔŋmɔ sɔɔmɔ mli lɛ he hewalɛ. Ni nɛkɛ wolo ni jɛ mumɔŋ nɛɛ tswaa hemɔkɛyeli ni sɛɛ tsɛɔ ni haa wɔŋmɛɔ wɔtsui shi, akɛ Yehowa Odasefoi ni sɔleɔ ŋmɛnɛ emaa shi, yɛ “ba ni Nuntsɔ” Yesu Kristo “eba” nɛɛ mli.
Te Obaaha Hetoo Oha Tɛŋŋ?
◻ Mɛni hewɔ ehe bahia ni mra be mli Kristofoi lɛ ateŋ mɛi komɛi atsake amɛsubaŋ kɛ jeŋba lɛ?
◻ Mɛɛ kɔkɔbɔɔ Yakobo kɛha niiatsɛmɛi?
◻ Mɛni hewɔ esa akɛ wɔŋmɛ wɔtsui shi?
◻ Mɛni hewɔ esa akɛ wɔsɔle daa?
[He ni Mfoniri ni yɔɔ baafa 19 lɛ Jɛ]
Pictorial Archive (Near Eastern History) Est.
[Mfoniri ni yɔɔ baafa 23]
Ehe bahia ni mra be mli Kristofoi komɛi ato amɛtsui shi amɛha amɛnanemɛi heyelilɔi
[Mfoniri ni yɔɔ baafa 24]
Ehe miihia ni Kristofoi ato amɛtsui shi, amɛna suɔmɔ, amɛsɔle