Wekukpaa Ni Jara Wa Ni Wɔɔɔha Ehi Wɔkɛ Nyɔŋmɔ Teŋ Daa

“Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.”​—Yak.4:8

 1, 2. (a) Yehowa ji nihalɔ ni dɛŋ kpɔɔ̀ yɛ mɛɛ gbɛ nɔ? (b) Mɔni yiŋ feɔlɛ kɔshikɔshi lɛ egbee mɛɛ oshra mli; ni te eeefee tɛɛŋ ejo enɛ naa foi hu? (d) Ani hemɔkeyeli nyɛɔ edaa; ni ani etsɔɔ nɔko ni fe jwɛŋmɔŋ nifeemɔ ko kɛkɛ?

¹ YEHOWA dɛŋ kpɔɔ̀. Wɔna wɔle momo kɛjɛ nɔni Luka ŋma lɛ mli akɛ Yehowa haa mɛi ni fĩɔ shi yɛ sɔlemɔ mli ni amɛsaraa befɛɛbe lɛ asɔlemɔi ahetoo. Ni Biblia ŋmalɔi krokomɛi hu jɛ Nyɔŋmɔ mumɔ mli amɛwo ŋaa kpakpa yɛ sɔlemɔ kɛ hemɔkɛyeli he.

² Yakobo nɛkɛ lɛ, mra mli yɛ ewolo lɛ mli lɛ, ekaiɔ wɔ akɛ wɔya nɔ ‘wɔkpa Nyɔŋmɔ fai’ koni eha wɔ nilee ni wɔkɛdamɔ kaai sɔrɔtoi lɛ anaa. Ewo ŋaa ni ebɔ kɔkɔ akɛ: “Shi ha ni ekpa fai yɛ hemɔkɛyeli mli, ni ekaje nɔkonɔko he ŋwane.” Mɔni jɛɔ ŋwane lɛ, eji ‘mɔko ni yiŋ etɛɛɛlɛ [yɛ Hela wiemɔ mli lɛ, eji “susuma-enyɔnyɔtsɛ”],’ ni enine shɛɛɛ nɔkonɔko nɔ kɛjɛɛɛ Yehowa dɛŋ. Wɔbaasumɔ moŋ ni wɔhemɔkɛyeli lɛ ana salɛ ni Yakobo tsĩ tã lɛ eko: ‘Nyɛhemɔkɛyeli ni aka akwɛ lɛ tsɛɔ tsuishiŋmɛɛ kɛbaa.’ (Yak. 1:​3-8)a Eyɛ mli akɛ ekolɛ shishijee mli lɛ wɔhemɔkɛyeli lɛ edaŋ tamɔ Abraham nɔ̃ lɛ moŋ, shi ebaanyɛ eda ni esa akɛ efee hemɔkɛyeli krɔŋŋ shi jeee fakɛfa. Nyɛhaa ni nɔni Paulo ŋma lɛ afea anɔkwale yɛ wɔgbɛfaŋ akɛ: “Nyɛhemɔkɛyeli lɛ miida naakpa, ni nyɛ fɛɛ nyɛtɛŋ mɔfɛɛmɔ suɔmɔ ni ekɛsumɔɔ enanemɛi lɛ miifa kɛmiiya nɔ hu.” Anɔkwa hemɔkɛyeli jeee nɔko ni yaa nɔ yɛ mɔko jwɛŋmɔ mli kɛkɛ, shi moŋ taakɛ Paulo ŋma lɛ, esani “ohe oye yɛ otsui mli.” Esa akɛ wɔna yiŋtoo kpakpa ko ni no atsirɛ wɔ ni eha wɔtsu nitsumɔi kpakpai.​—Rom. 4:​20; 10:​9, 10; 2 Tes. 1:⁠3.

 3. Yɛ sɔrɔtotsɔɔmɔi amli lɛ, mɛɛ anɔkwalei agbalaa wɔjwɛŋmɔ kɛbaa nɔ yɛ Yakobo 4:7 kɛ 8 lɛ?

³ Yɛ nɔni ewie he nɛɛ nɔmimaa mli lɛ, Yakobo ŋma fee sɛɛ akɛ: “Nyɛtsua nyɛniji ahe, nyɛ eshafeelɔi, ni nyɛhaa nyɛtsuii ahe atsea, nyɛ jwɛŋmɔi enyɔnyɔtsɛmɛi.” Dani Yakobo aaawie enɛ lɛ, ekɛ nibii to nii ahe yɛ sɔrɔtotsɔɔmɔ mli taakɛ Yesu fee lɛ, beni afee ni ekɛma anɔkwalei ni he hiaa lɛ anɔ mi: “Nyɛbaa nyɛhe shi nyɛnaa Nyɔŋmɔ; nyɛtee shi nyɛwoa Abonsam, ni eeejo nyɛnaa foi. Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.”​—Yak. 4:​7, 8.

