“Jwɛŋmɔŋ Hiɛshikãmɔ” yɛ Be Mli ni Naagbee lɛ Bɛŋkɛɔ Lɛ

“Nibii fɛɛ anaagbee lɛ eshɛ etã. Hewɔ lɛ nyɛ jwɛŋmɔ mli atsea.” —1 PETRO 4:7.

 1. Mɛni kɔɔ ‘jwɛŋmɔ mli ni aaatse’ lɛ he?

ESA akɛ bɔfo Petro wiemɔi ni yɔɔ yiteŋgbɛ lɛ aná gbɛ ni Kristofoi tsɔɔ nɔ amɛhiɔ shi lɛ nɔ hewalɛ waa diɛŋtsɛ. Shi Petro ekɛɛɛ mɛi ni kaneɔ ewolo lɛ akɛ amɛtsi amɛhe kɛjɛ je lɛŋ kɛ daa shihilɛ mli nibii ahe nitsumɔ he; ni asaŋ ewooo gbeyeishemɔ ni anyɛɛɛ nɔ aye yɛ hiɛkpatamɔ ni baa lɛ hewɔ lɛ he hewalɛ. Shi moŋ ewo hewalɛ akɛ: “Nyɛ jwɛŋmɔ mli atsea.” Mɔ ko ‘jwɛŋmɔ ni mli tse’ lɛ kɔɔ kojomɔ kpakpa, jwɛŋmɔ, nilee, shishinumɔ ni yɔɔ wɔ wiemɔ kɛ nifeemɔi amli lɛ ni wɔɔjie nomɛi akpo wɔtsɔɔ lɛ he lɛ ahe. Etsɔɔ akɛ ni wɔɔha Nyɔŋmɔ Wiemɔ lɛ aye wɔ jwɛŋmɔ kɛ nifeemɔi anɔ. (Romabii 12:2) Akɛni wɔhiɔ shi yɛ “yinɔ kɔdɔŋ ni bɛ eŋɛlɛ nɔ . . . teŋ” hewɔ lɛ, jwɛŋmɔ ni mli tse he miihia koni akɛtsi naagbai kɛ saji ni mli wawai anaa.—Filipibii 2:15.

 2. Yɛ mɛɛ gbɛ nɔ Yehowa tsuishitoo lɛ he baa sɛɛnamɔ kɛhaa Kristofoi ŋmɛnɛ?

² “Jwɛŋmɔŋ hiɛshikãmɔ” hu yeɔ ebuaa wɔ ni wɔbuɔ wɔhe akɛ mɛi ni baa shi yɛ gbɛ ni sa nɔ. (Tito 2:12; Romabii 12:3) Enɛ he miihia, yɛ wiemɔi ni aŋmala ashwie shi yɛ 2 Petro 3:9 lɛ hewɔ: “Jeee tsɛ Nuntsɔ [Yehowa, NW] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” Kadimɔ akɛ Yehowa miito etsui shi, jeee yɛ mɛi ni heee yeee lɛ pɛ he, shi moŋ ‘kɛha wɔ hu’—Kristofoi asafo lɛ mli bii lɛ. Mɛni hewɔ? Ejaakɛ “esumɔɔɔ akɛ mɛi komɛi alaaje.” Ekolɛ ehe miihia ni mɛi komɛi afee tsakemɔi lolo koni amɛhe asa kɛha naanɔ wala nikeenii lɛ. Belɛ nyɛhaa wɔkwɛa he ni ekolɛ ehe baahia ni afee tsakemɔi komɛi yɛ lɛ.

“Jwɛŋmɔŋ Hiɛshikãmɔ” yɛ Shãrãmɔ ni Wɔkɛ Mɛi Yeɔ lɛ Mli

 3. Mɛɛ sanebimɔi ni kɔɔ amɛbii ahe fɔlɔi baanyɛ abi amɛ diɛŋtsɛ amɛhe?

³ Esa akɛ shĩa lɛ afee toiŋjɔlɛ shihilɛhe. Shi yɛ mɛi komɛi agbɛfaŋ lɛ ebafeɔ “shĩa ni . . . béi yɔɔ mli.” (Abɛi 17:1) Ni oweku lɛ hu? Ani oshĩa lɛ eye ehe kɛjɛ “mlila kɛ mlifu kɛ bolɔmɔ” he? (Efesobii 4:31) Ni obii hu? Ani amɛnuɔ he akɛ asumɔɔ amɛ ni hiɛ sɔɔ amɛ? (Okɛto Luka 3:22 he.) Ani oohe be koni okɛtsɔɔ amɛ nii ni okɛtsɔse amɛ? Ani ‘otsɔseɔ amɛ yɛ jalɛ mli’ fe yɛ bolɔmɔ kɛ mlifu mli? (2 Timoteo 3:16) Akɛni gbekɛbii ji “Yehowa gboshinii” hewɔ lɛ, eyɛ bɔ ni akɛ amɛ yeɔ ahaa lɛ he miishɛɛ waa.—Lala 127:3.

