Feemɔ Mɔ ni Sumɔɔ Nɔyaa—Yaa Hiɛ

BENI okɛ Biblia mli shishitoo mlai bɔi nitsumɔ klɛŋklɛŋ kwraa lɛ, bɔ ni osusuɔ nii ahe, owiemɔi, kɛ nifeemɔi ni ehe shi waa lɛ bɔi tsakemɔ fiofio. Enɛɛmɛi ateŋ babaoo tsake dani okɛ ohe wo Teokrase Sɔɔmɔ Skul lɛ mli. Amrɔ nɛɛ, eka shi faŋŋ akɛ otee hiɛ saŋŋ kɛshɛ he ni ojɔɔ owala nɔ oha Yehowa. Ani no tsɔɔ akɛ obaanyɛ okpa hiɛ ní oooya lɛ? Dabi kwraa. Obaptisimɔ lɛ ji shishijee nii kɛkɛ.

Beni Paulo kɛɛ kaselɔ Timoteo ni ‘ebɔ’ ŋaawoo ni ekɛha lɛ kɛ sɔɔmɔ hegbɛi ni atuu awo edɛŋ lɛ ‘he mɔdɛŋ’—ni ‘ekɛ ehe awo’ nibii nɛɛ amli kwraa—bɔni afee ni ‘mɛi fɛɛ ana eshweremɔ lɛ faŋŋ’ lɛ, no mli lɛ eesɔmɔ akɛ Kristofonyo onukpa momo. (1 Tim. 4:12-15) Kɛji kpaako oje anɔkwale gbɛ lɛ nɔ nyiɛmɔ shishi loo oná niiashikpamɔ babaoo yɛ Kristofoi ashihilɛ mli jio lɛ, esa akɛ oná hiɛyaa ni oooná lɛ he miishɛɛ.

Wɔkaneɔ yɛ Efesobii 3:14-19 lɛ akɛ, bɔfo Paulo sɔle koni enanemɛi heyelilɔi lɛ “ayoo” anɔkwale lɛ “lɛɛmɔ kɛ kɛlɛ kɛ mlikwɔlɛ kɛ nɔkwɔlɛ lɛ.” Kɛha enɛ feemɔ lɛ, Yesu kɛ gbɔmɛi ateŋ nikeenii ha koni amɛtsɔɔ nii, ní amɛtsake mɛi, ni akɛtswa asafo lɛ ama shi. Jwɛŋmɔ ní wɔɔjwɛŋ Nyɔŋmɔ Wiemɔ ni jɛ mumɔŋ lɛ nɔ daa, kɛ gbɛtsɔɔmɔ ni jɛ tsɔɔlɔi ni he esa aŋɔɔ lɛ baanyɛ aye abua wɔ ni ‘wɔdara’ yɛ mumɔŋ.—Efe. 4:11-15.

Nɔ ni fata nakai dalɛ lɛ he ji ni ‘wɔɔtsɔmɔ mɛi heei yɛ wɔjwɛŋmɔ mumɔ lɛ naa.’ Enɛ biɔ ni wɔná jwɛŋmɔŋ henumɔ ni mli wa ni kɛ Nyɔŋmɔ kɛ Kristo nɔ lɛ kpãa gbee. Ebiɔ ni wɔná amɛjwɛŋmɔ lɛ eko be fɛɛ be, bɔni afee ni ‘wɔwo gbɔmɔ hee lɛ.’ (Efe. 4:23, 24) Kɛ́ okase Sanekpakpai lɛ, ani obuɔ enɛɛmɛi akɛ Kristo shihilɛ mli amaniɛbɔɔ nɔkwɛmɔnɔ ni sa akɛ onyiɛ sɛɛ? Ani otaoɔ ni oná sui pɔtɛɛ komɛi ni Yesu jie lɛ kpo lɛ, ni no sɛɛ lɛ obɔɔ mɔdɛŋ fɛɛ ni ooonyɛ ni okase enɛɛmɛi yɛ bo diɛŋtsɛ oshihilɛ mli?—1 Pet. 2:21.

