Mɛi Krokomɛi Anibii Ahe Miishɛɛ
“Nyɛteŋ mɔ fɛɛ mɔ akafo enɔ mli, shi efo enaanyo mli.”—FILIPIBII 2:4.
1, 2. Mɛni ji yiŋtoi komɛi ahewɔ ni esa akɛ wɔna mɛi krokomɛi anibii ahe miishɛɛ lɛ?
WƆYƐ yiŋtoo kpakpai ni wɔɔdamɔ nɔ wɔna mɛi krokomɛi anibii ahe miishɛɛ. Akɛ nɔkwɛmɔ nɔ lɛ, esa akɛ wɔna wɔnanemɛi adesai ahe miishɛɛ ejaakɛ wɔyɛ sɔrɔto. Bɔ ni ato gbɔmɔtso lɛ mli wala yibii ahe nii aha lɛ hiɛ gbɛjianɔtoo ni kɔɔ wɔ su kɛ baŋ yɛ fɔmɔ mli lɛ he. Bɔ ni eyɔɔ sɔrɔto ha sɔŋŋ hewɔ lɛ mɛi ni pɛiɔ awuiyeli mli lɛ kɛ fɔmɔ mli “waonaa kadimɔ” hu efata nibii ni amɛtsɔɔ nɔ amɛyɔseɔ mɛi lɛ he.
2 Yiŋtoi krokomɛi hu yɛ ni tsɔɔ nɔ hewɔ ni wɔyɔɔ sɔrɔto ni wɔhe yɔɔ miishɛɛ hu akɛ aŋkroaŋkroi lɛ. Nibii ni ebɔle wɔhe lɛ naa wɔnɔ hewalɛ kɛjɛɔ hɔŋɔɔ mli tɔɔ. Odaseyelii babaoo yɛ ni tsɔɔ akɛ fufɔbii ni afɔko amɛ lɛ po feɔ amɛnii yɛ nɔ ni yaa nɔ yɛ musu lɛ sɛɛ lɛ hewɔ. Yɛ no sɛɛ lɛ kɛ wɔbote je lɛ mli akɛ mɛi ni muɔ yɛ heyeli mli aloo susumai lɛ, wɔ fɔlɔi asui kɛ gbɛi hu naa wɔnɔ hewalɛ loo esaa wɔhe. Yɛ be mli ni wɔdaraa lɛ, wɔbaanyɛ wɔfee bi kome pɛ aloo nyɛmimɛi hii kɛ nyɛmimɛi yei baafata wɔhe ni wɔbaanyɛ wɔna gbɛfaŋnɔ ko yɛ amɛkwɛmɔ mli. Nɛkɛ naanyobɔɔ loo eko ni wɔnaaa lɛ naa hewalɛ yɛ gbɛ ni wɔtsɔɔ nɔ wɔdaraa lɛ nɔ. Nɔ ni wɔkaneɔ, nɔ ni atsɔɔ wɔ yɛ skul, nɔ ni wɔnaa yɛ televishin nɔ lɛ hu naa wɔjwɛŋmɔ kɛ nifeemɔi anɔ hewalɛ.
3. Yɛ Filipibii 2:4 kɛ gbeekpamɔ naa lɛ, mɛni miishɛɛ nɛkɛ esa akɛ wɔna titri lɛ yɛ mɛi krokomɛi anibii ahe?
3 No hewɔ lɛ, bɔ ni wɔyɔɔ sɔrɔto lɛ haa mɛi krokomɛi hu naa wɔhe miishɛɛ. Shi bɔfo Paulo yɛ nɔ kroko ni nɔ kwɔ ni haa enaa mɛi krokomɛi ahe miishɛɛ lɛ yɛ ejwɛŋmɔ mli. No hewɔ lɛ, ewo enanemɛi Kristofoi lɛ ahewalɛ akɛ ‘amɛkana amɛ diɛŋtsɛ amɛsaji pɛ he miishɛɛ, shi moŋ amɛna mɛi krokomɛi anibii hu he miishɛɛ.’ (Filipibii 2:4) Ni wɔɔtao nibii ni he aaaba sɛɛnamɔ aha wɔ pɛ lɛ, esa akɛ wɔna mɛi krokomɛi ahe miishɛɛ yɛ mumɔŋ titri. No hewɔ Iɛ mɛni ji gbɛi komɛi ni wɔtsɔɔ nɔ wɔnaa mɛi krokomɛi ahe miishɛɛ nɛɛ?
