‘Halamɔ Hii Ni Yɔɔ Nyɛmɔ, Ni Sheɔ Nyɔŋmɔ Gbeyei’
“Shi esa akɛ bo diɛŋtsɛ ohala hii ni yɔɔ nyɛmɔ, ni sheɔ Nyɔŋmɔ gbeyei yɛ gbɔmɛi lɛ fɛɛ ateŋ, hii anɔkwafoi ni anyɛŋ afite amɛ, ni ohala amɛ oto gbɔmɛi lɛ anɔ.”—2 MOSE 18:21, The New English Bible.
1. Mɛni hewɔ wiemɔi “nɔkwɛlɔ” kɛ “onukpa” ji wiemɔi komɛi ni Yehowa Odasefoi nyaa he waa lɛ?
1 “KƐJƐ Homer be lɛ mli [aaafee afii ohai 9 D.Ŋ.B] kɛbashi wɔgbii nɛɛ amli lɛ, wiemɔi pii egboi; afɔ ekrokomɛi babaoo hii. Ni Episkopos [nɔkwɛlɔ] kɛ presbyteros [onukpa] etee nɔ ehi shi.” Nɛkɛ wiemɔi ni ŋmɛnɛŋmɛnɛ beaŋ Hela woloŋlelɔ lɛ wie lɛ maa bɔ ni Hela wiemɔi kɛha “nɔkwɛlɔ” kɛ “onukpa” lɛ he hiaa babaoo ha lɛ nɔ mi. Akɛ nɛkɛ wiemɔi nɛɛ etsu nii yɛ Yehowa asafo lɛ gbɛjianɔtoo kɛha ewebii lɛ ahe afii akpei babaoo. Kɛji akɛ okɛ Yehowa Odasefoi bɔɔ lɛ, belɛ nibii ni abaasusu he ni nyiɛ sɛɛ nɛɛ ni kɔɔ bɔ ni fee ni nɛkɛ wiemɔi nɛɛ babote Kristofoi asafo lɛ mli lɛ baafee nɔ ni obaanya he titri.
2, 3. Namɛi ayiŋ esa akɛ Mose atsɔ koni esɔmɔ akɛ Israelbii lɛ ahiɛnyiɛlɔ ni Nyɔŋmɔ ehala lɛ?
2 Shi Biblia mli yinɔsane kɛ wɔ yaa shɔŋŋ fe Hela lalafolɔ Homer. Afii ohai 16 D.Ŋ.B. lɛ mli Mose nine shɛ nitsumɔ nɔ kɛjɛ Yehowa dɛŋ akɛ eku esɛɛ eya Mizraim ni eyanyiɛ Israelbii lɛ ahiɛ kɛjɛ nyɔŋyeli mli. Akɛni kɛjɛ be mli ni eshi lɛ diɛŋtsɛ ewebii lɛ eye aaafee afii 40 hewɔ lɛ, namɔ ŋɔɔ ebaaya ni ekɛ ehe ayatsɔɔ lɛ akɛ mɔ ni akɛ nitsumɔ ewo edɛŋ? Shi Nyɔŋmɔ kɛɛ, “yaa ni oyabua Israel onukpai [Hela, gerousía, “onukpai agwabɔɔ”; kwɛmɔ Septuagint Version] lɛ anaa. . . . Ni amɛaabo ogbee toi, ni okɛ Israel onukpai lɛ aya Mizraim maŋtsɛ lɛ ŋɔɔ.”—2 Mose 3:16, 18.
3 Eka shi faŋŋ akɛ kɛjɛ blematsɛmɛi lɛ abeaŋ tɔɔ abuɔ onukpai lɛ waa yɛ amɛniiashikpamɔ, nilee, jwɛŋmɔ kɛ kojomɔ kpakpa lɛ hewɔ. Amɛji mɛi ni esa akɛ Mose atsɔ amɛyiŋ koni amɛkpɛlɛ enɔ akɛ hiɛnyiɛlɔ ni amɛ Nyɔŋmɔ lɛ ehala lɛ kɛha jiemɔ.
