Jeŋba Kpakpa Mlihiɛmɔ yɛ Jeŋ ni Jeŋba Fɔŋ Eyi Mli Obɔ Mli

“Nyɛfea nyɛnii fɛɛ ni huhuuhuwiemɔi kɛ ŋwanejee akahi mli; koni nyɛhe akahi shwamɔ, ni nyɛfee mɛi krɔŋŋi, Nyɔŋmɔ bii ni he bɛ kpa ko yɛ yinɔ kɔdɔŋ ni bɛ eŋɛlɛ nɔ nɛɛ teŋ.”—FILIPIBII 2:14, 15.

1, 2. Mɛni hewɔ Nyɔŋmɔ fã ni abule Kanaanbii lɛ aseshi shishi lɛ?

YEHOWA fãmɔi lɛ shiii gbɛ ko kwraa kɛhaaa saji aheŋmɛɛmɔ koni akɛsaa. Israelbii lɛ miihe abote Shiwoo Shikpɔŋ lɛ nɔ beni gbalɔ Mose kɛɛ amɛ akɛ: “Feemɔ amɛ musu: Hitbii lɛ kɛ Amorbii lɛ kɛ Kanaanbii lɛ kɛ Perezbii lɛ kɛ Hivbii lɛ kɛ Yebusbii lɛ, tamɔ bɔ ni Yehowa, o-Nyɔŋmɔ lɛ, ewoo kitã lɛ.”—5 Mose 7:2; 20:17.

² Akɛni Yehowa ji Nyɔŋmɔ mɔbɔnalɔ hewɔ lɛ, mɛni hewɔ efã ni abule mɛi ni yɔɔ Kanaan lɛ aseshi shishi lɛ? (2 Mose 34:6) Yiŋtoo lɛ ekome ji ‘koni Kanaanbii lɛ akatsɔɔ Israelbii lɛ amɛnihii nii ni amɛfee amɛha amɛnyɔŋmɔi lɛ afeemɔ, ni amɛfee esha amɛshi Yehowa Nyɔŋmɔ!’ (5 Mose 20:18) Mose kɛɛ hu akɛ: “Nɛkɛ jeŋmaji nɛɛ anifɔjianii lɛ ahewɔ moŋ ni Yehowa shwieɔ amɛ kɛjɛɔ ohiɛ nɛɛ.” (5 Mose 9:4) Kanaanbii lɛ anɔkwɛmɔ nɔ diɛŋtsɛ ji efɔŋ. Bɔlɛnamɔ mli jeŋba shara kɛ wɔŋjamɔ ji amɛjamɔ lɛ kadimɔ nii. (2 Mose 23:24; 34:12, 13; 4 Mose 33:52; 5 Mose 7:5) Wekumɛi ni bɛŋkɛ ni akɛ amɛ naa bɔlɛ, hii ni kɛ hii feɔ yakayakanii, kɛ gbɔmɛi ni kɛ kooloi naa bɔlɛ ji ‘nɔ ni yɔɔ nɔ yɛ Kanaan shikpɔŋ lɛ nɔ.’ (3 Mose 18:3-25) Akɛ gbekɛbii ni leee efɔŋ ko lɛ shãa afɔle kɛ yiwalɛ amɛhaa apasa nyɔŋmɔi. (5 Mose 18:9-12) Ŋwanejee ko bɛ he akɛ, no hewɔ ni Yehowa bu shihilɛ mli kɛkɛ ni nɛkɛ jeŋmaji nɛɛ yɔɔ lɛ akɛ nɔ ni woɔ ewebii lɛ agbɔmɔtsoŋ, jeŋba kɛ mumɔŋ hilɛ-kɛhamɔ he gbeyei lɛ!—2 Mose 34:14-16.