Mumɔŋ Nibii Ahe Miishɛɛnamɔ kɛ Sɔrɔtofeemɔ yɛ Su kɛ Baŋ Mli
4. Taakɛ Efesobii 4:22-24 tsɔɔ lɛ, mɛɛ tsakemɔi haa miishɛɛ ni wɔyɔɔ yɛ mɛi krokomɛi amumɔŋ nibii ahe Iɛ yaa hiɛ?
4 Mɛi krokomɛi ahe miishɛɛnamɔ yɛ mumɔŋ lɛ daa beni wɔ diɛŋtsɛ lɛ wɔkɛ Ŋmalɛ mli anɔkwalei ahe nilee tsuɔ nii ni wɔ diɛŋtsɛ wɔhiɔ shi yɛ Yesu Kristo nɔkwɛmɔ nɔ lɛ naa lɛ. (1 Petro 2:21) Akɛ anɔkwa Kristofoi lɛ, ‘wɔjieɔ gbɔmɔ momo lɛ ni hiɔ shi yɛ wɔ tsutsu jeŋba lɛ naa lɛ wɔshwieɔ’ ni wɔbɔɔ mɔdɛŋ ni wɔkɛ “gbɔmɔ hee lɛ ni abɔ yɛ Nyɔŋmɔ subaŋ kɛ anɔkwa jalɛ naa” lɛ ato najiaŋ. (Efesobii 4:22-24) No hewɔ lɛ, akɛ mɛi krokomɛi ahesusumɔ yɛ mlihilɛ mli toɔ pɛsɛmkunya sui anajiaŋ fiofio.—Yesaia 65:25.
5. Mɛni hewɔ gbɔmɛi sɔrɔtoi ni hiɛ sui sɔrɔtoi yɔɔ Kristofoi asafo lɛ mli lɛ, ni enɛ teɔ mɛɛ sanebimɔ shi?
5 Eyɛ mli akɛ tsakemɔi yɛ su kɛ baŋ mli ni etee nɔ yɛ Yehowa webii ateŋ lɛ yɛ naakpɛɛ moŋ, shi eshafeemɔ sui yɛ lolo. Paulo po kpɛlɛ nɔ akɛ: “Mi ni misumɔɔ akɛ mafee nɔ ni hi lɛ, efɔŋ moŋ kpɛtɛ mihe.” (Romabii 7:21) Eji anɔkwale akɛ, fɔmɔ mli sui kɛ ekrokomɛi ni wɔna hu yɛ, ni enɛɛmɛi haa ayɔseɔ wɔ. Mɛi komɛi le nibii ni yɔɔ fɛo ni amɛtsuɔ he nii, mɛi krokomɛi hu le bɔ ni apɛiɔ loo atoɔ saji anaa ni atsɔɔ mli. Mɛi komɛi yɛ dioo ni amɛnyɛɛɛ amɛbɛŋkɛ mɛi, mɛi krokomɛi hu sumɔɔ naanyobɔɔ ni amɛnyɛɔ amɛbɛŋkɛɔ mɛi. Belɛ tɛ aaafee tɛŋŋ ni ahiɛ ekomefeemɔ ni yɔɔ Kristofoi asafo lɛ mli yɛ sui kɛ baŋi ni yɔɔ sɔrɔtoi nɛɛ fɛɛ mli lɛ mli?