 4. (a) Dani mɔ aaanyɛ atsi abɛŋkɛ mɔkroko lɛ, mɛni ebiɔ ni mɔ Iɛ afee? Ni mɛni baaha ni efee nakai? (b) Ani Nyɔŋmɔ feɔ fe nine kɛkɛ ni eeefɔ̃ etsɛ mɛi nɛ tamɔ nakai lɛ; ni mɛɛ gbɛjianɔi ato momo kɛha mɛi fɛɛ asɛɛnamɔ?

⁴ Mɛɛ hewalɛwoo po nɛ akɛ wɔjwɛŋmɔ adamɔ tɛ kome nɔ yɛ gbɛ ni ja nɔ, ni mɛɛ yisɛɛtsirɛmɔ ko ni haa mɔ tsui nyaa po nɛ! Mɔko jwɛŋmɔ aaanyɛ adamɔ tɛ kome nɔ ni etsu nɔkome befɛɛbe akɛni esusuɔ akɛ no ji nɔni sa akɛ efeɔ lɛ hewɔ, shi dani eeetsi ebɛŋkɛ mɔkroko lɛ ebiɔ babaoo fe nakai. Esa akɛ ejɛ etsuiŋ, ni nɔko atsirɛ mɔ lɛ ni ekɛ ehe aha ni efee klalo akɛ eeeshã afɔlei beni afee ni ena nakai mɔ-kɛ-mɔ teŋ wekukpaa lɛ ni eye no mli ŋɔɔmɔ. Kadimɔ akɛ Yakobo ekɛɛɛ akɛ kɛji wɔtsi wɔbɛŋkɛ Nyɔŋmɔ lɛ, ebaata shi yɛ sɛɛ flɛŋŋ ni emɛ ni wɔ wɔba wɔbaninalɛ dani ehere wɔ atuu. Nɔni ekɛɛ moŋ ji akɛ, kɛji wɔdiɛŋtsɛ wɔfee nɔko krɛdɛɛ ni wɔkɛtsi wɔbɛŋkɛ Nyɔŋmɔ lɛ, lɛ hu ebaafee nɔko tamɔ nakai nɔŋŋ ni ekɛtsi ebɛŋkɛ wɔ. Mɛɛ gbɛ nɔ etsɔɔ efeɔ enɛ? Eto gbɛjianɔi fɛfɛji ni e-Wiemɔ kɛ e-Bi lɛ ni ekɛha akɛ wɔ-Kpɔlɔ lɛ hu fata he, ni nohewɔ lɛ wɔ adesai ni yeee emuu ni wɔfeɔ esha lɛ nyɛɔ wɔbɛŋkɛɔlɛ. Hegbɛi nɛɛ yɛ kɛha mɛi fɛɛ ni taoɔ akɛ amɛtsu he nii kɛ amɛtsuiŋ faŋŋ kɛ jwɛŋmɔ krɔŋŋ lɛ.

 5. Bei pii lɛ mɛɛ gbɛ nɔ atsɔɔ Nyɔŋmɔ tsuji ni ejɔɔ amɛhe nɔ amɛbale lɛ anɔ ayeɔ abuaa mɛi ni taoɔ ‘atsi abɛŋkɛ Nyɔŋmɔ’ lɛ yɛ?

⁵ Shi ani Yehowa diɛŋtsɛ feɔ nɔko pɔtɛɛ yɛ enɛ mli? Bei pii lɛ mɛni ji nɔkome ko ni saa mɔni taoɔ anɔkwale lɛ tsui he ni egbalaalɛ lɛ? Yɛ anɔkwale lɛ he nilee sɛɛ lɛ, ani jeee no ji mɔni Nyɔŋmɔ kɛlɛ tsuɔ nii akɛ etsulɔ lɛ mɔhejwɛŋmɔ krɔŋŋ ni suɔmɔ yɔɔ mli lɛ? (1 Kor. 3:⁠5) Kɛji mɔni taoɔ anɔkwale lɛ ba Yehowa Odasefoi akpee klɛŋklɛŋ lɛ, ekolɛ enuŋ nɔni akɛɔ lɛ saŋŋ shishi, shi naanyobɔɔ mumɔ ni mɛi fɛɛ jieɔlɛ kpo lɛ naà enɔ hewalɛ waa, dani agbɛnɛ hu bɔni mɛi naà deka amɛbaalɛ ni amɛhereɔlɛ hiɛmɛɛ lɛ hu saa ehiɛ. Yɛ nɛkɛ gbɛ nɔ lɛ enuɔ he akɛ yɛ lɛdiɛŋtsɛ emɔdɛŋ ni ebɔɔ ekɛtaoɔ anɔkwale lɛ kɛ no Halɔ lɛ sɛɛgbɛ lɛ anɔheremɔ naa lɛ, Nyɔŋmɔ miigbalalɛ kɛmiibɛŋkɛlɛ. Be mli ni enaa nɔyaa lɛ, enaa Nyɔŋmɔ gbɛtsɔɔmɔ kɛ ejɔɔmɔ he odaseyelii krokomɛi, ejaakɛ Nyɔŋmɔ ‘haa faa ni ewieee mɔ hiɛ.’​—Yak. 1:⁠5.