 3. Mɛni ba akɛni Israelbii lɛ tsuuu Nyɔŋmɔ fãmɔi ni kɔɔ Kanaanbii lɛ ahe lɛ he nii kɛmɔɔɔ shi hewɔ?

³ Akɛni atsuuu Nyɔŋmɔ fãmɔi nɛɛ ahe nii kɛmɔɔɔ shi hewɔ lɛ, Kanaanbii lɛ ateŋ mɛi pii ayi ná wala yɛ Shiwoo Shikpɔŋ lɛ nɔ kunim ni Israelbii lɛ ye lɛ mli. (Kojolɔi 1:19-21) Yɛ be ko sɛɛ lɛ, anu Kanaanbii lɛ asubaŋ ni naa mɔ nɔ hewalɛ ni yaa nɔ fiofio lɛ he, ni abaanyɛ akɛɛ akɛ: “Ni [Israelbii lɛ] amɛkwa [Nyɔŋmɔ] ekpɔi lɛ kɛ ekpaŋmɔ ni ekɛ amɛtsɛmɛi lɛ kpaŋ lɛ kɛ edasei ni eye etsɔɔ amɛ lɛ, ni amɛyanyiɛ yakayakanii asɛɛ ni amɛtsɔmɔ yakagbɔmɛi, ni amɛnyiɛ jeŋmaji ni ebɔle amɛ kɛkpe ni Yehowa wo amɛ kitã yɛ amɛhe akɛ amɛkafee amɛnii tamɔ amɛ lɛ asɛɛ.” (2 Maŋtsɛmɛi 17:15) Hɛ̃ɛ, Israelbii pii yadi nibii fɔji ni ha Nyɔŋmɔ fã akɛ akpata Kanaanbii lɛ ahiɛ lɛ nɔŋŋ sɛɛ beni afii lɛ hoɔ lɛ—wɔŋjamɔ, bɔlɛnamɔi ni tekeɔ nɔ, kɛ gbekɛbii po ni akɛ amɛ shãa afɔle!—Kojolɔi 10:6; 2 Maŋtsɛmɛi 17:17; Yeremia 13:27.

4, 5. (a) Mɛni ba Israel kɛ Yuda ni yeee anɔkwa lɛ anɔ? (b) Mɛɛ ŋaawoo akɛha yɛ Filipibii 2:14, 15, ni mɛɛ sanebimɔi ateeɔ amɛ shi?

⁴ No hewɔ lɛ, gbalɔ Hoshea jaje akɛ: “Nyɛboa Yehowa wiemɔ lɛ toi, nyɛ Israelbii! Shi Yehowa kɛ shikpɔŋ lɛ nɔ bii lɛ ená, ejaakɛ anɔkwale kɛ mɔbɔnalɛ kɛ Nyɔŋmɔ he nilee bɛ shikpɔŋ lɛ nɔ. Nɔ ni eshwɛ amɛ pɛ ji kitakamɔ kɛ kutumpɔoyeli kɛ gbɔmɔgbee kɛ juu kɛ gbalafitemɔ; amɛgbulɔɔ shiai amɛwoɔ mli, ni lashishwiemɔ tsa lashishwiemɔ nɔ. No hewɔ lɛ, shikpɔŋ lɛ miiye ŋkɔmɔ, ni mɔ fɛɛ mɔ ni hiɔ nɔ lɛ etɔ biti, kɛ ŋaŋ kooloi kɛ ŋwɛi loofɔji lɛ, ni ŋshɔŋloi tete eplenee.” (Hoshea 4:1-3) Ashur ye Israel kooyigbɛ maŋtsɛyeli ni ekpɔtɔ lɛ nɔ kunim yɛ afi 740 D.Ŋ.B. Aaafee afii oha sɛɛ lɛ, Babilon ye Yuda maŋtsɛyeli ni yɔɔ wuoyigbɛ ni yeee anɔkwale lɛ nɔ kunim.

⁵ Nɛkɛ nibii ni ba nɛɛ feɔ bɔ ni eji oshara hã akɛ wɔɔŋmɛ gbɛ ni efɔŋ aye wɔnɔ lɛ he okadi. Nyɔŋmɔ hiɔ nii ni ejaaa, ni eŋmɛŋ enɛ feemɔ gbɛ yɛ ewebii ateŋ. (1 Petro 1:14-16) Eji anɔkwale akɛ “jeŋ fɔŋ ni yɔɔ ŋmɛnɛŋmɛnɛ nɛɛ mli” wɔyɔɔ lɛ, yɛ jeŋ ni miifite babaoo be fɛɛ be mli. (Galatabii 1:4; 2 Timoteo 3:13) Fɛɛ sɛɛ lɛ, Nyɔŋmɔ Wiemɔ lɛ woɔ Kristofoi fɛɛ ŋaa ni amɛya nɔ amɛfee amɛnii koni amɛhe “akahi shwamɔ, ni [amɛ]fee mɛi krɔŋŋi, Nyɔŋmɔ bii ni he bɛ kpa ko yɛ yinɔ kɔdɔŋ ni bɛ eŋɛlɛ nɔ nɛɛ teŋ, mɛi ateŋ ni [amɛ]tsoɔ tamɔ kanei yɛ je nɛŋ.” (Filipibii 2:14, 15) Shi te wɔɔfee tɛŋŋ wɔhiɛ jeŋba kpakpa mli yɛ jeŋ ni efɔŋ eyi mli obɔ mli? Ani abaanyɛ afee nakai diɛŋtsɛ?