6. Te esa akɛ wɔsusu sɔrɔtofeemɔ ni yɔɔ mɛi asu kɛ baŋ mli lɛ he wɔha tɛŋŋ, ni mɛɛ gbɛ nɔ oootsɔ ofee enɛ he mfoniri yɛ?
6 Kɛ wɔbaanyɛ wɔjie mɛi krokomɛi ahe miishɛɛnamɔ yɛ mumɔŋ lɛ kpo ni wɔbaa ekomefeemɔ ni yɔɔ Kristofoi ateŋ lɛ yi lɛ, belɛ esa akɛ wɔyoo nibii taakɛ bɔ ni amɛji ni wɔna amɛshishinumɔ. Akɛni Nyɔŋmɔ biii emuuyeli shi yɛ wɔdɛŋ hewɔ lɛ, esaaa akɛ wɔbiɔ emuuyeli kɛjɛɔ wɔ Kristofoi ananemɛi lɛ adɛŋ. Agbɛnɛ, Yehowa kpaaa gbɛ akɛ etsuji lɛ fɛɛ baatamɔ amɛhe. Wɔ fɛɛ wɔyɛ gbɛhe ko yɛ Kristofoi asafo lɛ mli, ni wɔbaanyɛ ni wɔkɛ nyɛmɔi sɔrɔtoi ni Nyɔŋmɔ kɛha ni wɔna kɛjɛ fɔmɔ mli lɛ aye abua enitsumɔ lɛ. (1 Korintobii 12:12-26) Kɛji akɛ wɔtee nɔ wɔtsu nii waa yɛ asafo lɛ Yitso ni ji Yesu Kristo shishi lɛ, wɔnaŋ bei ni wɔkɛaakwɛ mɔ ko yɛ gbɛ ni yɔɔ keketee nɔ. (1 Korintobii 4:1-4) Taakɛ bɔ ni ŋaa nitsulɔ le lɛ, afee edɛŋdadei loo ŋaa dadei lɛ eko fɛɛ eko aha nitsumɔ pɔtɛɛ ko. Ani hamle baanyɛ agbu fɔlɔ fɛfɛo ni dade ni akɛgbuɔ fɔlɔ feɔ lɛ? Ani homile loo ŋmoŋmologbɔɔ nɔ ni akɛgbɔɔ tso lɛ baanyɛ agbu fɔlɔ yɛ tso lɛ mli? Dabi, ejaakɛ dɛŋdade fɛɛ dɛŋdade yɛ nɔ pɔtɛɛ ni akɛtsuɔ.
7. Yɛ be mli ni wɔ fɛɛ wɔkɛ wɔhe woɔ Maŋtsɛyeli sɔɔmɔ mli yɛ ekomefeemɔ mli lɛ, mɛni esa akɛ wɔha ehi wɔjwɛŋmɔ mli titri?
7 Kwɛ bɔ ni Maŋtsɛyeli lala “Miishɛɛ Sɔɔmɔ” lɛ mli wiemɔi lɛ ji anɔkwale! Ewoɔ hewalɛ akɛ: “Nyɛhaa wɔkɛ miishɛɛ asɔmɔa wɔ-Nyɔŋmɔ kɛ Maŋtsɛ lɛ, beni wɔkɛ wɔnikeenii kɛhaa enitsumɔ lɛ baa lɛ.” Eji anɔkwale, wɔnyɛŋ wɔfee mɛi ni yɔɔ nyɛmɔ ni yɔɔ sɔrɔto. Ni kɛlɛ, wɔhaa nitsumɔ ni akɛwo wɔdɛŋ akɛ Yehowa Odasefoi lɛ hiɔ wɔjwɛŋmɔ mli titri, ni wɔjɛɔ wɔtsui muu fɛɛ mli wɔtuɔ wɔhe wɔhaa enɛ. Taakɛ lala lɛ kɛfata he lɛ: “Tsɛ wɔ sɔɔmɔ lɛ yɛ bibioo moŋ, shi wɔtsɔɔ nɔ wɔtsɔɔ akɛ wɔtuu wɔtsui muu fɛɛ wɔha ni wɔjie wɔsuɔmɔ kpo.”—Sing Praises to Jehovah, Lala 130.
Nyɛbua Mɛi Krokomɛi Akɛ Amɛnɔ Kwɔlɔ fe Nyɛ
8. Nɔ ni Paulo wie yɛ Filipibii 2:1-3 lɛ kɛ nitsumɔ haa ekomefeemɔ shwereɔ yɛ mɛɛ gbɛ nɔ?
8 Ahaa ekomefeemɔ hu yaa hiɛ kɛ wɔsusu akɛ mɛi krokomɛi anɔ kwɔlɔ fe wɔ. Paulo ŋma akɛ: “No hewɔ lɛ kɛ Kristo mli wiemɔ-kɛ-tsɔɔmɔ ko yɛ, kɛ suɔmɔ miishɛjemɔ ko yɛ, kɛ mumɔŋ naanyobɔɔ ko yɛ, kɛ musuŋtsɔlɛ kɛ mɔbɔnalɛ ko yɛ lɛ, nyɛhaa mimiishɛɛ lɛ ayia obɔ akɛ nyɛmiijwɛŋ nɔ kome, nyɛhiɛ suɔmɔ kome susuma kome, jwɛŋmɔ kome.” Kadimɔ nɔ ni bɔfo lɛ kɛfata he lɛ: “Ni nyɛkaŋmɛa yaka mligbalamɔi loo yaka anunyam taomɔ gbɛ, shi moŋ nyɛkɛ heshibaa jwɛŋmɔ abubua nyɛnanemɛi fe nyɛ diɛŋtsɛ nyɛhe.”—Filipibii 2:1-3.