Saji ni owieɔ he yɛ sanegbaa mli lɛ baanyɛ afee okadi ni tsɔɔ bɔ ni otee hiɛ oha. Mɛi ni ewo gbɔmɔ hee lɛ kɛ amɛhe wooo kutumpɔo wiemɔi, jɛmɔ, nyaŋemɔ nifeemɔi, loo heguɔgbee wiemɔi amli. Yɛ no najiaŋ lɛ, amɛwiemɔ ‘hi ni etswaa mɔ emaa shi ni akɛduroɔ mɛi ni nuɔ lɛ.’ (Efe. 4:25, 26, 29, 31; 5:3, 4; Yuda 16) Amɛwiemɔi yɛ teemɔŋ kɛ amɛwiemɔi yɛ asafoŋ kpeei ashishi fɛɛ tsɔɔ akɛ anɔkwale lɛ miitsake amɛshihilɛi.

Kɛ́ ‘tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosooo bo, ni ekpalaaa bo kɛyaaa kɛbaaa’ dɔŋŋ lɛ, no lɛ, no hu ji hiɛyaa he odaseyeli. (Efe. 4:14) Ákɛ nɔkwɛmɔnɔ lɛ, te ofeɔ onii ohaa tɛŋŋ kɛji je lɛ tsi bo ewo susumɔi, shishitoo mlai, loo hiɛtserɛjiemɔi heei amli lɛ? Ani ekaa bo ni otsiɔ be ni okɛtsuɔ mumɔŋ gbɛnaa nii ahe nii lɛ ofɔ̃ɔ afã bɔni afee ni otiu nakai nibii lɛ asɛɛ? Nakai ni ooofee lɛ baanyɛ atsĩ omumɔŋ nɔyaa naa. Kwɛ bɔ ni nilee yɔɔ mli waa akɛ wɔɔto be kɛha mumɔŋ nibii asɛɛtiumɔ!—Efe. 5:15, 16.

Bɔ ni okɛ mɛi krokomɛi yeɔ ohaa lɛ hu baanyɛ afee omumɔŋ hiɛyaa lɛ kadimɔ nii. Ani okase ‘musuŋtsɔlɛ, kɛ bɔ ni okɛ sane aaake’ onyɛmimɛi hii kɛ yei lɛ?—Efe. 4:32.

Esa akɛ bɔ ni oyaa hiɛ yɛ nibii ni ofeɔ yɛ Yehowa gbɛ nɔ lɛ gbɛfaŋ lɛ aje kpo yɛ asafo lɛ mli kɛ shia mli fɛɛ. Esa akɛ eje kpo hu yɛ skul, maŋ, kɛ onitsumɔhe. (Efe. 5:21–6:9) Kɛ́ ojieɔ sui ni Nyɔŋmɔ gbeyeishemɔ yɔɔ mli kpo jogbaŋŋ yɛ shihilɛi nɛɛ fɛɛ eko mli lɛ, no lɛ ohiɛyaa lɛ diɛŋtsɛ miije kpo faŋŋ.

Yehowa kɛ nyɛmɔi kɛ hesaai eha wɔteŋ mɔ fɛɛ mɔ. Eekpa gbɛ akɛ wɔkɛ enɛɛmɛi baatsu nii yɛ mɛi krokomɛi agbɛfaŋ bɔ ni ebaanyɛ etsɔ wɔnɔ ejie emlihilɛ lɛ kpo. Bɔfo Petro ŋma yɛ enɛ gbɛfaŋ akɛ: “Bɔ ni mɔ fɛɛ mɔ ená duromɔ keenii lɛ, nyɛkɛsɔmɔsɔmɔa nyɛhe, tamɔ Nyɔŋmɔ duromɔ nii . . . anɔkwɛlɔi kpakpai.” (1 Pet. 4:10) Te otsuɔ tsulɔ ni oji lɛ he nii ohaa tɛŋŋ?

Petro tsa nɔ akɛ: “Kɛ́ wiemɔ mɔ ko wieɔ lɛ, ewie akɛ Nyɔŋmɔ wiemɔi.” (1 Pet. 4:11) Kuku nɛɛ maa nɔ mi akɛ sɔ̃ kã wɔnɔ akɛ wɔwie ni ekɛ Nyɔŋmɔ Wiemɔ lɛ akpã gbee kɛmɔ shi, bɔni afee ni ewo Nyɔŋmɔ hiɛ nyam. Esa akɛ gbɛ ni atsɔɔ nɔ awieɔ wiemɔi nɛɛ hu awo Yehowa hiɛ nyam. Tsɔsemɔ ni akɛhaa kɛtsɔ Teokrase Sɔɔmɔ Skul lɛ nɔ lɛ baanyɛ aye abua bo ni okɛ onikeenii lɛ atsu nii yɛ nɛkɛ gbɛ nɔ—ni owo Nyɔŋmɔ hiɛ nyam kɛtsɔ gbɛ ni otsɔɔ nɔ oyeɔ obuaa mɛi krokomɛi lɛ nɔ. Akɛni no ji oti ni ma ohiɛ hewɔ lɛ, te esa akɛ oŋmɛ ohiɛyaa yɛ skul lɛ mli lɛ oha tɛŋŋ?