Roma Jeŋ ni Efɔŋ Eyi Mli Obɔ Lɛ

 6. Mɛni hewɔ klɛŋklɛŋ afii oha lɛ mli Kristofoi kɛ jeŋba kpakpa mlihiɛmɔ he kaa kpe lɛ?

⁶ Klɛŋklɛŋ afii oha lɛ mli Kristofoi lɛ kɛ jeŋba kpakpa mlihiɛmɔ he kaa kpe, ejaakɛ efɔŋ egbɛ eshwã Roma shihilɛ mli nibii fɛɛ kwa mli. Roma nilelɔ Seneca wie gbɔmɛi ni ehi amɛteŋ lɛ ahe akɛ: “Gbɔmɛi kɛ hewalɛ shiɔ akaŋ yɛ efɔŋfeemɔ mli. Bɔ ni ashweɔ ni afee efɔŋ lɛ yaa hiɛ daa gbi, gbeyei ni esa akɛ ashe yɛ he lɛ baa shi.” Ekɛ gbɔmɛi ni yɔɔ Roma lɛ to “kooloi awuiyelɔi akutso ko” he. Belɛ ebɛ naakpɛɛ mɔ akɛ Romabii lɛ tao akaŋshilɔi ni yi wa koni amɛkɛ klantei anɔ kɛbote gbele mli yɛ amɛhiɛtserɛjiemɔi ashishi.

 7. Te Paulo tsɔɔ nɔ fɔŋ feemɔi ni egbɛ eshwã mɛi pii ateŋ yɛ Ŋ.B. klɛŋklɛŋ afii oha lɛ mli lɛ mli eha tɛŋŋ?

⁷ Ekolɛ gbɔmɛi ni hi klɛŋklɛŋ afii oha lɛ mli lɛ asubaŋ ni ekpɔtɔ lɛ yɛ bɔfo Paulo jwɛŋmɔ mli beni eŋma akɛ: “Enɛ hewɔ Nyɔŋmɔ ŋmɛɛ amɛhe eha hiɛgbejianii ahe hiɛdɔɔi lɛ; ejaakɛ nɔ ni ato ni afeɔ lɛ, amɛyei lɛ etsake hiɛ eha nɔ ni afeee lɛ; ni nakai nɔŋŋ amɛhii lɛ hu fɔ̃ɔ yoo he nɔ ni ato ni afeɔ lɛ, ni amɛshãa yɛ amɛkɔnɔ fɔŋ lɛ mli kɛnyiɛɔ amɛ diɛŋtsɛ amɛhe sɛɛ, ni hii kɛ hii tsuɔ hiɛgbejianii, ni amɛná amɛtɔmɔ lɛ he nyɔmɔwoo ni sa yɛ amɛ diɛŋtsɛ amɛhe.” (Romabii 1:26, 27) Akɛni amɛtswa amɛfai shi akɛ amɛbaadi helooŋ akɔnɔi ni he tseee sɛɛ hewɔ lɛ, efɔŋ bayi Romabii akwasafoŋ shihilɛ mli obɔ.

 8. Akɛ gbekɛbii tsu nii yɛ gbɛ fɔŋ nɔ yɛ Helabii kɛ Romabii ateŋ yɛ mɛɛ gbɛ nɔ?

⁸ Yinɔsane etsɔɔɔ bɔ ni hii kɛ hii ayakayakanifeemɔ lɛ egbɛ eshwã Romabii lɛ ateŋ lɛ mli jogbaŋŋ. Shi ŋwanejee ko bɛ he akɛ, Helabii ni tsɔ amɛhiɛ, ni amɛtsuɔ enɛ he nii babaoo lɛ ná amɛnɔ hewalɛ. Nɔ ni afɔɔ feemɔ ji hii onukpai ni fiteɔ gbekɛbii hii, amɛŋɔɔ amɛ amɛwoɔ tsakpaa ko ni tamɔ tsɔɔlɔ kɛ nikaselɔ mli, ni yɛ bei pii amli lɛ enɛ kudɔɔ gbekɛbii lɛ kɛyaa bɔlɛnamɔ he jeŋba ni ehiii mli. Ŋwanejee ko bɛ he akɛ Satan kɛ edaimonioi lɛ hɔ efɔŋfeemɔ kɛ gbekɛbii ni afeɔ amɛ niseniianii nɛɛ sɛɛ.—Yoel 4:3; Yuda 6, 7.

