Okɛ Woo Aha Mɛi Krokomɛi
“Mɔ fɛɛ mɔ kɛ woo aha enaanyo tsutsu.” —ROMABII 12:10.
1, 2. (a) Mɛni esa akɛ wɔfee ní wɔkɛjie wɔ heshibaa jwɛŋmɔ lɛ kpo? (b) Bei pii lɛ, te Biblia lɛ kɛ wiemɔ “woo” tsuɔ nii ehaa tɛŋŋ, ni efeɔ mlɛo kɛhaa namɛi akɛ amɛkɛ woo aaaha mɛi krokomɛi?
WƆ NIKASEMƆ ni tsɔ hiɛ lɛ ma ŋaawoo ni jɛ Nyɔŋmɔ Wiemɔ lɛ mli lɛ nɔ mi, akɛ: “Nyɛ fɛɛ nyɛbaa nyɛhe shi nyɛhaa nyɛhe ní nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ.” (1 Petro 5:5) Gbɛ kome ní wɔɔtsɔ nɔ wɔná heshibaa jwɛŋmɔ ji ní wɔkase bɔ ni wɔkɛ woo aaaha mɛi krokomɛi.
2 Bei pii lɛ, akɛ wiemɔ “woo” tsuɔ nii yɛ Biblia lɛ mli akɛtsɔɔ bulɛ, hiɛnyamwoo, kɛ mɔ hesusumɔ ni esa akɛ wɔjie kpo wɔtsɔɔ mɛi krokomɛi. Wɔkɛ woo haa mɛi krokomɛi kɛtsɔ mlihilɛ ni wɔjieɔ lɛ kpo wɔtsɔɔ amɛ, bulɛ ní wɔnáa wɔhaa hiɛnyam ni amɛyɔɔ, amɛsusumɔi atoi ní wɔboɔ, kɛ klalo ní wɔfeɔ akɛ wɔɔtsu nibii ni nilee yɔɔ mli, ní amɛbiɔ yɛ wɔdɛŋ lɛ ahe nii lɛ nɔ. Bei pii lɛ, enɛ feemɔ waaa kɛha mɛi ni yɔɔ heshibaa jwɛŋmɔ lɛ. Shi, ekolɛ ebaawa kɛha mɛi ni yɔɔ henɔwomɔ tsui lɛ akɛ amɛaajie anɔkwa woo kpo, ni yɛ no najiaŋ lɛ, ekolɛ amɛaabɔ mɔdɛŋ ní amɛná mɛi ahiɛ duromɔ kɛ sɛɛnamɔi komɛi kɛtsɔ yiteŋmuluwoo ni etsɔɔɔ anɔkwayeli nɔ.
Yehowa kɛ Woo Haa Adesai
3, 4. Yehowa kɛ woo ha Abraham yɛ mɛɛ gbɛ nɔ, ni mɛni hewɔ?
3 Yehowa diɛŋtsɛ feɔ nɔkwɛmɔnɔ yɛ woo ni akɛhaa lɛ mli. Ebɔ adesai kɛ nifeemɔ mli heyeli, ni ekɛ amɛ yeee tamɔ tsɔnei ní ato bɔ ni esa akɛ amɛtsu nii amɛha. (1 Petro 2:16) Ákɛ nɔkwɛmɔnɔ lɛ, beni ekɛɛ Abraham akɛ ebaakpata Sodom hiɛ yɛ amɛ nɔ fɔŋ feemɔ ni fá kɛteke nɔ lɛ hewɔ lɛ, Abraham bi akɛ: “Ani oookpata jalɔ kɛ gbɔmɔ fɔŋ fɛɛ hiɛ shikome lo? Ekolɛ benɛ jalɔi nyɔŋmai enumɔ yɛ maŋ lɛŋ: aso no hu oookpata amɛhiɛ, ni oŋɔfaŋ maŋ lɛ yɛ jalɔi nyɔŋmai enumɔ lɛ ni yɔɔ mli lɛ hewɔ?” Yehowa ha hetoo akɛ ekɛ maŋ lɛ he baake lɛ yɛ jalɔi 50 lɛ ahewɔ. Kɛkɛ ni Abraham tee nɔ ekɛ heshibaa kpa fai. Ni kɛji jalɔi 45? 40? 30? 20? 10? pɛ yɔɔ mli hu? Yehowa ma nɔ mi eha Abraham akɛ ekpataŋ Sodom hiɛ kɛji aná jalɔi nyɔŋma pɛ yɛ maŋ lɛ mli.—1 Mose 18:20-33.