 6. Mɛni nɔŋŋ haa ni enɛ nyɛɔ ebaa lɛ; ni mɛni sa akɛ akaiɔ befɛɛbe?

⁶ be mli ni akudɔɔ mɔni taoɔ anɔkwale lɛ fiofio yɛ jalɛ gbɛ nɔ lɛ, ebayɔseɔ akɛ eji hegbɛ kpele ni mɔ aaana akɛ Yehowa kɛlɛ aaatsu nii akɛ enajiaŋdamɔlɔi lɛ ateŋ mɔkome ni ekɛwa mɛikrokomɛi Nyɔŋmɔ mumɔ lɛ ni afɔseɔ awoɔ wɔtsuii amli lɛ haa ni ebaalɛ nakai, ni nohewɔ lɛ wɔnyɛɔ wɔwoɔ nakai mumɔ lɛ yibii ni wɔjieɔ Nyɔŋmɔjeŋ suɔmɔ kpo.​—Gal. 5:​22, 23; 1 Yoh. 4:⁠11.

OHIƐ AHI OHE NƆ, KAAGBUGBAA

 7. Mɛni ji nɔni bɔni Yakobo wolo lɛ yaa ehaa lɛ tsɔɔ?

⁷ Yakobo ŋma eyaha Kristofoi ni ejɔɔ amɛhe nɔ ni shwa amɛhe ni amɛtsake amɛtsui dani amɛbatsɔmɔ Kristofoi lɛ. Amɛtsɔ amɛsɛɛ amɛha eshafeemɔ gbɛ ni kulɛ amɛnyiɛ nɔ lɛ, ni amrɔ nɛɛ amɛjɔɔ amɛhe nɔ kwraa amɛha Yehowa akɛ amɛ aaafee esuɔmɔnaanii agbɛnɛ. Tamɔ bɔni Yakobo wolo lɛ tsɔɔ lɛ, amɛteaŋ mɛi pii yeee amɛhenɔjɔɔmɔ lɛ nɔ. Amɛjie amɛhiɛ yɛ bɔni ehe hiaa eha akɛ amɛha nakai wekukpaa ‘ni yɔɔ amɛkɛ Yehowa teŋ lɛ ahi befɛɛbe lɛ nɔ.

 8. (a) Mɛni hewɔ enyɛŋ abu wekukpai flɛflɛ lɛ? (b) Yakobo ye etsui akɛ eye ebua mɛi ni shaneɔ kɛyaa sɛɛ lɛ yɛ mɛni gbɛfaŋ?

⁸ Ewa akɛ wekukpai ni yɔɔ mɛi ateŋ lɛ aaahi shi bɔni amɛyɔɔ lɛ befɛɛbe ni amɛtsakee kwraa. Anyɛŋ abu nomɛi akɛ nibii flɛflɛi. Enyɛɔ ebaalɛ yɛ wekukpai agbɛfaŋ tamɔ bɔni tsei nyɛɔ amɛnaà nɔyaa ko kɛ̃, kɛ́ nɔyaa lɛ yɛ blɛoo po, ni amɛnaà fãi kɛyaa sũ lɛ mli tɔ̃ɔ; aloo amɛfiteɔ ni amɛbɔiɔ gboimɔ lɛ. Kɛji ebalɛ nakai lɛ, yibii kɛ yibai lɛ fɛɛ ahiɛ kpataa. (Lala. 1:​1-3) Enɛ ji nɔni ba heloonaa Israel maŋ lɛ nɔ. Yakobo ye etsui akɛ eeeye ebua nakai mumɔŋ Israelbii ni kpaleɔ kɛyaa sɛɛsɛɛ nakai nɔŋŋ lɛ dani ekpe sɛɛ tsɔ. Nohewɔ lɛ eha amɛna sane lɛ faŋŋ ni etsɔɔ amɛ sɔrɔto ni yɔɔ anɔkwale lɛ kɛ amale teŋ yɛ nilei sɔrɔtoi lɛ agbɛfaŋ, kɛ agbɛnɛ hu yɛ naanyobɔɔ gbɛfaŋ, taakɛ etsɔɔ mli yɛ Yakobo Wolo 3:​13-18 kɛ 4:​1-6 lɛ. Yɛ no sɛɛ lɛ ekɛ yisɛɛtsirɛmɔ ni wɔwie he momo taakɛ eyɔɔ Yakobo Wolo 4:7 kɛ 8 lɛ tsa nɔ. Efeelɛ tamɔ bɔni Yehowa, tsirɛ heloonaa Israel yisɛɛ taakɛ wɔkaneɔ yɛ Yesaia 55:6 kɛ 7, kɛ Maleaki 3:6 kɛ 7 lɛ.