9, 10. (a) Klɛŋklɛŋ Korintobii 6:9, 10 buɔ nɔ fɔŋ feemɔi sɔrɔtoi fɔ yɛ mɛɛ gbɛ nɔ? (b) Mɛɛ shihilɛ mɛi ni yɔɔ Korinto asafo lɛ mli lɛ ateŋ mɛi komɛi hi mli, ni mɛɛ tsakemɔ ba yɛ amɛ sane lɛ mli?

⁹ Beni eŋmaa yɛ mumɔ lɛ tsirɛmɔ naa lɛ, Paulo kɛɛ Kristofoi ni yɔɔ Korinto lɛ akɛ: “Ani nyɛleee akɛ amimyelɔi anine shɛŋ Nyɔŋmɔ maŋtsɛyeli lɛ nɔ? Nyɛkahaa alakaa nyɛ! Ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayakanii, loo hii ni kɛ hii feɔ yakayakanii, loo julɔi loo hiɛjoolɔi loo dãatɔlɔi loo mɛi ajɛlɔi loo amimyelɔi anine shɛŋ Nyɔŋmɔ maŋtsɛyeli lɛ nɔ kwraa. Ni nɛkɛ nyɛteŋ mɛi komɛi yɔɔ sa; shi agbɛnɛ aju nyɛhe, ni asaŋ atsuu nyɛhe, ni abu nyɛ bem hu yɛ Nuntsɔ Yesu gbɛi kɛ wɔ-Nyɔŋmɔ lɛ Mumɔ mli.”—1 Korintobii 6:9-11.

¹⁰ No hewɔ lɛ, Paulo wolo ni jɛ mumɔŋ lɛ bu bɔlɛnamɔ mli jeŋba shara fɔ, akɛ “ajwamaŋbɔlɔi . . . anine shɛŋ Nyɔŋmɔ maŋtsɛyeli lɛ nɔ kwraa.” Shi beni Paulo etsi nifɔjianii nɛɛ saŋŋ tã lɛ sɛɛ lɛ, ekɛɛ akɛ: “Ni nɛkɛ nyɛteŋ mɛi komɛi yɔɔ sa; shi agbɛnɛ aju nyɛhe.” Yɛ Nyɔŋmɔ yelikɛbuamɔ hewɔ lɛ, efɔŋfeelɔi batsɔmɔ mɛi ni he tse yɛ ehiɛ.

11. Te klɛŋklɛŋ afii oha lɛ mli Kristofoi lɛ tee nɔ yɛ amɛ gbii lɛ amli shihilɛ fɔŋ ni ebɔle amɛ lɛ mli amɛha tɛŋŋ?

¹¹ Hɛɛ, Kristofoi ajeŋba kpakpa shwere yɛ klɛŋklɛŋ afii oha lɛ mli je lɛ ni efɔŋ eyi mli obɔ lɛ po mli. Heyelilɔi ‘tsake amɛjwɛŋmɔ amɛfee lɛ ehee.’ (Romabii 12:2) Amɛshɛ ‘amɛsa jeŋba lɛ’ amɛfɔ ni ‘amɛtsɔmɔ gbɔmɛi heei yɛ amɛjwɛŋmɔ mumɔ lɛ mli.’ No hewɔ lɛ amɛjo foi kɛjɛ je lɛ nɔ fɔŋ feemɔi lɛ amli, ni “[amɛ]wo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.”—Efesobii 4:22-24.

Ŋmɛnɛ Jeŋ ni Efɔŋ Eyi Mli Obɔ Lɛ

12. Mɛɛ tsakemɔ ko eba je lɛ mli kɛjɛ 1914 kɛbaa nɛɛ?

¹² Ni wɔgbi nɛɛ hu? Jeŋ ni wɔyɔɔ mli lɛ eyi obɔ kɛ efɔŋ fe bei fɛɛ. Kɛjɛ 1914 titri jeŋba etee nɔ efite yɛ jeŋ fɛɛ. (2 Timoteo 3:1-5) Akɛni ámɛkpoo tsutsu jwɛŋmɔ ni ahiɛ yɛ subaŋ kpakpa, jeŋba, woo, kɛ jeŋba he mla he lɛ hewɔ lɛ, mɛi pii etsɔmɔ mɛi ni susuɔ amɛ pɛ amɛhe yɛ amɛjwɛŋmɔ mli, ni “nɔ ko nɔ ko efeee amɛ hiɛgbele dɔŋŋ.” (Efesobii 4:19) Newsweek wolo tɛtrɛɛ lɛ kɛɛ: “Wɔyɛ yinɔ ko ni kɛ jeŋba toɔ nɔ ni mɔ ko jwɛŋmɔ kɛɔ lɛ lɛ he lɛ mli,” ni ekɛfata he akɛ, jeŋba mli shihilɛ ni yɔɔ lɛ “eba nɔ ni ja kɛ nɔ ni ejaaa he jwɛŋmɔi fɛɛ ni ayɔɔ lɛ shi amɛfee lɛ saji ni kɔɔ nii ni mɔ aŋkro lɛ sumɔɔ, ehenumɔŋ nibii ni esumɔɔ loo hiŋmɛigbelemɔ mli nihalamɔ he.”