4 Yehowa le akɛ jalɔi ni yɔɔ Sodom lɛ shɛɛɛ nyɔŋma, ni kɛlɛ, ekɛ woo ha Abraham kɛtsɔ esusumɔi atoi ní ebo kɛ bɔ ni ekɛ lɛ ye kɛ bulɛ lɛ nɔ. Mɛni hewɔ? Ejaakɛ Abraham “[hé] Yehowa eye, ni ebu enɛ jalɛ eha lɛ.” Atsɛ Abraham akɛ “Yehowa shieŋtsɛ.” (1 Mose 15:6; Yakobo 2:23, NW) Kɛfata he lɛ, Yehowa na akɛ Abraham kɛ woo haa mɛi krokomɛi. Beni shikpɔŋ he béi ko te shi yɛ ekooloi akwɛlɔi lɛ kɛ ewɔfaase Lot kooloi akwɛlɔi lɛ teŋ lɛ, Abraham kɛ woo ha Lot, kɛtsɔ hegbɛ ní eha lɛ akɛ lɛ klɛŋklɛŋ ehala he ni etaoɔ lɛ nɔ. Lot hala he ni esusuɔ akɛ eji shikpɔŋ kpakpa fe fɛɛ lɛ, ni Abraham fã kɛtee he kroko lɛ.—1 Mose 13:5-11.
5. Yehowa kɛ woo ha Lot yɛ mɛɛ gbɛ nɔ?
5 Nakai nɔŋŋ Yehowa kɛ woo ha Lot, jalɔ lɛ hu. Dani ebaakpata Sodom hiɛ lɛ, ekɛɛ Lot akɛ ejo foi kɛya gɔji ashikpɔŋ ko nɔ. Shi kɛlɛ, Lot kɛɛ akɛ esumɔɔɔ ni eya jɛmɛ; eesumɔ ni eya Zoar ni bɛŋkɛ lɛ lɛ moŋ, eyɛ mli akɛ nakai maŋtiase lɛ yɛ kpokpaa ni ebaakpata hiɛ lɛ mli. Yehowa kɛɛ Lot akɛ: “Naa, miwo ohiɛ nyam yɛ nɛkɛ sane nɛɛ hu mli, ni mibutuŋ maŋ ni owie he nɛɛ.” Yehowa kɛ woo ha Lot anɔkwafo lɛ, kɛtsɔ nɔ ni ebi ni efee lɛ nɔ.—1 Mose 19:15-22; 2 Petro 2:6-9.
6. Yehowa kɛ woo ha Mose yɛ mɛɛ gbɛ nɔ?
6 Beni Yehowa tsu Mose kɛku sɛɛ kɛtee Mizraim ekoŋŋ koni eyanyiɛ E-webii lɛ ahiɛ kɛjɛ nyɔŋyeli mli ní ekɛ Farao ayawie E-webii ní eeeha amɛya lɛ he lɛ, Mose jie naa akɛ: “Ofainɛ, mi-Nuntsɔ! Minaa tseee.” Yehowa ma nɔ mi eha Mose akɛ: “Mikɛ onaabu aaahi shi, ni matsɔɔo nɔ ni owie.” Shi Mose tee nɔ eshashao shi lolo. No hewɔ lɛ, Yehowa saa ema nɔ mi eha Mose ni eto gbɛjianɔ ni etsu enyɛmi nuu Aaron efata ehe akɛ enaawielɔ.—2 Mose 4:10-16.
7. Mɛni hewɔ Yehowa sumɔɔ ní ekɛ woo aha mɛi krokomɛi lɛ?
7 Yɛ shihilɛi nɛɛ fɛɛ mli lɛ, Yehowa jie bɔ ni esumɔɔ ní ekɛ woo aha mɛi krokomɛi, titri lɛ, mɛi ni sɔmɔɔ lɛ lɛ kpo. Eyɛ mli akɛ ekolɛ nɔ ni amɛbi lɛ yɛ srɔto yɛ Yehowa shishijee yiŋtoo he moŋ, shi esusu amɛ nibimɔi lɛ ahe ni eŋmɛ gbɛ, shii abɔ ni nibimɔi nɛɛ ekuuu eyiŋtoo mli lɛ.