 4. (a) Mɛni baanyɛ aba kɛ wu ko kɛ eŋa ye yɛ gbɛ ni yɔɔ keketee nɔ? (b) Te ŋamɛi aaafee tɛŋŋ ni amɛha amɛkɛ Nyɔŋmɔ teŋ toiŋjɔlɛ aya nɔ ni amɛha miishɛɛ ahi weku muu lɛ fɛɛ mli?

⁴ Ni wɔ gbalashihilɛ mli hefatalɔ lɛ hu? “Nakai sa akɛ wumɛi hu asumɔ amɛ diɛŋtsɛ amɛ ŋamɛi, tamɔ amɛ diɛŋtsɛ amɛ gbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo dã, shi moŋ elɛɔ lɛ ni ehiɛɔ lɛ dɔdɔɔdɔ, taakɛ bɔ ni Nuntsɔ lɛ hiɛɔ asafo lɛ.” (Efesobii 5:28, 29) Jeee akɛ nuu ni jɛ́ɔ mɔ, ni yeɔ mɔ nɔ keketee, loo ebɛ shishinumɔ lɛ kɛ toiŋjɔlɛ ni yɔɔ eshĩa mli lɛ woɔ oshara mli kɛkɛ, shi efiteɔ wekukpaa ni kã ekɛ Nyɔŋmɔ teŋ lɛ. (1 Petro 3:7) Ni ŋamɛi hu? Esa akɛ amɛ hu ‘amɛba amɛhe shi amɛha amɛwumɛi tamɔ bɔ ni amɛfeɔ amɛhaa Nuntsɔ lɛ.’ (Efesobii 5:22) Kɛ ŋa lɛ susu bɔ ni eeefee esa Nyɔŋmɔ hiɛ lɛ he lɛ, ebaanyɛ eye ebua lɛ ni eku ehiɛ eshwie ewu lɛ fãtɔɔi anɔ, koni eba ehe shi eha lɛ ni mlifu bɛ mli. Ekolɛ ŋa lɛ baanu he yɛ bei komɛi amli akɛ etsɔ̃ɔ ejwɛŋmɔ. Abɛi 31:26 wieɔ yoo kpakpa lɛ he akɛ: “Egbeleɔ edaaŋ yɛ nilee mli, ni mlihilɛ mla kã elilɛi nɔ.” Akɛni ekɛ ewu yeɔ yɛ mlihilɛ kɛ bulɛ mli hewɔ lɛ, ehaa toiŋjɔlɛ hiɔ ekɛ Nyɔŋmɔ teŋ, ni ehaa miishɛɛ faa yɛ weku muu lɛ fɛɛ mli.—Abɛi 14:1.

 5. Mɛni hewɔ esa akɛ gbekɛbii anyiɛ Biblia mli ŋaawoo ni kɔɔ bɔ ni amɛkɛ amɛ fɔlɔi yeɔ haa lɛ he lɛ sɛɛ?

⁵ Gbekɛbii, te nyɛkɛ nyɛfɔlɔi yeɔ haa tɛŋŋ? Ani nyɛkɛ wiemɔ sha ni bulɛ bɛ mli ni je lɛ fɔɔ nɔkpɛlɛmɔ lɛ tsuɔ nii? Aloo nyɛmiibo Biblia famɔ akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuntsɔ lɛ mli; ejaakɛ enɛ ja. ‘Wo otsɛ kɛ onyɛ,’ no ji klɛŋklɛŋ kita ni hiɛ shiwoo akɛ: ‘koni ahi ahao ni otsɛ yɛ shikpɔŋ lɛ nɔ’ ” lɛ toi?—Efesobii 6:1-3.