13. (a) Mɛɛ gbɛ nɔ hiɛtserɛjiemɔi babaoo ni yaa nɔ ŋmɛnɛ lɛ haa efɔŋfeemɔ shwereɔ yɛ? (b) Hiɛtserɛjiemɔ ni esaaa baanyɛ ana aŋkroaŋkroi anɔ hewalɛ fɔŋ yɛ mɛɛ gbɛ nɔ?

¹³ Taakɛ eji yɛ klɛŋklɛŋ afii oha lɛ mli lɛ, hiɛtserɛjiemɔ ni ehiii egbɛ eshwã ŋmɛnɛ. Tɛlivishin, redio, sinii, kɛ vidio nɔ nibii gbɛɔ bɔlɛnamɔ he nibii eshwãa be fɛɛ be. Efɔŋ ebote kɔmpiuta nitsumɔi po mli. Taakɛ univɛsiti nikasemɔ ko tsɔɔ lɛ, bɔlɛnamɔ he yakayakanii ni ajieɔ yɛ kɔmpiuta nɔ bianɛ lɛ ji “hiɛtserɛjiemɔ nii ni mɛi biɔ ni amɛkwɛ ni fa lɛ ateŋ ekome (kɛ́ ejeee nɔ ni fa fe fɛɛ po).” Mɛni ejɛ enɛɛmɛi fɛɛ mli eba? Adafitswaa wolo mli niŋmalɔ ko kɛɛ akɛ: “Kɛ́ lashishwiemɔ kɛ awui ni ayeɔ gbɔmɔtso lɛ kɛ yaka bɔlɛnamɔ yi wɔ hiŋmɛigbelemɔ ni ehe gbɛi lɛ mli obɔ nɛkɛ lɛ, wɔbaleɔ lá kɛ awui ni ayeɔ gbɔmɔtso lɛ kɛ yaka bɔlɛnamɔ babaoo. Wɔdaraa akɛ mɛi ni etɔ amɛ jwɛŋmɔ. Wɔkpɛlɛɔ kpɔtɔmɔ nɔ babaoo ejaakɛ wɔfee mɛi ni nibii heleee wɔ shi dɔŋŋ.”—Okɛto 1 Timoteo 4:1, 2 he.

14, 15. Mɛɛ odaseyeli yɔɔ ni tsɔɔ akɛ bɔlɛnamɔ he jeŋba kpakpa eba shi yɛ jeŋ fɛɛ?

¹⁴ Susumɔ amaniɛbɔɔ nɛɛ ni je kpo yɛ The New York Times lɛ mli lɛ he okwɛ: “Sane ni abaasusu he akɛ egbeɔ mɔ he guɔ afii 25 ni eho nɛ lɛ efee shihilɛ mli gbɛjianɔtoo ni akpɛlɛɔ nɔ agbɛnɛ. Hii kɛ yei ni kpɛlɛ nɔ akɛ amɛaahi shi yɛ hekome fe ni amɛaabote gbalashihilɛ mli lɛ tee hiɛ kɛyashɛ oha fɛɛ mli 80 [yɛ United States] kɛjɛ 1980 kɛbashi 1991.” Enɛ jeee sane ko ni ekaaa yɛ Amerika Kooyigbɛ pɛ kɛkɛ. Wolo tɛtrɛɛ Asiaweek lɛ bɔ amaniɛ akɛ: “Hiŋmɛigbelemɔ he ŋwanejee miiya nɔ yɛ maji ni yɔɔ [Asia] lɛ amli. Sane lɛ kɔɔ bɔlɛnamɔ mli heyeli kɛ blema jeŋba kpakpai ahe, ni nɔnyɛɛ kɛha tsakemɔ lɛ miida kɛmiiya hiɛ waa.” Akɔntaabui tsɔɔ akɛ, aakpɛlɛ gbalafitemɔ kɛ bɔlɛnamɔ ni tsɔɔ gbalashihilɛ hiɛ lɛ nɔ babaoo yɛ shikpɔji pii anɔ.

