Sila Ekãawoo Jɛɛhe

KƐJƐ mra be mli yɛ Kristofoi ayinɔsane mli lɛ, anɔkwa nɔkwɛlɔi gbɛfalɔi anitsumɔ lɛ ji nɔ ni he hiaa kɛha Nyɔŋmɔ webii asafoi lɛ ahewalɛwoo kɛ sanekpakpa lɛ gbɛɛ-kɛ-shwamɔ kɛyashi shikpɔŋ lɛ naagbeehei lɛ. Mɛi ni fata tsutsu nɔkwɛlɔi ni ahala lɛ ahe ji Sila, ni ji gbalɔ kɛ Yerusalem asafo lɛ mli onukpai lɛ ateŋ mɔ kome lɛ. Etsu gbɛfaŋnɔ ko ni he hiaa yɛ shiɛmɔ nitsumɔ lɛ nɔyaa mli lɛ he nii ni efata klɛŋklɛŋ maŋsɛɛ sanekpakpa shiɛlɔi ni shiɛ yɛ Europa shikpɔŋkuku lɛ mli lɛ ahe. Mɛni titri ha Sila he basa jogbaŋŋ ni etsu enɛɛmɛi fɛɛ? Ni mɛɛ sui komɛi ni kɔɔ esubaŋ he ji nɔ ni wɔɔfee jogbaŋŋ akɛ wɔɔkase?

Ketiafoo Sane Lɛ

Beni sanebimɔ ko ni kɔɔ ketiafoo he ni baanyɛ átee mligbalamɔ shi lɛ te shi yɛ afi 49 Ŋ.B lɛ, ehe bahia ni nɔyeli kuu ni yɔɔ Yerusalem lɛ kɛ gbɛtsɔɔmɔ ni yɔɔ faŋŋ aha Kristofoi lɛ koni akɛsaa sane lɛ. Yɛ shihilɛi nɛɛ amli lɛ, Sila ni atsɛɔ lɛ hu akɛ Silvano lɛ je kpo yɛ Biblia mli saji ni aŋmala ashwie shi lɛ mli. Ekolɛ eji mɛi ni feɔ yiŋkpɛɛ lɛ ateŋ mɔ ko ni no mli lɛ ahala lɛ akɛ “bɔfoi lɛ kɛ onukpai lɛ” atsulɔ koni ejaje amɛyiŋkpɛɛ lɛ etsɔɔ “nyɛmimɛi ni jɛ . . . Antiokia kɛ Siria kɛ Kilikia.” Yɛ Antiokia lɛ, Sila kɛ Yuda (Barsaba), ni Barnaba kɛ Paulo fata he lɛ kɛ shɛɛ sane ni amɛhiɛ lɛ ha, ni eka shi faŋŋ akɛ, amɛkɛ amɛnaabu gba nibii ni tee nɔ yɛ Yerusalem kpee lɛ shishi lɛ he sane, bɔ ni amu saji anaa kɛ nɔ ni yɔɔ wolo lɛ mli lɛ amɛtsɔɔ. Amɛhu “amɛkɛ wiemɔ babaoo shɛje nyɛmimɛi lɛ amii ni amɛwo amɛ hewalɛ.” Miishɛɛ sane ni jɛ mli ba ji akɛ, Kristofoi ni yɔɔ Antiokia lɛ ‘amii shɛ amɛhe.’—Bɔfoi lɛ Asaji 15:1-32.

