Wiemɔ ni Ahaa Trukaa

EKOLƐ otsu nii waa yɛ owiemɔ ni obaaha lɛ he. Ekolɛ oyɛ saji ni adafitswaa yɔɔ mli. Ekolɛ shishinumɔ yɛ mli. Ekolɛ obaanyɛ oha kɛ naatselɛ. Shi kɛ́ otoibolɔi lɛ ajwɛŋmɔ enyiɛɛɛ osɛɛ kɛmɔɔɔ shi—amɛboɔ nɔ ni okɛɔ lɛ fã pɛ toi ejaakɛ amɛjwɛŋmɔ kpaa shi kɛyaa nɔ kroko nɔ yɛ be kɛ bei amli lɛ—no lɛ te owiemɔ lɛ mɔɔ shi ehaa tɛŋŋ? Kɛ́ ewa kɛha amɛ akɛ amɛaaha amɛjwɛŋmɔ ahi wiemɔ lɛ nɔ lɛ, no lɛ ani ebaanyɛ eba akɛ obaanyɛ oshɛ amɛtsuii ahe?

Mɛni baanyɛ afee nɔ ni kɛ nakai naagba lɛ baa? Nibii srɔtoi baanyɛ ekɛ enɛ aba. Bei pii lɛ, nɔ ni kɛbaa ji wiemɔ lɛ ni anyɛɛɛ aha ni akwɛɛɛ wolo nɔ. Yɛ gbɛ kroko nɔ lɛ, wielɔ lɛ miikwɛ ewolo lɛ nɔ babaoo tsɔ, loo bɔ ni etsɔɔ ewieɔ lɛ yɛ keketee tsɔ. Shi kɛlɛ, nɛkɛ naagbai nɛɛ kɔɔ bɔ ni wɔsaa wɔwiemɔ lɛ wɔha lɛ he tɛ̃ɛ.

Kɛ́ klɛŋklɛŋ lɛ, oŋma owiemɔ lɛ ni no sɛɛ lɛ obɔ mɔdɛŋ ofee lɛ wiemɔ he wolo lɛ, obaana akɛ ebaawa akɛ oooha wiemɔ lɛ ni okwɛɛɛ wolo nɔ. Mɛni hewɔ? Ejaakɛ ohala wiemɔi pɔtɛɛ komɛi ni obaasumɔ ni okɛtsu nii. Kɛ́ okɛ wiemɔ he wolo lɛ tsu nii yɛ owiemɔ lɛ mli po lɛ, obaana akɛ obaabɔ mɔdɛŋ akɛ obaakai wiemɔi ni okɛtsu nii yɛ klɛŋklɛŋ nɔ lɛ mli lɛ. Kɛ́ aŋma nɔ ko lɛ, wiemɔ lɛ feɔ keketee tsɔ ni wiemɔ he gbɛjianɔtoo lɛ bafeɔ haŋtsii fe nɔ ni yɔɔ daa gbi wiemɔ mli. Owiemɔ lɛ baajie enɛ kpo.

Yɛ nɔ najiaŋ ni oooŋma wiemɔ lɛ mli nɔ fɛɛ nɔ fitsofitso lɛ, kaa nɔ ni nyiɛ sɛɛ nɛɛ okwɛ: (1) Halamɔ saneyitso kɛ saji otii ni obaadamɔ nɔ owie nakai saneyitso lɛ he ofɔ̃ shi. Kɛ́ wiemɔ lɛ yɛ kuku lɛ, no lɛ ekolɛ saji otii enyɔ ko baanyɛ afee nɔ ni fa. Wiemɔ ni sɛɛ kɛ lɛ baanyɛ ahiɛ fãi ejwɛ loo enumɔ. (2) Kadimɔ ŋmalɛi titrii ni oto oyiŋ akɛ okɛbaatsu nii yɛ sane oti fɛɛ sane oti mli ni owie he; agbɛnɛ hu ŋmalamɔ nɔkwɛmɔnii kɛ naataamɔi ni he hiaa lɛ oshwie shi. (3) Susumɔ bɔ ni obaaje owiemɔ lɛ shishi oha lɛ he. Obaanyɛ oŋma wiemɔ kome loo enyɔ ko. Agbɛnɛ hu too onaamuu wiemɔ lɛ he gbɛjianɔ.