 6. Te wɔɔfee tɛŋŋ wɔtao wɔkɛ wɔnanemɛi jálɔi ateŋ toiŋjɔlɛ?

⁶ Wɔjieɔ “jwɛŋmɔŋ hiɛshikãmɔ” hu kpo kɛ ‘wɔtao toiŋjɔlɛ ni’ wɔkɛ wɔnanemɛi heyelilɔi ‘nyiɛ no sɛɛ.’ (1 Petro 3:11) Gbeekpamɔi ni baaa kɛ shishinumɔi ni anaaa teɔ shi yɛ be kɛ bei amli. (Yakobo 3:2) Kɛ aŋmɛ gbɛ ni béi tee nɔ lɛ, ekɛ asafo muu lɛ fɛɛ toiŋjɔlɛ baawo oshara mli. (Galatabii 5:15) No hewɔ lɛ, nyɛsaa béi oya; nyɛtaoa tsabaai ni kɛ toiŋjɔlɛ baaba.—Mateo 5:23-25; Efesobii 4:26; Kolosebii 3:13, 14.

“Jwɛŋmɔŋ Hiɛshikãmɔ” kɛ Weku Mli Gbɛnaa Nii

 7. (a) Te Paulo wo “jwɛŋmɔŋ hiɛshikãmɔ” ni aaajie lɛ kpo yɛ shihilɛ mli saji ahe lɛ he hewalɛ eha tɛŋŋ? (b) Mɛɛ su esa akɛ wumɛi kɛ ŋamɛi Kristofoi aná yɛ shĩa lɛ mli gbɛnaa nii ahe?

⁷ Bɔfo Paulo wo Kristofoi aŋaa akɛ, amɛkɛ “jwɛŋmɔ kpakpa . . . ahi shi.” (Tito 2:12) Eyɛ miishɛɛ akɛ ooona akɛ nɔ ni Paulo ŋma lɛ woɔ yei aŋaa ni “amɛsumɔ amɛwumɛi, amɛsumɔ amɛbii, amɛhiɛ akã shi, amɛhe atse, amɛbaa amɛwe yi jogbaŋŋ.” (Tito 2:4, 5) Paulo ŋma enɛ yɛ Ŋ.B. afii 61-64 lɛ amli, afii fioo dani Yudafoi anibii agbɛjianɔtoo lɛ ba naagbee. Ni kɛlɛ, shihilɛ mli saji, tamɔ shĩa nitsumɔ he miihia lolo. No hewɔ lɛ, esa akɛ wumɛi kɛ ŋamɛi fɛɛ aná amɛ shĩa shihilɛi mli gbɛnaa nii ahe jwɛŋmɔ kpakpa, bɔni afee ni “akawie Nyɔŋmɔ wiemɔ lɛ he musubɔɔ wiemɔ.” Weku yitso ko kpa saralɔ ko fai yɛ bɔ ni eshĩa lɛ mli shihilɛ lɛ woɔ mɔ hiɛgbele lɛ hewɔ. Etsɔɔ mli akɛ asako mli “ejaakɛ ekɛ ehe ewo gbɛgbamɔ mli.” Kɛ wɔkɛ nibii shã afɔle yɛ Maŋtsɛyeli lɛ hewɔ lɛ, esa yijiemɔ, shi esa akɛ wɔkwɛ jogbaŋŋ koni wɔkɛ nibii ni baahi aha wɔ wekui lɛ akashã afɔle.

 8. Te weku yitsei aaafee tɛŋŋ ni amɛkwɛ amɛ wekui ahiamɔ nii anɔ yɛ gbɛ ni ŋmɛɔ pɛpɛɛpɛ nɔ?

⁸ Biblia lɛ woɔ tsɛmɛi ahewalɛ ni amɛha amɛ wekui aba klɛŋklɛŋ, ni ekɛɛ akɛ mɔ ni kwɛɛɛ eweku lɛ, “ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Timoteo 5:8) Shihilɛ mli taomɔ nii yɛ sɔrɔto yɛ jeŋ fɛɛ, ni ehi akɛ wɔkɛ hiɛshikamɔ aaakpa heloonaa nibii agbɛ. Mɔ ni ŋma Abɛi 30:8 lɛ sɔle akɛ: “Kaaha miye ohia lɛ, asaŋ kaaha mina nii.” Shi kɛlɛ, esaaa akɛ fɔlɔi kuɔ amɛhiɛ amɛshwieɔ amɛbii lɛ aheloonaa hiamɔ nii anɔ. Akɛ nɔkwɛmɔnɔ lɛ, ani ebaafee nɔ ni nilee yɔɔ mli, kɛ mɔ ko je gbɛ eshi eweku, ni amɛbɛ shihilɛ mli hiamɔ nii, koni eyadi teokrase hegbɛi asɛɛ? Ani enɛ haŋ mɔ lɛ bii amli awo la? Yɛ gbɛ kroko nɔ lɛ, Abɛi 24:27 kɛɔ akɛ: “Saamɔ onitsumɔ yɛ agbo naa, ni ofee lɛ klalo oha ohe yɛ ŋmɔshi; no sɛɛ dani oma otsũ.” Hɛɛ, yɛ be mli ni heloonaa nibii ahesusumɔ yɔɔ egbɛhe lɛ, ‘mɔ ko weku lɛ tswaa’—yɛ mumɔŋ kɛ henumɔŋ—he hiaa.

