NIKASEMƆ 46

Mɛni Hewɔ Esa Akɛ Ojɔɔ Ohe Nɔ, Ni Ohã Abaptisi Bo?

Nɔ Ni Aprinti

Kɛ́ owo Yehowa shi yɛ sɔlemɔ mli akɛ obaajá ekome too pɛ, ni akɛ obaahã esuɔmɔnaa nii ni obaafee lɛ he ahia bo fe nɔ fɛɛ nɔ yɛ oshihilɛ mli lɛ, belɛ, ojɔɔ ohe nɔ ohã lɛ ji no. (Lala 40:8) No sɛɛ lɛ, abaanyɛ abaptisi bo. Kɛ́ ohã abaptisi bo lɛ, no hãa mɛi leɔ akɛ ojɔɔ ohe nɔ ohã Yehowa. Yiŋ ni obaakpɛ akɛ obaajɔɔ owala nɔ ohã lɛ lɛ, ji yiŋ ni he hiaa fe fɛɛ ni obaakpɛ yɛ oshihilɛ mli. Yiŋkpɛɛ ni he hiaa waa nɛɛ baatsake oshihilɛ. Mɛni ekolɛ no baatsirɛ bo ni okpɛ yiŋ nɛɛ?

1. Mɛni tsirɛɔ mɔ ko ni ejɔɔ ehe nɔ ehãa Yehowa?

Suɔmɔ ji nɔ ni tsirɛɔ wɔ ni wɔjɔɔ wɔhe nɔ wɔhãa Yehowa. (1 Yohane 4:10, 19) Biblia lɛ kɛɔ wɔ akɛ: “Suɔmɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.” (Marko 12:30) Wɔkɛɛɛ kɛkɛ akɛ wɔsumɔɔ Nyɔŋmɔ, shi moŋ wɔkɛ wɔnifeemɔ hu tsɔɔ nakai. Kɛ́ nuu kɛ yoo ko sumɔɔ amɛhe waa lɛ, amɛboteɔ gbãla mli, nakai nɔŋŋ suɔmɔ ni wɔyɔɔ kɛhã Yehowa lɛ tsirɛɔ wɔ koni wɔjɔɔ wɔhe nɔ wɔhã lɛ, ni wɔhã abaptisi wɔ.

2. Kɛ́ ohã abaptisi bo akɛ Yehowa Odasefonyo lɛ, mɛɛ jɔɔmɔi obaaná?

Kɛ́ abaptisi bo lɛ, obaabatsɔ Yehowa weku ni yɔɔ miishɛɛ lɛ mli nyo. Ni ebaajie suɔmɔ kpo etsɔɔ bo yɛ gbɛi pii anɔ, ni naanyobɔɔ ni yɔɔ okɛ lɛ teŋ lɛ mli baawa fe bɔ ni eji bianɛ lɛ po. (Kanemɔ Maleaki 3:16-18.) Agbɛnɛ hu, Yehowa baatsɔ o-Tsɛ, ni obaaná nyɛmimɛi hii kɛ yei ni yɔɔ jeŋ fɛɛ ni sumɔɔ lɛ, ni sumɔɔ bo hu. (Kanemɔ Marko 10:29, 30.) Yɛ anɔkwale mli lɛ, esa akɛ ofee nibii komɛi dani abaanyɛ abaptisi bo. Esa akɛ okase Yehowa he nii, osumɔ lɛ, ni ohe e-Bi lɛ nɔ oye. No sɛɛ lɛ, esa akɛ ojɔɔ owala nɔ ohã Yehowa. Kɛ ofee nibii nɛɛ ni ohã abaptisi bo lɛ, belɛ, obɔi gbɛ ni kɛ mɔ yaa naanɔ wala mli lɛ nɔ nyiɛmɔ ji no. Nyɔŋmɔ Wiemɔ lɛ kɛɔ akɛ: “Baptisimɔ lɛ hu miihere nyɛyiwala.”—1 Petro 3:21.

KASEMƆ PII OFATA HE

Obaana nɔ hewɔ ni ehe hiaa akɛ obaajɔɔ ohe nɔ ohã Yehowa, ni ohã abaptisi bo lɛ.