9. Ni mɔ ko aaafee mɔ ni sumɔɔ bei kɛ henɔwolɔ lɛ tsɔɔ mɛni, ni te wɔɔfee tɛŋŋ wɔkwa nɛkɛ sui nɛɛ?
9 Akɛni ebuuu mɛi krokomɛi akɛ amɛnɔ kwɔlɔ fe lɛ hewɔ lɛ, mɔ ni sumɔɔ bei lɛ jieɔ “su ni ejaaa kɛ nɔ ni gbaa mɔ naa ni kɛ bei kɛ ŋwanejee baa lɛ kpo yɛ bei babaoo mli.” (Webster’s New Collegiate Dictionary) Nɛkɛ su nɛɛ baanyɛ ajie ehe kpo yɛ “ŋwanejee kɛ naataomɔi” amli. (1 Timoteo 6:4) Yɛ anɔkwale mli lɛ, esa akɛ asusu mumɔ loo su ni yɔɔ wiemɔi kɛ susumɔi ni amɛjieɔ lɛ kpo lɛ asɛɛ lɛ he titri. No hewɔ lɛ kwa mɔ ni maa ewiemɔi ni akɛtsuɔ nii loo aŋmalaa ashwieɔ shi lɛ anɔ mi ni oootsɔ lɛ. Ni kɛji akɛ akɛ jwɛŋmɔ kroko ni kɔɔ hemɔkɛyeli ko he baha bo hu? Okɛ ohe akpɛtɛ Ŋmalɛ mli sane ni Nyɔŋmɔ etsɔ “tsulɔ anɔkwafo kɛ nilelɔ” lɛ nɔ ekɛha bo lɛ he yɛ anɔkwayeli mli. (Mateo 24:45-47) Yɛ fɛɛ sɛɛ lɛ, nɛkɛ ji gbɛ ni wɔtsɔ nɔ wɔkase anɔkwale lɛ yɛ klɛŋklɛŋ kwraa. Kɛ wɔyoo enɛ lɛ eeeye ebua wɔ ni wɔkwa henɔwolɔi ni wɔɔtsɔmɔ, ni ji akɛ bu ni wɔɔbu wɔhe akɛ wɔhe hiaa tsɔ.
Yaa nɔ Ona Mɛi Krokomɛi Ahe Miishɛɛ
10. Esa akɛ akɛ Filipibii 2:4 atsu nii yɛ asafo lɛ mli yɛ mɛɛ gbɛ nɔ?
10 Kaimɔ akɛ Paulo woɔ wɔ hewalɛ akɛ ‘wɔkafo wɔ pɛ wɔnɔ mli shi moŋ wɔfo mɛi krokomɛi anibii hu mli.’ (Filipibii 2:4) Mɛni ji nɔ ni enɛ tsɔɔ? Taakɛ bɔni kɛ wɔje gbɛ wɔtɛje wɔhiɛ wɔkwɛ nibii ni ebɔle wɔhe kɛkpe lɛ ebaaye ebua wɔ yɛ wɔ sɔɔmɔ nitsumɔ lɛ mli lɛ nakai nɔŋŋ mɛi krokomɛi ni yɔɔ asafo lɛ mli lɛ ahilɛ-kɛhamɔ he miishɛɛ ni wɔɔna lɛ baaŋmɛ wɔ gbɛ ni wɔna hegbɛ ni baaha ekomefeemɔ kɛ suɔmɔ ni ka wɔteŋ lɛ mli awa. Onukpai lɛ titri ji mɛi ni gbɛnaa nii ka amɛnɔ akɛ amɛjie nanemɛi heyelilɔi lɛ ahesusumɔ kpo, ejaakɛ abɛbua ko kɛɔ akɛ: “Bɔɔ mɔdɛŋ ni ole bɔ ni otooi lɛ yɔɔ, ni okwɛ okooloo kui lɛ jogbaŋŋ.” (Abɛi 27:23) Ni kɛlɛ, esa akɛ wɔ fɛɛ wɔgbala wɔjwɛŋmɔ kɛya wɔnanemɛi heyelilɔi lɛ ahiamɔ nii anɔ, ni esa akɛ wɔnyɛ wɔfee nakai.—1 Petro 2:17.