 9. Mɛni hewɔ nilee yɔɔ mli akɛ weku yitsei aaasusu gbele loo hela ni aaanyɛ aba amɛnɔ lɛ he lɛ?

⁹ Ani oto gbɛjianɔ ni okɛbaakwɛ oweku lɛ kɛ́ aleenɔ̃ ogbo trukaa? Abɛi 13:22 kɛɔ akɛ: “Gbɔmɔ kpakpa shiɔ gboshinii ehaa ebii abii.” Kɛfata gboshinii ni ji Yehowa he nilee, kɛ akɛ lɛ teŋ wekukpaa kpakpa lɛ he lɛ, fɔlɔi baasumɔ ni amɛshi heloo gbɛfaŋ nibii amɛha amɛbii. Yɛ shikpɔji pii anɔ lɛ, weku yitsei kpakpai baabɔ mɔdɛŋ ni amɛkɛ shika ko ato, mla naa shamansheo, kɛ inshuɔrans ko. Ejaakɛ Nyɔŋmɔ webii yeee amɛhe kɛjɛɛɛ “be kɛ nibii ni aleee ni baa trukaa” lɛ mli. (Jajelɔ 9:11, NW) Shika yɛ “kɛha hebuu,” ni gbɛjianɔ ni atoɔ jogbaŋŋ baanyɛ atsi fimɔ naa. (Jajelɔ 7:12, NW) Yɛ shikpɔji ni nɔyeli lɛ wooo helatsamɔ he nyɔmɔ lɛ, mɛi komɛi baahala akɛ amɛkɛ shika ko aaato kɛha gbɔmɔtsoŋ hewalɛnamɔ he hiamɔ nii, aloo amɛto gbɛjianɔ ko ni baaha amɛnyɛ amɛwo hewalɛnamɔ he nyɔmɔ.a

10. Mɛɛ gbɛ nɔ fɔlɔi Kristofoi aaatsɔ ni ‘amɛto nɔ ko’ kɛha amɛbii?

¹⁰ Ŋmalɛi lɛ kɛɔ hu akɛ: “Esaaa akɛ bii tiaa nii toɔ amɛ fɔlɔi, shi moŋ fɔlɔi ni tiaa nii toɔ amɛbii.” (2 Korintobii 12:14) Yɛ je lɛŋ lɛ, efɔɔ kaa akɛ fɔlɔi aaatia shika naa amɛto amɛha amɛbii awɔsɛɛ be mli wolo-kasemɔ kɛ gbalashihilɛ bɔni afee ni amɛha amɛna shishijee kpakpa yɛ shihilɛ mli. Ani ósusu nibii anaa ni ooobua oto kɛha obi lɛ mumɔŋ shihilɛ yɛ wɔsɛɛ be lɛ he? Akɛ nɔkwɛmɔnɔ lɛ, ŋɔɔ lɛ akɛ obi ko ni eda kɛ ehe ewo be-fɛɛ sɔɔmɔ lɛ mli. Yɛ be mli ni esaaa akɛ be-fɛɛ sɔɔlɔi biɔ loo amɛkpaa yelikɛbuamɔ gbɛ kɛjɛɔ he kroko lɛ, fɔlɔi ni yɔɔ suɔmɔ lɛ baasumɔ ni ‘amɛkɛ lɛ aja nii yɛ ehiamɔ lɛ naa,’ bɔni afee ni amɛkɛye amɛbua lɛ ni ehi be-fɛɛ sɔɔmɔ lɛ mli.—Romabii 12:13; 1 Samuel 2:18, 19; Filipibii 4:14-18.