He ni asaa dani ahaa wiemɔ lɛ he miihia waa diɛŋtsɛ. Shi kaakane wiemɔ lɛ kɛ jwɛŋmɔ akɛ ookase owo oyitsoŋ. Yɛ wiemɔ ni ahaa ní akwɛɛɛ wolo nɔ lɛ mli lɛ, kɛ́ oosaa ohe lɛ, esa akɛ oma susumɔ ni yɔɔ mli lɛ nɔ mi, shi jeee wiemɔi lɛ. Susumɔ ni yɔɔ mli lɛ ji nɔ ni esa akɛ otĩ mli kɛyashi amɛbaaka ojwɛŋmɔ mli. Kɛ́ oto owiemɔ lɛ he gbɛjianɔ jogbaŋŋ ni shishinumɔ hi mli lɛ, esaaa akɛ enɛ feɔ nɔ ni wa, ni yɛ be mli ni owieɔ lɛ, esa akɛ susumɔi ni yɔɔ mli lɛ aba yɛ gbɛ ni waaa nɔ.

Susumɔ Emli Sɛɛnamɔi lɛ Ahe. Sɛɛnamɔ ni he hiaa ni yɔɔ wiemɔ ni ahaa ní akwɛɛɛ wolo nɔ lɛ he ji akɛ owieɔ yɛ gbɛ ni mli ka shi faŋŋ nɔ, ni gbɔmɛi boɔ toi amrɔ nɔŋŋ. Owiemɔ lɛ baafee nɔ ni ŋɔɔ waa ni otoibolɔi lɛ baaná he miishɛɛ babaoo.

Nɛkɛ wiemɔ gbɛ nɛɛ yeɔ ebuaa bo ni okwɛɔ toibolɔi lɛ ahiɛ babaoo, ni ehaa okɛ amɛ gbaa sane jogbaŋŋ. Akɛni okɛ ohiɛ efɔɔɔ bɔ ni oto wiemɔ fɛɛ wiemɔ he gbɛjianɔ yɛ wiemɔ he wolo lɛ nɔ hewɔ lɛ, otoibolɔi lɛ baanu he akɛ ole osane lɛ jogbaŋŋ ni akɛ oheɔ nɔ ni okɛɔ lɛ oyeɔ yɛ anɔkwale mli. No hewɔ lɛ, nɛkɛ wiemɔ hamɔ su nɛɛ haa onyɛɔ okɛ hedɔɔ wieɔ yɛ sanegbaa gbɛ nɔ, wiemɔ ni ajɛɔ tsuiŋ ahaa ní shɛɔ tsui lɛ he.

Wiemɔ ni ahaa ní akwɛɛɛ wolo nɔ lɛ hu ŋmɛɔ tswaa feemɔ gbɛ. Afeko sane lɛ kpɛŋŋ aahu akɛ onyɛɛɛ ofee tsakemɔi yɛ mli. Ŋɔɔ lɛ akɛ, yɛ gbi ni obaaha owiemɔ lɛ mra mli lɛ, onu adafitswaa ko ni sa kadimɔ ni kɔɔ osane lɛ he tɛ̃ɛ. Ani efeŋ nɔ ni sa akɛ oootsĩ tã? Aloo ekolɛ, beni owieɔ lɛ, ona akɛ gbekɛbii babaoo ni miiya skul yɛ toibolɔi lɛ ateŋ. Kwɛ bɔ ni ebaahi akɛ oootsake onɔkwɛmɔnii kɛ bɔ ni okɛtsuɔ nii ohaa lɛ kɛ jwɛŋmɔ akɛ obaaye obua amɛ ni amɛnu bɔ ni sane lɛ saa amɛshihilɛi ahe lɛ shishi!