 9. (a) Mɛni ji gbɛ kome nɔ ni Abonsam tsɔɔ etuaa mɛi lɛ; ni mɛɛ gbɛ nɔ ekɛ enɛ tsuɔ nii yɛ, yɛ ŋmɛnɛbeaŋ? (b) Te Petro wo ŋaa yɛ enɛ gbɛfaŋ eha tɛɛŋ?

⁹ Ani nakai sane lɛ nɔŋŋ eko yɛ ŋmɛnɛ yɛ gbe ko nɔ? “Jaramɔ bei” ni agba he sane ato lɛ eba, ni nɔnyɛɛ kɛ oshrai sɔrɔtoi fɛɛ miifa yɛ mɛi anɔ yɛ hefɛɛhe, titri yɛ anɔkwa Kristofoi ni nyiɛ ‘gbɛ leleoo ni kɛ mɔ yaa wala mli’ lɛ nɔ lɛ agbɛfaŋ (Mat. 7:​14; 2 Tim. 3:​1-5) Abonsam yɛ gbɛ̀i wuji enyɔ ni etsɔɔ nɔ emaa mɛi. Taakɛ Petro ŋma lɛ, beikomɛi beni ewo wɔhe gbeyei ni eha wɔje nakai gbɛ lɛ nɔ sɛɛ lɛ, efeɔ enii “tamɔ jata ni huɔ eetao mɔni eeemi.” (1 Pet. 5:⁠8) Ekɛ saji ni woɔ mɔ he gbeyei baa, ekolɛ maŋ muu fɛɛ nɔ̃ aloo yɛ mɔ aŋkroaŋkro gbɛfaŋ, kɛ jwɛŋmɔ lɛ akɛ ekɛ no aaanyɛ wɔnɔ koni wɔŋmɛɛ wɔnɔkwayeli he, kɛji enyɛɛɛ eha wɔŋmɛɛ wɔshidaamɔ ni kɔɔ Kristofoi ahenilee kɛ Biblia mli shishitoomlai ahe lɛ he kwraa. Wɔdaagbi shihilɛ mli ni wɔɔɔhi kɛ wala diɛŋtsɛ po he aaanyɛ aba sane yɛ saji ni mli wawai ni kɔɔ apaayeli aloo wɔhe ni wɔkɛwooo je lɛ mli saji amli lɛ he. Taakɛ atsĩ tã momo lɛ, biɛnɛɛ ehe hiaa yɛ akɛ wɔya nɔ wɔsɔle koni aha wɔ nilee ni wɔkɛkɔ sane sɛɛ kɛ nyɛmɔ beni afee ni wɔkɛ Biblia mli shishitoomlai atsu nii. Nohewɔ lɛ Petro tee nɔ etsirɛ wɔ akɛ: “Nyɛdamɔa shi Shiŋŋ yɛ hemɔkɛyeli mli nyɛtsĩalɛ [Abonsam lɛ] gbɛ, Shi duromɔ fɛɛ Nyɔŋmɔ . . . lɛ, kɛ́ nyɛna amanehulu fioo nɛɛ etã lɛ, lɛdiɛŋtsɛ eeesaa nyɛ pɛ ni eeewaje nyɛ ni eeewo nyɛ hewalɛ ni eeeha nyɛfi shi shiŋŋ.”​—1 Pet. 5:​9, 10.

10, 11. (a) Mɛɛ gbɛ kroko nɔ Satan tsɔɔ etuaa mɛi; ni te anaa enɛ ahaa tɛɛŋ ŋmɛnɛ: ni mɛɛ oshra no kɛbaa? (b) Nohewɔ lɛ esa akɛ wɔhiɛ hiɔ wɔhe nɔ ni wɔjwɛŋmɔ damɔɔ tɛ kome nɔ yɛ mɛɛ gbɛ nɔ?

