“Nyɛsɔlea Nyɛhaa Nyɛhe”

YEHOWA ji “sɔlemɔ Toibolɔ” lɛ. (Lala 65:​3, NW) Eboɔ mɛi ni amɛjɛ amɛtsuiŋ fɛɛ amɛtu amɛhe amɛha lɛ lɛ asɔlemɔ toi yɛ be fɛɛ mli, ni wɔbaanyɛ wɔna nɔmimaa akɛ kɛ wɔmiisɔle wɔha wɔhe lɛ eboɔ toi.

Shi mɛni hewɔ esa akɛ asɔle aha he? Mɛni he nɛkɛ esa akɛ asɔle yɛ? Ni mɛɛ Nyɔŋmɔ gbeyeishemɔ sui yaa hiɛ kɛ wɔsɔle wɔha wɔhe lɛ?

Mɛni Hewɔ Esa akɛ Wɔsɔle Wɔha Wɔhe?

Ŋmalɛi lɛ woɔ Yehowa webii ahewalɛ ni amɛsɔle amɛha amɛhe. Sɔlemɔi ni afeɔ ahaa mɛi krokomɛi lɛ fata bɔfo Paulo faikpamɔi ni ekɛfɔ Nyɔŋmɔ hiɛ lɛ ahe. (Kolosebii 1:3; 2 Tesalonikabii 1:11) Agbɛnɛ kaselɔ Yakobo ŋma akɛ: “Nyɛsɔlea nyɛhaa nyɛhe.”​—Yakobo 5:⁠16.

Hewalɛ yɛ sɔlemɔ ni afeɔ ahaa Nyɔŋmɔ tsuji krokomɛi lɛ mli. Anaa enɛ yɛ Yakobo 5:​13-18, he ni awo Kristofonyo ni he yeɔ yɛ mumɔŋ lɛ hewalɛ akɛ eha asafo lɛ mli onukpai lɛ aba eŋɔɔ ni “amɛkpa lɛ mu yɛ Nuŋtsɔ lɛ [Yehowa] gbɛi amli ni amɛsɔle amɛha lɛ” lɛ. Amɛsɔlemɔ ni mɔ ni ehao lɛ baanu lɛ baawaje lɛ ni ebaatsɔ eyiŋ akɛ Nyɔŋmɔ baabo lɛ diɛŋtsɛ esɔlemɔ lɛ hu toi. (Lala 23:5; 34:18) Yɛ mɔ lɛ ni akɛ lɛ aaasɔle lɛ sɛɛ lɛ, onukpai lɛ bɔɔ mɔdɛŋ ni amɛha ena mumɔŋ hewalɛ ekoŋŋ kɛtsɔ Ŋmalɛ mli wiemɔi ni tamɔ mu ni tsaa mɔ lɛ jajemɔ nɔ.

Yakobo kɛfata he akɛ: “Ni hemɔkɛyeli sɔlemɔ lɛ aaahere helatsɛ lɛ yiwala, ni Nuŋtsɔ lɛ [Yehowa] aaatee lɛ shi.” Hɛɛ, eka shi faŋŋ akɛ onukpai lɛ “[a]hemɔkɛyeli sɔlemɔ lɛ” baaye abua mɔ ni he yeɔ yɛ mumɔŋ lɛ. Agbɛnɛ Nyɔŋmɔ “aaatee lɛ shi” kɛba mumɔŋ hewalɛnamɔ mli kɛ eesumɔ ni Ŋmalɛi lɛ aye abua lɛ. Shi kɛji akɛ mumɔŋ hela lɛ jɛ esha ko ni hiɛdɔɔ yɔɔ mli hu? Kɛ mɔ lɛ etsake etsui lɛ, Yehowa kɛbaake lɛ.

No hewɔ lɛ Yakobo kɛɛ, “Nyɛjajea nyɛnɔtɔmɔi nyɛtsɔɔa nyɛhe, ni nyɛsɔlea nyɛhaa nyɛhe, ni nyɛhe ata. Jalɔ sɔlemɔ ni mli wa lɛ nyɛɔ nii babaoo etsuɔ. Elia . . . sɔle sɔlemɔ ko koni nugbɔ akanɛ, ni enɛɛɛ yɛ shikpɔŋ lɛ nɔ afii etɛ kɛ nyɔji ekpaa sɔŋŋ. Ni esaa esɔle, ni Nyɔŋmɔ ha nu nɛ, ni shikpɔŋ lɛ ba enii.” (1 Maŋtsɛmɛi 17:​1-7; 18:​1, 42-45) Hewalɛ yɛ jalɔ sɔlemɔ ni kɛ Nyɔŋmɔ suɔmɔnaa nii kpaa gbee lɛ mli.​—1 Yohane 5:​14, 15.