Sɛɛnamɔ kroko ni yɔɔ wiemɔ ni ahaa ní akwɛɛɛ wolo nɔ lɛ he lɛ ji bɔ ni enyɛɔ ekanyaa bo diɛŋtsɛ ojwɛŋmɔ lɛ. Kɛ́ ona akɛ toibolɔi ahiɛ sɔɔ owiemɔ lɛ, ni amɛmiibo toi lɛ, ewoɔ bo diɛŋtsɛ hewalɛ ni ehaa ogbalaa nibii amli kɛyaa shɔŋŋ loo oheɔ be ni okɛtĩɔ saji otii komɛi amli ni okɛmaa nɔ mi. Kɛ́ ona akɛ miishɛɛ ni toibolɔi lɛ yɔɔ lɛ miiba shi lɛ, obaanyɛ ofee nii ni okɛye naagba lɛ nɔ moŋ fe ni ooowie otsɔɔ gbɔmɛi ni jwɛŋmɔ yɔɔ nɔ kroko nɔ lɛ.

Tsi Ohe Kɛjɛ Osharai ni Yɔɔ Mli lɛ Ahe. Esa akɛ ole hu akɛ osharai yɛ wiemɔ ni ahaa ní akwɛɛɛ wolo nɔ lɛ mli. Ekome ji akɛ obaanyɛ oye be fe nine. Kɛ́ okɛ susumɔi babaoo wo owiemɔ lɛ mli beni ohaa owiemɔ lɛ, be nɔyeli baanyɛ afee naagba. Kɛ́ okadi be ni obaaye kɛha wiemɔ fã fɛɛ wiemɔ fã yɛ wiemɔ he wolo lɛ nɔ lɛ, no lɛ obaanyɛ otsu enɛ he nii. No sɛɛ lɛ nyiɛmɔ gbɛjianɔtoo nɛɛ sɛɛ pɛpɛɛpɛ.

Oshara kroko ni titri lɛ eyɔɔ kɛha wielɔi ni he esa lɛ ji hekɛnɔfɔɔ ni ayɔɔ fe nine. Akɛni mɛi komɛi ahe esa kɛ maŋshiɛmɔ hamɔ hewɔ lɛ, ebaanyɛ efee amɛ akɛ ewaaa akɛ amɛaabua susumɔi komɛi anaa koni ebote be ni akɛha lɛ mli. Shi esa akɛ heshibaa kɛ le ni wɔle akɛ wɔmiiná tsɔsemɔ gbɛjianɔtoo ko ni Yehowa diɛŋtsɛ ji Tsɔɔlɔ Kpeteŋkpele lɛ mli gbɛfaŋnɔ lɛ atsirɛ wɔ koni wɔkɛ ekãa kɛ sɔlemɔ asaa wɔhe jogbaŋŋ yɛ nifeemɔ fɛɛ nifeemɔ mli.—Yes. 30:20; Rom. 12:6-8.

Ekolɛ, nɔ ni wielɔi babaoo ni he esako yɛ wiemɔ ni ahaa ní akwɛɛɛ wolo nɔ lɛ susuɔ he waa ji akɛ, amɛhiɛ baakpa nɔ ni amɛtaoɔ ni amɛkɛɛ lɛ nɔ. Kaaha gbɛkpamɔ nɛɛ miitsĩ onaa yɛ ohiɛ ni oooya yɛ wiemɔ ni mɔɔ shi lɛ mli. Saamɔ ohe jogbaŋŋ, ni okwɛ Yehowa gbɛ kɛha emumɔ lɛ yelikɛbuamɔ.—Yoh. 14:26.