¹⁰ Gbɛ kroko ni Abonsam tsɔɔ nɔ etuaa mɔ lɛ yɛ nigii fe enɛ. Satan “diɛŋtsɛ tsakeɔ ehe etsɔɔ la bɔfo.” Efeɔ enii tamɔ onufu, jeee ni ekɛ aaawo mɔko he gbeyei, shi moŋ koni ekɛshishiu mɔ ni ekɛlaka mɔ, “taakɛ bɔni onufu lɛ kɛ ekutumpɔo lɛ laka Hawa lɛ.” (2 Kor. 11:​3, 14) Yɛ nɛkɛ ŋaa nɛɛ he odaseyeli mli lɛ, nɔkome yɛ ni Satan le ni esumɔŋ ni ole, ni no ji akɛ ebɛ be kwraa. Yɛ ta ni awuu ye ŋwɛi beni ato Mesia maŋtsɛyeli lɛ yɛ afi 1914 Ŋ.B. mli sɛɛ lɛ hewɔ lɛ, lɛ onufu kpele lɛ, “ashɛlɛ afɔ̃ shikpɔŋ lɛ nɔ ni . . . egri naakpa, ni ele akɛ be fioo kɛkɛ eyɔɔ.” (Kpoj. 12:​1-12) Kɛji titri lɛ, ebaanyɛ elaka mɛi ni ‘yeɔ Nyɔŋmɔ kitãi lɛ anɔ ni amɛhiɛ Yesu Kristo odase lɛ koni amɛhe amɛye akɛ “naagbee be” lɛ yɛ shɔŋŋ lɛ, eye kunim etã. (Kpoj. 12:17) Mɛi pii ahiɛ aaaje amɛhe nɔ yɛ bɔni sane lɛ he jaraa eha lɛ he, ni amɛsaraŋ. Ewaaa kwraa akɛ wɔɔɔha daagbi shihilɛ mli nibii ni mɛi diɔ sɛɛ lɛ ahe wɔtsuii fɛɛ. Eji anɔkwale akɛ ehe ehia ni wɔle bɔni wɔɔɔfee wɔna Yehowa jwɛŋmɔ yɛ saji ahe ni wɔbɔ mɔdɛŋ wɔyɔse bɔni ebuɔ be ehaa lɛ, ni wɔkai Petro wiemɔi nɛɛ akɛ: “Nibii fɛɛ anaagbee lɛ eshɛ etã. Nohewɔ lɛ nyɛjwɛŋmɔ mli atsea ni nyɛhiɛ akãa shi ahaa sɔlemɔi.”​—1 Pet. 4:7; 2 Pet. 3:​8, 9.

¹¹ Biblia ŋmalɔi Yakobo kɛ Petro fɛɛ wie wiemɔi babaoo ni waã wɔ ni amɛwoɔ wɔ hewalɛ beni afee ni wɔhiɛ ahi wɔhe nɔ yɛ gbɛ ni ja nɔ ni wɔkagbugbaa, ni wɔhiɛ tsui kpakpa ni wɔkɛ wɔjwɛŋmɔ afɔ̃ sɔlemɔi kɛ hemɔkɛyeli nɔ.

NYƐSƆLEA NYƐHAA NYƐHAA MƐI EFĨ AMƐ LƐ

12. (a) Naagbee lɛ te Yakobo wie sɔlemɔ he sane lɛ he eha teeŋ? (b) Mɛɛ gbɛ nɔ ayeɔ abuaa asafo nɔkwɛlɔi kɛ mɛi ni efi amɛ lɛ fɛɛ yɛ?

¹² Yɛ Yakobo wolo lɛ naagbeegbɛ lɛ, ewie sɔlemɔ he yɛ hemɔkɛyeli gbɛfaŋ yɛ gbɛ kroko nɔ hu. Etsɔɔ akɛ yɛ sane fɛɛ sane mli, kɛji ‘wɔmiina amanehulu’ aloo ‘wɔna tsuijurɔ’ lɛ, esa akɛ wɔbɛŋkɛ Nyɔŋmɔ yɛ sɔlemɔ mli aloo yijiemɔlalai alamɔ mli. Agbɛnɛ hu ewie sɔlemɔ ni aaasɔle aha mɛi ni efĩ amɛ lɛ he. Ekɛɛ esani mɔni he yeɔ, belɛ mɔni he yeɔ yɛ mumɔŋ ni egba ejwɛŋmɔ kɛ ehenumɔnii anaa lɛ ‘atsɛ asafo lɛ mli onukpai lɛ ni amɛsɔle amɛhalɛ.’ Enɛ po tsɔɔ akɛ eyɛ hemɔkɛyeli ni ele heni sa akɛ etaoɔ yelikɛbuamɔ kɛjɛɔ. Dani mɔko aaaya tsofafeelɔ ko ŋɔɔ koni afeelɛ tsofa Iɛ, ja eyɛ nakai mɔ lɛ mli hemɔkɛyeli saŋŋ akɛ ebaanyɛ etsalɛ dã. Agbɛnɛ kwɛmɔ yibii kpakpai ni jɛɔ nii ni tamɔ nakai lɛ feemɔ mli kɛbaa: “Ni hemɔkɛyeli sɔlemɔ lɛ aaahere helatsɛ lɛ yiwala, ni [Yehowa] aaateelɛ shi, ni kɛji efee eshai lɛ, aaaŋɔfalɛ.” (Yak. 5:​13-15) Enɛ haa mɛi ni efi amɛ kɛ agbɛnɛ asafonɔkwɛlɔi ni sa akɛ amɛfeɔ klalo ni amɛnaà he suɔmɔ akɛ atsɔ amɛnɔ ni mɛi ni efi amɛ lɛ ana nibii ni he hiaa amɛ lɛ fɛɛ tswɛm naà gbɛtsɔɔmɔ kpakpa.

