Yɛ Kaai Fɛɛ Sɛɛ lɛ, Kpɛtɛmɔ Ohemɔkɛyeli lɛ He!
“Minyɛmimɛi, kɛji nyɛgbee kaai sɔrɔtoi pii amli lɛ, nyɛbua lɛ miishɛɛ sɔŋŋ.”—YAKOBO 1:2.
1. Yɛ mɛni fɛɛ sɛɛ ni Yehowa webii sɔmɔɔ lɛ yɛ hemɔkɛyeli kɛ “miishɛɛ kɛ tsuijurɔ” mli lɛ?
YEHOWA webii sɔmɔɔ lɛ akɛ e-Dasefoi, ni amɛyɛ emli hemɔkɛyeli kɛ “miishɛɛ kɛ tsuijurɔ.” (5 Mose 28:47; Yesaia 43:10) Amɛfeɔ enɛ, eyɛ mli akɛ kaai babaoo baa amɛnɔ. Yɛ amɛtɔlɛ lɛ fɛɛ sɛɛ lɛ, amɛnáa miishɛjemɔ kɛjɛɔ wiemɔi nɛɛ amli: “Minyɛmimɛi, kɛji nyɛgbee kaai sɔrɔtoi pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛ́ɔ tsuishiŋmɛɛ kɛbaa.”—Yakobo 1:2, 3.
2. Mɛni ale yɛ mɔ ni ŋma Yakobo wolo lɛ he?
2 Aŋma nakai wiemɔi lɛ aaafee afi 62 Ŋ.B., ni mɔ ni ŋma ji kaselɔ Yakobo, Yesu Kristo nyɛ bi lɛ. (Marko 6:3) Yakobo ji onukpa yɛ Yerusalem asafo lɛ mli. Yɛ anɔkwale mli lɛ, lɛ, kɛ Kefa (Petro), kɛ Yohane tamɔ “akulashiŋi”—asafo lɛ sɛɛfilɔi ni he wa ni yɔɔ shiŋŋ. (Galatabii 2:9) Beni akɛ ketiafoo he sane lɛ ba “bɔfoi lɛ kɛ onukpai” lɛ ahiɛ aaafee afi 49 Ŋ.B. mli lɛ, Yakobo kɛ sane mlitsɔɔmɔ ni damɔ Ŋmalɛ nɔ ha, ni klɛŋklɛŋ afii oha lɛ mli nɔyeli kuu lɛ kpɛlɛ nɔ.—Bɔfoi lɛ Asaji 15:6-29.
3. Mɛni ji naagbai ni klɛŋklɛŋ afii oha lɛ mli Kristofoi kɛkpeɔ lɛ ekomɛi, ni te wɔɔfee tɛŋŋ wɔná Yakobo wolo lɛ he sɛɛ ni fe fɛɛ?
3 Ákɛ mumɔŋ tookwɛlɔ ni susuɔ mɔ he lɛ, Yakobo ‘le bɔ ni tooi lɛ yɔɔ.’ (Abɛi 27:23) Eyɔse akɛ Kristofoi kɛ kaai ni mli wa waa miikpe. Esa akɛ ajaje amɛteŋ mɛi komɛi ajwɛŋmɔ, ejaakɛ amɛmiikwɛ niiatsɛmɛi ahiɛaŋ. Kɛha amɛteŋ mɛi komɛi lɛ, jamɔ ebafee nɔ ko kɛkɛ ni afeɔ. Mɛi komɛi kɛ amɛlilɛii ni amɛyeee nɔ lɛ miiye awui. Je lɛ mumɔ miifite nii, ni amɛteŋ mɛi pii bɛ tsuishiŋmɛɛ ni amɛsɔleee hu. Yɛ anɔkwale mli lɛ, Kristofoi lɛ ateŋ mɛi komɛi ahe miiye yɛ mumɔŋ. Yakobo wolo lɛ tsu nɛkɛ saji nɛɛ ahe nii yɛ gbɛ ni tswaa mɔ emaa shi nɔ, ni anyɛɔ atsuɔ eŋaawoo lɛ he nii ŋmɛnɛ taakɛ eji yɛ Ŋ.B. klɛŋklɛŋ afii oha lɛ mli lɛ. Kɛ wɔsusu wolo nɛɛ he akɛ nɔ ni aŋma aha wɔ diɛŋtsɛ lɛ, ehe baaba sɛɛnamɔ babaoo aha wɔ.a
