‘Ŋaawoo ni Damɔ Suɔmɔ Nɔ’

AAFEE afi 60-61 Ŋ.B., ni tsulɔ ko ni jo foi shi Roma je kilomitai 1,400 [shitoi 900] gbɛfaa ko shishi kɛmiiba shia yɛ Kolose, Asia Bibioo lɛ wuoyi-anai maŋtiase ko mli. Ehiɛ shɛɛ sane ko ni akɛ nine ŋma kɛha enuŋtsɔ lɛ, ni mɔ ni ŋma lɛ jeee mɔ ko mɔ ko akɛ bɔfo Paulo. Ŋmɛnɛ, nakai wolo lɛ ji Biblia lɛ fa, ni ehiɛ mɔ ni nine shɛ nɔ lɛ gbɛi, Filemon.

Wolo ni aŋma ayaha Filemon lɛ ji nɔ ni akɛ hesaa babaoo tsu he nii yɛ ŋaa kɛ yiŋtsɔmɔ mli. Shi nɔ ni he hiaa fe fɛɛ lɛ, nikasemɔi ni anyɛɔ atsuɔ he nii babaoo yɛ mli kɛha Kristofoi ŋmɛnɛ, ni emli ekome ji sɛɛnamɔ ni yɔɔ Kristofoi asuɔmɔ ni adamɔɔ nɔ awoɔ mɔ ŋaa lɛ mli lɛ. Nyɛhaa wɔkwɛa wolo ni ekɛɛɛ shi hewalɛ babaoo yɔɔ mli nɛɛ mli jogbaŋŋ agbɛnɛ.

Foijelɔ ko Ku Esɛɛ

Filemon ji Kristofonyo, Kolose asafo lɛ mlinyo ko ni asumɔɔ lɛ waa. (Filemon 4, 5) Ejaakɛ eshia ji he ni asafo ni yɔɔ jɛmɛ lɛ kpeɔ yɛ! (Kuku 2) Agbɛnɛ, Filemon le bɔfo Paulo jogbaŋŋ; eeenyɛ eba akɛ bɔfo lɛ ye ebua lɛ ni ebatsɔ Kristofonyo. Eji anɔkwale akɛ Paulo tsɔɔ akɛ lɛ diɛŋtsɛ eshiɛɛɛ yɛ Kolose. (Kolosebii 2:⁠1) Shi eye afii enyɔ yɛ Efeso, ni eshiɛ babaoo aahu akɛ “mɛi fɛɛ ni yɔɔ Asia [ni Kolose fata he] lɛ . . . nu Nuŋtsɔ Yesu wiemɔ lɛ.” (Bɔfoi 19:10) Eka shi faŋŋ akɛ Filemon fata mɛi ni bo toi jogbaŋŋ lɛ ahe.

Fɛɛ sɛɛ lɛ, taakɛ hiɛnaanɔbii ni yɔɔ nakai be lɛ mli lɛ ji lɛ, Filemon yɛ tsulɔ loo nyɔŋ. Nyɔŋyeli jeee nɔ ni baa mɔ shi yɛ be fɛɛ mli yɛ blema bei lɛ amli. Yɛ Yudafoi lɛ ateŋ lɛ, hɔɔmɔ ni mɔ ko aaahɔɔ ehe kɛ eweku lɛ mlibii ewo nyɔŋyeli mli ni mɔ ko kɛwo ehe nyɔji lɛ ji nii ni akpɛlɛɔ nɔ. (3 Mose 25:​39, 40) The International Standard Bible Encyclopedia lɛ wie Roma be lɛ he akɛ: “Gbɔmɛi pii hɔɔ amɛhe amɛwo nyɔŋyeli mli yɛ yiŋtoi sɔrɔtoi ahewɔ, titri lɛ, koni ebote shihilɛ ni yɔɔ mlɛo kɛ shweshweeshwe mli, fe ni eeehi shi akɛ ohiafo, odehe, koni ena nitsumɔi krɛdɛɛ etsu, koni akɛ woo aha lɛ yɛ gbɔmɛi ateŋ. . . . Mɛi pii ni jeee Romabii hɔɔ amɛhe amɛha Roma maŋbii kɛ gbɛkpamɔ ni ja, ni Roma mla toɔ he gbɛjianɔ jogbaŋŋ, akɛ amɛbaatsɔmɔ Roma maŋbii kɛ aha amɛye amɛhe.”