13. Te Yakobo kɛ Elia tsu nii eha tɛɛŋ akɛ nɔkwɛmɔnɔ ko ni sa kadimɔ yɛ sane nɛɛ mli lɛ?

¹³ Yakobo lɛɛ sane nɛɛ mli lolo, ni yɛ asafo nɔkwɛlɔi kɛ nyɛmimɛihii krokomɛi ni ena mumɔŋ salɛ lɛ ahejwɛŋmɔ mli lɛ, ekɛɛ “jalɔ sɔlemɔ ni mli wa lɛ nyɛɔ nii babaoo etsuɔ.” Nɔni ekɛfĩ enɛ sɛɛ ji Elia sɔlemɔi ni Nyɔŋmɔ ha hetoo lɛ ahe wiemɔ, akɛ klɛŋklɛŋ lɛ esɔle “koni nyɔŋmɔ akanɛ,” ni afii etɛ kɛ nyɔji ekpaa fɛɛ lɛ, nyɔŋmɔ enɛɛɛ, ni esɔle ekoŋŋ ni nyɔŋmɔ bɔi nɛmɔ. Ni Elia jeee gbɔmɔ ko ni he wa fe adesai. Eji “gbɔmɔ adesa tamɔ wɔ nɔŋŋ.”​—Yak. 5:​16-18.

14. Akɛ naagbee ŋaawoo lɛ, mɛɛ gbɛ nɔ Yakobo tee nɔ ewo hewalɛ yɛ?

¹⁴ Yɛ naamuamɔ mli lɛ, be mli ni ewoɔ hewalɛ lolo akɛ wɔhiɛ ahi wɔhe nɔ akɛ wɔɔɔye wɔbua mɛi ni ‘duɔ gbɛ kɛjɛɔ anɔkwale lɛ mli’ kɛ́ eeehi lɛ, ekɛɛ “mɔni kpaleɔ eshafeelɔ kɛjɛɔ egbɛduu mli lɛ, ehere susuma yiwala kɛjɛ gbele mli, ni eeeha eshai pii anɔ.” (Yak. 5:​19,20) Mɛɛ naamuamɔ ni shɛjeɔ mɔ mii po nɛ! Kwɛ bɔni enɛ tamɔ bɔni Yehowa kɛɔ yɛ lɛdiɛŋtsɛ ehe lɛ pɛpɛɛpɛ, akɛ: “Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, . . . ni ŋɔɔ tɔmɔ kɛ efɔŋ kɛ esha efaa.”​—2 Mose 34:​6, 7.

15. Yɛ nakai gbɛ nɔ nɔŋŋ lɛ mɛɛ gbɛ̀i enyɔ Yuda wie he akɛ aaanyɛ atsɔ nɔ aye abuɔ mɛi ni efi amɛ lɛ?

¹⁵ Sane kome hu ji akɛ Yuda mu wolo ni eŋma lɛ naa yɛ gbɛ ko ni tamɔ nakai nɔŋŋ nɔ, ni ewie ‘wɔnane ni wɔɔɔha emɔ shi yɛ hemɔkɛyeli ni yɔɔ krɔŋkrɔŋ fe fɛɛ lɛ nɔ’ lɛ he. Lɛ hu ema nɔ mi waa akɛ ebiɔ ni wɔfee klalo akɛ wɔɔɔwa mɛi ni efĩ amɛ lɛ yɛ mlihilɛ gbɛ nɔ ni wɔhe afee oya kɛ nakai feemɔ. “Nyɛyaa nɔ nyɛnaa mɛikomɛi ni yiŋ feɔ amɛ kɔshikɔshi lɛ mɔbɔ; nyɛshaã amɛ kɛjɛa la lɛ mli koni nyɛkɛherea amɛyiwala. Shi nyɛyaa nɔ nyɛkɛ gbeyeishemɔ anaa mɛikrokomɛi mɔbɔ, ni nyɛhia mligbɛ atade ni akɛ heloo ewo he muji lɛ tete.” (Yuda 20-23, NW) Nohewɔ lɛ biɛnɛɛ hu aawie aatsɔɔ mɛi ni ena mumɔŋ salɛ lɛ. Kɛji ole mɔko ni yiŋ feɔlɛ kɔshikɔshi aloo enaji etɔtɔ kɛbote mujinitsumɔ mli lɛ, kaaye ohe oyai ni onyage mɔnɛ, shi moŋ shálɛ kɛjɛ la lɛ mli kɛ́ eeehi, ni okwɛ jogbaŋŋ koni bodiɛŋtsɛ lɛ ekashã ohe aloo owo ohe muji yɛ gbɛ ko nɔ.