Kɛji Wɔgbee Kaai Amli Lɛ
4. Te esa akɛ wɔsusu kaai ahe wɔha tɛŋŋ?
4 Yakobo tsɔɔ wɔ bɔ ni esa akɛ wɔbu kaai wɔha. (Yakobo 1:1-4) Etsĩii ekɛ Nyɔŋmɔ Bi lɛ teŋ wekukpaa tã, shi moŋ ekɛ heshibaa tsɛɔ ehe akɛ “Nyɔŋmɔ kɛ Nuntsɔ Yesu Kristo tsulɔ.” Kɛjɛ shishijee lɛ, Yakobo ŋma wolo lɛ eyaha mumɔŋ Israel “akutsei nyɔŋma kɛ enyɔ ni egbɛ eshwã” yɛ yiwaa hewɔ lɛ. (Bɔfoi lɛ Asaji 8:1; 11:19; Galatabii 6:16; 1 Petro 1:1) Ákɛ Kristofoi lɛ, awaa wɔ hu wɔyi, ni wɔkɛ “kaai sɔrɔtoi pii” kpeɔ. Shi kɛji akɛ wɔkai akɛ, kaai ni wɔŋmɛɔ wɔtsui shi yɛ mli lɛ wajeɔ wɔhemɔkɛyeli lɛ, wɔbaabu amɛ “miishɛɛ sɔŋŋ” kɛ eba wɔnɔ. Kɛ wɔhiɛ wɔ emuuyeli mli wɔha Nyɔŋmɔ yɛ kaai abe mli lɛ, enɛ kɛ naanɔ miishɛɛ baaba abaha wɔ.
5. Mɛni baanyɛ afata wɔkaai lɛ ahe, ni mɛni baa kɛ wɔŋmɛ wɔtsui shi yɛ mli yɛ omanyeyeli mli?
5 Nɔ ni fata wɔkaai lɛ ahe ji amanehului ni baa adesai fɛɛ nɔ lɛ. Akɛ nɔkwɛmɔnɔ lɛ, gbɔmɔtsoŋ hewalɛ ni wɔbɛ baahao wɔ. Nyɔŋmɔ tsuuu naakpɛɛ helatsamɔi ahe nii bianɛ, shi ehaa wɔsɔlemɔi kɛha nilee kɛ shifimɔ ni he hiaa ni baaha wɔtsu hela lɛ he nii lɛ ahetoo. (Lala 41:2-4) Ákɛ Yehowa Odasefoi ni awaa wɔ yi lɛ, wɔnaa amanehulu hu yɛ jalɛ hewɔ. (2 Timoteo 3:12; 1 Petro 3:14) Kɛ wɔŋmɛ wɔtsui shi yɛ omanyeyeli mli yɛ kaai nɛɛ amli lɛ, eyeɔ wɔhemɔkɛyeli lɛ he odase akɛ nɔ ni ‘áka akwɛ.’ Ni kɛ wɔhemɔkɛyeli ye kunim lɛ, enɛ “tsɛ́ɔ tsuishiŋmɛɛ kɛbaa.” Hemɔkɛyeli ní atsɔ kaai anɔ aha emli ewa lɛ baaye abua wɔ ni wɔŋmɛ wɔtsui shi yɛ wɔsɛɛ be kaai amli.
6. Te ‘tsuishiŋmɛɛ gbeɔ enitsumɔ naa kɛwulaa shi’ ehaa tɛŋŋ, ni mɛɛ gbɛ ni anyɛɔ atsɔɔ nɔ atsuɔ he nii wɔbaanyɛ wɔkɔ kɛ wɔyɛ kaa shishi?
6 Yakobo kɛɛ: “Ni nyɛhaa tsuishiŋmɛɛ lɛ agbea enitsumɔ naa kɛwulaa shi.” Kɛ wɔŋmɛ kaa gbɛ koni eya nɔ, ni wɔbɔɔɔ mɔdɛŋ akɛ wɔɔha eba naagbee oya kɛtsɔ gbɛ ni jeee ŋmalɛ naa nɔ̃ nɔ lɛ, tsuishiŋmɛɛ lɛ baatsu “enitsumɔ” ni ji emuu ni eeeha wɔye akɛ Kristofoi, ni wɔtɔɔɔ fã yɛ hemɔkɛyeli mli. Shi kɛlɛ, kɛji akɛ kaa ko jie wɔgbɔjɔmɔ ko kpo lɛ, esa akɛ wɔtao Yehowa dɛŋ yelikɛbuamɔ ni wɔkɛye nɔ kunim. Shi kɛ kaa lɛ ji nɔ ni hãa akɛ he woɔ bɔlɛnamɔ jeŋba shara mli hu? Nyɛhaa wɔsɔlea yɛ naagba lɛ he, ni agbɛnɛ wɔfee nii yɛ wɔsɔlemɔi lɛ kɛ gbeekpamɔ naa. Ekolɛ ehe baahia ni wɔtsake he ni wɔtsuɔ nii yɛ lɛ, aloo wɔto gbɛjianɔi krokomɛi ni baaha wɔhiɛ emuuyeli mli wɔha Nyɔŋmɔ.—1 Mose 39:7-9; 1 Korintobii 10:13.