11. Ani jwɛŋmɔ ni ja ni aaana yɛ shika he lɛ tsɔɔ hemɔkɛyeli ni abɛ? Tsɔɔmɔ mli.

¹¹ Shika he jwɛŋmɔ ni ja ni mɔ ko yɔɔ lɛ etsɔɔɔ hemɔkɛyeli ni abɛ ákɛ Satan yiwalɛ gbɛjianɔtoo lɛ naagbee ebɛŋkɛ. Etsɔɔ ‘nilee ni akɛtsuɔ nii’ kɛ kojomɔ kpakpa kɛkɛ. (Abɛi 2:7; 3:21) Yesu kɛɛ be ko akɛ “je nɛŋ bii lɛ le amɛnɔ̃ lɛ mli ŋaa fe la bii lɛ,” yɛ shika ni amɛkɛtsuɔ nii lɛ mli. (Luka 16:8) Belɛ ebɛ naakpɛɛ mɔ akɛ, mɛi komɛi ena bɔ ni ehe hiaa ni amɛfee tsakemɔi yɛ bɔ ni amɛkɛ amɛ nibii ni amɛyɔɔ tsuɔ nii amɛhaa lɛ mli, koni amɛkwɛ amɛ wekui lɛ ahiamɔ nii anɔ jogbaŋŋ.

“Jwɛŋmɔŋ Hiɛshikãmɔ” yɛ Bɔ ni Wɔkwɛɔ Wolo-Kasemɔ Wɔhaa lɛ Mli

12. Mɛɛ gbɛ Yesu tsɔ nɔ etsɔɔ ekaselɔi lɛ anii koni amɛnyɛ amɛhi shihilɛi heei amli?

¹² “Je nɛŋ su lɛ miitsake,” ni shika helɛtemɔi amli saji atsakemɔ kɛ tsɔnei ahe nilee heei miiya nɔ oyayaayai. (1 Korintobii 7:31) Shi kɛlɛ, Yesu tsɔɔ ekaselɔi lɛ ni amɛkɛ amɛhe awo shihilɛi fɛɛ mli. Ekɛɛ amɛ, beni etsu amɛ kɛtee amɛ klɛŋklɛŋ shiɛmɔ he tafaa lɛ mli lɛ akɛ: “Nyɛkataoa shika loo jwiɛtɛi loo akɔɔble nyɛwoa nyɛ hɛfiinii amli; asaŋ nyɛkataoa gbɛfaa kotoku, loo flakai enyɔ, loo tokotai, loo tso tete; shi nitsulɔ lɛ eŋmãa sa lɛ.” (Mateo 10:9, 10) Shi yɛ sɛɛ mli be kroko lɛ, Yesu kɛɛ: “Mɔ ni yɔɔ fotro lɛ, ha ni ekɔ, nakai nɔŋŋ mɔ ni yɔɔ kotoku hu.” (Luka 22:36) Mɛni etsake? Shihilɛi lɛ. Jamɔ mli shihilɛ lɛ efee nɔ ni hetsɛ̃ yɔɔ mli waa, ni esa akɛ amɛto gbɛjianɔ amɛha amɛhe agbɛnɛ.

13. Mɛni ji yiŋtoo titri ni yɔɔ wolo-kasemɔ sɛɛ, ni mɛɛ gbɛ nɔ fɔlɔi baanyɛ aye abua amɛbii yɛ enɛ mli?

¹³ Nakai nɔŋŋ ŋmɛnɛ, ehe baahia ni fɔlɔi asusu bɔ ni shika helɛtemɔ mli saji ji ŋmɛnɛ lɛ he. Akɛ nɔkwɛmɔnɔ lɛ, ani ookwɛ akɛ obii lɛ anine miishɛ skul nikasemɔ ni sa nɔ? Yiŋtoo titri ni yɔɔ wolo-kasemɔ sɛɛ ji ni ewula gbekɛ lɛ koni enyɛ efee Yehowa sɔɔlɔ ni he esa kɛmɔ shi. Ni wolo-kasemɔ ni he hiaa fe fɛɛ ji mumɔŋ nikasemɔ. (Yesaia 54:13) Fɔlɔi hu susuɔ nyɛmɔ ni amɛbii lɛ yɔɔ ni amɛkɛaaye amɛbua amɛ diɛŋtsɛ amɛhe yɛ shika gbɛfaŋ lɛ he. No hewɔ lɛ okɛ gbɛtsɔɔmɔ aha obii lɛ, ye obua amɛ ni amɛhala skul nikasemɔi ni sa, ni okɛ amɛ asusu nilee ni yɔɔ wolo-kasemɔ kroko ni amɛaana amɛfata he loo nilee ni bɛ mli lɛ he. Yiŋkpɛi ni tamɔ nɛkɛ lɛ ji weku lɛ gbɛnaa nii, ni esaaa akɛ mɛi krokomɛi wieɔ shiɔ gbɛ ni amɛkɔ lɛ. (Abɛi 22:6) Ni mɛi ni ehala akɛ amɛaatsɔɔ amɛbii wolo-kasemɔ yɛ shĩa lɛ hu?b Yɛ be mli ni mɛi pii etsu nitsumɔ ni sa yijiemɔ lɛ, mɛi komɛi ena akɛ nitsumɔ lɛ wa fe bɔ ni amɛsusu, ni amɛbii lɛ ena nɔ̃. No hewɔ lɛ, kɛ oosusu nikasemɔ yɛ shĩa lɛ he lɛ, bɔɔ mɔdɛŋ ni osusu nɔ ni ebaahe bo lɛ he, jee gbɛ oŋmɛ sane lɛ okwɛ jogbaŋŋ akɛ ani oyɛ hesaai kɛ he-tsɔsemɔ ni he hiaa ni okɛaagbe naa lo.—Luka 14:28.