‘NYƐJWƐŊA EHE . . . NYƐKWƐALƐ JOGBAŊŊ’

16, 17. Yɛ Hebribii Awolo lɛ mli lɛ, mɛni nɔ Paulo damɔ ekɛ nii to nii ahe lɛ: ni mɛɛ mlikpɛi no haa afeɔ?

¹⁶ Bɔfo Paulo ŋmala Kristofoi a-Hela Ŋmalɛi lɛ amli woji lɛ titri. Wolo ni eŋma Hebri Kristofoi lɛ waa wɔ ni ekɛ gbɛtsɔɔmɔ kɛha hemɔkɛyeli krɔŋŋ ni he wa lɛ namɔ haa, nɔni haa wekukpaa kpakpa baa mɔ kɛ Yehowa kɛ Yesu Kristo teŋ lɛ.

¹⁷ Belɛ shishinumɔ yɛ mli akɛ yɛ nakai wolo lɛ mli lɛ, Paulo kɛ Yudafoi ni ji heloonaa Israelbii lɛ toɔ Yudafoi ni batsɔmɔ Kristofoi asafo ni ji mumɔŋ Israelbii ni fee sɛɛ lɛ akɛ Jeŋmajiaŋbii hu bafata he lɛ, klɛŋklɛŋbii ahe. Yɛ niiahekɛtoi nɛɛ amli lɛ, Paulo tsɔɔ bɔni Hebri Kristofoi lɛ yɔɔ hegbɛi pii fe heloonaa Israelbii lɛ, shi etsɔɔ hu akɛ enɛ kɛ gbɛnaanii ni tsii ebaŋmɛ amɛnɔ. Ŋmɛnɛ, anɔkwa Kristofoi fɛɛ aaanyɛ amɛkɛ nibii nɛɛ nɔŋŋ ato amɛhe ni amɛna he sɛɛ, ekɔɔɔ he eko nɔ̃ shishilɛ mli ni amɛjɛ.

18. Mɛɛ kɔkɔ ebɔɔ yɛ kpalaŋmɔ ni aaakpalaŋ kɛya sɛɛ lɛ he shii abɔ yɛ ewolo lɛ mli; ni mɛni nɔ no damɔ yɛ Israelbii ayinɔsane mli?

¹⁸ Mra mli lɛ, Paulo tsɔɔ akɛ kɛji esani abuɔ nɔni akɛɛ kɛtsɔ ŋwɛi bɔfoi anɔ beni akɛ Mla lɛ ha Israel lɛ waa lɛ, no lɛ “te wɔ lɛ wɔbaafee tɛɛŋ wɔjo naa foiŋ, kɛji wɔbuuu nɛkɛ yiwalaheremɔ kpeteŋkpele nɛɛ lɛ, nɔni tsutsu lɛ Nuntsɔ [Yesu] ji mɔni wie he” lɛ? (Heb. 2:​1-3; Gal. 3:19) Abɔ kɔkɔ ko ni tamɔ enɛ nɔŋŋ yɛ nakai wolo lɛ naagbeegbɛ. Beni Paulo ewie nɔni ba yɛ Sinai Gɔŋ lɛ shishi lɛ he sɛɛ lɛ, eŋma akɛ: “Kɛ́ mɛi ni kwa mɔni wie tsɔɔ amɛ yɛ shikpɔŋ lɛ nɔ lɛ ahe ejeee mli lɛ, belɛ kɛji wɔkpale kɛjɛ mɔni jɛɔ ŋwɛi wieɔ lɛ he lɛ, wɔ moŋ wɔhe ejeŋ mli kɔkɔɔkɔ.”​—Heb. 12:⁠25.