Nilee Taomɔ
7. Te aaafee tɛŋŋ aye abua wɔ koni wɔtsu kaai ahe nii?
7 Yakobo tsɔɔ wɔ nɔ ni esa akɛ wɔfee kɛ wɔleee bɔ ni wɔɔfee wɔtsu kaa ko he nii. (Yakobo 1:5-8) Yehowa ebɔŋ wɔ ahora yɛ nilee ni wɔbɛ ni wɔsɔleɔ wɔbiɔ yɛ hemɔkɛyeli mli lɛ hewɔ. Ebaaye ebua wɔ ni wɔkwɛ kaa lɛ yɛ gbɛ ni ja nɔ, ni wɔŋmɛ wɔtsui shi yɛ mli. Nanemɛi heyelilɔi baagbala wɔjwɛŋmɔ kɛya ŋmalɛi anɔ aloo yɛ Biblia lɛ kasemɔ be mli. Nibii ni baa ni Nyɔŋmɔ kudɔɔ baanyɛ aha wɔna nɔ ni esa akɛ wɔfee. Nyɔŋmɔ mumɔ lɛ baanyɛ akudɔ wɔ. (Luka 11:13) Kɛji akɛ wɔɔná nibii ni he yɔɔ sɛɛnamɔ nɛɛ amli ŋɔɔmɔ lɛ, taakɛ wɔbaakpa gbɛ lɛ, esa akɛ wɔkɛ wɔhe akpɛtɛ Nyɔŋmɔ kɛ ewebii lɛ ahe.—Abɛi 18:1.
8. Mɛni hewɔ ŋwanejelɔ nine shɛŋ nɔ ko nɔ kɛjɛŋ Yehowa dɛŋ lɛ?
8 Yehowa hãa wɔ nilee koni wɔnyɛ wɔdamɔ kaai anaa kɛ ‘wɔkpa fai yɛ hemɔkɛyeli mli ni wɔjeee nɔ ko nɔ ko he ŋwane lɛ.’ Ŋwanejelɔ lɛ “etamɔ ŋshɔke ni kɔɔyɔɔ tswaa kɛyaa kɛbaa” ni anyɛɛɛ ale ebe. Kɛji akɛ wɔnyɛɛɛ wɔfi shi shiŋŋ nakai yɛ mumɔŋ lɛ, ‘wɔkasusu akɛ wɔbaaná nɔ ko kɛjɛ Yehowa dɛŋ.’ Nyɛkahãa wɔfea “jwɛŋmɔi enyɔnyɔ-tsɛmɛi” kɛ ‘mɛi ni fiii shi’ yɛ sɔlemɔ loo yɛ gbɛi krokomɛi amli. Yɛ no najiaŋ lɛ, nyɛhãa wɔnáa hemɔkɛyeli yɛ Yehowa, nilee Jɛɛhe lɛ mli.—Abɛi 3:5, 6.
Niiatsɛ kɛ Ohiafo Fɛɛ Baanyɛ Ashwã
9. Mɛni hewɔ wɔyɔɔ nɔwomɔ ni wɔɔdamɔ nɔ wɔshwã akɛ Yehowa jálɔi lɛ?
9 Kɛji akɛ ohia po ji wɔkaai lɛ ateŋ ekome lɛ, nyɛhaa ehia wɔjwɛŋmɔ mli akɛ, Kristofoi niiatsɛmɛi kɛ ohiafoi fɛɛ baanyɛ ashwã. (Yakobo 1:9-11) Dani mɛi ni afɔ amɛ mu lɛ ateŋ mɛi ni fa aaatsɔmɔ Yesu sɛɛnyiɛlɔi lɛ, no mli lɛ amɛbɛ nɔ ko tsɔ̃ yɛ heloo gbɛfaŋ, ni je lɛ ebuuu amɛ. (1 Korintobii 1:26) Shi amɛbaanyɛ amɛshwã yɛ amɛ ‘nɔwomɔ’ kɛmiiya Maŋtsɛyeli niyelɔi agbɛhe mli lɛ hewɔ. (Romabii 8:16, 17) Nɔ ni tamɔɔɔ nakai lɛ, ‘aba’ niiatsɛmɛi ni tsutsu ko lɛ akɛ woo hãa amɛ lɛ ‘shi’ akɛ Kristo sɛɛnyiɛlɔi akɛni je lɛ gbe amɛhe guɔ lɛ hewɔ. (Yohane 7:47-52; 12:42, 43) Shi akɛ Yehowa tsuji lɛ, wɔ fɛɛ wɔbaanyɛ wɔshwã, ejaakɛ je lɛŋ ninamɔ kɛ gbɛhe ni nɔ kwɔ jeee nɔ ko nɔ ko kɛ akɛto mumɔŋ ninamɔ ni wɔnáa mli ŋɔɔmɔ lɛ he. Ni kwɛ bɔ ni wɔdaa shi wɔhãa, akɛ, gbɛhe ko bɛ kɛha henɔwomɔ yɛ kwasafoŋ shihilɛ mli yɛ wɔteŋ!—Abɛi 10:22; Bɔfoi lɛ Asaji 10:34, 35.