11. Mɛni hewɔ esa akɛ wɔbo toi jogbaŋŋ yɛ be mli ni wɔkɛ wɔmumɔŋ nyɛmimɛi hii kɛ yei wieɔ lɛ?
11 Gbɛ kroko ni atsɔɔ nɔ ahaa ekomefeemɔ shwereɔ ni anaa mɛi krokomɛi ahe miishɛɛ ji ni wɔhe be ni wɔkɛ wɔmumɔŋ nyɛmimɛi hii kɛ yei lɛ agba sane jogbaŋŋ. Taomɔ nɔ ni amɛsusuɔ he. Obaanyɛ ofee enɛ kɛ oyasara amɛ yɛ amɛshia mli, dani aje kpeei ashishi aloo yɛ kpeei lɛ asɛɛ yɛ Maŋtsɛyeli Asa lɛ nɔ. aloo yɛ be mli ni atse kpeei wuji ni akpa. Kɛ amɛmiiwie lɛ bo toi jogbaŋŋ. Enɛ baatsɔɔ akɛ wɔbaanu naagbai ni amɛkɛkpeɔ, kɛkɛ lɛ wɔbaanyɛ wɔyɛ wɔbua ni wɔtere amɛjatsui lɛ eko wɔha amɛ ni wɔkɛye Kristo mla lɛ nɔ. (Galatabii 6:2) Ni kɛlɛ, nɔ kroko ni he hiaa waa fe wɔ nyɛmimɛi lɛ ni wɔkɛ amɛ aaawie kɛkɛ lɛ yɛ ni baanyɛ abu ekomefeemɔ ni yɔɔ asafo lɛ mli lɛ he. Mɛni ji no?
Jiemɔ Henumɔ Kpo Otsɔɔ Amɛ
12. Mɛni hewɔ esa akɛ wɔjie henumɔ ni anaa ahaa mɛi krokomɛi akpo lɛ?
12 Henumɔ ni ajieɔ Iɛ kpo lɛ hu haa Kristofoi a-ekomefeemɔ shwereɔ. Akɛni shihilɛ mli naagbai miifa hewɔ lɛ, ehe miihia ni wɔ fɛɛ wɔjie nɛkɛ su nɛɛ kpo. Ekaba kɔkɔɔkɔ akɛ wɔkɛ wɔjwɛŋmɔ ema nɔ ni wɔfeɔ lɛ nɔ sɔŋŋ hewɔ lɛ wɔsusuuu mɛi krokomɛi ahenumɔi ahe. Akɛ nɔkwɛmɔ nɔ lɛ: Beni nyɛminuu ko ni yɔɔ Sɔɔmɔ kpee lɛ nɔ ba pɛ kɛkɛ ni onukpa ko wie etsɔɔ lɛ oya yɛ sane ko ni esa akɛ atswa he adafi he. Onukpa lɛ hiɛ fee lɛ yaa kɛ hiɛgbele, beni nɛkɛ nyɛmi nuu nɛɛ kwɛ lɛ, ni eŋmɔ, ni ekɛɛ lɛ akɛ: “Klɛŋklɛŋ lɛ, Nyɛminuu, miiŋa bo!” lɛ. Amɛkɛ miishɛɛ ŋaŋaa amɛhe dani amɛwie saji ni abaatswa he adafi lɛ he, ni enɛ ha nyɛminuu lɛ na miishɛɛ. Mɛɛ nii onukpa lɛ kase nɛkɛ! No hewɔ lɛ kaaha ohe miife oya ni oku ohiɛ oshwie agwaseaŋ nibii komɛi ni haa okɛ mɛi krokomɛi anaanyobɔɔ lɛ feɔ nɔ ni ŋɔɔ lɛ nɔ.
13. Henumɔi ni anaa ahaa mɛi lɛ tsirɛɔ onukpai lɛ koni amɛfee mɛni yɛ be mli ni amɛkɛ amɛnanemɛi yeɔ lɛ?
13 Bɔ ni anuɔ nii ahe ahaa mɛi krokomɛi lɛ haa onukpai jieɔ musuŋtsɔlɛ kɛ sui kpakpai akpo. Yɛ bei komɛi amli lɛ, esa akɛ nɛkɛ hii nɛɛ afee mɛi ni he jɔ, “taakɛ bɔ ni bii anyɛ hiɛɔ lɛ diɛŋtsɛ ebii dɔdɔɔdɔ lɛ.” (1 Tesalonikabii 2:7) Aŋkroaŋkroi komɛi ayelikɛbuamɔ lɛ biɔ tsuishitoo kɛ suɔmɔ babaoo ni akɛaaye abua. Ehe baahia ni akanya mɛi ni ‘amɛshi amɛ tsutsu suɔmɔ lɛ’ kɛya nitsumɔi ni fa mli, ni yelikɛbuamɔ he baahia amɛ koni amɛyoo bɔ ni wɔbe nɛɛ he hiaa lɛ. (Kpojiemɔ 2:4; 2 Timoteo 4:2; Hebribii 6:11, 12) Taakɛ Paulo ji lɛ, onukpai ‘yɛ suɔmɔ babaoo’ kɛha nanemɛi Kristofoi lɛ, amɛwoɔ amɛ ŋaa ni amɛshɛjeɔ amɛmii ‘koni amɛya nɔ amɛnyiɛ bɔ ni sa Nyɔŋmɔ hiɛ.’—1 Tesalonikabii 2:8, 11, 12.