Hesai Kɛha Onukpai Yɛ Israel
4. Mɛɛ ŋaawoo Yetro kɛha Mose, ni mɛni jɛ mli ha?
4 Beni Israelbii lɛ yaje ŋa lɛ nɔ, ni amɛye amɛhe kɛjɛ Mizraimbii ni yeɔ amɛ nyɔŋ lɛ adɛŋ pɛ kɛkɛ ni kojomɔ nitsumɔ ni ka Mose nɔ yɛ maŋ lɛ he lɛ bafee nɔ ni tsii waa. Eshaanuu Yetro ni eba lɛ saramɔ lɛ na enɛ faŋŋ, ni ekɛ ŋaawoo ko ni anyɛɔ atsuɔ he nii ni eka shi faŋŋ akɛ Yehowa kpɛlɛɔ nɔ ha lɛ. Ekɛɛ akɛ: “Nɔ ni ofeɔ nɛɛ ehiii. Ebaatɔo, bo kɛ maŋ ni fata ohe nɛɛ; shi nii nɛɛ tsii tsɔ ha bo, okome too onyɛŋ ofee. Agbɛnɛ bo migbee toi; mawoo ŋaa, ni Nyɔŋmɔ afata ohe: Bo lɛ daamɔ Nyɔŋmɔ hiɛ oha maŋ lɛ, koni okɛ amɛsaji lɛ aba Nyɔŋmɔ ŋɔɔ, . . . Ni asaŋ halamɔ maŋ lɛ fɛɛ mli hii ni yɔɔ nyɛmɔ, ni sheɔ Nyɔŋmɔ gbeyei, ni amɛji anɔkwafoi, ni hiɔ hiɛjoomɔ . . . bɔni afee ni amɛmɔ sɛɛ amɛhao.” (2 Mose 18:17-23, New World Translation) Nɛkɛ kojomɔ gbɛjianɔtoo hee ni yɔɔ Israel nɛɛ ha akpa jatsu lɛ mli aha hii krokomɛi ni yɔɔ nyɛmɔ. Israel asafo lɛ ebana onukpai akuu ko ni ato amɛ gbɛjianɔ ni he esa ni baanyɛ atsu kojomɔ saji kɛ naataomɔi ahe nii.
5. Ani Mose baahala onukpa fɛɛ onukpa ni yɔɔ kɛkɛ?
5 Mɛɛ sɔrɔtofeemɔ enɛ ji yɛ ŋmɛnɛŋmɛnɛ jeŋ gbɛjianɔtoo nɛɛ ni mɛi fioo pɛ yɔɔ ni amɛhiɛ sɔɔ shishitoo mlai ni nɔ kwɔlɔ—he ni nyɔɔŋnihamɔ kɛ jeŋba gbonyo fiteɔ nɔyelɔi kɛ mɛi ni ayeɔ amɛ nɔ lɛ nɛkɛ! Yɛ blema bei lɛ amli yɛ blema Israel lɛ aje gbɛ atao mɛi ni kɛ Mose baasɔmɔ ni amɛtsu kojomɔ he nii yɛ maŋ lɛ mli lɛ amli jogbaŋŋ ahala amɛ. Taakɛ Yetro wie lɛ: “Bo diɛŋtsɛ taomɔ hii ni yɔɔ nyɛmɔ, ni sheɔ Nyɔŋmɔ gbeyei ni yɔɔ gbɔmɛi lɛ fɛɛ ateŋ, hii anɔkwafoi ni anyɛŋ afite amɛ, ni ohala amɛ oto gbɔmɛi lɛ anɔ.” (2 Mose 18:21, The New English Bible) Ejeee sane kɛkɛ ni akɛbalaa hii ni amɛdara yɛ afii amli. Esa akɛ Mose ‘atao’ hii ni yɔɔ nyɛmɔ, ni he esa, ni anyɛŋ afite amɛ. Mɛɛ naakpɛɛ tɛi ni afolɔ ashwie shi enɛ ji kɛha mɛi ni esa akɛ amɛkwɛ nibii ni he hiaa Yehowa webii ni yɔɔ ŋmɛnɛ lɛ anɔ lɛ nɛkɛ!