10. Te esa akɛ Kristofonyo asusu heloonaa ninamɔ he eha tɛŋŋ?
10 Yakobo yeɔ ebuaa wɔ koni wɔna akɛ wɔwala damɔɔɔ ninamɔ kɛ nɔ ni wɔnyɛ wɔtsu yɛ je lɛŋ lɛ nɔ. Taakɛ bɔ ni fɛo ni fɔfɔi yɔɔ lɛ nyɛŋ atsi egbimɔ kɛ egbele naa yɛ hulu ‘la ni tsoɔ’ lɛ mli lɛ, nakai nɔŋŋ niiatsɛ ninamɔ lɛ nyɛŋ aha ewala sɛɛ akɛ. (Lala 49:7-10; Mateo 6:27) Ebaanyɛ egbo yɛ be mli ni ediɔ ‘eshihilɛ gbɛi asɛɛ’, ekolɛ yɛ jarayeli nitsumɔi amli lɛ. No hewɔ lɛ, nɔ ni he hiaa titri ji ni ‘wɔtsɔmɔ niiatsɛmɛi yɛ Nyɔŋmɔ gbɛfaŋ’ ni wɔfee bɔ fɛɛ bɔ ni wɔɔnyɛ ni wɔkɛha Maŋtsɛyeli lɛ he nibii aya hiɛ.—Luka 12:13-21; Mateo 6:33; 1 Timoteo 6:17-19.
Miishɛɛ Ji Mɛi ni Ŋmɛɔ Amɛtsui Shi yɛ Kaa Mli Lɛ
11. Mɛɛ gbɛkpamɔi yɔɔ kɛha mɛi ni kɛ amɛhe kpɛtɛɔ amɛhemɔkɛyeli he yɛ kaai amli lɛ?
11 Niiatsɛmɛi jio, ohiafoi jio, kɛ wɔŋmɛ wɔtsui shi yɛ wɔkaai amli lɛ, wɔbaanyɛ wɔná miishɛɛ. (Yakobo 1:12-15) Kɛ wɔŋmɛ wɔtsui shi yɛ kaai amli ni wɔhemɔkɛyeli yɛ shiŋŋ lɛ, abaanyɛ abu wɔ akɛ mɛi ni yɔɔ miishɛɛ, ejaakɛ miishɛɛ yɛ nɔ ni ja yɛ Nyɔŋmɔ hiɛ ni afeɔ lɛ mli. Akɛni amɛkɛ amɛhe kpɛtɛ amɛhemɔkɛyeli lɛ he kɛyashi gbele mli hewɔ lɛ, Kristofoi ni akɛ mumɔ efɔ amɛ lɛ anine shɛɔ “wala akekere” ni ji shihilɛ ni gbele bɛ mli nɔ yɛ ŋwɛi. (Kpojiemɔ 2:10; 1 Korintobii 15:50) Kɛ wɔyɛ shikpɔŋ nɔ shihilɛ he hiɛnɔkamɔi ni wɔmɔ wɔhemɔkɛyeli ni wɔyɔɔ yɛ Nyɔŋmɔ mli lɛ mli lɛ, wɔbaanyɛ wɔkpa naanɔ wala yɛ paradeiso shikpɔŋ nɔ lɛ gbɛ. (Luka 23:43; Romabii 6:23) Kwɛ bɔ ni Yehowa hi ha gbɔmɛi fɛɛ ni naa emli hemɔkɛyeli lɛ!
12. Kɛ wɔkɛ amanehulu miikpe lɛ, mɛni hewɔ esaaa akɛ wɔkɛɔ akɛ: “Nyɔŋmɔ ŋɔɔ ajɛ aka mi” lɛ?
12 Ani Yehowa nyɛɔ ekɛ amanehulu kaa wɔ? Dabi, esaaa akɛ wɔkɛɔ akɛ: “Nyɔŋmɔ ŋɔɔ ajɛ aka mi.” Yehowa ebɔɔɔ mɔdɛŋ akɛ eeekɔne wɔyiŋ koni wɔfee esha, shi moŋ ebaaye ebua wɔ ni eha wɔ hewalɛ ni he hiaa koni wɔŋmɛ wɔtsui shi yɛ kaai amli, kɛ́ wɔdamɔ shi shiŋŋ yɛ hemɔkɛyeli mli. (Filipibii 4:13) Nyɔŋmɔ yɛ krɔŋkrɔŋ, no hewɔ lɛ ekɛ wɔ wooo shihilɛi komɛi ni baagbɔjɔ wɔ shifimɔ ni wɔkɛdamɔɔ nɔ fɔŋ feemɔ naa lɛ mli. Kɛji akɛ wɔkɛ wɔhe wo shihilɛ ko ni kɛ Ŋmalɛ lɛ kpãaa gbee mli ni wɔfee esha ko lɛ, esaaa akɛ wɔshwaa lɛ, “ejaakɛ Nyɔŋmɔ lɛ akaaa lɛ yɛ nifɔji agbɛfaŋ, ni lɛ diɛŋtsɛ hu ekaaa mɔ ko.” Eyɛ mli akɛ Yehowa baaŋmɛ kaa ko gbɛ koni etsɔse wɔ kɛha wɔ diɛŋtsɛ wɔhilɛ kɛhamɔ moŋ, shi ekɛ jwɛŋmɔ fɔŋ ekaaa wɔ. (Hebribii 12:7-11) Satan baanyɛ aka wɔ ni wɔfee efɔŋ, shi Nyɔŋmɔ baanyɛ ajie wɔ kɛjɛ nakai mɔ fɔŋ lɛ dɛŋ.—Mateo 6:13.