Asɔle yɛ Mɛni He?

Wɔbaanyɛ wɔsɔle yɛ sane fɛɛ sane he wɔha naanyo heyelilɔ lɛ. Akɛ nɔkwɛmɔ nɔ lɛ, Paulo bi ni mɛi krokomɛi asɔle aha lɛ koni ena hegbɛ ni ekɛjaje sanekpakpa lɛ. (Efesobii 6:​17-20) Shi kɛji akɛ wɔle akɛ aaka mɔ ko hu? Wɔbaanyɛ wɔsɔle koni ‘ekafee nɔ ko fɔŋ ko,’ ni akɛ Nyɔŋmɔ akashi lɛ yɛ kaa lɛ mli shi moŋ ejie lɛ kɛjɛ mɔ fɔŋ Satan Abonsam dɛŋ. (2 Korintobii 13:7; Mateo 6:13) Ni kɛji akɛ mɔ ko he miiye yɛ gbɔmɔtsoŋ lɛ, wɔbaanyɛ wɔbi Yehowa ni ewaje lɛ bɔ ni sa ni aaanyɛ aha edamɔ ehela lɛ naa.​—Lala 41:​1-4.

Esa yɛ be fɛɛ mli akɛ aaasɔle aha nanemɛi Yehowa jalɔi ni awaa amɛyi lɛ. Paulo kɛ enanemɛi lɛ kɛ yiwaa ni naa wa kpe, ni ekɛɛ Korinto Kristofoi lɛ akɛ: “Nyɛhu nyɛfataa wɔhe kɛkpaa fai, koni mɛi pii ada shi aha wɔ yɛ duromɔ keenii ni aŋɔha wɔ yɛ mɛi pii ahewɔ lɛ hewɔ.” (2 Korintobii 1:​8-11; 11:​23-27) Kɛji akɛ awowɔ tsuŋ po lɛ, wɔbaanyɛ wɔsɔle wɔha nyɛmimɛi krokomɛi ni awaa amɛyi lɛ, ni wɔkai yɛ be fɛɛ mli akɛ Yehowa boɔ “jalɔi afaikpamɔ toi.”​—Abɛi 15:⁠29.

Esa akɛ wɔsɔle wɔha wɔnyɛmimɛi ni gbɛnaa nii ni tsii jwere amɛnɔ yɛ Yehowa gbɛjianɔtoo lɛ mli lɛ. Mɛi ni kudɔɔ gbɛjianɔtoo lɛ ni saa niyenii ni “tsulɔ anɔkwafo kɛ nilelɔ lɛ” kɛhaa lɛ fata enɛ he. (Mateo 24:​45-47) Akɛ nɔkwɛmɔ nɔ lɛ, Yehowa Odasefoi a-Nɔyeli Kuu lɛ mlibii lɛ sa wɔsɔlemɔi, ni wɔbaanyɛ wɔsɔle akɛ Nyɔŋmɔ aha amɛ ‘nilee mumɔ.’​—Efesobii 1:​16, 17.

Kristofoi Asubaŋi Amli Gbeleɔ

Kɛ wɔsɔle wɔha wɔnanemɛi heyelilɔi lɛ, wɔtsɔɔ akɛ wɔsusuɔ mɛi ahe, wɔfeee pɛsɛmkunya ni wɔyɛ suɔmɔ. Suɔmɔ ni pɛsɛmkunya bɛ mli ni wɔkɛsusuɔ wɔmumɔŋ nyɛmimɛi hii kɛ yei ahe lɛ kɛ Paulo sane ni tsɔɔ akɛ suɔmɔ “epeleee lɛ diɛŋtsɛ enɔ” lɛ kpaa gbee. (1 Korintobii 13:​4, 5) Mɛi krokomɛi ni wɔsɔleɔ wɔhaa lɛ ji gbɛ kome ni ‘haaa wɔfo wɔkome wɔnɔ mli shi moŋ wɔfoɔ wɔnanemɛi anɔ hu mli.’ (Filipibii 2:⁠4) Kɛ wɔha mɛi krokomɛi ahilɛ-kɛhamɔ fee nɔ ni wɔsusuɔ he yɛ wɔsɔlemɔi amli lɛ, wɔnaa akɛ wɔ hu wɔmiitsi kɛmiibɛŋkɛ amɛ yɛ nyɛmimɛi asuɔmɔ ni haa ayɔseɔ Yesu kaselɔi lɛ mli.​—Yohane 13:​34, 35.