No hewɔ lɛ, Sila tsu gbɛfaŋnɔ ko ni he hiaa jogbaŋŋ yɛ nɛkɛ shishijee sane nɛɛ saamɔ mli. Shi enitsumɔ lɛ jeee nɔ ni yɔɔ mlɛo. Gbɛ ko bɛ ni akɛaale bɔ ni asafo ni yɔɔ Antiokia lɛ baafee enii yɛ yiŋkpɛɛ ni afee lɛ he aha. No hewɔ lɛ, saji ahe wielɔ ko wie akɛ: “Mɔ ko ni yɔɔ nilee kɛ ŋaalee babaoo he bahia koni etsɔɔ nɔ ni bɔfoi lɛ eŋmala yɛ amɛwolo lɛ mli lɛ shishi.” Sila ni ahala lɛ kɛha nitsumɔ ni he hiaa nɛɛ kɛɔ wɔ nɔ ko yɛ nɔ̃ gbɔmɔ ni eji lɛ he. Abaanyɛ akɛ he afɔ̃ enɔ akɛ mɔ ni baanyɛ ekɛ nɔyeli kuu lɛ gbɛtsɔɔmɔi aha yɛ anɔkwayeli mli. Ekolɛ eji nɔkwɛlɔ hu ni yɔɔ nilee ni baanyɛ ekɛ béi saamɔ ni náa mɔ nɔ hewalɛ atsu nii kɛji akɛ, akɛ naataamɔ wo asafo lɛ he gbeyei.

Ekɛ Paulo Fã Gbɛ

Kɛji akɛ Sila ku esɛɛ etee Yerusalem yɛ nakai nitsumɔ lɛ sɛɛ aloo eyaaa jio lɛ, no lɛ abɛ nɔmimaa yɛ he. Bɔ fɛɛ bɔ ni eji lɛ, beni béi bakã Barnaba kɛ Paulo teŋ yɛ Yohane Marko he sɛɛ lɛ, Paulo hala Sila ni yɔɔ Antiokia yɛ nakai be lɛ mli kɛha gbɛfaa hee ko ni akpɛ yiŋ kɛjɛ shishijee mli akɛ abaaku sɛɛ koni ayasara maji ni Paulo yashiɛ yɛ yɛ eklɛŋklɛŋ maŋsɛɛ sanekpakpa gbɛfaa lɛ mli lɛ.—Bɔfoi lɛ Asaji 15:36-41.

Ekolɛ jwɛŋmɔ kpakpa ni Sila hiɛ kɛha Jeŋmaji ateŋ shiɛmɔ lɛ kɛ hegbɛ ni eyɔɔ akɛ gbalɔ kɛ naawielɔ kɛha nɔyeli kuu ni baanyɛ aye abua koni akɛjaje amɛyiŋkpɛi lɛ atsɔɔ heyelilɔi ni yɔɔ Siria kɛ Kilikia lɛ ná ehalamɔ lɛ nɔ hewalɛ. Nɔ ni jɛ mli ba lɛ hi jogbaŋŋ. Bɔfoi lɛ Asaji lɛ gba akɛ: “Shi beni amɛkpaa maji lɛ anɔ lɛ, amɛkɛ mlai ni bɔfoi lɛ kɛ onukpai lɛ ni yɔɔ Yerusalem lɛ wo lɛ ha amɛ, koni amɛye nɔ. Agbɛnɛ asafoi lɛ ná hewalɛ yɛ hemɔkɛyeli mli, ni amɛyi faa daa nɛɛ.”—Bɔfoi lɛ Asaji 16:4, 5.

Yɛ be mli ni maŋsɛɛ sanekpakpa shiɛlɔi lɛ fãa gbɛ lɛ, mumɔ krɔŋkrɔŋ lɛ ha amɛje amɛnitsumɔ lɛ nɔ kɛtee he kroko shii enyɔ. (Bɔfoi lɛ Asaji 16:6, 7) Akɛ Timoteo fata kuu lɛ he yɛ gbɛ lɛ nɔ yɛ Listra, yɛ be mli ni ‘agba gbalɛi’ ni atsĩii tã yɛ ehe lɛ sɛɛ. (1 Timoteo 1:18; 4:14) Kɛtsɔ ninaa ni akɛha Paulo, mɔ hu ni yɔɔ gbalɛ nikeenii lɛ nɔ lɛ, afã nanemɛi gbɛfalɔi lɛ koni amɛwó lɛlɛ kɛya Makedonia yɛ Europa.—Bɔfoi lɛ Asaji 16:9, 10.