13. Mɛni baanyɛ aba kɛ wɔkpooo akɔnɔ fɔŋ lɛ?
13 Ehe miihia ni wɔsɔle be fɛɛ be, ejaakɛ shihilɛ ko baanyɛ ni ekɛ akɔnɔ fɔŋ ni baalaka wɔ ni wɔfee esha aba. Yakobo kɛɔ akɛ: “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ.” Wɔnyɛŋ wɔshwa Nyɔŋmɔ yɛ esha ni wɔfee lɛ he, kɛ wɔŋmɛ gbɛ ni wɔha wɔtsui hi akɔnɔ ni kɛ esha baa lɛ nɔ. Kɛji akɛ wɔjieee akɔnɔ fɔŋ kɛjɛɛɛ wɔmli lɛ, ‘eŋɔɔ hɔ,’ alɛɔ lɛ yɛ tsui lɛ mli, ni “efɔɔ esha.” Kɛ afee esha agbe naa lɛ, “efɔɔ gbele.” Eyɛ faŋŋ akɛ, esa akɛ wɔbu wɔtsuii ahe, ni wɔte shi wɔshi eshafeemɔ akɔnɔi. (Abɛi 4:23) Abɔ Kain kɔkɔ akɛ esha miihe aye enɔ kunim, shi eteee shi ewooo enɛ. (1 Mose 4:4-8) No hewɔ lɛ, kɛ wɔmiije shishi ni wɔdi gbɛ ko ni kɛ ŋmalɛi lɛ kpãaa gbee sɛɛ hu? Yɛ anɔkwale mli lɛ, kɛ Kristofoi onukpai bɔɔ mɔdɛŋ ni amɛjaje wɔ, koni wɔkafee esha wɔshi Nyɔŋmɔ lɛ, esa akɛ wɔda shi.—Galatabii 6:1.
Nyɔŋmɔ—Nibii Kpakpai Ajɛɛhe
14. Mɛɛ shishinumɔ naa abaanyɛ akɛɛ akɛ Nyɔŋmɔ nikeenii “hi kɛwula shi”?
14 Esa akɛ wɔkai akɛ Yehowa ji nibii kpakpai Ajɛɛhe, shi jeee kaai ajɛɛhe. (Yakobo 1:16-18) Yakobo wie nanemɛi heyelilɔi lɛ ahe akɛ “minyɛmimɛi ni misumɔɔ,” ni etsɔɔ akɛ Nyɔŋmɔ ji ‘nibii kpakpai fɛɛ kɛ nikeenii ni hi kɛwula shi’ lɛ a-Halɔ. Yehowa mumɔŋ kɛ heloonaa nikeenii lɛ “hi kɛwula shi,” loo amɛyeɔ emuu, ni nɔ ko nɔ ko eshwɛɛɛ amɛ. Amɛbaa ‘kɛjɛɔ ŋwɛi,’ kɛjɛɔ Nyɔŋmɔ shihilɛhe ni yɔɔ ŋwɛiniiaŋ lɛ. (1 Maŋtsɛmɛi 8:39) Yehowa ji “lai atsɛ lɛ”—hulu lɛ, nyɔŋtsere lɛ, kɛ ŋulamii lɛ. Ehãa wɔ mumɔŋ la kɛ anɔkwale hu. (Lala 43:3; Yeremia 31:35; 2 Korintobii 4:6) Ákɛ mɔ ni tamɔɔɔ hulu ni haa esusumai tsakeɔ beni enyiɛɔ kɛyaa, ni eshɛɔ he ni etsoɔ fe fɛɛ shwane lɛ, Nyɔŋmɔ hiɔ he ni kpɛɔ fe fɛɛ mli yɛ nii kpakpai ni ekɛhaa lɛ mli. Yɛ anɔkwale mli lɛ, ebaawula wɔ ni wɔkpee kaai anaa, kɛ wɔkɛ mumɔŋ nibii ni eto he gbɛjianɔ kɛtsɔ e-Wiemɔ lɛ kɛ “tsulɔ anɔkwafo kɛ nilelɔ” lɛ nɔ ekɛhaa lɛ tsu nii kɛmɔ shi lɛ.—Mateo 24:45.