Onukpai Ni Yehowa Kɛ Hewalɛ Ewo Amɛdɛŋ
6, 7. Mɛni Yehowa fee koni ehala onukpai yɛ Israel?
6 Yɛ be ko sɛɛ lɛ Israelbii lɛ wie huhuuhu amɛshi shihilɛi ni yɔɔ ŋa lɛ nɔ lɛ. Akɛni agbɛnɛ Mose nu he akɛ maŋ lɛ nɔkwɛmɔ etsɔ jatsu ni tsii tsɔ kɛha lɛ hewɔ lɛ, ekɛ naagba lɛ yafɔ Yehowa hiɛ. Mɛni ji tsabaa ni Nyɔŋmɔ kɛha! Wɔkaneɔ nɛkɛ: “Ni Yehowa kɛɛ Mose akɛ: Buamɔ Israel onukpai [Hela, presbytéron, Septuagint Version] lɛ ateŋ mɛi nyɔŋmai kpawo naa oha mi, mɛi ni ole akɛ amɛji maŋ lɛ, onukpai [presbyteroi] kɛ amɛnɔkwɛlɔi, . . . ni maŋɔ mumɔ ni yɔɔ onɔ lɛ eko mashwie amɛnɔ, ni amɛkɛ bo atere maŋ lɛ jatsu lɛ, koni okome okatere.”—4 Mose 11:16, 17.
7 Mose fee taakɛ afa lɛ lɛ, ni akɛɛ wɔ akɛ: “Ni Yehowa kpeleke shi yɛ atatu lɛ mli ni ekɛ lɛ bawie, ni eŋɔ mumɔ ni yɔɔ enɔ lɛ eko eshwie onukpai [presbytérous] nyɔŋmai kpawo lɛ nɔ; ni eba mli akɛ, beni mumɔ lɛ yi amɛnɔ lɛ, amɛgbagbai.” (4 Mose 11:24, 25) Naa “onukpai” nɛɛ ahalamɔ yɛ teokrase gbɛjianɔtoo naa lɛ he odaseyeli ni ka shi faŋŋ. Yehowa eto ewebii lɛ gbɛjianɔ kɛha jiemɔ kɛmiijɛ nyɔŋyeli mli ni agbɛnɛ ekɛ ‘hii ni yɔɔ nyɛmɔ, anɔkwafoi ni sheɔ Nyɔŋmɔ gbeyei’ miitsu nii ni amɛkɛ Mose ana hiɛnyiɛmɔ kɛ maŋnɔkwɛmɔ he gbɛnaa nii lɛ mli gbɛfaŋnɔ.
8. Mɛni onukpai lɛ tsu beni Israelbii lɛ yahi Shiwoo Shikpɔŋ lɛ nɔ lɛ?
8 Yɛ be ni sa mli lɛ, Israelbii ni faa kɛjɛɔ he kome kɛyaa he kroko lɛ ye Shiwoo Shikpɔŋ lɛ nɔ kunim ni amɛyahi maji kɛ maŋtiasei amli agbɛnɛ taakɛ bɔ ni amɛshihilɛ ji yɛ Mizraim lɛ. Enɛ tsɔɔ akɛ onukpai lɛ bafee mɛi ni akutsei amli gbɛnaa nii ebaka amɛnɔ. Amɛtsu nii akɛ nɔkwɛlɔi akuu amɛha akutseiaŋ he ni amɛyɔɔ lɛ, ni amɛhala kojolɔi kɛ maŋnɔkwɛlɔi koni amɛtsu jalɛsaneyeli he nii ni amɛha toiŋjɔlɛ, gbɛjianɔtoo kpakpa kɛ mumɔŋ hewalɛnamɔ aba gbɔmɛi lɛ ateŋ.—5 Mose 16:18-20; 25:7-9; Rut 4:1-12.