Yesu kɛ Woo Ha Mɛi Krokomɛi
8. Yesu kɛ woo ha yoo ko ní he miiye waa yɛ mɛɛ gbɛ nɔ?
8 Yesu kase Yehowa yɛ woo ní akɛhaa mɛi krokomɛi lɛ gbɛfaŋ. Be ko beni efata asafo babaoo ko he lɛ, yoo ko ní lá eho lɛ aahu afii 12 sɔŋŋ lɛ fata amɛhe. Datrɛfoi nyɛɛɛ atsá lɛ. Abuɔ lɛ yɛ Mose Mla lɛ naa akɛ mɔ ko ni he tseee yɛ jamɔ gbɛfaŋ, ni kulɛ esaaa akɛ eyaa jɛmɛ. Eyaje Yesu sɛɛ gbɛ, ni eta etade lɛ he, ni atsá lɛ. Yesu damɔɔɔ Mla lɛ mli nibii bibii lɛ anɔ doo, ní eeekã yoo lɛ hiɛ yɛ nɔ ni efee lɛ hewɔ. Shi moŋ, akɛni ele shihilɛ lɛ hewɔ lɛ, ekɛ woo ha lɛ, ni ekɛɛ: “Biyoo, ohemɔkɛyeli eha ohe ewao; yaa yɛ hejɔlɛ mli, ni ohela lɛ aaajɔo.”—Marko 5:25-34; 3 Mose 15:25-27.
9. Yesu kɛ woo ha Jeŋmajiaŋnyo ko yɛ mɛɛ gbɛ nɔ?
9 Be kroko hu lɛ, Foenike yoo ko kɛɛ Yesu akɛ: “Naa mi mɔbɔ, Nuntsɔ, David bi; mibiyoo miina nɔ kɛ daimonio.” Akɛni Yesu le akɛ atsu lɛ kɛba Israel maŋ lɛ ŋɔɔ shi jeee Jeŋmajiaŋbii lɛ aŋɔɔ hewɔ lɛ, ekɛɛ lɛ akɛ: “Ejaaa akɛ aŋɔɔ [Israel] bii aboloo lɛ ashɛrɛɔ ashwieɔ [Jeŋmajiaŋbii] shifɔji abii.” Yoo lɛ to he eha lɛ akɛ: “Shi bɛ shifɔji abii lɛ hu yeɔ fufuji ni shwieɔ amɛnuntsɔmɛi akpɔlɔi lɛ ashishi lɛ eko!” Kɛkɛ ni Yesu kɛɛ: “Oo yoo, ohemɔkɛyeli da! Afee ahao tamɔ bɔ ni otaoɔ lɛ!” Ebiyoo lɛ he wa lɛ. Yesu kɛ woo ha yoo Jeŋmajiaŋnyo nɛɛ yɛ ehemɔkɛyeli lɛ hewɔ. Wiemɔ “shifɔji abii” ni ekɛtsu nii, yɛ nɔ najiaŋ ní eeetsɛ amɛ gbeei ni hiɛ yɔɔ la lɛ po jɔɔ sane lɛ he ni ejie musuŋtsɔlɛ ní eyɔɔ lɛ kpo.—Mateo 15:21-28.