14. Mɛɛ odaseyeli Paulo jie lɛ kpo ni tsɔɔ akɛ eyɛ henumɔ kɛha mɛi krokomɛi?
14 Paulo to okadi kpakpa eha onukpai lɛ yɛ bɔ ni amɛaafee ni amɛjie mumɔŋ nyɛmimɛi hii kɛ yei lɛ ahilɛ-kɛ-hamɔ hesusumɔ ni suɔmɔ yɔɔ mli lɛ kpo. Eŋma akɛ: “Soro nibii ni yɔɔ sɛɛ; ni asaŋ mihaomɔ ni minaa daa . . . [ji] asafoi lɛ fɛɛ ahesusumɔ.” Akɛni Paulo yɔɔ susumɔ ni tamɔ nɛkɛ hewɔ lɛ, ebaanyɛ ebi akɛ: “Namɔ gbedeɔ, ni mi lɛ migbedeee? Namɔ nane atɔtɔɔ, ni mimli eshaaa mi haaa lɛ?” Kɛ oji onukpa lɛ, ani oyɛ henumɔ ni tamɔ nɛkɛ kɛha mɛi krokomɛi?—2 Korintobii 11:28, 29.
Onine ni Aaashɛ Onyɛmi lɛ Nɔ
15. Kɛ naagbai loo bei ni mli wa te shi yɛ nyɛmimɛi ateŋ lɛ, mɛɛ Yesu ŋaawoo ni yɔɔ Mateo 18:15 ni esa akɛ anyiɛ sɛɛ, ni mɛni ji yiŋtoo ni yɔɔ nakai feemɔ mli?
15 Henumɔ ni aaana aha mɛi krokomɛi lɛ haa ekomefeemɔ shwereɔ yɛ Yehowa tsuji ateŋ. Shi bei fioo komɛi baa ni bei bibii komɛi teɔ shi. Kɛji akɛ hiɛdɔɔ yɛ saji ni tamɔ nɛkɛ mli lɛ, esa akɛ Kristofoi anyiɛ Yesu ŋaawoo ni aŋma afɔ shi yɛ Mateo 18:15-17 lɛ sɛɛ. Kadimɔ klɛŋklɛŋ nifeemɔ lɛ. No ji ni okɛ onyɛmi lɛ awie yɛ teemɔŋ bɔ ni afee ni “ojie etɔmɔ lɛ kpo.” Mɛni esa akɛ efee oyiŋtoo? No ji, ‘ni onine ashɛ onyɛmi lɛ nɔ’! Yesu kɛɛ: “Kɛji ebo bo toi lɛ, nyɛmi efee nyɛmi.” Yɛ miishɛɛ mli lɛ, ni aaawie yɛ teemɔŋ lɛ ji fɛɛ ni he baahia ni baaha toiŋjɔlɛ wekukpaa aba bo kɛ onaanyo Yehowa jalɔ lɛ teŋ.
16. Mɛni esa akɛ ofee kɛ oyoo akɛ sane yɛ okɛ onyɛmi ko teŋ?
16 Kɛ oyoo akɛ sane ko yɛ okɛ onyɛmi lɛ teŋ lɛ, nyiɛmɔ Yesu ŋaawoo lɛ sɛɛ koni “oya okɛ onyɛmi lɛ ayakpata.” (Mateo 5:24) Okɛ lɛ awie naagba lɛ he yɛ toiŋjɔlɛ mli, yɛ mlihilɛ gbɛ nɔ, koni nyɛbɔ mɔdɛŋ ni nyɛnu nyɛhe shishi. Kɛ eba lɛ nɛkɛ lɛ, abaanyɛ ana sane lɛ naa ni asafo lɛ toiŋjɔlɛ baahi shi.
Mɛi ni Heee Yeee lɛ ni Nine Aaashɛ Amɛnɔ
17, 18. Mɛɛ ŋaawoo Petro kɛha ŋamɛi ni ji Kristofoi ni hiɔ shiai ni jamɔ egbala mli lɛ amli lɛ?