Ayi Lɛ ni Awo Lɛ Tsuŋ

Yɛ Filipi, ni ji “shikpɔŋ lɛ nɔ maŋ wulu” lɛ mli lɛ, Sila tsɔ shihilɛ ko ni mli wa ni hiɛ kpaŋ nɔ kɔkɔɔkɔ mli. Beni Paulo efã klamɔ mumɔ ko yɛ tsulɔ yoo ko mli sɛɛ, ní enuntsɔmɛi lɛ na akɛ amɛninamɔ jɛɛhe lɛ sɛɛ efo lɛ, amɛgbala Sila kɛ Paulo kɛtee maŋ lɛ kojolɔi lɛ ahiɛ. Nɔ ni jɛ mli ba ji akɛ, mɛi enyɔ nɛɛ yaje heguɔgbee shishi ni ji akɛ, akɛ amɛ tsɔɔ yɛ maŋ akɛ efɔŋfeelɔi, ni agbala amɛnɔhaa atadei lɛ amli ni ayi amɛ kpãi yɛ jara lɛ nɔ.—Bɔfoi lɛ Asaji 16:12, 16-22.

Jeee akɛ nakai yii lɛ ji toigbalamɔ ni waa mɔ he, ni miitsi adesa tsuishiŋmɛɛ kɛmiiya he ni ehĩii nɔ ko feemɔ dɔŋŋ lɛ he kɛkɛ, shi yɛ Paulo kɛ Sila sane lɛ mli lɛ, toigbalamɔ lɛ damɔɔɔ mla nɔ. Mɛni hewɔ? Roma mlai tsɔɔ akɛ esaaa akɛ ayiɔ Romanyo ko. Paulo ji Roma maŋ lɛ mlinyo ni eka shi faŋŋ akɛ nakai Sila hu ji. Beni ‘ayi amɛ kpãi pii’ sɛɛ lɛ, awo Paulo kɛ Sila tsuŋ ni abɔ amɛnaji apã. Gustav Stählin tsɔɔ mli akɛ, apã nɛɛ ji “dade ko ni ehiii kwraa ni abaanyɛ agbɛ gboklɛfonyo lɛ naji amli yɛ mli bɔ ni asumɔɔ koni akɛtsĩ ewɔɔ naa.” Ni kɛlɛ, ŋwanejee ko bɛ he akɛ, nyɔɔŋteŋ beni amɛsɛɛ eyi obɔ kɛ faji ni waa mɔ he lɛ, “Paulo kɛ Sila miisɔle ni amɛmiila amɛmiijie Nyɔŋmɔ yi.”—Bɔfoi lɛ Asaji 16:23-25.

Enɛ kɛɔ wɔ nɔ kroko hu yɛ Sila subaŋ he. Ená miishɛɛ akɛ amɛmiina amanehulu yɛ Kristo gbɛi lɛ hewɔ. (Mateo 5:11, 12; 24:9) Eka shi faŋŋ akɛ, no ji mumɔ kome too ni yɛ Antiokia shiɛmɔ ni tsɔ hiɛ lɛ mli lɛ, eha Sila kɛ ehefatalɔi lɛ nyɛ amɛkɛ ekãawoo kɛ hewalɛwoo ni mɔɔ shi ha asafo lɛ, ni eha nanemɛi Kristofoi lɛ ná miishɛɛ. Ekolɛ miishɛɛ ni Paulo kɛ Sila yɔɔ lɛ bada beni atsɔ naakpɛɛ gbɛ nɔ ajie amɛ kɛjɛ tsuŋwoohe lɛ kɛtsɔ shikpɔŋhosomɔ nɔ ni amɛnyɛ amɛye amɛbua gboklɛfonyo ni taoɔ ehe agbe lɛ kɛ eweku lɛ koni amɛjie Nyɔŋmɔ mli hemɔkɛyeli kpo.—Bɔfoi lɛ Asaji 16:26-34.