Shi naagba ko te shi, beni Filemon tsuji lɛ ekome, nuu ko ni atsɛɔ lɛ Onesimo, shi lɛ, ni ejo foi kɛtee Roma, ekolɛ ni eju Filemon shika po koni ekɛwo ehe nyɔji yɛ gbɛfaa lɛ mli lɛ. (Kuku 18) Onesimo kɛ Paulo ni no mli lɛ eji gboklɛfonyo lɛ kpe yɛ Roma.

Tsulɔ loo wenuu ni “sá lɛ ehe bɛ sɛɛnamɔ” ko ni jo foi kɛjɛ sɔɔmɔ shishi lɛ ebatsɔ Kristofonyo agbɛnɛ. Ekɛ ehe ha Paulo akɛ ebaasɔmɔ lɛ, ni etsu nibii pii ni sɛɛnamɔ yɔɔ he eha bɔfo ni awo lɛ tsuŋ lɛ. Belɛ ebɛ naakpɛɛ mɔ akɛ Onesimo na gbɛhe ko yɛ Paulo “diɛŋtsɛ hedɔɔi amli,” ni ebatsɔ “suɔmɔ nyɛmi” kɛha Paulo!​—Kukuji 11, 12, 16.

Kulɛ Paulo baasumɔ ni Onesimo kɛ lɛ ahi shi, shi Filemon yɛ mla naa hegbɛ akɛ Onesimo nɔtsɛ. No hewɔ lɛ gbɛnaa nii ka Onesimɔ nɔ akɛ eku esɛɛ kɛya emla naa nuŋtsɔ lɛ sɔɔmɔ mli. Shi te Filemon baahere lɛ aha tɛŋŋ? Ani ekɛ mlifu baabi ni etsu hegbɛ ni eyɔɔ akɛ egbalaa etoi waa lɛ he nii? Ani ebaaje anɔkwale ni Onesimo kɛɔ akɛ eji naanyo Kristofonyo lɛ he ŋwane?

Saji ni Asaa yɛ Suɔmɔ Mli

Nɔ kɔ kanya Paulo koni eŋma wolo eyaha Filemon yɛ Onesimo he. Lɛ diɛŋtsɛ ekɛ enine ŋma wolo lɛ, ni ekɛtsɔɔɔ woloŋmalɔ ko nɔ taakɛ efɔɔ feemɔ lɛ. (Kuku 19) Taomɔ minitii fioo ko ni okɛkane wolo kuku ni aŋma ayaha Filemon lɛ fɛɛ. Obaana akɛ yɛ be mli ni ejie ehe kpo ni ekɛ “durɔmɔ kɛ hejɔlɛ” ŋamɔ emaje Filemon shiabii lɛ sɛɛ lɛ, Paulo jie Filemon yi yɛ ‘esuɔmɔ kɛ hemɔkɛyeli ni eyɔɔ yɛ Nuŋtsɔ Yesu mli lɛ kɛ bɔ ni ejieɔ enɛ kpo etsɔɔ krɔŋkrɔŋbii lɛ fɛɛ’ lɛ hewɔ.​—Kukuji 1-7.