Wielɔi krokomɛi haa wiemɔ ni amɛkɛbaatsu nii lɛ he naagbamɔ babaoo tsiɔ amɛnaa. Eji anɔkwale akɛ, ekolɛ wiemɔi ni ahala kɛ wiemɔ ni aŋmala emli wiemɔi fɛɛ he wiemɔ he mla bɛ wiemɔ ni ahaa ní akwɛɛɛ wolo nɔ lɛ mli, shi wiemɔ ni sanegbaa su yɔɔ mli lɛ baanyɛ aye no najiaŋ. Mɛi babaoo boɔ wiemɔ ni awieɔ ni eshishinumɔ waaa ni ebɛ hwanyaŋŋ lɛ toi. Kɛ́ osaa ohe jogbaŋŋ lɛ, wiemɔi kukuji ni sa lɛ diɛŋtsɛ baaba, jeee akɛni okase owo oyitsoŋ lɛ hewɔ, shi moŋ akɛni okase susumɔi lɛ jogbaŋŋ lɛ hewɔ. Ni kɛ́ okɛ wiemɔ kpakpa tsu nii yɛ odaa gbi wiemɔ mli lɛ, no lɛ, lɛ diɛŋtsɛ ebaaba kɛji odamɔ wiemɔ kpoku lɛ nɔ.

Saji ni Esa akɛ Oŋmala ni Okɛtsu Nii. Beni be shwieɔ mli ni okɛtsuɔ nii lɛ, obaanyɛ otse wiemɔi ni oŋmalaa yɛ owiemɔ he wolo lɛ nɔ lɛ nɔ koni efee wiemɔi fioo ni okɛbaatsu nii yɛ owiemɔ lɛ eko fɛɛ eko mli. Obaanyɛ oŋmala enɛ kɛ ŋmalɛi ni obaasumɔ ni okɛtsu nii lɛ fɛɛ yɛ wolo fioo ko nɔ loo wolo ko ni obaakwɛ nɔ ni ekai bo yɛ nɔ ni obaakɛɛ lɛ he. Yɛ shiɛmɔ nitsumɔ lɛ mli lɛ, bei pii lɛ okaseɔ wiemɔ he gbɛjianɔtoo ni yɔɔ mlɛo owoɔ oyitsoŋ. Kɛ́ ofee nibii amlipɛimɔ ko ni okɛyaatsu nii yɛ sɛɛsaramɔ ko mli lɛ, no lɛ obaanyɛ oŋmala wiemɔi fioo ko yɛ wolo bibioo nɔ ni okɛwo o-Biblia lɛ mli. Aloo obaanyɛ okɛ wiemɔ he wolo ni yɔɔ “Bible Topics for Discussion” lɛ mli loo sane ni anaa yɛ Reasoning From the Scriptures lɛ mli lɛ atsu nii akɛ nɔ ni obaadamɔ nɔ ni okɛgba sane lɛ.

Shi kɛlɛ, kɛ́ aha bo nifeemɔi pii yɛ asafoŋ kpeei ashishi yɛ otsii fioo ko mli ni ekolɛ obaaha maŋshiɛmɔ ofata he lɛ, no lɛ obaana akɛ esa akɛ oŋmala saji babaoo. Mɛni hewɔ? Bɔni afee ni onyɛ okai sane lɛ dani otsu emli nifeemɔi lɛ ahe nii. Ni nakai po lɛ, kɛ́ okɛ ohe fɔ̃ wiemɔi ni oŋmala lɛ nɔ babaoo kɛtao wiemɔi ni obaawie yɛ owiemɔ lɛ mli—ni okwɛ wiemɔ muu fɛɛ wiemɔ muu nɔ owie lɛ—no lɛ sɛɛnamɔ ni yɔɔ wiemɔ ni ahaa ní akwɛɛɛ wolo nɔ lɛ mli lɛ baaŋmɛɛ bo. Kɛ́ oŋmala nibii babaoo lɛ, folɔmɔ shishi bɔni afee ni onyɛ okwɛ saji titrii fioo kɛ ŋmalɛi ni atsɛ shi aŋmalako emli wiemɔi lɛ yɛ owiemɔ he wolo lɛ nɔ lɛ.