Yii loo tsuŋwoo lɛ eko kwraa wooo Paulo kɛ Sila he gbeyei. Beni akɛ wiemɔ tsu koni ajie amɛ lɛ, amɛkpoo akɛ amɛkɛ hiɛgbele baashi Filipi nigii taakɛ kojolɔi lɛ kpa gbɛ lɛ. Amɛŋmɛɛɛ saji ahe shi moŋ amɛtsɔ sane lɛ amɛfɔ̃ nakai onukpai henɔwolɔi ni kɛ hewalɛ ni husu bɛ he tsu nii lɛ anɔ. Paulo bi akɛ: “Wɔ ni Romabii ji wɔ ní abuko wɔ fɔ lɛ, amɛyi wɔ yɛ jara nɔ, ni amɛwo wɔ tsuŋ hu: ni kpaako amɛshwieɔ wɔ nigii lo? Dabida, shi moŋ ha amɛ diɛŋtsɛ amɛba ni amɛbajie wɔ.” Akɛni amɛshe nɔ ni baajɛ mli aba lɛ he gbeyei hewɔ lɛ, kojolɔi lɛ na akɛ esa akɛ amɛkpa mɛi enyɔ lɛ fai koni amɛshi maŋ lɛ mli.—Bɔfoi lɛ Asaji 16:35-39.

No hewɔ lɛ, beni amɛma hegbɛi ni amɛyɔɔ akɛ Romabii lɛ anɔ mi sɛɛ lɛ, Paulo kɛ Sila kpɛlɛ kojolɔi lɛ anibimɔ lɛ nɔ—ni amɛyashɛ amɛnanemɛi lɛ. Yɛ nɔ ni amrɔ nɛɛ ekadiɔ shiɛmɔ gbɛfaa muu lɛ fɛɛ kɛ gbeekpamɔ naa lɛ, Sila kɛ ehefatalɔ lɛ ‘shɛje’ nyɛmimɛi lɛ ‘amii’ shikome ekoŋŋ ni amɛyiŋ amɛtee.—Bɔfoi lɛ Asaji 16:40.

Kɛjɛ Makedonia Kɛtee Babilon

Ákɛ nɔ ni kulɛ ebaanyɛ efee niiashikpamɔ gbonyo lɛ ejeee amɛnijiaŋ wui hewɔ lɛ, Paulo, Sila kɛ amɛhefatalɔi lɛ tsa nɔ kɛtee maŋsɛɛ shikpɔji heei anɔ. Amɛkɛ naagbai krokomɛi kpe yɛ Tesalonika. Omanye ni Paulo ye yɛ eshiɛmɔ nitsumɔ lɛ mli yɛ Hejɔɔmɔ Gbii etɛ lɛ nɔ hewɔ lɛ, shitee-kɛ-wolɔi awuŋayelɔi kanya gbɔmɛi akuu ni feɔ basabasa, ni ebafee nɔ ni nilee yɔɔ mli akɛ maŋsɛɛ sanekpakpa shiɛlɔi lɛ ashi maŋ lɛ mli nyɔɔŋteŋ. Amɛtee Beroia. Beni shitee-kɛ-wolɔi lɛ ná amɛle nibii ni Paulo kɛ ehefatalɔi lɛ etsu yɛ nakai maŋ lɛ mli lɛ, amɛjɛ Tesalonika tɔɔ amɛba. Paulo pɛ shi, ni Sila kɛ Timoteo hi shi yɛ Beroia koni amɛkwɛ mɛi heei ni yɔɔ wiemɔ lɛ he miishɛɛ lɛ akuu lɛ nɔ. (Bɔfoi lɛ Asaji 17:1-15) Sila kɛ Timoteo yafata Paulo he ekoŋŋ yɛ Korinto, ni amɛkɛ sanekpakpa kɛ ekolɛ nikeenii ni jɛ anɔkwa nanemɛi ni yɔɔ Makedonia lɛ ŋɔɔ lɛ baha lɛ. Ekolɛ enɛ ha bɔfo ni ehia lɛ lɛ akpa heloonaa nitsumɔ ni etsuɔ yɛ be kukuoo ko mli lɛ, ni ekɛ ehe wo be-fɛɛ shiɛmɔ nitsumɔ lɛ mli ekoŋŋ kɛ ekãa. (Bɔfoi lɛ Asaji 18:1-5; 2 Korintobii 11:9) Yɛ Korinto lɛ, atsɛ Sila kɛ Timoteo hu akɛ sanekpakpa jajelɔi kɛ Paulo nanemɛi hefatalɔi. No hewɔ lɛ, eyɛ faŋŋ akɛ amɛnitsumɔi lɛ baaa shi yɛ nakai maŋ lɛ hu mli.—2 Korintobii 1:19.