10. Mɛɛ nikasemɔ ko ni náa mɔ nɔ hewalɛ Yesu tsɔɔ ekaselɔi lɛ, ni mɛni hewɔ ehe hiaa lɛ?
10 Yesu tee nɔ etsɔɔ ekaselɔi lɛ bɔ ni ehe hiaa ní amɛná heshibaa jwɛŋmɔ ni amɛkɛ woo aha mɛi krokomɛi, ejaakɛ amɛyɛ mi-klɛŋklɛŋ naagba lɛ lolo. Be ko lɛ, Yesu bi amɛ yɛ naataamɔ ko ni ba amɛteŋ lɛ sɛɛ akɛ: “Mɛni sane nyɛye yɛ nyɛteŋ . . . lɛ?” Amɛtswaaa amɛsɛŋ, ejaakɛ “amɛye sane yɛ amɛteŋ akɛ, namɔ ji agbo fe fɛɛ.” (Marko 9:33, 34) Gbi gbɛkɛ dani Yesu baagbo po lɛ, “naataamɔ hu bate shi yɛ amɛteŋ akɛ amɛteŋ namɔ abaabu agbo fe fɛɛ.” (Luka 22:24) No hewɔ lɛ, beni amɛyeɔ Hehoo niyenii lɛ, Yesu “[tsɔ] nu ewo kulo mli, ni ebɔi ekaselɔi lɛ anaji ahe fɔmɔ.” Mɛɛ nikasemɔ ni náa mɔ nɔ hewalɛ nɛ! Yesu ji Nyɔŋmɔ Bi, Yehowa pɛ nɔ kwɔ fe lɛ yɛ jeŋ muu lɛ fɛɛ mli. Ni kɛlɛ, etsɔɔ ekaselɔi lɛ nikasemɔ ko ni woo yɔɔ mli kɛtsɔ amɛnaji ahe fɔmɔ nɔ. Ekɛɛ akɛ: “Okadi mito miha nyɛ, koni bɔ ni mifee nyɛ nɛɛ, nyɛ hu nyɛfee nakai.”—Yohane 13:5-15.
Paulo kɛ Woo Ha Mɛi
11, 12. Beni Paulo batsɔ Kristofonyo sɛɛ lɛ, mɛni ekase, ni ekɛ nikasemɔ nɛɛ tsu nii yɛ Filemon gbɛfaŋ yɛ mɛɛ gbɛ nɔ?
11 Ákɛ Kristo kaselɔ lɛ, bɔfo Paulo kɛ woo ha mɛi krokomɛi. (1 Korintobii 11:1) Ewie akɛ: “Asaŋ wɔtaooo gbɔmɛi ahiɛnyam . . . shi moŋ wɔmli jɔ yɛ nyɛteŋ, taakɛ bɔ ni biianyɛ hiɛɔ lɛ diɛŋtsɛ ebii dɔdɔɔdɔ lɛ.” (1 Tesalonikabii 2:6, 7) Biianyɛ kwɛɔ ebii bibii anɔ jogbaŋŋ. Beni Paulo batsɔ Kristofonyo sɛɛ lɛ, ekase heshibaa jwɛŋmɔ kpojiemɔ ni ekɛ woo ha enanemɛi Kristofoi lɛ kɛtsɔ bɔ ni ekɛ amɛ ye kɛ mlijɔlɛ lɛ nɔ. Beni efeɔ nakai lɛ, ejie bulɛ kpo yɛ nifeemɔ mli heyeli ni amɛyɔɔ lɛ hu gbɛfaŋ, taakɛ sane ko ni ba beni eji gbokɛlɛfonyo yɛ Roma lɛ feɔ he nɔkwɛmɔnɔ lɛ.
12 Tsulɔ ko ní atsɛɔ lɛ Onesimo, ní ejo foi eshi enuntsɔ lɛ, bo Paulo nitsɔɔmɔ lɛ toi. Ebatsɔ Kristofonyo kɛ Paulo naanyo hu. Tsulɔ lɛ nuntsɔ ji Filemon, ni lɛ hu eji Kristofonyo, ní eyɔɔ Asia Bibioo lɛ. Paulo ŋma bɔ ni Onesimo he yɔɔ sɛɛnamɔ kɛha lɛ, yɛ wolo ko ní eŋma kɛyaha Filemon lɛ mli, ni ekɛɛ: “Kulɛ miisumɔ akɛ ekɛ mi ahi shi.” Shi kɛlɛ, Paulo ha Onesimo ku esɛɛ kɛtee Filemon ŋɔɔ, ejaakɛ eŋma akɛ: “Misumɔɔɔ akɛ maje osusumɔ sɛɛ mafee nɔ ko, beni afee ni ejurɔ ní obaafee lɛ akabafee akɛ fimɔ naa ni, shi moŋ tsuijurɔ naa.” Paulo eŋɔɔɔ anɔkwale ni eji akɛ eji bɔfo lɛ akɛ hegbɛ ní ekɛaatsu nii, shi moŋ ekɛ woo ha Filemon kɛtsɔ bi ní ebiii ni Onesimo kɛ lɛ ahi shi yɛ Roma lɛ nɔ. Kɛfata he lɛ, Paulo wo Filemon ŋaa ní ekɛ woo aha Onesimo, ni ekɛ lɛ ahi shi akɛ “mɔ ni fe tsulɔ tete, mɔ ni ji suɔmɔ nyɛmi.”—Filemon 13-16.