Yɛ be mli ni esa akɛ be fɛɛ be lɛ, wielɔ ni he esa aha wiemɔ ní ekwɛɛɛ wolo nɔ lɛ, ebaanyɛ efee nɔ ni sɛɛnamɔ yɔɔ he akɛ ekɛ gbɛ̀i krokomɛi ni atsɔɔ nɔ ahaa wiemɔ lɛ hu atsu nii. Yɛ hiɛkpamɔ kɛ naamuu wiemɔi lɛ amli, he ní esa akɛ akɛ toibolɔi ahiɛkwɛmɔ afata wiemɔ ni akwɛ jogbaŋŋ ni aŋmala lɛ he lɛ, wiemɔi fioo ni ebaakase ewo eyitsoŋ lɛ he miihia. Yɛ hei ni akɛ anɔkwa saji, akɔntaabui, mɛi awiemɔi ní atsɛ yisɛɛ loo ŋmalɛi etsu nii lɛ, nikanemɔ he miihia, ni obaanyɛ ofee enɛ koni emɔ shi.

Beni Mɛi Krokomɛi Biɔ Nii Amlitsɔɔmɔ. Bei komɛi lɛ abiɔ wɔ koni wɔbatsɔɔ wɔhemɔkɛyelii lɛ amli ní wɔnaaa hegbɛ ni wɔkɛsaa wɔhe kɛtsɔ hiɛ. Enɛ baanyɛ aba kɛji mɔ ko ni wɔkɛkpe yɛ shiɛmɔ nitsumɔ lɛ mli lɛ tee sane ko ni enuuu shishi lɛ shi lɛ. Nakai shihilɛ lɛ nɔŋŋ baanyɛ ate shi beni oyɔɔ wekumɛi ateŋ, oyɔɔ nitsumɔhe, loo skul. Nɔyeli lɛ mli onukpai hu baanyɛ abi ni wɔgbála wɔhemɔkɛyelii kɛ wɔshihilɛi amli wɔtsɔɔ amɛ. Ŋmalɛi lɛ woɔ wɔ ŋaa akɛ: “Ni daa nɛɛ nyɛsaa nyɛhe nyɛtoa, koni nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ní yɔɔ nyɛmli lɛ shishi lɛ, kɛ mlijɔlɛ kɛ gbeyeishemɔ.”—1 Pet. 3:15.

Kadimɔ bɔ ni Petro kɛ Yohane ha Yudafoi Akuashɔŋ lɛ hetoo taakɛ aŋma yɛ Bɔfoi lɛ Asaji 4:19, 20 lɛ. Amɛkɛ wiemɔi muji enyɔ pɛ tsu nii ni amɛkɛtsɔɔ amɛshidaamɔ mli faŋŋ. Amɛfee enɛ yɛ gbɛ ni sa amɛtoibolɔi lɛ nɔ—ni amɛtsɔɔ akɛ sane ni bɔfoi lɛ kɛkpe lɛ nɔŋŋ ji nɔ ni saneyelihe lɛ hu kɛkpe lɛ. Sɛɛ mli lɛ, akɛ apasa naafolɔmɔi shi Stefano, ni akɛ lɛ tee saneyelihe kome too lɛ nɔŋŋ hiɛ. Kanemɔ hetoo ni ekɛha trukaa ni hewalɛ yɔɔ mli lɛ yɛ Bɔfoi lɛ Asaji 7:2-53. Te eto ewiemɔ lɛ he gbɛjianɔ eha tɛŋŋ? Ewie saji ahe yɛ bɔ ni amɛtsara nɔ kɛba yɛ yinɔsane mli lɛ naa. Beni eshɛ he ko ni sa lɛ, ema atuatsemɔ mumɔ ni Israel maŋ lɛ jie lɛ kpo lɛ nɔ mi. Yɛ naamuu mli lɛ, etsɔɔ akɛ Akuashɔŋ lɛ ejie nakai mumɔ lɛ nɔŋŋ kpo kɛtsɔ gbe ní amɛha agbe Nyɔŋmɔ Bi lɛ nɔ.