Yɛ nɔ najiaŋ ni ooosusu nii ahe yɛ saji otii abɔ ni otsu he nii yɛ owiemɔ he ŋaawoo wolo lɛ nɔ loo nifeemɔi srɔtoi ni akaha bo lɛ naa lɛ, susumɔ bɔ ni tsɔsemɔ lɛ eha Nyɔŋmɔ yijiemɔ afɔle ni oshãa lɛ etee hiɛ lɛ he. Skul lɛ sáa wɔ ni wɔhe saa jogbaŋŋ yɛ shiɛmɔ nitsumɔ lɛ mli. No hewɔ lɛ, bi ohe akɛ: ‘Ani misáa mihe diɛŋtsɛ yɛ nɔ ni miyaa ni miyakɛɛ yɛ shiɛmɔ nitsumɔ lɛ mli lɛ mli? Ani mikase bɔ ni ajieɔ anɔkwa miishɛɛ kpo yɛ mɛi ni miyeɔ amɛ odase lɛ he? Ani mitoɔ gbɛjianɔ kpakpa kɛha sɛɛsaramɔ feemɔi kɛtsɔ sanebimɔi ni mishiɔ mihaa gbɔmɛi lɛ koni wɔsusu he yɛ be kroko mli lɛ nɔ? Kɛ́ mikɛ mɔ ko miikase Biblia lɛ, ani miibɔ mɔdɛŋ koni mihe asa ákɛ tsɔɔlɔ ni shɛɔ tsui he?’

Kaadamɔ sɔɔmɔ hegbɛi ni akɛhaa bo lɛ pɛ nɔ obu hiɛyaa ni oná. Anaa ohiɛyaa lɛ yɛ nɔ ni okɛfeɔ lɛ mli, shi jeee yɛ nifeemɔ ni akɛha bo lɛ mli. Kɛ́ aha bo nifeemɔ ni biɔ nitsɔɔmɔ lɛ, bi ohe akɛ: ‘Ani mikɛ nitsɔɔmɔ he ŋaa tsuɔ nii lɛɛlɛŋ? Ani mitsu sane lɛ he nii bɔ ni ená mɛi ni nu lɛ ashihilɛi anɔ hewalɛ?’

Ŋaa ni awoɔ bo koni okɛ onikeenii lɛ atsu nii lɛ tsɔɔ akɛ bo okɛ hegbɛ lɛ baatsu nii. Ani bo klɛŋklɛŋ oŋɔɔ hegbɛ lɛ ni okɛ mɛi krokomɛi tsuɔ nii yɛ shiɛmɔ nitsumɔ lɛ mli? Ani otaoɔ hegbɛi ni oooná ni okɛye obua osafo lɛ mli bii heei, mɛi ni darako, loo mɛi ni bɛ gbɔmɔtsoŋ hewalɛ lɛ? Ani okɛ ohe haa koni osaa Maŋtsɛyeli Asa lɛ nɔ loo oyeɔ obuaa yɛ gbɛ̀i srɔtoi anɔ yɛ kpeei wuji kɛ kpeei bibii ashishi? Ani obaanyɛ okɛ ohe aha yɛ be kɛ bei amli ákɛ gbɛgbalɔi awalɔ? Ani onyɛɔ osɔmɔɔ akɛ daa gbɛgbalɔ loo oyeɔ obuaa asafo ko yɛ he ni hiamɔ lɛ da yɛ? Kɛ́ oji nyɛmi nuu lɛ, ani ooya hiɛ koni oshɛ Ŋmalɛ naa taomɔ nii kɛha asafoŋ sɔɔlɔi kɛ onukpai agbɛhe lɛ he? Osuɔmɔ mli ni ooojɛ ní okɛ yelikɛbuamɔ aha ni okpɛlɛ gbɛnaa nii anɔ lɛ ji hiɛyaa he okadi.—Lala 110:3.