Woo ní Akɛaaha yɛ Wɔgbii Nɛɛ Amli
13. Mɛni Romabii 12:10 lɛ kɛɔ wɔ akɛ wɔfee?
13 Nyɔŋmɔ Wiemɔ lɛ woɔ ŋaa akɛ: “Mɔ fɛɛ mɔ kɛ woo aha enaanyo tsutsu.” (Romabii 12:10) Enɛ tsɔɔ akɛ esaaa ní wɔmɛɔ ní mɛi krokomɛi kɛ woo aha wɔ tsutsu, shi moŋ esa akɛ wɔŋɔ hegbɛ lɛ ní wɔfee nakai. “Mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo.” (1 Korintobii 10:24; 1 Petro 3:8, 9) Enɛ hewɔ lɛ, Yehowa tsuji taoɔ hegbɛi ní amɛkɛaajie woo kpo amɛtsɔɔ mɛi ni yɔɔ weku kɔkrɔɔ lɛ mli, kɛ nanemɛi Kristofoi ni yɔɔ asafo lɛ mli, kɛ mɛi ni bɛ asafo lɛ mli lɛ hu po.
14. Ajieɔ woo kpo yɛ wu kɛ ŋa teŋ yɛ mɛɛ gbɛ nɔ?
14 Biblia lɛ kɛɔ akɛ: “Nuu fɛɛ nuu yitso ji Kristo, ni yoo fɛɛ yoo hu yitso ji nuu.” (1 Korintobii 11:3) Yehowa kɛ gbɛnaa nii fɔ̃ɔ nuu lɛ nɔ akɛ ekɛ eŋa lɛ aye tamɔ bɔ ni Kristo kɛ asafo lɛ ye lɛ. Akɛ gbɛtsɔɔmɔ haa wu lɛ yɛ 1 Petro 3:7 lɛ akɛ ekɛ ‘woo aha eŋa lɛ akɛ bɔɔ nɔ ni he waaa tuutu ko.’ Ebaanyɛ efee enɛ kɛtsɔ anɔkwayeli ní ekɛaasumɔ akɛ ebo lɛ toi, kɛ eŋa lɛ ŋaawoi ni eeesusu he lɛ nɔ. (1 Mose 21:12) Ebaanyɛ ekpɛlɛ yoo lɛ susumɔi anɔ ní ekɛtsu nii kɛji ekuuu shishitoo mla ko mli, ni esa akɛ eye ebua lɛ ní ekɛ lɛ aye kɛ mlihilɛ. Nakai nɔŋŋ hu esa akɛ “ŋa lɛ hu ashe ewu.” (Efesobii 5:33) Eboɔ nuu lɛ toi, ni ebɔɔɔ mɔdɛŋ akɛ eeefee nɔ ni lɛ yoo lɛ esumɔɔ be fɛɛ be, ebaaa nuu lɛ shi ni egbigbiliii emli ewooo lɛ. Ejieɔ heshibaa jwɛŋmɔ kpo kɛtsɔ ka ní ekaaa akɛ eeeye ewu lɛ nɔ, kɛji lɛ yoo lɛ yɛ sui komɛi ni nɔ kwɔlɔ yɛ nibii komɛi amli po lɛ nɔ.
15. Mɛɛ bulɛ esa akɛ aná aha mɛi ni edara yɛ afii amli lɛ, ni te esa akɛ amɛhere nɔ amɛha tɛŋŋ?
15 Mɛi komɛi yɛ Kristofoi asafo lɛ mli ni amɛji mɛi ni sa woo yɛ gbɛ krɛdɛɛ nɔ, tamɔ mɛi ni edara yɛ afii amli lɛ nɛkɛ. “Tee shi yɛ yiteŋwajiatsɛ hiɛ, ni owo nuumo [loo, yoomo] hiɛ nyam.” (3 Mose 19:32) Enɛ baa lɛ nakai yɛ mɛi ni kɛ anɔkwayeli esɔmɔ Yehowa aahu afii babaoo lɛ agbɛfaŋ titri ejaakɛ “waŋ lɛ, anunyam akekre ni, kɛ́ aná lɛ yɛ jalɛ gbɛ nɔ lɛ.” (Abɛi 16:31) Esa akɛ nɔkwɛlɔi lɛ afee enɛ he nɔkwɛmɔnɔ kɛtsɔ bulɛ ni sa ni amɛaajie lɛ kpo amɛtsɔɔ nanemɛi Kristofoi ni ye amɛ onukpa lɛ nɔ. Shi kɛlɛ, esa akɛ mɛi ni edara yɛ afii amli lɛ hu ajie bulɛ su kpo amɛtsɔɔ mɛi ni darako yɛ afii amli lɛ, titri lɛ mɛi ni asafoku lɛ nɔkwɛmɔ he gbɛnaa nii kã amɛnɔ lɛ.—1 Petro 5:2, 3.