Ani Yiteŋ Waŋ Pɛ Sa?
9, 10. Yɛ gbɔmɔtsoŋ salɛ sɛɛ lɛ, mɛɛ taomɔ nii krokomɛi esa akɛ ana yɛ “onukpa” he? Okɛ Ŋmalɛ afi sɛɛ.
9 Ani nɔ ni awie nɛɛ tsɔɔ akɛ, belɛ onukpa fɛɛ onukpa ni yɔɔ Israel lɛ baanyɛ afee “onukpa” ni baanyɛ atsu kojomɔ loo maŋnɔkwɛmɔ saji ahe nii? Ani afi ko ni aye baaha Israelnyo ko atsɔ “onukpa” nyɔŋlo yɛ nakai shishinumɔ mli? Dabi, shishinumɔ baŋ sanenaamuu ni tamɔ nɛkɛ mli. Elihu tsɔɔ saji amli faŋŋ, beni ekɛɛ: “Jeee onukpai ni leɔ nii, ni jeee hiimeji hu . . . nuɔ sane shishi.” Ni naabualɔ nilelɔ lɛ ŋma akɛ: “Waŋ lɛ, anunyam akekere ni, kɛ ana Iɛ yɛ jalɛ gbɛ nɔ lɛ.” (Hiob 32:6, 9; Abɛi 16:31; Jajelɔ 12:9, 10) Hebri Ŋmalɛi lɛ tsɔɔ faŋŋ akɛ esa akɛ ana afii amli dalɛ kɛ niiashikpamɔ ni kɛ nilee kɛ jalɛ jeŋba yaa yɛ “onukpa” ni he esa lɛ he.
10 Shi, dalɛ yɛ afii amli kɛ niiashikpamɔ he yɛ sɛɛnamɔ babaoo. Dani mɔ ko he aaasa kɛha sɔɔmɔ hegbɛi lɛ, esa akɛ onukpai lɛ akpɛlɛ Nyɔŋmɔ mumɔ lɛ gbɛtsɔɔmɔ nɔ ni amɛna e-Wiemɔ lɛ he shishinumɔ. Efaaa kɛkɛ akɛ mɔ ko aaanyɛ atsɛ ŋmalɛi. Ni aaale gbɛ ni aaatsɔ nɔ akɛtsu nii yɛ nilee mli lɛ ji nɔ ni he hiaa titri kɛha “onukpa.”—Abɛi 4:7-9; Tito 1:9.
Onukpai Ni Yɔɔ Kristofoi Asafo Lɛ Mli
11, 12. (a) Ani Yudafoi akutsei lɛ yɛ onukpai lolo beni Yesu Kristo yɔɔ shikpɔŋ nɔ lɛ? (b) Mɛɛ gbɛjianɔtoo nɔ atsɔɔ ahalaa onukpai yɛ Kristofoi asafo lɛ mli?
11 Wɔnaa kɛjɛɔ nɔ ni wɔsusu he nɛɛ mli akɛ eka shi faŋŋ akɛ kɛjɛ blema bei amli akɛ “onukpai” ni he esa etsu nii ni amɛnyiɛ hiɛ yɛ Yehowa webii lɛ asaji amli. Beni Yesu Kristo yɔɔ shikpɔŋ nɔ lɛ no mli lɛ Yudafoi lɛ eto osɔfoi kɛ onukpai akuu ko yɛ Yerusalem ni ale amɛ akɛ Sanhedrin. Amɛtsu nii akɛ Yudafoi asaneyeli he wulu. (Mateo 26:57-68) Shi kɛlɛ, odaseyelii tsɔɔ akɛ onukpai akui yɛ ni miitsu nii yɛ akutsei lɛ asaji amli yɛ maŋtiasei lɛ amli shi jeee yɛ maŋ muu lɛ fɛɛ pɛ nɔ he.—Luka 7:3-5.