¹⁵ Biblia lɛ gba fɔ̃ shi akɛ Satan nitsumɔ baafa yɛ wɔgbii nɛɛ amli. (Kpojiemɔ 12:12) Belɛ esaaa akɛ efeɔ wɔ naakpɛɛ akɛ efɔŋ efa babaoo yɛ gbɛ ni fãa mɔ tsui nɔ lɛ. Akɛ nɔkwɛmɔ nɔ lɛ, gbekɛbii ni akɛ amɛ tsuɔ nii yɛ bɔlɛnamɔ mli yɛ gbɛ ni ejaaa nɔ lɛ efa aahu akɛ etsɔ tsɛŋemɔ hela.a Jeŋmaji Ekomefeemɔ Gbekɛbii Afotro lɛ bɔ amaniɛ akɛ, “bɔlɛnamɔ mli jarayeli yɛ gbɛ ni ejaaa nɔ lɛ miiye gbekɛbii awui yɛ maŋ fɛɛ maŋ mli yɛ jeŋ fɛɛ.” Daa afi lɛ, “abɔɔ amaniɛ akɛ anyɛɔ gbekɛbii fe akpeiakpe 1 nɔ yɛ jeŋ fɛɛ awoɔ gbekɛbii ahoshwibɔɔ mli, akɛ amɛ yeɔ jara ni ahɔ̃ɔ amɛ kɛhaa bɔlɛnamɔ mli yiŋtoi, ni akɛ amɛ tsuɔ nii akɛfeɔ gbekɛbii abɔlɛnamɔ he woji.” Asɛɛɛ hii kɛ hii ni kɛ amɛhe feɔ yakayakanii lɛ hu he, ni maŋkwralɔi kɛ jamɔ mli hiɛnyiɛlɔi komɛi nyiɛɔ enɛ hiɛ, ni amɛhãa eshwereɔ akɛ “shihilɛ gbɛ kroko.”

Je lɛ Nɔ Fɔŋ Feemɔi lɛ Akpoomɔ

16. Mɛɛ shidaamɔ Yehowa Odasefoi kɔɔ yɛ bɔlɛnamɔ he jeŋba kpakpa he?

¹⁶ Yehowa Odasefoi kɛ mɛi ni kpɛlɛɔ bɔlɛnamɔ jeŋba he tɛi ni ŋmɛɔ nɔ fɛɛ nɔ feemɔ gbɛ lɛ anɔ lɛ kpaaa gbee. Tito 2:11, 12 kɛɔ akɛ: “Ejaakɛ Nyɔŋmɔ duromɔ ni akɛhereɔ gbɔmɛi fɛɛ yiwala lɛ epue, ni etsɔseɔ wɔ koni wɔkwa nɔshafeemɔ kɛ je nɛŋ akɔnɔi lɛ, ni wɔkɛ jwɛŋmɔ kpakpa kɛ jalɛ kɛ Nyɔŋmɔ gbeyeishemɔ ahi shi yɛ je nɛŋ.” Hɛɛ, wɔnáa nyɛ̃ɛ diɛŋtsɛ, wɔhiɔ nɔ fɔŋ feemɔi ni tamɔ bɔlɛnamɔ ni tsɔɔ gbalashihilɛ hiɛ, gbalafitemɔ, kɛ hii kɛ hii ayakayakanifeemɔi.b (Romabii 12:9; Efesobii 5:3-5) Paulo kɛ nɛkɛ ŋaawoo nɛɛ ha: “Hã ni mɔ fɛɛ mɔ ni tsĩɔ [Yehowa, NW] gbɛi lɛ atã lɛ atsi ehe kɛjɛ nii ni ejaaa gbɛ lɛ ahe.”—2 Timoteo 2:19.

17. Te anɔkwa Kristofoi buɔ dãa ni wa ni anuɔ lɛ amɛhãa tɛŋŋ?

¹⁷ Anɔkwa Kristofoi kpoɔ jwɛŋmɔ ni je lɛ hiɛ yɛ nibii ni tamɔ efɔŋfeemɔi bibii ahe lɛ. Akɛ nɔkwɛmɔ nɔ lɛ, ŋmɛnɛ, mɛi pii buɔ dãa ni wa ni akɛtsuɔ nii yɛ gbɛ fɔŋ nɔ lɛ akɛ shwɛmɔ. Shi Yehowa webii boɔ ŋaawoo ni yɔɔ Efesobii 5:18 lɛ toi: “Nyɛkatɔrɔa dãa, nɔ mli ni sakasakafeemɔ yɔɔ lɛ, shi moŋ nyɛyimɔa obɔ kɛ mumɔ lɛ.” Kɛ Kristofonyo ko hala akɛ ebaanu dãa lɛ, efeɔ nakai yɛ hiɛshikamɔ mli.—Abɛi 23:29-32.