16. Fɔlɔi kɛ bii kɛ woo haa amɛhe yɛ mɛɛ gbɛ nɔ?
16 Esa akɛ gbekɛbii kɛ woo aha amɛfɔlɔi: “Nyɛ bii lɛ, nyɛboa nyɛfɔlɔi lɛ atoi yɛ Nuntsɔ lɛ mli; ejaakɛ enɛ ja. ‘Wó otsɛ kɛ onyɛ,’ no ji klɛŋklɛŋ kita ni hiɛ shiwoo akɛ: ‘koni ahi ahao ni otsɛ yɛ shikpɔŋ lɛ nɔ.’ ” Yɛ no sɛɛ lɛ, fɔlɔi lɛ hu kɛ woo haa amɛbii lɛ, ejaakɛ akɛɔ amɛ akɛ ‘amɛkawo amɛbii lɛ amlifu, shi moŋ amɛlɛ amɛ yɛ Yehowa tsɔsemɔ kɛ ŋaawoo lɛ mli.’—Efesobii 6:1-4; 2 Mose 20:12.
17. Namɛi esa akɛ akɛ “woo toi enyɔ” awo amɛ lɛ?
17 Esa akɛ akɛ woo aha mɛi ni tsuɔ nii waa, ní amɛsɔmɔɔ asafo lɛ: “Onukpai ni yeɔ nɔ jogbaŋŋ lɛ, esa akɛ aŋɔ woo toi enyɔ awo amɛ, titri lɛ mɛi ni bɔɔ wiemɔ kɛ tsɔɔmɔ he mɔdɛŋ lɛ.” (1 Timoteo 5:17) Gbɛ kome ni wɔɔtsɔ nɔ wɔkɛ woo nɛɛ aha amɛ ji ní wɔɔfee nɔ ni Hebribii 13:17 kɛɔ lɛ, akɛ: “Nyɛboa nyɛtsɔɔlɔi lɛ atoi ní nyɛbaa nyɛhe shi nyɛhaa amɛ.”
18. Mɛni esa akɛ wɔfee yɛ mɛi ni bɛ asafo lɛ mli lɛ agbɛfaŋ?
18 Ani esa akɛ wɔkɛ woo aha mɛi ni bɛ asafo lɛ mli lɛ? Hɛɛ. Ákɛ nɔkwɛmɔnɔ lɛ, akɛ famɔ haa wɔ akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ.” (Romabii 13:1) Mɛnɛɛmɛi ji je lɛŋ nɔyelɔi ní Yehowa eŋmɛ gbɛ akɛ amɛkɛ nɔyeli hegbɛ atsu nii kɛyashi be mli ni e-Maŋtsɛyeli lɛ baaba ebaye amɛnajiaŋ lɛ. (Daniel 2:44) No hewɔ lɛ, “bɔ ni ji mɔ fɛɛ mɔ gbɛnaa lɛ, [wɔfeɔ wɔhaa] lɛ: Mɔ gbɛfaŋ ni ji onia lɛ, [wɔtsuɔ] onia; mɔ nɔ̃ ni ji too lɛ, too; mɔ nɔ̃ ni ji gbeyeishemɔ lɛ, gbeyeishemɔ; mɔ nɔ̃ ni ji woo lɛ, woo.” (Romabii 13:7) Esa akɛ ‘wɔkɛ woo aha gbɔmɛi fɛɛ.’—1 Petro 2:17.