Najiaŋ gbɛi ni akɛtsu nii akɛ “wɔ” yɛ woji ni aŋma kɛyaha Tesalonikabii lɛ mli fɛɛ lɛ—enyɔ lɛ fɛɛ ni aŋma yɛ Korinto lɛ yɛ nɛkɛ be nɛɛ mli lɛ—ji nɔ ni asusuɔ akɛ etsɔɔ akɛ Sila kɛ Timoteo ye ebua ni akɛŋma. Shi kɛlɛ, susumɔ ni ahiɛ akɛ Sila kɛ ehe wo woloŋmaa nitsumɔ lɛ mli lɛ damɔ nɔ ni Petro kɛɛ yɛ lɛ diɛŋtsɛ ewoji lɛ ateŋ ekome he lɛ nɔ titri. Petro kɛɛ akɛ, eŋma eklɛŋklɛŋ wolo lɛ ‘kɛtsɔ Silvano, wɔnyɛmi anɔkwafo lɛ nɔ.’ (1 Petro 5:12) Yɛ be mli ni enɛ baanyɛ atsɔɔ kɛkɛ akɛ Silvano ji mɔ ni hiɛ wolo lɛ kɛba lɛ, srɔtofeemɔ ni tsɔɔ bɔ ni aŋmala woji lɛ aha ni yɔɔ Petro woji enyɔ lɛ mli lɛ baanyɛ atsɔɔ akɛ ekɛ Sila tsu nii akɛ niŋmalɔ kɛŋma klɛŋklɛŋ wolo lɛ shi jeee nɔ ni ji enyɔ lɛ. No hewɔ lɛ, ekolɛ Sila nyɛmɔi kɛ teokrase hegbɛi babaoo lɛ ateŋ ekroko ji woloŋmaa.

Nɔkwɛmɔnɔ ni Esa akɛ Akase

Kɛ́ wɔdamɔ sɛɛ ni wɔsusu nibii ni wɔle akɛ Sila fee lɛ he jogbaŋŋ lɛ, esaji ni eŋmala eshwie shi lɛ náa mɔ nɔ hewalɛ. Eji nɔkwɛmɔnɔ ko ni hi jogbaŋŋ kɛha ŋmɛnɛŋmɛnɛ beaŋ maŋsɛɛ sanekpakpa shiɛlɔi kɛ nɔkwɛlɔi gbɛfalɔi. Ekɛ hekwamɔ tee hei ni yɔɔ shɔŋŋ yɛ lɛ diɛŋtsɛ enyɔmɔbɔɔ babaoo mli, jeee kɛha heloonaa sɛɛnamɔ loo hiɛnyam, shi koni ekɛye ebua mɛi krokomɛi. Oti ni ma ehiɛ ji koni ekɛ ŋaawoo ni nilee kɛ ŋaa yɔɔ mli, wiemɔi ni asaa he jogbaŋŋ yɛ mli ni miishɛɛ yɔɔ mli kɛ agbɛnɛ ekãa ni eyɔɔ yɛ shiɛmɔ nitsumɔ lɛ mli lɛ awo amɛ hewalɛ. Bɔ fɛɛ bɔ ni onitsumɔ yɛ Yehowa webii ni ato amɛhe gbɛjianɔ lɛ ateŋ ji ha lɛ, kɛ obɔ mɔdɛŋ nakai nɔŋŋ koni oná jwɛŋmɔ kpakpa—yɛ amanehulu mli po lɛ—bo hu obaafee ekãawoo jɛɛhe kɛha onanemɛi heyelilɔi lɛ.

[Shikpɔŋ he mfoniri ni yɔɔ baafa 29]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Paulo Maŋsɛɛ Sanekpakpa Gbɛfaa ni Ji Enyɔ

Ŋshɔ Kpeteŋkpele Lɛ

Antiokia

Derbe

Listra

Ikoniom

Troia

Filipi

Amfipoli

Tesalonika

Beroia

Ateene

Korinto

Efeso

Yerusalem

Kaisarea

[He ni Sane lɛ Jɛ]

Mountain High Maps® Copyright © 1997 Digital Wisdom, Inc.