3. Esa akɛ wɔteŋ mɔ fɛɛ mɔ ahala mɔ ni ebaasɔmɔ

Yɛ blema Israel lɛ, mɛi komɛi yasusu akɛ amɛbaanyɛ amɛjá Yehowa, ni yɛ nakai beiaŋ nɔŋŋ lɛ amɛjá amale nyɔŋmɔ Baal. Shi Yehowa tsɔ egbalɔ Elia nɔ ehã ana akɛ susumɔ nɛɛ ejaaa. Nyɛkanea 1 Maŋtsɛmɛi 18:21 lɛ, ni nyɛsusua sanebimɔ nɛɛ he:

Mɛɛ yiŋ ehe bahia ni Israelbii lɛ akpɛ?

Tamɔ eba lɛ yɛ Israelbii lɛ agbɛfaŋ lɛ, wɔ hu esa akɛ wɔhala mɔ ni wɔbaasɔmɔ. Nyɛkanea Luka 16:13 lɛ, ni nyɛsusua sanebimɔi nɛɛ ahe:

Mɛni hewɔ wɔnyɛŋ wɔjá Yehowa, ni yɛ nakai beiaŋ nɔŋŋ lɛ, wɔjá mɔ kroko loo nɔ kroko lɛ?
Te wɔɔfee tɛŋŋ wɔhã Yehowa ana akɛ wɔhala akɛ wɔbaajá lɛ lɛ?

4. Jwɛŋmɔ suɔmɔ ni Yehowa yɔɔ kɛhã bo lɛ nɔ

Mfonirii ni ato naa: Nuu ko miisusu Nyɔŋmɔ nikeenii lɛ ahe. 1. Suɔmɔ; akɛ suɔmɔ ni yoofɔyoo yɔɔ kɛha ebi abifao lɛ efee he mfoniri. 2. Niyenii ni ŋɔɔ; akɛ aduawai kɛ yelibai srɔtoi efee he mfoniri. 3. Biblia lɛ. 4. Yesu Kristo kpɔmɔ afɔleshaa lɛ.

Yehowa eke wɔ nibii kpakpai pii. Mɛni wɔbaanyɛ wɔke lɛ? Jiemɔ VIDIO lɛ.

VIDIO: Kee Nyɔŋmɔ Nii (3:04)

Mɛni ji nibii komɛi ni Yehowa efee kɛtsɔɔ akɛ esumɔɔ bo? Nyɛkanea Lala 104:14, 15 kɛ 1 Yohane 4:9, 10 lɛ, ni nyɛsusua sanebimɔi nɛɛ ahe:

Mɛni ji Yehowa nikeenii lɛ ateŋ nɔ ni ohiɛ sɔɔ waa?
Te nikeenii nɛɛ hãa onuɔ he yɛ Yehowa he ohãa tɛŋŋ?

Kɛ́ ake wɔ nɔ ko ni wɔsumɔɔ waa lɛ, wɔsumɔɔ ni wɔfee nɔ ko kɛda mɔ lɛ shi. Nyɛkanea 5 Mose 16:17 lɛ, ni nyɛsusua sanebimɔ nɛɛ he:

Kɛ́ ojwɛŋ nibii fɛɛ ni Yehowa efee ehã bo lɛ nɔ lɛ, mɛni no tsirɛɔ bo ni ofee ohã lɛ?

5. Kɛ́ ojɔɔ ohe nɔ ohã Yehowa lɛ, ebaajɔɔ bo yɛ gbɛi pii anɔ

Mɛi pii heɔ amɛyeɔ akɛ, kɛ́ amɛfee gbɛ́i, amɛná nitsumɔ ni abuɔ waa, loo amɛná shika lɛ, no baahã amɛná miishɛɛ. Ani amɛsusumɔ lɛ ja? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Bɔɔlutswaa Ji Nɔ Ni He Hiaa Mi Fe Fɛɛ Yɛ Shihilɛ Mli (5:45)

Mfonirii ni ato naa: Vidio ni ji, ‘Bɔɔlutswaa Ji Nɔ Ni He Hiaa Mi Fe Fɛɛ Yɛ Shihilɛ Mli’ lɛ mli mfonirii komɛi. 1. Andrey ha akɛ lɛ bɔi Biblia lɛ kasemɔ ekoŋŋ. 2. Andrey kɛ ebiyoo lɛ miishiɛ.

Eyɛ mli akɛ nuu lɛ sumɔɔ bɔɔlutswaa moŋ, shi mɛni hewɔ ekpa tswaa lɛ?
Ekpɛ eyiŋ akɛ ebaajɔɔ ehe nɔ ehã Yehowa, shi jeee bɔɔlutswaa. Kɛ́ okwɛ lɛ, yiŋ ni ekpɛ lɛ ja? Mɛni hewɔ okɛɔ nakai?