‘Kaatao Nibii Wuji’

14, 15. (a) Te fee tɛŋŋ ni Baruk laaje pɛpɛɛpɛ ni eŋmɛɔ yɛ mumɔŋ lɛ? (b) Mɛni hewɔ jwɛŋmɔ bɛ mli akɛ ‘eeetao nii wuji’ lɛ?

¹⁴ Akɛni nibii agbɛjianɔtoo nɛɛ naagbee lɛ bako hewɔ lɛ, mɛi komɛi baasumɔ ni amɛtao nɔ ni je lɛ yɔɔ ni ekɛaaha lɛ—nitsumɔi ni ehe gbɛi, nitsumɔi ni kɛ sɛɛnamɔi pii baa, kɛ ninámɔ. Susumɔ Yeremia woloŋmalɔ, Baruk he okwɛ. Ewo yara akɛ: “Miiha mihe kpoo, ejaakɛ Yehowa eŋɔ awerɛho efata minɔ̃naa lɛ he! Etɔ mi kɛ ntsɔidɔɔmɔ, ni minaaa hejɔɔmɔ.” (Yeremia 45:3) Etɔ Baruk. Nitsumɔ ni etsu akɛ Yeremia woloŋmalɔ lɛ wa, ni ekɛ nɔnyɛɛ baa. (Yeremia 36:14-26) Ni anaaa nɔnyɛɛ lɛ naagbee. Ebaahe afii 18 dani akpata Yerusalem hiɛ.

¹⁵ Yehowa kɛɛ Baruk akɛ: “Naa, nɔ ni mima lɛ, mi nɔŋŋ mikumɔɔ nɛɛ, ni nɔ ni mitɛo lɛ, mi nɔŋŋ mifamɔɔ nɛɛ, ni nakai ji shikpɔŋ muu lɛ fɛɛ. Ni bo lɛ nii wuji otaoɔ oha ohe? Kaatao!” Baruk eŋmɛɛɛ pɛpɛɛpɛ yɛ henumɔŋ dɔŋŋ. Eje shishi ni ‘eetao nibii wuji eha ehe,’ ekolɛ ninámɔ, gbɛi hemɔ, loo heloonaa nibii ni aaaha efee shweshweeshwe. Akɛni Yehowa “miifamɔ . . . shikpɔŋ muu lɛ fɛɛ” hewɔ lɛ, mɛɛ jwɛŋmɔ yɔɔ nibii nɛɛ ataomɔ mli? No hewɔ lɛ, Yehowa kɛ nɛkɛ kaimɔ ni mli kã shi nɛɛ ha Baruk: “Ejaakɛ naa, mikɛ efɔŋ aaaba heloo fiaa nɔ, . . . shi maŋɔ osusuma mahao akɛ haa nɔ̃ yɛ he fɛɛ he ni oootsɔ̃.” Heloonaa ninamɔ ejeŋ Yerusalem hiɛkpatamɔ lɛ mli! Yehowa ma ‘esusuma ni ekɛaaha lɛ akɛ haa nɔ̃’ lɛ pɛ nɔ mi.—Yeremia 45:4, 5.

16. Mɛni Yehowa webii baanyɛ akase kɛjɛ Baruk niiashikpamɔ lɛ mli?

¹⁶ Ehe miihia ni Yehowa ajaje Baruk, ni Yehowa ye eshiwoo lɛ anɔkwale, Baruk je mli shweshweeshwe. (Yeremia 43:6, 7) Mɛɛ nikasemɔ ni hewalɛ yɔɔ mli eji kɛha Yehowa webii ni yɔɔ ŋmɛnɛ lɛ nɛkɛ! Jeee be ni ‘wɔkɛtaoɔ nibii wuji wɔhaa wɔ diɛŋtsɛ wɔhe’ lɛ nɛ. Mɛni hewɔ? Ejaakɛ “je lɛ miiho aya ni nakai ji emli sɛɛdii nii lɛ.”—1 Yohane 2:17, NW.