17 Shihilɛi ni mli wawai fe fɛɛ yɛ be mli ni akɛ Ŋmalɛ naa shishitoo mlai tsuɔ nii lɛ baa yɛ shia ni jamɔ egbala mli lɛ mli. Kristofoi pii kɛ deŋmegbomɔ tsuɔ nii yɛ anɔkwayeli mli yɛ be mli ni amɛkɛ nijiaŋwujee kɛ haomɔi ni baa kɛjɛɔ mumɔŋ ekomefeemɔ ni bɛ amɛgbalashihilɛi amli lɛ kpeɔ lɛ. Te aaafee tɛŋŋ ni aaaye abua amɛ?
18 Akɛni onukpai lɛ naa mɛi krokomɛi anibii ahe miishɛɛ hewɔ lɛ, amɛkɛ mumɔŋ yelikɛbuamɔ haa mɛi ni yɔɔ shiai ni jamɔ egbala mli lɛ yɛ miishɛɛ mli. Akɛ nɔkwɛmɔ nɔ lɛ, abaanyɛ agbala jwɛŋmɔ kɛya Petro ŋaawoo ni kɔɔ Kristofoi yei ajeŋba he yɛ shihilɛi ni tamɔ nɛkɛ mli lɛ nɔ. Ekɛɔ amɛ ni amɛba amɛhe shi amɛha amɛwumɛi kɛji akɛ mɛnɛɛmɛi ji mɛi ni heee yeee ni “amɛbooo wiemɔ lɛ toi tete.” Mɛni hewɔ esa akɛ aba he shi aha amɛ? “Bɔ ni afee ni . . . aye amɛnɔ [aloo, nine ashɛ amɛnɔ] ni wiemɔ ko bɛ mli kɛtsɔ ŋamɛi lɛ ajeŋba nɔ.” (1 Petro 3:1; Kingdom Interlinear) Shi mɛɛ gbɛ nɔ abaatsɔ ni nɛkɛ ŋaawoo nɛɛ kɛ nitsumɔ amɔ shi?
19. Okɛ nɔkwɛmɔ nɔ ko aha ni tsɔɔ sɛɛnamɔ ni yɔɔ 1 Petro 3:1 kɛ nitsumɔ he.
19 Yoo ko ni atsɛɔ lɛ Vera kpɛlɛɔ nɔ akɛ beni ebatsɔ Kristofonyo klɛŋklɛŋ kwraa lɛ, ekɛ ewu lɛ wieɔ Biblia mli anɔkwale lɛ he, kɛkɛ ni nuu nɛɛ bafee mɔ ni sane lɛ toiboo etɔ lɛ. Yoo lɛ kɛfata he akɛ: “Yɛ Ŋmalɛ mli ŋaawoo ni minine shɛ nɔ kɛjɛ onukpa ko dɛŋ lɛ sɛɛnyiɛmɔ mli lɛ, mikpɛ miyiŋ akɛ ehe baahia ni mikɛ ŋaa atsu nii koni mamɛ bei ni hegbɛi kpakpai kɛ amɛhe baaba.” Nɔ ni wɔnaa ji akɛ Vera kɛ 1 Petro 3:1 tsu nii, eyɛ mli akɛ eŋɔɔ hegbɛi koni ekanya ewu lɛ, Barry, koni amɛsusu Biblia mli shishitoo mlai ahe. Nuu nɛɛ tsɔɔ mli yɛ sɛɛ mli akɛ: “Miyoo yɛ Awake! he [wolo ni fata Buu-Mɔɔ lɛ he] yɛ afii lɛ amli akɛ minaa wolo nɛɛ yɛ shia lɛ mli hei komɛi ni esaaa akɛ ehiɔ. Nɔ ni yɔɔ mli ji saji ni anyɛɔ atsuɔ he nii ni emli saji lɛ po baa dani adafitswaa loo saji diɛŋtsɛ ni kɔɔ nakai nibii lɛ ahe lɛ baa.” Nɔ ni jɛ mli ba ji akɛ, yɛ mligbalamɔ ni he aaafee afii 20 lɛ sɛɛ lɛ, Barry kɛ Vera ena miishɛɛ ni amɛfee ekome yɛ Yehowa sɔɔmɔ mli.