Kulɛ bɔfo Paulo tsuɔ nitsumɔ ko ni abuɔ waa dani ebatsɔ Kristofonyo. Ekase Yudafoi lɛ amla yɛ tsɔɔlɔ ko ni ehe gbɛ́i waa lɛ ŋɔɔ. Shi eshi nitsumɔ nɛɛ koni ebatsɔ Kristofonyo. Ani Paulo shwa ehe? Nyɛkanea Filipibii 3:8 lɛ, ni nyɛsusua sanebimɔi nɛɛ ahe:

Mɛni hewɔ Paulo bu nɔ ni etsu dani ebatsɔ Kristofonyo lɛ akɛ “bɔɔla babaoo,” loo jwɛi babaoo lɛ?
Mɛni ená yɛ no najiaŋ?
Kɛ́ okwɛ lɛ, mɛni baahã otsui anyɔ omli yɛ shihilɛ mli, sɔɔmɔ ni obaasɔmɔ Yehowa aloo nibii krokomɛi ni obaafee?

Mfonirii ni ato naa: 1. Saul, be ni eji Farisifonyo ni buɔ ehe jalɔ lɛ; sɛɛ mli lɛ atsɛ lɛ Paulo. 2. Bɔfo Paulo miiŋma wolo eyaha enyɛmimɛi Kristofoi lɛ. — Be ni Paulo batsɔ Kristofonyo lɛ, jɔɔmɔi ni ená lɛ fá kwraa fe nibii ni eshi lɛ

MƐI KOMƐI KƐƆ AKƐ: “Mile akɛ anɔkwale lɛ nɛ, shi mifeko klalo akɛ mahã abaptisi mi.”

Kɛ́ okwɛ lɛ, mɛni hewɔ jwɛŋmɔ yɔɔ mli akɛ obaajɔɔ ohe nɔ ohã Yehowa lɛ?

EMLI OTI

Suɔmɔ tsirɛɔ wɔ koni wɔjɔɔ wɔhe nɔ wɔhã Yehowa, ni wɔhã abaptisi wɔ.

Mɛni Okase?

Mɛni hewɔ esa jogbaŋŋ akɛ wɔbaasumɔ Yehowa kɛ wɔtsui muu fɛɛ ni wɔjá lɛ lɛ?
Mɛɛ gbɛi anɔ Yehowa jɔɔ e-Dasefoi ni abaptisi amɛ lɛ?
Ani obaasumɔ ni ojɔɔ ohe nɔ ohã Yehowa?

Deeti ni migbe nikasemɔ nɛɛ naa:

Nɔ Ni Obaanyɛ Ofee

Kɛ́ oosaa ohe kɛhã nikasemɔ ni nyiɛ sɛɛ lɛ, susumɔ yiŋtoi ahewɔ ni ojɔko ohe nɔ ohãko Yehowa lɛ ahe.

Nɔ Kroko Ni Obaanyɛ Ofee:

Your other goal

EHE SAJI KROKOMƐI

Obaana nɔ ni hã yoo ko ni láa kɛ nuu ko ni tswaa bɔɔlu henɔ ko lɛ jɔɔ amɛhe nɔ amɛhã Yehowa lɛ.

Oblahii Kɛ Oblayei Biɔ Akɛ—Mɛni Mikɛ Miwala Baafee?—Amɛsusu Be Ni Eho Lɛ He (6:54)

Obaana yiŋtoi krokomɛi ahewɔ ni esa akɛ ojɔɔ ohe nɔ ohã Yehowa.

“Mɛni Hewɔ Esa Akɛ Ojɔɔ Ohe Nɔ Oha Yehowa?” (Buu-Mɔɔ, January 15, 2010)

Yɛ lala vidio nɛɛ mli lɛ, obaana akɛ mɛi ni ejɔɔ amɛhe nɔ amɛhã Yehowa lɛ yɛ miishɛɛ.

Bo Pɛ Masɔmɔ Daa (4:30)

Kɛ́ okane sane ni ji, “Mibi Mihe Afii Pii Akɛ, ‘Mɛni Hewɔ Wɔyɔɔ Shihilɛ Mli?’” lɛ, obaana nɔ ni tsirɛ yoo ko ni esusu nibii ni he hiaa lɛ waa yɛ shihilɛ mli lɛ ahe ekoŋŋ.

“Biblia lɛ Tsakeɔ Mɛi” (Buu-Mɔɔ, November 1, 2012)