Be ni Eshwɛ lɛ He Nitsumɔ yɛ Gbɛ ni Hi Jogbaŋŋ Nɔ

17, 18. (a) Te Yona fee enii eha tɛŋŋ beni Ninivebii lɛ tsake amɛtsui lɛ? (b) Mɛɛ nikasemɔ Yehowa tsɔ enɛ nɔ etsɔɔ Yona?

¹⁷ Belɛ mɛɛ gbɛ nɔ wɔɔtsɔ ni wɔkɛ be ni eshwɛ lɛ atsu nii yɛ gbɛ ni hi jogbaŋŋ nɔ? Kasemɔ nii kɛjɛ gbalɔ Yona niiashikpamɔ lɛ mli. Kɛkɛ “ni eyiŋ etee Ninive . . . , ni eshiɛ ni ekɛɛ: Biɛ gbii nyɔŋmai ejwɛ sɛɛ lɛ abaabutu Ninive.” Yona naa kpɛ ehe, ejaakɛ Ninivebii lɛ bo eshɛɛ sane lɛ toi ni amɛtsake amɛtsui! Yehowa kpataaa maŋtiase lɛ hiɛ. Te Yona fee enii yɛ he eha tɛŋŋ? “Yehowa, ŋɔɔ misusuma kɛjɛ mimli; ejaakɛ faŋ nɔ ni migbo moŋ fe nɔ ni mihiɛ kã nɛɛ.”—Yona 3:3, 4; 4:3.

¹⁸ Kɛkɛ ni Yehowa ha Yona kase nɔ ko ni he hiaa waa. Esaa “adedeŋkruma ko, ni ekwɛ̃ eha Yona yiteŋ, koni eyiteŋ ana hɔɔŋ . . . Kɛkɛ ni Yona nya adedeŋkruma lɛ he naakpa.” Shi Yona miishɛɛ lɛ sɛɛ etsɛɛɛ, ejaakɛ etsɛɛɛ ni tso lɛ ŋãlã. Yona ‘mli wo la’ yɛ hulu ni shãa lɛ lɛ hewɔ. Kɛkɛ ni Yehowa ma E-sane titri lɛ nɔ mi, akɛ: “Bo lɛ, adedeŋkruma nɛɛ ni ogboko he deŋme ko . . . [lɛ] esane miidɔo; ni mi lɛ, Ninive maŋ kpeteŋkpele nɛɛ, ni gbɔmɛi fe akpei oha kɛ nyɔŋmai enyɔ ni leee amɛninejurɔ kɛ amɛbɛku, kɛ kooloi babaoo hu yɔɔ mli lɛ sane akadɔ mi, bɛ?”—Yona 4:6, 7, 9-11.

19. Mɛɛ mɔ pɛ hesusumɔ jwɛŋmɔ wɔbaasumɔ ni wɔkwa?

¹⁹ Kwɛ bɔ ni Yona susumɔ lɛ tsɔɔ ekome ehe susumɔ! Tso sane baanyɛ adɔ lɛ, shi emusuŋ etsɔɔɔ lɛ bibioo po yɛ Ninivebii lɛ ahe—gbɔmɛi, ni kɛ wɔɔwie yɛ mumɔŋ lɛ, ‘amɛleee sɔrɔtofeemɔ ni kã amɛninejurɔ kɛ abɛku teŋ.’ Wɔ hu wɔbaashwe yiwalɛ jeŋ nɛɛ hiɛkpatamɔ, ni wɔsane ja hu! (2 Tesalonikabii 1:8) Shi, yɛ be mli ni wɔmɛɔ lɛ, wɔyɛ gbɛnaa nii akɛ wɔye wɔbua mɛi ni yɔɔ tsuijurɔ lɛ, ní kɛ wɔɔwie yɛ mumɔŋ lɛ, ‘amɛleee sɔrɔtofeemɔ ni kã amɛninejurɔ kɛ abɛku teŋ’ lɛ. (Mateo 9:36; Romabii 10:13-15) Ani okɛ be fioo ni eshwɛ lɛ baatsu nii ni okɛye obua gbɔmɛi pii bɔ ni ooonyɛ koni amɛnine ashɛ Yehowa he nilee ni jara wa waa lɛ nɔ? Mɛɛ nitsumɔ yɔɔ ni kɛ miishɛɛ ni wɔnaa kɛjɛɔ mɔ ko ni wɔyeɔ wɔbuaa lɛ koni ena wala lɛ mli lɛ yeɔ egbɔ?