Kulɛ Paulo baanyɛ ekɛ hegbɛ ni eyɔɔ akɛ bɔfo lɛ atsu nii ni ‘efa Filemon ni efee nɔ ni ja gbɛ,’ shi yɛ no najiaŋ moŋ lɛ, Paulo ‘tsɔ suɔmɔ nɔ moŋ ewo lɛ ŋaa.’ Ema anɔkwale ni eji akɛ Onesimo ebatsɔ nyɛmi nuu Kristofonyo diɛŋtsɛ, mɔ ni he eba sɛɛnamɔ diɛŋtsɛ kɛha Paulo lɛ nɔ mi. Bɔfo lɛ kpɛlɛ nɔ akɛ: “Kulɛ miisumɔ akɛ [Onesimo] kɛ mi ahi shi, koni esɔmɔ mi yɛ onajiaŋ yɛ sanekpakpa lɛ kpaai lɛ amli. Shi,” Paulo tee nɔ akɛ, “misumɔɔɔ akɛ maje osusumɔ sɛɛ mafee nɔ kɔ, bɔni afee ni ejurɔ ni obaafee lɛ akabafee akɛ fimɔ naa ni, shi moŋ tsuijurɔ naa.”​—Kukuji 8-14.

No hewɔ lɛ Paulo wo Filemon hewalɛ ni ehere etsutsu tsulɔ lɛ ekoŋŋ akɛ nyɛmi nuu. Paulo ŋma akɛ: “Heremɔ lɛ tamɔ mi diɛŋtsɛ.” Jeee akɛ bɔ fɛɛ bɔ ni ji lɛ abaaha Onesimo aye ehe kɛjɛ nyɔŋyeli shishi. Paulo ebɔɔɔ mɔdɛŋ akɛ eeetsake kwasafoŋ shihilɛ ni yɔɔ egbii lɛ amli lɛ. (Okɛto Efesobii 6:9; Kolosebii 4:1; 1 Timoteo 6:2 he.) Ni kɛlɛ, ŋwanejee ko bɛ he akɛ, Kristofoia ekomefeemɔ ni ka Onesimo kɛ Filemon teŋ agbɛnɛ lɛ baagbɔjɔ tsulɔ kɛ nuŋtsɔ wekukpaa lɛ mli fioo. Filemon baabu Onesimo akɛ “mɔ ni fe tsulɔ tete, mɔ ni ji suɔmɔ nyɛmi.”​—Kukuji 15-17.

Shi nyɔmɔ ni Onesimo hiɛ, ekolɛ yɛ juu hewɔ lɛ hu? Paulo kpa fai ekoŋŋ yɛ naanyobɔɔ ni ka ekɛ Filemon teŋ lɛ hewɔ, akɛ: “Shi kɛji eyeo sane fɔŋ ko aloo ehiɛo nyɔmɔ ko lɛ, no lɛ buu nakai akɔntaa lɛ oha mi.” Paulo jie hekɛnɔfɔɔ kpo akɛ Filemon baajie mumɔ ni kɛ sane keɔ kpo, ni eya kɛteke nibii ni Paulo biɔ lɛ po. Akɛni Paulo hiɛ ka nɔ akɛ etsɛŋ ni abaaŋmɛɛ ehe hewɔ lɛ, eto gbɛjianɔ po akɛ ebaaba ebato gbɔ yɛ Filemon shia yɛ wɔsɛɛ be mli. Yɛ be mli ni ekɛ ŋamɔi krokomɛi emaje, ni ebi “Nuŋtsɔ Yesu Kristo duromɔ” eha Filemon lɛ, Paulo kɛ ewolo lɛ ba naagbee.​—Kukuji 18-25.

Nikasemɔi Kɛha Kristofoi Ŋmɛnɛ

Nikasemɔi ni anyɛɔ atsuɔ he nii eyi Filemon wolo lɛ mli obɔ kɛha Kristofoi ni yɔɔ ŋmɛnɛ. Nɔ kome ji akɛ, ekaiɔ wɔ bɔ ni ehe hiaa ni wɔkɛ sane ake, kɛ naanyo heyelilɔ ko efee wɔ efɔŋ ni mli wa po. Yesu Kristo kɛɛ: “Kɛji nyɛkɛ gbɔmɛi atɔmɔi fa amɛ lɛ, nyɛ-Tsɛ ni yɔɔ ŋwɛi lɛ kɛaafa nyɛ hu.”​—Mateo 6:⁠14.