12 Akɛni wɔna bɔ ni sane lɛ ji yɛ yinɔsane mli lɛ he nilee nɛkɛ hewɔ lɛ, ewaaa akɛ wɔɔna bɔ ni mra be mli Kristofoi asafo lɛ baaya nɔ ekɛ teokrase gbɛjianɔtoo ni tamɔ nɔ ni Yehowa kpɛlɛ nɔ yɛ Mose be lɛ mli lɛ atsu nii lɛ. Yɛ Nyɔŋmɔ mumɔ krɔŋkrɔŋ lɛ gbɛtsɔɔmɔ shishi lɛ, nakai “onukpai” aloo onukpai ni ahala amɛ, ni yɔɔ Kristofoi asafo lɛ mli lɛ baafee hii ‘ni yɔɔ nyɛmɔ, anɔkwafoi, mɛi ni anyɛŋ afite amɛ ni sheɔ Nyɔŋmɔ gbeyei.’
13. Mɛni hewɔ hii ni tsuɔ nii waa ni yɔɔ nyɛmɔ he hiaa yɛ Kristofoi asafo lɛ mli?
13 Kɛjɛ Pentekoste yɛ afi 33 Ŋ.B. kɛyaa lɛ heyelilɔi asafo lɛ shwere oyayaayai. (Bɔfoi lɛ Asaji 2:41; 4:4) Agbálaaa amɛmli awooo teemɔŋ kui bibii amli, kui ni amɛgbala amɛmli ni kaseɔ Biblia amɛ diɛŋtsɛ tamɔ Essene jamɔ lɛ ji lɛ. Kristojamɔ jeee teemɔŋ sane ko. Abaaha ale yɛ he fɛɛ he, abaatswa he adafi atsɔɔ maji. (Mateo 5:14-16; 28:19, 20) Yɛ yiŋtoo nɛɛ hewɔ lɛ, hii ni tsuɔ nii waa ni yɔɔ nyɛmɔ he miihia ni amɛnyiɛ hiɛ yɛ Kristofoi agbɛjianɔtoo lɛ mli. Eka shi faŋŋ akɛ belɛ amɛ amɛbaafee “onukpai” lɛ.
Hesaai Kɛha “Onukpai”
14. Mɛɛ taomɔ nii ni esa akɛ ana yɛ onukpai ahe Petro ma nɔ mi?
14 Eka shi faŋŋ akɛ beni shɛɔ ŋmɛnɛŋmɛnɛ beaŋ afii nyɔŋmai kpawo lɛ mli lɛ no mli lɛ ato mumɔŋ hesaai kɛha mɛi ni baatsɔmɔ onukpai ni baanyiɛ hiɛ yɛ Kristofoi asafo lɛ mli lɛ ama shi. Yɛ enɛ hewɔ lɛ wɔnaa enɛ he wiemɔi babaoo yɛ bɔfoi Petro kɛ Paulo niŋmaai lɛ amli. Akɛ nɔkwɛmɔ nɔ lɛ, Petro ŋma akɛ:
“No hewɔ lɛ onukpai ni yɔɔ nyɛteŋ lɛ, miiwie miitsɔɔ amɛ akɛ: Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa; ni asaŋ jeee akɛ mɛi ni yeɔ asafoi lɛ anɔ nuŋtsɔmɛi asane, shi moŋ mɛi ni toɔ okadii amɛhaa asafoku lɛ.” (1 Petro 5:1-3)
Belɛ etsɔɔ akɛ shishinumɔ yɛ mli akɛ, beni Petro ma nɔ mi akɛ “onukpai” baasɔmɔ shi jeee yɛ “sɛɛnamɔ ni yɔɔ hiɛgbele hewɔ, shi moŋ tsuijurɔ naa” lɛ belɛ eeti ŋaawoo ákɛ Mose ahala ‘hii ni yɔɔ nyɛmɔ, ni sheɔ Nyɔŋmɔ gbeyei, anɔkwafoi, ni nyɛɛɔ hiɛjoomɔ lɛ mli.’—2 Mose 18:21.