18. Biblia mli shishitoo mlai kudɔɔ Yehowa tsuji yɛ bɔ ni amɛkɛ weku lɛ mlibii yeɔ hãa lɛ mli yɛ mɛɛ gbɛ nɔ?

¹⁸ Akɛ Yehowa tsuji lɛ, wɔkpoɔ jwɛŋmɔ ni mɛi ni yɔɔ je lɛ mli lɛ ateŋ mɛi komɛi hiɛ akɛ gegeege ni afeɔ kɛ bolɔmɔ ni abolɔɔ awoɔ gbalashihilɛ mli hefatalɔ kɛ gbekɛbii loo wiemɔ sha ni akɛjɛɔ amɛ lɛ ji jeŋba ni akpɛlɛɔ nɔ lɛ hu. Akɛni amɛtswa amɛfai shi akɛ amɛbaadi jeŋba kpakpa sɛɛ hewɔ lɛ, wumɛi kɛ ŋamɛi Kristofoi feɔ ekome kɛtsuɔ Paulo ŋaawoo nɛɛ he nii: “Nyɛhãa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afoa yɛ nyɛteŋ, kɛ efɔŋ fɛɛ efɔŋ. Shi nyɛmli ahia ahãa nyɛhe, nyɛmusuŋ atsɔa nyɛ yɛ nyɛhe, nyɛŋɔ-fafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.”—Efesobii 4:31, 32.

19. Te efɔŋfeemɔ yɛ jarayeli je lɛ mli lɛ egbɛ eshwã ehã tɛŋŋ?

¹⁹ Anɔkwa ni ayeee, shishiumɔ, amale, nitsumɔ mli ŋaatsɔɔ kɛ yiwalɛ, kɛ juu hu ji nibii ni asɛɛɛ he ŋmɛnɛ. Sane ko ni yɔɔ jarayeli nitsumɔ wolo tɛtrɛɛ CFO (Shika Nitsumɔ Mli Onukpa) lɛ mli lɛ bɔ amaniɛ akɛ: “Nibii amlipɛimɔ ko ni afee yɛ nitsulɔi 4,000 he lɛ . . . na akɛ, mɛi ni abibii amɛ saji lɛ amli oha fɛɛ mli 31 ena ‘subaŋ ko ni ehiii kwraa’ yɛ afi ni ho lɛ mli.” Nɔ ni fata subaŋ ni ehiii nɛɛ he ji amale, woji ni akɛ amale etsake emli nibii, bɔlɛnamɔ ni akɛhaoɔ mɔ, kɛ juu. Kɛ wɔɔhi shi akɛ mɛi ni he tse yɛ jeŋba mli yɛ Yehowa hiɛ lɛ, belɛ esa akɛ wɔkwa subaŋ ni tamɔ nɛkɛ ni wɔye anɔkwa yɛ wɔ shika mli nitsumɔi amli.—Mika 6:10, 11.

20. Mɛni hewɔ ehe hiaa ni Kristofoi aye amɛhe kɛjɛ “shikasuɔmɔ” he lɛ?

²⁰ Susumɔ nɔ ni ba nuu ko ni susu akɛ ebaaná be babaoo eha Nyɔŋmɔ sɔɔmɔ kɛ enine shɛ shika babaoo ko nɔ trukaa lɛ he okwɛ. Egbala mɛi krokomɛi ewo shika nitsumɔ ko ni akɛ shika woɔ mli lɛ mli kɛtsɔ sɛɛnamɔi ni amɛbaakpa gbɛ akɛ amɛbaana lɛ ni ewo he tsɔ̃ lɛ mli. Beni enɛɛmɛi baaa mli lɛ, ebafee yeyeeye akɛni eesumɔ ni ewo nyɔmɔ babaoo ni ebɔ nɛɛ aahu akɛ eju shika ko ni akɛwo edɛŋ lɛ. Yɛ enifeemɔi kɛ tsuitsakemɔ ni ebɛ hewɔ lɛ, ashwie lɛ kɛjɛ Kristofoi asafo lɛ mli. Biblia kɔkɔbɔɔ akɛ: “Shi mɛi ni taoɔ nii pii ana lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɛi ewoɔ hiɛkpatamɔ kɛ laajemɔ mli lɛ amli. Ejaakɛ nibii fɔji fɛɛ ashishifa ji shikasuɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli lɛ mli, ni amɛkɛ piŋmɔi babaoo egbulɔ amɛhe” lɛ ji anɔkwale diɛŋtsɛ!—1 Timoteo 6:9, 10.