19. Nohewɔ lɛ mɛɛ wiemɔi ni kɛ otii lɛ mamɔɔ shi ni he yɔɔ sɛɛnamɔ awie yɛ Hebribii Awolo 3:​12-15 kɛ 12:25-29 lɛ?

¹⁹ Biɛnɛɛ esa akɛ wɔhemɔkɛyeli lɛ feɔ hemɔkɛyeli krɔŋŋ yɛ, beni afee ni ena su ni aka akwɛ lɛ eko. Tsui lɛ he bajeɔ mli. Beni Paulo etsɔɔ nɔni Nyɔŋmɔ wie yɛ Israel he akɛ “daanɛɛ amɛduɔ gbɛ yɛ amɛtsui mli” sɛɛ lɛ, ebɔ kɔkɔ waa ko kɛha wɔ nɔŋŋ wɔsɛɛnamɔ, akɛ: “Nyɛkwɛa ni ahia, anyɛmimɛi, koni nyɛteŋ mɔko akahi tsui fɔŋ ni heee yeee ni ekpale kɛjɛ Nyɔŋmɔ, hiɛkaalɔ lɛ, he.” Wɔnyɛŋ wɔdamɔ wɔnajiaŋ. Kɛji ‘wɔtsiii wɔbɛŋkɛɛɛ Nyɔŋmɔ’ kɛ hemɔkɛyeli ni daa befɛɛbe yɛ be mli ni wɔyaa nɔ wɔleɔ Nyɔŋmɔ he sane babaoo lɛ, no lɛ oshra yɛ akɛ ‘esha shishiumɔ lɛ aaawaje wɔteŋ mɔko,’ ni eeeha wɔkpa kɛya sɛɛ, ni wɔyɔseŋ nɔni baa wɔnɔ lɛ. Esa akɛ wɔwawaa wɔhe yɛ enɛ gbɛfaŋ koni ‘wɔwie wɔtsɔɔtsɔɔ wɔhe gbi fɛɛ gbi.’ Kɛji “wɔhiɛ wɔhe ni wɔŋɔfɔ̃ɔ enɔ kɛjɛ shishijee lɛ mli kpɛŋŋ kɛyashi naagbee” lɛ, no dani wɔɔɔye kunim. Esa akɛ wɔhiɛ nɛkɛ hekɛnɔfɔɔ kpɛŋŋ ni ji hemɔkɛyeli ni hosooo nɛɛ mli beni afee ni wɔnine ashɛ “maŋtsɛyeli ni anyɛŋ ahoso” lɛ kɛ emli jɔɔmɔi lɛ anɔ.​—Heb. 3:​10-14; 12:⁠28.

20. Yɛ hemɔkɛyeli he titri ni Paulo wie sɛɛ lɛ, mɛɛ gbɛ nɔ ewo wɔ hewalɛ waa yɛ, yɛ sɔlemɔ gbɛfaŋ yɛ wolo nɛɛ mli?

²⁰ Paulo wo wɔ hewalɛ hu yɛ sɔlemɔ gbɛfaŋ akɛ “wɔkwɛ hemɔkɛyeli Shishijelɔ kɛ Naagbelɔ ni ji Yesu lɛ, . . . nyɛjwɛŋɔ mɔni ŋmɛ etsui shi eha naashai ni eshafeelɔi ŋmɛlɛ nɛɛ he, koni ekaje nyɛtsine ni nyɛsusumai lɛ anijiaŋ miije wui.” Yɛ nibii sɔrɔtoi fɛɛ ni Yesu tsɔ mli kɛho lɛ ahewɔ lɛ, ebaanyɛ ena wɔ mɔbɔ yɛ wɔgbɔjɔmɔi lɛ ahewɔ, tsɛ esha bɛ ehe moŋ, ni kɛtsɔ enɔ lɛ wɔɔɔnyɛ ‘wɔtsi wɔbɛŋkɛ duromɔ sɛi lɛ,’ ni wɔna yelikɛbuamɔ yɛ be ni sa mli.​—Heb. 4:​15, 16; 12:​2, 3.

21. Nɛgbɛ Paulo kɛ “tawuunii” ni Nyɔŋmɔ kɛhaa wɔ lɛ tsa sɔlemɔ he sane lɛ nɔ kpaakpa yɛ, ni mɛɛ gbɛ nɔ efee no yɛ? Mɛɛ mlikpɛɛ enɛ haa afeɔ?

²¹ Naagbee lɛ, taakɛ Paulo ŋma eyaha Efesobii lɛ, nyɛhaa wɔkaiɔ akɛ ‘sɔlemɔ ni aaasɔle daa yɛ mumɔ mli’ lɛ kɛ ‘Nyɔŋmɔ tawuunii lɛ fɛɛ’ ni wɔɔɔwo lɛ nyiɛ kpaakpa. Ni taakɛ Paulo fee lɛ, esani wɔsɔle wɔha wɔhe kɛ mɛikrokomɛi hu beni afea ni ‘wɔnyɛ wɔwie . . . ni wɔkɛ ekaa ajaje sanekpakpa lɛ mli teemɔsane ni yɔɔ krɔŋkrɔŋ lɛ.’​—Efe. 6:​10-20.b

[Shishigbɛ niŋmai]