15. Mɛɛ taomɔ nii Paulo kɛmamɔ shi kɛha “onukpa”?
15 Yɛ Paulo wolo ni eŋma eyaha ehefatalɔ nitsulɔ ni ekɛ ehe fɔɔ enɔ waa, Tito, ni sɔmɔɔ yɛ Mediterania ŋshɔkpɔ Kreta lɛ nɔ lɛ, efa lɛ akɛ ‘ojaje nibii ni ekɔdɔ lɛ pɛpɛɛpɛ’ yɛ asafoi lɛ amli ni “owowoo onukpai [presbytérous] yɛ maŋ fɛɛ maŋ mli.” Nɔ ni yɔɔ miishɛɛ ji akɛ, Hela wiemɔ ni atsɔɔ shishi “onukpa” lɛ tsɔɔ “nuu ni sa, mɔ ni sa yɛ eniiashikpamɔ kɛ nilee ni ekɛkwɛɔ eweku lɛ loo gbɔmɛi anɔ lɛ hewɔ.” (Episcopos y Presbyteros, ni Professor Manuel Guerra y Gómez ŋma) Anaa nɛkɛ shishinumɔ nɛɛ faŋŋ hu yɛ taomɔ nii ni Paulo kɛmamɔ shi eha Tito kɛha nakai Kristofoi ni he baasa ni amɛsɔmɔ akɛ nɔkwɛlɔi lɛ mli. Eŋma akɛ:
“Kɛ mɔ ko yɛ ni kpa ko bɛ ehe, ni eji mɔ ni yɔɔ ŋa kome, ni yɔɔ bii ni heɔ yeɔ, ni awieee amɛhe akɛ nyenyeŋtswibɔlɔi loo toigbolɔi ji amɛ lɛ. Ejaakɛ esa akɛ nɔkwɛlɔ [Hela, epískopon] lɛ kpa ko akahi ehe, akɛni Nyɔŋmɔ we nɔ tsulɔ nukpa ji lɛ hewɔ lɛ; jeee mɔ ni feɔ lɛ diɛŋtsɛ etsuinaa nii, jeee mlifutsɛ, jeee daanulɔ, jeee ninekpokpookpotsɛ, jeee kpɛkpɛɛlɔ, shi moŋ gbɔfeelɔ, mɔ ni sumɔɔ ekpakpa, mɔ ni jwɛŋmɔ mli ka shi, jalɔ, mɔ ni he tse, mɔ ni hiɛ ka shi, mɔ ni hiɛɔ tsɔɔmɔ lɛ naa anɔkwa wiemɔ lɛ mli, koni enyɛ etsɔɔ mɛi yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ naa lɛ hu, ekã amɛhiɛ.” (Tito 1:5-9)
Nɛkɛ taomɔ nii nɛɛ amlikwɛmɔ jogbaŋŋ yeɔ buaa wɔ ni ehaa wɔleɔ akɛ esa akɛ “onukpa” ni yɔɔ Kristofoi asafo lɛ mli lɛ nine ashɛ jeŋba mli tɛi ni afolɔ ashwie shi kɛ mumɔŋ shihilɛ ni nɔ kwɔ nɔ.
16. Te wɔfeɔ tɛŋŋ wɔleɔ akɛ onukpai lɛ ji nɔkwɛlɔi hu yɛ Ŋ.B. klɛŋklɛŋ afii oha lɛ mli?
16 Eyɛ miishɛɛ hu akɛ aaakadi bɔ ni Paulo kɛ Hela wiemɔi presbyteros kɛ epískopos, “onukpa” kɛ “nɔkwɛlɔ” tsuɔ nii haa lɛ. Wɔbaanyɛ wɔkase kɛjɛ enɛ mli akɛ onukpai ni amɛhe esa lɛ tsuɔ nii akɛ nɔkwɛlɔi yɛ asafoi lɛ amli. Ŋmalɛi krokomɛi tsɔɔ akɛ onukpai nɔkwɛlɔi saŋŋ baanyɛ ahi asafo kome too lɛ nɔŋŋ mli.—Bɔfɔi lɛ Asaji 14:23; 20:28; Filipibii 1:1.