15. Mɛni ji Yehowa nikeenii ni hi fe fɛɛ lɛ ateŋ ekome?
15 Mɛni efee Nyɔŋmɔ nikeenii ni hi fe fɛɛ lɛ ateŋ ekome? Mumɔŋ bii ni etsɔɔ mumɔ krɔŋkrɔŋ lɛ nɔ efɔɔ amɛ, sanekpakpa lɛ loo “anɔkwale wiemɔ” lɛ he nii ni amɛtsuɔ. Mɛi ni náa mumɔŋ fɔmɔ lɛ ji “klɛŋklɛŋ yibii” diɛŋtsɛ, mɛi ni ahala amɛ kɛjɛ gbɔmɛi ateŋ koni amɛtsɔmɔ “maŋtsɛmɛi kɛ osɔfoi” yɛ ŋwɛi. (Kpojiemɔ 5:10; Efesobii 1:13, 14) Ekolɛ Yakobo miisusu akoko klɛŋklɛŋ yibii ni akɛhãa akɛ afɔle yɛ Nisan 16, ni ji be ni atee Yesu shi lɛ kɛ ŋmãa aboloi enyɔ ni akɛha akɛ afɔle yɛ Pentekoste gbi lɛ nɔ, beni afɔse mumɔ krɔŋkrɔŋ lɛ ashwie shi lɛ he. (3 Mose 23:4-11, 15-17) Yɛ enɛ mli lɛ, Yesu baafee klɛŋklɛŋ yibii ni enanemɛi niyelɔi lɛ baafee ‘klɛŋklɛŋ yibii komɛi.’ Shi kɛ wɔyɛ shikpɔŋ nɔ hiɛnɔkamɔ hu? Ojogbaŋŋ, ni wɔɔha ehi wɔjwɛŋmɔ mli lɛ baaye abua wɔ ni wɔmɔ wɔhemɔkɛyeli ni wɔyɔɔ yɛ “nibii kpakpai” fɛɛ a-Halɔ lɛ mli lɛ mli kpɛŋŋ, mɔ ni eha naanɔ wala yɛ Maŋtsɛyeli nɔyeli lɛ shishi lɛ efee nɔ ni baanyɛ aba lɛ.
Feemɔ ‘Wiemɔ lɛ Nɔyelɔ’
16. Mɛni hewɔ esa akɛ wɔhe afee ‘oya kɛ ninumɔ shi wɔhumi shi kɛ wiemɔ kɛ mlifu’ lɛ?
16 Kɛji akɛ wɔkɛ wɔhemɔkɛyeli lɛ he kaai miikpe bianɛ loo jeee nakai lɛ, esa akɛ wɔtsɔmɔ “wiemɔ lɛ nɔyelɔi.” (Yakobo 1:19-25) Ehe miihia ni wɔhe “afee oya kɛ” Nyɔŋmɔ wiemɔ lɛ ‘numɔ,’ wɔfee mɛi ni kɛ toiboo yeɔ nɔ. (Yohane 8:47) Yɛ gbɛ kroko nɔ lɛ, nyɛhaa ‘wɔhumia shi kɛ wiemɔ,’ ni wɔkwɛ jogbaŋŋ yɛ nɔ ni wɔwieɔ lɛ he. (Abɛi 15:28; 16:23) Ekolɛ Yakobo miikanya wɔ koni wɔkafee oya wɔwie akɛ wɔkaai lɛ jɛ Nyɔŋmɔ ŋɔɔ. Awoɔ wɔ ŋaa hu akɛ ‘wɔhumi shi kɛ mlifu; ejaakɛ gbɔmɔ mlifu tsuuu Nyɔŋmɔ jalɛ he nii.’ Kɛ nɔ ni mɔ ko wieɔ lɛ wo wɔmli la lɛ, nyɛhaa ‘wɔhumia shi,’ koni wɔkwa oweletɔɔ hetoo. (Efesobii 4:26, 27) Mlifu mumɔ ni baagba wɔnaa ni etsɔ kaa kɛha mɛi krokomɛi lɛ nyɛŋ awo yibii ni wɔ-Nyɔŋmɔ ni ja lɛ mli hemɔkɛyeli taoɔ yɛ wɔdɛŋ lɛ. Kɛfata he lɛ, kɛ wɔyɛ “sɛɛyoomɔ babaoo” lɛ, ‘wɔbaahumi shi kɛ mlifu,’ ni ebaagbala wɔnyɛmimɛi hii kɛ yei lɛ kɛbɛŋkɛ wɔ.—Abɛi 14:29, NW.