Filemɔn wolo lɛ he baaba sɛɛnamɔ titri aha mɛi ni yɔɔ gbɛhei amli yɛ Kristofoi asafo lɛ mli ŋmɛnɛ lɛ. Nɔ ni sa kadimɔ ji akɛ Paulo kɛ hegbɛ ni eyɔɔ akɛ bɔfo lɛ tsuuu nii koni ekɛfa Filemon ni efee nɔ ni sa. Kɛfata he lɛ, Paulo biii ni aŋmɛ Onesimo gbɛ ni ehi Roma ni esɔmɔ Paulo. Paulo kɛ bulɛ ha hegbɛi ni mɛi krokomɛi yɔɔ yɛ amɛnibii ahe lɛ. Eyoo hu akɛ, eyɛ mli akɛ ekolɛ keketee ni eeefee lɛ baaha atsu sane lɛ he nii moŋ, kɛlɛ ebaahi moŋ akɛ Filemon aaajɛ etsui mli afee nii. Edamɔ suɔmɔ nɔ ebi nii koni ekɛkanya tsuiŋ ni ajɛɔ afeɔ nii.

No hewɔ lɛ, esaaa akɛ Kristofoi onukpai ni yɔɔ ŋmɛnɛ lɛ “yeɔ asafoi lɛ anɔ nuŋtsɔmɛi asane,” kɛtsɔ amɛhewalɛ lɛ ni amɛkɛaatsu nii yɛ gbɛ fɔŋ nɔ aloo ni amɛaafee keketee yɛ bɔ ni amɛkɛ tooi lɛ yeɔ haa lɛ mli. (1 Petro 5:​1-3) Yesu kɛɛ: “Nyɛle akɛ maji lɛ anɔ lumɛi lɛ yeɔ amɛnɔ, ni amɛteŋ gbɔmɛi agboi lɛ yɛ hewalɛ yɛ amɛnɔ. Akafee nakai yɛ nyɛteŋ.” (Mateo 20:​25, 26) Nɔkwɛlɔi naa akɛ asafo lɛ mlibii boɔ suɔmɔ mli ni ajɛɔ akɛ sane fɔɔ amɛhiɛ lɛ toi babaoo fe famɔi. Mɛi ni ehao ni saji gbaa amɛnaa lɛ ahiɛ sɔɔ nɔkwɛlɔi ni kɛ mlihilɛ heɔ be amɛkɛboɔ amɛnaagbai atoi ni kɛ shishinumɔ woɔ amɛ ŋaa lɛ.

Paulo wolo lɛ kaiɔ onukpai hu yɛ sɛɛnamɔ ni yɔɔ yijiemɔ kɛ ŋaa he. Eje shishi kɛ nɔkpɛlɛmɔ akɛ atsɔ Filemon nɔ ‘ajie suɔmɔ kpo atsɔɔ krɔŋkrɔŋbii lɛ.’ (Kuku 7) Ŋwanejee ko bɛ he akɛ, nɛkɛ yijiemɔ loo kafomɔ diɛŋtsɛ nɛɛ saa Filemon jwɛŋmɔ. Nakai nɔŋŋ hu ŋmɛnɛ, abaanyɛ akɛ yijiemɔ loo kafomɔ diɛŋtsɛ afata he awula ŋaawoo loo wiemɔ-kɛ-tsɔɔmɔ. Ni esaaa akɛ ŋaawoo ni tamɔ nɛkɛ feɔ nɔ ni akɛhaa kpeŋkpeŋ ni ŋaalee bɛ mli, shi nɔ ni “ŋoo yɔɔ mli” diɛŋtsɛ ni eŋɔɔ toibolɔ lɛ toi naa.​—Kolosebii 4:⁠6.