17. (a) Mɛɛ taomɔ nii kɛha nɔkwɛlɔ Paulo kɛmaje Timoteo? (b) Mɛni hewɔ esa akɛ onukpa lɛ hu afee mɔ ni yɔɔ ekaa yɛ shiɛmɔ nitsumɔ lɛ mli?
17 Yɛ be mli ni eŋmaa ehaa Timoteo lɛ, Paulo kɛ taomɔ nii ni esa akɛ ana yɛ nɔkwɛlɔ ko he lɛ fɔ shi, shi yɛ gbɛ ni yɔɔ sɔrɔto fioo nɔ, ekolɛ akɛni esusu shihilɛi komɛi ni yɔɔ sɔrɔtoi ahe lɛ hewɔ. (1 Timoteo 3:1-7) Akɛni klɛŋklɛŋ Kristofoi asafo lɛ ji sanekpakpajajelɔi agbɛjianɔtoo hewɔ lɛ akpɛlɛ nɔ akɛ nɛkɛ onukpai nɛɛ hu kɛ ekaa baajaje sanekpakpa lɛ. Hejɔ̃ loo kpɔkeefeemɔ ko bɛ nitsumɔ nɛɛ mli.—Luka 24:46-48; 1 Korintobii 9:16; okɛto Mateo 25:24-27 he.
Hemɔkɛyeli Kwamɔ Bote Mli
18. Hemɔkɛyeli kwamɔ sa nɔkwɛlɔi agbɛhe lɛ he yɛ mɛɛ gbɛ nɔ?
18 Yɛ be mli ni asafo lɛ yaa ehiɛ kɛboteɔ afii ohai enyɔ kɛ etɛ lɛ mli lɛ, nibii bɔi tsakemɔ. Hemɔkɛyeli kwamɔ ni agba afɔ shi lɛ bahe shi. (Bɔfoi lɛ Asaji 20:29, 30; 2 Petro 2:1) Hii ni taoɔ hiɛnyam te shi kɛjɛ onukpai ni yɔɔ asafoi lɛ amli lɛ ateŋ. Akɛni amɛhiɛ jwɛŋmɔi ni fiteɔ nii hewɔ lɛ amɛje shishi amɛbu gbɛhe mli ni amɛyɔɔ ákɛ nɔkwɛlɔi lɛ ákɛ hewalɛ kɛ gbɛihemɔ gbɛhe ko. Asafoi lɛ ekomɛi amli nɔkwɛlɔi lɛ po batsɔmɔ “osɔfonukpai” ni miiye sɔlemɔi akuu ko nɔ. Yɛ be ni sa mli lɛ asafoŋbii lɛ halaa nɛkɛ osɔfonukpai nɛɛ ni akɛ amɛ woɔ gbɛhei ni amɛyɔɔ mli lɛ, ni amɛteŋ mɛi komɛi ji nɔyelɔi ni ale amɛ waa. No hewɔ lɛ, taakɛ Katolek yinɔsaneŋmalɔ ko ŋma lɛ, ákɛ: “Enɛ kɛ oshara kpeteŋkpele ba, titri lɛ kɛjɛ be mli ni osɔfonukpai lɛ agbɛhe kɛ gbɛihemɔ lɛ yaa hiɛ, ní shika kɛ heloo gbɛfaŋ nibii babaoo fataa nɛkɛ gbɛhei nɛɛ ahe . . . ni no ha awó maŋkwramɔŋ gbɔmɛi anɔ awo osɔfonukpai anitsumɔ ni ehe gbɛi fe fɛɛ lɛ amli lɛ hewɔ.”