17. Mɛni baa kɛ ajie efɔŋfeemɔ kɛjɛ tsui kɛ jwɛŋmɔ lɛ mli?
17 Yɛ anɔkwale mli lɛ, ehe miihia ni wɔye wɔhe kɛjɛ “nyaŋemɔ nitsumɔ” fɛɛ he—nɔ fɛɛ nɔ ni Nyɔŋmɔ hiɔ ni kɛ mlifu baa. Agbɛnɛ hu esa akɛ ‘wɔshɛrɛ efɔŋ nɔtekemɔ fɛɛ wɔshwie.’ Esa akɛ wɔ fɛɛ wɔjie helooŋ kɛ mumɔŋ mujiwoo fɛɛ kɛjɛ wɔhe. (2 Korintobii 7:1; 1 Petro 1:14-16; 1 Yohane 1:9) Efɔŋ ni wɔjie kɛjɛ tsui kɛ jwɛŋmɔ mli lɛ ye ebua wɔ ni ‘wɔkɛ mlijɔlɛ here anɔkwa wiemɔ ni atɛo yɛ wɔmli lɛ nɔ.’ (Bɔfoi lɛ Asaji 17:11, 12) Bɔ fɛɛ bɔ ni be ni wɔbatsɔmɔ Kristofoi lɛ etsɛ eha lɛ kɔɔɔ he eko, esa akɛ wɔya nɔ wɔŋmɛ gbɛ ni atɛo Ŋmalɛ mli anɔkwale lɛ babaoo yɛ wɔmli. Mɛni hewɔ? Ejaakɛ Nyɔŋmɔ mumɔ lɛ haa wiemɔ lɛ ni atɛo yɛ wɔmli lɛ woɔ “gbɔmɔ hee” ni kɛ mɔ yaa yiwalaheremɔ mli lɛ.—Efesobii 4:20-24.
18. Yɛ mɛɛ gbɛ nɔ mɔ ni ji wiemɔ lɛ nulɔ kɛkɛ lɛ yɔɔ sɔrɔto yɛ mɔ ni ji enɔyelɔ lɛ he lɛ?
18 Mɛɛ gbɛ nɔ wɔtsɔɔ yɛ akɛ wiemɔ lɛ ji wɔ gbɛtsɔɔmɔ nɔ̃? Kɛtsɔ “wiemɔ lɛ nɔyelɔi, ni jeee wiemɔ lɛ nulɔi kɛkɛ” ni wɔkɛ toiboo feɔ lɛ nɔ. (Luka 11:28) “Nɔyelɔi” yɛ hemɔkɛyeli ni kɛ nitsumɔi tamɔ ekãa ni afeɔ yɛ Kristofoi asɔɔmɔ nitsumɔ lɛ mli, kɛ he ni akɛwoɔ Nyɔŋmɔ webii akpeei amli daa lɛ baa. (Romabii 10:14, 15; Hebribii 10:24, 25) Mɔ ni nuɔ wiemɔ lɛ kɛkɛ lɛ “tamɔ nuu ko ni kwɛɔ ehiɛ su lɛ yɛ ashwishwɛ mli.” Ekwɛɔ ehe, kɛkɛ lɛ eshi etee, ni ehiɛ kpaa nɔ ni he baahia ni baajaje epuemɔ lɛ nɔ. Ákɛ ‘wiemɔ lɛ he nitsulɔi’ lɛ, wɔkaseɔ Nyɔŋmɔ “mla ni hi kɛwula shi” ni kɔɔ nɔ fɛɛ nɔ ni etaoɔ yɛ wɔdɛŋ lɛ he lɛ, ni wɔboɔ toi. No hewɔ lɛ, heyeli ni wɔnáa mli ŋɔɔmɔ bianɛ lɛ yɛ sɔrɔto kwraa yɛ esha kɛ gbele nyɔŋyeli lɛ he, ejaakɛ ekɛ mɔ yaa wala mli. No hewɔ lɛ, nyɛhaa ‘wɔyaa nɔ yɛ mla ni hi kɛwula shi lɛ mli,’ ni wɔpɛi mli daa ni wɔbo toi. Ni bo lɛ susumɔ enɛ he okwɛ! Ákɛ ‘wiemɔ lɛ he nitsulɔi ni jeee nulɔi ni hiɛ kpaa nɔ’ lɛ, wɔnáa miishɛɛ ni jɛɔ Nyɔŋmɔ duromɔ mli baa lɛ.—Lala 19:8-12.
Ekɔɔ Babaoo He Fe Hiɛaŋhiɛaŋ Jálɔi Kɛkɛ
19, 20. (a) Taakɛ Yakobo 1:26, 27 tsɔɔ lɛ, mɛni jamɔ ni he tse biɔ kɛjɛɔ wɔdɛŋ? (b) Mɛni ji jamɔ ni muji ko bɛ he lɛ he nɔkwɛmɔnii komɛi?
19 Kɛ wɔɔná ŋwɛi duromɔ mli ŋɔɔmɔ lɛ, belɛ ehe baahia ni wɔkai akɛ anɔkwa jamɔ jeee hiɛaŋhiɛaŋ nifeemɔ ko kɛkɛ. (Yakobo 1:26, 27) Ekolɛ wɔbaasusu akɛ wɔji ‘gbɔmɛi ni jáa’ Yehowa, shi bɔ ni ebuɔ wɔteŋ mɔ fɛɛ mɔ ehaa lɛ ji nɔ̃ diɛŋtsɛ ni he hiaa. (1 Korintobii 4:4) Tɔ̃mɔ kome ni hiɛdɔɔ yɔɔ mli lɛ baanyɛ afee ‘lilɛi lɛ manyoflɛ’ ni wɔwooo. Wɔbaalaka wɔhe kɛ wɔsusu akɛ Nyɔŋmɔ hiɛ sɔɔ wɔjamɔ lɛ, yɛ be mli ni wɔgbeɔ mɛi ahe guɔ, wɔmaleɔ amɛhe, loo wɔkɛ lilɛi lɛ tsuɔ nii yɛ gbɛi fɔji krokomɛi anɔ lɛ. (3 Mose 19:16; Efesobii 4:25) Yɛ anɔkwale mli lɛ, wɔsumɔɔɔ ni ‘wɔjamɔ lɛ feɔ yaka’ ni Nyɔŋmɔ ekpɛlɛɛɛ nɔ yɛ yiŋtoo ko hewɔ.