Kɛ́ atsɛ bo trukaa koni obatsɔɔ ohemɔkɛyelii lɛ amli lɛ, mɛni baanyɛ aye abua bo koni owiemɔi lɛ amɔ shi? Kasemɔ Nehemia, mɔ ni sɔle yɛ eyitsoŋ dani eha sane ní Maŋtsɛ Artashasta bi lɛ lɛ hetoo lɛ. (Neh. 2:4) No sɛɛ lɛ, too nɔ ni obaakɛɛ lɛ he gbɛjianɔ yɛ ojwɛŋmɔ mli oya nɔŋŋ. Wɔbaanyɛ wɔto gbɛ̀i titri lɛ anaa yɛ nɛkɛ gbɛ nɔ: (1) Halamɔ oti kome loo enyɔ ni okɛbaatsɔɔ sane lɛ mli (obaanyɛ okɛ otii ni anaa yɛ Reasoning From the Scriptures lɛ mli lɛ atsu nii). (2) Kpɛɛ oyiŋ yɛ ŋmalɛi ni obaasumɔ ni okɛtsu nii ni okɛfi nakai otii lɛ sɛɛ. (3) Susumɔ ŋaa gbɛ ni obaatsɔ nɔ ni okɛje onii amlitsɔɔmɔ lɛ shishi bɔni afee ni mɔ ni biɔ sane lɛ asumɔ akɛ eeebo toi. Agbɛnɛ jeee shishi ni owie.

Kɛ́ oyaje nɔnyɛɛ shishi lɛ, ani obaakai nɔ ni esa akɛ ofee? Yesu kɛɛ esɛɛnyiɛlɔi lɛ akɛ: “Nyɛkahaoa nyɛhe yɛ bɔ ni aloo nɔ ni nyɛaakɛɛ hewɔ; shi aaaŋɔ nɔ ni nyɛaawie aha nyɛ yɛ nakai ŋmɛlɛtswaa lɛ mli nɔŋŋ. Ejaakɛ jeee nyɛ ji mɛi ni wieɔ lɛ, shi moŋ nyɛtsɛ lɛ mumɔ lɛ wieɔ yɛ nyɛmli.” (Mat. 10:19, 20) Enɛ etsɔɔɔ akɛ abaaha bo naakpɛɛ “nilee wiemɔi” ni akɛha klɛŋklɛŋ afii oha lɛ mli Kristofoi lɛ. (1 Kor. 12:8) Shi kɛ́ onáa tsɔsemɔ ni Yehowa kɛhaa etsuji yɛ Kristofoi asafo lɛ mli lɛ mli gbɛfaŋnɔ daa lɛ, no lɛ mumɔ krɔŋkrɔŋ lɛ baaha okai saji ni he hiaa lɛ.—Yes. 50:4.

Ŋwanejee ko bɛ he akɛ, wiemɔ ni ahaa ní akwɛɛɛ wolo nɔ lɛ baanyɛ amɔ shi jogbaŋŋ. Kɛ́ okaseɔ ni okɛtsuɔ nii be fɛɛ be ni ahaa bo nifeemɔi yɛ asafo lɛ mli lɛ, no lɛ kɛ ehe bahia ni oha sane hetoo trukaa lɛ, ewaŋ ehaŋ bo akɛni gbɛ kome too lɛ nɔŋŋ nɔ atsɔɔ afeɔ nakai lɛ hewɔ. Kaashashao shi. Kasemɔ ni oookase wiemɔ ni ahaa ní akwɛɛɛ wolo nɔ lɛ baaye abua bo ni oha oshiɛmɔ nitsumɔ lɛ amɔ shi jogbaŋŋ. Ni kɛ́ oná hegbɛ akɛ obaaha wiemɔ yɛ asafo lɛ mli lɛ, eka shi faŋŋ akɛ obaagbala toibolɔi lɛ ajwɛŋmɔ kɛba wiemɔ lɛ nɔ, ni obaashɛ amɛtsuii ahe.