19. Mɛni jɛ hemɔkɛyeli kwamɔ nɛɛ mli ba yɛ naagbee?
19 Hɛɛ, awó osɔfonukpa fɛɛ osɔfonukpa nɔ tamɔ maŋtsɛ ko ni yɔɔ hewalɛ waa. Ni nɔ ni jɛ mli ba ji akɛ enɛ kɛ mligbalamɔi kɛ béi ba Kristendom ni jeee anɔkwale Kristojamɔ dɔŋŋ kɛjɛ blema beebe lɛ mli. Teokrase gbɛjianɔtoo ni ji hii ni yɔɔ nyɛmɔ, onukpai kɛ nɔkwɛlɔi ni diɔ mumɔŋ nibii asɛɛ lɛ ba shi kwraa kɛbote osɔfoi anɔyeli kuu mli. Sɔɔmɔ ni ajɛɔ suɔmɔ mli akɛhaa asafo lɛ ni awooo he nyɔmɔ nɛɛ tsake kɛbote nitsumɔ ni awɔɔ mɛi anyɔmɔ mli ni biɔ afii babaoo ni akɛaakase nii yɛ osɔfoi anikasemɔ he, jeŋnilee kɛ sɔlemɔ lɛ mlai akasemɔ mli.
20. Mɛɛ saji abiɔ ni aha hetoo agbɛnɛ?
20 Ani enɛ tsɔɔ akɛ akuŋ sɛɛ atoŋ anɔkwale Kristojamɔ, kɛ eshishijee teokrase gbɛjianɔtoo kɛha asafo fɛɛ asafo lɛ amaŋ shi dɔŋŋ? Aloo ákɛ sɔɔmɔ kpakpa ni mli ka shi faŋŋ ni “onukpai” lɛ loo “nɔkwɛlɔi” lɛ kɛhaa lɛ elaaje kɛmiiya naanɔ? Ni Yesaia gbalɛ lɛ ni kɔɔ teokrase gbɛjianɔtoo lɛ ni abaawo nɔ lɛ he lɛ hu? Ekɛɔ akɛ: “Akɔɔbele najiaŋ lɛ mikɛ shika aaaba, ni dade najiaŋ lɛ mikɛ jwiɛtɛi aaaba, ni tsei anajiaŋ lɛ akɔɔbele, ni tɛi anajiaŋ lɛ dade; ni maŋɔ hejɔlɛ mafee onɔyelɔi, ni maŋɔ jalɛ mafee onukpai.” (Yesaia 60:17) Nikasemɔ ni nyiɛ sɛɛ nɛɛ baaha nɛkɛ sanebimɔi ni he hiaa nɛɛ ahetoo.a
[Shishigbɛ niŋmai]
a Ajie kɛjɛ September 1, 1983 Blɔfo Buu-Mɔɔ lɛ mli.
Ani Obaanyɛ Oha Hetoo?
□ Mɛɛ gbɔmɛi nɛkɛ ahalaa amɛ koni amɛkɛ Mose ana kojomɔ he gbɛnaa nii lɛ mli gbɛfaŋnɔ yɛ blema lsrael?
“Onukpai” lɛ sɔmɔ yɛ mɛɛ gbɛhe mli beni Israelbii lɛ yahi Shiwoo Shikpɔŋ lɛ nɔ lɛ?
□ Mɛni ji sui komɛi ni ekaaa ni akpaa gbɛ yɛ onukpai loo nɔkwɛlɔi ni ji Kristofoi lɛ ahe?
□ Hemɔkɛyeli kwamɔ ni agba he sane afɔ shi sa lɛ sa onukpai agbɛjianɔtoo lɛ he yɛ mɛɛ gbɛ nɔ?
[Mfoniri ni yɔɔ baafa 11]
Israel onukpai lɛ sɔmɔ akɛ kojolɔi yɛ maŋ Iɛ agboi anaa