19. Wɔbaanyɛ ‘wɔfee mɛi krokomɛi ejurɔ’ ní wɔkɛ woo aha amɛ yɛ mɛɛ gbɛ nɔ?
19 Yɛ be mli ni eji anɔkwale akɛ esa akɛ wɔkɛ woo aha mɛi ni bɛ asafo lɛ mli lɛ po lɛ, kadimɔ nɔ ni Nyɔŋmɔ Wiemɔ lɛ maa nɔ mi: “Ákɛ nɔ ni wɔyɔɔ dekã hewɔ lɛ, nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” (Galatabii 6:10) Shi kɛlɛ, gbɛ ni hi fe fɛɛ ní wɔɔnyɛ wɔtsɔ nɔ ‘wɔfee mɛi krokomɛi ejurɔ’ ji ní wɔha amɛnu amɛmumɔŋ hiamɔ nii ahe, ní wɔtsu amɛmumɔŋ hiamɔ nii nɛɛ ahe nii. (Mateo 5:3) Wɔbaanyɛ wɔfee enɛ kɛtsɔ bɔfo Paulo kaimɔ nɛɛ toiboo nɔ, akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ní jaa anɔkwale wiemɔ lɛ mli pɛpɛɛpɛ.” Kɛ́ wɔtsɔ ŋaa gbɛ nɔ wɔkɛ hegbɛ fɛɛ hegbɛ ní wɔnáa lɛ tsu nii kɛye odase, ní ‘wɔgbe wɔsɔɔmɔ lɛ naa kwraa’ lɛ, jeee ejurɔ pɛ kɛkɛ wɔfeɔ mɛi fɛɛ, shi moŋ wɔkɛ woo hu miiha amɛ.—2 Timoteo 2:15; 4:5.
Woo ni Wɔkɛaaha Yehowa
20. Mɛni ba Farao kɛ esraafoi lɛ anɔ, ni mɛni hewɔ?
20 Yehowa kɛ woo haa ebɔɔ nii. Belɛ nilee yɛ mli akɛ esa akɛ wɔ hu wɔkɛ woo aha lɛ. (Abɛi 3:9; Kpojiemɔ 4:11) Yehowa Wiemɔ lɛ hu jajeɔ akɛ: “Mɛi ni woɔ mihiɛ nyam lɛ, mawo amɛhiɛ nyam; shi mɛi ni gbeɔ mihe guɔ lɛ, abuŋ amɛ ahaŋ nɔ ko nɔ ko.” (1 Samuel 2:30) Beni akɛɛ Mizraim nɔyelɔ Farao akɛ eha Nyɔŋmɔ webii lɛ aya lɛ, ekɛ henɔwomɔ ha hetoo akɛ: “Namɔ ji Yehowa lɛ ní mabo egbee toi?” (2 Mose 5:2) Beni Farao tsu esraafoi lɛ ní amɛyaye Israelbii lɛ anɔ lɛ, Yehowa gbá Ŋshɔ Tsuru lɛ mli nui lɛ amli enyɔ eha Israel. Shi beni Mizraimbii lɛ tiu amɛ lɛ, Yehowa ha nui lɛ ku amɛsɛɛ. “Farao shwiilii lɛ kɛ eta lɛ [Yehowa] eloo ewo ŋshɔŋ.” (2 Mose 14:26-28; 15:4) No hewɔ lɛ henɔwomɔ ní Farao kɛkpoo akɛ ekɛ woo aaaha Yehowa lɛ kɛ enaagbee ni ji ehiɛkpatamɔ ba.—Lala 136:15.
21. Mɛni hewɔ Yehowa te shi ewo Belshazar lɛ, ni mɛni jɛ mli ba?
21 Babilon Maŋtsɛ Belshazar kpoo akɛ ekɛ woo aaaha Yehowa. Eye Yehowa he fɛo yɛ dãatɔɔ okpɔlɔŋmɛɛ ko shishi kɛtsɔ shika kɛ jwiɛtɛi nibii krɔŋkrɔŋi ni amɛyaloo kɛjɛ Yerusalem sɔlemɔwe lɛ ní ekɛnu wein lɛ nɔ. Ni beni efeɔ enɛ lɛ, belɛ eejie ewɔŋjalɔi anyɔŋmɔi lɛ ayi. Shi Yehowa tsulɔ Daniel kɛɛ lɛ akɛ: “Obaaa otsui shi . . . Shi owó ohe nɔ oshi ŋwɛi Nuntsɔ lɛ.” Agbe Belshazar nakai nyɔŋ lɛŋ nɔŋŋ, ni ahe emaŋtsɛyeli lɛ kɛjɛ edɛŋ.—Daniel 5:22-31.