20 Eyɛ mli akɛ Yakobo etsĩii jamɔ ni he tse lɛ he nɔ̃ fɛɛ nɔ̃ tã moŋ, shi ekɛɔ akɛ nɔ ni fata he ji ‘awusai kɛ okulafoi akwɛmɔ yɛ amɛ amanehulu mli.’ (Galatabii 2:10; 6:10; 1 Yohane 3:18) Kristofoi asafo lɛ jieɔ miishɛɛ krɛdɛɛ kpo yɛ okulafoi lɛ akwɛmɔ mli. (Bɔfoi lɛ Asaji 6:1-6; 1 Timoteo 5:8-10) Akɛni Nyɔŋmɔ ji okulafoi kɛ awusai Ahebulɔ hewɔ lɛ, nyɛhaa wɔkɛ Lɛ afea ekome, kɛtsɔ nɔ ni wɔɔnyɛ wɔfee ni wɔkɛye wɔbua amɛ yɛ mumɔŋ kɛ heloonaa lɛ nɔ. (5 Mose 10:17, 18) Jamɔ ni he tse hu tsɔɔ akɛ ‘ato he kɛjɛ je’ lɛ ni ji adesai agbɛjianɔtoo ni kã Satan hewalɛ mli nɛɛ mli. (Yohane 17:16; 1 Yohane 5:19) No hewɔ lɛ, nyɛhaa wɔyea wɔhe kɛjɛa je ni leee Nyɔŋmɔ lɛ jeŋba he, koni wɔwo Yehowa hiɛ nyam ni wɔhe aba sɛɛnamɔ yɛ esɔɔmɔ lɛ mli.—2 Timoteo 2:20-22.
21. Yɛ nɔ ni kɔɔ Yakobo wolo lɛ he lɛ, mɛɛ sanebimɔi esa akɛ wɔsusu he lolo?
21 No hewɔ lɛ, esa akɛ he ni wɔsusu Yakobo ŋaawoo lɛ he kɛyashɛ nɛɛ aye abua wɔ ni wɔŋmɛ wɔtsui shi yɛ kaai amli ni wɔkɛ wɔhe akpɛtɛ wɔhemɔkɛyeli lɛ he. Esa akɛ eha hiɛsɔɔ ni wɔyɔɔ kɛha nibii kpakpai a-Halɔ ni yɔɔ suɔmɔ lɛ aya hiɛ. Ni Yakobo wiemɔi lɛ yeɔ buaa wɔ koni wɔtsu jamɔ ni he tse he nii. Mɛni hu egbalaa wɔjwɛŋmɔ kɛyaa nɔ? Mɛɛ nibii krokomɛi hu wɔbaanyɛ wɔfee koni wɔkɛtsɔɔ akɛ wɔyɛ anɔkwa hemɔkɛyeli yɛ Yehowa mli?
[Shishigbɛ niŋmai]
a Kɛji akɛ wɔmiikase enɛ kɛ nikasemɔi enyɔ ni nyiɛ sɛɛ lɛ yɛ teemɔŋ loo yɛ weku nikasemɔ mli lɛ, nyɛbaana akɛ ehe baaba sɛɛnamɔ akɛ nyɛaakane Yakobo wolo ni tswaa mɔ hemɔkɛyeli emaa shi nɛɛ fã fɛɛ fã ni átsɛ sɛɛ yɛ ŋmalɛi lɛ amli lɛ.
Te Obaaha Hetoo Oha Tɛŋŋ?
◻ Mɛni baaye abua wɔ ni wɔŋmɛ wɔtsui shi yɛ kaai amli?
◻ Mɛni hewɔ Kristofoi baanyɛ ashwã yɛ kaai fɛɛ sɛɛ lɛ?
◻ Te wɔɔfee tɛŋŋ wɔfee wiemɔ lɛ nɔyelɔi?
◻ Jamɔ ni he tse lɛ kɔɔ mɛni he?
[Mfoniri ni yɔɔ baafa 9]
Kɛ oyɛ kaa shishi lɛ, ná hewalɛ ni Yehowa yɔɔ ni ekɛaaha sɔlemɔi ahetoo lɛ mli hemɔkɛyeli
[Mfoniri ni yɔɔ baafa 10]
“Wiemɔ lɛ nɔyelɔi” miijaje Nyɔŋmɔ Maŋtsɛyeli lɛ yɛ jeŋ fɛɛ