Yaa nɔ Ohi Shi kɛ “Jwɛŋmɔŋ Hiɛshikãmɔ”

20, 21. (a) Mɛni ji gbɛi komɛi ni wɔbaanyɛ wɔtsɔ nɔ wɔjie “jwɛŋmɔŋ hiɛshikãmɔ” kpo yɛ gbii ni jwere wɔhiɛ lɛ amli? (b) Mɛɛ jɔɔmɔi baajɛ “jwɛŋmɔŋ hiɛshikãmɔ” ni wɔkɛhiɔ shi lɛ mli aba?

²⁰ Beni Satan gbɛjianɔtoo lɛ shigbeemɔ kɛmiiya hiɛkpatamɔ mli lɛ yaa nɔ nɛɛ, kaai heei baajie amɛhiɛ kpo kɛ̃. Timoteo Wolo ni Ji Enyɔ 3:13 gbaa akɛ: “Shi gbɔmɛi fɔji kɛ shishiulɔi aaawo wu yɛ efɔŋ mli.” Shi “ekaje nyɛtsine ni nyɛsusumai lɛ anijiaŋ miije wui.” (Hebribii 12:3) Okɛ ohe akpasa Yehowa kɛha hewalɛwoo. (Filipibii 4:13) Kasemɔ tswãafeemɔ, ni odamɔ shihilɛ mli nibii ni fiteɔ kɛyaa hiɛ lɛ anaa, fe ni oosusu tsutsu bei lɛ ahe. (Jajelɔ 7:10) Okɛ nilee atsu nii, ni onyiɛ gbɛtsɔɔmɔ ni “tsulɔ anɔkwafo kɛ nilelɔ” lɛ kɛhaa lɛ sɛɛ.—Mateo 24:45-47.

²¹ Wɔleee bei ni eshwɛ lɛ fálɛ. Ni kɛlɛ, wɔbaanyɛ ni wɔkɛ hekɛnɔfɔɔ awie akɛ, “nibii fɛɛ anaagbee ebɛŋkɛ.” Dani nakai naagbee lɛ aaaba lɛ, nyɛhaa wɔkɛ “jwɛŋmɔŋ hiɛshikãmɔ” ahia shi yɛ bɔ ni wɔkɛ wɔhe yeɔ haa lɛ mli, yɛ bɔ ni wɔkwɛɔ wɔ wekui wɔhaa lɛ mli, ni agbɛnɛ yɛ gbɛnaa nii ni jwere wɔnɔ yɛ je lɛŋ lɛ mli. Kɛtsɔ nakai feemɔ nɔ lɛ, wɔ fɛɛ wɔbaanyɛ wɔna hekɛnɔfɔ̃ɔ akɛ abaana wɔ yɛ naagbee lɛ akɛ ‘muji loo kpa ko bɛ wɔhe . . . yɛ hejɔlɛ mli,’ ejaakɛ wɔkɛ “jwɛŋmɔŋ hiɛshikamɔ” ehi shi!—2 Petro 3:14.

[Shishigbɛ niŋmai]

Saji Otii Kɛha Emlitii

◻ Te wɔɔfee tɛŋŋ wɔjie “jwɛŋmɔŋ hiɛshikamɔ” kpo yɛ bɔ ni wɔkɛ gbɔmɛi yeɔ haa lɛ mli?

◻ Te wɔɔfee tɛŋŋ wɔŋmɛ pɛpɛɛpɛ yɛ wɔ weku mli gbɛnaa nii ahe nitsumɔ mli?

◻ Mɛni hewɔ esa akɛ fɔlɔi anya amɛbii awolo-kasemɔ he lɛ?

◻ Mɛni wɔkaseɔ kɛjɛɔ Baruk kɛ Yona sane lɛ mli?

[Mfoniri ni yɔɔ baafa 18]

Kɛ wu kɛ ŋa kɛ amɛhe ye yɛ gbɛ ni ejaaa nɔ lɛ, amɛfiteɔ wekukpaa ni kã amɛkɛ Yehowa teŋ lɛ

[Mfoniri ni yɔɔ baafa 20]

Esa akɛ fɔlɔi anya amɛbii lɛ awolo-kasemɔ he