Kɛ́ onuɔ he akɛ onyɛɛɛ babaoo otsu yɛ niiashikpamɔ ni obɛ tsɔ yɛ Kristofoi ashihilɛ mli lɛ hewɔ lɛ, no lɛ ná tsui. Nyɔŋmɔ Wiemɔ lɛ nyɛɔ “ehaa kwashiai leɔ nii.” (Lala 19:7; 119:130; Abɛi 1:1-4) Biblia mli ŋaawoo ni wɔkɛtsuɔ nii lɛ haa wɔnáa Yehowa he nilee ni yeɔ emuu, ní jara wa fe tsɔsemɔ fɛɛ ni anáa kɛtsɔɔ niiashikpamɔ pɛ nɔ lɛ he sɛɛ. Ni kɛlɛ, yɛ be mli ni wɔyaa hiɛ yɛ sɔɔmɔ ní wɔkɛhaa Yehowa lɛ mli lɛ, wɔnáa niiashikpamɔ ni jara wa waa. Te wɔɔfee tɛŋŋ wɔkɛtsu nii jogbaŋŋ?

Yɛ saji srɔtoi ní wɔkɛkpe yɛ wɔshihilɛ mli lɛ hewɔ lɛ, abaanyɛ aka wɔ ni wɔsusu akɛ: ‘Mikɛ shihilɛ nɛɛ ekpe pɛŋ. Mile nɔ ni esa akɛ mafee.’ Ani enɛ baanyɛ afee nilee gbɛ? Abɛi 3:7 bɔɔ kɔkɔ akɛ: “Kaabu ohe nilelɔ.” Esa akɛ niiashikpamɔ aha wɔsusu nii ahe kɛya shɔŋŋ diɛŋtsɛ beni wɔtsuɔ shihilɛ mli saji ahe nii lɛ. Shi kɛji wɔmiiná mumɔŋ hiɛyaa lɛ, no lɛ esa akɛ wɔ niiashikpamɔ lɛ hu aha ehi wɔjwɛŋmɔi kɛ wɔtsuii amli akɛ Yehowa jɔɔmɔi ahe miihia wɔ bɔni afee ni wɔye omanye. Kɛkɛ lɛ, abaana wɔshweremɔ lɛ faŋŋ kɛtsɔ klalo ni wɔfeɔ ni wɔyaa Yehowa ŋɔɔ kɛha gbɛtsɔɔmɔ yɛ wɔshihilɛi amli, shi jeee kɛtsɔ shihilɛi anaa ni wɔɔkpee kɛ hekɛnɔfɔɔ ni wɔyɔɔ yɛ wɔmli lɛ nɔ lɛ nɔ. Wɔ hekɛnɔfɔɔ lɛ jieɔ lɛ kpo akɛ nɔ ko nɔ ko nyɛŋ aba ní jeee lɛ eŋmɛ gbɛ, kɛ wɔhe ni wɔkɛaafɔ̃ enɔ kɛ suɔmɔ ni wɔɔná yɛ wɔkɛ wɔŋwɛi-Tsɛ lɛ teŋ lɛ nɔ.

Eyɛ mli akɛ bɔfo Paulo eda yɛ mumɔŋ, ni eji Kristofonyo ni afɔ lɛ mu moŋ, shi eyɔse akɛ ehe miihia ni ekã he ‘eya hiɛ’ ní enine ashɛ oti ni ma ehiɛ lɛ nɔ. (Fil. 3:13-16) Ani okɛ lɛ kpãa gbee yɛ jwɛŋmɔ ní ehiɛ nɛɛ he?

Nɛgbɛ otee hiɛ kɛyashɛ? Daamɔ bɔ ni owo gbɔmɔ hee lɛ kɛmɔ shi, kɛ bɔ ni oba ohe shi oha Yehowa maŋtsɛyeli lɛ kwraa, kɛ bɔ ni okɛ ekãa bɔɔ mɔdɛŋ koni okɛ onikeenii lɛ atsu nii ni okɛwo Yehowa hiɛ nyam lɛ nɔ osusu odalɛ lɛ. Yɛ be mli ni onáa Teokrase Sɔɔmɔ Skul tsɔsemɔ lɛ he sɛɛ lɛ, esa akɛ sui ni ama nɔ mi yɛ Nyɔŋmɔ Wiemɔ lɛ mli lɛ aje kpo fiofio yɛ bɔ ni owieɔ kɛ bɔ ni otsɔɔ nii ohaa lɛ mli. Yaa nɔ oha ohiɛyaa he nibii nɛɛ ahi ojwɛŋmɔ mli. Hɛɛ, nya he, ni oshweremɔ lɛ baafee faŋŋ amrɔ nɔŋŋ.