20. Mɛɛ yelikɛbuamɔ onukpai baanyɛ ni amɛkaha wumɛi ni ji Kristofoi ni yɔɔ shiai ni jamɔ egbala mli lɛ amli lɛ?
20 Wu ni heɔ yeɔ lɛ hu kɛ naagbai wuji kpeɔ kɛji akɛ eŋa teɔ shi ewoɔ anɔkwa Kristo jamɔ ni enaa ebii anɔ hewalɛ koni amɛte shi amɛwo lɛ. Kɛ onukpai lɛ na gbɔmɔ ni tamɔ nɛkɛ he miishɛɛ lɛ, onukpai lɛ baanyɛ agbala ejwɛŋmɔ kɛya Biblia mli shishitoo mlai ni yeɔ buaa lɛ anɔ. Akɛ nɔkwɛmɔ nɔ lɛ, abaanyɛ atsɔɔ lɛ akɛ yɛ eŋa lɛ shitee-kɛ-woo lɛ fɛɛ sɛɛ lɛ, lɛ ji weku lɛ yitso ni esa akɛ ekɛ Ŋmalɛ mli tsɔsemɔ aha ebii lɛ. (Efesobii 6:4) Abaanyɛ awo lɛ hewalɛ ni ekɛ eŋa lɛ ahi shi “yɛ nilee naa,” ni ejie miishɛɛ kpo yɛ nɔ ni yoo lɛ feɔ lɛ mli ni eye ebua lɛ yɛ eshia lɛ mli nitsumɔi amli ni ekwɛ gbekɛbii lɛ anɔ. (1 Petro 3:7) Nɔ ni fe fɛɛ lɛ, esa akɛ awo wu ni heɔ yeɔ kɛ tsɛ lɛ hewalɛ koni eha sanegbaa aya nɔ koni ele nɔ ni yɔɔ eweku lɛ mlibii lɛ ateŋ mɔ fɛɛ mɔ tsui mli. Onukpai lɛ hu baaye abua lɛ ni eya nɔ ebɔ mɔdɛŋ akɛ eeeye ebua eŋa lɛ kɛ wiemɔi “ni ŋoo yɔɔ mli,” ni etsɔ ŋaa gbɛ nɔ ni ekɛ Ŋmalɛ mli anɔkwale lɛ aha lɛ yɛ bei ni sa mli.—Kolosebii 4:6.
21. Te aaafee tɛŋŋ ni aye abua mɔ ni heee yeee lɛ koni enya anɔkwale lɛ he lɛ?
21 Miishɛɛ ni ajieɔ lɛ kpo yɛ Kristofoi ni jamɔ egbala amɛ shiai amli lɛ aweku ahe lɛ hu haa anyɛɔ agbaa Maŋtsɛyeli lɛ he sane. Akɛ nɔkwɛmɔ nɔ lɛ: Kristofonyo nuu ko nijiaŋ je wui akɛni eŋa lɛ ete shi ewo lɛ waa afii babaoo hewɔ. Onukpa ko kɛ ehe ha akɛ ebaaba ebasara lɛ kɛ Biblia mli sanegbaa. Beni eshɛ shia lɛ, onukpa lɛ ŋa eŋa lɛ fɛfɛo ni ebi lɛ akɛ: “Ani obaasumɔ ni okɛ wɔ ata shi lo?” Nakai ninefɔɔ yɛ naanyobɔɔ gbɛ nɔ lɛ na yoo lɛ nɔ hewalɛ aahu akɛ ekɛ miishɛɛ kpɛlɛ nɔ akɛ ebaafata amɛhe yɛ sanegbaa lɛ mli. Etsɛɛɛ ni emɔ anɔkwale lɛ mli ni eje shishi akɛ eeeshiɛ etsɔɔ mɛi krokomɛi.
22. Mɛni ewɔ esa akɛ wɔna mɛi krokomɛi anibii ahe miishɛɛ lɛ?
22 Akɛ Yehowa Odasefoi lɛ, belɛ nyɛhaa “wɔfea nibii fɛɛ yɛ sanekpakpa lɛ hewɔ.” (1 Korintobii 9:23) Yɛ anɔkwale mli lɛ, “akɛ nɔ ni wɔyɔɔ deka hewɔ lɛ, nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” (Galatabii 6:10) Eba akɛ wɔɔna mɛi krokomɛi anibii ahe miishɛɛ koni suɔmɔ ashwere yɛ wɔ jeŋ muu fɛɛ nyɛmifeemɔ lɛ mli.
Te Obaaha Hetoo Oha Tɛŋŋ?
◻ Mɛni hewɔ esa akɛ wɔna mɛi krokomɛi anibii ahe miishɛɛ titri Iɛ?
◻ Te wɔfee tɛŋŋ wɔna wɔnanemɛi heyelilɔi ahe miishɛɛ?
◻ Onukpai baanyɛ ajie henumɔ kpo aha mɛi krokomɛi yɛ mɛɛ gbɛ nɔ?
◻ Mɛni baanyɛ ajɛ mɛi ni heee yeee lɛ ahe miishɛɛ ni wɔɔna lɛ mli aba?