22. (a) Mɛni hewɔ Yehowa mlifu ba Israel hiɛnyiɛlɔi lɛ kɛ amɛmaŋbii lɛ anɔ lɛ? (b) Namɛi ná Yehowa hiɛ duromɔ lɛ, ni mɛni jɛ mli ba?
22 Yɛ Ŋ.B. klɛŋklɛŋ afii oha lɛ mli lɛ, eshɛ be ko ní Maŋtsɛ Herode kɛ maŋbii lɛ miiwie, ni amɛbolɔ akɛ: “Nyɔŋmɔ gbee nɛ, shi jeee gbɔmɔ gbee ni.” Maŋtsɛ folo nɛɛ eteee shi ewooo amɛwiemɔ lɛ, shi moŋ eetao anunyam lɛ. No hewɔ lɛ, “[Yehowa, NW] bɔfo tswa lɛ nɔ̃, ejaakɛ ekɛ anunyam lɛ haaa Nyɔŋmɔ.” (Bɔfoi lɛ Asaji 12:21-23) Herode kɛ woo ha lɛ diɛŋtsɛ ehe, jeee Yehowa, no hewɔ lɛ atswa lɛ nɔ̃ ni egbo. Jamɔ mli hiɛnyiɛlɔi ni hi shi yɛ nakai beaŋ lɛ kɛ woo haaa Nyɔŋmɔ kɛtsɔ e-Bi, Yesu yinɔ apãm ní amɛtee ní amɛgbe lɛ lɛ nɔ. Nɔyelɔi komɛi le akɛ Yesu tsɔɔ anɔkwale lɛ, shi amɛnyiɛɛɛ esɛɛ, “ejaakɛ amɛmiisumɔ gbɔmɛi ahiɛnyam fe Nyɔŋmɔ nɔ̃.” (Yohane 11:47-53; 12:42, 43) Ákɛ maŋ muu lɛ, amɛkɛ woo haaa Yehowa loo e-Najiaŋdamɔlɔ ní ehala lɛ, ni ji Yesu lɛ. Enɛ hewɔ lɛ, Yehowa eyaaa nɔ ekɛ woo haaa amɛ, ni ekpoo amɛ kɛ amɛsɔlemɔtsu lɛ kɛha hiɛkpatamɔ. Shi ehere mɛi ni kɛ woo haa lɛ kɛ e-Bi lɛ ayiwala.—Mateo 23:38; Luka 21:20-22.
23. Mɛni esa akɛ wɔfee koni wɔhi shi yɛ Nyɔŋmɔ jeŋ hee lɛ mli? (Lala 37:9-11; Mateo 5:5)
23 Esa akɛ mɛi fɛɛ ni sumɔɔ ní amɛhi shi yɛ Nyɔŋmɔ jeŋ hee lɛ mli beni akpata amrɔ nɛɛ gbɛjianɔtoo nɛɛ hiɛ lɛ kɛ woo aha Nyɔŋmɔ kɛ e-Bi, Kristo Yesu, ní amɛbo amɛ toi. (Yohane 5:22, 23; Filipibii 2:9-11) “Aaafolɔ” mɛi ni kɛ woo ni tamɔ nakai haaa amɛ lɛ “kɛaajɛ shikpɔŋ lɛ nɔ.” Yɛ gbɛ kroko nɔ lɛ, jalɔi ní kɛ woo haa Nyɔŋmɔ kɛ Kristo, ní amɛboɔ amɛ toi lɛ “aaahi shikpɔŋ lɛ nɔ.”—Abɛi 2:21, 22.
Kɛha Emlitĩi
◻ Ákɛ akɛ woo aaaha mɛi krokomɛi lɛ tsɔɔ mɛni, ni Yehowa fee enɛ yɛ mɛɛ gbɛ nɔ?
◻ Yesu kɛ Paulo kɛ woo ha mɛi krokomɛi yɛ mɛɛ gbɛ nɔ?
◻ Namɛi sa woo yɛ wɔgbii nɛɛ amli?
◻ Mɛni hewɔ esa akɛ wɔkɛ woo aha Yehowa kɛ Yesu lɛ?
[Mfoniri ni yɔɔ baafa 17]
Yehowa kɛ woo ha Abraham kɛtsɔ efaikpamɔi ní ebo toi lɛ nɔ
[Mfoniri ni yɔɔ baafa 18]
Wu kɛ ŋa kɛ woo haa amɛhe, yɛ gbalashihilɛi ni yeɔ omanye lɛ amli