Wɔjieɔ su ni haa anuɔ he ahaa mɔ lɛ kpo wɔtsɔɔ mɛi ni wɔsɔleɔ wɔhaa amɛ lɛ. (1 Petro 3:⁠8) Wɔnuɔ he wɔhaa amɛ, ni wɔkɛ wɔhe woɔ amɛmiishɛɛ saji kɛ amɛhaomɔi amli. Yɛ adesa gbɔmɔtso lɛ gbɛfaŋ lɛ, kɛ nine kome pila lɛ, ekrokomɛi lɛ kwɛɔ nɔ ni amɛbɔɔ mɔdɛŋ ni amɛjɔɔ piŋmɔ ni pilamɔ lɛ kɛbaa lɛ he. (Okɛto 1 Korintobii 12:​12, 26 he.) Nakai nɔŋŋ hu sɔlemɔ ni wɔfeɔ wɔhaa wɔnyɛmimɛi hii kɛ yei ni naa nɔ lɛ hu haa wɔnuɔ he wɔhaa amɛ ni eyeɔ ebuaa wɔ ni wɔkaiɔ amɛ. Wɔlaajeɔ nii kɛ wɔku wɔhiɛ wɔshwie wɔnanemɛi anɔkwa Kristofoi anɔ yɛ wɔsɔlemɔi amli lɛ, ejaakɛ Nyɔŋmɔ kɛ Kristo kpooo amɛ.​—1 Petro 5:​6, 7.

Nyɔŋmɔ gbeyeishemɔ sui sɔrɔtoi lɛ fɛɛ yaa hiɛ kɛ wɔsɔle wɔha mɛi krokomɛi lɛ. Wɔnuɔ amɛ shishi ni wɔtoɔ wɔtsui shi babaoo wɔhaa amɛ. Ajieɔ hetsɛ̃ kɛyaa, ni gbɛ baa kɛhaa susumɔi ni tswaa mɔ maa shi ni haa wɔfeɔ mɛi ni yɔɔ suɔmɔ kɛ miishɛɛ. Mɛi krokomɛi ni asɔleɔ ahaa lɛ hu kɛ toiŋjɔlɛ kɛ ekomefeemɔ baa Yehowa webii ateŋ.​—2 Korintobii 9:​13, 14.

Nyɛyaa nɔ Nyɛsɔlea Nyɛhaa Nyɛhe

Taakɛ Paulo fee lɛ, wɔbaanyɛ wɔbi ni mɛi krokomɛi asɔle aha wɔ. Kɛfata sɔlemɔ ni amɛkɛ wɔ aaasɔle lɛ he lɛ, wɔnanemɛi lɛ baanyɛ asɔle yɛ teemɔŋ amɛha Nyɔŋmɔ yɛ wɔhe, ni amɛtsi wɔgbɛi ata, ni amɛtsi wɔnaagabai lɛ ata, ni amɛbi ni eye ebua wɔ. Ni yelikɛbuamɔ baaba, ejaakɛ “Nuŋtsɔ lɛ [Yehowa] le bɔ ni efeɔ ejieɔ jalɔi yɛ kaa mli.”​—2 Petro 2:⁠9.

Yehowa Odasefoi ni tsiɔ wɔgbɛi ata yɛ amɛsɔlemɔi amli lɛ hu kɛ kaai kpeɔ​—ni ekolɛ amɛmli wawai po fe wɔ diɛŋtsɛ wɔnɔ. Ni kɛlɛ amɛkɛ wɔnaagbai lɛ yafɔɔ Naanɔ Maŋtsɛ lɛ hiɛ, ni ekolɛ amɛfoɔ po amɛhaa wɔ. (Okɛto 2 Korintobii 2:4; 2 Timoteo 1:​3, 4 he.) Kwɛ bɔ ni esa akɛ wɔda shi yɛ enɛ he! Hiɛsɔɔ kɛha enɛ kɛ yiŋtoi krokomɛi ni wɔsusu he lɛ hewɔ lɛ, nyɛhaa wɔsɔlea wɔhaa wɔhe.