21. Mɛɛ subaŋ anaa lɛ waa yɛ gbɔmɛi ni yɔɔ hewalɛ yɛ je lɛ mli lɛ ahe, shi te esa akɛ mɛi ni hiɛ gbɛhei ni he hiaa yɛ Kristofoi asafo lɛ mli lɛ aba amɛjeŋ amɛha tɛŋŋ?

²¹ Yɛ bei pii amli lɛ, je lɛŋ gbɔmɛi ni yɔɔ hewalɛ ni ale amɛ lɛ bɛ jeŋba, ni eyeɔ anɔkwale ni abɛbua, ‘Hewalɛ fiteɔ mɔ’ lɛ ji lɛ he odase. (Jajelɔ 8:9) Yɛ shikpɔji komɛi anɔ lɛ, nyɔɔŋnihemɔ kɛ juu kɛ fɔ̃i komɛi ji kojolɔi, polisifoi, kɛ maŋkwralɔi ashihilɛ gbɛ. Shi, esa akɛ mɛi ni nyiɛɔ hiɛ yɛ Kristofoi asafo lɛ mli lɛ afee mɛi ni yɔɔ jeŋba kpakpa, ni amɛkaye mɛi krokomɛi anɔ nuntsɔmɛi asane. (Luka 22:25, 26) Onukpai, kɛ agbɛnɛ asafoŋ sɔɔlɔi sɔmɔɔɔ yɛ “sɛɛnamɔ ni yɔɔ hiɛgbele hewɔ.” Esa akɛ amɛfee mɛi ni anyɛɛɛ abɔ mɔdɛŋ afite amɛ loo aná amɛ kojomɔ nɔ hewalɛ kɛtsɔ heloo gbɛfaŋ ninamɔ ko ni amɛaakpa gbɛ lɛ nɔ.—1 Petro 5:2; 2 Mose 23:8; Abɛi 17:23; 1 Timoteo 5:21.

22. Nikasemɔ ni nyiɛ sɛɛ lɛ baasusu mɛni he?

²² Yɛ fɛɛ mli lɛ, Kristofoi miiye omanye yɛ ŋmɛnɛŋmɛnɛ gbii nɛɛ amli kaa ni ji jeŋba kpakpa mlihiɛmɔ yɛ wɔ jeŋ ni efɔŋ eyi mli obɔ lɛ mli lɛ mli. Ni kɛlɛ, jeŋba kpakpa kɔɔ nibii babaoo he fe efɔŋfeemɔ ni wɔɔkwa kɛkɛ. Nikasemɔ ni nyiɛ sɛɛ lɛ baasusu nɔ ni jeŋba kpakpa ni aaaná lɛ biɔ diɛŋtsɛ lɛ he.

[Shishigbɛ niŋmai]

[Nikasemɔ lɛ he Sanebimɔi]

◻ Mɛni hewɔ Yehowa fã ni abule Kanaanbii lɛ aseshi shishi lɛ?

◻ Mɛɛ nɔ fɔŋ feemɔi egbɛ eshwã yɛ klɛŋklɛŋ afii oha lɛ mli, ni te Kristofoi fee tɛŋŋ amɛhi shihilɛ ni ebɔle amɛhe nɛɛ mli?

◻ Mɛɛ odaseyeli yɔɔ ni tsɔɔ akɛ, je lɛ ena jeŋba ni efite yɛ jeŋ fɛɛ kɛjɛ 1914?

◻ Mɛɛ nɔ fɔŋ feemɔi ni efa esa akɛ Yehowa webii akpoo?

[Mfoniri ni yɔɔ baafa 9]

Klɛŋklɛŋ afii oha lɛ mli Kristofoi lɛ yɛ jeŋba kpakpa, eyɛ mli akɛ amɛhi shi yɛ jeŋ ni efɔŋ eyi mli obɔ mli

[Mfoniri ni yɔɔ baafa 10]

Efɔŋ ebote kɔmpiuta nitsumɔi po mli, ni ehaa gbekɛbii pii kɛ mɛi krokomɛi naa hegbɛ amɛkwɛɔ bɔlɛnamɔ he nibii

[Mfoniri ni yɔɔ baafa 12]

Esa akɛ Kristofoi ahiɛ jeŋba kpakpa mli, amɛkakase mɛi krokomɛi aŋaatsɔɔ ni ejaaa lɛ