Agbɛnɛ Paulo tsɔɔ hekɛnɔfɔɔ akɛ Filemon baafee nɔ ni ja, akɛ: “Akɛni mihiɛ ka nɔ akɛ ooobo mi toi hewɔ miŋmao nɛɛ, ejaakɛ mile akɛ ooofee fe bɔ ni mikɛɔ nɛɛ tete.” (Kuku 21) Onukpai, ani nyɛjieɔ nakai hekɛnɔfɔɔ lɛ nɔŋŋ kpo yɛ nyɛnanemɛi Kristofoi amli? Ani enɛ yeee ebuaaa amɛ ni amɛsumɔ akɛ amɛaafee nɔ ni ja?

Nɔ ni yɔɔ miishɛɛ hu ji akɛ, fɔlɔi naa yɛ bei babaoo mli akɛ, nɔ kpakpa jɛɔ hekɛnɔfɔɔ ni amɛaatsɔɔ akɛ amɛyɔɔ yɛ amɛbii amli lɛ mli baa. Kɛ amɛyɔse sɛɛnamɔ ni yɔɔ suɔmɔ mli ni ajɛɔ afeɔ toiboo​—bɔ ni amɛsumɔɔ akɛ amɛaafee nii kɛteke taomɔ nii komɛi ahe nitsumɔ lɛ​—fɔlɔi baanyɛ amɛkɛ bulɛ ko aha amɛbii lɛ. Kɛ aaahi lɛ, esa ákɛ akɛ fɔlɔi afamɔi loo nibimɔi aha yɛ mlihilɛ kɛ suɔmɔ gbee mli. Esa akɛ atsɔɔ bɔ ni anuɔ nii ahe ahaa mɔ, ni akɛ yiŋtoi ni yɔɔ sɛɛ aha. Esa akɛ fɔlɔi ajie amɛbii ayi waa loo amɛkafo amɛ kɛ́ yijiemɔ ni tamɔ nɛkɛ sa, ni akwa hiɛkamɔ keketee titri lɛ yɛ mɛi ateŋ.

Wumɛi baanyɛ ajie saneshishinumɔ kɛ mlihilɛ kpo yɛ nakai susumɔ lɛ nɔŋŋ naa, ni amɛfee klalo akɛ amɛaajie amɛŋamɛi ayi. Enɛ haa yoo heshibaa feɔ nɔ ni ŋɔɔ ni shɛjeɔ mɔ mii ni haa mɔ naa miishɛɛ!​—Abɛi 31:​28; Efesobii 5:⁠28.

Atsɔɔɔ bɔ ni Filemon here Paulo wolo lɛ nɔ eha diɛŋtsɛ. Shi wɔnyɛŋ wɔsusu akɛ bɔ ni Paulo yɔɔ hekɛnɔfɔɔ babaoo yɛ emli lɛ tamɔɔɔ nakai kwraa. Eba akɛ Kristofoi onukpai, fɔlɔi, kɛ wumɛi ni yɔɔ ŋmɛnɛ lɛ aaaye omanye nakai nɔŋŋ yɛ amɛnifeemɔi amli, jeee kɛmiitsɔ yisɛɛtsirɛmɔ, kɛ nɔnyɛɛ yɛ ekaa naa nɔ, shi moŋ kɛtsɔ ‘ŋaawoo ni damɔ suɔmɔ nɔ’ lɛ nɔ.

[Mfoniri ni yɔɔ baafa 23]

Ni Paulo aaadamɔ hegbɛ ní eyɔɔ akɛ bɔfo lɛ nɔ efa lɛ, edamɔ Kristofoi asuɔmɔ moŋ nɔ ewo Filemon ŋaa